“ǀUNI TSĒDI” kai ǁgâiba ūhâ ǃkhais ǃgaon ge Jehovab ǃoaba-aona ǃnūǃnâxasiba kaise ǂhâ hâ. (2Tim. 3:1-5) Khoen hîna aitsama ǀnamsen an, ǁnâugu tama khoen tsî ǃkhō-oasen ǁoa khoen ge sida ǂnamipe ǀoa hâ. Nē ǀgauga ūhâ khoen ge hoaǁae ǃnūǃnâxa tama hâ. Xawe mâ Xristeǁî-i hoa-i ge nî dîsen: ‘Jehovaba ǂan tama khoen di ǃnūǃnâxasiba ta tita tsîna ra ǁgae? ǃNūǃnâxasiba tae-e ra ǂâibasen? Tsî mati ta nē mâǂoa ra ǀgauba ti ûib di ǃâ kai ǁkhā?’

Elobmîs di mûǂuisa xus ge ǃnūǃnâxa di hâ mîsa ǃgomsina tanis ǃgâ-ai hâ. Khoe-i hîna elosi ǃnūǃnâxasiba ūhâ i ge ǂâibasens ǀkha ra mâǀgai. ǁÎ-i ge ǁî-i ǂhâsib ǃgâ-ai xūna ra mû tsî ǃgâi tama mâsiba ra ǃaroma xūna ǃgâise ra kō. Nē ǃkhais ǃaroma i ge ǃnūǃnâxa khoe-e ǁaixa kaihe i ga ra o, o ǁaib ǃnâ hâhâ tama hâ. Buruburuxa tama hâ ǃkhais ge Elobmîs ‘ǃnūǃnâxasiba’ ǃgâi ǀgaugu di ǀguib ase ra ǁguiǃāsa ǀnamma xu ra hāba. * (1Kor. 13:4) Elobmîs ge ‘ǃnūǃnâxasiba’ “gagab di ǂûb” ǀkha ra ǃkhōǀhao. (Gal. 5:22, 23) Xawe nē ǀgauba tae-e sida xu ra ǂgaoǀkhā?

ǃNūǃnâxasiba omkhâis ǃaroma da ge Jehovab gagaba nî ǂgan îb hui da. Tsî mâ hâ ǃkhais ge Jehovab ge nē gagaba ra ǂgan khoen hoana ra mā tsî ǁîb ai ra ǂgomaiǂnûin tsîna. (Luk. 11:13) Nē gagab Elob dib a ǀgaisa xawe da ge ǀguiǃnâxase sida ǀgoredi ǀkha nî ûi. (Psa. 86:10, 11) Nēs ge ra ǂâibasen î da ǃnūǃnâxasiba tsēs hoasa sîsenǂui tsî sida ǂgaob ǃnâ nē ǀgauba ūhâ. Xawe da ge ǃnāsase nî dī î da nē ǀgauba sida ûib di ǃâ kai. Xawe tae-e noxoba a hui da ǁkhā?

ǃNūǃnâxasib tsîna da ge a omkhâi ǁkhā Jesub aiǁgausa ǁgaes tsî ôaǃnâs ǃnâ-ū. Jesub di aiǁgaus ǀkha ǀguiǃnâxaseb ge apostel Pauluba ge mî ‘ǀasa khoeb’ ge ‘ǃnūǃnâxasiba’ ǃkhōǂgā hâ tsîb ge ǀaro tsî ge mî ‘Elob di ǂkhîba . . . ab sadu ǂgaogu ǃnâ gao.’ (Kol. 3:10, 12, 15) ǁNāti i ǂkhîba da ge sida ǂgaogu ǃnâ a “gao” kai ǁkhā Jesub di khôahe ǁoasa ǂgoms hîna ra ǁgaus Elob ǁîb ǁaeb ǃnâ xūna nî dīsa ǁgaes ǃnâ-ū. Tsî nî ǂan Elob mâ mâsib hoaba nî ǂhanuǂhanu ǃkhaisa ǀgūǁae. Jesub aiǁgausa da ga ra sao o, o da ge sida ǃnūǃnâxasiba ǂoaǃnâ tide, sida ǂnamipen ga xūna ī xawe.​—Jhn. 14:27; 16:33.

Elob di ǀasa mîmâisa ǃhūbaiba da ra  mû ǂgao xawe da ge ra ǁkhāǁkhāsen î da Jehovab sida ǀkha ǃnūǃnâxa ǃkhaisa ǂâiǂâisen. Elobmîs ge nē ǃkhaisa ra ǁapoǁapoba da: “ǃKhūb [Jehovab, NW] ge mîmâis ǀkha ǀhape tama hâ (ǀnîn ǁîsa ǀhapes ase ūhâ khami), tsîb ge a ǃnūǃnâxaba da, tsîb ǂgao tama, khoe-i nî kāǁōsa, xawen nî hoana ǃhobasen ǃkhaisa.” (2Pet. 3:9) Jehovab sida ǀkha ǃnūǃnâxa ǃkhaisa ǂâiǂâi da tama hâ î da sida ǃgâsan ǀkha ǃnūǃnâxa? (Rom. 2:4) ǁNāsa ǂâis ǃnâ ūhâse, taena xūn hîna ǃnūǃnâxasiba ǂhâ hâna?

