1 Korinteǁîn 15:8 ǃnâb ge Pauluba ge mî: “ǀUnis aib ge ǁkhāti tita ǁaeb ai ǃnae tama ta xas tsîna ge mûhe.” ǂGuro da ge gere ǁnâuǃā Apostel Paulub ge ǃkharuǃnâb ge xūn xa gere xoasa. Jesub ǀhomsi ǂkhaisib ǃnâ hâ ai-īsibab ge mû o. Nēs ge gere mûsen ǁîb ǃnaes di aiǂhanub. Tamas ka iob gagasi khâisa ais ai gere hōsa. ǁNāti ī khâis noxopa tsoatsoa tama hâ hîna. Nē xoasa ǃnāsase ôaǃnâs ge ǃgāsasiba ra mā da, î da ǁnâuǃā da ra ǀgauba ǀkharaǀkhara.

Ama i ge, Paulub ge nēba tae-i ge ǁîb ge gagasi soros ǃnâ gere ǀkharaǀkharasen, o gere īs xa gere ǃhoasa. Xawe tae-eb gere ǂâibasen mîb ge o, “tita ǁaeb ai ǃnae tama ta” di? ǂGui ǃaroma di ge a hâ ǁkhā.

ǁÎb ge gagasi soros ǃnâ buruxa tsî ǃkhae ǀgaub ǃnâ ge ǀkharaǀkharasen. ǁAeb aiǃâ ra ǃnae ǀgôa-i ge ra buru kai da. Saulub (ega ge Paulub ase ǂansa īb) ge Damaskusa ǃoa ge ī, îb ǁnāba hâ Xristeǁîna ǃgôaǃgon. ǁÎb ge ge ǃâubasen tama hâ i îb, Jesub ǁōba xu khâi hâ ai-īsiba mû. Nē ǀkharaǀkharasens ge Paulub ǀguiba ge buruxa ba tama hâ i. Xawe ǁnā Xristeǁîn hînab gere ǃgôaǃgonhe ǂgaon tsîna ge buruxaba ī. Nēs ge kaise ge ǃhuriǃhurisa ī tsîb ge ǁaeroba ge ǂgī.—ǃNǃkh. 9:1-9, 17-19.

“ǂHanu tama ǁaeb” aib ge ge ǀkharaǀkharasen. Grikeǁî mîs “ǁaeb ai ǃnae tama” di hâs ge, ǂhanu tama ‘ǁaeb ai ǃnaes’ dis tsîna a ǂnûiǃkhunihe ǁkhā. Jerusalem Elobmîs ge nēti ra mî: “Khoe-i ǃâubasen tama hîna ta ge ge ǃnae.” Paulub ǀkharaǀkharasens aiǃâb ge Jesuba ǀnai ǀhommi ǃnâ ge hâ i. Ais ai hâ xoadi ǃnâb ge ra mî khoen ge Jesuba mû. Xaweb ge Pauluba, Jesuba ǀhommi khâisab ge hō, o ǀgui ge mû. (1Kor. 15:4-8) Paulub ge “ǁaeb ai ǃnae” tama hâ i. Xawes ge nēsa ǃēsa ge mābi, îb Jesuba khâis khaoǃgâ mû.

ǃGamǃgamsenxa ǀgaub ǃnâb ge ǁîb xa gere ǃhoa. ǀNî khoegu ǂansa ūhâgu ǃoagub ge, Pauluba ǃgâi tama ǀgaub ǃnâ kama gere ǃhoa. Nēs ga Paulub ǂâibasen hâ, ob ge aiǂhanub māheb hâba ga ǃgôaǃgâ tama hâ. Xaweb ge aiǃgû tsî ge mî: ‘Tita ge apostelgu hoagu xa a ǂkhari tsî apostelse ǂgaihesa anu tama hâ. Elob di ǀhaohâba ta gere ǃgôaǃgon amaga. Xawe Elob di ǀkhomma xus ge nē ta ī khami ta isa. Tsî ǀkhommi âb ge tita tawa ǁause ī tama ge i, o ta ge ǁîgu hoagu ǃgâ-ai gere sîsen tsî ta ge tita ǁîsa dī tama. Xawe Elob ǀkhommi tita ǀkha hâb ge ǁîsa ge dī.’​—1Kor. 15:9, 10.

ǀNîsi i ge ra mûsen, Paulub ge Jesub ge ǁîb aiǃâ, ǃâubasen tamab hâse ǀkharaǀkharasen ǀgauba ǃoa gere ǀnae ǁgausa. Tamas ka iob ge ǃâubasen tama hâ isa ǀkharaǀkharasensa. Tamas ka iob ge ǀnisi anu tamab hâ khama gere tsâ. ǁNāti ī ǀkharaǀkharasensa mûsa. Mâb ǀguib ga mâsi xaweb ge Pauluba ǃkharuǃnâb ge xū-e gere ǃgôaǃgâ. Nēs ge ǁîba dî ī ose gere ǂgomǃgâ kai, Jesub ge ǁōba xū a khâisa. ǁNā-amagab ge nau khoenab gere aoǁnâba o, nēb ge ǃkharuǃnâ xū-e ǃoa gere ǁnaeǁgau.​—ǃNǃkh. 22:6-11; 26:13-18.