1. Tae-i ǁkhoreba da hoa da ūhâ tsî nēsa tae-e ǃkhōǂgā hâ?

MATI du nî tsâ sadu a ǂan tsî ra ǃgôa khoe-i ga sadu ǀonsa ǀuru o? Tsî ǁnās xōǀkhā sado mûǂan tama io? ǁNās ge kaise a tsûaǂgao kai da ǁkhā. Tae-i ǃaroma? Hoa da ge ra ǁkhore î da ǂanǃgâhe. Sida ra ǂhâba ǂanǃgâhes ge khoe-i xa ǂanhes ǃgâ-ai hâ. Nēs ge ūǃoahe tsî dī da ran ǃgao ǂanǃgâhesa.—Num. 11:16; Job. 31:6.

2, 3. ǂAnǃgâhe ǂgaos turaba mati i io ǃgâi tama hâ? (Tsoatsoas ǃnâ hâ ai-īsiba mû re.)

² ǂGui ǁkhorega da ge ūhâ ǂanǃgâhes ǃgao xawes ge nēsa ǃgâise ǀnōsa tama hâ, ǀoasa kurusa da ūhâ tama hâ ǃkhais ǃgao. Nēs ge ǃgâi tama ǂanǃgâhesa a tura kai da ǁkhā. Satanni ǃhūbaib ge ǂanǃgâhes turab tsî ūǃoahe ǂgaos tsîna ra kaikai. Nēs ge a dī ǁkhā î da tā sida ǀgoreǀîs tsî ǂanǃgâsa anu hâba ǃoaba, Jehova Eloba.—J.ǂHa. 4:11.

³ Jesub tsēdi ǃnâgu ge ǂgomdi ǂgaeǂgui-aoga ǃgâi tama ǂâi ǀgauba ge ūhâ i ǂanǃgâhes xa. Jesub ge ǁîb  ǁkhāǁkhāsabena ge ǃkhâikhom: “Xoaǂansabega ǂanbasen re, gaxu saragu ǃnâ ǃgûmas, tsî ǁamaxūǃkhaidi tawa tawedehes xa ǃgâibahega, tsî ǂguro ǂnûǃkhaide sinagogegu ǃnâ, tsî aiǂnûǃkhaide ǂûǁaedi ǃnâ ǀnamga.” Jesub ge ǀaro tsî ge mî: “ǁÎgu ge ǃnāsa ǀgoraǃgâ-e nîra hō.” (Luk. 20:46, 47) ǁNās ǃoa-aib ge Jesuba ǀgâsa ǃoatarasa ge koa nau khoen ge ǀnîsi ǁîs ge aoǂgā ǂkhari marirosa ǂanǃgâ tama hâ i xawe. (Luk. 21:1-4) Jesub di ǂanǃgâs ge nau khoena xu gere ǀkhara. Nē ǁkhāǁkhāǃâs ge nî hui da î da ǂhanu mûǂuisa ūhâ ǂanǃgâs xa, Jehova Elob ra ūǃoasa.

4. Tae-e a ǃgâi ǀgau ǂanǃgâhes diba tsî tae-i ǃaroma?

⁴ Tae-e a ǃgâi ǀgau ǂanǃgâhes diba, sada nî ôaba? Nē ǂanǃgâs ge ǀgapi ǁkhāǁkhās, ǃkhūsib tsî ǁkhoaxasib nē ǃhūbaib dib tsîna ǃoa ǁnaeǁgau tama hâ. Xawe ǂâi re, Paulub ge ǁguiǃāba da ǂanǃgâsa sao ra xoas ǃnâ: “Eloba du a ǂan ǃnubai, ā nēs ǃgâ-ai kais: Elob xa du mûǂanhe hâ ǃnubai, mati du kha ǁkhawa ra ǃhoba ǁnā ǂkhabusa tsî ǁkhoatsama tsoatsoa-ain, ǀasa-ame du ǁkhawa ra sîsenba ǂgaon ǃoa?” (Gal. 4:9) Kaise buruxa aiǂhanub ge ū da hâba. ‘Elob xa da mûǂanhe hâ ǃnubai’ ǀhommi tsî ǃhūbaib ǂgaeǂgui-aoba. ǁÎb ge māsenxa sida ǀkha ǀhōgusa. ǀGui Elobmîs ôaǃnâ-aob ge ge mî, “ǁÎb ge sida ǃnâ ǃgâiǃgâibasensa ra ôa.” Jehovab ga sida ǁîb ǀhōsan ase ga ra ǂanǃgâ o, o da ge ǃaromasa ūhâ ûib ǃnâ.—Aoǁn. 12:13, 14.

