1. 2 Korinteǁîn 3:1-3 sa mati ra hui da î da mû ǀō-aisa aiǂhanuba da ūhâsa khoena Elobmîsa ǁkhāǁkhā tsî ǁāǁnâs kōse huisa? (Tsoatsoas ai hâ ai-īsiba mû re.)

MATI du ra tsâ sadu ra Elobmîsa ǁkhāǁkhā khoe-i ga sadu ǀhaohâba xu ǁāǁnâhe o? Nēs ge sado ra ǂkhî kai. (Mat. 28:19) Nē go ǀasase ǁāǁnâhe khoe-i ǀkha du ga ǁkhāǁkhāsen hâ o, o du ge kaise ra ǃgâiaǂgao, ǁî-i go ǁāǁnâhe ǃkhais ǃgao. (1Tes. 2:19, 20) ǀAsase ǁāǁnâhe hâ khoe-i ge ǀasa ‘ǂkhani-i’ ase ī. ǁÎ-i ǀkha goro Elobmîsa ǁkhāǁkhāsen khoe-i ǀgui-i ǃoas ose xawe hoa ǀhaohâba ǃoa.—Khomai re 2 Korinteǁîn 3:1-3.

2. (a) Mâ ǂhâǂhâsa dîsa da nî ǃhoaǃgao tsî tae-i ǃaroma? (b) Elobmîs ǁkhāǁkhāsa a tae? (ǀGamiros.)

² ǃKharu go haka kurigu ǃnâ i ge 10 miliun khoena Elobmîsa goro ǁkhāǁkhāhe *, ǃhūbaib ǂhawase. ǁNā haka kurigu ǃnân ge 280 000 khoena kurib hoaba gere ǁāǁnâhe. Tsî gere Jehovab di ǀHûǀguitimî-aon tsî Jesub di ǁkhāǁkhāsabe kai. Mati da, nē ǂgui khoen, ǁkhāǁkhā da rana ǁāǁnâs kōse a hui ǁkhā? Jehovab ge a ǃnūǃnâxa tsî khoena aiǂhanuba ra mā, în Jesub di ǁkhāǁkhāsabe kai. ǁNā-amaga da ge ǁîna ra hui, în ǃhaese ǁāǁnâs kōse sī. ǁAeb ra mâ toa amaga.—1 Kor. 7:29; 1 Pet. 4:7.

3. Tae-e da nē ǁkhāǁkhāǃâs ǃnâ nî ǃhoaǃgao, khoe-e Elobmîsa ǁkhāǁkhās xa?

 ³ ǂGaeǂguira soros ge ǁnâub berode ge ǂgan îdi Elobmîsa ra ǁkhāǁkhāhe khoen di aiǃgûs ǀkha hui, ǁāǁnâs kōse. Nē ǁkhāǁkhāǃâs tsî sao ras ǃnâ da ge nî mû, mati da aimâba-aon, sîsaben tsî ǃnarimâra mûǂam-aogu aiǁgaude xu a ǁkhāǁkhāsen ǁkhāsa. * (ǂKhm. 11:14; 15:22) ǁÎn ge Elobmîsa ra ǁkhāǁkhān tsî ǁkhāǁkhāhe ran tsîna ra hui, în ǁîn ǁkhāǁkhāde ǃgâiǃgâi. Nē ǁkhāǁkhāǃâs ǃnâ da ge koro xūna nî ǃhoaǃgao, hîna i mâ khoe-i hoa-e nî dī-e, î-i ǁāǁnâhe.

