1. Mâ ǁaegu ai i Jehovaba ǃoabasa a ǃgom ǁkhā?

JEHOVABA ǃoabasa mâ ǁaegu ai a ǃgom? ǃGomsina da ga ra ūhâ o sa, tamas ka io ǃgomsina da ga ūhâ tama io sa? ǃGomsina da ga ūhâ o da ge Jehovab ai ra ǂgomaiǂnûi. Xawe tae-e da ra dī ǃgomsina da ga ūhâ tama io? ǀNîsi da Eloba ǃoabas a ǂhâǂhâsasa a ǀuru ǁkhā? Jehovab ge Israelǁaesa ge ǂâiǂâiǃnâ nēti xū-i a ī ǁkhāsa.—Deu. 6:10-12.

2. Gao-aob Asaba mâ aiǁgausa ge māda?

² Gao-aob Asab ge ǃgâi aiǁgaub hîna ge gā-aise tanisen tsî Jehovab ai a ǂgomaiǂnûiba. ǁÎb ge ǁgai ǁaeb ai ǀgui Jehovaba ge ǃoaba tama hâ I, xawe ǃnorasa ǁaeb ais tsîna Jehovaba gere ǃoaba. ǂKhamsisa xub ge “Asab di ǂgaoba ǀoasase ǃKhūb ǀkha ge hâ i.” (1Gao. 15:14) ǀGui ǀgaub hînab ge ǂgomǃgâsiba a ǁgaub ge ama tama hâ ǂgomde Judaba xu ūbēsa. Elobmîs ge ra mî: “ǁÎb ge ǃhao altardi tsî ǀgapigu tsîga ūbē, tsî ǂnûikhâihesa īga khôaǂkhū tsî haiǂgaode ǁhāǁnâ” ti. (2Kro. 14:2, 4) ǁÎb aumas Maaxas tsînab ge ǀgapi ǃharosa xu ge ūǁnâ. Tae-i ǃaroma? ǁÎs ge ama tama ǃoabade gere ǃkhōǃkhō ǃkhais ǃaroma.—1Gao. 15:11-13.

3. Tae-e da nē ǁkhāǁkhāǃâs ǃnâ nî ǃhoaǃgao?

³ Asab ge ǂhumi ǃoabadi ǀguide ge ūbē tama hâ i, xaweb ge ǁîba Judab gaosib ǃnāka hâ khoena ge ǂkhâǃnâ în Jehovaba ǁkhaba ǃoaba tsoatsoa. Jehovab ge Asaba ǀkhae tsî ǁaerob ǃnorasasiba * Israelǁaesa ge  mā. Nē disi kurigu ǃnâb ge Asab ǂgaeǂguis ǃnāka ǃhūba “ge ǃnōsa” i. (2Kro. 13:23; 14:3, 5) Nē ǁkhāǁkhāǃâs ǃnâ da ge nî mû Asab ge nē ǃnorasasib ǁaeba mati a sîsen-ūsa. Tsîda ge nî mû ǂgurokam ǁaeb Xristeǁîn ge Asab khami ǃnorasasib ǁaeba a sîsen-ū ǀgauba. ǀAmsi da ge nē dîsa nî ǃeream, Jehovaba ǃoabasa ra mā-am ǃhūb ǃnâ du ga ǁan o du nē ǃnorasasib ǁaeba mati a sîsen-ū ǁkhā?

4. 2 Kroniks 14:1, 5, 6 ǃoagub Asaba ǃnorasasib ǁaeba mati ge sîsen-ū?

