1-3. (a) Jehovaba tae-i ǃaroma Salomoba ge ǀnam i tsî Salomoba tae-i ǀkhaega ge hō? (b) Nē ǁkhāǁkhāǃâs ǃnâ da mâ dîde nî ǃeream?

SALOMOB ge axaros ǀguisab i hîna ge Isrealǁaes di gao-ao kai. ǁÎb ǂgaeǂguis di tsoatsoas ǃnâb ge ǁhawosa ge ūhâ i: “ǂGaoǀkhā te re, tare xū-e ta nî mā tsi ǃkhaisa.” Ob ge Salomoba ge mî: “Tita ge a ǂkham ǀgôa, tsî ta ge ǂgâs kas, ǂoas kas hoasa a ǀū. . . . Sa ǃgāta ǁnâi ǁnâuǃāxa ǂgaoba mā, sa ǁaesa ta nî ǂhanuǂhanu ǁkhāse.” (1Gao 3:5-10) “ǁNâuǃāxa ǂgaoba”—ǃGâi xū-eb ge ge ǂgan. Nēs ǃaromab ge Jehovaba Salomoba, ge ǀnam i. (2Sa 12:24) Elob ge nē ǂkham gao-aob di ǃereams ǀkhā kaise ge ǂkhî i tsî Salomoba, “gā-ai tsî ǁnâuǃāxa ǂgaoba” ge mā.​—1Gao 3:12.

² ǁNâuǀnamxaseb ge hâ amagab ge Salomoba ǂgui ǀkhaega ge ǃkhōǃoa. ǁÎb ge aiǂhanuba ge ūhâ i omma “ǃKhūb, [Jehovab, NW] Israeli di Eloba” ombasa. (1Gao 8:20) ǁÎb ge ǁîb gā-aisib ǃgao ge ǂansa i. Elob xab gere daoǁgauhe o, ob gere ǃhoa xūn ge ǃnona ǂkhanidi Elobmîs didi ǃnâ a xoasa. Nē ǂkhanidi ǀguis ge ǂKhoamîdi ǂkhanisa.

³ ǂGaoba di hâ mîs ge ǂgui ǃnāde ǂKhoamîdi ǂkhanis ǃnâ hâ. Aiǁgause, ǂKhoamîdi 4:23 tawa da ge ra khomai: “Sâuhe nî xūn hoan ǃgâ-ai sâu sa ǂgaoba.” Nē xoas ǃnâ î “ǂgao” di hâ mîsa tae-e ǃoa ra ǁnaeǁgau? Nē dîsa da ge nē ǁkhāǁkhāǃâs ǃnâ nî ǃeream. Tsî ǀgam dîra ǃereamdi  tsîna nî ǃhoaǃgao: ǁGâuaba mati sida ǂgaoba a ǁgaiǁgai ǁkhā? Tsî tae-e da nî dī, sida ǂgaoba ǁkhaubas ǃgao? Elob ǃoa-ai ǂgomǂgomsase hâs ǃgao da ge nē ǂhâǂhâsa dîdi ǃereamde nî ǁnâuǃā.

4-5. (a) Psalmdi 51:6 sa mati ra hui da î da “ǂgaob” di hâ mîsa ǁnâuǃā? (b) Sida ǂurusiba mati ǂganaga da a hams ǂhâǂhâsasiba ra ǂkhō?

⁴ ǂKhoamîdi 4:23 tawa î ge “ǂgaob” di hâ mîsa khoe-i ǂganagaba ǃoa ra ǁnaeǁgau. (Khomai re Psalmdi 51:6.) ǀNî hâ mîdi ǃnâ i ge “ǂgaob” di hâ mîsa sida ǂâidi, tsâsigu tsî turagu tsîna ǃoa ra ǁnaeǁgau. Nēs ge amabes ǃnâ da ǂganaga a hamsa ǃoa ra ǁnaeǁgau tsî ǃauga da hamsa ǃoa ǁnaeǁgau tama hâ.

