1, 2. (a) ǃHūbaiba mati ǀgoras ǃnâ ra ǁgao ǂoa? (b) Mâ ǃnona dîde ta nî ǃhoaǃgao?

SUID Europab ǃnâ hâ ǃgâsas ge ra mî: “ǁÎs ge ǂkhabadība ǂkhamsisa xu gere hōǃâ di.” Tsîs ge ra ǀaro “tita ge ǂgīǂgōsi xūn hîna ti ǃhūb ǃnâ ra īna ge mâxōǀkhā tama hâ i tsî ta ge ǁkhōǁkhōsa ǂâi ǀgauba ge omkhâi. Tsî ta ge ǂgui kuriga terroris khoeb ǀkha ge ǀhōsagu i.” ǃGâsab hîna Afrikab ǃkhapagas ǃnâ ra hâb hîna ge ǂkhabadība gere ǂkhâǃnâb ge ra mî: “Tita ge gere tsâ ti ǃhaos ge nau ǃhaodi xa a ǀgapi tsî ta ge ǁnās ǀkha ǂgīǂgōsi xūn ǃnâ ge ǁhao tsoatsoa.” ǁÎb ge ra ǀaro “sida ge gere ǁkhāǁkhā-e mati da sida mâǃoa-aon tsî sida ǃhaos khoen hîna ge ǀnî hâ ǃnande gere mâxōǀkhāna nî ǃgam ǀgausa.” Europab ǁaegu ǁan hâ ǃgâsas ge ra mî: “Tita ge ǀgorasa ge ūhâ i. Tsî ta ge ǁnās ǀkhā khoe-i hîna ge ǀnî hâ khōb īsib tamas ka io ǀnî hâ ǂgomsa xu gere hā-e ge ǃhui hâ i.”

² Khoen nētsē nē ǃhūbaib ǃnâ ra tanisen ǀgaub ge nē ǃnona khoen aiǁgaudi ǃnâ ra mûhe. ǂKhābadība ra ǂkhâǃnâ ǃnandi ge ra ǀgai, ǂgīǂgōsi ǀgoradi ge ǁnaetigu ase ī tsîn ge ǃhūsabena ǂgui ǃhūgu ǃnâ ǃhuihe hâ. Elobmîs ge ra mî khoen ge nē ǀuniga tsēdi ǃnâ nî “ǂkhîbaguoǃnâ.” (2Tim. 3:1, 3) Nē ǃhūbaib ǀgoras xa  ǀoa hâ xawen Xristeǁîna mati ǁîn ǀguiǃnâxasiba a ǁkhauba ǁkhā? ǂGuina da ge Jesub ge ǂguro ǃgôaǁaeb ǃnâ a hōǃâ mâsib hînan ge khoena ǂgīǂgōsi ǂkhîba ūhâ tama hâ îba xu a ǁkhāǁkhāsen ǁkhā. Hā re î da ǃnona ǃaromade ǃhoaǃgao: Jesuba tae-i ǃaroma ǂgīǂgōsi xūn ǃnâ ge ǁhao tama hâ îba? Jesuba mati ge ǁgau Elob ǃoaba-aon ǂgīǂgōsi xūn ǃnâ ǀkhā-e ū tidesa? Tsî Jesuba tae-e ge ǁkhāǁkhā da nau khoen ǃoagu ǂhanuoǃnâse ǂkhābadība sîsenǂuisa?

3, 4. (a) Jodeǁîna tae-e ge ǃâubasen hâ i Jesub tsēdi ǃnâ? (b) Tsî ǁîn ǂâi ǀgauba mati Jesub ǁkhāǁkhāsabega ge tsâǀkhā?

³ Jodeǁîn hînab ge Jesuba gere aoǁnâban ge Romeǁîn ǂhanuba xu gere ǃnora kaihe ǂgao. Jodeǁîn ǂgīǂgōsi ǂgaeǂgui-aogu tamas ka io Jodeǁîn ǂhanuba gere ǃkhamba khoen ge nē tanisen ǀgauba khoen ǃnâ gere omkhâi. ǃGâi tama ǂâi ǀgauba ūhâ khoen ge Judab Galileaǁîb di ǁkhāǁkhā ǀgauba gere sao. ǁÎb ge ǂgui khoena gere ǂgaeǂhapu ama tama mesiab ase. Jodeǁîn ǂhanub ǃnaeǃkhaidi xoa-aob ge Judab xa ra mî, “ǁîb ge khoega gere ǂkhâǃnâ îgu mâǃoa tsoatsoa tsîb ge ǁîba khoega ǂkhabusase gere mû Romeǁîn ǂhanuba gu ge ǃgôa hâ i amaga.” Tsîn ge Romeǁîna Judaba ge ǃgam. (ǃNǃkh. 5:37) Tsî ǀnî ǂgīǂgōsi ǂgaeǂgui-aogu ge ǁîgu ǂhâsib ǃaroma ǂkhābadība gere aiǃgû kai.