⁴ 2 Kroniks 14:1, 5, 6 tsîna khomai re. Asab ge khoena ge mîba Jehovab ge ǃhūba “sâba mā hâ i” sa. ǁÎb ge nē ǃnorasasib ǁaeb ǂkhîǂhorisens ǃgao ǀgui nî sîsen-ūhe ti ge ǂâi tama hâ i. ǁÎb ge ǁaeba ǁama ǂui tsî ǃādi, mirku, ǂgō-omku, tsî dao-amdi tsîna ge om. Judab di khoenab ge “ǃhūb gorose sada ais aiǃâ hâ” ti ge mîba. Asaba tae-e gere ǂâibasen? ǁÎb ge khoen harase Elob xan māhe hâ ǃhūb ǃnâ a ǃgûmâ ǁkhā tsîn khākhoen xan ǁgâiǀāhe tamase a om ǁkhā ti gere ǂâibasen. ǁÎb ge khoena ge ǂkhâǃnâ în nē ǃnorasasib ǁaeba ǃamkuse sîsen-ū.

5. Asaba tae-i ǃaroma ǁîb toroǂnubisa ge ǀgaiǀgai?

⁵ Asab ge nē ǃnorasa ǁaeba sîsen-ū tsî ǁîb toroǂnubisa ge ǀgaiǀgai. (2Kro. 14:7) Nēsa ra ǂâibasen Jehovab ǃnâb ge ǂgomǃgâ tama hâ i ti? Hî-i. Asab ge ge ǂan i gao-aob aseb khoena nî aiǂhomisa, hā nî ǃgomsigu ǃgao. ǁÎb ge ge ǂan i nē ǃnorasasib Judab ǃnâ hâhâ tidesa tsî nēs ge ge ama-i.

6. ǂGurokam ǁaeb Xristeǁîna ǃnomsa ǁaeba mâti gere sîsen-ū?

⁶ ǂGurokam ǁaeb Xristeǁîn ge ǃgôaǃgonhen gere xawe ǃnomsa ǁaeb tsîna ge ūhâ i. Tae-en ge nē ǁaeb ǃnâ gere dī? Nē ǂgomǂgomsa khoen ge ǀû tamase ǃgâiǂhôasa gere aoǁnâ. ǃNaeǃkhaidi ǃnâ-i ge ra mî, ǁîn ge ‘ǃKhūb di ǃaoǃgâs ǃnâ gere tanîsen’ di. ǁÎn ge ǀûs ōse ǃgâiǂhôasa gere aoǁnâ tsî i ge ǁnās xa ǃaromahe hâse ǀhaohâba “ge ǀoa.” Amaseb ge Jehovaba ǃnorasa ǁaeb ǃnân ge ôasase gere dī aoǁnâ sîsen-e ge ǀkhae.—ǃNǃkh. 9:26-31.

7-8. Paulub tsî nau khoen tsîna ǀkhara ǃēsan ge hō-o tae-e ge dī? ǁGuiǃā re.

⁷ ǂGurokam ǁaeb Xristeǁîn ge hōn gere ǃēs hoas ai ǃgâiǂhoasa gere aoǁnâ. Aiǁgauseb ge Apostel Pauluba ǂgui khoen hîna Efeses ǃnâ hânab a aoǁnâba ǁkhā sab ge mû-o ǁnāba hâ tsî gere ǁkhāǁkhāsabe dī.—1Kor. 16:8, 9.

⁸ Paulub tsî nau Xristeǁîn ge ǀkhāra ǃēsa ge hō ǃgaos xa hâ mâsib ge 49ǁî kuri hâ i o. (ǃNǃkh. 15:23-29) ǀHaohâb ge mîǁguib xa a mîbahes khaoǃgân ge nē ǁkhāǁkhāsabena ôasase “ǃKhūb mîsa gere aoǁnâ.” (ǃNǃkh. 15:30-35) Tae-e ge hā? Elobmîs ge ra mî: “O gu ge ǀhaohâga ǂgoms ǃnâ ǀgaiǀgaihe tsî ǃgôab ǃnâ tsēkorobe gere ǀarohe.”—ǃNǃkh. 16:4, 5.

9. ǂGui ǃhūgu ǃnâb mâsiba mati hâ nētsē tsî tae-e da a dîsen ǁkhā?

