1-2. (a) Tae-i ǃaroma da a ǂan Jesub ge supu ǀgauba a mādasa ǁîb ǁōba ǂâiǂâisens ǃaroma? (b) Mâ ǀgaugu Jesub diga da nî ǃhoaǃgao?

ǁGUIǃĀ ǁkhā i du a tae-i Xristub ǁōb ǂâiǂâisen tawa kurib hoaba ra īsa? Hoa da ge hoaǃnâ-aixase ǃuiǂûs tawa ra ī xūna ra ǂâihō. Tae-i ǃaroma? Nē ǃuiǂûs kaise a ǀguiǃgubu amaga. Xawe nē ǁaxasib ge kaise a ǂhâǂhâsa. ǁNā-amaga da ge dîsen ǁkhā, ‘tae-i ǃaromas nē ǃuiǂûsa kaise a ǀguiǃgubu?’

² Jesub ge ǃhūbaib-aib ge hâ io, ǂhâǂhâsa amaba supu tsî ǁnâuǃāxa ǀgaub ǃnâ gere ǁkhāǁkhā. (Mat. 7:28, 29) ǁNās ǁkhās khamib ge sida tsîna supu ǀgauga ge mā ǁîb ǁōba ǂâiǂâisens diga. * Hā re i da ǃuiǂûs xa ǃamkuse ǂâi tsî ǀnî xūn Jesub ge mîn tsî dīn tsîna. Nēs ge nî hui da i da Jesub ǃgamǃgamsens, ǁkhoaǂgaosib tsî ǀnammi tsîna ǁnâuǃā tsî ǁîba da mati nî ǁgae ǀgaus tsîna nî ǁkhāǁkhāsen.

3. Mateub 26:26-28 ǃoagu i Jesub ge ǂûiǂgā ǃuiǂûsa mati supu i tsî ǁîb ge sîsen-ū ǀgam xūna tae-e gere ǂâibasen?

³ Jesub ge ǁîb ǁōb ǂâiǂâisensa ǁîb 11 ǂgomǂgomsa apostelgu ǀkhab hâ hîna ge ǂûiǂgā. ǁÎb ge nē ǂâiǂâisensa Pasxaba xu ge ǃau xūn ǀkha ge dī. (Khomai re Mateub 26:26-28.) ǁÎb ge ǀnai ge ǁnāpa hâ i ǀkhuruǀkhuruhe  tama peregu tsî ǂauxûi-i tsîna ge sîsen-ū. Jesub ge ǁîb ǁkhāǁkhāsabega ge mîba nē ǀgam xūn ge ǁîb soros tsî ǀaob tsîna ra ǂnûǁkhaeba tsî nēsab ge ǀgūǁae ǁîn ǃgao nî mā. Apostelgu ge ge buru tama hâ i nē ǃuiǂûs a supu ǀgaub xa. Tae-i ǃaroma?

4. Jesub ge Martasa a mā ǀapemāde mati ra ǁnâuǃā kai da tae-i ǃaromab ge Jesuba ǃuiǂûsa ǀguiǃgupuse a dīsa?

⁴ ǂÂi re tae-i ge īsa ǃnonaǁî kurib Jesub aoǁnâs dib ǃnâ, ǁîb ǀhōsan Lasarub, Martas tsî Marias tsînab ge sari o. Jesub ge nē ǃnomsa ǃkhais ai ge aoǁnâ tsoatsoa. Martas tsîn ge ge hâ i xawes ge ǁîsa ǂûna ǁîs ǃhaokhoeba dības ǀkha ge ǀhape i. Jesub ge nēsa a mû o, ob ge ǁîba Martasa ge mûǂan kai ǂgui ǂû-i ge hoaǁae ǂhâbasa tama hâ. (Lukab 10:40-42) Jesub ge ǁîb ge mî xū-e aitsama ge dī ǁîb ǁōb aiǃâ. ǁÎb ge nē ǂâiǂâisensa ǀguiǃgupu ǀgaub ǃnâ ge dī. Nēsa tae-e Jesub xa ra mîba da?

