NĒ ǂkhanidi ge reënboog ǂkhanidi di ge re ǂgaihe. ǁÎde ta ge ôaǃnâ o, o ta ge ǂhâǂhâsa ǂkhōde ge mû hîna ge ti ǂâisa a ǁkhowa-amde. ǂKhamsisa xu ta ge Elobmîs amaba ge ǀnam, nē amab ge ǁnā ǂkhanidi ǃnâ gere hō-e.

ǀGamǁî ǃhūbaib torob ge Indiaba gere ǃnamiǂgā ǂgao. Ti ûib ge ǁnās xa ǃaromahe hâse gere ǁgaiǂoa. Ti ǁgûra ge hâ ǀgora tsî ǁnāpaxū ge a ǃgame khôa. Tita ge ge ǁnâuǃā tama hâ i, tae-i ǃaroma ra ǀgam khoe ra hîna ta a ǀnam ra nî ǀgora ǃkhaisa. ǂKhabuǂâi tsî ta ge ā xuhe hâ xū-i khami gere tsâ. ǀGuri ta ge ǀgôa-i amaga ta ge ǂhâba ta hâ ǁkhaeǂgaos tsî ǂkhâǃnâs tsîna ge hō tama hâ i.

Tita tsî ti ǁgûs tsîn ge Karachi di ǀon hâ kaiǃās ǃnâ ǀguiba gere hâ. ǀGui tsēb ge Fred Hardaker di ǀon hâ kaira ǀaeǃkhō-aob hîna ge Jehovab di ǀHûǀguitimî-aon di ǀgui-iba sim oms tawa ge sī. ǁÎb ge ǁnā sîsabeb hîna ge ti omarisa ǂkhanina a māb ǂgoms ǃnâ ge hâ i. ǁÎb ge ti ǁgûsa Elobmîsa gere ǁkhāǁkhā. Ti ǁgûs ge ge mî ǁîs ǂgao tama hâ di. Xaweb ǃgâsab  Hardakera tita Elobmîsa sao ra wekhe ge ǁkhāǁkhā tsoatsoa.

Ega ta ge Xristeǁîn ǀhaode ǃgâsab Hardakeri di ǀaeǃkhō ǃkhaib tawa ge hâǃnâ tsoatsoa. ǁAubexan ge 12 kaira ǃgâsana ǁnāpa gere ǀhao ǃoabas ǃaroma. ǁÎn ge tita gere ǁkhaeǂgao tsî gere kōǃgâ ǁîn ǀgôab ase. ǃAmkuse ta ge ra ǂâi-oa matin ge ti xōǀkhā gere ǂnûsa tsîn ge ama ǀhōsa-i khami tita ǀkha gere ǃhoasa. ǁNāsa ta ge kaise ge ǂhâ hâ i ǁnā ǁaeb ai.

ǃGâsab Hardakeri ge tita ge ǁkhau î ta ǁîb ǀkha aoǁnâ sîsenni ǃnâ ǁhao. ǁÎb ge ge ǁkhāǁkhā te mati ta fonograafa nî sîsen-ū ǀgauba î kom ǃkhōǁnâdi hîna Elobmîs ǃhoade ǃkhōǂgā hâde ǀhuru. ǀNî ǃhoadi ge kaise ge ǃoa i tsî ǀnî khoen ge nēs xa ge ǃgâibahe tama hâ i. Xawe ta ge kaise ge ǁkhoaxabahe i ǀnî khoena aoǁnâbasa. Kaise ta ge Elobmîs amaba ge ôasaba i tsî ge ǀnam i nēs xa khoena mîbasa.

Japani armis ge Indiaba gere ǀgū khamib ge Englandi ǂhanuba kai ǁgâiba Jehovab di ǀHûǀguitimî-aon ai gere sîsenǂui. ǀAms aib ge ǁnā ǁgâiba tita Julib 1943ǁî kurib ǃnâ ge tsâǀkhā. Skoli danab hîna ge Anglican ǂgoms di ǁkhāǁkhā-ao-ib ge tita skola xu ge ǃhae “ǃgâi tama ǀgaub ǃnâ ta ra tanisen ǃkhais ǃgao.” ǁÎb ge ti ǁgûsa ge mîba Jehovab di ǀHûǀguitimî-aon ǀkha ta ra hâǀhao ǃkhais ge ǃgâi aiǁgaus ase nau ǀgôana ge ība tama hâ i. ǁÎs ge ge ǁaixa tsî ge ǂkhā te î ta tā Jehovab di ǀHûǀguitimî-aon ǀkha hâǀhao. ǁÎs ge ega ti ǁgûb ǃoa ge sî te hîna ge Peshawar di ǀon hâ ǃās ǃnâ ǁan hâ îba. Nē ǃās ge 1 370 km ga ge ǃnū i ti ǁgûs ǃāsa xu. Gagasi ǂû-e ta ge ge hō tama hâ i tsî ge ǀhûǀhao tama hâ i tsî ǁnās ǀkha gagasise ge ǂkhabu.

