1-2. 1 Timoteub 6:20 ǃoagub ge Timoteuba tae-e dī kaihe?

ǀNÎ ǁAEGA da ge sida di ama-ai xūna nau khoen di ǃomdi ǃnâ ra ǁnāxū. Aiǁgause da ge mari-e banks ǃnâ ra sâu. Nēsa da ga ra dī os sida di marisa kā tamas ka io ǃnarihe tidesa da ge ra ǃâubasen. ǁNā-amaga da ge ra ǁnâuǃgā nau khoena xūna mā tsî kōǃgâbahes mati ra tsâsa.

² Khomai re 1 Timoteub 6:20 sa. Apostel Paulub ge Timoteuba ge hōhōǃnâ ǀō-aisa xū-eb māhe hâsa. Nēs ge Elob ǂâibasens khoen ǀkhab ūhâsa ǂansa. Timoteub ge “mîsa aoǁnâs” tsî “ǃgâiǂhôa-aob di sîsenna” dīs di aiǂhanub tsîna Jehovab xa ge māhe. (2Tim. 4:2, 5) Paulub ge Timoteuba ge mîba îb māheb ge xūna kōǃgâ. Timoteub khami da ge sida tsîna nētsē ama-ai xūna māhe hâ. Taena ǁnāna? Tsî tae-i ǃaroma da Jehovab ge māda ǀō-aisa xūna nî kōǃgâ?

3-4. Tae-i ǃaroma i Elobmîs ǃnâ hâ amaba a ǀō-aisa?

³ Jehovab ge amab ǂansa ge māda tsî nē ǂans ge Elobmîs ǃnâ a hō-e ǁkhā. Nē amab ge a ǀō-aisa sidab ǃgâi ǀhōsagusisa Jehovab ǀkha ūhâsa ra ǁkhāǁkhā ǃkhais ǃaroma. Tsî-i ge ra mîǃā tae-i ama ǂkhîba ûib ǃnâ ra hausa. Nē amaba da ga ūǃoa tsî ûiǂui o da ge ǂhumi ǂomdi tsî ǁgauoǃnâ ûiga xu ra sâuhe.—1Kor. 6:9-11.

⁴ Nau ǃaromas hînas Elobmîsa a ǀō-aisas ge Jehovab ge ǃgamǃgamsen hâ khoen hîna “ǃkhōǂuibasenhe” hâna Elobmîs amaba ra mā. (ǃNǃkh. 13:48) ǃGamǃgamsen hâ khoen ge ǂgomǂgomsa tsî gā-ai ǃgāb Elobmîs xa ra  ǁkhāǁkhā nî xūna ra ūǃoa. (Mat. 11:25; 24:45) Nē amaba da ge sida aib ai ǀgui ǁkhāǁkhāsen hō tide. Tsî nēs ge hoa xūn ǂam-ai a ǀō-aisa.—ǂKhm. 3:13, 15.

5. Tae-i ǀkhas tsînab ge Jehovab ǂgomǃgâ da?

⁵ Jehovab ge ǁîb tsî ǁîb nî dī xūn xa hâ amab xa nau khoena mîbas di aiǂhanub tsîna ge māda. (Mat. 24:14) Nē haisi-ams ge kaise a ǀō-aisa Jehovab di omaris ǁani kai tsîs khoena ǀamo ûiba hōs ǀkha ra hui amaga. (1Tim. 4:16) Nēsi da ga ǃnāsa tamas ka io ǀoro ǁaeba aoǁnâ sîsen-i ǃnâ ga ra dī, xawe da ge nē ǂhâǂhâsa sîsen-i hîna nēsi ra dīhe-e ra ǂkhâǃnâ. (1Tim. 2:3, 4) Kai aiǂhanub ge Jehovab ǀkha ǀguiba sîsensa.—1Kor. 3:9.

6. ǂKhaikarise ge hâ tama hâ i khoen ǀkha tae-e ge ī?

