1, 2. (a) Gagasi khoesisa mati ǀnî ǃgâsana ge hui? (b) Mâ ǃnona dîde da nî ǃhoaǃgao?

“GAGASI khoesis ge ge hui te î ta ǂkhîba ūhâ tsî tsēkorobe ǃgomsiga sîsenǂam ǁkhā,” dis ge Kanadab ǃnâ hâ ǃgâsasa ra mî. Brasili ǃnâ hâ ǃgâsab ge ra mî, “23 kurigam ǃgame hâ xawem ge noxoba sim ǃgame ommi ǃnâ a ǂkhî, nēs ge gagasi ǂâi ǀgauga hoaǁae ūhâs xa ra ǃaromahe.” Filepine ǃhūb ǃnâ hâ ǃgâsab ge ra mî, “gagasi khoesis ge ra hui te î ta hoaǁae ǂkhîba ūhâ tsî ǃgâsan hîna ǃkharagagu khaoǃhūga xu ra hāna ǃgâise hâ ū ǁkhā.”

² Nēti i ǀgauga ūhâs ge ra ǁgau gagasi khoe du asa. Nēs ǀkha da ge sao ra dîde a dîsen ǁkhā, ‘mati ta gagasise a ǀgai ǁkhā tsî ǂguro xoaǀgoras ǃnâ xoasa xūna xu a ǀama ǁkhā?’ Xawe ǁnā dîsa da nî ǃereams aiǃâ da ge aibe nî ǁnâuǃā, Elobmîs tae-e gagasi khoe-i xa ra mîsa tsî nēs tae-e ra ǂâibasens tsîna. Nē ǁkhāǁkhāǃâs ǃnâ da ge ǃnona dîde nî ǃeream. (1) Gagasi khoesisa tae-e ra ǂâibasen? (2) Mâ aiǁgaude nî hui da î da gagasise ǀgai? (3) “Xristub di ǂâisa” ūhâsa mati nî hui da î da gagasi khoe kai?

3. Elobmîsa mati ǁgansi khoe-i tsî gagasi khoe-i ǃkharagagusiba ra ǁgau?

³ Apostel Paulub ge ra mûǂan kai da tae-i a gagasi khoesa. Nēs ǃnâ-ūb ge ‘gagasi khoe-i’ tsî “ǂūsi khoe-e” [ǁgansi khoe-i] ǃkharagagusiba ra ǁgau. (Khomai re 1 Korinteǁîn 2:14-16.) Tae-i ǃkharagagusiba hâ? ‘ǂŪsi khoe-i’ ge khoe-i hîna “Elob Gagab dina ǃkhā tama hâ; gâresise i ǁîna ūhâ xui-ao, tsî i ge ǁîna a ǁnâuǃā ǁoa.” Xawe i ge “gagasi khoe-e” “hoana ra ǀgora” tsî “Xristub di ǂâisa” ūhâ. Paulub ge ra ǂkhâǃnâ da î da gagasi khoe kai. Mâ ǀgaugu ǃnân ǁgansi khoe-e gagasi khoe-e xu ra ǀkhara?

4, 5. ǁGansi khoe-i di ǀgauga a tae?

⁴ ǂGurose aibe ǁgansi khoe-i di ǂâi ǀgaub xa ǂâi re. Nē ǃhūbaib ǀgaub ge ǁgansi ǂâi ǀgaub ai a ǃgaoǃgaosa. Paulub ge nēsa “ǁnā gagab, nēsi ǁnâuǁoasib di ôan ǃnâ ra sîsenni” ase ra ǁguiǃā. (Efe. 2:2) Nē gagab ge ǃnāsase khoena ra ǂkhâǃnâ în nau khoen ra dī xūna ǁgae. ǁÎn ge ǃnāsase ǁgansi turagu ai ǁîn ǂâide ǂnûi hâ. Nēs ge ra ǃaroma în ǁîn ra ǂgao xūna dī tsîn ge ǁîna Elob di ǂgaoǀkhādi ǃoagu ûi tama hâ. ǁGansi khoe-i ge hoaǁae ǀgapi ǀonsa ombasens, ǃkhūsiba ǀhaoǀhaos tsî ǁî-i ǃgâib ǃnâ hâ xūna ǁkhaubas tsîn ǃoa ǀgui ra kō.