⁴ Nē ǃgâi tama ǂâi ǀgauba ūhâ khoen ge hâ i xawen ge ǀnî Jodeǁîna Mesiab di hāsa ge ǃâubasen hâ i. ǁÎn ge gere ǂâi Mesiab hā tsî ǁîna Romeǁîn ǂhanuba xu nî ǃnora kai di. (Luk. 2:38; 3:15) ǂGuin ge gere ǂgom Mesiab gaosiba nî ǂnûikhâi di Israeli ǃnâ. Tsîn ge ǂgui Jodeǁîn hîna ge ǀnî hâ ǃādi ǃnâ ǁan hâ îna ǁîn ǃhūba ǃoa ge oa hā. ǂÂi oa re Johaneb ǁĀǁnâ-aob ge Jesuba a dî dîs xa: “Satsa, hā nîtsa koma?” (Mat. 11:2, 3) Johaneb ge ǀnîsi gere ǂan ǂgao ǀnî hâb noxoba hā tsî Jodeǁîn ǃâubasensa nî dīǀoaǀoa di. ǀGam ǁkhāǁkhāsabe kha hîna ge Jesuba khâis khaoǃgâ Emaus daob ai a ǀhao-ū kha tsîn ge dīǀoaǀoahe ǁoa ǃâubasens Mesiab dīs xa gere ǃhoa. (Khomai re Lukab 24:21.) ǁNās khaoǃgâgu ge Jesub apostelga ge dî: “ǃKhūtse, nē ǁaeb aits kha Israelǁîna gaosiba ǁkhawa nî ūkhâiba?”​—ǃNǃkh. 1:6.

5. (a) Galileab khoena tae-i ǃaroma Jesuba gao-aose gere ǁgaumâi ǂgao? (b) Jesuba mati khoen ǂâi ǀgauba ge dawa?

⁵ Mesiab xa ge hâ i ǃâubasens ge ǀnîsi Galileab khoena ge ǁgari în Jesuba ǁÎn gao-aose ǁgaumâi ǂgao. Nēs xa ǂâi re Jesub ge ǀnîsi ǁîna ǃgâi ǂgaeǂgui-aose ga hâba hâ din ge gere tsâ: ǁÎb ge ge ǃgâi ǃhoa-ao-i, ǀaesen hâna gere ǂgauǂgau tsî khoen tsîna ǂâu hâ ǂûna gere mā. Jesub ge 5 000 khoenab ǂûma toa hâs khaoǃgâ ǁîn di tanisen ǀgauba ge mû. “Tsî Jesub ge ǂan io, hā tsîn nî ǃkhō bi ǃkhaisa, gao-aodī bin nîse, ob ge ǁkhawa ǃhommi ǃoa ge ǂgō, ǁîb ǀguiba ǀguri.” (Jhn. 6:10-15) Tsî sao re tsēs ai i ge Galileahurirob tawa khoen ǁkhoaǂgaosiba nē mâsib xa ge bē. Tsîb ge Jesuba nēs khaoǃgâ khoena ǁîb sîsenni mâsib xa ge mîba. ǁÎb ge ge hā îb khoen gagasi ǂhâsiba dīǀoaǀoa, ǃkhūsib ose. “Tā kā ra ǂû-i ǃaroma sîsen, î du ǁnā ǂû-i, ǀamo ûib kōse ra hâhâ-i Khoen Ôab nîra mā du-i ǃaroma sîsen” dib ge ǁîna ge mîba.​—Jhn. 6:25-27.