⁶ Timoteub di ǁaeb ǃnâ ge ûi hâ-i Xristeǁîn ge Elob ǀkha sîsens di aiǂhanuba ge ǃgôaǃgâ tama hâ-i. Demab ge nē ǃhūbaib di xūnab ge ǀnam hâ-i amaga Paulub ǀkha sîsens di aiǂhanuba ge xūmâi. (2Tim. 4:10) Filetub tsî Himeneub tsîkha ge ge aoǁnâ ǀû, ǁîkha ge Paulub ra ǃgôaǃgonhe khama kha nî ǃgôaǃgonhesa gere ǃao amaga. (2Tim. 1:15) Himeneub, Aleksanderi tsî Filetub tsîgu ge amaba xu ǁnāǁnôa tsî Jehovaba ge ǃoaba ǀû. (1Tim. 1:19, 20; 2Tim. 2:16-18) Nē khoen hoan ge Jehovaba ge ǀnam i, xawe ega Jehovab ge mā nî ama-ai xūna ǀō-aisase ge mû ǀû.

7. ǁGâuaba mâ ǃnuide ra sîsen-ū îda ǁîb ǂhâba hâ xūna dī?

⁷ ǁGâuaba taena ra sîsen-ū i da Jehovab ge ǂgomǃgâda tsî a māda xūna ǁāxū? ǁÎb ge saora ǃnuide ra sîsen-ū. TVs tsî ǂkhanin tsînab ge ra sîsen-ū îb sida di ǂâiǀgaub tsî tanisen ǀgaub tsîna dawa, îda ǂaub ǀkha Jehovaba ǃgâ ǀû tsî ǀnam ǀû. ǁÎb ge nau khoen ra mî xūn tamas ka io ǃgôaǃgonhes ǀkha ra ǃaoǃaoda î da aoǁnâ ǀû. ǁÎb ge ra ǂhâba î da “ǂkhabase gā-aisise ra ǂgaihe ǂans” hîna ǁāǁnôa hâsa ǃgâ tsî amaba ǁāxū.—1Tim. 6:20, 21.

8. Tae-e da Daniel di ǀon hâ ǃgâsaba xu ra ǁkhāǁkhāsen?

⁸ ǂAnbasen tama da ga io, o da ge amaba nî ǂoaǃnâ. Danieli * hîna ge vidio gamede ǀhurusa ǀnam îb ti aiǁgausa du kō re. ǁÎb ge ra mî: “Disi kurixa ta a hîna ta ge vidio gamede ge ǀhuru tsoatsoa. Aibe ta ge ǁnatikōse ǀurixa gamede ge ǀhuru tama hâ i. Xawe ta ge  ǁaeb ra ī khama ǃkham ǃnâ-e tsî ǃgaidība ūhâ gamede ge ǀhuru tsoatsoa.” ǁÎb ge 15 irga nē vidio gamede tsēs hoasa gere ǀhuru. “Amaba ta ga mî o ta ge ge ǂan i nē gamedi hîna da gere ǀhuru di ge ǃnāsa ǁaeb tiba gere ū tsî Jehovaba xū gere ǂgaebē te ǃkhaisa. Xaweb ge ti ǂgaoba ǁnātikōse ge ǃgari i tsî ta ge Elobmîs tsoatsoadi tida ǀkha dīxū-e ūhâ tama hâ ti gere tsâ,” tib ge Daniela ra mî. ǂAnbasen tama da ga io, o i ge sâǁaeb ǃnâ da ra dī xūna amaba a ǂoaǃnâ kai da ǁkhā. Nēs ga ra ī o da ge Jehovab māda hâ ama-ai xūna nî ǂoaǃnâ.

9. 1 Timoteub 1:18, 19 ǃnâb Pauluba, Timoteuba ham-i ǀkha ra ǀgōpeǀnō?

