1, 2. (a) Tae-i ǃaroman ge khoena Paulub tsēdi ǃnâ ǃgāsis tsî ǃnorasasib xa gere ǂâiǂhansen? (b) Pauluba khoena ham-e ǃoa ge ǁnaeǁgau ǃnorasasiba hōs ǃgao?

ROMEǁÎN ǁaeb ǃnâ ge ûi hâ i Xristeǁîn ge ǀgapiǂâixasib xa ge ǀoahe hâ i. Nēs ge ǃnāsase ǂhanugu, ǂhanu-aisib tsî ǃnorasasib tsîna ge ǃkhōǂgā hâ i. Xawe i ge Romeǁîn di ǀgaib tsî ǂhaisib tsîna ǃgā dīn gere khoena xu ge hâ i. ǀNî ǁaeb ai gere ǃgôahes ǃoagu i ge 30 persenti khoena ge ǃgā i Romeǁîn ǀharib ǃnâ. ǁNās ǃaroman ge ǃnāsa khoena ǃnorasasib xa hoaǁae gere ǃhoa ǁnās ge Xristeǁîn tsîna ge ǃkhōǂgā hâ i.

² ǁNā ǃkhais ǃaromab ge apostel Pauluba ǃnāsase ǁîb ǂkhanidi ǃnâ ǃnorasasib xa ra ǃhoa. ǁÎb aoǁnâ sîsenni di ǂâibasens ge ǀhûhâsib ǃgomsina ǃkhambas tamas ka io ǂgīǂgōsi xūna aiǃgû kais ai ge ǃgaoǃgaosa tama hâ i, khoen ge kaise gere ǂhâba xūn ge i xawe. Khoesi ǂgaeǂguis ai kōs xab ge Paulub tsî ǀnî Xristeǁîn tsîna ǃgarise ge sîsen în Elob Gaosib ǃgâiǂhôasa khoena aoǁnâba. Tsî ǀnōhe ǁoasa ǁguibas xoremarib Jesub Xristub disa ǃgôaǃgâ. Paulub ge ǂgomsabena ge hui în ama ǃnorasasiba hō. ǁÎb  di ǀgamǁî sîǂkhanis Korinteǁîn ǀhaohâba ǃoas ǃnâb ge sao rana ge mî: “ǃKhūb ge a Gaga; tsî ǃKhūb di Gagab hâpa, ǁnāpab ǃnorasiba hâ.”​—2Kor. 3:17.

3, 4. (a) Tae-e ge dī îb Pauluba 2 Korinteǁîn 3:17 ǃnâ xoasa xūna mî? (b) Tae-e da nî dī î da Jehovaba xu ra hā ǃnorasasiba hō?

³ ǀGamǁî Korinteǁîn di tsoatsoas ǃnâb ge Pauluba Moseb ǂhaisib xa ra ǃhoa, matib ge Sinaiǃhomma xub ge ǁgôaxa o a mûsen ǀgaub xa. Khoen ge Moseban ge mû o ge ǃao, ǁnā-amagab ge Moseba ǁîb aisa ǃkhaib ǀkha ge ǃgū-ai. (Eks. 34:29, 30, 33; 2Kor. 3:7, 13) “Xawe” Paulub ge ra ǁguiǃā, “ǃKhūb ǃoan ga ǃhobaseno, os ge ǃgū-aisa nîra ūǁnâhe.” (2Kor. 3:16) Paulub mîde tae-e ra ǂâibasen?

⁴ ǃKharu go ǁkhāǁkhāǃâs ǃnâ da ge go ǁkhāǁkhāsen, Jehovab ge hoana a kuru ǃkhaisa tsîb ǁÎb ǀguiba hâhâ ra ǃnorasasiba ūhâsa. Nēs ra ǂâibasens ge Jehovab tsî ǁîb “gagab hâpa” ǁnāpab ge ǃnorasiba hâ. ǁNā ǃnorasasiba xu ǃgâiba hōs ǃaroma da ge ‘Jehovab ai nî kō,’ ǁîb ǀkha ǀgaisa ǀhōsagusisa oms ǃnâ-ū. Israelǁaes hîna ge ǃgaroǃhūb ǃnâ hâ îs ge gagasi mûǂuisa ge ūhâ tama hâ i, Jehovab ge ǁîna gere hâ ū ǀgaus ǃnâ. ǁÎn di ǂgaob tsî ǂâidi tsîn ge ǃgari tsî ge ǃgū-aisa i. ǁÎn ge Egypteba xun ge ǃnora kaihe o, o nē ǃnorasasiba ǁgansise gere mû.​—Heb. 3:8-10.

