1. Jehovaba tae-i ǁkhaeǂgaosa ge mā Edenni ǃhanab ǃnâ ge hâ mâǃoas ǁaeb ǃnâ?

KHOEN ge ǁoreb tsî ǁōb tsîna a ǀumisa xub ge Jehovaba ra ǁgau ǁîb a ǁkhaeǂgaos di Elosa. Edenni ǃhanab ǃnâ ge hâ mâǃoas khaoǃgâb ge Jehovaba Adammi suriba ge mîba în ǁkhoaǂgaosiba ūhâ. Khoesib ge hoa-e ge ǂoaǃnâ tama hâ i. Genesis 3:15 ǃnâ a māsa kēbos ge khoesib hoaba ǃâubasensa ge mā, “kaira ǀaob” ǁGâuab tsî ǁîb dīgu tsîn ge nî dīkākāhe di.​—J.ǂHa. 12:9; 1Jhn. 3:8.

2. Jehovaba Noaxa mati ge ǁkhaeǂgao?

² Jehovab ǃoaba-aob Noaxi ge eloxoresa ǃhūbaib ǃnâ gere hâ. Noaxi tsî ǁîb omaris tsîn ǀguin ge ǁnā ǁae  Jehovaba gere ǃoaba. ǂKhabadīb tsî ǁgauoǃnâ ǁgoe-ūgub ge kaise ǀoa hâ i amagab ge Noaxa ge ǂkhabuǂâi. (Gen. 6:4, 5, 11; Jud. 6) Xaweb ge Jehovaba ǁîba ǃnāsa ǃgāsasiba ge mā hîna ge ǁîba ǁkhoaǂgaosiba a māba îb “eloǃaoǃgâxase . . . tanisen.”(Gen. 6:9) Jehovab ge Noaxa ge mîba ǁnā eloxoresa ǃhūbaibab nî dīkākāsa. Tsî Noaxa ge mîba tae-eb nî dīsa în ǁîb omaris ǁanina sâuhe. (Gen. 6:13-18) Jehovab ge Noaxa ge ǁgau ǁîb a ǁkhaeǂgaos di Elosa.

3. Josuaba tae-i ǁkhaeǂgaosa ge hō? (Tsoatsoas ǃnâ hâ ai-īsiba mû re.)

³ Egab ge Josuaba ǃgom sîsen-e ge māhe Elob khoena mîmâisa ǃhūba ǃoa daoǁgausa. Nēs ge gere ǂâibasen ǁnā ǃhūb di khoen ǀkhab nî ǃkhamsa. Josuab ge ǃaroma-e ge ūhâ i ǃaos di-e. Jehovab ge nēsab a ǂan amaga Moseba ge sî îb Josuaba ǁkhaeǂgao. Elob ge ge mî: “ǁNâi Josuaba mîmā, îts ǁîba ǀgaiǀgai îts ǁîba ǁapoǁapo: ǁÎb ge nē ǁaes di ais aiǃâ ǃgâu tsî nî ǁnā ǃhūb, sats nî mûba ǁîna ǀumi kai.” (Deu. 3:28) Josuab khoena nî daoǁgaus aiǃgâb ge Jehovab sao ra mîde ge mî: “Tita mîmā tsi tama ta hâ ǁîsa? ǁNâi ǀgaisa îts ǃgâiǂâixa, îts tā ǃhuri îts tā burugâ; ǃKhūb, sa Elob ge sa ǀkha hâ, mapats ga ǃgûs hoasa.” (Jos. 1:1, 9) Nē ǁkhaeǂgaos ge ge ǂoaǂamsa i.

4, 5. (a) Jehovaba ǃkharu ge ǁaeb ǃnâ khoena mati gere ǁkhaeǂgao? (b) Jehovaba ǁîb ǀGôaba mati ge ǁkhaeǂgao?

