1, 2. ǀGui ǃgâsaba tae-e ǁîb gagasi mâsib xa ge mûǂan, tsî ǁîba nēs xa tae-e ge dī?

ROBERTOB ge ǂkhamsis ǃnâ ge ǁāǁnâhe, xawe amaba ge ūbasen tama hâ i. ǁÎb ge ge mî: “Tita ge tsū xū-e ge dī tama hâ i, xawe da ge xūna khoen ra dī amaga ǀgui gere dī. Tita ge gagasise ǀgaisase gere mûsen, hoa ǀhaode ǃoa ī tsî ǀnî ǁkhâga aimâba-ao sîsen-e gere dī. Xawe i ge xū-e ge ǃgâi tama hâ i.”

² Robertob ge ge mûǂan tama hâ i tae-i a tsūsa, ǃgame toab hâs khaoǃgâ ǀguib ge ge mûǂan. ǁÎb tsî ǁîb taras tsîn ge Elobmîs ai ǃgaoǃgaosa dîde gere dî ǃnâgu. ǁÎb taras hîna gagasise a ǀgaisas ge ǃgomsi-e ge ūhâ tama hâ i, nē dîde ǃereamsa xawe Robertob ge hoaǁae gere tao. Tae-eb nî mîsab ge ge ǀgū i. ǁÎb ge ra mî: “Xū-e a ǀgū khami ta ge gere tsâ. Tsîb ge ge mî ‘ti taras di dana ta ga ra io, o ta ge tita tsîna xū-e nî dī.’” ǁÎb ge xū-e ge dī. “Elobmîsa ta ge ǂōrisase ǁkhāǁkhāsen tsî ǃamkuse ge ǁnâuǃā tsoatsoa dib ge ra mî. ǁNâuǃāba hō tsî ta ge Jehovab ǀkha ǀgaisa ǀhōsagusisa ge omkhâi.”

3. (a) Tae-e da Robertob aiǁgausa xu a ǁkhāǁkhāsen ǁkhā? (b) Mâ ǂhâǂhâsa xūna da nēsi nî ǃhoaǃgao?

³ Robertob aiǁgausa xu da ge ǂgui xūna a ǁkhāǁkhāsen  ǁkhā. Elobmîs ǂansa da ge a ūhâ ǁkhā tsî hoa ǀhaode ǃoa a ī ǁkhā, xawes ge ǁnāsa gagasi khoe kai da tide. ǀNîsi da ge gagasise aiǃgû hâ, xawe da ge ôaǃnâsen tsî ra mû gagasise da noxoba nî ǀgaisa. (Fil. 3:16) ǃNona dîde da ge nē ǁkhāǁkhāǃâs ǃnâ nî ǃeream hui da nî de î da gagasise aiǃgû: (1) Tae-e nî hui da sida gagasi mâsiba ôaǃnâs ǀkha? (2) Mâ ǀgaugu ǃnâ da gagasise nî ǀgai tsî gagasi khoese ǀgaisase nî aiǃgû? (3) Gagasise ǀgaisa mati sida tsēkorobe ûib ǃnâ nî hui?

4. Efeseǁîn 4:23, 24 ǃnâ ra hō-e ǀapemāsa ham-i ǃoa ra ǁnaeǁgau?

⁴ Elob ǃoaba-ao kai da ge o, o da ge ge ǀkharaǀkharasen. Nēs ge sida ûib hoaba ge tsâǀkhā. Tsî ǁāǁnâhe da ge o, o da ge ge ǀûsen tama hâ i. Mîbahe da ge ra î da ‘ǀasakaisen sida ǂâis di gagas ǃnâ.’ (Efe. 4:23, 24) ǀOasa kurusa da ūhâ tama amaga, da ge hoa da nî ǀkharaǀkharasen. ǂGui kuriga Jehovaba ǃoaba hâ khoen tsîn ge nî aiǃgû gagasise omkhâisensa.—Fil. 3:12, 13.