4. Tae-e da a ǁkhāǁkhāsen ǁkhā, dao-ams ai ra dīhe Elobmîs ǁkhāǁkhāde xu?

⁴ Sida ǃgâsan ge khoen dao-amdi tawa, Elobmîs ǁkhāǁkhāde ra tsoatsoa. Nēb ge ǃgâi ǀgau khoe-e Elobmîsa ǁkhāǁkhāsa. Nē ǁkhāǁkhās ge a ǃnuburo tsî mâ wekheb hoaba a dīhe ǁoa. ǃNāsase ǁgams ǃaroman ge ǃgâsana ǀnî ǁaegu ai khoe-i di ǃgôasa ǂgan tsî khoe-e ra ǁkhami tamas ka io sms-e ra xoaba. Tsî Elobmîsa xu hâ xoa-e khoe-i ǀkha ra ǀgoragu. Nē ǁgamǀhaodi ge ǁkhâga a ū ǁkhā, khoe-i Elobmîs ǁkhāǁkhās ǃnâ ǃgâiǃgâibasensa nî ūhâs aiǃâ. Elobmîsa du ra ǁkhāǁkhā khoe-e * mâǁnāsen tsî ǁāǁnâ kaisen î nî, nē ǀgaub ai ǀgui i ga a ǁkhāǁkhāsen o? Hî-i.

5. Jesuba tae-e Lukab 14:27-33 ǃnâ ge mî, î da Elobmîsa da ra ǁkhāǁkhā khoena hui?

⁵ Jesub ge ǂkhō-e ra sîsen-ūse ge mîǃā, tae-e i khoe-e nî dīsa ǁîb ǁkhāǁkhāsabe kai ǂgao i ga ra o. ǁÎb ge khoe-i ǂgō-om-e ra om ǂgao i tsî gaob hîna toroba ǃoa ra îb xa gere ǃhoa. Jesub ge ge mî om aob ge “aibe ǂnû, tsî ǁnās ǃoa ǂhâbab hâna nî ǃgôa” ǂgō-omma om toas ǃgao tsîb ge gaob tsîna “aibe ǂnû, tsî” ra ǀapeǀape nē torobab nî dansa. (Khomai re Lukab 14:27-33 sa.) ǁNās ǁkhās aseb ge Jesuba ge ǂan i, khoe-i ga ǁîb di ǁkhāǁkhāsabe kai ǂgao o, o i ge nî ôaǃnâ ǁîba sao-ais taena ǃkhōǂgā hâsa. ǁNā-amaga da ge Elobmîsa da ra ǁkhāǁkhā khoena nî ǂkhâǃnâ, în mâ wekheb hoaba ǁkhāǁkhāsen. Matin nēsa a dī ǁkhā?

6. Tae-e da a dī ǁkhā, î da Elobmîsa da ra ǁkhāǁkhā khoe-e aiǃgû kai?

⁶ Daos tawa ra dīhe Elobmîs ǁkhāǁkhāde gaixuse dī tsoatsoa re. ǀNîsi du  ge ǀgam xoaro ra khoe-i ǀkha a ǀgoragu ǁkhā. Oms khoe-i ga gaixu saridi xa ǃgâibahe o, ǁî-e dî re, ǃkhai-e ôa tsî du ǁgamǀhaos ǀkha aiǃgû ǁoasa. Oms khoe-i ra ǃeream ǀgaub ge nî ǁgau matikōse i, nē ǁkhāǁkhādi xa a ǂhâǂhâsabahesa. Tsî ǁî-i ga aiǃgûsa du ga ǂhâba o, o du ge ǁî-e a dî ǁkhā, ǀgam ǃnāra i wekheb ǃnâ ǁkhāǁkhāsen ǂgao tama hâsa. ǀGui tamas ka ra io ǀgam ǃnāra ǁkhāǁkhāsens ge hui tide.