5. Mati da Jehovab xa a ǂanǃgâhe ǁkhā?

⁵ Moseb ge nēti i ǀkhaeba ge hōǃâ. Moseb ge Jehovaba a ǀkhoma o îb ǁîb ǀgauga ǂan, ob ge Jehovaba ge ǃeream bi: “ǁKhāti ta ge tita ǃkhais hîats go mîsa nî dība tsi, ǀkhommats go ti mûǁae hō tsî ǀons tawa ta a ǂan tsi amaga.” (Eks. 33:12-17) ǁNās ǁkhās khami da ge buruxa ǀkhaega a hōǁkhā Jehovab ga sida ǀonsa ǂan o. Xawe mati da Jehovab xa a ǂanhe ǁkhā? Nēsa da ge ǁÎba ǀnams tsî ǁÎb ai māǁnâsens tsîn ǃnâ-ū ra dī.—Khomai re 1 Korinteǁîn 8:3.

6, 7. Tae-e a dī ǁkhā î da sida ǀhōsagusisa Jehovab ǀkha ǂoaǃnâ?

⁶ Sida ǀhōsasisa da ge sida ǀhomsi ǁGûb ǀkha nî ǀgaiǀgai. Galate Xristeǁîn hînab ge Pauluba a xoaban khami da ge sada tsîna “ǂkhabusa tsî ǁkhoatsama tsoatsoa-ain” nē ǃhūbaib dina xu nî ǂgōsen. Nēs ge ǂanǃgâhesa ǃkhōǂgā hâ. (Gal. 4:9) ǁNā ǂgurokamǁaeb Xristeǁîn hîna ge Paulub xa a xoabahen ge gagasise ge aiǃgû tsî Elob xa ge ǂanhe. Xawe Paulub tsîn ge ge mî nē ǃgâsan ge ǁkhawa ge “ǁnā” oa ǀkhaiǃnâ xūna ǃoa. Paulub ge ǀnî mîdi ǃnâ gere mî: “Nētikō ǃnūse hā tsî du ra gâresib ǃoa oa, ǁau xūn hîna du ge ǁnāxūna ǃoa?”

⁷ Nēti i mâsib ǃnâ hōsen ǁkhā î da a nētsē? Î, īǁkhā a. Jehovaba da ge ǂguro ǂan o, o da ge Paulub khami ge ī-i hîna ge ǂanǃgâhesa Satanni ǃhūbaib ǃnâ a ǁnāxūba. (Khomai re Filipeǁîn 3:7, 8.) ǀNîsi da ge ǀgapi ǁkhāǁkhāsens ǃēsa ge ūǃoa tama hâ i tamas ka io ǀgapi ǃharosa sîsen-aib ai māhes tsî ǂgui mari-e kurus tsîna ge ǂkhā.  Sida ǁnaes ǁkhāsib tsî ǃkhoes ǁkhāsib tsîn ge ǀnîsi ga ǃkhū kai da hâ. Tsî ga dī hâ în ǂgui khoena ǂan da, xawe da ge nēna ge ūǃoa tama hâ i. (Heb. 11:24-27) Matikōse i gā-aisiba ǁgau tide nē xūna da ‘ǂoaǃnâ’ hâ di da ga ra ǂâi o. ǁNāti i ǂâi ǀgaub ge nî dī î da “ǂkhabusa tsî ǁkhoatsama” xūna ôa nē ǃhūbaib dina. *

8. Tae-e nî hui da î da sida mîǁguib Jehovaba ǂanǃgâs diba ǀgaiǀgai?

⁸ Mati da nî dī î da sida mîǁguiba ǀgaiǀgai tsî Jehovab ǂanǃgâsa ôa, ǃhūbaib dis ose? Nēsa dīs ǃgao da ge ǀgam ǂhâǂhâsa xūna nî ǂâiǃgâ. ǂGurose Jehovab ge hoaǁae ǁîba ǂgomǂgomsase ra ǃoaba khoena ǂanǃgâsiba ra mā. (Khomai re Hebreǁîn 6:10; 11:6) Jehovab ge ǁîb ǃoaba-aona ra ǃgôaǃgâ. Tsî ǁÎb ge ǁîna ǃgôaǃgâ tama isa ‘ǂhanuoǃnâse’ ra mû. Jehovab ge hoaǁae “ǁîb dina a ǂan” (2Tim. 2:19) ǁÎb ge “ǂhanu-ain di daoba a ǂan” tsî a ǂan matib ǁîna ǃgomsina xu nî huisa.—Psa. 1:6; 2Pet. 2:9.