⁵ ǂÂi re sida ǂurusib mati ǂganaga da ī ǀgaub ǂhâǂhâsasiba ra ǁgausa. ǂGurose, ǂuruse da ga hâ ǂgao o, o da ge ǃgâi ǂû-e nî ǂû tsî sida ǀkhāsa ǃgâi mâsib ǃnâ nî ūhâ. ǁNās ǁkhās khami da ga gagasise ǀgaisase ga ra hâ ǂgao o, o da ge ǁaeb hoaba Elobmîsa ǂōrisase nî khomai tsî Elobmîs ai ǃgaoǃgoasa ǂkhanin tsîna nî khomai. Nēs ǃnâ-ū da ge Jehovab ǃnâ da ra ǂgomsa ra ǁgau. Nēsa da ge ǁkhāǁkhāsen da ra xūna ûiǂuis tsî sida ǂgoms xa ǃhoas ǃnâ-ūs tsîna a dī ǁkhā. (Rom. 10:8-10; Jak. 2:26) ǀGamǁîse, ǃauga da ra mûsen ǀgaub ge a mî ǁkhā ǂuru da ge a di xawe da ǂganaga ǀaesen hâ hîna. Sida gagasi ǁaxasigu ǃnâ ra ǁhao amaga da ge a mî ǁkhā noxoba da ge ǂgoms ǃnâ a ǀgaisa di xawe i ge ǃgâi tama tsâsiga sida ǃnâ a khâi ǁkhā. (1Kor. 10:12; Jak. 1:14, 15) ǂÂis ǃnâ da ge nî ūhâ ǁGâuab ǁîb ǂâi ǀgauba da nî ūhâsa ra ǂgao ǃkhaisa. ǁÎba nēsa mâ ǀgaub ǃnâ a dī ǁkhā? Tsî mati da a ǁkhaubasen ǁkhā?

6. ǁGâuaba tae-e ra ǂgao tsî nēsab mati ra dī?

⁶ ǁGâuab ge ra ǂgao î da ǁîb khami ī tsî Jehovab ǁgaraga tā sao tsî sida xa ǀgui ǂâi. ǁGâuab ge a ǁgari da  ǁoa ǁîb khami ǂâi tsî tanisensa. ǁNās ǀkhab ge ǁîba ǀnî hâ ǀgaugu ǃnâ ra gaxaǃnâ da ǂgao. Aiǁgause, ǁîb xa ǀnai ǁgaiǁgai-e hâ khoen ǂnamipeb ge ra mâi da. (1Jhn. 5:19) ǁÎb ge ra ǂgao î da nē khoen ǀkha hâǀhao ǂan da a xawe ǃgâi tama khoen ǀkha hâs ge sida ǂâi ǀgaub tsî tanisen ǀgaub tsîna nî ‘ǁgaiǁgai’. (1Kor. 15:33) Nēs ge Gao-aob Salomob tawa ge sîsen. ǁÎb ge ǂgui tarade ge ǃgame tsî nē taradi ge ‘ǁîba gere gaoǂam’ tsî “ǁîb di ǂgaoba ge ǂgaeǂhapu” Jehovab ǃoa-ai.​—1Gao. 11:3.

7. ǁGâuaba tae-e ra sîsen-ū ǁîb ǂâi ǀgauba khoraǂuis ǃnâ tsî tae-i ǃaroma da nēsa nî ǂanbasen?

⁷ ǁGâuab ge muvin tsî ai-īsiǂhôaǂgares tsîna ra sîsen-ū ǁîb ǂâi ǀgauba khoraǂuis ǃnâ. ǁÎb ge a ǂan muvin tsî ai-īsiǂhôaǂgares tsîn ǃnâ da ǃgâiǃgâibasensa ūhâsa tsî nēs ǃnâ-ū sida ǂâi ǀgaub tsî tsâsigu tsîna ra ǁgaiǁgai. Jesub tsîn ge ai-īsiga ǁîb ǁkhāǁkhās ǃnâ gere sîsen-ū. ǁÎb di ǂkhōs Samariaǁîb dis tsî ǀgôab hîna ge omsa xu ī tsî ǁîb ǀumisa a hîǀhurub xa ǂâi re. (Mat. 13:34; Lukab 10:29-37; 15:11-32) Khoen hîna ǁGâuab ǂâi ǀgauba ūhân ge nē ǀgauba a sîsen-ū ǁkhā nau khoena ǁgaiǁgais ǃnâ. Xawe sida ge ǀnōsa ǀgauba nî ūhâ. Muvin tsî ai-īsiǂhôaǂgares tsîn ge a ǁkhāǁkhā da ǁkhā ǁgaiǁgai da tama hâse. Xawe da ge nî ǂan. ǁKhoaxa ǁaeba ūhâsa da ga ǁhûi o, o da ge nî dîsen, ‘nē ta ra kō xū-e ra ǁgau ǃgâi i ge a ti sorosi turagu ǃnâ māǁnâsensa di?’ (Gal. 5:19-21; Efe. 2:1-3) Tae-e du nî dī mû du ga o, kō du ra xū-i ge ǁGâuab ǂâi ǀgauba ūhâ di? ǁKhōǁkhōsa ǀaeba xu du nî ǂgōsen khami nēsa xu ǂgōsen re.

