1-2. (a) Jehovaba tae-e ra mû ǂgui khoen ga Jesub ǁōb ǂâiǂâisens ǃaroma ga ra ǀhao o? (Tsoatsoas ai hâ ai-īsiba mû re.) (b) Tae-e da nē ǁkhāǁkhâǃâs ǃnâ nî ǃhoaǃgao?

ǂÂI re Jehovab tae-e ra mûsa ǂgui khoen Jesub ǁōba ra ǂâiǂâisensab ra mû o ǃhūbaib ǂhawase. ǁÎb ge ǁnā ǂgui khoen ǀguina mû tama xawe mâ ǀguiǀguibi-i hoa-e ra ǂanǃgâ. Aiǁgauseb ge ǁîba ǁnān hîna mâ kurib hoaba ǂgomǂgomsase ra ǀkhīna ra mû. Nē khoen ǁaegun ge ǀnîna hâ ǃgomsinan ūhâ xawe ra ǀkhīna. ǀNîn ge hoaǁae ǀhaode ǁhaoǃnâ tama xawen ge Jesub ǁōb ǂâiǂâisensa hoaǁae ǂgomǂgomsase ra hâǃnâ. Jehovab ge ǁnān tsîna a ǂan hîna ǂguro ǃnāsa Jesub ǁōb ǂâiǂâisensa ra ǁhaoǃnâna ǂanǂui ǂgaos ǃaroma.

² Jehovab ge kaise a ǂkhî nētikō ǂgui khoen Jesub ǁōb ǂâiǂâisensa ra ǁhaoǃnâ ǃkhaisa. (Lukab 22:19) Xaweb ge Jehovaba nē ǂgui khoen ǃgôaba ǃoa kō tama hâ. ǁÎb ge nē khoen ra hāba ǃaromadi ǃnâ ǃgâiǃgâibasensa ūhâ. Nē ǁkhāǁkhāǃâs ǃnâ da ge ǂhâǂhâsa dîsa nî ǃhoaǃgao: Tae-i ǃaroma da Jesub ǁōb di ǂâiǂâisens ǀguisa ǁhaoǃnâ tama hâ, xawe wekhe korobe ra dīhe ǀhaodi Jehovab ǀnamma xū ra aiǂhomiba da di tsîna ra ǁhaoǃnâ?

3-4. (a) Tae-i ǃaroma da ǀhaode ra ǁhaoǃnâ? (b) ǀHaode ǁhaoǃnâsa tae-e sadu xa ra mî? (c) 1 Korinteǁîn 11:23-26 ǃoagu da tae-i ǃaroma Jesub ǁōb ǂâiǂâisens ǃuisa ǂoaǃnâ kaisen tide?

³ Sadu ge ǀhaohâb ǀhaode ra ǁhaoǃnâ sada ǃoabas ǃâ di a amaga. Jehovab xa da ra ǀhaodi tawa ǁkhāǁkhā-e  amagas tsîna da ge ra ǁhaoǃnâ. ǀGapiǂâixa khoen ge nēsa ūǃoa tama hâ ǁkhāǁkhāhesan ǂhâ tama din ra ǂâi amaga. (3 Johaneb 9) Xawe da ge sada mâsenxa Jehovab tsî ǁîb ǀapeǂhomis xa ǁkhāǁkhāhesa.​—Jes. 30:20; Johaneb 6:45.

⁴ Sada ǁhaoǃnâs ǀhaodi tawas ge sada tsamtsiǃnâsib tsî mâsenxasib ǁkhāǁkhāhe ǂgaos diba ra ǁgau. Jesub ǁōb di ǂâiǂaisens ǃuisa da ge ra ǁhaoǃnâ ǁgari-e da ra amagas ose xawe Jesub mîmāsa da ra ǁnâuǀnam amaga: “Dī nēsa ti ǂâiǂâisensa ǃoa.” (Khomai re 1 Korinteǁîn 11:23-26.) Nē ǀhaodi ge sida ǂgomǃgâsib hānîǁaeb diba ra ǀgaiǀgai tsî Jehovab ǀnammi xa ra hōhōǃnâ da. Xaweb ge Jehovaba a ǂan ǂkhâǃnâhe tsî da hoaǁae nî ǂâiǂâiǃnâhesa. ǁNā-amagab ge mâ wekheb hoaba ǀhaode ra māda tsî ra ǂgan da nēsa ǁhaoǃnâsa. Tsamtsiǃnâsib ge ra hui da nēsa ǁhaoǃnâsa. Mâ wekheb hoaba da ge ǁaeba ra ǂnuiǂui nē ǀhaodi ǃgao ǂhomisen tsî ǁîde ǁhaoǃnâsa.