5. (a) Jehovab gagaba tae-i ǃnorsasiba ra mā? (b) Mati da a ǂan ǁgansi ǃgāsis, Jehovab ra mā ǃnorasasiba dan tidesa? (c) Mâ dîde da nî ǃhoaǃgao?

⁵ Jehovab gagab ǀkha a ǃkhōǀhaosa ǃnorasasib ge ǁgansi ǃgāsisa xu ǃnora kaihes xa a ǃgâi. Khoesib a dī ǁkhā xūn ǃâ-aib ge Jehovab gagaba ǁoreb tsî ǁōb tsîna xu ra ǃnora kai da. ǁNās xōǀkhā ama tama ǂgoms tsî ǁîs dī xūna xus tsîna ra huiǂui da. (Rom. 6:23; 8:2) ǁNāsa ǂoaǂamsa ǃnorasasi tamasa? Khoe-i ge ǁnā ǃnorasasiba a hōǃâ ǁkhā ǃkhō-oms ǃnâ i ga hâ tamas ka io ǃgā i ga xawe. (Gen. 39:20-23) Nēs ge a ama ǃgâsas Nancy Yuens tsî ǃgâsab Harold King hâra xa, ǁîra ge ǁîra ǂgoms ǃgao ǃkhō-oms ǃnâ ge hâ i. ǁÎra xa du ge JW Broadcastings tawa a kō ǁkhā. (Look under INTERVIEWS AND EXPERIENCES > ENDURING TRIALS.) Mati da a ǁgau ǁkhā sida ǃnorasasiba da ra ǃgôaǃgâ ǃkhaisa? Tsî mati da gā-aise sida ǃnorasasiba a sîsen-ū ǁkhā?

6. Israelǁaesa mati ganganoǃnâsiba ge a ǁgau māhen ge ǃnorasasib xa?

⁶ ǀKhaehe da go xū-i ra ǂgan marisa da ga ǂan o, o da ge mā-ao-e ra gangan. Israelǁaes ge Jehovab ge ǁîna a mā ǃnorasasiba ge ǃgôaǃgâ tama hâ i, Egypteba xun ge ǃnora kaihe o. ǂGui ǁkhâgu tsîn ǃkharu tama hâ hînan ge Egypteb ǃnân gere ǂû tsî ā xūna ge ǁkhore tsoatsoa. Tsî Jehovab ge mā nî xūna ge ǃgôaǃgâ tama hâ i tsî Egypteba ǃoa gere oa ǂgao. ǁÎn ge ‘ǁaun, komkommer an, waatlemun an, tsuibel an tsî knoffel an’ tsîna Elob ge ǁîna a mā ǃnorasasib ǁîba ǃoabas dib ǂamai ge mâi. Buruxa-e Jehovab ge nē ǁaes ǀkha a ǁaixa ǃkhaisa? (Num. 11:5, 6, 10; 14:3, 4)Tae-e da go nēpa xu ǁkhāǁkhāsen?

7. Pauluba mati 2 Korinteǁîn 6:1 mîdi ǀkha ǀguiǃnâxase gere tanisen tsî sida mati ǁnāsa a sao ǁkhā?

 ⁷ Apostel Paulub ge Xristeǁîna ge ǂkhâǃnâ în tā Jehovab ge Jesub ǃnâ-ū a mā nî ǃnorasasiba ǁause ǃgôa. (Khomai re 2 Korinteǁîn 6:1.) ǂÂi-oa re tsûb Paulub gere hōǃâba ǁoreb tsî ǁōb ǃgāb ge io. Xaweb ge ǃgâiaǂgaob ǀkha ra mî: “Eloba ta ra gangan Jesub Xristub sada ǃKhūba xu.” Tae-i ǃaroma? ǁÎb ge Xristeǁî ǃgâsana ra mîba: “ǂHanub Gagab dib, Xristub Jesub ǃnâ hâ ûib dib ge ǁoreb tsî ǁōb tsîkha di ǂhanuba xu ǃnoraǃnora te hâ.” (Rom. 7:24, 25; 8:2) Paulub khami da ge sida tsîna ǁoreb tsî ǁōba xu da ǃnora kaihe hâ ǃkhaisa nî ǃgôaǃgâ. Xoremarib ǃgao da ge Eloba ǃgâiǂâis tsî ǃgâiaǂgaob ǀkha a ǃoaba ǁkhā.​—Psa. 40:8.

