1, 2. (a) Xristeǁî ǁgûna mati ra tsâ ǁî-i ǀgôa-i ga mî o, ǁāǁnâhe ǂgao i rasa? (b) ǁĀǁnâhe ra khoena tae-i ǃaroma ra dîhe māǁnâsen i hâsa Jehovab ai? (Tsoatsoas ǃnâ hâ ai-īsiba mû re.)

MARIA di ǀon hâ ǂkhamkhoeros ge ǁāǁnâhe ra khoen ǀkha ǀguiba ge khâi, ǁîs ǁgûra ǁîsa ra kō hîna. ǃGari, ǃgāsa dommi ǀkhas ge ǀgam dîra ge ǃeream ǃhoa-aob ge dîra. ǁNās khaoǃgâs ge ge ǁāǁnâhe.

² Marias ǁgûra ge kaise ge ǃgâiaǂgao ǁîs ge Jehovab ai ǃkhō-oasen tama hâse māǁnâsen tsî a ǁāǁnâ kaisen o. ǁÎs ǁāǁnâs aiǃâs ge ǁîs ǁgûsa ǂgui dîna ge ūhâ i. ǁÎs ge aitsama ge dîsen: ‘Mariasa ǂkham tama hâ ǁāǁnâhes ǃgao? ǁÎsa ǁnâuǃā is ta tae-i ǃnâs ra ǂgāsensa? Aibes nî ǃâu ǁāǁnâhes nî aiǃâ?’ Nēn ge dîn hînan ǀnamxaǃnâ ǁgûna ra dîsena, ǁî-i ǀgôa-i ga ǁāǁnâhe ǂgao i ge ra di  mî o. (Aoǁn. 5:5) Hoa xūn ǂam-ais ge māǁnâsens tsî ǁāǁnâhes tsîna kaise ǂhâǂhâsa Xristeǁî-i ûib ǃnâ.—Mû re boksisa “ Māǁnâsen î du hâ Jehovab ai?” di hâsa.

3, 4. (a) Apostel Petruba mati ǁāǁnâs ǂhâǂhâsasiba ge a ǂkhō? (b) Tae-i ǃaromas Noaxi ge kuru arka ǁāǁnâs ǀkha a ǀgopeǀnōhe ǁkhā?

³ Apostel Petrub ge Noaxi ge kuru arka ǁāǁnâs ǀkha ge ǀgopeǀnō: ‘ǁĀǁnâs sada nēsi ra ǃgâiǃō kai.’ (Khomai re 1 Petrub 3:20, 21.) Arka kurus ǃnâ-ūb ge Noaxa ge ǁgau ǁîb Elob ǂâisa ra dī ǃkhaisa. Noaxi ge ǂgomǂgomsase Jehovab xab ge māhe sîsen-e ge dī. Noaxi ǂgoms ge ge dī îb ǁîb tsî ǁîb omaris tsîna Kai ǁgammi dâusa ûi ǃkharu ǁkhā. Petrub ǂkhōs di ǂâibasensa a tae?

⁴ Arki ge Noaxi ǂgomsa ge ǁgauǁgau. Khoen aisi ǁāǁnâhes ge mûhe ǁkhā ǁgauǁgausa. Tae-es ra ǁgau? Xristeǁî-i Jehovab ai māǁnâsen hâsa tsî Xristub di khâis ǃnâ ra ǂgomsa. Noaxi khamin ge māǁnâsen hâ ǁkhāǁkhāsabena Elob ǁîna mā hâ sîsenna ra dī. Noaxi ge Kai ǁgammi dâusa ûi ǃkharu khamin ge ǂgomǂgomsase ǁāǁnâhe hâna nē ǃhūbaib ǀamsa nî ûi ǃkharu. (Mrk. 13:10; J.ǂHa. 7:9, 10) Nēs ge māǁnâsens tsî ǁāǁnâs tsîna kaise ra ǂhâǂhâsa kai. Khoe-i hîna ǁāǁnâsa ra ǂanabega mâiǂui i ge ǀamo ûiba nî ǂoaǃnâ.