5. Tae-i ǃaroman tsamtsiǃnâ khoena Jehovab ǁkhauǂuisa ra ūǃoa?

⁵ Mâ kurib hoaban ge ǂgui ǃgâi ǂgaoga ūhâ khoena Jehovab ǁkhauǂuisa ra ūǃoa ǁîb xa ǁkhāǁkhāhes disa. (Jes. 50:4) ǁÎn ge Jesub ǁōb ǂâiǂâisensa ǁhaoǃnâs xa ǃgâiba-e tsîn ge nau ǀhaodi tsîna ra ǁhaoǃnâ tsoatsoa. (Sax. 8:20-23) ǀGuiba da ge ra gangan ǁkhāǁkhāhe tsî daoǁgauhesa Jehovab xa hîna a sada ‘ti hui-ao tsî ore-aoba.’ (Psa. 40:17) Tae-e a ǁkhoaxa tamas ka io a ǂhâǂhâsa Jehovab tsî ǁîb ǀgôab kaiseb a ǀnammi tsîkha xa ǁkhāǁkhāhes xa?​—Mat. 17:5; 18:20; 28:20.

6. Matib tsamtsîǃnâsiba ǀgui khoeba ge hui îb Jesub ǁōb ǂâiǂâisensa ǁhaoǃnâ?

⁶ Mâ kurib hoaba da ge ra dītsâ ǂgui khoena Jesub ǁōb ǂâiǂâisensa ǃoa ǁkhausa. ǂGui ǃgamǃgamsenxa khoen ge nē ǁkhauǂuisa ūǃoas ǃnâ-ū ra ǀama. Nē aiǁgaus xa ǂâi re. ǂGui kurin ǃkharu hâseb ge khoeba ǁgâisa ǁkhauǂuisa ge ǃkhōǃoa Jesub ǁōb ǂâiǂâisensa ǃoa. Xaweb ge ǃgâsab hîna nē ǁkhauǂuisa ge mābi ba ge mîba nēsab hâǃnâ tidesa. Xawe Jesub ǁōb ǂâiǂâisens ǃuis aib ge ǃgâsaba ge buru ǁnā khoeb ge ǀHû-ommi dao-ams ǃnâ ǃgû ǂgâxa o. Nē khoeb ge ǃkhōǃoas hînab ge hōs xa ge ǃgâiba-e tsî wekheb ǀhaodi tsîna ge ǁhaoǃnâ tsoatsoa. ǁÎb ge sao ra kuri ǃnona ǀhaodi tawa ǀgui ge ǀkhai-i. Tae-e ge huibi îb nēti-ī ǃgâi ǀgauba ūhâ? ǁÎb ge ǃgâi ǂgaoba ge ūhâ i ǁîb ǂâide dawas ǃgao. ǃGâsab hîna ge ǁkhaubib ge ega ge mî “nē khoeb ge kaise a ǃgamǃgamasenxa.” Jehovab ge nē khoeba amaba ǃoa ge ǂgae tsîb ge nēsi a ǁāǁnâsa ǃgâsa.​—2Sam. 22:28; Johaneb 6:44.