⁹ ǂGui ǃhūgu ǃnâ da ge sida harase a aoǁnâ ǁkhā. Sadu ǃhūb tsîna nēti-ī ǃnorasasiba ūhâ? Ti-i ga ra io dîsen re, ‘ti ǃnorasasiba ta mati ra sîsen-ū?’ Nē ǀuniga tsēdi ge Jehovab khoena kaise a ǀō-aisaba, ǁîn ǃhūbaib ai noxoba mûhe tama hâ aoǁnâs tsî ǁkhāǁkhā sîsen-i ǀkha a ǁāxa amaga. (Mrk. 13:10) ǂGui xūna da ge nē sîsen-i ǃnâ a dī ǁkhā.

10. 2 Timoteub 4:2 sa tae-e da nî dīsa ra ǂkhâǃnâ da?

¹⁰ Nē ǃnomsa ǁaeba du mati a sîsen-ū ǁkhā? (2 Timoteub 4:2 sa khomai re.) ǂÂiǃgâ re sadu tamas ka io sadu omaris di ǁani-i ǃnāsa ǁaeba aoǁnâ sîsen-i ǃnâ hâ tamas ka io a aimâba-ao kai ǁkhāsa. Tā da ge ǃkhūsisa nî ǀhaoǀhaobasen ǁnā xūn ǀkhā da kai ǁgâiǀāb ǃnâ ǃkharu tide xūi-ao.—ǂKhm. 11:4; Mat. 6:31-33; 1Jhn. 2:15-17.

11. ǂGui ǃgâsana tae-e ge dī în ǂgui khoena ǃgâiǂhôasa ǁnâu?

¹¹ ǂGui aoǁnâ-aon ge ǀkhara gowaba ra ǁkhāǁkhāsen în khoena Jehovab xa ǁkhāǁkhā. Elob di ǀapeǂhomis ge nēsa ra ǂkhâǃnâ, ǂgui gowagu ǃnâs Elobmîs ai a ǃgaoǃgaosa vidion tsî ǂkhanin tsîna ra māǂui amaga. Aiǁgause, 2010ǁî kurib ǃnân ge sida ǂkhanin tsî vidion tsîna 500 gowagu ǃnâ ge hâ-i, xawe nētsēb ge ǁnâ ǃgôaba 1 000 gowaga ǃkharu hâ.

12. Khoena ǃgâiǂhôasa ǁîn ǁgûsigowab ǃnâ ǁnâusa xu mati ra ǀama? Aiǁgau-e mā re.

¹² Khoen ga Elobmîs amaba ǁîn ǁgûsigowab ǃnâ a ǁnâu ob ǁîn ǂgaoba mati ra tsâǀkhāhe? ǀGui ǃgâsas ge ǁîs ǁgûsigowab Kinyarwandab ǃnâ ge hâ i kai ǀhaosa ǃoa ge i Amerikab ǃnâ. Nē gowab ge Rwandab, Kongo (Kinshasas) tsî Ugandab ǃnâs tsîna ra ǃhoa-e. Kaiǀhaos ge toa, os ge ǁîsa ge mî: “ǂGuro ǃnâs ge tida kaiǀhaosa ra ǁnâuǃāsa,  ǁnā ta ge 17 kurigu ǃkharuhase Amerikaba ǃoa a doeǀkhīsa xu.” ǃGāsa i ge a nē ǃgâsas ǂgaob ge ge tsâǀkhā-e ǁîs ǁgûsigowab ǃnâs ge nē kaiǀhaosa a ǁnâu-o. Sadu mâsib ga mā-am o, ǀkhara gowaba ǁkhāǁkhāsen îdu nî, īdu ǁnā gowaba ra ǃhoa khoena Elomîsa ǁkhāǁkhā? Nēs ge ǀnîsi ǃamkuse nî sîsen kai-am khoen sadu ǀhaohâb ǂharis ǃnâ ǀkhara gowaba ra ǃhoa amaga. ǁGuiǂgāsen du ga ra o, o du ge kai ǂkhîba nî hō.

