1-2. (a) Jesajab 41:10 ǃnâ a xoasa haisi-amsa mati ǀnî ǃgâsas Yoshiko di ǀon hâsa ge tsâǀkhā? (b) Jehovaba nē haisi-amsa ham-i nî ǀama ǃkhais ǃgao ge xoa kai?

ǂGOMǂGOMSA Xristeǁî ǃgâsas hîna Yoshiko di ǀon hâs ge ǁgai ǂhôa-e ge ǁnâu. ǁÎs ǀaeǃkhō-aob ge ge mî ǀoro ǁkhâgu ǀguigas ge nî ûi di. ǁÎsa nēs xa mati ge tsâ? Yoshikos ge Elobmîs xoas hîna Jesajab 41:10 ǃnâ hâsa ge ǂâihō. (Khomai re.) Tsî ǁîs ǀaeǃkhō-aoba ge mîba ǁîs ge ǃao tama hâ di, Jehovab ǁîs ǃomkha ra ǃkhō amaga. * Nē xoas ǃnâ hâ haisi-ams ge nē ǃgâsasa ge hui îs hoase Jehovab ai ǂgomaiǂnûi. Nē xoas ge sida tsîna a hui ǁkhā ǃgomsina da ga ra ūhâ ǁaeb ǃnâ. Nēsa ǁnâuǃās ǃgao da ge ǂgurose nî kō Elob ge tae-i ǃaroma Jesajaba nē haisi-amsa a māsa.

² Jehovab ge Jesajaba nē mîde ge xoa kai îb Jodeǁîn hîna ge Babilons ǃnâ ǃkhōsis ǃnâ gere ūhēna ǂkhâǃnâ. Xawe Jehovab ge nē mîde Jodeǁîn ǃgao ǀgui ge xoa kai tama hâ i xawe hoa khoen hîna ǁîba ra ǃoaban ǃgao nētsēs kōse. (Jes. 40:8; Rom. 15:4) Nētsē da ge ‘ǃgom ǁaegu’ ǃnâ ûi hâ tsî ǁnās ǀkha Jesajab ǂkhanis ǃnâ hâ ǁkhaeǂgaosa ǂhâ hâ.​—2Tim. 3:1.

3. (a) Mâ mîmâide 2019ǁî kurib xoas hîna Jesajab 41:10 ǃnâ hâs ǃnâ ra hō-e? (b) Tae-i ǃaroma da nē mîmâide ǂhâ hâ?

³ Nē ǁkhāǁkhāǃâs ǃnâ da ge ǃnona mîmâidi Jehovab ge mādi hîna sida ǂgomsa ra ǀgaiǀgaidi xa nî ǃhoaǃgao  hîna Jesajab 41:10 ǃnâ a xoasade: (1) Jehovab ge sida ǀkha hâ, (2) ǁîb ge a sida Elo tsî (3) ǁîb ge nî hui da. Nē ǁkhaeǂgaode da ge ǂhâ hâ, * Yoshikos khami da sida tsîna sida ûib ǃnâ ǃgomsina ra hōǃâ amaga. ǃGomsina da ge ǃhūbaib ǃnâ ra ī xūn xa ǃaromahe hâses tsîna ra hōǃâ. ǀNî khoen ge ǂhanub xas tsîna ra mâǃoahe. Hā re î da nē ǃnona ǃaromade ǃhoaǃgao.

4. (a) Mâ mîmâisa da ǂgurose nî ǃhoaǃgao? (ǁNaeǁgau saosa mû re.) (b) Jehovaba mâ ǀgaugu ǃnâ ǁîb tsâsiga ra ǁgau da? (c) Elob di mîde mati ra tsâ kai da?