7. Mati i Elobmîsa ra ǁkhāǁkhā khoe-e mâ ǁkhāǁkhās hoas ǃgao nî aiǂhomisen?

⁷ Elobmîsa ra ǁkhāǁkhā khoe-i asa du ge mâ Elobmîs ǁkhāǁkhās hoas aiǃâ nî aiǂhomisen. ǃHoaǃgao du nî xūna khomaiǃgâ re tsî xoadi tsîna. Mâǂoa ra ǂâide ǁhûi re. ǁKhāǁkhāǃâs di xoaǂams xa ǂâi re tsî ǃnaga māsa xoaǂamdi tsî dîdi tsîn xa. ‘Khomaihe’ nî xoadi, ai-īsigu tsî nē ǁkhāǁkhāǃâsa nî ǁguiǃā vidiogu tsîna sîsen-ū re. Elobmîsa du ra ǁkhāǁkhā khoe-e ǂâis ǃnâ ūhâse, ǂâi re, mati i nē ǃgāsasiba nî supuse ǁnâuǃā tsî ǁî-i ûib ǃnâ sîsen-ūsa.—Neh. 8:8; ǂKhm. 15:28.

8. Apostel Paulub di mîdi Koloseǁîn 1:9, 10 ǃnâ hâde tae-e ra ǁkhāǁkhā da, î da sida ra ǁkhāǁkhā khoe-e ǀgoreba?

⁸ Aiǂhomisen du ga ra o, Jehovaba ǃoa ǀgore re. Tsî Elobmîsa du ra ǁkhāǁkhā khoe-i tsî ǁî-i di ǂhâsigu tsîna ǀgoreba re. Jehovaba ǂgan re, îb hui du î du Elobmîsa xu ǁkhāǁkhā, khoe-i di ǂgaoba nî tsâǀkhā ǀgaub ǃnâ. (Khomai re Koloseǁîn 1:9, 10.) Dîsen re, sadu Elobmîsa ra ǁkhāǁkhā khoe-i ǁnâuǃā tama tsî ra dîsen xūna. ǂÂis ǃnâ du ūhâ re, sadu ge nē khoe-e nî hui î-i ǁāǁnâhe.

9. Elobmîsa ra ǁkhāǁkhā khoe-e mati ǁî-i ra ǁkhāǁkhā khoe-e nî hui î-i aiǂhomisen? ǁGuiǃā re.

⁹ ǂGomǃgâ da ge ra khoe-e da ga Elobmîsa hoaǁae a ǁkhāǁkhā o, o i Jehovab tsî Jesub tsîn ge ǁî-e dība-e nî ǃgôaǃgâsa. Tsî ǁnās ǀkha ǃnāsase nî ǁkhāǁkhāsen ǂgaosa. (Mat. 5:3, 6) ǁKhāǁkhāsa xu ǃgâiba hōs ǃgao, i ge ǁkhāǁkhāhe ra khoe-e ǃgaoǃgâxase nî ǃgâ. Nēsa dīs ǃaroma ǁî-e hui re, î-i mâ ǁkhāǁkhās hoas ǃgao aiǂhomisen. Tsî ǁkhāǁkhāsen an go xūna ǂâiǃgâ tsî ǁîn ûib ǃnâ sîsen-ū. Mati du ǁî-e nî hui î-i aiǂhomisen? ǁKhāǁkhā du ra khoe-i ǀkha ǀguiba aiǂhomisen tsî  ǁî-e ǁgau re, matis nēsa ra dīhesa. * ǁÎ-e ǁgau re, mati i dîdi ǃereamde nî hōsa. Tsî ǀoro mîde ǂgaeǃgaos mati ǁî-e nî huisa î-i ǃereamde ǃkhōmâi. ǁÎ-e mîba re, î-i ǃeream-e ǁî-i mîdi ǃnâ mā. Nēsa i ga dī o, o du ge a ǂan ǁkhāǁkhāsen i go xū-e i ra ǁnâuǃāsa. Sadu Elobmîsa ra ǁkhāǁkhā khoe-e du nî ǂkhâǃnâ xū-i ge noxoba hâ.

10. Tae-i ǃaroma i Elobmîsa tsēs hoasa khomaisa a ǂhâǂhâsa tsî Elobmîsa ra ǁkhāǁkhāsen khoe-e tae-e nî dī, i-i nēsa xu ǃgâiba hō?