6. Jesuba mati ge ǂanǂan ǁîb ǂgīǂgōsi xūn ǃnâ ǃâ-e ūhâ tama hâ ǃkhaisa? (Tsoatsoas ǃnâ hâ ai-īsiba mû re.)

⁶ ǁÎb ǁōb khaoǃgâb ge Jesuba ge mû  ǁîb saosaben gere ǃâubasensa îb ǃhūbaib ai gaosiba ǁapoǁapo Jerusalems ǃnâ. ǁÎb ge ǁîn ǂâi ǀgauba ge dawa ǁîna maris di ǂkhōsa mîbas ǃnâ-ū. Nēs ge ge ǁgau Jesub hîna a “ǀgapiǃgôahesa khoeb” ǁaeroba nî īsa. (Luk. 19:11-13, 15) Jesub ge ǁîb ǀkhā-e ǁhûi tama hâ ǃkhaisa Romeǁî ǂamkhoega ge mîba. Pilatub ge Jesuba ge dî: “Satsa kha Jodeǁîn di gao-aotsa?” (Jhn. 18:33) Pilatub ge ǀnîsi gere ǃao Jesub ǂgīǂgōsib xūna nî ǀû kai ǃkhaisa, nēs ge Pilatuba kaise gere ǂâiǂhansen kai. Jesub ge ǃeream tsî ge mî: “Ti gaosib ge nē ǃhūbaiba xu hâ tama hâ.” (Jhn. 18:36) ǁÎb ge ǂgīǂgōsi xūn ǀkha ge ǁaeǁaesen tama hâ i, ǁîb Gaosib a ǀhommi di Gaosi amaga. Jesub ge Pilatuba ge mîba ǁîb sîsenni ǃhūbaib ai hâb ge ‘amabab nî ǃkhō-ambase’ hâ.​—Khomai re Johaneb 18:37.

7. Tae-i ǃaroma da ǂgīǂgōsi xūn ǃnâ ǁhao tide?

⁷ Sada ǁgaumâisa da ga ra ǁnâuǃā o Jesub ge ǁîb disa a ǁnâuǃā khami, o da ge sada tsîna xū-e dī tamase nē ǃhūbaib ǂgīǂgōsi xūn ǃnâ ǁhao tide. Nēs ge supu tide. “Khoen ge sida ǂharis ǃnâ ǁgai ǂoas ǀguisa ra dī,” dib ge ǀnî ǃnarimâra sari-aoba ra mî. “ǀGui ǃhaosa nau ǃhaos ǀgapise ūhâs ge nētsē a ǀgapi. Tsîn ge ǀnîna ra ǂâi ǃhūb ǃnorasasib ǁîn ûiba nî ǀkharaǀkhara di. Kai gangans ǃgâsana ǃoa hîna Xristeǁîn ǀguiǃnâxasib tsî ǃGâiǂhôasa aoǁnâs ǀkha ǁkhoaǂgaose ra aiǃgûna. Tsîn ge ǁîna Eloba ǃoa ra kō, ǁîb ǁîn ǃgomsina nî ǀam kaise.”

8. Khoena tae-i ǃgomsiga gere hōǃâ ǁgui-aimaris tawa î gere hā o?

⁸ ǂHanuoǃnâsib ge ǂgīǂgōsi xūna ra khâikhâi ǃnâ. Jesub ǁaeb ǃnâ î ge ǁgui-aimarisa kaise ge ǃgomsi i. Judab Galileaǁîb di mâǃoas ge Romeǁîn ǂhanub di ǁgui-aimaris di xoaǂgāsens xa ge ǃaromahe. ǁÎn hîna ge Jesuba a ǃgân ge gere ǂgaoǀkhāhe în ǁgui-aimarisa ǁîn ūhâ xūn ai mâtare, aiǁgause ǂharib tsî omdi ais tsîna. Xawe gu ge mariǃkhōǃoa-aoga nēsa ge ǃgom kai. Nē mariǃkhōǃoa-aogu ge kai marisa ra ǂgan xū-e ǁamaxū tsî ǁîga marisa gere ūbasen. Saxeub ge ge dana mariǃkhōǃoa-ao-i hîna ge Jerixos ǃnâ ǁan hâ îba. ǁÎb ge khoena xu mari-e gere ū tsî nēs ǃnâ-ū ge ǃkhū. (Luk. 19:2, 8) ǁÎb tanisen ǀgauban ge ǃnāsa khoena ǀnîsi ge ūhâ i.

9, 10. (a) Jesub khākhoena mati ǁîba ǂgīǂgōsi xūn ǃnâ gere ǂgā ǂgao? (b) Jesub di tanisen ǀgaub ǂgīǂgōsi xūn ǃoagub xa da tae-e ra ǁkhāǁkhāsen? (Tsoatsoas ǃnâ hâ ai-īsiba mû re.)