⁴ Jehovab ge ǂgurose sao ra mîdi ǀkha ra ǁkhaeǂgao da: “Tā ǃao, tita ge sa ǀkha hâ xuige.” * Jehovab ge ǁîb ǀnammi ǃnâ-ū ra ǁgau da ǁîb sida ǀkha hâsa. Mû re matib ǁîb ǀnamma ra ǁgau ǀgausa. “ǃGomǀgausats ge ti mûǁae” dib ge Jehovaba ra mî. ‘ǂKhaisats ge ge tsî ta ge ge ǀnam tsi.’ (Jes. 43:4) Xū-i xare i hîna ǃhūbaib ǃnâ hâ i ge Jehovab sida ūba hâ ǀnamma ūbē tide. (Jes. 54:10) ǁÎb ǀnammi tsî ǀhōsagusis tsîn ge ǁkhoaǂgaosiba ra mā da. ǁÎb ge Abrahammi ǁîb ǀhōsabab ge ǁkhauba khami sida tsîna nētsē nî ǁkhauba. Jehovab ge ǁîba ǃoa ge mî: “Tā ǃao re, Abramtse, tita ge sa khōsikhōta.”​—Gen. 15:1.

5-6. (a) Mati da a ǂan Jehovab ge ra hui ǂgao di ǃgomsina da ra hōǃâ o? (b) Tae-e da Yoshikos aiǁgausa xu a ǁkhāǁkhāsen ǁkhā?

⁵ ǂAn da ge a Jehovab sida ǃgomsin ǀkha ra hui ǂgaosa, sao ra mîmâisab ge mā amaga: “ǁGammats ga xanuo, o ta ge tita sa ǀkha nîra hâ; tsî ǃāgats ga ǃgâuo, o gu ge dâunari tsi tide. ǀAesats ga ǃgûǃganuo, ots ge khauǃkhūhe tide; ob ge ǁhabuba ǂhubi tsi tide.” (Jes. 43:2) Nē mîde tae-e ra ǂâibasen?

⁶ Jehovab ge ûiba ra ǃgom kai xūna ūbē tama hâ xawe ‘ǃāgu’ khami kai ǃgomsina mā-am tide tsî ǁîba da nî  ǃoaba ǀûs tsîna mā-am tide. Jehovab ge ra mîǁgui ǁîb ge nî hui da ǃgomsina da ga ra hōǃâ ǁaeb ǃnâ di, î da nē ǃgomsina mâǃoa ǁkhā. Jehovaba tae-e nî dī? ǁÎb ge nî hui da î da tā ǃao tsî ǁîb ai hoaǁae ǂgomaiǂnûi ǁōb kōse. (Jes. 41:13) Yoshikos ge nēs a ama ǃkhaisa ge mûǂan. ǁÎs ǀgôas ge ra mî: “Kaise da ge ge buru ti ǁgûs a ǃnomsa ǀgausa mûsa. Jehovab ge ǃnomsasiba a māsi ǃkhaisa da ge ge mû. ǁŌs nî tsēs kōses ge ti ǁgûsa ǀaeǃkhō-aon tsî ǀaesen hâ khoen tsîn ǀkha Jehovab tsî ǁîb mîmâidi xa gere ǃhoa. Tae-e da Yoshikos aiǁgausa xu ra ǁkhāǁkhāsen? Elob mîmâis hîna “tita ge sa ǀkha hâ” di ra mîs ai da ga ǂgomaiǂnûi o, o da ge nî ǁkhoaǂgaoxa tsî nî ǀgai ǃgomsina da ra hōǃâ ǁaeb ǃnâ.

7-8. (a) Mâ ǀgamǁî mîmâisa da nî ǃhoaǃgao tsî nēsa tae-e ra ǂâibasen? (b) Jehovaba tae-i ǃaroma Jodeǁîn hîna ge ǃkhōsis ǃnâ hâ îna “tā sau” di ge mîba? (c) Mâ mîdi hîna Jesajab 46:3, 4 ǃnâ hâde Elob khoen ǂgaoga ge ǃnom kai?

⁷ ǀGamǁî mîmâis hînab ge Jesajaba a mās ge: “Tā sau, tita ge a sa Elo xuige” di hâ. Nē mîdi hîna ǂâiǂhansens xa hâde tae-e ra ǂâibasen? Nē xoas ǃnâ i ge ‘ǂâiǂhansen’ di hâ mîsa hoaǁae ǃgâbǀkhāba ǃoa kōsa ǃoa ra ǁnaeǁgau.