9. Aiǁgau-e mā re matib ge Jehovaba ǁîb khoena a ūǃoa ǀgausa?

⁹ Jehovab ge ǀnî ǁaega ǁîb khoena ǂanǃgâsiba ǀō-aisa ǀgaugu ǃnâ ra ǁgau. (2Kro. 20:20, 29) Aiǁgauseb ge Jehovaba ǁîb khoena ǂĀxahurib tawa ge hui Faraob ge ǁîna gere ǁkhae ǂgao o. (Eks. 14:21-30; Psa. 106:9-11) Nē ǃnaeǃkhais ge kaise ge ǂoaǂamsa i, ǁnā ǁaeb khoen ge 40 kurigu ǃkharu hâse noxoba ǁnā ǃnaeǃkhais xa gere ǃhoa. (Jos. 2:9-11) Matikōses nē ǃnaeǃkhaisa ra ǂkhâǃnâ da Jehovab ǂanǃgâs hîna da ǃgôaxa ǁnāǂams Gogi tsî Magogi diba xu nî hōsa ǂâiǃgâsa. (Ese. 38:8-12) ǁNā ǁaeb ai da ge kaise Elob di ǂanǃgâsa nî ǃgôaǃgâ ǃhūbaib dis ose.

10. Mâ ǃâb Jehovab ǂanǃgâs diba da ǂâis ǃnâ nî ūhâ?

¹⁰ ǀGamǁîse da ge kaise ǂhâǂhâsa amaba ǂâis ǃnâ nî ūhâ: Jehovab ge nî ǂanǃgâ da ǂgomhe ǁoasa ǀgaub ǃnâ. ǁNān hîna ǃgâi xūna khoen xan nî mûhe amaga ǀgui ra dīn ge Jehovab xa ǀkhaehe tide. Tae-i ǃaroma? ǁÎn ǀkhaeb ge ǀoasase ǀnai mataresa khoen xan ra ǂanǃgâhe ǂgao amaga. (Khomai re Mateub 6:1-5.) Jesub ge ge mî ǁîb ǁGûb ge “ǂganǃgâsib ǃnâ” ǁnān hîna khoen xa ǂanǃgâhesa ôa tamana ra ǀkhae. Jehovab ge ǁîn dīga ra ǃgaoǃgâ tsî ǁîna ra ǀkhae, mâ-i hoa-e. ǀNî ǁaegu aib ge Jehovaba ǂgom tama da hâ hîna ra ǀkhae da. Hā re î da ǀnî aiǁgaude ǃhoaǃgao.

11. Jehovaba mati Mariasa ge ǂanǃgâ?

¹¹ Elob ǀGôab nî ǃnaehe ǁaeb aib ge Jehovaba ǃgamǃgamsen hâ ǂkhamkhoesa ge ǁhûi. ǁÎs ge a Maria, ǀō-aisa ǀgôab di ǁgûsa. Marias ge ǀgâsa ǃās Nasarets ǃnâ gere hâ, kaise ǃnūse Jerusalems tsî kai tempeli tsîna xu. (Khomai re Lukab 1:26-33.) Mariasa tae-i ǃaroma nē aiǂhanub ǃgao ge ǁhûihe? ǁÎs ge ǀhomǃgāb Gabrieli xa ge mîbahe “ǀkhomas go Elob tawa hō”  ǃkhaisa. Marias ge ǁîs gagasiba ge ǁgau egas ge Elisabets ǀkha a ǃhoa o. (Luk. 1:46-55) Ama as ge Jehovab ge Mariasa ǃgaoǃgâxase gere kō. Tsîb ge ǁîsa ǃâubasen tamas hâ hîna nē aiǂhanuba ge mā, ǁîs ǂgomǂgomsasib ǃgao.