5. Mâ dîde nî hui da aitsama ôaǃnâsens ǀkha?

⁵ Gagasise da ga ǀgai ǂgao o, o da ge aitsama nî ôaǃnâsen. Kaira tamas ka io da ga ǂkham i xawe, da ge hoa da sao ra dîde nî dîsen: ǀKharaǀkharana mû i ta ra tita ǃnâ, ǁgau rana gagasi ǂâi ǀgauba ta ūhâsa? Xristub ǀgauba ū ta hâ? Tita Xristeǁî ǀhaodi tawa ra tanisen ǀgauba tae-e ti gagasi mâsib xa ra ǁgau? Tita ra ǃhoa xūna tae-e ti turagu xa ra ǁgau? Tita Elobmîsa ra ǁkhāǁkhāsen ǀgaub, ana ta ra ǀgaub tsî ǁnamahe ta ga o, o ta ra tanisen ǀgaub tsîna tae-e tita xa ra mî? ǃÂitsâhe ta ga o, mati ta ra tanisen? Gagasise a ǀgaise Xristeǁî-i khami ta ra tanisen? (Efe. 4:13) Nē dîdi ǃereamdi xa da ga ra ǂâi o, o i ge nî hui da gagasise ôaǃnâsensa.

6. Sida gagasi mâsiba ôaǃnâs ǃaroma i tae-i tsîna a ǂhâbasa?

⁶ ǀNî ǁaeb ai i ge gagasise ôaǃnâsensa, nau khoena xu huiba ǂhâ hâ. Apostel Paulub ge ge mî, ǁgansi khoe-i ge ǁî-i a tsū ǃkhaisa Elob aiǃâ mû tama hâ. Xawe gagasi khoe-i ge Elob ǂâi ǀgauba ra ǁnâuǃā tsî ǁî-i a tsū ǃkhaisa ra mû. (1Kor. 2:14-16; 3:1-3) ǀHaohâb ǃûi-aogu hîna Xristub ǂâi ǀgauba ūhâgu ge ǁaeb aiǃâ, tsū dīgu ǁgansi khoen diga ra mû. ǁÎgu ga nēsa sida ǂanǂan o, nē ǁnamasa ǃkhōǃoa î da ra? Nēsa da ga dī o, o da ge sida gagasi turab a ǀgaisasa ra ǁgau.—Aoǁn. 7:5, 9.

7. Elobmîs ǂans ǀguisa ūhâsa mati i io, ǂâu tama hâ gagasi khoe kai dasa?

⁷ ǂÂis ǃnâ ūhâ re, Elobmîs ǂans ǀguisa ūhâs ge gagasi khoe kai da tama hâ. Gao-aob Salomob ge kai ǂansa Jehovab ǀgaugu xa ge ūhâ i. ǁÎb mîdi ge ega Elobmîs ǃnâ ge xoahe. Xaweb ge ǁîba ǀunis ǃnâ Jehovab ǃoa-ai ge ǂhauǃnâ tama hâ i. (1Gao. 4:29, 30; 11:4-6) Elobmîs ǂansa ūhâs ǃgao i, tae-i tsîna a ǂhâbasa? Gagasise ǀgai tsî da ge nî aiǃgû. (Kol. 2:6, 7) Xawe nēsa da mati nî dī?

8, 9. (a) Tae-e nî hui da gagasise ǀgaisa? (b) Sida mîǁguiba a tae, Elobmîsa da ga ǁkhāǁkhāsen tsî ǂâiǃgâ o? (Tsoatsoas ǃnâ hâ ai-īsiba mû re.)

⁸ Paulub ge ǃkharu ge ǁaeb Xristeǁîna ge ǂkhâǃnâ în “dīǀoaǀoasib ǃoa aiǃâb ǃoa ǃgû.” (Heb. 6:1) Tae-e da nî dī Paulub  ǃkhâikhomsa da ga ra dīǀoaǀoa ǂgao o? ǀGui ǀgaub ge “Keep Yourselves in God’s Love” di hâ ǂkhanisa ôaǃnâsa. Nē ǂkhanis hoasa da ga ǁkhāǁkhāsen toa o, o da ge nî ǂan mati da Elob ǁgaraga sida ûib ǃnâ nî dīǀoaǀoasa. Nē ǂkhanisa da ga ǁkhāǁkhāsen toa o, o da ge ǀnî hâ ǂkhanin hîna sida ǂgomsa nî ǀgaiǀgaina nî ôaǃnâ. (Kol. 1:23) ǀGore î da ra, î da ǁkhāǁkhāsen da ra xūna sida ûib ǃnâ dī?

