1-2. Aoǁnâ-aob 11:6 tsî aoǁnâ sîsen-i tsîna mati ra ǀhao?

ǀNÎ ǃHŪGU ǃnân ge khoena ǃgâiǂhôasan ga ra ǁnâu o ǃnāsase ra ǂan ǂgao. Nē ǃgâiǂhôasan ge ge ǃâu hâ-i. Nau ǃhūgu ǃnân ge khoena Elob tamas ka io Elobmîs ǃnâ ǃgâiǃgâibasen-e ūhâ tama hâ. Sadu ra hâ-ban khoena ǃgâiǂhôasan ga ǁnâu o, mati ra tanisen? Mati ǀguin ga khoena a tanisen xaweb ge Jehovaba ra ǂhâba îda aoǁnâ sîsen-i ǀkha aiǃgû, ǁîb toa i ge go di nî mîs kōse.

² Jehovab ge ǀnai ge mîǁgui nē aoǁnâ sîsen-i mâ ǁae nî toasa tsî ǁnā ǁaeb ais ge “ǀamsa nîra hā.” (Mat. 24:14, 36) ǁNā ǁaeb nî hās aiǃgâ da “ǃommi âtsa tā ǂgaedawa” di hâ mîde mati nî ǁnâuǀnam? *—Khomai re Aoǁnâ-aob 11:6.

3. Tae-e da nē ǁkhāǁkhāǃâs ǃnâ nî ǃhoaǃgao?

³ ǃKharugo ǁkhāǁkhāǃâs ǃnâ da ge, haka xūn hîna da nî dīn îda ǃgâi ‘khoeǃkhō-ao’ kais din xa goro ǃhoa. (Mat. 4:19) Nē ǁkhāǁkhāǃâs ǃnâ da ge ǃnona ǀgaugu hîna da sada di aoǁnâ sîsen-i ǃnâ nî ǀgai gu xa nî ǃhoa, mati ǀgui-i ga sada di mâsiga ī xawe. Tsî da ge nî ǁkhāǁkhāsen tae-i ǃaroma i a ǂhâǂhâsasa îda (1) aoǁnâ sîsen-e ǂgurose sida di ûib ǃnâ mâi, (2) ǃnūǃnâxa tsî (3) ǀgaisa ǂgomsa ǃkhōǀgara.

4. Tae-i ǃaroma da Jehovab ge māda sîsen-i ai ǂâisa ra ǂnûi ǂgao?

⁴ Jesub ge ǁîb ǁkhāǁkhāsabega ge mîba, khoen mati nî  ī ǃkhaisa tsî tae-i ǀuni tsēdi ǃnâ nî ī sa. ǁÎb ge ge ǂan i nē xūn ǁîb di sao-aona aoǁnâ sîsen-i ǃnâ nî ǂhanisa. Tsîb ge ǁîga ge mîba îgu ‘ǂkhaikari hâ.’ (Mat. 24:42) Noaxi tsēdi ǃnâ i ge ǂgui xūna gere ī hîna ge khoena gere ǂhanina în tā ǃgâiǂhôasa ǃgâ. ǁKhā mâsib ge sida di tsēdi ǃnâs tsîna hâ. (Mat. 24:37-39; 2Pet. 2:5) ǁNā-amaga da ge Jehovab ge māda sîsen-i ai ǂâisa ra ǂnûi ǂgao.

5. ǃNaeǃkhaidi 1:6-8 sa mati ra mî aoǁnâ sîsen-i nî dīhe ǀgaub xa?