⁴ Jehovab ge khoena ǂkhâǃnâs ǀguisa ge dī tama hâ i xaweb ge ǁîna ǁkhaeǂgaos mîde gere mā. Nēs ge Jodeǁîn hîna ge Babilons ǃnâ ǃkhōsis ǃnâ hâ îna ǁkhaeǂgaos ase ge ība i. Jehovab ge ge mî: “Tā ǃao, tita ge sa ǀkha hâ xuige; tā sau, tita ge a sa Elo xuige. Tita ge ra ǀgaiǀgai tsi, tita ge ǁkhāti ra hui tsi; tita ge ǁkhāti ra mâǃgâ tsi amǀkhābǁôab ti ǂhanu-aisib dib ǀkha.” (Jes. 41:10) ǃKharu ge ǁaeb Xristeǁîn ge nē ǃâubasensa ge ūhâ i tsî sida tsîna nētsē.​—Khomai re 2 Korinteǁîn 1:3, 4.

⁵ Jesub tsîn ge ǁîb ǁGûb xa gere ǁkhaeǂgaohe. ǁÎb ǁāǁnâs tawab ge Jesuba domma ge ǁnâu, mî rase: “Nēb ge ti ǀgôab, ǀnam ta aba, ǃgâiǃgâibasensa ta ūǃnâ hâba.” (Mat. 3:17) Nē mîdi ge Jesuba ǃhūbaib aib ge hâ io gere ǁkhaeǂgao.

6. ǂKhōs hîna talendi xa hâsa tae-i ǁkhaeǂgaosa ra mā?

⁶ Jesub ge ǁîb ǁGûb aiǁgause gere ǁgae. ǂKhōs hîna talendi xa hâs, Jesub kēbos ǀuni tsēdi dis ge ǂgomǂgomsasiba ra ǂkhâǃnâ. Jesub ge ǁîb ǂgomǂgomsa ǃgāna ge mîba: “Aio, ǃgâi tsî îǂhôa ǃgātse, ǀoron ǂamats ge ǂgomǂgomsa i, o ta ǂguin ǂama nî mâi tsi: ǂGâ sa ǃKhūb di ǃgâiaǂgaob ǃnâ.” (Mat. 25:21, 23) Nēs ge ra ǂkhâǃnâ da ǂgomǂgomsase Jehovaba ǃoabasa.

7. Jesuba ǁîb apostelga tae-i ǂkhâǃnâsa ge mā?

⁷ Jesub apostelgu ge gere ǂnoagu hami ǁîgu ǃnâ a ǀgapisa xaweb ge Jesuba ǁîga ge ǂkhâǃnâ î gu ǃgamǃgamsen tsî ǃgāgu khami tanisen ǀhonkhoegu khamis ose. (Luk. 22:24- 26) Petrub ge ǂgui ǃnāde Jesuba ge ǂkhîoǃnâ kai. (Mat. 16:21-23; 26:31-35, 75) Jesub ge Petruba ge ǂkhābē tama hâ i xawe ǁîba ge ǁkhaeǂgao tsî ge mîba bi îb ǁîb ǃgâsana sī ǂkhâǃnâ.​—Jhn. 21:16.

8. Hiskiaba mati toroǂamsagu tsî Judab khoen tsîna ge ǁkhaeǂgao?

⁸ Jehovab ǀGôab ǃhūbaib ai nî hā tsî aiǁgausa nî mā aiǃgân ge Jehovab ǂgomǂgomsa ǃoaba-aona ǀnai gere ǁgūtsâ ǁkhaeǂgaogusa. Asiriaǁîn xan gere ǃkham ūhe ǂgao o, ob ge Hiskiaba toroǂamsagu tsî Judab khoen tsîna ge ǀhaoǀhao îb ǁîna ǁkhaeǂgao. “Tsî ǁaes ge mîdi Hiskiab, Judab gao-aob didi ai ge ǂgomaiǂnûi.”​—Khomai re 2 Kroniks 32:6-8.

