1, 2. (a) Tae-i ǃaroma da ǁkhoaǂgaosiba Noaxi, Danieli tsî Jobi tsîgu aiǁgaude xu nî hō? (b) Esegiela mâ mâsib ǃnaga Esegieli 14:​14 ǃnâ a xoasa mîde ge xoa?

ǃGOMSINA du ra hōǃâ, aiǁgause ǀaeb, mari ǃgomsin tamas ka io ǃâitsâgu? ǁAeb ai i a ǃgomba du ǂkhîba ūhâ ǀkharasa Jehovaba ǃoabas ǃnâ? Nēti du ga ra tsâ o, o du ge Noaxi, Dan­ieli tsî Jobi tsîn di aiǁgaude xu ǁkhoaǂgaosiba nî hō. ǁÎgu tsîn ge ǀoasa kurusa ge ūhâ tama hâ i tsî sida ra hōǃâ ǃgom­sin hoana gere hōǃâ, ǁō ǁkhās tsîna gu ge ge hî. Nē ǃgomsin ge hâ i xawe gu ge ǁîga ǂgomǂgomsase ge hâ Jehovab ǃoa-ai tsî gu ge sida ǃgao kaise ǃgâi aiǁgausa ge mā da ǁgae ǁkhā da asa.​—Khomai re Esegieli 14:​12-14.

² Esegieli ge nē xoaǀgoras mîde Babilons ǃnâ 612 kuriga Jesub aiǃâ ge xoa. * (Ese. 1:1; 8:1) Jerusalems di dīkakas ge gere ǀgū tsî ǁnās ge 607ǁî kuri Jesub aiǃâ ge ī. ǀOro khoen  hîna ge Noaxi, Danieli tsî Jobi tsîgu di ǀgauga ūhâ în ge ge sâuhe. (Ese. 9:1-5) ǁNā ǀoro khoen ǁaegu i ge Jeremiab, Baruxi, Ebed-meleki tsî Rexabǁîn tsîna ge hâ i.

3. Nē ǁkhāǁkhāǃâs ǃnâ da tae-e nî ǃhoaǃgao?

³ Nētsēs tsîna i ge Jehovab xa ǂhâu­ǃnâse ra mûhe khoen, Noaxi, Danieli tsî Jobi khami īna nî sâuhe nē ǃhūbaib ǀams ga ra hā o. (J.ǂHa. 7:​9, 14) Hā re i da kō, Jehovab ge tae-i ǃaroma nē khoe­ga ǂhanu-aisib di aiǁgaus ase a sîsen-ūsa. ǁÎgu xa da ra ǃhoa, hîna da ge nî mû (1) tae-i ǃgomsina gu gere hōǃâs tsî (2) mati da ǁîgu ǂgoms tsî ǁnâuǀnam­xasib tsîna nî ǁgae ǀgausa.

4, 5. Noaxa tae-i ǃgomsina gere hōǃâ tsî ǁîb ge ǀûǃnâsen tama hâ i ǃkhaisa tae-i ǃaroma a ǀō-aisa?

⁴ ǃGomsin Noaxi gere hōǃân. Noaxi di kai ǁgûb Henoxi ǁaeb ǃnân ge khoena, kaise ge eloxoresa i. ǁÎn ge “karosa” tsî uiuisa mîde Jehovab ǃoa ai gere mî. (Judab 14, 15) ǂKhabadīb ge gere ǀoa. Noaxi tsēdi ǃnâ i ge ǃhūbaiba “ǂkhabadīb xa ge ǀoa hâ i.” ǀGauoǃnâ ǀhomǃgāgu ge khoegu khami dīsen tsî khoede ǃhūbaib ai hā gere ǃgamme tsî ǁaixa hâ, hāba­ǃnâgu hâ ǀgôana ge hō. (Gen. 6:​2-4, 11, 12) Xaweb ge Noaxa gere mâǂoa. “Noaxi ge ǀkhomma ge hō ǃKhūb mûǁae . . . Noaxi ge ǂhanu-ai tsî ǂhauǃnâ ao ge i, ǃhaodi âb ǃnâ. Noaxi ge eloǃaoǃgâxase gere tanisen.”​—Gen. 6:​8, 9.