7. Mati di ǀhaodi tsî Elobmîs ǃnâ da ra khomai xūn tsîna nî huida ǃgamǃgamsenxasiba omkhâisa?

⁷ ǀHaodi tawa du ra ǁkhāǁkhāsen xūn tsî Elobmîs ǃnâ du ra khomai xūn tsîn ge ra hui du i du ǃgamǃgamsenxasiba omkhâi. Jesub ǁōb ǂâiǂâisens aisi hâ wekhegu ǃnâ da ge Jesub ǃgamǃgamsenxasib aiǁgaude ǃoa ra kō hîna ge ǁgaribi de ǁîb ûiba mâs ǃnâ. Tsî ǁnā tsēs aisi da ge ra ǂgan-e Elobmîs ǃâdi hîna Jesub ǁōb tsî ǁîb khâis tsîn ǂnamipe ra ǃgûde khomaisa. ǁÎb di ǃgamǃgamsenxasiba ǁgaesa da ge ra dītsâ ǃgom-i ga xawe.​—Lukab 22:41, 42.

8. Matib Jesuba ǁkhoaǂgaosiba ge ǁgau?

⁸ Jesub tsîna da ge ǁîb ǁkhoaǂgaosib ǃnâ ra ǁgae ǂgao. ǁKhoaǂgaosib hîna da ǁîb ǁōb ǂâiǂâisens tsēdi aiǃâ ra ǁgaub xa ǂâi re. ǁÎb ge ge ǂan i ǁîb khākhoen nî taotaobi, ǂnaubi tsî ǀgoraǃgâbi ǃkhaisa. (Mat. 20:17-19) Xaweb ge noxoba māsenxase ge ǁō. ǁAeb ge mâtoa o, ob ge ǁîb di ǂgomǂgomsa apostelgu ǃoa ge mî: “Khâi î go ǃgû; kō, tita ra ǀapexūb a ǀgū xuige.” (Mat. 26:36, 46) Tsî ǁnā ǂnubis khoen ge ǃkhōbi ǃgû ǀkhī ob ge aisǀkhāb ǀkha ge ǂoaxa tsî ǂnubisa ge mîba îgu ǁîb apostelga ǃgû kaihe. (Johaneb 18:3-8) Jesub ge mâǂoa ra ǁkhoaǂgaosiba ge ǁgau. Nētsēn ge ǂkhauhesan tsî nau gūn tsîna Jesub ǁkhoaǂgaosiba ra ǁgae. Matin nēsa ra dī?

9. (a) Tae-i ǃaroma da ǁkhoaǂgaosiba ǂhâhâ ǀhaode ǁhaoǃnâs ǃaroma? (b) Sadu aiǁgausa mati sadu ǃgâsan hîna ǃkhō-omdi ǃnâ ǁîn ǂgoms ǃaroma ǂnôana nî tsâǀkhā?

⁹ ǀHaode hoaǁae ǁhaoǃnâs ǃaroma da ge ǁkhoaǂgaosiba ǃgomsina da ga ūhâ ǁaeb ǃnâ nî ǁgau. Sada ǃgâsan ǀnîn ge ǁgâiǀāgu tsî ǀaeb ǃgomsinan ūhâ xawe ǀhaode ra ǁhaoǃnâ. ǀNîn ge kai ǁgâiǀāgan omaridi khoen tsî ǂhanuba xū ra hō xawe ǀhaode ra ǁhaoǃnâ. ǁAeroba ǂâi re sadu aiǁgaudi mati sadu ǃgâsan hîna ǃkhō-omdi ǃnâ ǁîn ǂgoms ǃaroma ǂganam ǂgāhe hâna ra hui ǀgausa. (Heb. 13:3) ǁÎn ga ǁnâu o sadu ǃgomsin ǁaegu Jehovaba ra ǃoaba ǃkhaisa on ge ra ǂkhâǃnâ-e ǁîn ǁkhoaǂgaosib tsî ǂgoms tsîn ǃnâ mâǀgaibesa. Apostel Paulub tsîn ge ǁkhā ǃgomsib ǃnâ ge hâ-i. Romes ǃnâb ge ǃkhōsis ǃnâ hâ io, ob ge ǁîb ǃgâsan ge ǂgomǂgomsase Eloba ra ǃoaba dib gere ǁnâu o, o gere ǃgâiaǂgao. (Fil. 1:3-5, 12-14) ǁAerob ǁîb ǁnāxūhes khaoǃgâb ge Pauluba ǁîb sîǂkhanisa Hebreǁîna ǃoa ge xoa. ǁÎb sîǂkanis ǃnâb ge ǁnā ǂgomǂgomsa ǃgâsana ge ǂkhâǃnâ în ǁîn “ǃgâsaǀnamguba” âiǃgû tsî ǁîn ǀhaode xū tā hâbē.​—Heb. 10:24, 25; 13:1.