⁹ Jesub di mâǃoa-aon ge ge ǂhâba hâ i  îb Jesuba ǁgui-aimaris di ǁhōgu ǃnâ ǃâ-e ǁhûi. ‘ǁGui-aimaris’ ge ge ǃgomsi i ǁîs ge Romeǁîn ǂhanub ǃoagu maris ai gere māhe ǀgapi ǁgui-ai î amaga. (Khomai re Mateub 22:16-18.) Jodeǁîn ge nē ǁgui-ais xa ge ǃgâibahe tama hâ i. Nēs ge gere ǁgau ǁîn ge Romeǁî ǂhanuba gere ǃgôasa. “Herodeǁîgu” hîna ge nē ǁgui-aimarisa ǂgao tama hâ îgu ge ge ǂâi hâ i Jesub ga ǁîga nēsa xu ga ra hui o, ob ǁîba ǁore-aob ase nî mûhesa. Tsîb ga Jesuba mî hâ o nē ǁgui-aimaris ǂhâbasa tamasa ob ge ǁîba ǁîb saosabena ga ǂoaǃnâ hâ.

¹⁰ ǁNās ǀkhab ge Jesuba ǀkhā-e ū tamase ge hâ. ǁÎb ge ge mî: “Kaesara ǁnâi mā Kaesari di-e, tsî Eloba Elob di-e.” (Mat. 22:21) Tsî Jesub ge ge ǂan i mariǃkhōǃoa-aogu ǁaegu î ǂhanuoǃnâsiba hâsa. Xaweb ge ǁÎba ge mā-am tama hâ i îs nēsa ǁîba tā ǂhani, ǂhâǂhâsa sîsen-e xu. Nēs ge Elob Gaosib xa aoǁnâsa, ǁîb ǀguib khoesib ǃgomsiba nî ūbē amaga. Nēs ǀkhab ge ǁÎba ǁîb saosabena ǃgâi aiǁgau-e ge ǁnāxuba. Tsîn ge ǁîna nēs ǀkha ǂgīǂgōsi xūn ǃnâ ǃâ-e ū tama hâ nēsi î ga ǂhanuse ga ra mûsen xawe. Xristeǁîn ge Gaosib tsî ǁîb ǂhanu-aisib tsîna ra ôa. Nēsan ge hoase ǂgīǂgōsi xūn tamas ka io ǂhanuoǃnâsib xa ǃhoa tama îs ǃnâ-ū ra dī.​—Mat. 6:33.

11. ǀNî ǃgâsas aiǁgausa mâ re.

¹¹ ǃNāsa Jehovab di ǀHûǀguitimî-aon ge ge dītsâ în nē ǂgīǂgōsi xūn ǃnâ tā ǃâ-e ū. “ǃKharu ge ǃnaeǃkhaidi ǀgapi ǁkhāǁkhāsens khaoǃgâ ta ge ǃgâi tama ǂâi ǀgauba ge omkhâi tsoatsoa,” dis ge Groot Brittanjeb ǃnâ ra hâ ǃgâsasa ge mî. “ǂNūkhoen di ǃnorasasiba ta ge gere ǃkhamba ǂgao, ǃgâi tama ǀgaub ǃnâ da gere ǀgoraǃgâ-e amaga. Hoaǁae ta ge ǂkhabab ǃnâ gere dan xawe ta ge noxoba ǁaib xa ǀgui gere ǀoahe. Tita ge ge ǀū-i ǃhaoǃnâbe ǀgoras a tsūsa. Xawe ta ge Elobmîsa a ǁkhāǁkhāsen tsoatsoa o, o ta ge ge mûǂan nē tanisen ǀgauba ta ti ǂgaoba xu nî ūǂuisa. ǃUri ǃgâsas ǀkha ta ge Elobmîsa ge ǁkhāǁkhāsen tsoatsoa, ǁîs ge tita ge hui. Tsî ta ge nētsē Aimâba-aose ra sîsen ǃgommegowab ǀhaohâb ǃnâ. Tsî ta ge nēs ǀkha ǁkhā ta as kōse hoa ǃhaodi khoena ra ôa î ta Elobmîsa ǁkhāǁkhān.”