5. Nē ǃuiǂûs a ǀguiǃgupu ǃkhaisa tae-e Jesub xa ra ǁgau tsî nēsa mati Filipeǁîn 2:5-8 ǀkha ra ǃgûǀhao?

⁵ Jesub ge mî tsîb gere dī xūn hoan ǃnâ gere ǃgamǃgamsen. ǁNās ǀkha da ge buru tama hâ ǁîb ǁōb ǃuis aiǃâb ge ǃgamǃgamsenxasiba gere ǁgausa. (Mat. 11:29) ǁÎb ge ge ǂan i kaise ǂoaǂamsa mās hîna i khoe-e noxoba dītsâ tama hâsab ge ra dī di tsî Jehovab ge ǀhommi di khâisa nî mā bi. ǁÎb ge ge ǀgapiǀgapisen tama hâ i, kai ǂâiǂâisens ǁîb ǁōb disa dīs ǃnâ-ū. Xaweb ge ǁîb ǁkhāǁkhāsabega ge mîba îgu kurib ǃnâ ǀgui ǃnāsa ǀguiǃgupu ǃuiǂûs ǀkha ǁîb ǁōba ǂâiǂâisen. (Johaneb 13:15; 1Kor. 11:23-25) Nē ǀguiǃgupu tsî ǃgâi ǀgaub ǃnâ ra dī-e ǃuiǂûs ge ra ǁgau Jesub ge ǀgapiǃgôasen tama hâ isa. Kaise da ge ra ǃgâiaǂgao ǃgamǃgamsens a sida ǀhomsi Gao-aob di ǀgaugu ǃâsa.​—Khomai re Filipeǁîn 2:5-8.

6. Mati da Jesub ǃgamǃgamsenxasiba a ǁgae ǁkhā ǃgomsina da ga hōǃâ ǁaeb ǃnâ?

⁶ Mati da Jesub ǃgamǃgamsenxasiba a ǁgae ǁkhā? Nau khoen ǃgâiba sida dib ǂam-ai mâis ǃnâ-ū. (Fil. 2:3, 4) ǀUniga ǃuis Jesub ǁōb dis xa du ǂâi re. Jesub ge ge ǂan i ǁōb nî ǃkhaisa xawe noxoba ǁîb ǂgomǂgomsa  apostelgu xa gere ǂâi hîna ǀgūǁae ǁîb ǁōb xa nî ǃoaga. ǁNās ǀkhab ge ǀuniga ǃuisa ǁîga gere ǁkhāǁkhā, ǂkhâǃnâ tsî ǁkhaeǂgao. (Johaneb 14:25-31) Jesub ge nau khoen xa hoaǁae gere ǂâi ǁîb xas ose. Nēs ge kaise ǃgâi aiǁgaus hînab ge Jesuba a ǁnāxūba dasa.

7. Jesuba mati ǁkhoaǂgaosiba gere ǁgau ǁîb ǁōb ǂâiǂâisensab ge ǂûiǂgās khaoǃgâ?

⁷ Jesub ge ǃuiǂûsab ge ǂûiǂgās khaoǃgâ kai ǁkhoaǂgaosiba ge ǁgau. Mâ ǀgaub ǃnâ? Jesub ge ǁîb ǁGûb di ǂâisa ge ūǃoa ǂan i ge i xawe mâǃoahe tsîb nî ǃgam-esa. (Mat. 26:65, 66; Lukab 22:41, 42) Jesub ge ǁkhoaǂgaosiba ge ūhâ i Jehovab ǀonsa ǁkhaubas tsî khoen hîna ra ǃhōbasena ǀamo ûiba mās tsîn ǃgao. Tsîb ge ǁîb saosaben tsîna hānîǁaeb ǃgao gere aiǂhomi.

8. (a) Jesuba tae-e ǁîb ǂgomǂgomsa apostelga ge mîba? (b) ǁÎb ǁōb khaoǃgâ gu ge Jesub ǁkhāǁkhāsabega mati ǁîb ǁkhoaǂgaosiba gere ǁgae?

