KHOEN ge hoaǃnâ-aixase ǂkhîb ǃnâ ra ûi ǂgao. Xawen ge nē ǀuniga tsēdi ǃnâ hoa khoena “ǃgom ǁaega” ra hōǃâ. (2Tim. 3:1) ǂHanuoǃnâsib, ǂurusib ǃgomsin, sîsen osib, ǃoab tsî ǀnî hâ xūn ge a ǃaroma ǁkhā î da sida ǂkhîba ǂoaǃnâ. Elob ǃoaba-aon tsîn ge a ǂkhabuǂâi ǁkhā tsî ǁîn ǂkhîba a ǂoaǃnâ ǁkhā. Nēs ga sadu ǀkha ī o, mati du sadu ǂkhîba a hō oa ǁkhā?

Nē dîsa da nî ǃereams aiǃâ da ge aibe nî ǁnâuǃā ama ǂkhîb a taesa. Tsî khoen hîna ge ǃgomsina gere hōǃâ xawe ǂkhî īn xas tsîna nî ǃhoa. Xawe da ge nî ǁkhāǁkhāsen mati da sida ǂkhîba nî kōǃgâsa.

Tā da ge ǃgâiaǂgaoba khoexaǃnâ tsâsib ǀkha nî ǀgopeǀnō. Aiǁgause: ǀHoro hâ khoe-i ge ǃgâu i ga ra o, kaise ra âi. Xawe nē khoe-i ge ǃgā i ga ra o, o ra âi ǀû tsî i ge ûib di ǃgomsin xa ǁkhawa ra ǂâi tsoatsoa. ǁÎ-i ǃgâu i ra o ra hōǃâ ǃgâiaǂgaob ge ǁaerob dis ǀguisa ī.—ǂKhm. 14:13.

ǃGâiaǂgaob ge ǂgaob ǃgamsib ǃnâ hâ tsâsiba. Nēb ge “ǃgâi xū-e ǃâubasens xa ra ǂkhâǃnâhe tsâsiba.” ǃGâiaǂgaob ge mâsib hîna ǃgom ǁaegu ǃnâs tsîna ra hâba. (1Tes. 1:6) Ama as ge khoe-i ge xū-i xa a tsūbahe ǁkhā xawe noxoba ǁî-i di ǂkhîba a ūhâ ǁkhā. Aiǁgause, apostelgu ge ge ǂnauhe Jesub xa gu gere ǃhoa o. Tsî gu ge ǁîga “ǀapemāǃnans di aisa xu ǃgâiaǂgao hâse ge ǃgû, Jesub di ǀons ǃaroma ǃharaxūhesa tsâsa gu ge anuǃgôahe ǃkhais ǃaroma.” (ǃNǃkh. 5:41) ǁNâuǃāxa ǃkhais ge ǁîgu ge ge ǃgâiaǂgao tama hâ i ǂnauhe gu ge o. Xawe gu ge Elob ǃoa-ai gu ge ǂgomǂgomsase mâǀgai ǃkhais ǃgao ge ǂkhî i.

ǃGâiâǂgaob ǀkha da ge ǃnaehe tama hâ tsî nē tsâsiba da ge ūhâs ǀguisa dī tama hâ. Tae-i ǃaroma? Ama ǃgâiaǂgaob a Elob gagab di ǂû amaga. Elob gagab di huib ǀkha da ge ‘ǀasa khoeba’ a ana ǁkhā. (Efe. 4:24; Gal. 5:22) Xawe ǂkhîba da ga ūhâ o, o da ge ûib ǃgomsina a tani ǁkhā.

Jehovab ge ǃhūbaib nî ǃgâi xūn ǀkha aiǃgûsa ge ǂhâba hâ i, ǁgain ose. Xawe ǁgai khoen ra dī xūn ge Jehovaba ǂkhîoǃnâ kai tama hâ. Elobmîs ge ra mî: “ǀGaib tsî dâb tsîkha ǁîb di hâǃkhais ǃnâ” hâ di. (1Kro. 16:27) ǁNās xōǀkhā, Elob ǃoaba-aon ra dī ǃgâi xūn ge Jehovab ‘ǂgaoba ra ǃgâiaǂgao kai.’—ǂKhm. 27:11.

Jehovaba da ge a ǁgae ǁkhā xūn ga sida ǃâubasen hâ khami ǃgû ǁnâ tama i xawe. Sida ǂkhîba ǂoaǃnâs xa da ge ǃgâi xūn hîna da nēsi ūhân ai a kō ǁkhā tsî ǃnūǃnâxasib ǀkha hā nî xūn ais tsîna nî kō. *