Sida tsēkorobe ǁaxasib ge sida ǃnūǃnâxasiba a ǃâitsâ ǁkhā. Aiǁgause, ǂhâǂhâsa xū-e du ga ra mî ǂgao o, o da ge ǃnūǃnâxasiba ǂhâ hâ, khoe-e ǃhoa ǁkhae tama hâse. (Jak. 1:19) ǃNūǃnâxasib tsîna da ge ǂhâ hâ ǃgâsan ra dī xūn xa da ga ǃgâibahe tama io. ǁNā xūn xa ǁaixa kaihes xa da ge nî ǂâiǃgâ matib Jehovab tsî Jesub tsîkha sida ga xū-e dīsā o ra tanisen ǀgauba. ǁÎkha ge sida ǂkhariro dīsādi ai kō tama hâ. Xawe kha ge sida ǃgâi ǀgaugu tsî ǁgūtsâdi ai ra kō.​—1Tim. 1:16; 1Pet. 3:12.

ǀNî hâ xū-i hîna sida ǃnūǃnâxasiba a ǃâitsâ ǁkhā i ge khoe-i ga mî o, xū-e da go mî tamas ka io a dīsā ǃkhaisa. Xawe ǃnāsa ǁaeba da ge ǀnîsi kaise ǃhaese ǁkhaubasen tsî ra ǀhapio kaisen. Xawe Elobmîs ge nēti ra mî: “Tā gagas âts ǃnâ ǃhaese ǁaixa; ǁaib gâreb di ǃâǃnâb ǃnâ ra sâ xuige.” (Aoǁn. 7:8, 9) ǀHapiǂgā-amhe da ga ra xawe da ge sida ǃereamsa aibe nî ǂâiǃgâ ǃnūǃnâxase. Jesub ge ǂhanuoǃnâseb ge ǃkhāǃkhāhe xawe ǁnā tsoatsoasa ge sao.​—Mat. 11:19.

Kaikhoen ge ǀō-aisase ǃnūǃnâxasiba ǂhâ hâ ǃgâi tama tanisen ǀgaub tsî ǁgai turagu tsînan ga ǁîn ǀgôan ǃnâ a mû o. ǂÂi re, Mattiab hîna Betels omaris ǁaniba Scandinaviab ǃnâ. ǂKhamkhoeb aseb ge Mattiaba skoli tawa gere ǃkhāǃkhāhe ǁîb ǂgoms ǃgao. ǁÎb ǁgûra ge nēs xa ge ǀū i. Xawe ra ge ǁîra ǀgôab gere hōǃâ mâǃoas xa gere tsâǀkhāhe, Mattiab ge amabab ūhâ ǃkhaisa a îganǀgē tsoatsoa. “Nē mâsib ge ǃnūǃnâxasiba ge ǂhâ hâ i,” dib ge Mattiab ǁgûb Gillis di ǀon hâba ra mî. Mattiab ge gere dî: “Hama a Elo? O, Elobmîs ga Eloba xu hâ tama ios? Mati da a ǂan Elob nē-i tamas ka io nau-e sida xu ra ǂhâba ǃkhaisa?” Mattiab tsîn ge ǁîb ǁgûba gere dî: “Tae-i ǃaroma ta nî ǀgoraǃgâhe tita ga sadu khami ǂgom tama io?”

“ǀNî ǁaegu” aib ge Gillisa gere mî, “ǁîb ǀgôab dîdi ge ǁaib ǃnâ-ū gere ǁgâiǂuihe. ǁÎb ǁgûra ǃoagus ose xawe amab ǃoagu, nēs ge ǁîb ûiba kaise gere ǃgomǃgom.” Gillisa mati nē mâsiba ge sîsenǂam? “Tita tsî ti ǀgôab tsîn ge ǂnû tsî gaxuse gere ǃhoa. ǃNāsa ǁaeba ta ge ǃgâs ǀguisa gere dī tsî dîna gere dî î ta hō matib ra tsâ ǀgausa. ǀNî ǁaegu ai ta ge xū-e gere ǁguiǃāba bi îb ǁî-e ǂâiǃgâ, ǁkhawa kham nî  ǁgamǀhaos aiǃâ. ǀNî ǁaegu ai ta ge ǁîba gere mîba î ta aibe ǂâiǃgâ ǀnî tsēb ge mîba te xū-e. Hoaǁae kham gere ūhâ ǁgamǀhaodi ge ge ǃaroma îb Mattiaba xoremarib, Elob ǂgaeǂguis tsî Jehovab ǀnammi ǁkhāǁkhāde ǁnâuǃā tsoatsoa. Nēs ge ǁaeba ge ū tsî ge ǃgom i xaweb ge Jehovab ǀnamma Mattiab ǂgaob ǃnâ ge ǃnomaǃkhō. Tita tsî ti taras tsîn ge kaise ra ǃgâiaǂgao sim di ǃnūǃnâxa ǁgūtsâdi ǃnâ-ūm ge sim ǀgôaba a hui ǃkhaisa tsî ǁîb ǂgaoba a tsâǀkhāsa.”

