ǂGUI ǃgâsan hîna ge ǃkharu gere kurigu ǃnâ ǁîn di ǃhūga a ǁnāxū în sîsen ôan ge, ǃnaexun ge ǃhūga ǃoa ge oa. ǁNā ǀnammi khoen tsî Jehovaban ūbahâb xa ǂkhâǃnâhe, hâsen ge ǁîna aoǁnâ-aon di ǂhâsib hâ ǃāde ǃoa ge doe. (Mat. 22:37-39) Tae-i di mîǁguigan ge dī tsî Jehovaba ǁîna mati ge ǀkhae? Hāre î da Kamerooni, Afrikab ǃhūb ǃnâ kō.

Onésime di ǀon hâ ǃgâsab ge 1998ǁî kuri ǃnaeǃnâheb ge ǃhūb Kameroona xu 14 kurina ge doe hâ-i. ǀGui tsēb ge ǀhaos aib hâ hîna ǂkhō-e ge ǁnâu, aoǁnâ sîsenni xa. ǃHoa-aob ge ge mî: “ǀGam ǀhōsakha ga ǁauna ǃkharagagu ǃkhaidi ǃnâ a ǃkhō o, tsîb ga ǀgui ǀhōsaba ǂgui ǁauna naub xa a ǃkhō o, nau ǀhōb hîna go ǀorona go ro ǃkhōba, ǂgui ǁauna go ro ǃkhō ǀhōsaba ǃoab nî doe?”

Nē ǂkhōs ge Onésimeba ge hui, îb Kameroona ǃoa oa. ǁNapan ge ǂgui khoena Elobmîsa gere ǁkhāǁkhāsen ǂgao. Xaweb ge gere ǂâiǂhansen Kamerooni ǃnâ hâsa. ǁKhapa ǁnaedi îb nî nētikō ǂgui kurinab ge doe hâ-is khaoǃgâ? ǃNani ǁkhâgab ge Kamerooni ǃnâ ge sari, îb kō ǁnaedib nîsa. Tsîb ge 2012ǁî kuri hoaraga hâb nîse ge doe-oa sī.

Onésimeb ge ra mî: “Kaise i ge ge ǀamsa i. Tsî da ge ǃgari bangkwerogu ai ǀgui gere ǂnû. Xawe ta ge ǃgâi xūn ai ge kō tsoatsoa tsî ta ge ǃauga ra ī xūn ai ǂâisa ǂnûi tama i tsî ǃgâise gere ǃgâ,” tib ge ǀomrase ra mî.

2013ǁÎ kurib ge Onésimeba, Géraldinesa ge ǃgamme. ǁÎs ge khoese kurina Fransi ǃnâ gere hâ tsî Kameroona ǃoa ge doe-oasī. Jehovaba ǁîra mati ge ǀkhae, ǁîra ge ǂhâǂhâsa xūna ǁîra di ûib ǃnâ ǂgurose mâi amaga? Onésimeb ge ra mî: “ǂGurom ge Gaosib aoǁnâ-aon skola ǃoa ge ī, tsî ǁnāpaxū bethelsa ǃoa. ǃKharu gere kurib ǃnâ i ge 20 khoen Elobmîsa ra ǁkhāǁkhāsena sida ǀhaohâb ǃnâ ge ǁāǁnâhe. Nēsisa ta ge ra tsâ ǂhanu ǃkhais ai ta ‘ǁauna ra ǃkhō’ ǃkhaisa.” (Mrk. 1:17, 18) Géraldines ge ra mî: “ǂÂi ta ge hâ-is xa ta ge ǂgui ǀkhaega ge hōǃâ.”