9. Jobi ǂkhanisa tae-e ǁkhaeǂgaos xa ra ǁkhāǁkhā da?

⁹ Jobi tsîn ge ǁkhaeǂgaosa ge ǂhâ hâ i xaweb ge ‘ǂkhabusa ǁkhaeǂgao-aoga’ ge ǁkhāǁkhā mati gu nî ǁkhaeǂgaosa. ǁÎb ge ‘ams ǀkha ǀgaiǀgai gu tsî  . . . ge ǁkhaeǂgao gu.’ (Job. 16:1-5) Jobi ge Elihub tsî Jehovab tsîn xa ge ǁkhaeǂgaohe.​—Job. 33:24, 25; 36:1, 11; 42:7, 10.

10, 11. (a) Jeftab ǀgôasa tae-i ǃaroma ǁkhaeǂgaosa ge ǂhâ hâ i? (b) Hamna nētsē ǁkhaeǂgaosa ǂhâ hâ?

¹⁰ ǀNî hâ aiǁgaus ǁkhaeǂgaosa ge ǃkharu ge ǁaeb ǃnâ ǂhâ hâ i khoe-i dis ge Jeftab ǀgôasa. Amonǁîn ǀkhab sī nî ǃkhams aiǃgâb ge Jeftaba ge mîǁgui Jehovab ga dansa ga ra mā bi o, ob ǂgurose ǃkhams khaoǃgâ omsa xu ra ǂoaxa khoe-e Jehovaba nî mā î-i ǁîba ǃoaba-ommi tawa sī ǃoaba. Tsî î ge ǁîb ǀguise ūhâ ǀgôasa ge ǂoaxa is ǁîb ǀkha ǃgâiaǂgao dans ǃgao. Jeftab ge ge tsûaǂgao. Xaweb ge ǁîb mîmâisa ge ūhâ ǀgara tsî ǁîb ǀgôasa Siloba ǃoa ge sî is tabernakeli tawa sī ǃoaba.​—ǂHǂh. 11:30-35.

¹¹ Nēs ge Jeftab tsî ǀgôasas tsîna kaise ge ǃgomba i xawes ǁîsa dadasab mîǁguiga ge ǁnâuǀnam. (ǂHǂh. 11:36, 37) ǁÎs ge ge ūǃoa ǃgame tama i, ǀgôana hō tama i tsîs omaris ǀonsa aiǃgû kai tidesa. ǁÎs ge ǂkhâǃnâhes tsî ǁkhaeǂgaos tsîna ge ǂhâ hâ i. Elobmîs ge ra mî: “O i ge ge ǁnaeti kai Israeli ǃnâ, kurikorobe di Israeli di ǀgôade gere ǃgû ǃkhaisa, Jeftab Gileadǁîb di ôasa di nî ābase, haka tsēde kurib ǃnâ.” (ǂHǂh. 11:39, 40) Xristeǁîn hîna ǃgame tama i tsî ǁîn ûiba ‘ǃKhūb din xa ra ǂhansen an’ ge koahes tsî ǁkhaeǂgaos tsîna ǂhâ hâ.​—1Kor. 7:32-35.

12, 13. Petruba ‘ǃgâsana mati gere ǁkhaeǂgao’?

¹² ǁŌb nî ǃuis aiǃgâb ge Jesuba apostel Petruba ge mîba: “Simontse, Simontse, mû, Satanni ge sago ge ǂganǂuibasen, ǃhorob khamib nî ǀgora gose. Xawe ta ge satsa ge ǀgoreba, ǂgoms âts ǀuni tidese; îts ǁnâi, ǀguitsēts ga ǃhobaseno, ǃgâsagu âtsa ǀgaiǀgai.”​—Lukab 22:31, 32.

¹³ Petrub ge ǃkharu ge ǁaeb Xristeǁîna gere ǂkhâǃnâ. (Gal. 2:9) ǁÎb aiǁgaus pinkstertsēs dis ge ǃgâsana  gere ǁkhaeǂgao. ǀUniga tsēdi ǁîb aoǁnâ sîsenni didi aib ge ǃgâsan ǃoa ge xoa. Nēsa ǁguiǃās ǃgaob ge ge mî: ‘ǀNîrona ta go xoa, ǁnama tsî ra ǃkhō-amǃâ, nē ǀkhommi Elob dib, ǁîb ǃnâ du mâb a ama-ai ǀkhom ǃkhaisa.’ (1Pet. 5:12) Petrub mîdi ge nētsēs kōse Xristeǁîna ra ǁkhaeǂgao. Tsîn ge Jehovab di mîmâisa ǃâubasen hâ.​—2Pet. 3:13.