13. Russiab ǃnâ hâ ǃgâsana ǁîn di ǃnorasasib ǁaeba mati ge sîsen-ū?

¹³ ǀNî ǃhūgu ǃnân ge sida ǃgâsana harase a aoǁnâ ǁoa, ǂhanub xan mā-amhe tama hâ amaga. Russiab ǃnâ hâ ǃgâsan di aiǁgausa kō re. ǂGui kurigan ge ǂhanub xa gere ǃgôaǃgonhe xawen ge Maarti 1991ǁî kurib ǃnâ ge mā-amhe în ǃnorasase aoǁnâ. ǁNā ǁaeb ai i ge 16 000 aoǁnâ-aona Russiab ǃnâ ge hâ i. ǀGamdisi kuriga ǃkharu tsîb ge ǁnā ǃgôaba 160 000 kōse ge ǀarosen. ǃGāsa-i ge a, sida di ǃgâsan ge nē aiǂhanuba sîsen-ū tsî ǃnorasase a aoǁnâsa. ǁNā ǃnorasa ǁaeb ge hâhâ tama ge hâ i. Mâsib ge ǁnā ǃhūb ǃnâ a dawa xawen ge ǁîna noxoba ôasase Jehovaba ra ǃoaba. ǁKhān a xūn hoanan ge ra dītsâ în ǁîba ǃoaba.

14-15. Jehovaba ǁîb di ǀgaiba sîsen-ū tsî mati Asaba ge hui?

¹⁴ Asab di tsēdi ǃnâ i ge ǃnorasasiba ge hâhâ tama hâ i. ǀGui miliuns xa ǃnāsa soldaga ūhâ toroǂnubis ge Etiopiaba xu ge hā. Toroǂnubis mûǂam-aob Serab ge ge ǂgomǃgâ hâ i ǁîb tsî ǁîb ǂnubis Judaba nî hîkākāsa. Xaweb ge gao-aob Asaba ǁîb di  ǃgôab khoen ai ǂgomsa ǂnûi tama i tsî ǁîb Elob Jehovab ai ge ǂgomaiǂnûi. Asab ge ǀgore tsî ge mî: “Hui da re, ǃKhū, sida di Elotse, sida ge sa ai ra ǂgomaiǂnûi, tsî sa ǀons ǃnâ da ge nē ǂguib ǃoagu go hā xuige.”—2Kro. 14:10.

¹⁵ Etiopiab di toroǂnubis ge ǂgui soldaga ge ūhâ i Asab di toroǂnubis xa. Xaweb ge Asaba ge ǂan-i Jehovab a ǀgaisasa tsîb ǁÎb khoena nî huisa. Jehovab ge ǁîb khoena ge hui tsî Etiopiab di toroǂnubisa taoxase ge hîkākā.—2Kro. 14:7-12.

16. Mati da a ǂan ǃnorasa ǁaeb nî ǀamsa?

¹⁶ ǀŪ da ge a mā ǀguiǀguibe khoe-i hoa-i ǀkha i tae-e hānîǁaeb ǃnâ nî īsa, xawe da ge a ǂan Jehovab ǀhûǀguitimî-aon ra hōǃâ ǃnorasasib hâhâ tidesa. ǂÂis ǃnâ ūhâ re, Jesub ge ge mî ǀuniga tsēdi ǃnâ i ǁîb ǁkhāǁkhāsabena “hoa ǁaedi xa nîra ǁkhanhe” ǃkhaisa. (Mat. 24:9) Apostel Paulub tsîn ge ge mî: “Xristub Jesub ǃnâ ǃaoǃgâxase ra ûi ǂgaon hoan ge nîra ǃgôaǃgonhe.” (2Tim. 3:12) ǁGâuab ge “kai ǁaiba ūhâ” tsîda ge a ǃâubasen ǁoa, ǁîb xa ra ǃaromahe mâsiba xu da nî ǃkhoebēsa.—J.ǂHa. 12:12.