¹⁰ Mâ wekheb hoaba i ga ǁî-e ra ǁkhāǁkhā khoe-i ǀkha ǁkhāǁkhāsen, xawe i ge Elobmîsa ra ǁkhāǁkhāhe khoe-e ǁî-i di aib ai i ga ǁkhāǁkhāsen o, nēsa xu ǃgâiba nî hō. Jehovab ǀkha i ge nî ǃhoa. Mati? Kaise i ge a ǂhâǂhâsa ǁîna ǃgâ tsî Jehovab ǀkha ǃhoasa. ǁÎ-i ge Jehovaba a ǃgâ ǁkhā Elobmîsa tsēs hoasa khomais ǃnâ-ū. (Jos. 1:8; Psa. 1:1-3) ǁGau i re mati i ‘Elobmîs khomai ǃâdi ǀapeǁguiba’ jw.orgs ai nî sîsen-ūsa. * Nē Elobmîs khomai ǃâsa xu i ǁî-e nî ǃgâiba hōsa du ga ǂhâba o, ǁî-e ǂkhâǃnâ re, i-i Elobmîs Jehovab xa ra ǁkhāǁkhā xūn xa ǂâiǃgâ. Tsî nē xūnan mati ǁîn ûib ǃnâ nî sîsen-ūsa.—ǃNǃkh. 17:11; Jak. 1:25.

11. Mati i Elobmîsa ra ǁkhāǁkhāsen khoe-e nî ǁkhāǁkhāsen i-i ǃamkuse ǀgore, tsî tae-i ǃaroma i a ǂhâǂhâsa i-i ǁî-e hoaǁae Jehovab ǃoa ǀgore?

¹¹ Elobmîsa sadu ǀkha ra ǁkhāǁkhāsen khoe-e ǂkhâǃnâ re i-i Jehovab ǀkha tsēs hoasa ǃhoa. ǂGaoba xu ǀgore re, Elobmîs ǁkhāǁkhās tsoatsoas tsî ǀams ai. Sadu Elobmîsa ra ǁkhāǁkhā khoe-i ǀkha ǀgore re tsî ǁî-i tsîna ǀgoreba re. Sadu di ǀgorede i ga ra ǃgâ o i ge nî ǁkhāǁkhāsen, mati i ǂgaoba xu Jehovab ǃoa, Jesub Xristub ǀons ǃnâ nî ǀgoresa. (Mat. 6:9; Jhn. 15:16) ǂÂi re mati i Elobmîsa tsēs hoasa khomais (Jehovaba ǃgâs) tsî ǀgores (Jehovab ǀkha ǃhoas) sadu ǀkha Elobmîsa ra ǁkhāǁkhāsen khoe-e Elob ǀkha nî ǀgū-ǀgūsa. (Jak. 4:8) Nēsa i ga tsēs hoasa dī o, i ge ǁî-e nî hui i-i māǁnâsen tsî ǁāǁnâ kaisen. Tae-i tsîna ǁî-e nî hui?