⁵ Mâ ǀgaub ǃnâs tsîna da ǁgansi khoe-e a mûǂan ǁkhā? Khoe-i hîna “ǁgans di sîsenga” ra dī-i ge nēs ǃnâ ǃkhōǂgāsa. (Gal. 5:19-21) Paulub di ǂguro sîǂkhanis Korinteǁî ǀhaohâba ǃoab ge xoas ǃnâs tsînab ge ǁgansi khoe-i di ǀgauga ra mîǃā. Nēs ge khoen ǁaegu ǀgorasa dīs, ǀkhāga ūs, ǂkhababa ǃkhōǃkhōs, ǁnâuǃgâ ǃkhaiba ǃoa ī ugus, ǁgaumâisa ǃgâsagu tsî aogu tsîna ǃgôasiba ūhâba tama is tsî kaise ǂûs tsî kaise ās tsîna ǃkhōǂgā hâ. ǁGansi khoe-i ge ǃâitsâhe i ga ra o, o ǃâitsâb ǃnâ ra māǁnâsen. (ǂKhm. 7:21, 22) Judab ge ge mî ǁîn ge aiǃâb ǀkha ǁgaiǂoas ǀguisa nî dī tsî “gagaba ūhâ”tide di.—Judab 18, 19.

6. Gagasi khoe-e mati ra mûǂan-e?

⁶ “Gagasi khoe-e” tae-e ra ǂâibasen? Gagasi khoe-i ge a māsenxa Eloba ǃgâsa. Gagasi khoe-i ge ra dītsâ ‘Eloba ǁgaesa.’ (Efe. 5:1) Nēs ra ǂâibasens ge ǁîn ge ra dītsâ Jehovab ǂâi ǀgauba hoa xūn ǃnâ mûsa tsî hoaǁae ǁîb di mûǂuisa ūhâsa. ǁÎn ge Eloba ama khoeb ase ra mû. ǁÎn ge ǁgansi khoen khami ī tama hâ xawe hoaǁae dīn ra xūn hoana Elob di ǂgaoǀkhādi ǃoagu ra dī. (Psa. 119:33; 143:10) ǁGansi turagu ai ǂâisa ǂnûis xa i ge gagasi khoe-e ra dītsâ ‘gagab di ǂûba’ ǁgausa. (Gal. 5:22, 23) ǃGāsase “gagasi ǂâi ǀgauba ūhâ” di hâ mîsa ǁnâuǃās ǃaroma sao ra ǃkharagagusib xa ǂâi re: Khoe-i hîna ǁamaxū ǃkhaib ǃnâ ǃgâi ǂansa ūhâ i ge ǁamaxū-ao-i di ǂâi ǀgauba ūhâ khoe-i ase ra mûhe. ǁNās ge a ǀgui khoe-i hîna gagasi xūna dīs xa a ǃgâibahe-e tsî gagasi ǂâi ǀgauba ūhâse a ǂansa-e.

7. Elobmîsa tae-e gagasi ǂâi ǀgauba ūhâ khoen xa ra mî?

⁷ Elobmîs ge ǃgâise gagasi ǂâi ǀgauba ūhâ khoen xa ra ǃhoa. Mateub 5:3 ge ra mî: “ǃGâiǃōn ge hâ gagas ǃnâ ǀgâsana, ǁîn dib a gaosib ǀhommi diba amaga.” Tsî Romeǁîn 8:6 ge gagasi khoe-i ūhâ ǃgâi aiǂhanub xa ra ǃhoa, mî rase: “Tsî ǁgans di ǂâiǂâisens ge a ǁō; xawe Gagab di ǂâiǂâisens ge ûi tsî a ǂkhî xui-ao.” Nēsi da ga Gagasi xūn ǀkha ga ra  ǁaeǁaesen o, o da ge ǂkhîba Elob ǀkha a ūhâ ǁkhā tsî hanîǁae ǀamo ûiba.

8. Tae-i ǃaroma i gagasise ǀgaisa ǁguiǂgāsensa ǂhâ hâ?

⁸ Xawe da ge nēsi ǁkhōǁkhōsa ǁaegu ǃnâ ûi hâ. ǁGansi tanisen ǀgaugu hoaǁae sida ǁaegu hâ ǃkhais ǃgao da ge ǁkhā da an hoana nî dītsâ gagasise ǀgai tsî sida di gagasiba ǁkhaubasa. Khoe-i ga ǁî-i di gagasi ǂâi ǀgauba ga ra ǂoaǃnâ o, o i ge ǁî-e “ǁgansi” ǀgauga ǃēsa ra mā ǁî-i di gagasi ǂâi ǀgauba dīkākās ǀkha. Tae-e a hui da ǁkhā is nēsa tā ī? Mati da gagasise a ǀgai ǁkhā?