⁹ Khomai re 1 Timoteub 1:18, 19 sa. Paulub ge Timoteuba soldab ǀkha ǀgōpeǀnō tsî ge mîba îb ‘ǃgâi ǃkhamsa ǃkham.’ Nēs ge ama ǃkham tamasa xawe gagasi ǃkhamsa. Mâ ǀgaub ǃnân Xristeǁîna torob ǃnâ ra ǃkham soldagu khama nî ī? Mâ ǀgauga da ǂhâ hâ i da Xristub di solda kai? Hā re i da koro xūn hîna da Paulub di ǂkhōsa xu ra ǁkhāǁkhāsena ǃhoaǃgao. Nē da ra ǁkhāǁkhāsen xūn ge nî huida îda amaba ǃkhōǀgara.

10. Eloǃaoǃgâxasiba a tae tsî tae-i ǃaroma da nē ǀgauba ǂhâ hâ?

¹⁰ Eloǃaoǃgâxasiba omkhâi re. ǃGâi soldab ge a ǂgomǂgomsa. ǀNam i a xūn tsî khoen tsînab ge ǁîba ra ǃkhamba. Paulub ge Timoteuba ge ǂkhâǃnâ îb ǁnāti i eloǃaoǃgâxasiba ūhâ. ǁNās ge Elob ǃoa-ai ǂgomǂgomsase hâsa. (1Tim. 4:7) Jehovaba da ūba hâ ǀnammi ra kai khama da ge amaba nî ǃkhōǀgara ǂgao.—1Tim. 4:8-10; 6:6.

11. Tae-i ǃaroma da aitsama ǃkhō-oasensa ǂhâ hâ?

¹¹ Aitsama ǃkhō-oasensa ǁkhāǁkhāsen re. Soldab ge hoaǁae ǃgarise nî sîsen îb ǃkhams ǃgao ǂhomisa. Timoteub ge gagasise ge ǀgaisa i, Paulub di ǀapemāsa ǁnâuǀnam tsîb ge ǁgai turaga xū hâbē, ǃgâi ǀgauga ūhâ tsî nau gagasi ǃgâsan ǀkha ǀguiba gere hâ amaga. (2Tim. 2:22) ǁNās ge aitsama ǃkhō-oasensa ge ǂhâ hâ-i. Sida tsîn ge aitsama ǃkhō-oasensa ǂhâ hâ sida di ǁgansi turaga ǃkhamǃoas ǃaroma. (Rom. 7:21-26) ǁNās ǂam-ai da ge aitsama ǃkhō-oasensa ǂhâ hâ îda ǀoro ǂūga ǁhû tsî ǃgâi ǂūba omkhâi. (Efe. 4:22, 24) Tsî da tsēs ǀams ai tsau hâ xawe da ge ra dītsâ îda ǀhaode ǃoa ī.—Heb. 10:24, 25.

12. Mâ ǀgaugu ǃnâ da Elobmîsa da ra sîsen-ū ǀgausa nî ǀāǀā?

¹² Soldab ge ǁîb ra ǃkham-ū xūn ra sîsen ǀgauba nî ǁkhāǁkhāsen. Nēsa ǂans ǃgaob ge hoa ǁae nēsa nî dī. ǁNās ǁkhās khami da ge sida tsîna Elobmîs ta sîsen-ūhe ǀgauba nî ǂan. (2Tim. 2:15) Nē ǂansa da ge ǀhaodi tawa ra omkhâi. Xawe da ga nau khoena Elobmîs a ama-aisa ga ra ǁgau ǂgao o, o da ge aitsama Elobmîsa nî ôaǃnâ. Elobmîsa da ge nî sîsen-ū îda sida di ǂgomsa ǀgaiǀgai. Nēs ge khomai da ra xūna ǂâiǃâ tsî sida di ǂkhinigu ǃnâ ôaǃnâsa ǃkhōǂgā hâ. Îda ǃamkuse ǁnâuǃā tsî ǁkhāǁkhāsen da go xūna dī. (1Tim. 4:13-15) O da ge Elobmîsa sîsen-ū tsî nau khoena nî ǁkhāǁkhā. ǁÎna da ge xoas ǀguisa khomaiba ǂgao tama, xawe da ge ra ǂhâba în ǁîna ǁnâuǃā tsî nē xūnan mati nî sîsen-ūsa mû. Elobmîsa da ga hoaǁae  ga ra ôaǃnâ o da ge ra ǀāǀāsen.—2Tim. 3:16, 17.