12. Jesuba tae-e ǁîb ǁkhāǁkhāsabega ge ǃkhâikhom?

¹² Jesub tsēdi ǃnâ î ge ǂgomdi tsî ǂgīǂgōsi xūn tsîna ǀguiba gere dīhe. Daily Life in Palestine at the Time of Christ di hâ ǂkhanis ge ra mî, “Jodeǁîn hîna ge ǂgomdi ǃoagu ǀgora-e hâ în ge ǂgīǂgōsi ǃnandi ǀgora ǀgaub ǀkha ge ǀgui i.” Jesub ge “ǁîga mîmā tsî ge mî: Kō, î ǂanbasen re Farisegu di ǀkhuruǀkhurupereb xa, tsî Herodeb di ǀkhuruǀkhurupereb xa.” (Mrk. 8:15) Herodeǁîgu ge Herodeb saosabena ǃoa ra ǁnaeǁgau. Tsî ǂgīǂgōsi xūn ǃoagu î ge Farisega Jodeǁîn ǃnorasasiba gere mâxōǀkhā. Mateub ǃGâiǂhôas ǂkhanis ge ra ǁgau Jesub ge Sadusegu xas tsîna gere ǃhoasa. ǁÎb ge ra mî ǁîgu ge ǁnā ǁaeb ǂgīǂgōsib mâsigu ǃnâ gere ǁhao di. ǃNāsa Sadusegu ge Romeǁîn di ǂhanub ǂgīǂgōsi xūn ǃnâ ǃâ-e ge ūhâ i. Tsîb ge Jesuba ǁîb ǁkhāǁkhāsabega ge ǃkhâikhom îgu tā nē Farisegu ǁkhāǁkhādi ǃnâ ǁhao tamas ka io mâxōǀkhā. (Mat. 16:6, 12) Nē ǁgamǀhaosab ge Jesuba khoen ge ǁîba gere gao-aose ǁgaumâi ǂgaos khaoǃgâ ǁîb ǁkhāǁkhāsabegu ǀkha ge ūhâ i.

13, 14. (a) Mâ ǀgaub ǃnân ǂgīǂgōsi xūn tsî ǂgomdi tsîna ǂkhabadība ra ǃaroma? (b) Tae-i ǃaroma i ǂhanuoǃnâsiba ǂkhābadība a ǀam kai ǁoa? (Tsoatsoas ǃnâ hâ ai-īsiba mû re.)

¹³ ǂGomdi tsî ǂgīǂgōsi xūn tsîn ga ra  ǀhao o, o i ge ǂkhabadība ra tsoatsoa. Jesub ge ǁîb ǁkhāǁkhāsabega ge mîba îgu tā ǀkhā-e ǁhûi. ǁNās ǃaromas tsîna gu ge ǁkhāǁkhā-aogu tsî Farisegu tsîna ge ǀape îgu Jesuba ǃgam. ǁÎgu ge ǁîba ǂgīǂgōsib tsî ǂgomdi ǀhomaǀhoma-aob ase ge mû. ǁÎgu ge ge mî: “ǁNāti ge ga ǁîba dī kaio, on ge hoana ǁîb ǃnâ nî ǂgom. O gu ge Romeǁîga hā, tsî nî ǃhūb tsî ǁaes tsîna sage ūǀhana.”(Jhn. 11:48) Tsîb ge ǀgapipristeri Kajafaba Jesuba ǃgamsa ge ǀape.​—Jhn. 11:49-53; 18:14.

¹⁴ Kajafab ge soldaga ge sî îgu Jesuba ǃuia sī ǃkhō. Jesub ge ge ǂan i nē ǃnaeǃkhais nî īsa ǁnās ǀkhab ge ǂûgu nîs aiǃâ ǁîb apostelga ge ǂgan îgu gôaga ū sao. Nē ǀgam gôaga ge ǁîga ǂhâǂhâsa xū-e ge ǁkhāǁkhā. (Luk. 22:36-38) Tsîb ge Petruba ǁnā ǃui gôaba ǀkha soldagu di ǀguiba ge ǁnāǂam. ǁÎb ge nēsa ǁaixab ge hâ i amaga ge dī, Jesub ge ǂhanuoǃnâse a ǃkhōhe ǃkhais ǃaroma. (Jhn. 18:10) ǁNās ǀkhab ge Jesuba Petruba ge mîba: “ǂGā-oa sa gôaba ǁîb di ǃkhais ǃnâ; gôaba ra ū-i hoa-i gôab ǀkha nî hîǀhuruhe xuige.” (Mat. 26:52, 53) Nē ǁaxasib ge Jesub ge ǁnā tsē a dī ǀgores ǀkha ge ǀguiǃnâxa i, mîb ge o ǁîn ge nē ǃhūbaib di ǃâ tide di. (Khomai re Johaneb 17:16.) Nēs ge ra ǁgau Elob ǀguib ge ǂhanuoǃnâsiba nî ǀam kai.