12. Elobmîsa ra ǁkhāǁkhā khoe-e mati Elobmîsa ra ǁkhāǁkhāsen khoe-e nî hui i-i ǃgâi ǀhōsagusisa Jehovab ǀkha ūhâ?

¹² Elobmîsa ra ǁkhāǁkhāsen khoe-i ge Elobmîs ǁkhāǁkhās ǃnâ hâ xūna tā ǁî-i  ǂâis ǃnâ ǀgui nî ūhâ xawe ǁî-i ǂgaob ǃnâs tsîna. Tae-i ǃaroma? Sida ǀkha Elobmîsa ra ǁkhāǁkhāsen khoe-i Jehovaba nî ǂansa da ge ra ǂhâba. Xawe i ge ǁkhāǁkhāsen i ra xūna ǁî-i ǂgaoba nî tsâǀkhā. I-i nēsa ûiǂui. Jesub ge ǃamku ǀgaub ǃnâ ǁkhāǁkhāb gere xūna gere ǁguiǃā. Tsîn ge khoena ǁîba xu ǁkhāǁkhāsens xa ge ǃgâibahe i. Tsîn ge ǂgui khoena ǁîba ge sao-ai, ǁîb ge ǁîn di ǂgaoga gere tsâǀkhā amaga. (Luk. 24:15, 27, 32) Sadu ǀkha Elobmîsa ra ǁkhāǁkhāsen, khoe-i ge Jehovaba ama khoeb ase nî mû tsî i ge nî mûǂan Jehovab a ǁî-i di ǁGû, Elo tsî ǀHōsa kai ǁkhāsa. (Psa. 25:4, 5) Elobmîsa du ra ǁkhāǁkhā-ū khoe-e hui re, i-i sida di Elob di īsa ǀgauga mû. (Eks. 34:5, 6; 1Pet. 5:6, 7) Mâ ǃhoaǃâs hoas ǃnâ Jehovab ǀgauga ǃhoaǃgao re. Sadu ǀkha Elobmîsa ra ǁkhāǁkhāsen khoe-e hui re i-i Jehovab di īsa ǀgauga ǂan. ǁÎb di ǀnammi, ǃgâisib tsî ǀkhomxaǂgaosib. Jesub ge ge mî ‘ǂguro tsî hoan xa kai mîmās’ ge “ǃKhūb sa Elobats ge nî ǀnam.” (Mat. 22:37, 38) Sadu ǀkha Elobmîsa ra ǁkhāǁkhāsen khoe-e hui re i-i Jehovaba ǀnam.

13. Aiǁgau-e Khāǁkhā du ra khoe-e ma re mati i Jehovab di īsa ǀgaugu xa nî ǁkhāǁkhāsensa.

¹³ Elobmîsa du ra ǁkhāǁkhā khoe-i ǀkha du ga ǁgam o, ǁî-e mîba re tae-i ǃaroma du Jehovaba a ǀnamsa. Nēs ge ǁkhāǁkhāsen ra khoe-e nî hui, i-i Jehovab di ǀhō kai tsî ǁîba ǀnam. (Psa. 73:28) Aiǁguase i ga ǁgarab tamas ka io xoasa ga ra hâ o, Jehovab di ǀnammi, gā-aisib, ǂhanu-aisib tsî ǀgaib tsîn xa ra ǃhoasa, hîna sadu ǂgaoba ra tsâǀkhāsa. ǁÎ-e mîba re nēn ge ǂgui ǃaromadi ǀguis, tae-i ǃaroma du Jehovaba a ǀnamsa. Xū-i ge hâ mâ khoe-i hoa i hîna Elobmîsa ra ǁkhāǁkhāsen i nî dī-e i-i ǁāǁnâ-e.

14. Hebreǁîn 10:24, 25 sa tae-e ra mîba da ǀhaodi xa sida ǀkha ra ǁkhāǁkhāsen khoena nî hui-e, în aiǃgû?

¹⁴ Hoada ge ǂhâba hâ i-i sida ǀkha ra Elobmîsa ǁkhāǁkhāsen khoe-i hoa-e ǁāǁnâhe. ǀGui ǂhâǂhâsa ǀgaub hîna da ǁîna a hui ǁkhāb ge ǁîna ǂkhâǃnâsa în ǀhaode ǃoa ī. Elobmîsa ra ǁkhāǁkhāhe khoen hîna ǀhaode ǃoa ra īn ge ǃhaese ra aiǃgû, din ge ǂansa ūhâ Elobmîs ǁkhāǁkhā-aona ra mî. (Psa. 111:1) ǀNî ǁkhāǁkhā-aon ge ǁîn ǀkha ra ǁkhāǁkhāsen khoena ra mîba Elobmîs ǁkhāǁkhāsa xun ǀnî xūn ǀguina nî hōsa.  Xawen ǂgui xūn hînan nî ǁkhāǁkhāsenan na ǀhaodi tawa nî hōsa. Hebreǁîn 10:24, 25 sa khomai re sadu ra ǁkhāǁkhā khoe-i ǀkha. Tsî ǁî-e mîǃāba re tae-i ǃaroma i a ǃgâisa, i-i ǀhaode ǃoa ī. ǁÎ-e ǀhuruba re tae-e Gaosib ǀhû-omi tawa ra ī? di hâ vidioba. * Sadu ǀkha ra ǁkhāǁkhāsen khoe-e hui re i-i ǂhâǂhâsasib ǀhaodi diba mû.