8. ǁGûna mati ǁîn ǀgôana a hui ǁkhā ǁîn ǂgaoba ǁkhaubas ǃnâ?

⁸ ǁGûn ge ǃereamsa ūhâ ǁîn ǀgôana  ǁGâuaba xu ǁkhaubasa, îb tā ǁîn ǂgaoga ǁgaiǁgai. Sadu ǁkhāsib ǃnâ hân hoana du ge ra dī sadu ǀgôana ǁkhōǁkhōsa ǀae-e xu ǁkhaubasa. ǁNās ǁkhās khami du ge sadu ǀgôana muvin, ai-īsiǂhôaǂgares, vidio gamedi tsî internets hîna ǁGâuab ǂâi ǀgauba ūhâna xu nî ǁkhauba. Jehovab ge ǀgôan gagasi ǂhâsiba kōǃgâs ǁgaumâisa ǁgûna ge mā. (ǂKhm. 1:8; Efe. 6:1, 4) ǁNās ǀkha tā ǃao re, oms ai Elobmîs ai ǃgaoǃgaosa ǁgaraga ūhâsa. Sadu ǀgôana mîba re tae-en nî kōs tsî tae-en kō tidesa tsî ǁnâuǃā kai tae-i ǃaroma du nē mîǁguiga ra dīsa. (Mat. 5:37) Sadu ǀgôan ra kai khami ǁîna mûǂan kai re tae-i a tsūs tsî tae-i tsū tama hâs tsîna Jehovab ǁgaragu ǃoagu. (Heb. 5:14) ǂÂis ǃnâ ūhâ re sadu ǀgôan ge ǂgui xūna sadu ra mî tsî dī xūna xu nî ǁkhāǁkhāsen.​—Deu. 6:6, 7; Rom. 2:21.

9. ǁGâuaba mâ ǂâi ǀgauba ra mā tsî nēsa tae-i ǃaroma a ǁkhōǁkhōsa?

⁹ ǁGâuab ge sida ǂgaoba a ǁgaiǁgai ǁkhā khoen gā-aisib ai ǂgomaiǂnûi kai das ǃnâ-ū tsî Jehovab di gā-aisib ais ose. (Kol. 2:8) ǀGui ǂâi ǀgaub ǁGâuab ge māb xa ǂâi re—ǁîb ge ge mî ǃkhūsis ge ǂgurose sida ûib ǃnâ nî hā di. Khoen hîna nēti ra ǂâin ge a ǃkhū ǁkhā tamas ka io ǃkhū tama hâ. ǁÎn ge ǁkhōǁkhōsa mâsib ǃnâ a ǂgâ ǁkhā. Tae-i ǃaroma? ǁÎn ge ǁnātikōse mari-i ai ra ǂgomaiǂnûi tsoatsoa tsî ǁîn ǂurusib, omaris tsî Elob ǀkhan ūhâ ǀhōsagusis tsîna nēs ǃgao ra māǁnâ. (1Tim. 6:10) Kaise da ge ra ǃgôaǃgâ sida ǀhomsi ǁGûb ge gā-aisiba a mā dasa î da ǀnōsa mûǂuiba mari-i ǃoa-ai ūhâ.​—Aoǁn. 7:12; Lukab 12:15.

10-11. (a) Tae-e da nî dī aitsama ǁkhaubasens ǃgao? (b) ǃÛi-aoga tae-e gere dī ǃkharu ge ǁaeb ǃnâ tsî sida ǃgâiǂâisa mati ǃûi-ao-i khami ī?

¹⁰ Sida ǂgaoba ǁkhaubas ǃnâ da ga ǃgâiǃō ǂgao o, o da ge ǁkhōǁkhōsa mâsiga nî mûǂan tsî nēs ǃoagu nî ǁkhaubasen. ǂKhoamîdi 4:23 tawa hâ mîs “sâu” di hâs ge ǃûi-aob xa ra ǂâi kai da. Gao-aob Salomob tsēdi ǃnâb ge ǃûi-aoba ǃauga ǃās mîrgu ai gere mâ tsî ǀō-e gere dī ǁkhōǁkhōsasibab gere mû o. Nēs ge ra ǁnâuǃā kai da tae-e da nî dīsa îb ǁGâuaba tā sida ǂâi ǀgauba ǁgaiǁgai.