⁸ Jesub ge ǁkhoaǂgaosiba ge ǁgau ūb ge hâ i ǂâiǂhansendi xa ǂâi tama is ǃnâ-ū tsî ǁîb ǂgomǂgomsa apostelgu di ǂhâsigu xa gere ǂâi. ǁÎb ge ǂnûiǂgā ǀguiǃgupu ǂûǀhaos Judabab ge ǂoa kais khaoǃgâs ge ǁîb ǂkhauhesa saobasena nî ǂâiǂâiǃnâ Jesub ǀaob tsî ǀasa ǃgaeǀhaos tsîna xun mati nî ǀamasa. (1Kor. 10:16, 17) ǁÎn ǁkhauǂûisan ra ǃgôaǃgâ ǃkhaisa ǁgaus ǃgaob ge Jesuba ǁîb saosabena ge mîba ǁîb tsî ǁîb ǁGûb tsîn ǁîna xu tae-e ra ǂgaoǀkhāsa. (Johaneb 15:12-15) Jesub ge apostelga ǃgomsin hîna gu nî hōǃân xas tsîna ge mîba. Jesub ge ǁîb  aiǁgaus ǃoa ra ǁgause ǁîga ge ǂkhâǃnâ îgu “ǃgâiǂâixa.” (Johaneb 16:1-4a, 33) ǂGui kuriga ǃkharu hâse gu ge noxoba Jesub ǁkhāǁkhāsabega māsenxasib ǀgaub tsî ǁkhoaǂgaosib tsîna gere ǁgau. ǂGuiǃnâgu ǃgomsinan gere hōǃâ xawen ge noxoba gere ǂkhâǃnâgu.​—Heb. 10:33, 34.

9. Mati da Jesuba nî ǁgae ǁkhoaǂgaosiba ǁgaus ǃnâ?

⁹ Nētsēs tsîna da ge Jesub ǁkhoaǂgaosiba ra ǁgae. Aiǁgause, ǁkhoaǂgaosiba i ge ǂhâ hâ sida ǃgâsan hîna ra mâǃoahena huisa. ǀNî ǁaegu ain ge sida ǃgâsana ǂhanuoǃnâse ǃkhōsis ǃnâ ra ū-e. ǁNās ga ī o, o da ge hoana ǁîn ǃgao nî dī nēs ge ǁîna ǃhoabas tsîna ǃkhōǂgā hâ. (Fil. 1:14; Heb. 13:19) ǀNî hâ ǀgaub ǁkhoaǂgaosiba da ra ǁgaub ge “ǁkhoaǂgaose” aoǁnâs ǃnâ-ū. (ǃNǃkh. 14:3) Jesub khami da ge khoen ga ra mâǃoa da xawe Gaosib haisi-amsa nî aoǁnâ ǀgara. ǀNî ǁaegu ai da ge ǁkhoaǂgaosiba ūhâ tide. Xawe da tae-e nî dī?

10. Jesub ǁōb ǂâiǂâisens aiǃâ da tae-e nî dī tsî tae-i ǃaroma?

¹⁰ Sida ǁkhoaǂgaosiba da ge a ǀgaiǀgai ǁkhā xoremarib ge mā da ǃâubasens xa ǂâiǃgâs ǃnâ-ū. (Johaneb 3:16; Efe. 1:7) Jesub ǁōb ǂâiǂâisens aiǃâ da ge ǃēsa ūhâ sida ǃgôaǃgâsiba xoremarib ǃgao ǁgausa. Nē ǁaeb ǃnâ da ge nē ǂâiǂâisens ǃgao a māsa Elobmîs xoade nî khomai tsî Jesub ǁōb aiǃâ gere ī xūn xa nî ǂâiǃgâ. ǁNās ǀkha da ge ǃuiǂûsa da ga hâǃnâ o, o ǂhâǂhâsasib pereb tsî ǂauxûi-i tsîn disa nî ǁnâuǃā tsî ǁîn tae-e ra ǂâibasensa. Jehovab tsî Jesub tsîkha ge dība da  xūna da ga ǁnâuǃā tsî mû o nēsa xu da mati ra ǀamasa, os ge sida ǃâubasensa ra ǀgai tsî da ge ra ǂkhâǃnâ-e ǀams kōse ǁkhoaǂgaosiba ǁgausa.​—Heb. 12:3.