⁵ Nē mîdi tae-e nē ǂhanu-ai khoeb xa ra mîsa ǂâiǃgâ re. Noaxi ge Eloba 70 tamas ka io 80 kurigu ǀguiga ge ǃoaba tama hâ i, ǁgamgu dâus ǁaeb ai. Nētsēn ge ǂgui khoena ǁnātikō kuriga ra ûi. Xawe ǁîb ge 600 kuriga ǁnā eloxoresa ǃhūbaib ǃnâ ge ûi. (Gen. 7:​11) Sida nētsē ǀhao­hâb tsî sida ǀaokhoena xu ra hō gagasi ǂkhâǃnâsab ge ǁîba ge ūhâ tama hâ i. *

6. Noaxa mâ ǀgaugu ǃnâ ǁkhoaǂgoasiba gere ǁgau?

⁶ Noaxi ge ǃgâi ûiba ūhâs ǀkhā ǀgui ge ǂâu tama hâ i. Xaweb ge ǁîba “ǂhanu-aisib di aoǁnâ-aob” di a ǂansa, ǁîb ǂgomsa Jehovab ǃnâ ra ǁgauba. (2Pet. 2:5) ǁÎb ǂgoms “ǀkhab ge ǃhūbaiba ǀgoraǃgâ,” dib ge apostel Pauluba ge xoa. (Heb. 11:7) Noaxi ge khoen xa gere mâǃoahe tsî ǀgauoǃnâses tsîna gere hâ ūhe. Xaweb ge ǁîba ‘khoena ge ǃao’ tama hâ i. (ǂKhm. 29:​25) ǁÎb ge ǁkhoaǂgaosiba ge ūhâ i, Jehovab ǁîb ǂgomǂgomsa ǃoaba-aona ra māba.

7. Arkab gere om o, ob ge Noaxa mâ ǃgomsina gere hōǃâ?

⁷ Noaxi ge Eloba ǁaubexa koro kai disi kuriga ge ǃoaba. Jehovab ge ǁîba ge mîba îb arka om, khoen tsî xamanin tsîn nî sâuhe ǁkhāse. (Gen. 5:​32; 6:​14) Nē sîsenni ge kaise ǃgomse gere mûsen, om sîsenni ǀgui-i ose. Noaxi ge ge ǂan i, nēs nî ǃaromasa îb ǂgui khoen xa mâǃoahe. Xaweb ge ǁîba ǁnâuǀnamxase ǂgoms ǃnâ ge aiǃgû. Dib ge “Noaxa ge dī.”​—Gen. 6:22.

8. Noaxa mâ ǀgaugu ǃnâ Jehovab ai gere ǂgomaiǂnui?

⁸ ǀNî hâ ǃgomsib hînab ge Noaxa gere hōǃâb ge, ǁîb kaikhoes tsî ǀgôan tsîn di ǂhâsiga kōǃâsa. ǁGamgu dâus aiǃân ge khoena ǃgarise gere sîsen în ǂû-e hō ǁkhā. Noaxi tsîn ge nēsa gere dī. (Gen. 5:​28, 29) Noaxi ge ǁîb ûiba, tsēkorobe  ǂhâsigu ai ge mâi tama hâ i, xawe Elob ai. Arka oms ge 40 tamas ka io 50 kuriga ge ū, xaweb ge ǁîba ǁaeba gagasi xūna hoaǁae ge ūba hâ i, ǁaxab ge i xawe. Tsîb ge 350 kuriga ǁgamgu dâus khaoǃgâ noxoba nēsa gere dī. (Gen. 9:​28) Kaise ǃgâi aiǁgau tamasa ǂgoms tsî ǁnâuǀnamxasib disa!