13. Hebreǁîn 5:14 ǃoagu da tae-e nî dī îda tae-i a tsū tsî tae-i a ǃgâisa ǁhûi ǁkhā?

¹³ Tae-i a tsū tsî tae-i a ǃgâisa ǂan re. Soldab ge ǀnai aisi nî ī xū-e mû tsî nî ǁkhaubasen. Sida tsîn ge gagasise a tsûtsûda ǁkhā xūna mûǃā tsî ǁîna xū ni hâbē. (ǂKhm. 22:3; khomai re Hebreǁîn 5:14 sa.) Aiǁgause da ge sida di sâǁaeb ǃnâ da ra dī xūna ǃamkuse nî ǁhûi. Tvs tsî muvin tsîn ge kai-amse ǁgauoǃnâ xūna ra ǁgau. Jehovab ge nē tanisen ǀgaub xa ǃgâibahe tama hâ tsî i ge sida tsîna a tsûtsû ǁkhā. ǁNā-amaga da ge Eloba da ūba hâ ǀnamma nî ǂkhabu kai xūna xu nî hâbē.—Efe. 5:5, 6.

14. Tae-i a tsū tsî tae-i ǃgâisa ǂansa Daniela mati ge hui?

¹⁴ Danieli hîna da go ais-ai a ǃhoaǃgaob ge ge mûǂan, ǃkhamǃnâ-e tsî ǃgaidība ūhâ vidio gamedi a tsūsa. ǁÎb ge Watchtower Librarib ǃnâ nē ǃgomsib ǀkha nî huibi xūna gere ôa. Nēsa ǁîba mati ge hui? ǁÎb ge nē ǁgai vidio gamede ge ǀhuru ǀû. Tsîb ge internets aib gere ǀhuru-u khoena xu ge hâbē. Danieli ge ra mî: “Vidio gamede da nî ǀhurus xa ta ge ǃauga ra dīhe xūna ge dī tsoatsoa tsî ta ge ti ǀhōn hîna ǀhaohâb ǃnâ hân ǀkha ge hâ tsoatsoa.” Danieli ge nēsi a aimâba-ao tsî a ǀhaohâb ǃûi-ao.

15. ǂHumi ǂhôana tae-i ǂkhôaba a dī ǁkhā?

¹⁵ Timoteub khama da ge sada tsîna ǁnāǁnôa hâ khoen da ǃhoa ǂhumi ǂhôab a dī ǁkhā ǂkhôaba a mûǃā ǁkhā. (1Tim. 4:1, 7; 2Tim. 2:16) Aiǁgausen ge ǁîna ǂhumi ǂhôana sida di ǃgâsan tamas ka io Jehovab di ǀapeǂhomis xa a ǃhoa ǁkhā. Nē ǂhumi ǂhôan ge sida di ǂgomsa a ǂkhabu kai ǁkhā. Tā da ge nē xūna nî ǂgom. Tae-i ǃaroma? Nē ǂhumi ǂhôan ge “ǁgao hâ ǁnâuǃāba ūhâ tsî amaba ūǀhanahe hâ” khoena xu ra hā. ǁÎn ge “ǂnoagudîdi tsî khomgudi” tsîna ra tsoatsoa ǂgao. (1Tim. 6:4, 5) ǁÎn ge ra ǂkhaba îda ǁîn di ǂhumiba ǂgom tsî tā sada di ǃgâsana ǂgomǃgâ.