⁵ Nētsē da ge Gaosib di ǃgâiǂhôasa aoǁnâs ai sida di ǂâisa ra ǂnûi ǂgao. Jesub ge ge mî ǁîb sao-aon ǁîb xa ǃnāsa sîsen-e nî dī ti, ǁîb ǁōb khaoǃgâ. (Jhn. 14:12) Jesub di ǁōb khaoǃgâ gu ge ǀnî ǁkhāǁkhāsabega ǁauǃkhō sîsen-e ǁkhapa ge dī tsoatsoa. ǁÎb khâis khaoǃgâb ge Jesuba ǁîb ǁkhāǁkhāsabega ge hui, îgu buruxa ǀgaub ǃnâ ǁauna ǃkhō. ǁNā ǁaeb aib ge ǁîga ge hōhōǃnâ, khoeǃkhō-ao sîsen-i nau xūn ǂam-ai a ǂhâǂhâsa ǃkhaisa. (Jhn. 21:15-17) ǀHomǃapab nîs aiǃgâb ge Jesuba ǁîb di ǁkhāǁkhāsabega ge mîba, aoǁnâ sîsen-i ǁîb ge tsoatsoa i, nau ǃhūgu ǃnâs tsîna nî dīhesa. (Khomai re ǃNaeǃkhaidi 1:6-8.) Kurigu khaoǃgâb ge Jesuba apostel Johaneba ǁkhapos ǃnâ ge mîba tae-i “ǃKhūb di tsēs” * ai nî ī sa. Apostel Johaneb ge ge mû: ǀHomǃgāb daoǁgaus ǃnakas “ǀamo ǃgâiǂhôasa . . . mâ ǃhaoǃnās hoasa, tsî ǃhaos hoasa, tsî gowab hoaba, tsî ǁaes” hoas ǃnâ ra aoǁnâhesa. (J.ǂHa. 1:10; 14:6) ǃGāsa i ge a Jehovab di ǂâis ge îda nē ǃhūb ǂhabase ra dīhe aoǁnâ sîsen-i ǃnâ ǃâ, toa i nîs kōse.

6. Tae-e da ga dī o da aoǁâ sîsen-i ai sida di ǂâisa nî ǂnûi hō?

⁶ Jehovab aoǁnâ sîsen-i ǀkha ra huida  ǀgaus xa da ga ǂâi o, o da ge aoǁnâ sîsen-i ai ǂâisa nî ǂnûi. ǁÎb ge gagasi ǂûna ǁgâisa ǂkhanin, audion, vidion tsî broadcast ǃnâ-ū ra māda. Aiǁgause i ge sida internets ǂhaweb ai 1 000 xa ǃnāsa gowagu ǃnâ Elobmîs xa hâ ǃnāsa ǃgāsasiba ra hō-e. (Mat. 24:45-47) Khoen ge nē ǃhūbaib ǃnâ a ǀgorasa, ǃkharagagu ǂgīǂgōsi ǃnandi ǃnân hâ tsî ǃkharagaǃnâgu kerkhegu ǃnân hâ tsîn ǀnîna ǃkhū hâ, ǀnîn a ǀgâsa hîna amaga. Xawe i ge ǁkhaisa miliuns xa ǃnāsa ǃgâsana, Eloba ǀguiǃnâxase ǃhūbaib ǂhawase ra ǃoaba. Aiǁgause i ge Fraitaxtsē April 19, 2019ǁî kuri ǃhūbaib ǂhawase hâ, Jehovab ǀhûǀguitimî-aona ǀguiǃnâxase tsēkorobe mîs xa ra ǃhoa vidioba gere kō. ǁNā ǃuia i ge 20 919 041 khoena ge ǀhao hâ-i, Jesub ǁōb ǂâiǂâisens ǃgao. Nētsē ǃhūbaib ǂhawase ra dīhe ǁāxasigu ai da ga sida ǂâisa ǂnûi o, da ge ra mû kai aiǂhanuba da ūhâsa nē aoǁnâ sîsen-i ǃnâ ǃâsa.