11-12. Tae-e da nēs kōse ǁkhāǁkhāsen?

¹¹ Nēs kōse da ge go ǁkhāǁkhāsen Jesub ǁōb ǂâiǂâisens ge ǀō-aisa xoremarib xa ǀgui ǂâi kai da tama hâ xawe Jesub ǀgaugu ǃgamǃgamsenxasib tsî ǁkhoaǂgaosib dikha xas tsîna ra ǁkhāǁkhā da. Kaise da ge ra ǃgâiaǂgao mûsa Jesub ge nē ǀō-aisa ǀgauga a ǁgausa sida ǀhomsi ǀGapi Pristeri ase. (Heb. 7:24, 25) ǃGôaǃgâsiba ǁgaus ǃgao da Jesub ǁōba ra tsēdi ǁîb ge mîmā khami. (Lukab 22:19, 20) Nēsa da ge Nisan 14 ǀkha ra ǃgûǀhao tsēs ai ra dī, kaise ǂhâǂhâsa tsēs ge kurib ǃnâ.

¹² Jesub ǂâiǂâisens di ǀguiǃgupusiba xu da ge ǀnî hâ ǃaromas Jesub ge ǁōba dasa ra mû. Nē ǀgaub ǃgaob ge ge ǂansa i ǃhūbaib-aib ge hâ io. Nēsa ge tae-i?

13. Johaneb 15:9 tsî 1 Johaneb 4:8-10 tsîna mati Jehovab tsî Jesub tsîkha ge ǁgau ǀnamma ra ǁguiǃā tsî ham-e nē ǀnamma xu ra ǀama?

¹³ Jesub ge Jehovab sida ūba hâ ǀnamma dīb gere xūn hoan ǃnâ gere ǁgau. (Khomai re Johaneb 15:9; 1 Johaneb 4:8-10.) Jesub ge ǁîb ǂgaoba xu ǁîb ûiba sida ǃgao ge mā. ǂKhauhesan ǀgui tamas ka io da ga “nau gūn” ǀgui-i xawe da ge hoada Jehovab tsî ǁîb ǀgôab tsîn ge nē ǁguibas ǃnâ-ū a ǁgau da ǀnamma xu ra ǀama. (Johaneb 10:16; 1 Johaneb 2:2) Jesub ǁōb ǂâiǂâisens tawa gere sîsen-ūhe ǀkhuruǀkhuruhe tama pereb tsî ǂauxûi-i tsîn xa ǂâi re, nēs ge Jesub ǀnammi tsî ǁîb ǁkhāǁkhāsabegu ǃnâb ūhâ ǃgâiǃgâibasens tsîna gere ǁgau. Mâ ǀgaub ǃnâ?

14. Jesuba mâ ǀgaub ǃnâ ǁîb ǁkhāǁkhāsabega ǀnamma gere ǁgau?

¹⁴ Jesub ge ǁîb ǂkhauhesa saosabenab a ǀnam ǃkhaisa ge ǁgau supu tsî ǀguiǃgupu ǃuiǂûsa ǂnûiǂgās ǃnâ-ū. ǁAeb ra ī khamin ge nē ǂkhauhesa ǁkhāǁkhāsabena nē ǂâiǂâisensa kurib hoaba ge tsēdī tsoatsoa, nēsan ge ǃgom ǁaegu ǃnâs tsîna ra dī. (J.ǂHa. 2:10) ǁÎna Jesuba gere ǁnâuǀnam? Îo, ǁîn ge gere ǁnâuǀnam.

15-16. ǀNîna mati Jesub ǁōb ǂâiǂâisensa ǃgâi tama mâsigu ǃnâ ge tsēdī?

