1. Tae-i !aroma da ra !gâiaǂgao?

KAISE da ge ra ǂkhî mûsa matin Jehovab !oaba-aona ra |arosen |gauba. ǂOa goro kurib !nâ i ge 10 miliuns xa a !nāsa khoena Elobmîsa gere ǁkhāǁkhā-e. Nēs ra ǁgaus ge Elob !oaba-aon ǁîn !nâba ra !nâ kaisa. Tsî ǂgui khoen hîna da ge Jesub ǁōb ǂÂiǂâisensa !oa a ǁkhaun xas tsîna ǂâi re. ǁÎn ge Elob ge xoremarib ǁguibas !nâ-ū a ǁgau kai |nammi xas tsîna ge ǁkhāǁkhāsen.​—1Jhn. 4:9.

2, 3. (a) Tae-e sida |gui!nâxasiba a ǁkhae ǁoa !hūbaib di “ǃnân ase  . . ǃnâsa”? (b) Mateub 5:14-16 !oagu da tae-e nî !hoa!gao?

² Jehovab !oaba-aon ge !hūbaib ǂhawase !kharaga!nâgu gowaga ra !hoa. Xawes ge nēsa ǁîna |gui!nâxasib !nâ Jehovaba !oabas !nâ |gora tama hâ. (J.ǂHa. 7:9) |Nî hâ ǁgûsi gowab tamas ka io da ra hâ!khais hoas ǂam-ai da ge “ǃhūbaib di ǃnân ase” ra ǃnâ ǂgao.​—Fil. 2:15.

³ !Oaba-aon ra |arosen |gaub, |guiǂnâxasib hîna da ra hō!âb tsî ǂkhaikarise hâs !nâ-ū da ge ra dītsâ Jehovaba ǂkhaisiba ǁgausa. Nē ǁkhāǁkhā!âs !nâ da ge nî ǁkhāǁkhāsen matin nēn hoana a ī ǁkhāsa.​—Khomai re Mateub 5:14-16.

4, 5. (a) Aoǁnâ sîsenni !nâ-ū da mati sida di !nâba a !nâ kai ǁkhā? (b) Mâ |khaena da sida di !gâi tanisen |gauga xu a hōǁkhā? (Tsoatsoas ǃnâ hâ ai-īsiba mû re.)

⁴ “Khoe-i ge ǁî-i di !nâba !nâsa î ga mā-amsen tama io Elob !oa-ai ǂhau!nâse hâ hō tide.” Di i ge “Light in the Darkness” di hâ xoa|goras hîna The Watch Tower Junib 1, 1925 dib !nâ a xoasasa ra mî. Nē xoa|goras ge ra ǁgui!ā: “ǁÎ-i ge nēsa khoena !hūbaib ǂhawase !gâiǂhôas xa aoǁnâbas !nâ-ū ra dī tsî ǁî-i tsîna ra nē !nâb di !â kai.” Aoǁnâ sîsenni tsî ǁkhāǁkhāsabedīs !nâ-ū |gui da ge sida !nâba ra !nâ kai. (Mat. 28:19, 20) Xawe da ge nēn hoan ǂam-ai sida tanisen |gaub !nâ-ū Jehovaba ǂkhaisiba ra mā. Aoǁnâs sisenni !nâ da ra |hao-ū khoen ge sida tanisen |gauga ra !gao!gâ. Sida |nom |gaub tsî mati da khoena ra tawede |gaub tsîn ge khoena nî ǂan kai, kaise ǃgâi Eloba da ra !oaba !khaisa.