5. Tae-e da nē ǁkhāǁkhāǃâs ǃnâ nî ǃhoaǃgao?

⁵ ǁĀǁnâs ǂhâǂhâsa ǃkhais ǃgao da ge ǃnona dîde nî ǃhoaǃgao. Elobmîsa tae-e ǁāǁnâs xa ra mî? ǁĀǁnâhe ǂgao ra khoe-e tae-e nî dī? Tae-i ǃaroma i  Xristeǁî-e ǁāǁnâsa ǁî-i ǂâis ǃnâ nî ūhâ ǁî-i ǀgôa-i tamas ka io Elobmîsa i ra ǁkhāǁkhā khoe-i ǃgao?

6, 7. (a) ǁGuiǃā re ǂhâǂhâsasib Johaneb ǁāǁnâs disa. (b) Tae-i ǀō-aisa ǁāǁnâsab ge Johaneba dī?

⁶ Johaneb ǁĀǁnâ-aob gere dī ǁāǁnâs xa ge da ge Elobmîs ǃnâ ra khomai. (Mat. 3:1-6) ǁNān hîna gere māsen an în Johaneb xa ǁāǁnâhen ge gere ǃhausen ǁîn ǁoren ǃaroma. Xawe Johaneb ge dī ǂhâǂhâsa ǁāǁnâs ge ǁoren ǃhausens ǀkha dī xū-e ge ūhâ tama hâ i. Johaneb ge ǀō-aisa aiǂhanuba ge ūhâ i Jesuba ǁāǁnâsa. (Mat. 3:13-17) Jesub ge ǁore-e ge ūhâ tama hâ i tsî ǁnās ǀkhas ge ǃhobasensa ge ǂhâbasa tama hâ i ǁîb ǃgao. (1Pet. 2:22) ǁÎb ǁāǁnâs ge ge ǁgau ǁîb Elob ǂâisa ra dīsa.—Heb. 10:7.

⁷ Jesub ge ǃhūbaib ai hâ i o, o gu ge ǁîb ǁkhāǁkhāsabegu tsîna khoena gere ǁāǁnâ. (Jhn. 3:22; 4:1, 2) Johaneb ge khoena gere ǁāǁnâ khami gu ge ǁîgu tsîna ǃhausens khoe-i ra ǁgaus Moseb ǂHanub ǃoagu ǁores ǃgao ǀgui gere ǁāǁnâ. Jesub ǁōb tsî khâis khaoǃgâs ge ǁāǁnâsa ǀkhara ǂâibasensa Jesub saosabena ūba hâ.

8. (a) Jesub ge ǁōba xu khâis khaoǃgâ, tae-eb ge ǁîb ǁkhāǁkhāsabega mîmā? (b) ǁGuiǃā re ǂhâǂhâsasib Xristeǁî-i di ǁāǁnâs diba.

⁸ Jesub ge ǁōba xu khâis khaoǃgâb ge 33ǁî kurib ǃnâ 500 aogu, taradi tsî ǀgôan aisi ge a ǂhai. ǁNā tsēs aib ge sao ra mîde ge a mî: “ǁNā-amaga ǃgûǂoa, î go hoa ǁaede ǁkhāǁkhāsabedī, î go ǁîna ǁāǁnâ, ǁGûb, ǀGôab, tsî ǃAnu Gagab ǀons ǃnâ. Î go ǁîna ǁkhāǁkhā sago ta gere mîmān hoana ǃkhōǀgaipesa.” (Mat. 28:19, 20; 1Kor. 15:6) ǂGui saosaben Jesub din ge ǁnā tsē ge hâ i nē mîmāsab ge ǁîb ǁkhāǁkhāsabega a mā o. ǁNās ǀkhab ge Jesuba ge a ǁgau ǁāǁnâs Xristeǁî-i di ǂgaoǀkhāsa. (Mat. 11:29, 30) Eloba ra ǃoaba ǂgao khoe-i hoa-i ge nî ǂanǃgâ Jesub ra Jehovab ǂâibasens ǃnâ ǀhuru ǃâba. ǁNāsa i ga khoe-e dī o, o i ge a ǁāǁnâhe ǁkhā. ǁGammi ǃnâ ǁāǁnâhes ǀguis ge Elob mā-amsa ūhâ. Elobmîs ge ra ǁgau matin ge ǂgurokamǁaeb ǀasa ǁkhāǁkhāsaben Xristub dina ǁāǁnâs ǂhâǂhâsasiba gere ǁnâuǃā ǀgausa. Tsî ǁîn ge ǂanabega gaxuse ge ū tama hâ i în ǁāǁnâ kaisen.—ǃNǃkh. 2:41; 9:18; 16:14, 15, 32, 33.

