Hebregowab mîs ge hoa ǀgam mîra nî sîsen-ūhesa ra mā-am. Dī-unusa ǂnûiǃkhunis ge sao ra xūn ai a ǃgaoǃgaosa:

1. Dī-unusa ǂnûiǃkhunis ǂkhâǃnâgu ra mîdi tsî gowab xoa ǀgaub ǂkhâǃnâs. Psalmdi 144:12-15 tsî ǁîs aiǃâ hâ ǁaraǃādi ge 12ǁî ǁaraǃās di ǂguro mîdi ai a ǃgaoǃgaosa. Hebregowab mîs ge ǃgâiaǂgaob di ra ǂâibasen. ǃGâiaǂgaob tsîn ge ǂguiǃnâgu ǀgaugu ǃnâ a ǁgâiǂuihe ǁkhā. Aiǁgauses ge nē mîs tsîna xū-i ǃoas tsîna ra ǁnaeǁgau, “ham-i” khami. “Ham-i” di hâs mîs ge ǀoro ǂnûiǃkhunis ǃnâ gere sîsen-ūhe. ǀNî mîdi ǃnâs ge 12ǁî ǁaraǃāsa xu 14ǁîs kōse hâ xūna ǁgai khoena ǃoa gere ǁnaeǁgau. Xawe nē mîs [ǃgâiaǂgaob] di hâs tsîn ge xū-e ǃaromasa ǃoas tsîna ra ǁnaeǁgau. Tamas ka io ǃnūriga mās ǃnâs tsîna ra sîsen-ūhe. Tsî sao rase a ǂnûiǃkhunihe ǁkhā, “nēs” “nēs ǀkhas” tamas ka io “ǀnais” ǀkhas tsîna. “ǀNai” di hâ mîs ge dī-unusa ǂnûiǃkhunis tsî ǀnî hâ ǂnûiǃkhunidi ǃnâs tsîna ra sîsen-ūhe.

2. Dī-unusa ǂnûiǃkhunis mîdi ge psalmdi ǃnâ ǃamkuse ra sîsen-ūhe. “ǀNai” di hâ mîs hîna 12ǁî ǁaraǃās ǃnâ ra sîsen-ūhes ge ǀkhaegu hîna ra saogu 12ǁî ǁaraǃāsa xu 14ǁîs kōse hâga ǂhanu-ain ǃoa ra ǁnaeǁgau. Nēn ge ‘ore te î huiǂui te re’ tsūdi-aona xu di ra ǀkhoma (11ǁî ǁaraǃās). Nē ǀkharaǀkharas ge 15ǁî ǁaraǃās ǃnâ “ǃgâiǃōs” di hâ mîsa ǀgam ǃnāra ra sîsen-ū xawes ge nēsa ǃgâi ǀgaub ǃnâ ra sîsen-ūhe. Hoa ǀgam ǃâgu ǃnâs ge ǃgâiaǂgaosa ‘ǁnā ǁaes ǃKhūba [Jehovaba, NW]’ ra ǃoabasa ǃoa ra ǁnaeǁgau. ǂÂis ǃnâ ūhâ re Hebregowab xoa ǀgaub ǃoagu i ge ǁgaeǁgae saode a ǀkhai. ǁNās ǃaroman ge ǂnûiǃkhuni-aona Hebregowab xoa ǀgaub, ǂkhoahe ra ǀgaub tsî Elobmîs xoa ǀgaub tsîna ǂâis ǃnâ nî ūhâ.

3. ǀAsa ǂnûiǃkhunis xoa ǀgaub ge ǀnî hâ Elobmîs xoa ǀgaub ǀkha a ǀguiǃnâxa tsî Elob khoen nî hōǃâ ǀkhaega ra ǁgau. ǃGâiaǂgao di hâ mîs ge ǀkharaǀkharahe hâ xoa ǀgaub ǃoagu, Psalmdi xoa-aob Davib gere ǁgâiǂuisen ǀgaub xa a xoasa. Nēs ge Elob ga Israelǁaesa ǁîn khākhoena xu ga ra sâu tsîn nî hōǃâ ǂkhîb tsî ǃgâiǃōb xa ra ǃhoa. (Lev. 26:9, 10; Deu. 7:13; Psa. 128:1-6) Aiǁgauses ge Deuteronomium 28:4 sa ra mî: “ǀKhaehesan ge nîra sa ǃnāb di ǂûtanib tsî sa ǃhanab di ǂûtanib tsî sa ǀgoan di ǂûtanib.” Tsîs ge nēsa a ama, Davib ǀgôab Salomob gere ǂgaeǂgui ǁaeb ais ge ǁaesa ǀō-aisa ǂkhîb tsî ǃgâi ûib tsîna ge ūhâ i. Tsî Salomob ǂgaeǂguis ge Mesiab di ǂgaeǂguis ǃoas tsîna gere ǁnaeǁgau.​—1Gao. 4:20, 21; Psa. 72:1-20.

ǀAms ai sida Psalmdi 144ǁî danaǃâsa ra ǁnâuǃā ǀgaub ge, sida Elobmîsa ra ǁnâuǃā ǀgauba dawa tama hâ. Xawe di ge Psalmde Elob khoen ūhâ ǃâubasensa ra ǂhaiǂhai. Nēs ge tsūdi-aon nî dīkākāhe tsîn Elob khoena ǀamo ǂkhîba ǃhūbaib ai nî ūhâs di ǃâubasens tsîna ǃkhōǂgā hâ.​—Psa. 37:10, 11.