9. (a) Tae-e nî hui da î da gagasise ǀgai? (b) Mâ aiǁgaudi xa da nî ǃhoaǃgao?

⁹ ǀGôa-i ge ǁgû-i aiǁgausa ǃgaoǃgâxase kō tsî ǁî-e ǁgaes ǃnâ-ū ra kai. ǁNās khami da ge sada tsîna gagasise a ǀgaisa khoen aiǁgaude sao tsî gagasise a ǀgai ǁkhā. Xawe ǁgansi tanisen ǀgauba ūhâ khoen aiǁgaude ǁgaes ge a ǁkhōǁkhōsa. (1Kor. 3:1-4) Elobmîs ǃnâ da ge nēti i aiǁgaudi xa ra khomai. Gagasise da ga ǀgai ǂgao o, o da ge ǃgâi aiǁgaude ge ǁgau khoena nî ǁgae. Hā re î da Jakob, Marias tsî Jesub aiǁgaude kō.

10. Jakobuba mati ge ǁgau ǁîb a gagasi khoesa?

¹⁰ ǂGurose hā re î da Jakobub di aiǁgaus xa ǃhoa. Ûib nētsē sada supuba tama khamib ge Jakob tsîna ǃgoma gere hōǃâ. ǁÎb ǃgâb Esaub hîna ǁgansi ǂâi ǀgauba ūhâb ge ǁîba gere ǃgam ǂgao. ǁNās ǂam-aib ge ǁîb di ǀuiǁgûba ǁîba ge gāxaǃnâ. Nē “ǁgansi” ǂâi ǀgauba ūhâ khoegu ǁaegub ge hâ i xaweb ge Jakob gagasise ge aiǃgû. ǁÎb ge Abrahammi ǃoa ge dīhe mîmâis ǃnâ ǀgaisa ǂgomsa ge  ūhâ i tsî ǁîb omarisa gere kōǃgâ ǁîn Jehovab ǂâibasens ǃnâ ǃâ-e nî ūhâ amaga. (Gen. 28:10-15) Jakob di mîdi tsî dīb gere xūn ge ge ǁgau ǁîb Elob di ǂgaoǀkhādi tsî ǂâibasens xa hoaǁae gere ǂâisa. Aiǁgause Esaub ge Jakob gere ǃgam ǂgao o, ob ge ge mî: “Sats kom ge mîo: Tita ge ǂanǂansase sa tawa nîra ǃgâidī, tsî tita ge sa suriba nîra mâi hurib amǃgâb di ǁkhaeb hîa ǂguib ǃaroma ǃgôahe ǁoab axase.” (Gen. 32:6-12) ǁÎb ge Jehovab ge ǁîb tsî ǁîb ǁōǂoa ge kai ǁgûn ǃoa a dī mîmâidi ǃnâ ǀgaisa ǂgomsa ge ūhâ i tsî Elob ǂâisa dīs ǃoagu gere ûi.

11. Tae-e ra ǁgau Marias a gagasi khoesa?

¹¹ Marias aiǁgaus xa ǂâi re. Jehovaba tae-i ǃaroma Mariasa ge ǁhûi is Jesub mamasa kai? ǁÎs ge gagasi ǂâi ǀgauba ge ūhâ i. Nēsa da mati a ǂan? ǁÎs ge Saxariab tsî Elisabets tsîna a sari o, os ge ǁîs ǃhoa ǀgaub ǃnâ ge ǁgau ǁîs a gagasi khoesa. (Khomai re Lukab 1:46-55.) Marias di ǃhoa ǀgaub ge ge ǁgau ǁîs Elobmîsa a ǀnamsa tsîs ge Hebre xoadi ǃnâ ǃgâi ǂansa ūhâ isa. (Gen. 30:13; 1Sam. 2:1-10; Mal. 3:12) Marias tsî Joseb tsîn ge ǃgame hâ i xawe ra ge Jesub ǃnaes aiǃâ ge ǁgoe ǀhao tama hâ i. Nēsa tae-e ra ǁgau? ǁÎra ge Jehovab ǂâis tsî ǁîb ǂgaoǀkhāde dīǀoaǀoas xa ge ǀgapibahe i tsî ǁîra di ǁgansi turagu xa ǀgui ge ǂâi tama hâ i. (Mat. 1:25) ǁAeb ge ī khamis ge Mariasa Jesub gere dī xūna ǃgaoǃgâ tsî “nē mîdi hoade ǂgaob âs ǃnâ ge sâu.” (Luk. 2:51) Nēs ge ra ǁgau ǁîs ge Mesiab hās ǃnâ ǃgâiǃgâibasensa ūhâ isa. Marias aiǁgausa ǁgauda tama hâ, î da Elob ǂâis tsî ǁîb ǂgaoǀkhāde dīsa ǂgurose sida ûib ǃnâ mâi?