7. Jesub di aiǁgausa mati ra huida îda sada di aoǁnâ sîsen-i ai ǂâisa ǂnûi?

⁷ ǀKhara ǀgaub hîna da aoǁnâ sîsen-i ai, sida di ǂâisa a ǂnûi ǁkhāb ge Jesub di aiǁgausa saosa. ǁÎb ge xū-i xare i tsîna mā-am tama ge hâ-i, i i aoǁnâ sîsen-i ǃnâ ǂhanibi. (Jhn. 18:37) ǁGâuab ge “hoa gaosigu ǃhūbaib diga ge ǁgau bi ǁîgu ǂkhaisib ǀkha” xaweb ge Jesuba nēs xa ge nanahe tama hâ-i. Khoen gere gao kaibi ǂgao xawes tsînab ge ǁîba ge ǂkhā. (Mat. 4:8, 9; Jhn. 6:15) ǁÎb ge ǃkhusisa ge ôabasen tama hâ-i tsîb ge ǁîba ǃgôaǃgonhesa ge ǃao tama hâ-i. (Luk. 9:58; Jhn. 8:59) Apostel Paulub di ǁnamasa da ga ǂâihō, o da ge sida di aoǁnâ sîsen-i ai ǂâisa nî ǂnûi, sida di ǂgoms ga ǃâitsâhe xawe. ǁÎb ge Xristeǁîna ge mîba în Jesub di aiǁgausa sao, on ge “ǀomdi ǃnâ tsō tsî tsanaǁkhui” tide.—Heb. 12:3.

8. ǃNūǃnâxasiba a tae tsî tae-i ǃaroma i nētsi a ǂhâǂhâsa?

⁸ ǃNūǃnâxa khoen ge mâsib nî dawas kōse ra ǃâu. Nē ǁgaora mâsib nî ǀam tamas ka io da ga, ǃgâi xū-e gaxuse ga ra ǃâu xawe da ge hoada ǃnūǃnâxasiba ǂhâ hâ. Habakuki tsîn ge ǀnî khoen ge Judab ǃnâ ūhâ-i ǂūgu nî ǀam ǁaeba ge ǃâu hâ-i. (Hab. 1:2) Jesub ǁkhāǁkhāsaben ge “ǁnātimîsib” Elob Gaosiba hā tsî ǁîna Romeǁîn di ǁgâiǀaba xu nî oresa gere ǃâubasen. (Luk. 19:11) Elob Gaosib nē hâ eloxoresasiba ūbē tsî ǀasa ǃhūbaib hîna ǂhanu-aisib xa ǀoa hâba nî hau ǁaeba da ge ǃâu hâ. (2Pet. 3:13) Xawe da ge ǃnūǃnâxase nî ǃâu, ǁîb ǁhuiǂui hâ ǁaeb nî hās kōse. Hāre îda kō Jehovab ǃnūǃnâxasiba ra ǁkhāǁkhā da ǀgauba.

9. Mâ aiǁgaude Jehovab a ǃnūǃnâxa ǃkhaisa ra ǁgau?

⁹ Jehovab ǃnūǃnâxasiba ra ǁgau ǀgaub ge kai aiǁgaus ase a îba da. Noaxab ge gaxu ǁaeba ge mā îb arka om tsî ‘ǂhanu-aisib di aoǁnâ-ao’ kai. (2Pet. 2:5; 1Pet. 3:20) Jehovab ge Abrahammi ge Sodoms tsî Gomoras tsîn nî hîkākāhe ǀgaub xa ǂgui dîna gere dîbi xawe gere ǃgâ. (Gen. 18:20-33) ǂGui kurinab ge Jehovaba ǁnâuǀnamoǃnâ Isrealǁaes ǀkha ge ǃnūǃnâxa i. (Neh. 9:30, 31) Jehovab ge ǂâusa ǁaeba khoena ra mā în “ǃhobasen.” Nēs ǃnâ da ge ǁîb di ǃnūǃnâxasiba ra mû. (2Pet. 3:9; Jhn. 6:44; 1Tim. 2:3, 4) Jehovab di aiǁgaus ge ǃgâi ǃaromade ra māda îda ǃnūǃnâxasiba ūhâ aoǁnâ tsî da ra ǁkhāǁkhā hîna. ǂKhōsa ra sîsen-ūseb ge ǃnūǃnâxasib xa ra ǁkhāǁkhā da.