1947ǁÎ kuri ta ge Karachis ǃoa ge oa sîsen-e sī ôas ǃgao. ǁNāpa ta hâ hîna ta ge ǀaeǃkhō-aob Hardakera ge sari. ǁÎb ge kaise ǃgâise ge ǁkhoreǁhare te.

“Tae-e ra ǂhani tsi?” dib ge ge dî te, ǁîb ge ǀnîsi ge ǂâi hâ i ǀaeǃkhōhes ǃgao ta ra ôa bi di.

“ǀAeǃkhō-ao ǀaesen tama ta ge hâ,” di ta ge ge ǃeream bi. “Tita ge gagasise ǀaesen hâ. Elobmîs ǁkhāǁkhāsa ta ge ǂhâ hâ.”

“Mâǁaets ra tsoatsoa ǂgao?” dib ge ge dî.

“Ī ǁkhā i ga ra o nēsi,” di ta ge ge ǃeream bi.

Kaise ǁkhoaxase kom ge ǁnā ǃuia Elobmîsa ge ôaǃnâ. Kaise ta ge ǃgâise gere tsâ Jehovab khoen ǀkha ǁkhawa ǀhûǀhaosa. Ti ǁgûs ge kaise ǃgarise gere dītsâ tita ǂkhāsa î ta tā Jehovab khoen ǀkha ǀhûǀhao. Xawe nē ǃnās ai ta ge ge mîbasen î ta amaba ti ûib ǃnâ ûiǂui. Augustub 31, 1947ǁî kurib ǃnâ ta ge Jehovab ai māǁnâsen tsî ge ǁāǁnâ kaisen. Kaise ǃhae ǁaeb ǃnâ ta ge 17 kurixa ta a hîna ge aimâba-ao kai.

Ti ǂguro ǁgaumâis aimâba-ao-i ases ge Quetta di ǀon hâ ǃās ǃnâ ge hâ i, Britse ǀoro armi ǃkhais tawa. 1947ǁÎ kurib ǃnâb ge nē ǃhūba Indiab tsî Pakistani tsîn ǃnâ ge ǀgorahe. * Nēs ge ǃhūbǂhawase ǂgomdi ǂkhabadība ge ǃaroma khoen ǁaegu. Nēs ge kaise kai ǃgôab khoena ge ǃhūsabe kai. ǁAubexa 14 miliun khoen ge ge ǃhūsabe kai tsî hâǃkhai-e ge ūhâ tama hâ i. Muslim khoen hîna ge Indiab ǃnâ ǁan hâ în ge Pakistani ǃoa ge ī. Tsî Hindun tsî Sikhs khoen tsîn ge Indiaba ǃoa ge ī. ǁNā ǀhomab ǃgâ-ai ta ge kaise khoen xa ǀoahe hâ treinsa ge ū Karachis ǃnâ. Tsî ta ge treins ǃauga mâ ǀurib ai ge ǃkhōbasen Quettas kōse.

Quettas ǃnâ ta ge ǀō-aisa aimâba-aob George Singhsi hîna ge 20 kurixa îba ge ǀhao-ū. Nē ǃgâsab ge ǀurihāba ge mā te î ta ǃnari ǁkhā ǃhomxa ǀkharib ǃnâ. ǃNāsa ǁaeba ta ge ǀguri gere aoǁnâ. ǃNani ǁkhâgu ǃnâ ta ge 17 khoena Elobmîsa gere ǁkhāǁkhā tsî ǀnîn ge amab ǃnâ ge ǂgâxa. Sadiq Masih ge ge ǁîn di ǀgui-i hîna ge toroǃkham-ao ība. ǁÎb ge George di ǀon hâ ǃgâsab tsî tita tsîna ge hui î kom Urdu gowab ǃnâ Elobmîs ai a ǃgaoǃgaosa ǂkhanina ǂnûiǃkhuni. Sadiq di ǀon hâ ǃgâsab ge ǁaeb tsîn ǃkharu tama hâ hîna ôasase ǃgâiǂhôasa gere aoǁnâ.