17. Mâ ǀgaugu ǃnâs sida ǂgomsa ǀnîsi nî ǃâitsâhe?

¹⁷ ǀGūǁae i ge hoada ǂgomsa nî ǃâitsâhe. ǀAe i ge “kai tsūǀkhāga nîra hâ, ǃhūbaib di tsoatsoasa xu nēsis kōse ge ī tama hâ iga.” (Mat. 24:21) ǁNā ǁaeb ai-i ge sida omaris ǁanina nî māǃoada tsîb ge ǂhanuba sida aoǁnâ sîsen-e nî ǂkhā. (Mat. 10:35, 36) Asab khami da Jehovab ǃnâ nî ǂgomǃgâ ǁîb xa hui-e tsî sâuhes ǃgao?

18. Hebreǁîn 10:38, 39 ǃoagu i tae-e nî huida îda nēsi aiǂhomisen ǃnorasasib ǁaeb nî ǀams aiǃâ?

¹⁸ Jehovab ge nēsi ra aiǂhomi da i da sida ǂgomsa ǀgaiǀgai. ǁÎb ge ‘ǂgomǂgomsa tsî gā-ai ǃgāba’ ra sîsen-ūse “ǁaeb ai” ra ǂûmā da îda ǀgaisase hâ. (Mat. 24:45) Xawe da ge sida ǀkhāba hau tsî ǁnobeǁoasa ǂgomsa Jehovab ǃnâ nî omkhâi.—Khomai re Hebreǁîn 10:38, 39 sa.

19-20. 1 Kroniks 28:9 sa ǂâis ǃnâ ūhâse, mâ dîna da nî dîsen tsî tae-i ǃaroma da nē dîna nî dîsen?

 ¹⁹ Gao-aob Asab khama da ge Jehovaba nî ‘ôa.’ (2Kro. 14:3; 15:1, 2) Sida ôas ge Jehovaba da ga ǂan tsî ǁāǁnâhe o ra tsoatsoa. Mâ ǃēs hoasa da ge nî ū, îda Jehovaba da ūba hâ ǀnamma omkhâi. Nē ǀnamma ǃâitsâs ǃgao dîsen re: ‘Hoaǁae ta ǀhaode ra ǁhaoǃnâ?’ Jehovab ǀapeǂhomis xa aiǂhomihe hâ ǀhaode ta ga ǁhaoǃnâ o, o da ge gagasise ra khoakhoahe tsî sida ǃgâsan xa ra ǀgaiǀgaihe. (Mat. 11:28) Nētis tsîna dîsen re: ‘Hoaǁae ta Elobmîsa ra ǁkhāǁkhāsen? Sadu omaris ǀkha du ga hâ-o, wekheb hoaba du omaris ǃoabas ǃgao ǁaeba ra ǁamaǂûi? Tamas ka io ǀguri du ka hâ o du omaris ǃnâ du hâ khama ǁaeba ra ǁama ǂui? Tsî ǁkhā du a khama du aoǁnâ tsî ra ǁkhāǁkhāsabe dī?’

²⁰ Tae-i ǃaroma da nē dîde nî dîsen? Elobmîs ge ra mî Jehovab ge sida ǂâidi tsî sida ǂgaogu ǃnâ hâ xūna ra ôaǃnâ tsî da ge sida tsîna ǁkhā xū-e nî dī. (1 Kroniks 28:9 sa khomai re.) Sida ǂâiǀgaub tamas ka io tanisen ǀgaub ǃnâ da ǀkharaǀkharana nî dī sa da ga mû o, da ge Jehovaba nî ǂgan îda ǁnā xūna dawa. Nē ǁaeba sîsen-ū re its hā nî ǃgomsin ǃgao aiǂhomisen. Tā i xū-i xare-e ǂhani tsi nē ǃnorasa ǁaeba ǃamkuse sîsen-ūsa xu.