10. Jakobub 5:7, 8 ǃnâ ra mîhe ǃhanaǂgā-aob di aiǁgausa xu da tae-e a ǁkhāǁkhāsen ǁkhā?

 ¹⁰ Jakobub 5:7, 8 sa khomai re. ǃHanaǂgā-aob di aiǁgaus ge sida ǃnūǃnâxasiba ra ǁkhāǁkhā. ǀNî hain ge kaise ǃhaese ra kai. Xawe i ge ǁnān hîna ra ǂûtanina gaxuse ra ū. Israel ǃhūb ǃnâb ge ǃhanaba ǃani ǁkhâgu khaoǃgâ ǀgui gere ǂûtani. ǃHanaǂgā-aob ge ǁîb di ǃkhomde ǂguro ǀnanub khaoǃgâ gere ǂgā. Tsî ǀuniga ǀnanub khaos-ai ǂûna gere ǀhaoǀhao. (Mrk. 4:28) Sada tsîn ge ǃhanaǂgā-aob di ǃnūǃnâxasiba ra ǁgae ǂgao. Xawes ge nēsa supu tama hâ.

11. Matib ǃnūǃnâxasiba sida di aoǁnâ sîsen-i ǃnâ nî huida?

¹¹ Dīǀoaǀoasa kurusa ūhâ tama hâ khoen ge, ǁîn ra dī sîsen-i ǃhaese nî ǂûtani ǃkhaisa ra ǂhâba. Xawe da ge sida di ǃhanab nî ǂûtanisa da ga ǂhâba o, sida di ǃhanaba ǃanu, ǁgam-e mā tsî nî kōǃgâ. Aoǁnâ sîsen-i ǃnâs tsîna da ge ǁkhā ǀgaub ǃnâ nî ǁguiǂgāsen. ǁAeba i ge ra ū sida ǀkha Elobmîsa ra ǁkhāǁkhāsen khoena huisa, în ǃhaoǀgorasa ǀû tsî ǀnamxaǃnâ khoe kai. Sida di ǃnūǃnâxasib ge nî huida îda tā ǂkhabuǂâi khoen ga ǃgâ ǂgao tama io. ǀNî khoen ga māsenxase ǃgâ tsî ga ra ǁkhāǁkhāsen ǂgao xawe da ge nî ǃnūǃnâxa. Elobmîsa ra ǁkhāǁkhāsen khoe-e da ge a ǁgari ǁoa, i i ǂgomsa ūhâ. ǀNî ǁaegu ais tsîna i ge Jesub di ǁkhāǁkhāsabega, Jesub gere ǁkhāǁkhā xūna ge ǁnâuǃā tama hâ-i. (Jhn. 14:9) ǂÂis ǃnâ da ge nî ūhâ, ǃhana tsî da ge a ǂnâ ǁkhā, xaweb ge Elob ǀguiba ra kaikai.—1Kor. 3:6.

12. Mati da ǃnūǃnâxasiba nî ǁgau sida di omaris ǁanin hîna amaba ūhâ taman ǀkha da ga ǃhoa o?

¹² Kaise i ge a ǃgombada ǁkhā ǃnūǃnâxasiba ūhâsa, sida di omaris ǁanina da ga aoǁnâba o. Aoǁnâ-aob 3:1, 7 ǃnâ hâ tsoatsoas ge a huida ǁkhā. ǁNāpa i ge  ra mî: “Mâ xū-i hoa-i ge ǁî-i di ǁaeba ūhâ . . . ǁaeb ǃnōsase hâs dib, tsî ǁaeb ǃhoas dib.” Sida di tanisen ǀgaub ge sida di omaris ǁanina a hui ǁkhā, în sida ga ǁîna aoǁnâba o ǃgâ. (1Pet. 3:1, 2) Hoa khoen ǀkha da ge ǃnūǃnâxase nî tanisen sida di omaris ǁanina ǃkhōǂgāhâse, ôasase da aoǁnâ tsî ra ǁkhāǁkhā hîna.

13-14. Mâ aiǁgaun ǃnūǃnâxasib dina da nî ǁgae?