8, 9. (a) Tae-i ǃkhâikhomsab ge Petruba sida ǃnorasasib xa mā? (b) Tae-i ǃgomsinan ǂkhamkhoena nētsē a hōǃâ ǁkhā?

⁸ ǃGôaǃgâsiba da ra ǁgau hîna da ge tātsēs tsîna sida ǃnorasasiba ǃgâi tama ǀgaub ǃnâ sîsen-ū tide. Apostel Paulub ge ra ǃkhâi da î da tā sida ǃnorasasiba ǁgansi turagu ǃgao sîsen-ū. (Khomai re 1 Petrub 2:16.) Nē ǃkhâikhomsa Israelǁaes ǀkha ge ī xūn xa ǂâi kai da tama hâ? Xawe nēs ge kaise sida nî ǁkhōǁkhōsaba. ǁGâuab tsî ǁîb ǃhūbaib tsîn ge xūna îsase ra mûsen kai, sara anas, ǂû-i, xûi-i tsî ǁkhoaxasib tawa i ga ra hā o. Kaise gā-ai ǁamaxū-aon ge gaxaǃnâsiba ra sîsen-ū î da mâ xū-i hoa-e ǁama ǂgao. Nē xūna da ǂhâ tama hâ xawe. Kaise i ge nî supu ǁnāti i xūna ǂgaosa tsî sida ǃnorasasiba ǃgâi tama ǀgaub ǃnâ sîsen-ūsa.

⁹ Petrub ra mā ǀapemās tsîna da ge ǂgaob ǀkha nî ū, ûib ǃâga i ra tsâǀkhā amaga. Aiǁgause ǀgapi ǁkhāǁkhās tsî dī da ra sîsenni mîǁguigu tsîna i ge ǃkhōǂgā hâ. ǂKhamkhoen ge nētsē ǁgâib ǃnaga hâ ǂoaǂamsa ǀgapi ǃkhaib tawa sī ǁkhāǁkhāsens ǃgao. ǁÎn ge ra ǂgom kaihe ǀgapi ǁkhāǁkhāsats ga ra ūhâ o, ots ge ǃgâise ra matare sîsen-e nî hō di. Tsî ǁnās ǀkha ra ǀgapiǃgôahe. ǃKharagagusib ge hâ ǀgapi ǁkhāǁkhāsa ūhân tsî ǀgapi ǁkhāǁkhāsa ūhâ tama ǂkhamkhoen ǁaegu. Nē mîǁguiga dīs ge ǂkhamkhoena a tsâǀkhā ǁkhā tsî ǁîna ǃgâi xū-i ase a ība ǁkhā. Tae-en ǂkhamkhoen tsî ǁîn ǁgûn tsîna ǂâis ǃnâ nî ūhâ?

10. Tae-e da ǂâis ǃnâ ra ūhâ ǂgao sida ǃnorasasib xa hâ mîǁguiga da ga dī o?

¹⁰ ǀNî khoen ge ra tsâ mîǁguigu tawa i ga ra hā o, o i ge mâ khoe-i hoa-e nî mîǁguibasen. ǁÎ-i di ǃgâiǂâis ga ǁî-i ǃnorasasiba ǁgaiǁgai tama io, os ge ǁnāsa a ǃgâi din ge ra ǂâi. ǀNîn ge Paulub mîde ǂâis ǃnâ a ūhâ ǁkhā Korinteǁî ǀhaohâb ǃoab ge xoasa ǂû-i xa: “Tare xū-i ǃaromab kha ti ǃnorasiba nau-i di ǂâis xa ra ǀgoraǃgâhe?” (1Kor. 10:29) Ama as ge mâ khoe-i hoa-i ge a mîǁguibasen ǁkhā ǀgapi ǁkhāǁkhās tsî sîsenni ǃgao mîǁgui-e dīsa. Xawe da ge ǂâis ǃnâ nî ūhâ sada ǃnorasasib ge sada xu hâ tama hâ tsî sada mîǁguigu ge ǃaromana a hau ǁkhā. ǁNā ǃkhais ǃgaob ge Pauluba sao ra mîde ge xoa: “Hoana ta mā-amhe hâ xawen ge hoana harebe tama hâ; hoana ta mā-amhe hâ xawen ge hoana ǂnubikhâi tama hâ.” (1Kor. 10:23) Nēs ge a hui da ǁkhā î da ǂanǃgâ kaise ǂhâǂhâsa xūn  hâsa ǂâis ǃnâ da nî ūhâna, sida di ǃnorasasib xa.