¹¹ Elobmîs ǁaegu ǃnâ gu ge ǃûi-aoga dao-amdi ǃûi-aogu ǀkha ǀguiba gere sîsen. (2Sam. 18:24-26) ǁÎgu ge ǀguiba gere sîsen tsî dao-amde gere ǂganam kākhoen ga ǀgūse hâ o. (Neh. 7:1-3) Sida ǃgâiǂâis * ge sida ǃûi-ao-i ase a sîsen ǁkhā, ǁGâuab ga sida ǂgaoba ga ra ǁgaiǁgai ǂgao o. ǀNî mîdi ǃnâb ga sida tsâsigu, ǂâibasendi tsî turagu tsîna ga ra ǁgaiǁgai ǂgao ǁaeb ai. Sida ǃgâiǂâis ga nē ǃkhâikhomsa mā da o, o da ge nî ǃgâ tsî ǁkhā da an hoana nî dī nēsa xu ǂgōsensa.

12-13. Tae-e da nî ǁgari-e dīsa xawe tae-e da nēs xa nî dī?

¹² Aiǁgause, ǂâi re mati da ǁGâuab ǂâi ǀgauba ūhâsa xu a ǁkhaubasen ǁkhā ǀgausa. Jehovab ge ge ǁkhāǁkhā da “ǀaib tsî mâ ǃanuoǃnâsib hoab tsî xūǃgunuxasib tsîna an sadu ǃnâ tā ǂgaihe.”  (Efe. 5:3) Xawe tae-e da nî dī khoen ga skoli tamas ka io sîsenni tawa ǀaib xa ǃhoa o? ǂAn da ge a ‘eloxoresasib tsî ǃhūbaib di turagu tsîna xu’ da nî ǂgosensa. (Titub 2:12) Sida ǃgâiǂâis hîna a ǃûi-aos ge ǁkhōǁkhōsa xūna xu a ǁkhauba da ǁkhā. (Rom. 2:15) Xawe ǃgâ i da nî? ǀNî ǁaeb ai da ge ra ǁgari-e sida ǀhōsan ra ǃhoa xūna ǃgâsa tamas ka io ǁîn ra kō xūna kōsa. Xawe ǁnā ǁaeb ǃnâ da ge ǃās dao-amde nî ǂganam, nēs ge ra ǂâibasen î da ǀnî hâ xū-i xa ǃhoa tsoatsoa tamas ka io ǃgû bē.

¹³ ǁKhoaǂgaosiba i ge ǂhâ hâ, hî-i di mîsa sida ǀhōsan ra mî tsî dī xūna ǃoa. Jehovab ge sida ra dītsâ o ra mû tsî ǀgaib tsî gā-aisib tsîna nî mā da ǁGâuaba mâǃoasa. (2Kro. 16:9; Jes. 40:29; Jak. 1:5) Mati da nî aiǃgû sida ǂgaoba ǁkhaubas ǃnâ?

14-15. (a) Tae-i ǃoa da sida ǂgaoba nî ǁkhowa-am tsî nēsa da mati a dī ǁkhā? (b) ǂKhoamîdi 4:20-22 sa mati ra hui da Elobmîsa khomaisa xu ǃgâiba hōsa? (“ ǂÂiǃgâ ǁkhā du a ǀgaub” di hâ boksisa mû re.)

¹⁴ Sida ǂgaoba ǁkhaubas ǃgao da ge tā ǁgai xūna xu ǀgui nî ǂgōsen xawe ǃgâi xūn tsîna nî mā-am. Mirga ūhâ ǃās di ǂkhōsa ǂâis ǃnâ ūhâ re. Dao-ams ǃûi-aob ge kākhoen tā nî ǂgâ amaga dao-amsa ra ǂganam xawe ǁkhawa ra ǁkhowa-am î-i ǂû-i tsî ǀnî hâ xūn tsîna ǂgâ ūhē. Dao-aomdi ga ǁkhowa-amhe tama hâ o, on ge ǁanǂgāsabena ga ǃâǁō hâ. ǁNās ǁkhās khami da ge sida ǂgaoga nî ǁkhowa-am î da Elob ǂâi ǀgauba ūhâ.