14, 15. Apostel Johaneb ǂkhanide Xristeǁîna mâ ǀgaugu ǃnâ ra ǁkhaeǂgao?

¹⁴ Apostel Johaneb tsîn ge ǃkharu ge ǁaeb Xristeǁîna gere ǂkhâǃnâ. ǁÎb ǀō-aisa ǃGâiǂhôas xoadi hînab Jesub aoǁnâ sîsenni xa xoa hâdi ge Xristeǁîna nētsēs kōse ra ǁkhaeǂgao. ǁÎb ǃGâiǂhôas ǂkhanis ge ra ǁgau Jesub ge mîsa ǀnammi ge ama ǁkhāǁkhāsaben ǁgauǁgaus ase nî ī di.​—Khomai re Johaneb 13:34, 35.

¹⁵ Johaneb ǃnona ǂkhanidi ge ǀō-aisa amaba ūhâ. ǁOreb xa da ga ǂkhabuǂâi o, ǃgâiaǂgao tama i da hâ khomai da ra o “tsî ǀaob Jesub Xristub     dib ge ǁoren hoana xu ra ǃanuǃanu da” di. (1Jhn. 1:7) Sida ǂgaob ga ra ǀgoraǃgâ da o, o da ǃgâiaǂgao tama hâ ‘Elob sada ǂgaob ǃgâ-ai a kai’ di da ra khomai o? (1Jhn. 3:20) Johaneb ge ge xoa “Elob a ǀnam” di. (1Jhn. 4:8, 16) ǁÎb ǀgamǁî tsî ǃnonaǁî ǂkhanidi ge Xristeǁîn hîna ‘amab ǃnâ ra ǃgû na’ ra koa.​—2Jhn. 4; 3Jhn. 3, 4.

16, 17. Apostel Pauluba tae-i ǁkhaeǂgaosa ǃkharu ge ǁaeb Xristeǁîna ge mā?

¹⁶ Apostel Paulub ge ǃnāsase ǃgâsana ǃkharu ge ǁaeb ǃnâ gere ǁkhaeǂgao.  Nēs ge ra ǁgau ǃkharu ge ǁaeb ǃnâ î ge ǀnî apostelga Jerusalems ǃnâ a hâsa. ǂGaeǂguira soros ge ǁnāpa ge hâ i. (ǃNǃkh. 8:14; 15:2) Xristeǁîn ge khoena Xristub xa gere aoǁnâba Judeab ǃnâ, khoen ge Jodeǁîn ǂgoms ǃoagu Elob ǃnâ ǀgui gere ǂgom amaga. Apostel Paulub ge ǃanu gagab xa ge sîhe îb Grikeǁîn tsî Romeǁîn tsîna sī aoǁnâba, khoen ge ǁnāpa ǂgui eloga gere ǃoaba amaga.​—Gal. 2:7-9; 1Tim. 2:7.

¹⁷ Paulub ge ǃnū ǃhūga ǃoa gere ī nēsi Turkib, Grikeǃhūb tsî Italiab di a ǂansa ga ǃoa îb Xristeǁî ǀhaohâga sī omkhâi. Nē Xristeǁîn ge ‘ǃgomsiba ǁîn ǁanǁare-aona xu gere hōǃâ’ tsî ǁnā amaga ǁkhaeǂgaosa ge ǂhâ hâ i. (1Tes. 2:14) 50ǁÎ kuri Jesub ge ǀhomma ǃoa a ǃapas khaoǃgâb ge Pauluba Tesalonikaǁîn ǀhaohâba ǃoa ge xoa: “Sige ge mâ ǁaeb hoab ai Eloba sadu ǃaroma ra gangan, tsî ge ge ǀûs ose sadu xa ra ǂâi sige ǀgoredi ǃnâ; tsî ge ge ra ǂâi sadu ǂgoms di sîsenni xa, tsî sadu ǀnammi di xūreb xa, tsî sadu ǃâubasens di sâsasib xa.” (1Tes. 1:2, 3) ǁÎb ge ǁÎna ge ǂkhâǃnâ, mî rase: “ǁNā-amaga ǁnamagu re, î-i nē-e nau-e ǂnubikhâi.”​—1Tes. 5:11.