⁸ Jehovaba tae-i ǃaroma Jodeǁîn hîna ge Babilons ǃnâ ǃkhōsis ǃnâ hâ îna ge mîba în tā ‘ǂâiǂhansen’? ǁÎb ge ge ǂan i ǁnā ǃhūb khoen ge nî ǃao di. Tae-i ǃaroman gere ǃao? 70 Kurigu ǀams Jodeǁîn ǃkhōsis dis ai i ge Babilonsa nî ǁnāǂamhe Medo-Persiab xa. Jehovab ge ǁîb khoena ge hui în ǃkhōsisa xu Babilonsa ǃoa ī. (Jes. 41:2-4) Babilonǁîn tsî ǀnî hâ ǃhaos khoen tsîn ge ǁnâu o ǁîn kākhoeb hās ge go ǀgū di, on ge ǁkhoaǂgaosiba gere omkhâi: “ǀGai re” di mîbagus ǃnâ-ū. ǁÎn ge noxoba ǀnî hâ eloga gere kuru, nē elogu ǁîna nî ǁkhauba di ǂâi tsî. (Jes. 41:5-7) Xaweb ge Jehovaba Jodeǁîn ǂgaoga gere ǃnomǃnom sao ra mîdi ǃnâ-ū: “Xawe sats Israelts, ti ǃgāts . . . tā sau, tita ge a sa Elo xuige.” (Jes. 41:8-10) Mû re nēpab ge Jehovaba “tita ge a sa Elo” di ge mî. Jehovab ge nē mîdi ǃnâ-ū ǁîb ǃoaba-aona gere ǁgau ǁîb ǁîna ǀuru tama hâ ǃkhaisa tsîb noxoba a ǁîn di Elosa tsîn ǁîna noxoba a ǁîb khoesa. ǁÎnab ge ge mîba: “Tita ge sado nîra ūkhâi, tsî tita ge sado nîra . . . ore.” Nē ǁkhaeǂgao tsî ra ǂkhâǃnâ mîdi ge Jodeǁîn hîna ge ǃkhōsis ǃnâ hâ ina gere ǀgaiǀgai.​—Khomai re Jesajab 46:3, 4.

9-10. Tae-i ǃaroma da ǃao tide? ǂKhō re.

⁹ Nētsēn ge khoena kaise ra ǂâiǂhansen ǃhūbaib mâsigu ra ǁgaiǂoa amaga. Sida tsîn ge nē ǃgomsin xa ra tsâǀkhāhe. Xawe da ge ǃaroma-e ūhâ tama hâ ǃaos di-e. Jehovab ge ra mî: “Tita ge a sa Elo.” Nē mîde tae-i ǃaroma ǃnomsase ra hâ kai da?

¹⁰ Sao ra ǂkhōs xa ǂâi re: ǀGam khoekha Jim tsî Ben di ǀon hâkha ge ani-kunis ai hâ ǀgaisa ǂoab hâ hîna. ǂOab ani-kunisa ra ǂkhā hîna i ge domma ra mî: “ǃGaesen du re. ǃGâi tama mâsib ǃnâ-ū da ge nî ǃnari.” Jimib ge kaise ge ǂâiǂhansen tsoatsoa. Xaweb ge anikunis ǃnari-aoba ge mî: “Tā ǃao re. Nēb ge anikunis ǃnari-aob hîna ra ǃhoaba.” Jimib  ge ǁîb danasa ǀgapi tsî ra dî “mâ ǂgomǃgâsiba nēba?” di. Xaweb ge ra mû Beni ge ǃao tama hâ di. Jimib ge ǁîba ge dî: “Tae-i ǃaromats di ǃnomsa?” Beni ge âi tsî ge mî: “Tita ge nē ǃnari-aoba ǃamkuse a ǂan. ǁÎb ge a ti ǁgû.” Tsîb ge Bena ge mî: “Hā re î ta ti ǁgûb xa mîba tsi. Tita ge a ǂan ǁîb xats ga ǂan tsî ǁîb ǀgaugu tsîna ǂan o, ots ge ǃnomsase nî hâ.”