9, 10. Tae-e da Etiopiaǁî khoeb tsî apostel Paulub ǁāǁnâs xa a ǁkhāǁkhāsen ǁkhā?

⁹ Khomai re ǃNaeǃkhaidi 8:35, 36. ǂÂi re Etiopiaǁî khoeb hîna ge Jerusalems ǃnâ sī ǀgoreǀî tsî gere oab xa. Jehovab ǀhomǃgāb ge Filipuba ge ǂkhâǃnâ îb nē khoeb ǀkha sī ǃhoa tsî “Jesub di ǃgâiǂhôasa” ǁîba mîba. Nē Etiopiab khoeba mati ge a ǃeream? Amabab ra ǃgôaǃgâ ǃkhaisab ge ge ǁgau ǁkhāǁkhāsen nî ge xūn ǃnâ-ū. Nē khoeb ge gere tura Jehovab daoǁgaus ǃnaga sîsensa ǁnā-amagab ge ge ǁāǁnâ kaisen gaxuse ū tamase.

¹⁰ ǀGamǁî aiǁgaus ge khoeb hîna gere Xristeǁîna saoǃgona. Nē khoeb ge Elob ai māǁnâsen hâ ǁaesa xu gere hā. Xawe Jodeǁîn ge ǁîn ge Jehovab ǀkha ūhâ i ǃgaeǁaesa ge a ǂoaǃnâ. Nē khoeb ge Jodeǁîn ǂgomsa [Judaisms]  kaise ge ôasaba i xaweb ge ǃgâi daob xa ge ǁkhāǁkhāsen. ǁÎb ge ǁōba xu ge khâi Jesub xa aitsama ge ǃhoa-ūhe. Nē khoeba mati ge ǃeream? ǁÎb ge Ananiab di ra ǂgaihe ǁkhāǁkhāsabeb huiba ge a ūǃoa. Nē khoeb xas ge Elobmîsa ra mî: “Ob ge khâi tsî ge ǁāǁnâkaisen.” (ǃNǃkh. 9:17, 18; Gal. 1:14) Nē khoeb ge apostel Paulub ase a ǂansa. Paulub ge Jesub ra Jehovab ǂâibasens ǃnâ ǀhuru ǃâba ge ǃgôaǃgâ tsî xū-e ge dī. ǁÎb ge ǃhaese ge ǁāǁnâ kaisen.—Khomai re ǃNaeǃkhaidi 22:12-16.

11. (a) Tae-e Elobmîsa ra ǁkhāǁkhāsen khoena ra ǂkhâǃnâ în ǁāǁnâ kaisen? (b) Mati du ra tsâ ǀasase ra ǁāǁnâhe khoen xa?

¹¹ Nētsē Elobmîsa ra ǁkhāǁkhāsen khoen ǀkhas tsîna i ge a ǀgui kairan tamas ka io ǂkhamkhoen ǀkha. ǁNān hîna Elobmîsa amabes ǃnâ ra ǃgôaǃgân ge ra tura în māǁnâsen tsî ǁāǁnâ kaisen. ǁĀǁnâhe ra khoen ǃgao hâ ǃhoadi hîna ǂharis kai ǀhaodi tsî ǀkharib kai ǀhaodi ai ra māhe di ge kaise a ǀō-aisa. Jehovab di ǀHûǀguitimî-aon ge kaise ra ǃgâiaǂgao ǁîn ǀkha Elobmîsa ra ǁkhāǁkhāsen khoen ga ǁāǁnâs kōse a aiǃgû o. Xristeǁî ǁgûna ǁkhore tama hâ ǁîn ǀgôana ǁāǁnâhe ran ǁaegu mûsa? 2017ǁÎ kurib ǃnân ge 284 000 “ǃkhōǂuibasenhe” hâna ǁîn māǁnâsensa ǁgammi ǁāǁnâs ǃnâ-ū ge a ǁgau. (ǃNǃkh. 13:48) Ama as ge nē khoen hîna ra ǀasase ǁāǁnâhen ge ra ǁnâuǃā ǁāǁnâs a Xristeǁîn ǂgaoǀkhā ǃkhaisa. Tae-e ǁîna ǁāǁnâs kōse ra sī ū?