10-11. (a) Hamna da Jesub ǁōb ǂâiǂâisensa ǃoa nî ǁkhau? (b) Efeseǁîn 1:7 sa mâ ǃaroma-e ra mā nēsa dīs ǃaroma?

¹⁰ ǁKhoaǂgaosiba da ge ra ǁgau ǀaokhoen, sîsen ǁare-ū da ra khoen tsî ǁanǁare-aon tsîna da ga Jesub ǁōb ǂâiǂâisensa ǃoa ǁkhau o. Tae-i ǃaroma da nē khoena ra ǁkhau? Jehovab tsî Jesub tsîn ge dība da xūna da ge ra ǃgôaǃgâ tsî ǁnās ǃaroma khoena Jesub ǁōb di ǂâiǂâisensa ǃoa ra ǁkhau ǂgao. ǁÎna da ge ra hui ǂgao în mûǂan matin Jehovab di ‘ǀkhomxaǂgaosiba’ xū a ǀama ǁkhāsa xoremarib ǃnâ-ū.​—Khomai re Efeseǁîn 1:7; J.ǂHa. 22:17.

¹¹ ǀHaode ǁhaoǃnâs ǃnâ-ū da ga ǁkhoaǂgaosiba ǁgau o, o da ge noxoba ǀnî ǃgâi ǀgauba ra ǁgau. ǀGuib hîna Jehovab tsî  Jesub tsîkha xa mâǂoa ra ǀgaub ǃnâ ra ǁgauheba.

12. (a) ǀHaode sadu ǀnammi hîna du Jehovab tsî Jesub tsîkha ūba hâba mati ra ǀgaiǀgai? (b) 2 Korinteǁîn 5:14, 15 sa tae-e ra ǂkhâǃnâ da dīsa Jesuba ǁgaes ǃnâ?

¹² Sadu ǀnammi Jehovab tsî Jesub tsîkha du ūba hâb ge ra ǁgari du ǀhaode ǁhaoǃnâsa. Tsî ǀhaodi tawa du ra ǁkhāǁkhāsen xūn ge sadu ǀnamma Jehovab tsî ǁîb ôab tsîkha ǃnâ ra ǀgaiǀgai. ǀHaodi tawa da ge hoaǁae ra ǂâiǂâiǃnâ-e ǁîkha ge dība da xūn xa. (Rom. 5:8) Jesub di ǁōb ǂâiǂâisens ge ǁîkha ǃgam ǀnammi xa ra hōhōǃnâ da ǁnān hîna noxoba nēsa ǃgôaǃgâ taman ǃoagus tsîna. ǃGôaǃgâsib ǃgao da ge Jesub ûiǀgauba sada ûigu ǃnâ ra ûiǂui. (Khomai re 2 Korinteǁîn 5:14, 15.) ǁNā-amaga gu ge sada ǂgaoga ra ǁgari da î da Jehovaba koa xoremarib hînab ge mādab ǃgao. ǀGui ǀgaub hîna da a koabi ǁkhās ge ǂgaoba xū hâ ǃereamde ǀhaodi tawa māsa.

13. Mati du sadu ǃgam ǀnamma Jehovab tsî ǁîb ôab tsîna a ǁgau ǁkhā? ǁGuiǃā re.

¹³ Sadu ge sadu ǃgôaǃgâsiba Jehovab tsî Jesub tsîkha a ǁgau ǁkhā sadu māsenxa ǁguibadi hîna du ra dī di ǃnâ-ū. ǀNî ǁaeb-ai da ge ǃkharagagu ǃgomsina da ūhâ xawe ǀhaode noxoba ra ǁhaoǃnâ. ǂGui ǀhaohâgu ge sîsenni khaoǃgâ ǀhaode ra ūhâ kaise da tsau hâ ǁaeb-ai. Tsî ǀnî ǀhaodi ge wekheb ǀams ai ǂgui ǃgâsan sâǁaeb ai ra hâ. Jehovaba ra mû tsau da hâ xawe da ǀhaode ra ǁhaoǃnâsa? ǁÎb ge ra mû. ǂGui ǃgomsin hîna da ūhân ǃnâ da ra ǁgūtsâ ǃkhaisab ga mû o, ob ge Jehovaba nēsa kaise ra ǃgôaǃgâ.​—Markub 12:41-44.