¹³ ǃNūǃnâxasiba da ge nētsē ûi hâ khoen tsî Elobmîs ǃnâ xoahe hâ khoena xu ra ǁkhāǁkhāsen. Habakuki ge eloxoresasib nî ǀam ǁaeba ǃoa gere mûǂui tsîb ge ǁîba ge mî: “Tita ge ti ǃûiǃkhais ai nî mâ.” (Hab. 2:1) Apostel Paulub ge ǁîb di aoǁnâ sîsen-e gere “dīǀoaǀoa” ǂgao xaweb ge ǃnūǃnâxase ge ǃâu tsî ge mî: “ǃGâiǂhôas Elob ǀkhommi disa ta nî aoǁnâ.”—ǃNǃkh. 20:24.

¹⁴ ǃGamme hâ khoera hîna ge Gilead skola ǃoa ī tsî ǀoro ǀhûǀguitimî-aon hâ tsî ǂgui khoen Xristeǁî tama hâ ǃhūba ǃoa a sîhe ra, di aiǁgausa kō re. Kaise ǀoro khoen ge Elobmîsa gere ǁkhāǁkhāsen ǂgao. ǁÎra ǀkha ge ǀgui Gilead klas ǃnâ hâ-i ǃgâsan ge ǁîn ge ǂgui khoen, hîna Elobmîsa ra ǁkhāǁkhāsen ǂgaona hō ǀgaub xa ǁîra gere ǁgamba. Xawe ra ge nē khoera ǃnūǃnâxase gere aoǁnâ, ǂgui khoen ge ǃgâ ǂgao tama hâ-i xawe. ǁKhaisa kurina ra aoǁnâ hâ hîna i ge ǁîra ǀkha Elobmîsa ra ǁkhāǁkhāsen khoe-e ge ǁāǁnâhe. ǀOro ǁaeb aiǁgaudi tsî nētsēs aiǁgaudi tsîna tae-e ra ǁkhāǁkhāda? Nē ǂgomǂgomsa khoen ge ge ǀopesa tama hâ-i tsî ǁîn di ǃomga ge sâ kai tama hâ-i. ǁÎn di ǃnūǃnâxasib ǃaromab ge Jehovaba ǁîna ge mādawa-am. Sida tsîn ge nî “ǂgoms tsî ǃnūǃnâxasiba xu mîmâide ge ǀumin di ǁgaeǁgae-ao” kai.—Heb. 6:10-12.

15. Mâba ǀgui ǀgau ǂgoms sida di ǂgomǃgâsib hîna da aoǁnâ sîsen-i ǃnâ ūhâba ra ǀgaiǀgaisa?

¹⁵ Sida ra aoǁnâ haisi-ams ǃnâ da ge ra ǂgom. ǁNā-amaga da ge nēsa ǂgui khoen ǀkha ra ǀgoragu ǂgao. Elobmîs ǃnâ hâ mîmâide da ge ra ǂgomǃgâ. (Psa. 119:42; Jes. 40:8) Elobmîs kēbodi hîna sida di ǁaeb ǃnâ ra dîǀoaǀoahede da ge ra mû. Khoen Elobmîs di tsoatsoade ǁnâuǀnam tsî ǁîn di ûib ǃnâ ǀkharaǀkharana ra dī ǀgausa da ge ra mû. Nē ǁgauǁgaudi ge sida di ǂgomǃgâsiba ra ǀgaiǀgai. ǁNā-amagas ge nē haisi-ams Gaosib ǃgâiǂhôas disa, khoe-i hoa-i xa ra ǁnâuhe ǂgao.

16. Psalmdi 46:1-3 sa mati sida di ǂgomsa Jehovab tsî Jesub tsîn ǃnâ ra ǀgaiǀgai îda aoǁnâ ǀgara?

¹⁶ Jehovab ǃnâs tsîna da ge ǂgomǃgâsiba ūhâ, nē haisi-ams di danaba tsî ǁîb di ôab Jesub hînab ge nē Gaosib di Gao-aose a ǂnûib ǃnâ. (Jhn. 14:1) Tae-i ǀgui-i ga ī xaweb ge Jehovaba a sida di ǀgai tsî a sâuǃkhai. (Khomai re Psalmdi 46:1-3.) ǁNās xōǀkhā da ge ra ǂgomǃgâ, Jesub nē sîsen-e Jehovab xab māhe hâ ǀgaib ǀkha ǀhomma xu ra kōǃgâsa.—Mat. 28:18-20.