15, 16. (a) Elobmîsa mati Xristeǁîna ra hui în ǂkhābadība xu ǂgōsen? (b) Jehovaba tae-e ra mû ǃhūbaib mâsibab ga nētsē ga ra kō o?

¹⁵ ǃKharu go xoaǀgoradi ǃnâ go hâ i ǃgâsas hîna Suid Europab ǃnâ hâs ge sao ra xū-e ge ǁkhāǁkhāsen. ǁÎs ge ra mî: “Tita ge ge mûǂan ǂhanuoǃnâsib ǂkhābadība a ǀam kai ǁoasa.” “ǃNāsa khoen hîna ǂkhābadīb ǃnâ ra ǁhaon ge ra ǁō. Tsîn ge ǀnîna ǁaib xa ǀoahe hâ. Kaise ta ge ge ǂkhî Elobmîs ǃnâ ta ge ǁkhāǁkhāsen o Elob ǀgui tsē ama ǂhanu-aisiba nî hausa. 25 Kuriga ta ge nē haisi-ams xa ra aoǁnâ.” Afrikab ǃkhapagas ǃnâ ǁan hâ ǃgâsab tsîn ge ǁîb ǃkham-ū gôaba, “Gagab di gôab” ǀkha ge ǃkhōǃkhuni. Nēsab ge ǁanǁare-aona ǂkhîb haisi-amsa aoǁnâbas ǃnâ-ū ra dī. (Efe. 6:17) Europab ǁaegu ǁan hâ ǃgâsas ge Jehovab di ǀHûǀguitimî-ao kais ge o, o ǃgâsab hîna ǀnî hâ gowaba ra ǃhoab ǀkha ge ǃgame. ǁÎs ge nē gowaba ra ǃhoa khoena ge ǃhui hâ i. Nē ǃnona khoen hoan ge ǀkharaǀkharana ge dī Xristuban ra ǁgae ǂgao amaga.

¹⁶ Tsî nē ǀkharaǀkharan ge kaise a ǂhâǂhâsa hoa da ǃaroma. Elobmîs ge khoesiba hurib ǀkha ra ǀgopeǀnō, hurib hîna ǂkhîba ūhâ tama hâba. (Jes. 17:12; 57:20, 21; J.ǂHa. 13:1) ǂGīǂgōsi xūn ge khoena ra khâikhâiǃnâ, ǀgora tsî ǃgâi tama ǂkhābadīb ǃnâ ra ǂgaeǂhapu xawe da ge Xristeǁîse ǀguiǃnâxasib tsî ǂkhîb tsîna nî ūhâ. Jehovab ga ǃhūbaib mâsiba ga ra kō o, ob ge nî mû mati da sada ǁaegu ǂkhîba ūhâ ǀgauba. Nēs ge ǁîb ǂgaoba nî ǂkhîǂkhî.​—Khomai re Sefanjab 3:17.

17. (a) Tae-e da nî dī ǀguiǃnâxasiba da ga ra ǂgao o? (b) Tae-e da sao ra ǁkhāǁkhāǃâs ǃnâ nî ǃhoaǃgao?

¹⁷ ǃNona xūna da ge go ǁkhāǁkhāsen Xristeǁî ǀguiǃnâxasiba da ga ra ǂgao o, o da a dī ǁkhāna: (1) Elob Gaosib ai da ge ra ǂgomaiǂnûi ǂhanuoǃnâsiba hā nî ǀam kaise, (2) ǂgīǂgōsi xūn ǃnâ da ge ǁhao tama hâ, (3) tsî da ge ǂkhābadība xu ra ǂgōsen. Xawe ǃhaoǃnâbe ǀgoras tsîn ge sida ǀguiǃnâxasiba a ǂkhabuǂkhabu ǁkhā. Sao ra ǁkhāǁkhāǃâs ǃnâ da ge nî ǁkhāǁkhāsen mati da nēsa a dan ǁkhā ǀgauba, ǂgurokham ǁaeb Xristeǁîn khami.