 Elobmîs ǃnâ xoasa khoen ǃgâi aiǁgaude da ge a ǁgae ǁkhā hîna ge ǃgom ǁaegu ǃnâs tsîna ǂkhîxa īna. Aiǁgause, Abrahammi di ûib ge ǁkhōǁkhōsa mâsib ǃnâ ge hâ i tsîb ge ǃgomsin tsîna ǀnî khoena xu gere hōǃâ. (Gen. 12:10-20; 14:8-16; 16:4, 5; 20:1-18; 21:8, 9) ǁNāti i ǁgâib ge hâ i xaweb ge Abrahamma ǁîb ǂkhîba ge ūhâ ǀgara. Matib ge ǁnāsa dī hō? ǁÎb ge ǀasa ǃhūbaib ǃâubasensa ge ūhâ i, Mesiab ǂgaeǂguis ǃnagab sī nî ûise. (Gen. 22:15-18; Heb. 11:10) Jesub ge ge mî: “Abrahammi sadu îb ge ǃgâiaǂgao ge hâ i, ti tsēsab nî mûs ǂama.” (Jhn. 8:56) Abrahamma da ge a ǁgae ǁkhā hā nî ǃgâiaǂgaob xa ǂâiǂâisens ǃnâ-ū.—Rom. 8:21.

Abrahammi khami kha ge apostel Paulub tsî Silab tsîkha Elob mîmâis ai ǁîkha ǂâisa ge mâi hâ i. ǁÎkha ge ǁîkha ǂgomsa ge ǀgaiǀgai tsî ǁîkha ǃgâiaǂgaoba ge ūhâ ǀgara ǁgai xūn ge ī xawe. Aiǁgause, ǂnauhe tsîkha ge ǃkhō-oms ǃnâ aoǂgāhe o, okha ge “ǀgore tsî Eloba ǁnaetsanadi ǀkha gere kare.” (ǃNǃkh. 16:23-25) Paulub tsî Sila hâkha ge ǃgomsina kha ge hōǃâ xawe gere ǃgâiaǂgao, Xristub ǀons ǃaroma kha gere saoǃgonhe amaga. Paulub tsî Silab aiǁgausa da ge a ǁgae ǁkhā, Eloba ǂgomǂgomsase ǃoabas ǃgâiaǂgaoba ra mā amaga.—Fil. 1:12-14.

Sida di ǀapeǂhomis ǃnâs tsîna da ge ǃgâsan aiǁgaude ūhâ hîna ǁîn ǂkhîba ūhâ ǀgara hâna ǃgomsinan ra hōǃâ xawe. Aiǁgause Novemberi 2013ǁî kurib ǃnâ i ge Super Typhoon [ǂoaxa ǀnanusa] Haiyani hîna ge Filipens ǃhūba a ǂkhôaba ge hâ i. ǁÎb ge 1 000 xa ǃnāsa ǀHûǀguitimî-aon omde ge ǂkhôa. Goerge di ǀon hâ ǃgâsab oms ge ge dīkākāhe tsîb ge nēti ge mî: “Nēn ge ī xawen ge ǃgâsana noxoba a ge ǂkhî i. Kaise i ge a ǃgom ǁnā tsâsiba mîdi ǃnâ ǁgâiǂuisa.” Nēti i ǃgomsin ga ra hāǂam da ǁaeb ai da ga Jehovab ge dība da ǃgâi xūn xa ga ra ǂâi o, o da ge ǂkhîba hoaǁae nî ūhâ. Tae-eb ge Jehovaba mā da ǂkhîba ra mā da-e?

Tae-e noxoba ǂkhîba nî mā da sida ǀhōsagusis hîna da Jehovab ǀkha ūhâs xa? Nēs xa ǂâi re: ǃHūbaib di Kuru-aoba da ge a ǂan. ǁÎb ge a sida Elo, sida ǁGû tsî a ǀhōsa.—Psa. 71:17, 18.

Ûib di aiǂhanub, nēsa xu da a ǀama ǁkhā ǃkhais xa da ge kaise ra ǂkhî. (Aoǁn. 3:12, 13) Gā-ai kurusabe da a tsî da Elob xa ǂgaehe hâ ǃkhais ǃaroma da ge ǁÎb sida ūba hâ ǂâibasensa ra ǁnâuǃā. (Kol. 1:9, 10) Nēsi da ge ama ǂâibasens tsî daoǁgauhes tsîna sida ûib ǃnâ ūhâ. Nau khoen ûib di ǂâibasensa ūhâ tama hâ hîna. Nēsab ge Pauluba ge mî: ‘Mûs mû taman, tsî ǂgaes ǁnâu taman, tsî khoe-i ǂgaob ǃnâ ǂgâ taman, ǁîn ge ǁnān, Elob ǁîba a ǀnamna ǂhomiba hâna. Xaweb ge Eloba ǁîna sada ge ǂhaiǂhaiba ǁîb di Gagaba xu’ (1Kor. 2:9, 10) Kai ǂkhîb xa da ǀoahe tama hâ, Jehovab ǂâibasensa ta a ǂan ǃkhais ǃgao?