Judiths ge Amerikaba ǃoa ge doe xawes ge ǁîsa ǃnāsase Jehovaba gere ǃoaba ǂgao. ǁÎs ge ra mî: “Ti omaris khoena ta ge Kamerooni ǃnâ sī gere sari, ǃnās hoasa ta ge oa ta gere o gere ā. ǂGui khoen hîna ta ge Elobmîsa gere ǁkhāǁkhāsen-ūna ta gere ǁnāxū amaga.” Xawes ge Judithsa Kameroona ǃoa ge oa ǂgao tama hâ-i. ǁÎs ge ǃgâise ra mataresi sîsen-e ge ūhâ-i. Tsîs ge dadasab di dokteri tsîna ǁnāpaxū ge matare ǁkhā i. Xawes ge Judithsa Jehovab ǃnâ ǂgomǃgâsiba ge ūhâ-i tsî Kameroona ǃoa ge doe-oa. ǁÎs ge ra mî ǀnî ǁaegas ge ǃgâi ûib hînas ge Amerikab ǃnâ ūhâ-iba ra ǁkhore di. Jehovaba  ǃoa ǀgore tsîs ge gere ǂgan îs ǁnaeti. ǁÎs ge ǃnarimâra mûǂam-aob tsî ǁîb taras tsîn xa ge ǂkhâǃnâhe.

Judiths ge ra ǂâi oa xūn ge oa ǀkhīs gere ǁaeb ai Kamerooni ǃnâ gere mûsen ǀgausa. Tsîs ge ra mî: “ǃNona kurin ǃnâ ta ge ǂkhîba ge hōǃâ tsî haka khoena ge hui în ǁāǁnâhe.” Judiths ge ǀō-aisa aimâba-aose ge sîsen tsoatsoa. Nētsēs ge ǁîs aob Sam-Casteli ǀkha ǃnarimâra sîsenni ǃnâ hâ. Xawe Judiths di dab ǀkha tae-e ge ī? ǁÎs tsî ǁîs omaris tsîn ge dadasaba, hospitale gere ôaba ǀkhara ǃhūb ǃnâ, dadasab di ǃôasa nî ǂkhâǃnâ-e. ǃÔas ge ǃgâise ge ǃgûǁnā.

Victor di ǀon hâ ǃgâsab ge Canadaba ǃoa ge doe. The Watchtower ǂkhanib ǃnâb ge ǀgapi ǁkhāǁkhāsens xa a khomais, khaoǃgâb ge ǁîb di ǁkhāǁkhāsens xa gere ǂâi. ǁÎb ge universiteitsa ǁnāxū tsî ǃnubu kersero-e ge dī. “Nēs ge ge hui te î ta ǃkhaese sîsen-e hō. Tsî gaxuse ta gere dī ǂgao xū-e dī tsoatsoa, ǁnās ge aimâba-aose aoǁnâsa,” dib ge ra mî. Egab ge Victora, Carolinesa ge ǃgamme, tsî ra ge Kameroona ge sari. ǁNapa ra ǁnâub berosa sari hâ hîna i ge ǀnî ǃgâsana gere ǂkhâǃnâ ra, î ra Kameroona ǃoa doesī. “ǂKhām nî ǃaroma-em ge ge ūhâ tama hâ-i. Sim di ûibam ge ǀnai ge ǀguiǃgubu kai hâ-i. Tsîm ge ǁnā ǁkhauǂuisa ge ūǃoa,” tib ge Victora ra mî. Carolines ge ǀnî ǀaeb mâsiroga ūhâ-i xawe ra ge ge mîǁgui doe ra nî ǃkhaisa.

Victori tsî Carolines tsîn ge ge âimâba-ao kai, î ra ǁnān hîna Elobmîsa ra ǁkhāǁkhāsen ǂgaona hui. Tsoatsoas ǃnâ ra ge ǂâusa mari-e ge sâu hâ-i tsî ra ge sîsen-e ôasa ge ǂhâ tama hâ-i. ǁÎra ge Canadab ǃnâ ǀoro ǁkhâna ge sîsen tsî ǁnāpaxū Kameroona ǃoa ge oasī îra aoǁnâ ǃkharu. Mâ ǀkhaena ra ge hō? ǁÎra ge Gaosib aoǁnâ-aon skola ǃoa ī, ǀō-aisa aimâba-ao kai tsî ra ge nēsi oms sîsen-e ra dī. “ǁNaetim hâ xūna ǁnāxū mâis, ge ge huimi im Jehovab di ǂkhâǃnâsa hōǃgâ,” tib ge Victora ra mî.