¹⁵ Nētsēs kōsen ge ama Xristeǁîna ra ǁgūtsâ Jesub ǁōba ǂâiǂâisensa. Jesub ge mā aiǁgausan ge ra dītsâ ǁîn ǁkhāsib hoab ǀkha, ǃgomsinan ga hōǃâs tsîna. Sao ra aiǁgausa kō re. ǃGâsab Harold Kingi ge ǀgurib ge Chinab ǃnâ ǃkhōsis ǃnâ hâ io, ǀgau-e gere ôa Jesub ǁōb ǂâiǂâisensa dīsa. ǁÎb ge ǀū ǃgâsis ǃnâ Jesub ǁōb ǂâiǂâisens tawa gere sîsen-ūhe ǀkhuruǀkhuruhe tama pereb tsî ǂauxûi-i tsîna ge kuru ūb ge hâ i xūn ǀkha. ǁÎb ge Jesub ǁōb ǂâiǂâisens nî hâ tsēs tsîna ǃamkuse ge ǃgôa. ǁNā ǁaeb ge hā o, ob ge ǀguri ǁnae, ǀgore tsî Elobmîs ai ǃgaoǃgaosa ǃhoasa ge mā.

¹⁶ ǀNî hâ aiǁgaus ge a nē. ǃGâsadi hîna ge 2ǁî torob ǃnâ ǃkhōsis ǃnâ hâ-i dige ǁîdi ûiga ge mā Jesub ǁōb ǂâiǂâisensa tsēdīs ǃgao. ǁNā ǁaxasib ǃgao ra sîsen-ūhe xūn a ǀguiǃgupu amaga di ge nēsa ǀūǃgâse ge tsēdī ǁkhā i. ǁÎdi ge ra mî: “ǀGuiba se ge ǃgubuse ge mâ tsî ǁaegub ǃnâ i ge ǀkhuruǀkhuruhe tama pereb tsî  ǂauxûi-i tsîna ge hâ i. ǂNuruǁnuibase ge ge ǃam hâ i, ǃnâb ga ǁgau hâ amaga tae-e se ra dīsa. . .  Sîse ǁguibade se ge Jehovaba ǃoa ge dī, ise sîse ǀgaib hoaba sîsen-ū ǁîb ǀonsa ǃanuǃanus ǃgao.” Kaise ǀgaisa ǂgomsa di ge ge ǁgau. Jesub ge ǀnamma ge ǁgau da īǁkhā kaib ge o î da ǃgâi tama mâsigu ǃnâs tsîna Jesub ǁōba tsēdī.

17. Mâ dîde da nî dîsen?

¹⁷ Jesub ǁōb ǂâiǂâisens ra ǀgū khami da ge sao ra dîde nî dîsen: ‘Mati da Jesuba ǀnamma ǁgaus ǃnâ nî ǁgae? Ti ǃgâsan di ǃgâiba ta tib ǂam-ai ra mâi? Ti ǃgâsana xu ta ǁîn ǁkhāsib ǃnâ hâ tama hâ xū-e ra ǃâubasen?’ Jesuba da ge hoaǁae nî ǁgae tsî nî “ǀguiǂâixa.”​—1Pet. 3:8.

18-19. (a) Tae-i xa da nî ǂan? (b) Tae-e du ra mîǁgui dīsa?

¹⁸ Jesub ǁōba tsēdīs ge ǀhapese hâ tide. Jesub ga ra hā o, ob ge ǂkhauhesan hîna noxoba ǃhūbaib-ai hâna nî ǀhaoǀhao ǀhomma ǃoa tsî î ge Jesub ǁōba ǁkhawa tsēdī-e tide.​—1Kor. 11:26; Mat. 24:31.

¹⁹ Jesub ǁōb ga ra tsēdī-e ǀû xawen ge Jehovab khoena noxoba nē tsēsa nî ǂâihō Jesub ge ǁgau ǃgamǃgamsenxasib, ǁkhoaǂgaosib tsî ǀnammi tsîn ase. ǁNān hîna ge nē tsēsa gere tsēdīn ge nau khoen nî ǀamase ǁîna nēs xa nî mîba. Xawe nēsi da ga nēsa xu ga ra ǀama ǂgao o, o da ge Jesub ǃgamǃgamsenxasib, ǁkhoaǂgaosib tsî ǀnammi tsîna nî ǁgae. Nēsa da ga dī o, o da ge Jehovab xa nî ǀkhaehe.​—2Pet. 1:10, 11.