⁵ “Tsî om-i !nâ go ga ǂgâ o khoena tawede re.” dib ge Jesuba ǁîb ǁkhāǁkhāsabega ge mîba. (Mat. 10:12) Jesub tsî ǁîb ǁkhāǁkhāsabegu tsîn gere aoǁnâ !ādi !nân ge khoena !haokhoena gere ǁkhauǂgā ǁîn omdi !nâ. Xawes ge ǁnāsa nētsē a ī ǁoa. Sida tanisen |gaub tsî khoexa!nâsib tsîn ge kaise a ǂhâǂhâsa. ǁNās !aroma da ge khoena sida ra sariba !aromasa nî mîba, nēs ǁîna nî tsaura kai amaga. Anusa |nom |gaub ge khoena !gâise nî tsâ kai. ǂGae mâ-e ra trollies tawa ra sîsen !gâsan ge nēs a ama !khaisa ge hō!â. ǂGae mâ-e ra trollies tawats ga sîsen o, ots nî mûǂans ge khoen ge !gâise ra tsâ ǁîn |kha |nom tsîts ga ǂhaisiba dî nî o. ǁNās ge ǁîna a ǂgae ǁkhā în sida ǂkhanina ū. Sa !gâi tanisen |gaub ge khoe-i |kha ǁgams |kha nî hui tsi.

6. Englandi !nâ hâ !gâsa ra mati ǁîra aoǁnâ sîsen-e ge khoraǂui?

⁶ Englandi !nâ hâ kaira !game hâ khoe-aogu ra ge |aeb xa omsa xu oms |kha a aoǁnâ ǁoa. Xawe ra ge ǁîra !nâba oms !auga ra !nâ kai. ǁÎra ge skoli xōǀkhā Elobmîs ai a !gao!gaosa ǂkhanina skoli ga ra ǂoa ǁaeb ai ra mâi. ǁNās ge kaise ǁgûn hîna ǁîn |gôana skola xu sī ra ūn !gao a !gâi. Tsîn ge ǁgûna Questions Young People Ask—Answers That Work, Volumes 1 tsî 2 tsîna !nāsase ra ǂgan. Tsîs ge ǁîn |haohâb !nâ aimâba-aose ra sîsen !gâsas tsîna ǁîra |kha |guiba ra sîsen. Nē !gâsas tsî !game hâ khoe-aogu ra tsîn di tanisen |gaub ge |nî ǁgûba ge ǂgae îb Elobmîs ǁkhāǁkhāsa ū!oa.

7. Tae-e a hui du ǁkhā |asase sadu !hūb !nâ sī hâ khoena aoǁnâbas !nâ?

⁷ !Kharu ge kurigu !nâ i ge ǂgui !hūga ǃhūsaben xa ge ǀoa. Tae-e du a dī ǁkhā î du nē khoena hui în Jehovab tsî ǁîb ǂâibasens xa ǂan? ǂGurose du aibe tae-i !aroma khoen di gowaba ǁkhāǁkhāsen tama hâba? Aiǁgause ǁîna tawedesa. JW Language appi ge a hui du ǁkhā nēsa dīsa. Tamas ka io du tae-i !aroma khoen hoa!nâ-aixase ǁîn gowab !nâ ra sîsen-ū mîde ǁkhāǁkhāsen tama hâba? Nēs !nâ-ū du ge |nîsi ǁîna jw.org’s !oa a ǁnaeǁgau ǁkhā în ǂgui!nâgu vidiogu tsî ǂkhanin tsîna ǁîn gowab !nâ mû.​—Deu. 10:19.

8, 9. (a) Mâ |apemāde da wekheb ǁaegub ǃnâ hâ ǀhaos tawa ra hō? (b) ǁGûna mati |gôana a hui ǁkhā în ǁîn !nâba !nâ kai?

⁸ Jehovab ge Sida Xristeǁî ûib tsî  aoǁnâ sîsenni |haosa ūhâs aiǂhanuba ge mā. Nē |haos ge ra hui da î da ǁkhoaǂgaose aoǁnâ ǁkhā. Nē |haos tawa da ra hō !gâi |apemādi ge ra hui da î da ǂgom!gâsens |kha khoena ǁkhawa sari tsî Elobmîs ǁkhāǁkhāsa ūhâ.

⁹ Sida |haodi tawa ǂguro !nāsa ra sī khoen ge |gôan |haodi !nâ ra ǁhao |gaub xa kaise ra buru. ǁGûdo sadu |gôana hui re în ǁîn !nâba !nâ kai aitsama |haodi !ereamde aiǂhomis !nâ-ū. ǁÎn di !gâi !ereamdi ge |asase |haodi tawa ra sī khoena kaise ra hui în nēb a amasa mûǂan.​—1Kor. 14:25.