⁹ ǂÂis ǃnâ ūhâ re, ǁkhāǁkhāsen tsî da ra ǂâiǃgâ xūn ge a ǃaroma ǁkhā î da Jehovaba ǂkhîǂkhî. Tsî da ge nî mîǁgui î da ǁîb ǂhanuga ǁnâuǀnam. (Psa. 40:8; 119:97) Tsî da ge nî ǁgūtsâ, î da sida gagasi kaisa ra ǂhani xūna xu ǂgō.—Tit. 2:11, 12.

10. ǂKhamkhoena tae-e nî dī în gagasise ǀgai?

¹⁰ ǂKhamkhoese, gagasi mîǁguiga du ūhâ? ǀNî ǃgâsab ge ǂharis kai ǀhaos tawa ǁāǁnâhe ra khoen ǀkha ǀapeǁguib nî tsoatsoas aiǃâ ǁîn gagasi mîǁguigu xa ra ǃhoa. ǂGui khoen hîna ra ǁāǁnâhen ge a ǂkham. Nē ǃgâsab ge ǁîna gere dî, mâ gagasi mîǁguinan ūhâsa. ǂGuin ge ra ǁgau ǁîn ǃamkuse a ǂansa tae-en nî dīsa în Jehovaba ǃoaba. ǀNîn ge mîǁguiba ra dī Jehovaba ǀoasase ǃoabasa tamas ka io ǂhâsib hâba sī huisa. Xawe ǀnî ǁaeb ain ge ǂkhamkhoena nēsa ǃeream-e ūhâba tama hâ. Nēsa ra ǂâibasen ǁîn gagasi mîǁguiga ūhâ tama hâsa? ǂKhamkhoets ase dîsen re: ‘Tita gagasi xūna ti ǁgûra ra dī amaga ǀgui ra dī? Tita Jehovab ǀgūse hâ ǁîb ǀkha ta, ǃgâi ǀhōsagusisa ūhâ amaga?’ Nē ǃkhâikhoms ge ǂkhamkhoen ǃoa ǀgui ǁnaeǁgau tama hâ. Nēti i mîǁguiga dīs ge hoa da hîna Jehovaba ra ǃoaba da nî hui î da gagasise ǀgai.—Aoǁn. 12:1, 13.

11. (a) Gagasise da ga aiǃgû ǂgao o, o da tae-e nî dī? (b) Mâ aiǁgaus Elobmîsa xu ra hāsa da nî ǁgae?

¹¹ ǀKharaǀkharasen da nî ǃkhaisa da ga mû o, o da ge ǁkhā da an hoana nî dī î da aiǃgû ǁkhā. Gagasi khoe kais ge kaise a ǂhâǂhâsa. Nēs ge ûib tsî ǁōb di ra ǂâibasen. (Rom. 8:6-8) Gagasi ǂâi ǀgauba ūhâs ge ǂâibasen tama hâ, ǀoasa kurusa da ge nî ūhâ di. Jehovab gagab ge nî hui da ǂhâǂhâsa ǀkharaǀkharana dīsa. Sida ge ǁkhā da an hoana nî dī. Lukab 13:24 xab ge John Barr di ǀon hâ ǃgâsab, hîna ge ǂgaeǂguira soros di ǁani îba ge mî, “ǂgui khoen ge gagasise kai tama hâ, ǃgarisen sîsen tama hâ amaga.” Jakob khami da ge nî ī, hîna ge ǃkham ǀû tama hâ îba ǀhomǃgāb ǀkha ǀkhaebab nî hōs kōse. (Gen. 32:26-28) Elobmîsa ǁkhāǁkhāsens ga ra ǁkhoaxa i xawe, da ge tā Elobmîsa ǁkhoab ǃgao xoahe hâ ǂkhanis khami nî khomai. Gagasi ǃgomǀgausa xūna da ge nî ôa hîna nî hui da na.