18. ǃKharu ge ǁaeb ǂgaeǂguira sorosa mati Filipuba ge ǂkhâǃnâ?

¹⁸ ǃKharu ge ǁaeb ǂgaeǂguira soros ge ǀhaohâb ǃûi-aogu ǀguiga ge ǁkhaeǂgao tama hâ i xawe hoa Xristeǁîna gere ǁkhaeǂgao. Filipub ge Samariaǁîna Xristub xa a aoǁnâba o, ob ge ǂgaeǂguira soros xa ge ǂkhâǃnâhe. ǂGaeǂguira soros ge Petrub tsî Johaneb tsîna ge sî îgu ǃgâsana sī ǀgoreba în ǃanu gagaba hō. (ǃNǃkh. 8:5, 14-17) Filipub tsî nau ǃgâsan tsîn ge nē ǂkhâǃnâs hînan ge ǂgaeǂguira sorosa xu a hōs xa ge ǁkhaeǂgaohe.

19. ǂGaeǂguira soros ge sî sîǂkhanisa mati ǃkharu ge ǁaeb Xristeǁîna ge tsâǀkhā?

¹⁹ Ega î ge ǂgaeǂguira sorosa ge dîhe îgu mîǁguiba dī Jodeǁî tama Xristeǁîn tsîn nî ǃgaohesa, Moseb di ǂhanub ǃoagu. (ǃNǃkh. 15:1, 2) ǃAnu gagab daoǁgaus ǃnaga tsî Elobmîsa ôaǃnâ hâse gu ge ǁîga ge mîǁgui nēs ǂhâbasa tama hâsa tsî sîǂkhanisa ǀhaohâga ǃoa ge xoa. ǂGaeǂguira soros ǂnûǁkhaeba-aon ge nē sîǂkhanisa ǀhaohâga ǃoa ge sî. ǀAmǂoasa ge tae-i? “Tsî khomain ge, on ge ǁkhaeǂgaos ǂama ge ǃgâiaǂgao.”​—ǃNǃkh. 15:27-32.

20. (a) ǂGaeǂguira sorosa nētsē tae-i ǁkhaeǂgaosa ǃhūbaib ǂhawase hâ ǃgâsan hoana ra mā? (b) Mâ dîsa sao ra ǁkhāǁkhāǃâs ǃnâ nî ǃereamhe?

²⁰ Nētsēs ge ǂGaeǂguira soros Jehovab di ǀHûǀguitimî-aon disa Betels omaris ǁanin, ǀō-aisa aimâba-aon, sîsaben tsî ǃhūbaib ǂhawase hâ ǃgâsan hoan tsîna ra ǁkhaeǂgao. Tsî ǀamǂoas ge ǃkharu ge ǁaeb ǀkha a ǀgui, ǃgâsan ge ǁkhaeǂgaohes khaoǃgâ ra ǃgâiaǂgao. 2015ǁÎ kurib ǃnâs ge ǂGaeǂguira sorosa Oa hā re Jehovaba ǃoa di hâ ǂkhaniba ge māǂui, nē ǂkhanib ge ǂgui khoena ge ǁkhaeǂgao. Xawe ǀhaohâb ǃûi-aogu ǀguiga Jehovaba nî ǁgae ǁkhaeǂgaos ǃnâ? Nē dîs ge sao ra ǁkhāǁkhāǃâs ǃnâ nî ǃereamhe.