9, 10. (a) Mati da Noaxi ǂgoms tsî ǁnâu­ǀnam­xa­sib tsîna nî ǁgae? (b) Jehovaba mati khoen hîna ǁîb ǁgaraga ra ǃkhōǀgaipena ra mû?

⁹ Mati da Noaxi ǂgoms tsî ǁnâuǀnamxasib tsîna nî ǁgae. Nēsa da ge ra dī Jehovab ǂhanu-aisiba da ga ra ǃkhōǀgaipe o, nē ǃhūbaib ǃnâ ǃâ-e ūhâ tama ga ra io tsî Goasiba ǂgurose sida ûib ǃnâ ga ra ūhâ o. (Mat. 6:​33; Jhn. 15:​19) Tsî nî dī îb sida ûi ǀgauba tā nē ǃhūbaib ǃnâ ǃgâiǃgâibasensa ūhâ. Sida di ǁgaragu ǃgameb tsî ǁgoe-ūgus ǃaroma hâgu ge ǂgui khoena ǁgai ǂâi ǀgauga ge mā. (Khomai re Maleaxib 3:​17, 18.) Noaxi khami da ge Jehovaba ra ǃao, khoen ose. ǂAn da as ge ǁîb ǀguib ǀamo ûiba nî mā da ǃkhaisa.​—Lukab 12:​4, 5.

¹⁰ O sida tae-e nî dī? Elob ǀkhā ǃgû îda nî khoen ga māǃoa da o, tamas ka io i ga ǃhūbaib ǁgâiǀāde sida ǂgomsa Jehovab ǃnâ ǃâitsâ o? Noaxi di ǂgoms tsî ǁnâuǀnam­xasib tsîna da ga ra ǁgae o, o da ge Jehovab ai nî ǂgomaiǂnui ǁîb nîra kôǃâ da ǃkhaisa.​—Fil. 4:​6, 7.

11. Danieli tsî ǁîb ǀkhā ge hâ i ǃnona khoegu tsîna tae-i ǃgomsina Babilons ǃnâ gere hōǃâ? (Tsoatsoas ǃnâ hâ ai-īsiba mû re.)

¹¹ Danieli gere hōǃâ ǃgomsin. Danieli ge Babilons ǃnâ ǃkhōsis ǃnâ ge hâ i, nē ǃās ge “ǁgôatsuiǁgoaǃoabas tsî ǃgaidīb” xa ge ǀoa-e hâ i. Babilonǁîn ge Jodeǁîna gere ǃgôaǁnâ, ǁîn tsî ǁîn Elob Jehovab tsîna. (Psa. 137:​1, 3) Nēs ge ǂgomǂgom­sa khoena gere tsûaǂgao kai, Daniela ǃkhōǂgā hâse! Danieli tsî ǁîb ǀkhā ge hâ i ǃnona khoegu Hananjab, Misaeli tsî Asariab tsîn ge ais-ǀkhāb ai ge mâi-e hâ i, ǁîgu gao-aob ǃoabas ǃnâ nî ǁkhāǁkhāhe amaga. ǁÎgu ge ǂû gu nî xūn tsîna gere mîbahe. ǂÛn tsî āxūn tsîn ge ǃgomsiba ge mā tsoatsoa. Danieli ge “gao-aob ǂûn di ǃâdi tsî ǁkhāti āxūn âb di ǂauxûib ǀkhab ǀuriǀurisen tide” ti a mî amaga.​—Dan. 1:​5-8, 14-17.

12. (a) Daniela mâ ǃgâi ǀgauga ge ūhâ i tsî nēsa mati io a ǀō-aisa? (b) Jehovaba Daniela mati gere mû?