12, 13. Jesuba tae-i ǂanǃgâsa ge hō tsî mâǁaeb ge tempela ǃoa ī ūhe?

¹² Jesub ge ǃnaehe o, ob ge Jehovaba ǀnî hâ ǂanǂansa khoe-e ge mîba tama hâ i tae-i ge Betlehems ǃnâ a īsa. ǀHomǃgāgu ge ǀgâsa gūre-aogu aiǃâ ge ǂhai hîna ge Betlehems ǃgauga ǁîgu di gūna gere kōǃgâga. (Luk. 2:8-14) Nē gūre-aogu ge nē ǀgôaroba ge sari. (Luk. 2:15-17) Marias tsî Joseb tsîn ge ǀnîsi kaise ge buru Jesub ge nēti i ǀgaub ǃnâ a ǂanǃgâhe o. Jehovab xūna ra dī ǀgaub tsî ǁGâuab xūna ra dī ǀgaub tsîn ge a ǃkharagagu. ǁGâuab ge gā-ai khoega ge sî îb Jesub tsî ǁîb ǁgûra tsîna ǁîgu xa sarihe. Jesub ge ǃnaehe ǂhôas ge hoa khoen hîna Jerusalems ǃnâ hâna ge ǁaixa kai. (Mat. 2:3) Jesub di ǃnaes ǂhôas ge ge ǃaroma în ǂgui ǀhapio ǀgôana ǃgamhe.—Mat. 2:16.

¹³ Hakadisi tsēde Jesub ǃnaes khaoǃgâs ge Mariasa Jehovaba tempeli tawa sī ǁguiba-e ge mā Jerusalems ǃnâ. Tempeli ge ǁaubexa 9 km de Betlehemsa xu ge ǃnū i. (Luk. 2:22-24) Marias, Joseb tsî Jesub tsîn tempela ǃoa garu hînas ge ǀnîsi gere ǂâi prister ga Jesub di ǀō-aisa ǃâba hānîǁaeb disa ǂanǃgâ îgu nî. Jesub ǂanǃgâhes ge ega ge hā, xawe Marias ge ǂâi hâ i ǀgaub ǃnâs ose. Jehovab ge “ǂhauǃnâ tsî eloǃaoǃgâxa” aob Simeoni tsî ǁîb taras hîna ge 84 kurixa i kēbo-aos Annas ǃnâ-ū ǁîb ǀgôaba ge ǂanǃgâ mîmâisa Mesiab tamas ka io Xristub ase.—Luk. 2:25-38.

14. Mariasa tae-i ǀkhaeba Jehovaba xu ge ǃkhōǃoa?

¹⁴ O Marias? Jehovaba ǁîsa noxoba gere ǂanǃgâ ǂgomǂgomsases ge ǁîb ǀGôaba a kaikai o? Î, ǁnāsab ge ge dī. Elob ge ǁîs dīgu tsî mîdi tsîna Elobmîs ǃnâ ge xoamâi. Marias ge Jesub ǀkha aoǁnâ sîsenni ǃnâ ǀguiba ge sîsen tama hâ i. ǃOataras ases ge Mariasa ǀnîsi Nasarets ǃnâ ge hâ i. ǁÎs ge ǀnî aiǂhanuga a ǂoaǃnâ xawes ge Jesub di ǁōb tsēs ai ǁîb ǀkha ǀguiba ge hâ i. (Jhn. 19:26) Marias ge ega nau ǁkhāǁkhāsabegu ǀkha Jerusalems tawa ge hâ i, ǃanu gagab ge a ǁhōǂuihe o pinkstertsēs ai. (ǃNǃkh. 1:13, 14) ǁÎs tsîn ge ǃanu gagab ǀkha ge ǂkhauhe naun ǀkha ǀguiba. Nēsis ge ǃēsa ūhâ ǀhommi ǃnâ sī Jesub ǀkha ǀamosib kōse hâsa. ǁNā ǂanǃgâs ge kaise a buruburuxa ǂgomǂgomsa ǃoabas ǃgao.