12, 13. (a) Romeǁîn 15:5 mâ ǀgaub ǃnâ nî hui da? (b) Apostel Petrub aiǁgaus tsî ǃkhâikhoms tsîna mâ ǀgaugu ǃnâ nî hui da? (c) Tae-e da nî dī î da gagasise ǀgai? (“ Xūn hîna da a dī ǁkhān î da gagasise ǀgai” di hâ boksisa mû re.)

¹² Gagasise da ga ra aiǃgû o, ob ge Elob gagaba ǀgaiba nî mā da î da sida ǂâi ǀgauba ǀkharaǀkhara. Gagab huib ǀkha da ge Xristub di ǂâi ǀgauba nî ūhâ tsoatsoa. (Rom. 15:5) Nēs ge nî hui da ǁgansi turaga xu ǂgō tsî Eloba ǂkhîǂkhî. (Gal. 5:16, 22, 23) Mû da ga o sida ǂâi ǀgaub ǁgansi ǂâi ǀgauga ra ǃkhōǃkhōsa, o da ge tā nî ǀûsen. Gagaba da ga ǂgan  o, ob ge Jehovaba ǃgâi ǂâi ǀgauba nî mā da tsî nî hui da ǃgâi xūn xa ǂâisa. (Luk. 11:13) Apostel Petrub xa ǂâi re. ǁÎb ge ǂgui ǃnāde, gagasi khoe-i nî tanisen khami ge tanisen tama hâ i. (Mat. 16:22, 23; Luk. 22:34, 54-62; Gal. 2:11-14) Xaweb ge ge ǀûsen tama hâ i. Jehovab huib ǀkhab ge Petruba Xristub khami ge ǂâi tsoatsoa. Sida tsîn ge ǁnāti a dī ǁkhā.

¹³ Petrub ge xūn hîna da a sîsenǂam ǁkhāna ǃoa ge ǁnaeǁgau. (Khomai re 2 Petrub 1:5-8.) ǁGuiǂgāsen da ge nî ‘ôasasib hoab’ ǀkha tsî sao ra ǀgauga ūhâs ǃnâ-ū, ǃkhō-oasens, taniǀnamxasib tsî ǃgâsaǀnamgus tsîna. Nē ǀgaugu ge nî hui da gagasi ǂâi ǀgauba ūhâ khoe-i ase aiǃgûsa. Tsēs hoasa dîsen re, ‘tae-e ta nî dī î ta nētsē gagasise ǀgai ǁkhā?’

14. Gagasi ǂâi ǀgauba ūhâsa mati, sida ûiba nî tsâǀkhā?

¹⁴ Xristub ǂâi ǀgauba ūhâs ge nî hui da, sida skoli ai ra tanisen ǀgaub, ǃhoa da ra ǀgaub tsî mîǁguigu hîna da ra dīgu ǃnâs tsîna. ǁNāsa da ga dī o, o i ge nî ǁgau Xristub saosabe da asa. Gagasi khoen ase da ge ǂgao tama, sida ǀhōsagusis sida ǀhomsi ǁGûb ǀkhā nî khôahesa. ǃÂitsâde da ga hōǃâ o, o i ge sida ǃgâi tanisen ǀgauba nî hui da nē ǃâitsâde xu ǂgōsa. Mîǁguiga da ga dī o, o da ge nē dîdi xa nî ǂâiǃgâ: ‘Mâ Elobmîs ǁgaraga nî hui da mîǁguiga dīsa? Xristuba tae-e nē mâsib ǃnâ ga dī hâ? Mâ mîǁguiba Jehovaba nî ǂkhîǂkhî?’ Nē ǂâi ǀgauba da ga ǂgao o, hā re î da ǀnî aiǁgaude kō. Hoa aiǁgaudi ge Elobmîs ai a ǃgaoǃgaosa ǁgaraga ūhâ, hui da nîga î da ǃgâi mîǁguiga dī.

15, 16. Aiǁgaude mā re mati i Xristub ǂâi ǀgauba ūhâsa sao ra ǀgaugu ǃnâ nî hui dasa (a) ǃgamme da nî khoe-e ǁhûis. (b) ǀhōsana ǁhûis.