¹² Danieli ge ǁîb gā-aisib ǀkhā kai ǃgom­siba gere hōǃâ, nēs ge ge ǃaroma îb ǁîba ǀō-aisa aiǂhanuga hō. (Dan. 1:​19, 20) ǁÎb ge ǀgapiǂâixa tama ge hâ i, xaweb ge gere ǃgamǃgamsen tsî Jehovaba ǃgôasib anub hâba gere mā. (Dan. 2:​30) Danieli ge ǂkhamsis tsēdi ǃnâ Jehovab xa ǁîb ge a ǂhanu-aisib di aiǁgau di ge mîhe, Noaxi tsî Jobi tsîna ǃkhōǂgā hâse. Danieli ge Jehovab ǃnâ ūhâ i ǂgomǃgâsiba ge ǃgâi tama hâ i? Nēs ge di ī tama hâ! Danieli ge ǁîb ûi kurigu hoaga, ǂgom­ǂgomsase ge hâ. ǁÎb di 90 kurigu ǃnâb ge Elob ǀhomǃgāba ǁîb ǃoa ge mî: “Danieltse, sats ǀnamǀnamsa aotse.”​—Dan. 10:11.

13. Daniela mâ ǀgaub ǃnâ ǁkhaeǂgaos ase nau Jodeǁîna ge ība i?

¹³ Danieli ge nē ǃgâi ǀgaugu ǃgao, ǂguro ministeri ase Babilons tsî Medo-Persias tsîn ǃnâ ge ǁgaumâihe. (Dan. 1:​21; 6:​1, 2) Jehovab ge di ge ǀape îb Dan­iela ǀkhaeb ase ǁîb khoen ǃaroma i, Joseb ge Egipteǃhūb ǃnâ ī i khami tsî  Esters tsî  * (Dan. 2:​48) Nēs ge ǁkhae­ǂgaos ase Jodeǁîn tsî Esegieli tsîna ge ība i, mûsa Jehovab ra hui ǀgausa!

14, 15. (a) Sida mâsiba mâ ǀgaub ǃnâ ­Danieli dib ǀkhā a ǀgui? (b) Nētsēn ǁgûna tae-e Da­nieli ǁgûn aiǁgausa xu a ǁkhāǁkhāsen ǁkhā?

¹⁴ Mati da Danieli ǂgoms tsî ǁnâuǀnam­xasib tsîna a ǁgae ǁkhā. Nētsē da ge ǃhūsabese ǁan hâ, ǃhūbaib hîna sorosises tsî gagasises tsîna Babilons kais xa ǃamiǂgā-e hâb ǃnâ. Nēti ge ama tama ǂgomde, ‘ǁgâuagu di ǁanǃkhaide.’ (J.ǂHa. 18:2) Sida tsîn ge ra māǂoa ǂgao, khoen xa da ra “ǁkhanhe” amaga. (Markub 13:​13) Danieli khami da ge Jehovab sida Elob ǃoa nî ǀgū. ǃGamǃgam­sen tsî da ga ǁîb ai ǂgomaiǂnui o, o da ge ǁîb mûǁae nî ǀō-aisa i.​—Hag. 2:7.

¹⁵ ǁGûn ge Danieli ǁgûra aiǁgausa xu a ǁkhāǁkhāsen ǁkhā. Nēsa mati ī? Eloxoresasib ge Judab ǃnâ ǀoa hâ i, xaweb ge Daniela Eloba ǂkhamsisa xu ge ǀnam i. Xawe nēs ge aitsâmaba xu ge hâ tama hâ i. Nēs ge ra ǁgau ǁgûra ge ǃgarise a sîsensa ǁîba gagasi xūna ǁkhāǁkhāsa. (ǂKhm. 22:6) ǁÎb ǀons ǂûs ge ǁnāsa ra ǁgau “ti ǀgoraǃgâ-aob ge a ǃKhū” ti ra ǂâibasensa. (Dan. 1:6) ǁGûn ge tā ǁîn ǀgôana nî ǀûǃnâ xawe ǃnūǃnâxasib ǀkhā nî ǁkhāǁkhān. (Efe. 6:4) ǁÎn ǀkhā da ge nî ǀgore tsî ǁîn tsîna nî ǀgoreba. ǁÎna du ga Elobmîs amaba ǁkhāǁkhā o, on ge ǁîna Jehovab ǀkhaeba nî hōǃâ.​—Psa. 37:5.