17. Aiǁgau-e mā ra tae-i ǃaroma da ǀûsen tamase ra aoǁâs di-e.

¹⁷ ǂGoms ge ra hui da îda ǁnā ǂgomǃgâsiba ūhâ, Jehovab sida di ǁguiǂgāsens ǃaroma nî ǀkhaedasa, ǃâubasen tama da hâ ǀgaub ǃnâs tsîna. (Aoǁn. 11:6) Aiǁgause i ge ǂgui khoena tsēs hoasa sida di ǂkhanin trolidi tsî tafeldi tsîna ra ǃkharu. Nē aoǁnâ ǀgauba sîsen-i ra? Î, sîsen ra. Novemberi 2014ǁî kurib di Our Kingdom Ministry di hâ ǂkhanib ge, ǂkham khoes hîna ge universiteits ai hâ-is hîna ge, Jehovab di ǀhûǀguitimî-aon xa xū-e gere  xoa ǂgaos xa ra ǃhoa. ǀHû-ommas ge hō tama i xawes ge sida ǂkhanin di tafelsa, universiteits tawa ge mā-i tsîs ge ǁnāpa ǂkhanina ge hō Jehovab di ǀhûǀguitimî-aon xa hâna. ǁAe-e ǃkharu tsîs ge ǁîsa ge ǁâǁnāhe tsî ge ǀhûǀguitimî-ao kai. Nēsisas ge a aimâba-ao. Nēti i aiǁgaudi ge ra ǁgau Gaosib ǃgâiǂhôasa ra ǃgâ ǂgao khoen, noxopa hâ ǃkhaisa tsî nēs ge ra ǂkhâǃnâ da îda aoǁnâ ǀgara.

18. Mati io da a mî ǁkhā Gaosib aoǁnâ sîsen-i Jehovab ǂhâba hâ khami nî ǀamsa?

¹⁸ ǂGomǃgâ ǁkhā da ge a Goasib aoǁnâ sîsen-i ǁaeb ai nî toasa. Noaxi tsēdi ǃnâ ge ī xū-e kō re. Jehovab ge ǁnāpa ge ǁgau ǁîb ǂhanu ǁaeb ai ǀgui xūna ra dīsa. 120 kurin aisib ge ǀnai Jehovaba ge mîmâi hâ-i, kai ǁgammi dâus mâ ǁae nî tsoatsoasa. ǂGui kurin ǃkharu hâseb ge Jehovaba Noaxa ge mîba îb arka om. Hakadisi tamas ka io korodisi kurigu, ǁgam-i kai dâus aiǃgâb ge Noaxa noxopa ǃgarise gere sîsen. Khoen ge ǃgâbi ǂgao tama hâ-i xaweb ge Noaxa ge aoǁâ ǀgara, Jehovab ge xamaninab arki ǃnâ ǂgā ti a mîbabis kōse. Tsîb ge Jehovaba ǁaeb ai arki di dausa ge “ǂganam.”—Gen. 6:3; 7:1, 2, 16.

19. Tae-i ǃoa da ra mûǂui sida di ǃomma da ga sâ kai tama io?

¹⁹ ǀGūǁaeb ge Jehovaba Gaosib ǃgâiǂhôas di aoǁnâ sîsen-e nî ǀam kai. Tsîb ge ǁGâuab di ǂgaeǂguisa nî hîkākā tsî ǀasa ǃhūbaib hîna ǁnâuǀnamxa khoen xa ǀhoa hâba nî hau. ǁNāǁaeb kōse hāre îda Noaxi, Habakuki tsî nau khoen hîna ge ǁîn di ǃomde sâ kai tama hâ-ina ǁgae. Tsî da ge aoǁnâ sîsen-i ai sida ǂâisa ǂnûi, ǃnūǃnâxa tsî ǀgaisa ǂgomsa nî ǃkhōǀgara Jehovab tsî ǁîb di mîmâidi ǃnâ.