10. Omaris !oabasa mati |gui!nâxasiba ra ai!gû kai?

¹⁰ |Nî hâ |gaub hîna da sida !nâba a !nâ kai ǁkhāb ge |gui!nâxasiba omaris tsî |haohâb tsîn !nâ ūhâsa. |Gui |gaub ǁgûn nēsa a dī ǁkhāb ge ǁaeba xu ǁaeb |kha omaris ǃoabasa ūhâsa. !Nāsa omaridi ge JW Broadcastingsa |guiba ra kō. Tae-i !aroma du JW Broadcastings khao!gâ ǁaeba ǁamaǂui tsî mâǂoa goro xūna !hoa!gao tama hâba? Omaris ǃoabasan ga ra ūhâ o, on ge ǁgûna ǂâis ǃnâ nî ūhâ ǂkhamkhoe-i ǂhâsib ge |gôaro-i ǂhâsib |kha |gui tama hâ. ǁKhā du as kōse dītsâ re î-i mâ omaris ǁani-i hoa-e nēsa xu |ama.​—Psa. 148:12, 13.

11-13. Mati du ǀguiǃnâxasiba a aiǃgû kai ǁkhā tsî mati du nau khoena a hui ǁkhā în ǁîn ǃnâba ǃnâ kai?

¹¹ ǂKhamkhoena mati |gui!nâxasiba |haohâb !nâ a ai!gû kai ǁkhā tsî nēs !nâ-ū mati nau khoena a hui ǁkhā? ǂKham Xristeǁîse du tae-i !aroma kaira !gâsan !nâ !gâi!gâibasensa ǁgau tama hâba? ǁÎna du ge ǀnîsi ǃgôasib ǃnâ a dî ǁkhā, mâ ǀkhaegan ge hōǃâsa Jehovaba ǀoasase ǃoabas ǃnâ-ū. Nēs xa du ge kaise a omkhâi-e ǁkhā. Tsîs ge nēsa sats tsî ǁîn tsîna a hui ǁkhā ǃnâba ǃnâ kais ǀkha. ǁNās ǀkha da ge hoa da nî dītsâ ǀasase sida ǀhaodi tawa ra hā khoena ǁkhoreǁharesa. Nēsa dīs ǃnâ-ū du ge ǀguiǃnâxasiba ra ǁgau tsî ǃhaokhoen tsîna a hui ǁkhā în ǁîn ǃnâba ǃnâ kai. Khoena du ge ǀgamsa ǀnoms ǀkha tawede tsî ǁîna ǂnû ǃkhais tsîna a mā ǁkhā. Tamas ka io ǁîna naun hîna ǀhaohâb  ǃnâ hân ai mai-aiǃâ re în ǁkhoreǁharehe hâse tsâ.

¹² ǁGaumâisats ga ra o aoǁnâ sîsenni ǀhaosa dīsa, o kaira ǃgâsana hui re aoǁnâ sîsenni ǃnâ. ǁÎna ǀhomaxa tama hâ ǂharis ǃnâ ra aoǁnâ? ǀNî ǁaeb ain ge ǁîna ǀnîsi ǂkhamkhoe-i ǀkha a sîsen ǁkhā în hui-e. ǁÎn hîna ǀaeb tamas ka io ǃnubusiga ūhân tsîna du ge ǁnâuǃāxa ǀgaub ǃnâ a hui ǁkhā. Sadu ga ǂkhaman, kairan, ǂansa ūhâ taman tsî ǂansa ūhân tsîn ǃnâ ǃgâiǃgâibasensa ga ra ǁgau o, o du ge ǁîna a hui ǁkhā în ǁkhoaǂgaose aiǃgû ǁîn ǃnâba ǃnâ kais ǃnâ.​—Lev. 19:32.