16. Mâ xūn hîna sida ǂâisa ra ǂgaebēna xū da nî ǂgōsen?

¹⁶ Sa ǂâisa nî ǂgaebē xūna xu ǂgōsen.  ‘Xristub Jesub di ǃgâi ǃkhamaoseb’ ge Timoteuba ǁîb ǂâisa ǃkhusis ai ge mâi tama hâ-i xawe aoǁnâ sîsen-i ai ǁîb ǂâisa gere ǂnûi. (2Tim. 2:3, 4) Timoteub khama da ge sida tsîna tā nē ǃhūbaib di xūn xa nî ǂgaeǂkhabuhe. “ǂGaeǂhapus ǁuiǃkhūsib dis” ge sida Jehovaba ūba hâ ǀnamma nî ǂkhabu kai tsî da ge Elobmîs tsî aoǁnâ sîsen-i tsîna ǃgôaǃgâ tide. (Mat. 13:22) Sida di ûiba da ge ǀguiǃgupuse nî ūhâ tsî da ge sida di ǁaeb tsî ǀgaib tsîna nî sîsen-ū îda ‘ǂgurose Elob di gaosiba ôa.’—Mat. 6:22-25, 33.

17-18. Tae-e da nî dī îda Jehovab ǀkha da ūhâ ǀhōsagusisa ǁkhauba?

¹⁷ ǂHomisen re îts ǃhaebe ǁkhaubasen. Soldab ge ǀnai ais-ai hâ xūn ǃgao nî aiǂhomisen îb ǁkhaubasen ǁkhā. Jehovab māda hâ xūna da ga ǃûiǃgâ o da ge ǃhaese tsū xūna xu nî ǁkhaubasen. Tae-e nî huida îda nēsa dī? ǀNai da ge nî aiǂhomisen ǃgomsib ǃnâ da nî ǂgâs aiǃâ da tae-e nî dīsa.

¹⁸ ǂKhō da ga ra o, kai ǁāxasi-i ga ra hâ o i ge ǁnāpa hâ khoena ra mîbahe în dau-amdi mapa hâsa kō ôa. Tae-i ǃaroma? În ǂan tsū xū-i ga ī on mâ dao-amsa ǃhaese nî sîsen-ūsa. ǁNās ǁkhās khami da ge sida tsîna mapa xu da nî ǂoasa nî ǂâiǃgâ ǁgauoǃnâ xūn, ǃkhamǃnâhe ra xūn tamas ka io ǁnāǁgôa hâ khoen ra ǃhoa xūna da ga internets tamas ka io TVsa da ra kō hîna ga mû o. Ī nîse ī xūn ǃgao da ga ǀnai ais-ai a aiǂhomisen o, o da ge sida ǀhōsagusis Jehovab ǀkha da ūhâsa nî sâu tsî ǁîb mûǁae ǃanuse nî hâ.—Psa. 101:3; 1Tim. 4:12.

19. Tae-i ǃgâi ǀkhaega da nî hōǃgâ Jehovab ge māda ama-ai xūna da ga ǃûiǃgâ o?

¹⁹ Jehovab mā da hâ xūna da ge nî ǃgôaǃgâ. Nēn ge Elobmîs amab tsî nau khoena Elobmîs xa ǁkhāǁkhās aiǂhanuba ǃkhōǂgâ hâ. Nēsa da ga dī o da ge ǃanu ǃgâiǂâis tsî ǂâibasensa ūhâ ûiba nî ūhâ. Tsî da ge nau khoena Jehovab xa ǁkhāǁkhās ra hau ǂkhîba nî hōǃgâ. ǁÎb huib ǀkha da ge ǂgomǃgâ-ūhe da ge xūna nî ǃûiǃgâ.—1Tim. 6:12, 19.