16, 17. Joba mâ ǃkharagagu ǃgomsina gere hōǃâ?

¹⁶ Jobi gere hōǃâ ǃgomsin. Jobi ûib xa ǁkhāǁkhāsens di ǃkharagagusigu. ǁÎb ǃgomsigu aiǃâb ge Joba “khoen aiǂoas din hoan ǃgâ-ai” ge ǂanǂansa i. (Job 1:3) ǁÎb ge ge ǃkhū hâ i, khoen xa ǂansa tsî kai ǃgôasiba ge ūba-e hâ i. (Job 29:​7-16) Nē xūnab ge ūhâ i xaweb ge ǁîba ge ǀgapiǂâixa tama hâ i, tamas ka io Elobab ǂhâ tama hâ khami ge tsâ tama hâ i. Jehovab ge ǁîba “ti ǃgāb” di ge ǂgai, tsîb ge ge ǀaro ‘aob hîa ǂhanu-ai tsî ǂhauǃnâ tsî eloǃaoǃgâxa tsî ǂkhababa ra ǂgōsenni’ di.​—Job 1:8.

¹⁷ ǃNubu ǁaeb ǃnâ i ge, Jobi ûiba ge ǀkhara. ǁÎb ge ǀgâ tsî ge ǃoaǂgâ. ǁGâuab ge nēsa ge ǃaroma, ǁîb ge ge mî Jobi Eloba ǁîb ǃgâib ǃaroma ǀgui ra ǃoabasa.  (Khomai re Job 1:​9, 10.) Jehovab ge nēsa ge ūbē tama hâ i, nēs ge ǁîba ǃoas tsîna gere ǁnaeǁgau! Elob ge Joba ǃēsa ge mā îb ǁgau, amabes ǃnâb ǁîba ǂgaoba xu ra ǃoaba ǃkhaisa.

18. (a)Tae-e Jobi di ǁkhoaǂgaosib xa ra māǂoaba da? (b) Jehovab ge Jobi ǀkhā gere tanisen ǀgauba ǁîb xa tae-e ra mî?

¹⁸ ǁGâuab ge ǂgui ǃâitsâde Joba gere mā tsîb ge Joba ge ǂâi Elob ǁîb ǃgomsina ra ǃaroma di. (Job 1:​13-21) ǃNona ama tama ǁkhaeǂgao-aogu ge Joba ǃgâi tama mîde ge mî, ǁgau rase Elob ǁîb ǃgomsina ra ǃaromasa. (Job 2:​11; 22:​1, 5-10) Xaweb ge Joba ǂgomǃgâsiba ge ūhâ ǀgara. ǁÎb ge ǀnî ǁaeb ai ǃgâi tama ǀgaub ǃnâ gere ǃhoa, xaweb ge Jehovaba ǁîb tsûba gere ǁnâuǃā. (Job 6:​1-3) Elob ge tsûaǂgao hâ khoeba ge mû, hîna ge ǁgâuab ge ǁîba gere ǃâitsâ xawe Eloba xu ǃgū tama hâ ība. Nē ǃgomsin ge toa o, ob ge Jehovaba Joba ǀnaib ge ūhâ īs xa ǃnāsase ge mā, 140 kurigu tsînab ge ge ûi. (Jak. 5:​11) ǁNā ǁaeb ǃnâb ge ǁîba Jehovaba hoase gere ǃoaba. Nēsa da mati a ǂan? Jobi ge ǂgui kuriga ǀnai ge ǁō hâ i, Esegieli ge nē ǁkhāǁkhāǃâs mîde a xoa o.

19, 20. (a) Mati da Jobi ǂgoms tsî ǁnâu­ǀnam­xa­sib tsîna nî ǁgae? (b) Nau khoen ǀkhā da ra tanisen ǀgaub ǃnâ da mati, Elob ǁkhaeǂgaoxasiba nî ǁgae?