11. Tae-e da Beni tsî Jimi tsîkha ǂkhōsa xu a ǁkhāǁkhāsen ǁkhā?

¹¹ Tae-e da nē ǂkhōsa xu a ǁkhāǁkhāsen ǁkhā? Beni khami da ge sida tsîna a ǃnomsa sida ǀhomsi ǁGûb Jehovaba da ǃamkuse a ǂan amaga. ǂAn da ge a ǁîb ǃgomsina da ga hōǃâ ǁaeb ǃnâs tsîna nî kōǃgâ da ǃkhaisa, nē ǃgom ǁaegu hîna da ûiǃnâ hâgu ǃnâ. (Jes. 35:4) Jehovab ai da ge ra ǂgomaiǂnûi tsî ǃnomsase ra hâ, ǃhūbaib khoen ǃaoba ūhâ hîna. (Jes. 30:15) Beni khami da ge sida tsîna ra tanisen sida ǀgūkhoen ǀkha da ga tae-i ǃaroma da Elob ai ra ǂgomaiǂnûi ǃaromas xa ǃhoa o. ǁNās ǀkhan ge Jehovab ai ra ǂgomaiǂnûi ǃgomsinan ga ra hōǃâ o, ob nî ǁîba hui nî ǃkhaisa.

12. (a) Mâ ǃnonaǁî mîmâisa da nî ǃhoaǃgao? (b) Jehovab “ǁôab” di hâ mîsa tae-e ǃoa ra ǂâi kai da?

¹² ǃNonaǁî mîmâis hînab ge Jesajaba a mās ge: “Tita ge ra ǀgaiǀgai tsi, tita ge ǁkhāti ra hui tsi.” Jesajab ge ǀnai ge mîmâi hâ i matib Jehovaba ǁîb khoena nî huisa mî rase: “ǃKhūb ge ǀgaisab ase nîra hā, tsî ǁôab âb ge nîra gao.” (Jes. 40:10) Elobmîs ge “ǁôa” di hâ mîsa ra sîsen-ū ǀgaiba  ǁguiǃās ǃaroma. ǁNā mîdi “ǁôab” ge nî ǂgaeǂgui di hâ di ge ra hui da mûǂansa Jehovab a ǀgaisa ǂgaeǂgui-aosa. ǁÎb ge ǁîb ǀgaiba ǃkharu ge ǁaeb ǃnâ gere sîsen-ū ǁîb ǃoaba-aona ǁkhaubas ǃgao. Nētsēs tsînab ge noxoba ǁîb ai ra ǂgomaiǂnûi khoena ra ǀgaiǀgai tsî ǁkhauba.—Deu. 1:30, 31; Jes. 43:10.

13. (a) Jehovaba mâ ǁaeb ai ǁîb mîmâis hui dab nîs disa ra dīǀoaǀoa? (b) Mâ mîmâisa ǀgaib tsî ǂgomǃgâsib tsîna ra mā da?

¹³ Sida khākhoen ra mâǃoa da ǁaeb aib ge Jehovaba ra mî: “Tita ge ra ǀgaiǀgai tsi.” ǀNî ǃhūgu ǃnân ge sida khākhoena ǃgarise ra dītsâ sida sîsen-e ǀû kaisa. Xawe da ge sida nē mâǃoasa ǃao tama hâ. Jehovab ge ge mîmâi ǁîb ge nî ǀgaiǀgai da tsî hui da di. ǁÎb ge ge mî: “Sîsenūxūs sa ǃoagu ga ǁāǁāhes hoas ge ǃgâiǃgâ tide.” (Jes. 54:17) Nēs ge ǃnona xūn xa ra ǂâi kai da.

14. Tae-i ǃaroma da buru tama hâ Elob khākhoen ra mâǃoa da o?

¹⁴ ǂGurose da ge Xristub saosaben ase nî ǃhui-e. (Mat. 10:22) Jesub ge ge mî ǁîb ǁkhāǁkhāsaben ge ǀuni tsēdi ǃnâ nî mâǃoa-e di. (Mat. 24:9; Johaneb 15:20) ǀGamǁîse, Jesajab kēbos ge ge mî, sida khākhoen ge ǃhui das ǀguisa dī tide xawe ǂgui xūna nî sîsen-ū sida tsûtsûs ǃgao. Nē xūn ge ǂgaeǂhapuhes, ǂûmib tsî mâǃoahes tsîna ǃkhōǂgā hâ. (Mat. 5:11) Jehovab ge sida khākhoena ǂkhā tide nē xūna sida ǃoagu sîsen-ūsa. (Efe. 6:12; J.ǂHa. 12:17) Xawe da ge tā nî ǃao. Tae-i ǃaroma?