ǂÂi re Jehovab ǁîb khoena dība hâ xūn xa. ǂKhî tama î da hâ, sida ǁoren ra ǀûbahe o? (1Jhn. 2:12) Elob di ǀkhomxaǂgaosib ǃaroma da ge ǀasa ǃhūbaib ǃoa ra mûǂui. (Rom. 12:12) Nēsis tsînab ge Jehovaba ǃgâsan ǀkha ǀkhae da hâ, hîna ǁîba ra ǃoabana. (Psa. 133:1) Elobmîs tsîn ge ra mî Jehovab ge sida ǁGâuab tsî ǁîb demonga xu ra ǁkhauba. (Psa. 91:11) Nē ǀkhaegu hînab Jehovaba ra mā da gu xa da ga ǂâiǃgâ o, o da ge nî mû matikōseb sida ǂkhîba ra kai tsî ǀgai ǃkhaisa.—Fil. 4:4.

ǀNai ǂkhîba ūhâ ǃgâsa-e ǁî-i ǂkhîba a kaikai ǁkhā? Jesub ge ge mî: “Nēna ta sago ǃoa goro ǃhoa, ti ǃgâiaǂgaob nî sago ǃnâ hâhâse, tsîb nî sago ǃgâiaǂgaoba ǀoase.” (Jhn. 15:11) Nēsa ǁgau tama hâ sida ǂkhîb a kai ǁkhāsa? Sadu ǁkhāsib ge ǀaesa khaus ǀkha a ǀgui. ǀAesa ǀgaisase khau kais ǃaromats ge ǀaena nî ǀaro. ǁNās ǁkhās khami da ge gagasise nî omkhâisen, î da sida ǂkhîba ūhâ ǀgara. ǂÂis ǃnâ ūhâ re: Elob gagab ge nî hui da sida ǂkhîba ǀgaiǀgais ǃgao. Sadu ge ǂkhîba a omkhâi ǁkhā Elob ǃanu gagab tsî ǃgâise ǁîb mîs ǃnâ du ra khomai xūn xa ǂâiǃgâs ǃnâ-ū.—Psa. 1:1, 2; Luk. 11:13.

Sadu ge sadu ǂkhîba a ǀgaiǀgai ǁkhā Eloba ra ǂkhîǂkhî dīga dīs ǃnâ-ū. (Psa. 35:27; 112:1)Tae-i ǃaroma? Kuruhe da ge ge î da ‘Eloba ǃao tsî ǁîb di mîmāde ǃkhōǀgaipe; nēs ge khoen hoana anu hâ.’ (Aoǁn. 12:13) Nau mîdi ǃnâ, Elob ǂâisa da nî dīse da ge ge kuruhe. ǁNās ǀkha da ga Jehovaba ga ra ǃoaba o, o da ge ûib ǂâibasens tsî ǃgâiaǂgaob tsîkha nî hōǃâ. *

Elosi ǂkhîba da ra omkhâi khami da ge sida ǃgâiba nî tsâ. Aiǁgause, Sida ǀhomsi ǁGûb mā-amsa da ge nî ūhâ ǁîba da ra ǃgâiaǂgaob ǀkha ǃoaba o, ǃgomsina da ga ūhâ xawe. (Deu. 16:15; 1Tes. 5:16-18) Ama ǂkhîba ūhâs ge ǃkhūsiba ôasa xu nî ǃkhō-oa da tsî ǃnāsa ǂkhîba nî mā da Elob Gaosiba da ǂgurose ra mâi ǃkhais ǃgao. (Mat. 13:44) Mû da ga ra o, nēs tae-e ra ǃaromasa ob ge sida ǂkhîba nî kai tsî sida ǃgâiaǂgaob tsîna.—ǃNǃkh. 20:35; Fil. 1:3-5.

“Nēsi du ga ǂkhîǂâixa o, o du ge hānîǁaeb ǃnâs tsîna kai ǂkhîba nî ūhâ.” Nē mîdeb ge ǀgapi ǁgauǃnâ ǃkhaib ôaǃnâ-aob Nebraskas Amerikab ǃnâ hâba ǂurusib xa ge mî. ǁNā mîdi ge a ǀguiǃnâxa Elobmîs ǀkha mî rase: “ǃGâiaǂgaoxa ǂgaob ge soǀôaba.” (ǂKhm. 17:22) Sadu ǂkhîb ra kai khami du ge ǃgâi ǂurusiba nî ūhâ.

ǃGom ǁaegu ǃnâ da ûi hâ xawe da ge hâhâ nî ǂkhîba a ūhâ ǁkhā. ǀGores, Elobmîsa ôaǃnâs tsî ǁkhāǁkhāsen da ra xūn xa ǂâiǂâisens ge nî hui da. Sida ǂkhîb tsîna da ge a kaikai ǁkhā ū da hâ ǀkhaega ǂâiǃgâs, nau ǃgâsan ǂgomsa ǁgaes tsî Jehovab ǂâisa dīs ǃnâ-ū. Psalmdi 64:10 di mîdi ge a ama mî rase: “ǂHauǃnâb ge ǃKhūb [Jehovab, NW] ǃnâ ǃgâiaǂgao tsî ǁîb ǃnâ nîra sâusen.”