¹⁵ ǃGamme da nî khoe-e ǁhûis. Elobmîs ai ǃgaoǃgaosa ǁgaragu ge 2 Korinteǁîn 6:14, 15 ǃnâ ra hō-e. (Khomai re.) Paulub mîdi ge ra ǁgau gagasi khoe-i tsî ǁgansi khoe-i tsîn ge a hâǀhao ǁoa. Nēsa mati ǃgamme da nî khoe-e ǁhûis ǀkha a ǀgui?

¹⁶ ǀHōsana ǁhûis. 1 Korinteǁîn 15:33 ǃnâ māsa Elobmîs ai ǃgaoǃgaosa ǁgaraga kō re. (Khomai re.) Elosi khoe-i ge ǁî-e gagasise nî ǂkhabu kai khoen ǀkha hâǀhao tama hâ. Mâ dîde nî hui da ǀhōsana ǁhûisa? Aiǁgause, nēsa mati internetsa sîsen-ūsa ǃoa ra ǁnaeǁgau? Tamas ka io da tae-e nî dī ǁkhauhe da ga o, ǀū da a khoen ǀkha internets ǂhaweb ai gamena ǀhurusa?

17-19. Gagasi ǂâi ǀgauba ūhâsa mati nî hui da (a) ǂâibasensa ūhâ tama mîǁguiga xu ǂgōsa? (b) mîǁguiga ûib ǃnâ ūhâsa? (c) ǁnâusāgun ga ra hâ o?

¹⁷ Gagasise a ǂkhabu kai da ǁkhā xūn.  Paulub mîdi Xristeǁîna ǃoa hâdi ge ǃkhâikhomde ūhâ. (Khomai re Hebreǁîn 6:1) Tae ga ‘ǁō hâ sîsengu’ ǂgōsen xu da nîga? Sîsengu hîna gagasise ǁō hâgu tsî ǂû tani tamagu tsîna. Nē ǁgaragu ge ǂgui dîdi hîna da sida ûib ǃnâ nî hōǃâgu ǀkha nî hui, sao rase: Nē sîsenga ǁgansi sîsengu ǃnaga ra ǁnā? Mari kurus? Tsî khoena ra ǃkhamba ǃnandi di ǁani kais tsîna?

¹⁸ Gagasi mîǁguigu. Jesub di ǃhommi aoǁnâs ge ǃamku daoǁgaude ra mā da mîǁguiga dīsa. (Mat. 6:33) Gagasi khoe-i ge gagasi mîǁguiga ra dī. Nē ǁgaraga ǂâis ǃnâ ūhâs ge sao ra dîde ǃereams ǀkha nî hui da: ǀGapi ǁkhāǁkhāsens ǀapena ūhâ ta hâ? ǀGapi sîsen-i ǀgui-e ta nî ūǃoa?

¹⁹ ǁNâusāgun. Paulub ǃkhâikhoms Romeǁîn ǀhaohâb ǃnâsa tae-e ǁnâusāgun xa ra ǁgau da? (Rom. 12:18) Xristub saosaben ase da ge “hoa khoen ǀkha ǂkhîb ǃnâ” nî ûi. ǁNâusāgun ga hâ o, mati da nî tanisen? ǃGom-e khoena ǀûbasa tamas ka io da ‘ǂkhîba kurus’ khoe-i ase a ǂansa?—Jak. 3:18.

20. Tae-i ǃaroma da gagasi khoese ra aiǃgû ǂgao?

²⁰ Nē aiǁgaudi ge nî hui da î da elosi ǁgaragu ai ǂgomaiǂnûi. Tsî mîǁguiga nî dī hui da nîga î da gagasi khoe kai. Gagasi ǂâi ǀgauba ūhâs ge sida tsēkorobe ûib ǃnâ ǂkhîba nî mā da. Robertob ge ra mî: “Jehovab ǀkha ǃgâi ǀhōsagusisa ūhâs ge ge hui te, ǃgâi ǁgû tsî kaikhoe kaisa. Tita ge kai ǂkhîba gere hōǃâ.” Gagasise aiǃgûsa da ga ǂgurose sida ûib ǃnâ mâi o, o da ge sida tsîna ǃgâi ǀkhaega nî hō. Gagasi khoese da ge ǃgâi ûiba nēsi nî ūhâ tsî hānîǁaeb ǃnâ “ǀamo ûiba nî hō.”—1Tim. 6:19.