15-16. (a) Mâ ǃnonaǁî amaba da ǂâis ǃnâ nî ūhâ tsî Jesajab 25:4, 5 tsîna mati nēsa ra ǂkhâǃnâ? (b) Jesajab 41:11, 12 sa mati sida ǃoagu ra ǃgam khoen ǀamǂoasa ra ǁguiǃā?

¹⁵ ǃNonaǁî amab hîna da ǂâis ǃnâ nî ūhâb xa ǂâi re. Jehovab ge ge mî “sîsenūxūs sa ǃoagu ga ǁāǁāhes hoas  ge ǃgâiǃgâ tide.” Mirgu ǃgâi tama ǂoab mâsiba xu ra ǁkhauba da khamib ge Jehovaba “ǁnaes tirangu disa” xu ra ǁkhauba da. (Khomai re Jesajab 25:4, 5.) Sida khākhoen ge ǃgâiǃō tide sida tsûtsûs ǃnâ.—Jes. 65:17.

¹⁶ Jehovab ge sida ǂgomǃgâsiba ǁîb ǃnâ ra ǀgaiǀgai, sida ra ‘mâǃoa’ khoen ǀkha i tae-e nî īsa ǁgūiǃāba das ǃnâ-ū. (Khomai re Jesajab 41:11, 12.) Sida khākhoen ga ǀgaisase ga ra mâǃoa da xawe i ge ǀamǂoasa a ǀgui: Hoa khākhoen Elob din ge nî ‘ǁauxū kai tsî torodī-ū khoen ge nîra kā.’

17-18. (a) Elobmîsa khomaisa mati sida ǂgomǃgâsiba Jehovab ǃnâ nî ǀgaiǀgai? Aiǁgau-e mā re. (b) 2019ǁÎ kurib xoas xa ǂâiǃgâsa mati nî hui da?

¹⁷ Sida ǂgomǃgâsiba da ge Jehovab ǃnâ ra ǀgaiǀgai ǁîba ǃnāsase ǂans ǃnâ-ū. Jehovaba da ga ǃgâise ga ra ǂan ǂgao o, o da ge Elobmîsa ǂnōrisase nî khomai tsî khomai da go xū-e nî ǂâiǃgâ. Elobmîs ge ra ǁgau Jehovab ge mati ǁîb khoena ǃkharu ge ǁaeb ǃnâ gere ǁkhaubasa. Nēs ge ǂgomǃgâsiba ra mā da nētsēs tsînab nî kōǃgâ da ǃkhaisa.

¹⁸ Jesajab ge sîsen-ū mîdi hîna ai-īsiba ra ǁguiǃā di xa ǂâi re, hîna ra ǁgau de matib Jehovaba nî kōǃgâ dasa. ǁÎb ge Jehovaba ǃoa ǃûi-aob ase ra ǁnaeǁgau tsî Elob ǃoaba-aona ǁkhaon ase. Jesajab ge Jehovab xa ge mî: “ǁîb ge ǁkhaon âba ǁîb ǁôakha ǃnâ ǀhaoǀhao tsî tîǂams âb ǃnâ nîra tani.” (Jes. 40:11) Jehovab ǃomkha da ra hōǃâ o, o da ge ǁkhaubahe hâse ra tsâ. ǂGomǂgomsa tsî gā-ai ǃgāb ge Jesajab 41:10 sa 2019ǁî kurib xoas ase ge ǁhûi i da ǃgomsina da ga hōǃâ xawe ǃnomsase hâ. Nēti ra mî: “Tā sau, tita ge a sa Elo xuige.” Nē mîdi hîna ra ǂkhâǃnâ di xa du ǂâiǃgâ re.