12. Elobmîsa ra ǁkhāǁkhāsen khoe-e tae-e nî dī ǁāǁnâs aiǃâ?

¹² Elobmîsa ra ǁkhāǁkhāsen khoe-i nî ǁāǁnâhes aiǃâ i ge aibe ǁî-i ǂgomsa Elobmîs ǃnâ nî ǀgaiǀgai. Tsî Elob ǂâibasen tsî ores ǃnâs tsîna nî ǂgom. (1Tim. 2:3-6) ǁNāti i ǂgoms ge nē khoe-e nî hui î-i tā Eloba tsûaǂgao kai. Xawe nî dītsâ Jehovab daoǁgaus ǃnâ mâisensa. (ǃNǃkh. 3:19) ǁNâuǃāxa a ǃkhais ge Elob ai māǁnâsen hâ khoe-i ge ǁî-e Elob Gaosiba xu ǃkhō-oa tide xūna dī tidesa. (1Kor. 6:9, 10) Xawe ǃnāsan ge ǂhâbasa Jehovab ǂhanuga ǁnâuǀnams ǃgao. ǁNān hîna ǂhanu-aisiba ra ôan ge ǀhaode hâǃnâ tsî aoǁnâ sîsenni ǃnâs tsîna nî ǁhao. Jesub ge ge mî nē sîsenni ge ǁîb di ama ǁkhāǁkhāsaben xa nî dīhe. (ǃNǃkh. 1:8) Nē xūna dīs khaoǃgâ ǀgui i ge ǀasa ǁkhāǁkhāsebe-e ǀgores ǃnâ-ū Jehovab ai a māǁnâsen ǁkhā. ǁNāpaxū i ge ǁî-i di māǁnâsensa ǁgammi ǁāǁnâs ǃnâ-ū a ǁgau ǁkhā.

13. Tae-i ǃaroman Elobmîs ǁkhāǁkhā-aona ǁāǁnâsa Xristeǁîn ǂgaoǀkhās ase nî mû?

¹³ Sida ǀgôan tsî Elobmîsa ra ǁkhāǁkhāsen khoena da ra hui khami da ge ǂâis ǃnâ nî ūhâ, în ǁāǁnâhe tsî ǁkhāǁkhāsabe kai. Nēsa da ga hoaǁae ǂâis ǃnâ ga ra ūhâ o, o i ge nî hui da Elobmîsa da ra ǁkhāǁkhā khoen ǀkha ǃgâise ǃhoasa. ǂHâǂhâsa ǁaeb ai da ge ǁnā-amaga māǁnâsens tsî ǁāǁnâs tsîn xa nî ǃhoa. ǂGao da ras ge sida ǀgôan tsî Elobmîsa ra ǁkhāǁkhāsen khoen nî ǁāǁnâs kōse aiǃgûsa.

14. Tae-i ǃaroma da khoena ǁgari tide ǁāǁnâs ǃgao?

¹⁴ Tā i ge khoe-e nî ǁgarihe ǁāǁnâ kaisens ǃgao nau khoe-i xa. ǁNāb ge Jehovab ǀgau tamaba. (1Jhn. 4:8)  ǁÎna da ga ǁkhāǁkhā o, o da ge nî hui nî în Elob ǀkhan ūhâ ǃgaeǁaesa ǀgaiǀgai. Nē khoe-i amaba ūba hâ ǀnammi tsî ǁî-i di Xristeǁî ǃereams ge ǁî-e nî hui î-i ǁāǁnâ kaisen.—2Kor. 5:14, 15.