2002ǁÎ kurib ge Alaini hîna ge Germanib di universiteits ai hâ-iba, Youths—What Will You Do With Your Life? ti hâ ǂkhaniba ge khomai. ǁNapab ge khomai xūn ge ge huibi îb ǀasa mîǁguiga dī. 2006ǁÎ kurib ge Ministerial Training skola ǃoa ge ī tsîb ge ǃnaexub ge ǃhūb, Kameroona ǃoa ge sîhe.

Kamerooni ǃnâb ge halwe tsēsa ra dīhe sîsen-e ge hō. Egab ge ǀkhara sîsenni ǃgâise ra matarebi-e sī ge hō. Xaweb ge gere ǂâiǂhansen nē sîsenni, ǁîb aoǁnâ sîsenni ǃnâ ra hâ ǁaeba nî ǀoroǀoro di. Tsîb ge ǀō-aisa aimâba-aos di ǁkhauǂuisab ge māhe o, nēsa ge ūǃoa. ǁÎb ǀhonkhoeb ge īb nîsa ǂgao tama i tsî ǁîb di paisa ge khui. Xaweb ge ǁîb mîmâis ai ge mâ. Alaini ge ega Stéphaniesa ge ǃgamme. ǁÎs ge ǂgui kurina France ǃhūb ǃnâ gere hâ. Mâ ǃgomsinas gere hōǃgâ Kameroona ǃoas ge doe o?

Stéphanies ge ra mî: “ǂKhari ǀaeb mâsirogu tsî alerxieb tsîna ta ge ge ūhâ-i. Xawe ta ge Jehovab di huib ǀkha sōǀôana gere hō tsî nēs ǀkha ǃgâise gere tsâ.” Nē khoe-aogura ge ǁîra gere mâǀgai ǃkhais ǃaroma ge ǀkhae-e. Alaini ge ra mî: “ǀGuri hâ faramros, Katé ti ǀon hâs tawam ge sī gere aoǁnâ o, om ge ǂgui khoena ge ǀhao-ū Elobmîsa gere ǁkhāǁkhāsen ǂgaona. Tsîm ge ega ǁîna Telefoni ǃnâ-ū gere ǁkhāǁkhā. Nepaxu i ge ǀgam khoega ge ǁāǁnâhe tsî i ge ǂkhari groeprosa ge tsoatsoahe.” Stéphanies ge ǀaro tsî ra mî:  “Kaisets ge kai ǂkhîba ra hōǃgâ khoen ga ǁîn ûiga Jehovaba ǃoa māǁnâsen o. ǂHâsib hâba aoǁnâs ǃnâ-ūm ge sima kai ǂkhîba ǂgui ǃnāde ge hōǃâ.” Nētsē ra ge Alaini tsî Stéphanies tsîra ǃnarimâra mûǂam-ao sîsen-e ra dī.

Gisèle di ǀon hâ ǃgâsas ge dokteran di skolas Italib ǃnâ ra ǂgâ hîna ge ǁāǁnâhe. ǁÎsa ge Elobmîsa gere ǁkhāǁkhā aimâba khoe-aogu ra ge ūhâ-i, ǀguiǃgupu ûib xas ge ǁîsa ge ǃgâibahe i. Tsîs ge ǁîs tsîna aoǁnâ sîsenni ǃnâ ǃnāsase gere dī ǂgao. Tsîs ge Gisèlesa skoli ais hâ hîna ge aimâba-ao kai.