12. (a) Jesuba mati ǁîb ǁgûba gere ǁgae? (b) Mati da Jesub aiǁgausa a ǁgae ǁkhā? (Tsoatsoas ǃnâ hâ ai-īsiba mû re.)

¹² ǃHūbaib ai ge hâ i khoen hoan ǃnâ, ham-i aiǁgausa ra mâǂoa gagasi khoe-i ase? Jesub aiǁgausa. ǁÎb ûib tsî aoǁnâ sîsenni ǃnâb ge ge ǁgau ǁîb ge Jehovaba gere ǁgae ǂgaosa. ǁÎb ge ǂâi ǀgaub, tsâsib tsî tanisen ǀgaub ǃnâ Elob di ǂâis ǀkha ǀguiǃnâxase gere ûi. (Jhn. 8:29; 14:9; 15:10) Aiǁgauseb ge Kēbo-aob Jesajaba Jehovab di ǀkhomxaǂgaosib xa ra ǃhoa tsîb ge ǃGâiǂhôas xoa-aob Markuba ra mî Jesub tsîn ge di gere tanisen di. (Khomai re Jesajab 63:9; Markub 6:34.) Sada tsîna Jesub khami, ǂhâsib ǃnâ hâ khoen ǀkha da ga ra ǀhao o, o khoexaǃnâsiba ra ǁgau? Jesub ge aoǁnâ sîsenni tsî ǃgâiǂhôas xa khoena ǁkhāǁkhās ǃnâ ge ǁguiǂgāsen hâ i. (Luk. 4:43) Nēn hoan ge a gagasi khoe-i di ǁgauǁgau.

13, 14. (a) Tae-e da sida ǁaegu hâ gagasi khoen aiǁgaude saos ǃnâ-ū a ǁkhāǁkhāsen ǁkhā? (b) Aiǁgau-e mā re.

¹³ Sada ǁaeb ǃnâs tsîna da ge gagasi ǂâi ǀgauga ūhâ khoen aiǁgaudi hîna Xristub khami ī ǀgauga ra ǁgauna ūhâ. ǀNîsi du ge ǁîn aoǁnâ sîsenni ǁkhoaǂgaosib, ǃhaokhoeǃkhōǃoasib tsî ǁîn ǀkhomxaǂgaosib tsîna ra mû. ǁÎn ge sida khami ǂkhabusasigu tsî ǀoasa kurusan ūhâ tama hâ xawe ra dītsâ gagasi ǀgauga ǁgausa. Raxel di ǀon hâ ǃgâsas hîna Brasili ǃnâ ra hâs ge ra mî: “Tita ge Jehovaba ǃoaba tama hâ khoen ra ana ǀgauba ǁgaes xa ge ǃgâibahe i. Tsî ta ge ǁaeb ge ī khami ǃkhaerase ge ana tsoatsoa. Xawe amaba ǁkhāǁkhāsens ge ge hui te î ta gagasi ǂâi ǀgauba ūhâ khoe-i khami ana tsoatsoa. ǀKharaǀkharana dīs ge ge  supu tama hâ i, xawe nēna dīs ǀkha ta ge ge ǂkhî tsî ǂâibasensa ûib ǃnâ ge hō.”

¹⁴ Reylene di ǀon hâ ǃgâsas Filipens ǃnâ hâs ge sao ra-e ge hōǃâ. ǁÎs ge ǀgapi ǁkhāǁkhāsensa ūhâs tsî ǃgâi sîsen-e ūhâs xa ge ǃgâibahe i. ǁÎs ge ra mî: “Ti gagasi mîǁguigu ge ǁaeb gere ī khami ge bē. Xawe ta ge ega ge mûǂan xū-i ti ûib ǃnâ a ǀkhaisa, ti sîsenni xa a ǂhâǂhâsa-e. Tsî ta ge ega ti ǂâi ǀgauba ge ǀkharaǀkhara tsî Jehovaba ǂgurose ti ûib ǃnâ ge mâi.” ǁNās xa ǃaromahe hâses ge Reylenesa ǀgaisa ǂgomsa Jehovab mîmâidi hîna Mateub 6:33, 34 ǃnâ xoasa di ǃnâ ge hō. ǁÎs ge ra mî: “Tita ge a ǂan Jehovab tita nî kōǃgâsa.” ǀNîsi du ge sadu ǀhaohâb ǃnâ nēti i aiǁgausa ūhâ khoe-e a ǂan. Nē khoen aiǁgaude ǁgaesa ǂgae da tama hâ?—1Kor. 11:1; 2Tes. 3:7.