15. Jehovaba mati ǁîb ǀGôaba ǃhūbaib aib ge hâ io ge ǂanǃgâ?

¹⁵ Jesub ge ǂgomdi tsî ǂgīǂgōsi ǂgaeǂgui-aogu xa ǂanǃgâhesa ge tura tama hâ i. Xawe matikōseb ge ǂkhâǃnâhe hâse tsâ Jehovab ge ǃnona ǁaxasigu ai ǀhomma xu ǁîb ǀkha a ǃhoa o. Jesub di ǁāǁnâs Jordanǃāb tawab ge Jehovaba ge mî: “Nēb ge ti ǀgôab, ǀnam ta aba, ǃgâiǃgâibasensa ta ūǃnâ hâba.” (Mat. 3:17) Johaneb ǁĀǁnâ-aob ǀguib ge ǁnā mîde ge a ǁnâu. Jesub ǁōb aiǃâ gu ge ǃnona apostelga Jehovab domma  ge ǁnâu mî rase: “Nēb ge ti ǀnamǀnamsa ǀGôab, ǃgâiǃgâibasensa ta ūǃnâ hâba; ǁîba ǁnâu!” (Mat. 17:5) Tsî ǀams aib ge Jehovaba ǁîb ǀgôab ǀkha ge ǃhoa ǀhomma xu ǁōb nîs aiǃâ.—Jhn. 12:28.

16, 17. Jehovaba mati Jesuba ǃâubasen tamab hâ ǂanǃgâsa ge mā?

¹⁶ Jesub ge ge ǂan i taotaosaseb nî ǁō ǃkhaisa tsî nî ǀhapiǂgā-amhesa ǃkhāǃkhā-aob ase. Xaweb ge ge ǀgore îs Jehovab ǂâisa dīhe, ǁîb dis ose. (Mat. 26:39, 42) “ǃGâuhaiba ge tsâb, taosiba ǃgôa tama i” tsî ǁîb ǂanǃgâsiba ge ôa tama hâ i, nē ǃhūbaiba xu. Xawe ǁîb ǁGûb ǂanǃgâsiba gere ôa. (Heb. 12:2) Jehovaba mati ǁnā ǂanǃgâsiba ge a ǁgau?

¹⁷ ǃHūbaib aib ge Jesuba hâ io, ob ge ǁîb ǁGûb ǀkhab ge ǀhommi ǃnâ ūhâ i ǂkhaisiba ge tura. (Jhn. 17:5) ǀNî ǃkhai-i tawa i ge xoasa tama hâ ǁîb gere ǀnî hâ xū-e turasa. Xawe ǁîb ge ǀnî hâ “ǀgapiǀgapihesa” ǀhommi ǃnâ ge ǃâubasen tama hâ i. Xawe Jehovaba tae-e ge dī? Jehovab ge Jesuba ǁîb ǃâubasen tama hâ ǂanǃgâsa khâis ǃnâ-ū ge mā ‘kaise ge ǀgapi’ īsa. ǁÎb ge ǁkhawa ǁō tide gagasi ûiba ge māhe ǀamosib kōse. * (Fil. 2:9; 1Tim. 6:16) ǁNās ge kaise ǂoaǂamsa ǂanǃgâsa Jesub ǂgomǂgomsa ǃoabas ǃgao.

18. Tae-e nî hui da î da ǃhūbaib ǂanǃgâsiba xu ǂgōsen?

¹⁸ Tae-e nî hui da î da ǃhūbaib ǂanǃgâsiba xu ǂgōsen? ǂÂis ǃnâ ūhâ re Jehovab hoaǁae ǁîb di ǂgomǂgomsa ǃoaba-aona ra ǂanǃgâ ǃkhaisa ǃâubasen taman hâ hîna. Ham-e a ǂan mâ ǃâubasen tama da hâ ǀkhaega da hānîǁaeb ǃnâ nî ǃkhōǃoa ǃkhaisa? Xawe nēsis ǃaroma da noxoba ǃgomsin tsî ǃâitsâgu nē ǃhūbaib dina ra hōǃâ hîna da ge nî mâǀgai. Nē ǃhūbaib ra mā ǂanǃgâs ge nî ǃgû-ī. (1Jhn. 2:17) Sida ǀnamxaǃnâ ǁGûb Jehovab ge ‘ǂhanuoǃnâ tama hâ tsî sida sîsenni tsî ǀnammi tsîna ǀuru tide, ǁîb ǀons ǃnâ da ge ǁgauba.’ (Heb. 6:10) Ama as ge ǁîb ge nî ǂanǃgâ da, ǂgom tama da hâ ǀgaugu ǃnâ.