Gisèles ge Kameroona ǃoa gere oa ǂgao, is Jehovaba ǁnapa ǀoasase sī ǃoaba. Xawes ge gere ǂâiǂhansen. Mîs ge ra: “Kameroona ǃoa oaǀkhīs ge ra ǂâibasen ti ǂkhanina ǂoaǃnâ tsî ta ge ti ǀhōsan tsî omaris ǁanin hîna Italib ǃnâ hâna nî ǂoaǃnâ. Nēs ge gere ǂâiǂhansen kai te.” Ti i ge ī i xawes ge ǁîsa 2016ǁî kuri, Meib ǃnâ Kameroona ǃoa ge doe-oa sī. ǁAero-e ǃkharu tsîs ge Léonce di ǀon hâ ǃgâsaba ge ǃgamme. Tsî ra ge Kamerooni ǃnâ ǁnâub beros xa ge ǁgaumâihe îra Ayos di ǀon hâ ǃāsa ǃoa doe, ǂhâsib aoǁnâ-aon dib hâba.

Ûiba Ayos ǃnâ mati ge ī i? Gisèles ge ra mî: “ǃNāsa ǁaeba i ge krag-e wekhena gere ǀkhai. Tsî da ge sida di selfonga ge charge ǁoa i. ǃNāsa ǁaebam ge sîsen tama ge hâ-i. ǀAes ai sâisam ge ge ǁkhāǁkhāsen. Tsîm ge ǃuia, kriwas ǀkha tōts ǃnâb ai ǁgam-e sī gere ôa. Tsaus ain ge khoena ǀoro i ǁaeb ai.” Tae-e Gisèles tsî ǁîs aob tsîna ge hui îra mâǁapo? Gisèles ge ra mî: “Jehovab di ǃanu gagab, hui ǀnamxa aob, tsî omaris di khoen tsî ǀhōsan hîna ge sima ǂkhâǃnâ tsî mari-e gere sīban ge ge huimi.”

Gisèlesa ǂkhî-e ǃnaexus ge ǃhūba ǃoas ge oasī o? “Îo, hoaragase,” tis ge ra mî. “ǃGomsiron hînam ge tsoatsoas ǃnâ gere hōǃân ge gere ǂkhabuǂâi kai mi. Xawem ge nēsa ǃkharuǃnâ om ge ge hōǃâ, dī ǂgaom ra xū-em ge dī ǃkhaisa. Jehovab ǃnâm ge ǂgomǃgâsiba ūhâ tsîm ge Jehovaba ge ǀgū.” Léonci tsî Gisèles tsîn ge Gaosib aoǁnâ-aon skola ǃoa ge ī. Tsî ra ge nēsi ǁaeroba ǀō-aisa aimâba-aose ǁgaumâisa.

ǁAuǃkhō-aogu hîna ǁkhoaǂgaose ǃgom ǁaegu ǃnâ ǂgui ǁauna ra ǃkhōgu khami i ge, ǁnān hîna ge māsenxase ǃnae ǃnân ge hūba ǃoa a oana, ǂgui ǀkharaǀkharana ge dī. În ǁnān hîna ǃgâi ǂgaoga ūhâ tsî ǃgâihôasa ra ǁnâu ǂgaona hui. Jehovab ge nē ǃgarise ra sîsen aoǁnâ-aona nî mādawa-am. ǁÎb di ǀons ǃgaon ra dī ǃgâi xūn ǃaroma. (Neh. 5:19; Heb. 6:10) ǃHaoǃhūb ǃnâ du ga hâ o tsî i ga sadu ge ǃnae ǃnâ ǃhūb ǃnâ ǂhâsib aoǁnâ-aon diba ga ra hâ o, oasī i du nî? Ti i nî īs ga ra io, o i ge kai ǀkhaeba ǃâu du hâ.—ǂKhm. 10:22.