15, 16. (a) Xristub khami da ga ī ǂgao o, o da tae-e nî dī? (b) Mati da sida ǂâi ǀgauba ‘Xristub di ǂâis’ ǀkha nî ǀguiǃnâxa kai?

¹⁵ Mati da Xristuba a ǁgae ǁkhā? Elobmîs ge 1 Korinteǁîn 2:16 ǃnâ ‘Xristub di ǂâisa’ ūhâs xa ra ǃhoa. Tsî Romeǁîn 15:5 ǃnâ ra mî “ǀguiǂâixa Xristub Jesub” ǀkha. ǁNās ǀkha da ge Xristub khami da ga ī ǂgao o, o ǁîb di ǂâi ǀgaub tsî ǁîb di ǀgaugu tsîna nî ǁgae. ǁÎb di aiǁgausa da ge nî sao. Jesub ge Elob ǀkhab ūhâ ǀhōsagusis xa a ǀgapibahe. Jesub khami da ga ra ī o, o da ge Jehovab ǀgauga nî ǁgae hō. Nēs ra ǁgaus ge kaise i a ǂhâǂhâsasa î da Jesub ra ǂâi khami ǂâi tsoatsoa.

¹⁶ Nēsa da mati a dī ǁkhā? Jesub ǁkhāǁkhāsabegu ge ge mû matib ge ǁîba gere ǁkhāǁkhā ǀgaus, khoexaǃnâse khoena gere hâ-ū ǀgaub tsî matib ge Elobmîs tsoatsoade gere sîsen-ū ǀgaub tsîna. ǁÎgu ge ge mî: ‘Sige ge a ǀhûǀguitimî-ao, . . . dīb gen hoan ǃnâ.’(ǃNǃkh. 10:39) Sada ge nētsē ǁîba ǀgūseba xu a ǃgaoǃgâ ǁoa ǁîgu khami. Xaweb ge Jehovaba ge īǁkhā kai, î da Jesub xa ǃGâiǂhôas ǂkhanidi ǃnâ khomai. Nē Elobmîs ǂkhanidi Mateub, Markub, Lukab tsî Johaneb dide khomais tsî ǂâiǃgâs ǃnâ-ū da ge Xristub di ǂâi ǀgaub xa ra ǁkhāǁkhāsen. Nēs ǀkha da ge ‘ǁîb di daoga nî ǃkhōdao’ tsî ‘ǁkhāti ǁkhā ǂâisa’ nî ūhâ Xristub khami.—1Pet. 2:21; 4:1.

17. Xristub ǂâi ǀgauba ūhâsa mati nî hui da?

¹⁷ Xristub ǂâi ǀgauba ǁkhāǁkhāsensa mati nî hui da? Sorosa ǀgaiba ra mā ǂûna da ga ǂû o, o da ge ra ǀgai. ǁNās khami da ga Xristub ǂâi ǀgaub xa ga ra ǁkhāǁkhāsen o, o da ge sada tsîna gagasise nî ǀgai. Tsî da ge mâ mâsib hoab ǃnâ Xristub khami nî ǂâi. Nēs ge nî ǃaroma î da ǃanu ǂâi ǀgaub tsî Elob mā-ams tsîna nî ūhâ. Nē xūn hîna da ra hōn ge ra hui da î da “ǃKhūb Jesub Xristuba ana.”—Rom. 13:14.

18. Tae-e du gagasi khoe-i di ǀgauga xu ra ǁkhāǁkhāsen?

¹⁸ Gagasi khoe-i tae-e ra ǂâibasensa da ge go ǃhoaǃgao. Mati da gagasi khoe-i aiǁgausa xu a ǁkhāǁkhāsen ǁkhā ǀgaub tsîna da ge go mû. ǀUnisi da ge go mû “Xristub di ǂâisa” ūhâs mati khoe-e gagasise ra ǀgai kai ǃkhaisa. Xawe da ge ǀnî hâ ǃâgu gagasi ǀgauga ǃkhōǂgā hâgu xa nî ǃhoa. Aiǁgause mati da gagasi khoese a ôaǃnâsen ǁkhā ǀgaub? Mati da a aiǃgû ǁkhā gagasise ǀgais ǃgao? Sida gagasi ûiba mati sida tsēkorobe ûiba a tsâǀkhā ǁkhā? Sao ra ǁkhāǁkhāǃâs ge nē dîde nî ǃeream.