15. Tae-e da nî dī i da Elobmîsa ra ǁkhāǁkhāsen khoe-e ǂkhâǃnâ, i-i hoaǁae ǀhaode hâǃnâ?

¹⁵ Tae-e du a dī ǁkhā sadu ǀkha ra ǁkhāǁkhāsen khoe-i ga ǀhaode ǃoa noxoba ga ī tama io? Ôasase ǁî-i ǀkha ǃhoa re tae-e du go ǀhaos ai a ǁkhāǁkhāsensa. ǁÎ-i ga sadu mati nē ǀhaodi xa ra tsâsa a mû o, o i ge ǁî-i tsîna nē ǀhaode ǃoa nî ī ǂgao. ǁÎ-e ǃKhē xu ǂgō-ommi, tamas ka io Xristeǁî ûib tsî aoǁnâ sîsenni di sîsen ǂkhaniba mā re, hîna ǀhaodi tawa ra dīheba. ǁÎ-e ǁgau re saora ǀhaos ai i tae-e nî ǃhoaǃgaohesa. Tsî ǁî-e dî re mâ ǃâb xa i ra mâǂoabahesa. ǁÎ-i di ǂguro ǀhaos ai i nî hōǃâ xūn ge nau kerkhe gu ain ra mû tsî ǁnâu xūn xa nî mâǂoa. (1Kor. 14:24, 25) ǁÎ-i ge ǃgâi aiǁgaude ūhâ khoena nî ǀhao-ū ǁgae ǁkhān ana. Tsî nî hui nî na în ǁāǁnâhe.

16. Tae-e a ǂhâbasa Elobmîs ǁkhāǁkhādi ǃnâ hîna ǁāǁnâs kōse nî sī na, tsî tae-e da sao ra ǁkhāǁkhāǃâs ǃnâ nî ǁkhāǁkhāsen?

¹⁶ Mati da Elobmîs ǁkhāǁkhāde a dī ǁkhā, ǁāǁnâs kōse ra sī de? ǁÎ-e da ge nî hui i-i mû mati kōse i nē ǁkhāǁkhāde a ǂhâǂhâsa ǃkhaisa. ǁÎ-e da ge nî ǂkhâǃnâ i-i mâ wekheb hoaba ǁkhāǁkhāsen. Tsî mâ ǁkhāǁkhāǃâs hoas ǃaroma aiǂhomisen. ǁÎ-e da ge ra ǂkhâǃnâ ǂgao i i tsēs hoasa Jehovab ǀkha ǃhoa. Tsî ǀgū ǀhōsagusisa ǁîb ǀkha omkhâi. ǁÎ-e da ge ra ǂkhâǃnâ ǂgao i-i ǀhaode hâǃnâ. (“ Elobmîsa ra ǁkhāǁkhāsen khoena tae-e nî dī în ǁāǁnâhe?” di hâ boksisa mû re.) Saora ǁkhāǁkhāǃâs ge nî ǁguiǃā koro xūn hînan Elobmîsa ra ǁkhāǁkhā khoena nî dīna, în ǁîn ǀkha ra ǁkhāǁkhāsen khoena hui, în ǁāǁnâhe.