Gillisi tsî ǁîb taras tsîn ge Jehovab huib ai gere kō ǁîra ǀgôaba ra ǃnūǃnâxase ra hui hîna. Gillisi ge ra mî: “Tita ge Mattiaba gere mîba ǁîbam a ǀnam ǃkhais ge ra ǃaroma îm ǀaexase ǀgore îb Jehovaba hui bi îb xūna ǁnâuǃā tsoatsoa.” Nē ǀgam ǁgûra ge kaise ra ǃgôaǃgâ ǃnūǃnâxasiba ra gere sîsenǂui ǃkhaisa.

Gagasi huiba mās ǃgao i ge Xristeǁî-e ǀnamxaǃnâ ǃnūǃnâxasiba nî omkhâi ǁî-i omaris ǁani-i hîna ǀaesen hâ-e kōǃgâs tawa i ga ra hā o. Ellens * di aiǁgaus xa ǂâi re, hîna Scandinaviab ǃnâ ra hâsa.

ǁAubexa 8 kurigu ǃkharu hâseb ge Ellens aoba ǀgam ǃnāra stroke ga ge hō nēs ge ǁîb ǂkhûsa ǃgâi tamase ge tsâǀkhā. Nēs ge ge ǃaroma îb Ellens aoba tā ǀkhomxaǂgaosib, ǃgâiaǂgaob tsî tsûaǂgaob tsîna ǁgau. Nē mâsib ge Ellensa xu kaise ge ǂgaoǀkhā hâ i. ǁÎs ge ra mî: “Nēs ge ǃnūǃnâxasib tsî ǂgui ǀgoredi tsîna ge ǂgan hâ i.” ǁÎs ge ǀaro tsî ra mî: “Ti ǂûǂûsa xoas hîna ra ǁkhaeǂgao tes ge Filipeǁîn 4:13 hîna ra mîsa: ‘Hoana ta a ǁkhā ǁîb, tita ra ǀgaiǀgaib, Xristub ǃnâ.’” Ellens ge ǃnūǃnâxasib hoab ǀkha Jehovab huib ai ra ǂgomǃgâ.​—Psa. 62:5, 6.

ǃNūǃnâxasib tawa i ga ra hā o, ob ge Jehovaba mâǂoa ra aiǁgause ī ǁgaehe ǁkhāba. (2Pet. 3:15) Elobmîs ǃnâ di ge ǂgui ǃnaeǃkhaide hâ Jehovab ǃnūǃnâxasiba ra ǃhoaǃgaode. (Neh. 9:30; Jes. 30:18) Aiǁgause, Jehovaba tae-e ge dī Abrahammi ge Sodoms dīkākās xa a dî bi o? Abrahammi gere ǃhoa o, ob ge Jehovaba ǁîba ge ǃhoa ǁkhae tama hâ i. Xawe Jehovab ge ǃnūǃnâxase Abrahammi dîdi tsî ǂâiǂhansendi tsîna gere ǃgâ. Jehovab ge ge ǁgau Abrahammab gere ǃgâ ǃkhaisa tsî ge mîba bi Sodomsab dīkākā tidesa 10 ǂhanu-ai khoen ga ǁnā ǃās ǃnâ hōhe o. (Gen. 18:22-33) Nēs ge ǃgâi aiǁgaus khoe-e ǃgâs disa, khoe-e ǃhoa ǁkhae tamase.

Elosi ǃnūǃnâxasib ge kaise a ǂhâǂhâsa ǀasa khoeba anas tawa i ga ǀkhī o, nēsan ge hoa Xristeǁîna nî dī. Kaise ǃgarise da ga sîsen o, nē ǀgauba omkhâisa, o da ge sida ǀhomsi ǁGûba nî ǂkhîǂkhî. Tsî nēs ge nî ǃaroma îb sida ‘ǁnān, ǂgoms tsî ǃnūǃnâxasiba xu mîmâide a ǀumin’ ǁaegu ǃgôa​—Heb. 6:10-12.