15, 16. (a) Matikō kurin ǀkha i khoe-e a ǁāǁnâhe ǁkhā? ǁGuiǃā re. (b) Tae-i ǃaroma i Elobmîsa ra ǁkhāǁkhāsen khoe-e Jehovab di ǀHûǀguitimî-aon di ǀgui-i ase nî ǁāǁnâhe?

¹⁵ ǁĀǁnâhe ǂgao ran ǃgao i ge kuri-e māsa tama hâ. Mâ khoe-i hoa-i ge ǃkharagaǃnâgu ǀgaugu ai gagasise ra kai. ǂGuin ge ǂkhamsis ǃnâ ra ǁāǁnâhe tsî Jehovaba ǂgomǂgomsase ra ǃoaba ǀgara. ǀNîn ge kaikhoe kain hâ hîna ǀgui ra ǁāǁnâ kaisen—tsî ǀnîna aiǁgause 100 kurixan a hîna.

¹⁶ ǀGui kaira kaikhoes hîna Elobmîsa gere ǁkhāǁkhāsens ge ge dî, ǁkhawas a ǁāǁnâhe ǁkhāsa. ǁÎs ge ǀnai ǀnî hâ ǂgoms ǃnâ ǁāǁnâhe hâ i xui-ao. Nē kaikhoes tsî ǁîsa Elobmîsa ra ǁkhāǁkhā ǃgâsas ge ǃkharagaǃnâgu Elobmîs xoade ge ôaǃnâ tsoatsoa ǁāǁnâs xa. Nē kaikhoes ge Elobmîs ǂgaoǀkhāsa mûǂan tsî ǃhaese ge ǁāǁnâ kaisen. ǁÎs ge 70 kurigu ǃnâ hâ i xawes ge ge tsâ tama hâ i ǁāǁnâs ǂhâbasa tama hâsa. ǁĀǁnâs ge Jehovab ǂâisa dīs ai a ǃgaoǃgaosa ǂans ǃnâ-ū. ǁNā ǃkhais ǃaroman ge ǀasase ra ǁāǁnâhe ǂgaona, ǀnî hâ ǂgoms ǃnân ge ǀnai ǁāǁnâhe hâ i xawe ǁkhawa nî ǁāǁnâhe.—Khomai re ǃNaeǃkhaidi 19:3-5.

17. Tae-e a ǂhâǂhâsa ǁāǁnâs tsēs ai nî ǂâiǃgâhe-e?

¹⁷ Khoe-i di ǁāǁnâs tsēs ge kai ǃgâiaǂgaob tsēsa. Nēb ge ǁaeb khoe-i nî xūna ǂâiǃgâba. Sadu māǁnâsensa ûiǂuis ge ǁguiǂgāsensa ǃkhōǂgā hâ. ǁNā-amagab ge Jesuba Xristeǁî ǁkhāǁkhāsabesisa ǃnaob [ǁgui-ais] ǀkha ge a ǀgopeǀnō. Jesub ǁkhāǁkhāsaben ge aitsama ûibasen tide xawen ge ‘ǁîna ge ǁōbab tsî ǁîna ge khâibaba nî ûiba.’—2Kor. 5:15; Mat. 16:24.

18. Mâ dîde da sao ra ǁkhāǁkhāǃâs ǃnâ nî ǃhoaǃgao?

¹⁸ Marias ǁgûs ge sao ra dîde ǂâis ǃnâ ge ūhâ i tsoatsoa ǃnâs tsîna a dîsade. ǁGûn ge sao ra dîde a dîsen ǁkhā: ‘Ti ǀgôa-e ǂansa ū i hâ māǁnâsens xa? ǁÎ-e ǀgapi ǁkhāǁkhāsens mîǁguiga ū i hâ? Ti ǀgôa-i ga ǁî-i ǁāǁnâs khaoǃgâ ǁkhōǁkhōsa ǁoreba dī os?’ Sao ra ǁkhāǁkhāǃâs ǃnâ da ge nē ǁhōga nî ǃhoaǃgao, matin ǁgûna ǃgâi mûǂuisa nî ūhâsa ǁāǁnâs xa.