11. Tae-i ǂâibasens ǀkha da ge ǃnora kaihe?

¹¹ Petrub ge sida ǃnorasasiba ǃgâi tama ǀgaub ǃnâ sîsen-ūs ǃoagu ǃkhâi da o, ob ge ǂâibasen-e ge ūhâ i. ǁÎb ge ge ǂkhâǃnâ da î da ǃnorasasiba “Elob di ǃgāse” sîsen-ū. Ama ǂâibasens ge Jehovab ge Jesub ǁguibas ǃnâ-ū ǁoreb tsî ǁōba xu a ǃnora kai dasa. ǁNās ǀkha da ge māǁnâsen hâ “Elob di ǃgāse.”

12. Tae-i aiǁgausab ge Noaxi tsî ǁîb omaris tsîna ǁgau da?

¹² Sida ǃnorasasiba da ga ǃgâi ǀgaub ǃnâ ga ra sîsen-ū ǂgao o, o da ge ǂōrisase gagasi mîǁguiga nî dī. ǁNās ge nî hui da î da tā ǃhūbaib di xūna tura. (Gal. 5:16) Aiǁgause, Noaxi tsî ǁîb omaris xa ǂâi re. ǁÎn ge tsūdīb tsî ǁgaiǁgaibe ǃhūbaib ǃnâ ge ûi hâ i. ǁÎn ge ge ǂgōsen ǁîn ǂamipe hâ khoen gere dī xūna saosa. Matin ge ǁnāsa dī hō? ǁÎn ge ge ǁhûibasen Jehovab ge ǁîna a mā sîsenna dīsa, ǁnās ge arka omsa. ǁÎn ge ǂû-e ǁîn tsî xamanin ǃgao ǀhaoǀhao tsî khoen tsîna gere ǃkhâikhom. “Ob ge Noaxa ge dī; Elob ge ǁîba mîmās ǁkhās khami.” (Gen. 6:22) Tsî ǀamǂoasa ge tae-i? Noaxa tsî ǁîb omaris tsîn ge ge ûiǃkharu.​—Heb. 11:7.

13. Tae-i mîmāsab ge Jesuba ǃkhōǃoa tsî ǁîb ǁkhāǁkhāsabena mā în dī?

¹³ Jehovaba nētsē da tae-e nî dīsa mîmā hâ? Jesub di ǁkhāǁkhāsaben ase da ge ǃamkuse sida mîmās Eloba xu ra hāsa a ǂan. (Khomai re Lukab 4:18,19.) Nētsēn ge ǂgui khoena ǂgīǂgīhe hâ nē ǃhūbaib di elob xa tsî eloǃoabadi, ekonomib tsî ǀhûhâsib dī xūn ǃnâ-ū ǃgāse ǃkhōhe hâ. (2Kor. 4:4) Sida aiǂhanub ge Jesub aiǁgausa  saosa tsî khoena huisa în Jehova Eloba ǂan tsî ǃoaba. ǁÎb a ǃnorasasib di Elo amaga. (Mat. 28:19, 20) Nē sîsen-i ge supu tama hâ tsî ǂgui ǃgomsina ǃkhōǂgā hâ. ǂGui ǃhūgu ǃnân ge khoena ǁae tama hâ ǀgauba ūhâ tsî ǀnîna ǁaixasa. Dîs hîna da nî dîsens ge: ‘Ti ǃnorasasiba ta a sîsen-ū ǁkhā î ta Gaosib sîsenna ǂkhâǃnâ?’

14, 15. Jehovab ǃoaba-aona mâ mûǂui ǀgauba ūhâ aoǁnâ sîsenni xa? (Tsoatsoas ǃnâ hâ ai-īsiba mû re.)

¹⁴ ǂGuin ge nētsē ra mûǂan mâǁaeb ǃnâ da ûi hâsa tsî ǀgui ǃgupu ûiba ûi tsî ǀoasase aoǁnâ sîsenni ǃnâ ra ǁhao. (1Kor. 9:19, 23) ǀNîn ge ǁîn ǂharidi ǃnâ ra sîsen tsî ǀnîna ǂhâsib ǃnāsase hâba sī ra aoǁnâ. ǃNurigu ge ra ǁgau ǃkharu ge 5 kurigu ǃnâ i ge aimâba-aon ǃgôaba 1 100 000 xa a ǃnāsa ǃkhaisa. Miliuns xa ǃnāsan ge noxoba ǃhūbaib ǂhawase ra ǀarosen în ǀoasase aoǁnâ. Nēsa ǂoaǂamsa tama hâ tsî gā-ai ǀgaub ǃnâ ǃnorasasiba sîsen-ūsa ǁgau tama hâ Jehovaba ǃoabas ǃnâ.​—Psa. 110:3.