¹⁵ Elobmîs ge Jehovab ǂâi ǀgauba ūhâ, ǁnās ǀkha da ga Elobmîsa hoaǁae khomai o, o da ge Jehovab ǂâi ǀgauba ra mā-am îb sida ǂâi ǀgaub, tsâsigu tsî dī da ra xūn tsîna tsâǀkhā. Mati da sida Elobmîs khomaisa xu a ǀama ǁkhā? ǀGores ge a ǂhâǂhâsa. ǀNî Xristeǁî ǃgâsas ge ge mî: “Elobmîsa ta nî khomais aiǃâ ta ge aibe ra ǀgore, îb Jehovaba hui te î ta ǃgâi xūn hîna ǁîb mîs ǃnâ hâna mû.” (Psa. 119:18) Khomai da ra xūna da ge nî ǂâiǃgâ. ǀGore, khomai tsî da ga ǂâiǃgâ o, o i ge Elob di mîsa sida ǂgaoba nî tsâǀkhā tsî da ge Jehovaba ra ǀnam.​—Khomai re ǂKhoamîdi 4:20-22; Psa. 119:97.

16. ǂGuina mati JW Broadcastingsa kōsa xu ge ǀama?

¹⁶ ǀNî hâ ǀgaub Elob ǂâi ǀgauba da a ūhâ ǁkhāb ge JW Broadcastings ai hâ xūna kōsa. ǀNî khoe-aogu ra ge ge mî: “ǁKhâb hoaba hâ broadcastings ge sim ǀgorede ge ǃeream. Nēs ge sima ge ǀgaiǀgai tsî ǀguri tsâsen ham ga ra o, o ra ǀgaiǀgai mî. Sida internets ai hâ amdem ge hoaǁae oms ai ra ǃgâ. Sâi tamas ka iom ra ǃanu hînam ge ǁîde ra ǀhuru.” Nēs ge ra hui da sida ǂgaoba ǁkhaubas ǃnâ. Nēs ge Jehovab khami ra ǂâi kai da tsî ra ǁkhauba da ǁGâuab ǂâi ǀgauba ūhâsa.

17-18. (a) Tae-e nî ī Jehovaba xu da ra ǁkhāǁkhāsen xūna da ga ûiǂui o 1 Gao-aogu 8:61 ǃnâ i ra ǁgau-e khami? (b) Tae-e da Gao-aob Hiskiab aiǁgausa xu a ǁkhāǁkhāsen ǁkhā? (c) Davib ǀgores hîna Psalmdi 139:23, 24 ǃnâ ra hō-es ǃoa-ai da tae-e a ǀgoreba ǁkā?

¹⁷ Hoaǁae da ga ǃgâi xūna dīsa xu da ra ǀama ǀgauba mûǂan o, o da ge sida ǂgomsa ra ǀgaiǀgai. (Jak. 1:2, 3) Kaise da ge ǃgâise ra tsâ Jehovab ǁîb ǀgôan ase ra mûǂan da o tsî da ge ǁîba hoaǁae ra ǃgâiaǂgao kai. (ǂKhm. 27:11)  Mâ ǃâitsâs hoas ge ra ǁgau hoase da Jehovaba ǃoabas ǃnâ mâǁnâsen hâsa. (Psa. 119:113) Hoaǁae da ge ra ǁgau Jehovaba da ǂgaob hoab ǀkha a ǀnamsa tsî ǁîb ǂâisa ra dī ǂgaosa.​—Khomai re 1 Gao-aogu 8:61.

¹⁸ Dīsā î da nî? Îo, hoa da ge ǀoasa kurusa ūhâ tama hâ. Dīsā da ga o, o da ge Gao-aob Hiskiab aiǁgaus xa nî ǂâi. ǁÎb tsîn ge gere dīsā. Xaweb ge ge ǃhōbasen tsî Jehovaba “ǀoasa ǂgaob ǀkha” ge ǃoaba tsoatsoa. (Jes. 38:3-6; 2Kro. 29:1, 2; 32:25, 26) ǁNās ǀkha da ge ǁGâuab ǂâi ǀgauba ūhâsa xu nî ǂgōsen. Tsî nî ǀgore î da “ǁnâuǃāxa ǂgaoba” ūhâ. (1Gao. 3:9; khomai re Psalmdi 139:23, 24.) Jehovab ǃoa-ai da ge ǂgomǂgomsase nî hâ sida ǂgaoba da ga ǁkhauba o.