Ega ta ge Karachis ǃoa ge oa tsî Henry Finch tsî Harry Forresti tsîn ǀkha sī gere sîsenǀhao. Nē ǃgâsa kha ge Gilead skola xu gere hā. ǁÎkha ge kaise ǃgâi elosi ǁkhāǁkhās ǃnâ ge huiǃnâ te. ǀGui ǃnā i ai ta ge  ǃgâsab Henrieb ǀkha Pakistani ǀapas ǃnâ sī gere aoǁnâ. Kaise kai ǀhomma gu ai kom ge ǃgamǃgamsenxa Urdu gowaba ra ǃhoa khoen hîna Elobmîs amab ǃnâ ǃgâiǃgâibasensa ūhâna ge ǀhao-ū. ǀGam kuriga ǃkharu hâse ta ge tita tsîna Gilead skola ge hâǃnâ. ǃNarimâra mûǂam-aob ase ta ge Pakistani ǃnâ ǁaerob ǀgaiba ge ǁgaumâihe. Lahore di ǀon hâ ǃās ǃnâ ta ge sîsaben ommi tawa gere hâ ǃnona ǃgâsagu ǀkha.

Kaise tsûtsûsa xū-i ge 1954ǁî kuri Lahore sîsaben ǀkha ge ī, ǁîn ge ge ǁnâugu tama hâ i. Nēs ge ge ǃaroma is ǁnâugu berosa ǀnîna, ǀnî hâ ǁgaumâide mā. Tita ge nē ǂnoagu di ǃnâ ǀkhā-e a ū ǃkhais ǃgao ta ge kaise ǀgaisase ge ǁnama-e. Khôahe hâse ta ge ge tsâ tsî gere ǂâi gagasise ta a ǂkhabusa di. Karachis ǃoa ta ge ge oa tsî ǁnāpaxū Londona ǃoa ge ī, î ta gagasise sī ǁkhawa ǃgâise tsoatsoa ǁkhā.

Londoni ǃnâ i ge ti ǀhaohâb ǃnâ ǃnāsa ǃgâsana ge Betels omaris ǁani i. Pryce Hughes di ǀon hâ ǃgâsab hîna ge ǁnâub beros tawa gere sîsenni ge tita ǃgâi ǀgaub ǃnâ ge hui. ǀGui tsēb ge ge mîba te matib ge kaise ǀgaisase Joseph F. Rutherfordi xa a ǁnamahe ǃkhaisa. Nē ǃgâsab ge ǃhūbaib ǂhawase gere dīhe aoǁnâ sîsenni di mûǂam-ao ge ība. ǃGâsab Hughesi gere ǁkhaubasen ǂgao o, ob ge ǃgâsab Rutherforda ǀgaisase ge ǁgau-oa bi. ǃGâsab Hughesi ge nē ǃnaeǃkhaisab ra mîba te hîna gere ǀnom. ǁÎb ge ge mî nē ǃnaeǃkhais ge ǂguro kaise ge ǂkhîoǃnâ kai bi. Xaweb ge ge ǂanǃgâ ǁîb ǀgaisase ǁnamahesa ǂhâ hâsa, nēs ge ge Jehovab di ǀnammi ǁgâiǂuisen ī. (Heb. 12:6) ǁÎb mîdi ge ti ǂgaoba ge tsâǀkhā, ǁîb ge ge hui te î ta ǁkhawa ǃgâiaǂgaob ǀkha ǃoaba tsoatsoa.

Ti ǁgûs ge Londoni ǃoa ge ī tsî Elobmîs ǁkhāǁkhāsa ge ūǃoa ǃgâsab John E. Barra xu. Nē ǃgâsab ge ega ge ǂGaeǂguira soros di ǁani kai. Ti ǁgûs ge kaise ǃhaese ge aiǃgû tsî 1957ǁî kurib ǃnâ ge ǁāǁnâhe. Ega ta ge ge mîbahe ti ǁgûb tsîn ge ǁōb nîs aiǃâ Elobmîsa Jehovab di ǀHûǀguitimî-aon xa gere ǁkhāǁkhāhe ǃkhaisa.

1958ǁÎ kuri ta ge Lene di ǀon hâ ǃgâsasa ge ǃgame Danmarka xu Londoni ǃnâ gere ǁansa. Sao ra kurim ge Jane di ǀon hâ ǀgui ǀgôas ǀkha ge ǀkhaehe, ǁîs ge a ǂguro sim koro ǀgôana xu. Tita tsîn ge Fulham ǀhaohâb ǃnâ aiǂhanuba ge ǃkhōǃoa. Lenes di ǂkhabusa ǂurusib ge ge ǃaroma î da ǀgamsa ǂoa mâsiba ūhâ ǃkhai-e ǃoa doe. 1967ǁÎ kuri da ge Adelaide di ǀon hâ ǃāsa ǃoa ge doe Australiab ǃnâ.