¹⁵ Tae-e nē ǃgâsana ge hui în ǁîn ǃnorasasiba gā-ai ǀgaub ǃnâ sîsen-ū? ǂÂi re, Johaneb tsî Judiths tsîra xa hîna ge ǃkharu ge 30 kuriga ǃkharagaǃnâgu ǃhūgu ǃnâ ǀguiba gere aoǁnâ ra. Aimâba-aon di skoli ge 1977ǁî kuri a tsoatsoa o, on ge gere hōhōǃnâhe în māsenxasen ǂhâsib hâba sī aoǁnâsa. Johaneb ge ra mî, nē mîǁguib ai ǂâisa ǂnûis ǃaromab ge ǀgui ǃgupu ûiba ge ûi tsoatsoa tsî ǁîb sîsen-e ge ǀkharaǀkhara. ǀNî hâ ǃhūb ǃnâ ra gere sī o, o ra ge gere mûǂan Jehovab ǃoa ǀgores tsî ǁîb ai kōs tsîn ge hui ra ǃkhaisa ǀasa gowaba ǁkhāǁkhāsens tsî ǂoa mâsiba ǁnaetisa. ǁÎra mati ra tsâ ǁnās xa? Johaneb ge ra mî: “Tita ge kaise ǃgâi ǁaeba ge ūhâ i tsî xū-e ǃhausen tama hâ.” ǁÎb ge ǀaro tsî ra mî: “Jehovab ge tita ǀnamxaǃnâ ǁgûb ase ge ība ī. Nēsi ta ge Jakobub 4:8 sa ǃgâise ra ǁnâuǃā mî rasa: ‘Elob ǃoa ǀgū, ob ge sado ǃoa nî ǀgū.’ Tita ge ge ǂan i ǂkhîǂkhî te tsî ǂâibasens xa ǀoa hâ ûiba ta ge hōsa.”

16. Matin ge ǂgui ǃgâsan hîna ǁkhāsiba ūhâ tama na ǁîn ǃnorasasiba ge sîsen-ū?

¹⁶ Johaneb tsî Judiths khami i mâsiban ge ǀnî ǃgâsana ūhâ tama hâ tsî ǃnubu ǁaeb ǀguiba ǀoasase ra ǃoaba hō. Xawen ge ǂgui ǃgâsana ǀapeǂhomis di om-sîsengu ǃhūbaib ǂhawase ra dīhe gu ǃnâ ra ǁhao. Aiǁgause, dana beros ge Amerikab ǃnâ gere omhe o, on ge 27 000 xa ǃnāsa ǃgâsana māsenxase ge māsen în sī hui, 2 wekhe gu tamas ka io kuriba. ǂGuin ge omdi ain gere dī xūna ǁnāxū tsî ge hā. Nēs ge a ǃgâi aiǁgau khoen hîna ge ǁîn ǁaeba Jehovab ǃoabas ǃnâ gere sîsen-ūn dīsa!

17. Mâ ǀkhaegan khoen hîna ǁîn ǃnorasasiba ǃgâi ǀgaub ǃnâ ra sîsen-ūna nî hō?

¹⁷ Kaise da ge ra ǂkhî Jehovaba da ge ǂan ǃkhaisa tsî ǃnorasasib ǁîba ǃoabasa xu ra hāb ǃnâ ra ǃgâiaǂgao. Mîǁguigu hîna da ra dīgu ǃnâ da ge nî ǁgau nē ǃnorasasiba da ra ǃgôaǃgâsa. Sida ǃnorasasiba da ge tā ǃgâi tama ǀgaub ǃnâ nî sîsen-ū xawe da ge Jehovaba ǁkhāsib hoab ǀkha ǃoabas ǃnâ nî sîsen-ū. Nēsa da ga dī o, o da ge Jehovab mîmâi hâ ǀkhaega nî hōǃâ. ǁÎb ge ra mî: “Kurusaben on nîra ǁauǁausib di ǃgaesa xu ǃnoraǃnorahe ǃkhaisa, Elob ôan ǂkhaisib di ǃnorasis ǃoa.”​—Rom. 8:21.