¹⁹ Mati da Jobi ǂgoms tsî ǁnâuǀnamxasib tsîna nî ǁgae. ǃGomsina da ga ra hōǃâ xawe da ge hoaǁae Jehovaba ǂgurose sida ûib ǃnâ mâi, ǁîb ai ǂgomaiǂnui tsî sida ǂgaob hoab ǀkhā ǁîba nî ǁnâu­ǀnam. Sida ge kaise ǂgui ǃaromana ūhâ nēsa dīsa! Sida ge ǁgâuab tsî ǁîb dīgu tsîna a ǂan. (2Kor. 2:​11) Jobi ǂkhanis ge ra ǁgauda î da ǂan tae-i ǃaromab Eloba ǃgom­si­na ra mā-amsa. Danieli kēbosa xu da ge hoa da ra ǁnâuǃā Elob Gaosib ǃhūbaib gaoside Jesub Xristub ǃnâ-ū ra ǂgaeǂguisa. (Dan. 7:​13, 14) Tsî nē Gao­sib ge ǀae hoase ǃhūbaib ǃgomsin hoana nî ūbe.

²⁰ Jobi aiǁgaus ge ra ǁgau, sida ǃgâsan hîna ǃgomsina ra hōǃâna da ge nî ǁkhae­ǂgao di. Jobi khamin ge ǀnîna ǃgâi tama ǀgaub ǃnâ ǀnî ǁaeb ai ra ǃhoa. (Aoǁn. 7:7) ǁÎna da ge ǀgoraǃgâ tide xawe nî ǁkhaeǂgaon. Nē ǀgaub ǃnâ da ge sida ǀnamǀnamsa Elob Jehovaba ra ǁgae.​—Psa. 103:8.

21. ǂGuro Petrub 5:​10 sa tae-i ge Noaxi, Danieli tsî Jobi tsîn di ûib ǃnâ gere īsa ra ǁgau?

²¹ Noaxi, Danieli tsî Jobi tsîn ge ǃkharagagu ǁaeb ǃnâ gere ûi tsî ǃkharagagu ǃgomsina gere hōǃâ xawe gu hoaga nē ǃgomsina ge māǃoa. ǁÎgu ûigu ge apostel Paulub mîdi xa ra ǂâi kai da. ǁÎb ge xoa xui-ao: “Tsî ǀkhommi hoab di Elob, ǁîb di ǀamo ǂkhaisib Jesub Xristub ǃnâ hâb ǃoa ǂgai da hâba, ab sadu, ǂkharirose ra tsâdo dīǀoaǀoa, ǀgaiǀgai, ǁapoǁapo, ǃgaoǃgao.”​—1Pet. 5:10.

22. Sao ra ǁkhāǁkhāǃâs ǃnâ da tae-e nî ǃhoaǃgao?

²² Petrub xoade xub ge Jehovaba ra ǁgau ǁîb ǃoaba-aon nî ǀgaisa. Nē mîdi ge Eloba ra ǃoaban ǃaromas tsîna nētsē hâ. Hoa da ge Jehovab xa ra ǀgaiǀgaihe ǂgao tsî ǁîb ǃoabas ǃnâ ra hâ ǂgao. ǁNā amaga da ge Noaxi, Danieli tsî Jobi tsîn di ǂgoms tsî ǁnâuǀnamxasib tsîna ra ǁgae ǂgao. Sao ra ǁkhāǁkhāǃâs ǃnâ da nî mû khami gu ge ǁîga nē ǁkhoaǂgaosiba ge ūhâ i Jehovaba gu ge ǃamkuse ǂan i amaga. ǁÎgu ge Jehovab ǂgaoǀkhādi ‘hoa de ra ǁnâuǃā.’ (ǂKhm. 28:5) Nēs ge sida ǀkhā a ǀgui.