Adelaides ǀhaohâb ǃnân ge 12 ǂhauhesa ǃgâsana ge hâ i. ǁÎn ge ôasase aoǁnâ sîsenni ǃnâ gere ǁhao. Sida gagasi ǁaxasib ge kaise ge ǃgâi i.

 1979ǁÎ kurim ge sim ti koroǁî ǀgôab Daniel di ǀon hâba ge hō. Danieli ge sorosi ǃnubusiba ge ūhâ i * tsî i ge ge ǃâubasen-e tama hâ i gaxuseb nî ûi ǃkhaisa. Nēsis tsîna ta ge a ǁguiǃā ǁoa tsûaǂgaob hîna ta gere hōǃâba. Hoanam ge gere dītsâ ǁîba kōǃgâsa. Nau haka ǀgôana ǁnāxūǂui tama hâse. ǀNî ǁaeb aib ge Daniela ge ǂhoa ǀomǂgāb nî ǂoa-eb ge ūhâ tama hâ i ǃkhais ǃgao. Nēs ge ǁîb ǂgaob ǃnâb ge ūhâ i ǀgam āra xa gere ǃaromahe. Tsî da ge hospitalsa ǃoa ge ī-ū bi. ǁÎb ǂkhabusa ǂurusib ǃgâ-aib ge ge gā-ai i tsî kaise ge îsa i. ǁÎb ge gagasi xūn tsîna ge ǀnam i. Omarise da ge ǂû da nîs aiǃâ gere ǀgore o, ob ge ǁîb ti ǃomra ǃgarise gere ǃkhōǀhao, ǁîb danasa gongon tsî ǂgaoba xu “Amen” di gere mî. ǁNās khaoǃgâ ǀguib ge gere ǂû.

Danieli ge haka kurixa o, ob ge ǀaob ǃnâ hâ kankersa ge hō. Sîm ge sorosise tsî ǂgaob ǃnâs tsîna ge tsau hâ i. Tita ge gere tsâ ǂâiǂhansendi nî ǃkhōǂgā te di. Kaisem ge ǂkhabuǂâi hâ i tsēs aib ge sida ǃnarimâra mûǂam-aob Neville Bromwichsa ge sari mi. ǁGamroxa mûdi ǀkhab ge ge ǃkhōǂgā mi. Hoa da ge ge ā. ǁÎb di ǀnamxaǃnâ ǀkhommi tsî ǁkhaeǂgao mîdi ge ǀnōhe ǁoa. ǁÎb ge ǁgoas 1 kamab ai ǀgui ge oa. ǁNās khaoǃgâb ge Daniela ge ǁō. Daniela ǁōb ǃnâ ǂoaǃnâs ge kaise ge tsûtsûsa i sida ûib ǃnâ. Sida ǃoaba da ge ge tani, ǁkhoaǂgaosib ǀkha, ǂan da a amaga Danieli Jehovab ǀnamma xu ǀgorahe tamasa. (Rom. 8:38, 39) Kaise da ge ra ǁkhore ǁîba Jehovab ǀasa ǃhūbaib ǃnâ sī mûsa khâisab ga ra hō o.​—Jhn. 5:28, 29.

Nētsē ta ge ǀgam kai stroke ga ge ûiǃkharu tsî noxoba ǀhaohâb ǃûi-aose ra hui. Tita ge ûib ǃnâ a hōǃâ xūn ge ǀkhomxaǂgaosiba nau khoena ǁgausa tita ǃnâ ge omkhâi. Tita ge ra dītsâ î ta tā khoena ǀgoraǃgâ. Xawe ta ge ra dîsen: ‘Matib ge ǁîn khaoǃhūba ǁîn ǂgaob tsî ǂâi ǀgaub tsîna tsâǀkhā? Mati ta a ǁgau ǁkhā ǁîn ǀkha ta ǁae hâsa? Mati ta ǁîna a ǂkhâǃnâ ǁkhā în Jehovab ǀgauga sao?’ ǃGâsana saris xa ta ge a ǃgâibahe. Ama as ge ǁîna ta ga gagasise ǁkhaeǂgao tsî khoakhoa o, o ta ge tita tsîna aitsama ra ǁkhaeǂgaosen tsî khoakhoasen.

Psalmdi xoa-aob khami ta ge ra tsâ, mîb ge o: “Ti ǂâidi ge ti ǃnâ ǂguio, o di ge sa ǁkhaeǂgaode ti ǀomsa ge khoakhoa.” (Psa. 94:19) Jehovab ge ǂgomdi ǁgâiǀāb, khoexaǃnâ ǂkhîoǃnâsib, ǂkhabuǂâis tsî ti ǃgomsin hoan ǃnâ ge huiǂui te. Amabes ǃnâb ge Jehovaba ǁGûb ase ge ība te ī.