14. Matib ge Jesuba aiǁgausa ǁgau da aitsama māsenxa ǀnamma ǁgaus ǃnâ?

¹⁴ Jesub ge aiǁgausa ge ǁgau da aitsama māsenxa ǀnamma ǁgaus ǃnâ. ǁÎb ge māsenxase ǀgui ǁîb ǁkhāǁkhāsabega ge ǁōba tama hâ-i xawe tsēkorobe ǁîgu ǂhâsiga aisi gere mâi. ǁÎb ge ǁîb ǁkhāǁkhāsaben ǀkha tsaub hâ xawe gere ǀhao. (Lukab 22:39-46) Tsîb ge nau khoenab a dība ǁkhā xūna ǃoa gere kō  khoena xūb a hōǁkhā xūna ǃoas ose. (Mat. 20:28) Sadu ǀnammi ga Jehovab tsî sadu ǃgâsan ǃoa-ai ǁnāti a ǀgaisa o, o du ge Jesub ǁōb ǂâiǂâisens tsî hoa ǀhaodi tsîna hoaǁae nî ǁhaoǃnâ.

15. Hamna da ǃgōsase ra hui ǂgao?

¹⁵ Sadu ge ǀgui ama Xristeǁî ǃgâsan ǃâ tsî da ge ǁaeba ra ǁamaǂui nau khoena nēsa ǃoa ǁkhausa. Xawe da ge ǃgōsase “ǂgoms horesana” ra hui ǂgao hîna ge ǁnāǁgôana. (Gal. 6:10) Sada ǀnamma da ge ǁîn ǃoa-ai ra ǁgau ǁîna ǂkhâǃnâs ǃnâ-ū ǀhaode ǁhaoǃnâs tsî ǃgōsase Jesub ǁōb ǂâiǂâisensa ǃoa. Jehovab tsî Jesub tsîkha khami da ge kaise ra ǃgâiaǂgao ǁnāǁgôa hâ khoe-i ga Jehovaba ǃoa oaǀkhī o sada ǀnamxa ǃnâ ǁGû tsî ǃûi-aoba.​—Mat. 18:14.

16. (a) Mati da a ǂkhâǃnâgu ǁkhā tsî sada ǀhaode tae-e ra dība da? (b) Johaneb 3:16 ǃnâ da ra hō mîde tae-i ǃaroma a ǃgâi nē ǁaeb ǃnâ ǂâiǃgâsa?

¹⁶ Hā ra wekheb ǃnâ ǂgui khoena ǁkhau re în Jesub ǁōb ǂâiǂâisensa Fraitaxtsē kham ǃui kharab-ai Aprili 19, 2019ǁî kurib ǃnâ ǁhaoǃnâ. (Boksisa mû re “ ǁÎna du nî ǁkhau?”) Hā ra kurib ǃnâ da ǂkhâǃnâgu re ǀhaode ǁhaoǃnâs ǃnâ-ū Jehovab xa da ra mâ-e de. Nē ǃhūbaib ǀams ra ǀgū khami da ge sada ǀhaode ǂhâ hâ ǃgamǃgamsenxasib, ǁkhoaǂgaosib tsî ǀnammi tsîna ǁgaus ǃaroma. (1Tes. 5:8-11) Sada ǂgaogu ǀkhā hā re i da ǁgau mati da Jehovab tsî ǁîb ôab tsîkha xa ra tsâsa sada kha a ǀnam ǃkhais ǃaroma.​—Khomai re Johaneb 3:16.