¹³ Psalmdiǁnae-aob ge ge mî: “Mû, matikōse i a ǃgâi tsî ǀnamǀnamsa, ǃgâsaga ǁkhāti ǀhû hâse ǁansa.” (Khomai re Psalmdi 133:1, 2.) Israelǁaes ge Jehovaba ra ǃoaba khoena xu ǂgui xūna gere ǀama. Nēs ge ǂkhauhesan ǃgao gere sîsen-ūhe oli-i hîna ra khoakhoa i ǀkha ge ǀgui-i. Tae-i ǃaroma du ǁgūtsâ tama hâba ǀguiǃnâxasiba ǃgâsan ǁaegu aiǃgû kais ǃnâ? Nēsa du ga ǀnai ga ra dī o, o du ge koahesa anu hâ. O sado a “haraharasen” ǁoa î du nēsa noxoba ǀoasase dī?​—2Kor. 6:11-13.

14. Tae-e da nî dī îb sida ǃnâba sida ǁanǁare-aon xa mûhe?

¹⁴ Mâ ǀgaub ǃnâ du Elobmîs amaba sadu ǁanǁare-aon ǃoagu a ǃnâ kai ǁkhā? Sadu ǃgâi mîdi tsî tanisen ǀgaub tsîn ge sadu ǁanǁare-aona amaba ǃoa a ǂgae ǁkhā. Dîsen re: ‘Ti ǁanǁare-aona tae ǃnôa khoese a ǂan te? Ti omsa ta ǃamkuse ra ūhâ tsî nēsa mati ti ǁanǁare-aona ra tsâǀkhā? ǂGurose ta aiǂhanuba ū tsî ti ǁanǁare-aona hoaǁae ra hui?’ Nau ǃgâsa-i ǀkha du ga ra ǃhoa o, o du tae-i ǃaroma ǁî-i di ǃgâi ǀgauga ôa tama hâba? Tsî ǁî-i tanisen ǀgaub ge mati ǁî-i omaris ǁanin, ǁanǁare-aon tsî sîsenǀhao-ū i ra khoe-e a tsâǀkhā ǀgaub xas tsîna dî tama hâba? ǃGâi xūn hîna ge īna da ge a ǁnâu ǁkhā.​—Efe. 5:9.

15. ǂKhaikari hâsa tae-i ǃaroma a ǂhâǂhâsa?

¹⁵ Sida tanisen ǀgaub ge kaise a ǂhâǂhâsa sida ǃnâba da ga ra ǃnâ kai ǂgao o. Jesub ge ǁîb ǁkhāǁkhāsabega hoaǁae gere mîba: “ǂKhaikari ǁnâi hâ” di. (Mat. 24:42; 25:13; 26:41) ‘Kai tsūǀkhāb’ [kai ǁgâiǀāb] ge noxoba a ǃnū tsî ǀgūǁae hā tide di da ga ra ǂâi o, o da ge aoǁnâ sîsenni ǂhâǂhâsasiba mû tide. (Mat. 24:21) ǁNāti i ga io, ob ge sida ǃnâba sida ǁanǁare-aon ǃoagu ǃgâise ǃnâ tide tsî nî ǃnâ ǀû.

16, 17. Tae-e da nî dī î da ǂkhaikari hâ?

¹⁶ Nē ǁaeb hîna da ûi ǃnâ hâb ra ǁgaiǂoa amaga da ge ǂkhaikari nî hâ. Jehovab ge ǂhanu ǁaeb ai ǀamsa nî ǀkhī-ū. ǁNās xa da ge ǂâiǂhansen tide. (Mat. 24:42-44) Xawe da ge nî ǃnūǃnâxa tsî hoaǁae ǂkhaikarise nî hâ. Elobmîsa da ge tsēs hoasa nî khomai tsî ǀgores ǃnâ nî hâhâ. (1Pet. 4:7) ǃGâsan aiǁgaude ǃgaoǃgâ re hîna ǁîn ûib ǃnâ ǂkhîba ra hōǃâna ǂkhaikari hâs ǃnâ tsî ǁîn ǃnâba noxoba ra ǃnâ kaina. ǀGui aiǁgaus ge The Watchtower ǂkhanib ǃnâ a xoasa Aprili 15, 2012, 18-21ǁî ǂhaweb ai tsî xoaǂams ge “Seventy Years of Holding On to the Skirt of a Jew” di hâ.

¹⁷ Sadu ûiba ǃgâi ǀhōsan tsî ǁkhoaxa ǁaxasib ǀkha omkhâi re. Nēs ge kai ǂkhîba nî mā du tsîb ge ǁaeba ǃhaese nî ǃkharu. (Efe. 5:16) ǂGui kurigu ǃkharu hâsen ge sida ǃgâsana sîsenni ǀkha ge ǀhape i tsî ǂgui xūna ge sīǃnâ. Xawe sida ge nētsē ǃnāsa xūna ra sīǃnâ Jehovab di  daoǁgaus ǀkha. Sida ǃnâb ge kaise ra ǃnâ ǂguro ǁaeb ǃgâsan di ǃnâb xa.

18, 19. ǀHaohâb ǃûi-aoga mati nî hui da î da ǂkhaikari hâ tsî aiǃgû? ǂKhō re.

¹⁸ Sida ǂgoms ge ra ǀgai Jehovaba da ǀoasa kurusa da ūhâ tama hâ xawe a ǃoaba ǁkhā ǃkhais ǃgao. Jehovab ge ‘khoega mādi’ ase ge mā ǁnāgu ge ǀhaohâb ǃûi-aoga tsî da ge ǁîga nî ǃgôaǃgâ. (Khomai re Efeseǁîn 4:8, 11, 12.) ǁKhawa î ga ǀhaohâb ǃûi-aoga ga ra sari du o, o ǁnā ǃēsa ū tsî ǁîgu gā-aisib tsî ǀapemādi tsîna xu ǃgâiǃō re.

¹⁹ ǀGam ǀhaohâb ǃûi-aokha ge Englandi ǃnâ khoe-aogu ra hîna ge ǃgomsiba ǃgameb ǃnâ ūhâ î ra ge sari. Taras ge gagasise ra ǃgaeǀhaohe hâ khami ge tsâ tama hâ i. Aob ge ra mî ǁîb ge ge ǃgâi ǁkhāǁkhā-ao tama hâ i tsî hoaǁae omaris ǃoabasa ge dī tama hâ i. Nē ǀhaohâb ǃûi-aokha ge nē khoe-aogu ra Jesub aiǁgaus xa ge ǂâi kai. Jesub ge ǁîb ǁkhāǁkhâsabega gere kōǃâ tsî ǁîgu ǂhâsigu ǀkha gere ǁaeǁaesen. ǀHaohâb ǃûi-aokha ge aoba ge ǂkhâǃnâ îb Jesuba ǁgae. Tsî tarasa ge huiǃnâ is ǃnūǃnâxa. ǁÎkha ge ǁîra ǀgauga ge ǁgau mati ra ǀguiba nî sîsensa îra omaris ǃoabasa ǁîra ǀgam ǀgôara ǀkha dī. (Efe. 5:21-29) Ega kha ge ǀhaohâb ǃûi-aokha aoba ge koa ǁgūtsâb ra amaga. ǁÎkha ge ǁîba ge ǂkhâǃnâ îb aiǃgû tsî Jehovab ǃanu gagab ai ǂgomaiǂnûi tsî ǃgâi gagasi dana kai. ǁÎkha ge nē omaris ǃnâ ūhâ i ǃgâiǃgâibasens tsî ǀnamǀnamxa ǂkhâǃnâs tsîn ge ǁîna ge hui în ǁîn ǃnâba ǃnâ kai.

20. Tae-e da nî ǃâubasen sida ǃnâba da ga ra ǃnâ kai o?

²⁰ “ǃGâiǃō i ge mâ-i hoa-i ǃKhūba ra ǃaoǃgâ-i, ǁîb di daogu ǃnâ ra ǃgû-e” dib ge psalmdiǁnae-aoba ra mî. (Psa. 128:1) Sadu ǃnâba du ge a ǃnâ kai ǁkhā khoena du ga ra hui o în Jehovaba ǃoaba tsî ǁguiǂgāsen re î du ǀguiǃnâxasiba aiǃgû kai. Tsî ǂkhaikari hâ re tsî sadu ǂkhîba ǂguiǂgui. Nau khoen ge sadu ǃgâi sîsenna nî mû tsî ǁnās ǀkha Jehovaba ǂkhaisiba nî mā.​—Mat. 5:16.