1. Tae-i mâsiban ge ǂguroǁaeb Xristeǁîna gere hōǃâ?

APOSTEL Paulub ge 62 tsî 64ǁî kuri Jesub khaoǃgâ sao rana ge xoa, “ǁnā ǃhaokhoen, Pontub tsî Galatiab tsî Kapadosiab tsî Asiab tsî Bitiniab ǃnâ ǀgaruǀgaruhe hân ǃoa.” (1Pet. 1:1) ǃHaoǃnâbese ge ǀgorasa i ǀhaohâb Asiab ǃnâb ge ǂkhâǃnâs tsî daoǁgauhes tsîna ge ǂhâ hâ i. Nē ǀhaohâb ge mâǃoahes tsî mîǁgaiǁgaihes tsîna gere hōǃâ. ǁÎn ge “ǃâitsâhe” tsî ǃgom ǁaegu ǃnâ ge ûi hâ i. “ǀAms xūn hoan dis go ǀgū” dib ge Petruba ge xoa. Jodeǁîn di ǂkhabadīb ǂgaeǂguis ge 10 kurigu ǁaeb ǃnâ ge a ǀam. Tae-e Xristeǁîna ga hui hâ ǁnāti i ǃgom ǁaega ûi ǃkharusa?​—1Pet. 4:4, 7, 12.

2, 3. Petruba tae-i ǃaroma ǁîb ǃgâsana gere ǂkhâǃnâ în ǃhaokhoeǃkhōǃoaxasiba ǁgau? (Tsoatsoas ǃnâ hâ ai-īsiba mû re.)

² Petrub ge ǁîb ǃgâsana hoan ǂam-ai ge a ǂkhâǃnâ: “Sâuǀnamgu” [ǃhaokhoeǃkhōǃoaxa]. (1Pet. 4:9) Nē mîs “ǃhaokhoeǃkhōǃoaxa” di hâs ge Grikegowab ǃnâ “khoexaǃnâsiba ǃhaokhoena ǁgau” di ra ǂâibasen. Xaweb ge Petruba nēs ǂam-ai ge mî î da sida Xristeǁî ǃgâsan ǃoagu “sâuǀnamgu,” [ǃhaokhoeǃkhōǃoaxa] nēn ge ǀnai da ǀguiba ra hâ ǀhao-ū  khoen tsîna ǃkhōǂgā hâ. ǃHaokhoeǃkhōǃoaxasiba mati ra hui nî?

³ Nēs ge ǁîna nî ǀguiǃnâxa kai. Sadu aiǁgaus xa ǂâi re. Khoe-i di omsa ǃoa ǁkhauhe tsâ î du hâ? ǁNā ǁkhauǂuisa ǃgâi ǂâidi ǀkha xu du tama hâ? Sadu ǀhaohâb ǃnâ hâ ǃgâsa-i ǀkha du ge ǁkhoaxa ǁaeba ūhâ i ǃkhaisa, sadu ǀhōsasisa ǁî-i ǀkha ǀgaiǀgai tama hâ? ǃHaokhoeǃkhōǃoaxasib ge ra hui da î da sida ǃgâsana ǃgâise ǂan ǁkhā. Petrub tsēdi ǃnâ ge hâ i Xristeǁîn ge ǀguiba gere hâǀhao, ǁîn mâsib ge ǃgâi tama hâ i amaga. ǁNās tsîn ge a ama sada hîna “ǀuni tsēdi” ǃnâ ûi hâ da ǃgao.​—2Tim. 3:1.

4. Mâ dîde da nē ǁkhāǁkhāǃâs ǃnâ nî ǃhoaǃgao?

⁴ Tae-i ǃēde da sida ūhâ ǃhaokhoeǃkhōǃoaxasiba ǁgausa tamas ka io ‘sâuǀnamgusa’? Mati da ǃhaokhoeǃkhōǃoaxasiba ra ǂhani xūna dansa a hōba ǁkhā? Tae-e a hui da ǁkhā î da ǃgâi ǃhaokhoe kai?

5. Mati da Sida ǀhaodi tawa ǃhaokhoeǃkhōǃoaxasiba a ǁgau ǁkhā?

⁵ ǀHaodi tawa: Sida ǀhaodi tawa ra hān hoana da ge nî ǁkhoreǁhare. Gagasi ǂû-e hā ra ǂû ǃhaokhoen ase. Jehovab tsî ǁîb ǀapeǂhumis tsîn ge a sida ǃkhōǃoa-ao. (Rom. 15:7) ǀAsa khoen ga ra sari o, o da ge sida ǁîna nî ǃkhōǃoa tsî nî ǁkhoreǁhare. ǀAsase ra sarin ga ǃgâi tamase ana xawe da ge nî ǁkhoreǁhare nî. (Jak. 2:1-4) Sari-ao-i ga kōǃgâhe tama io, ǁî-e ǁkhau re î-i sadu xōǀkhā ǂnû. ǁÎ-i ge kaise nî ǃgôaǃgâ ǀapeǁguiba sao tsî khomaihe ra xoade hōsa. ǁNāb ge ǃgâi ǀgaub ‘ǃhaokhoeǃkhōǃoaxasib’ diba.​—Rom. 12:13.

6. Ham-e du ǃnāsase sadu omdi ǃoa nî ǁkhau?

⁶ ǂÛ ǀhaos: Elobmîs ǁaegu ǃnâs ge ǃhaokhoe-e ǁkhausa gere ǂâibasen ǁî-i ǀkha ǂû ǀhaosa. (Gen. 18:1-8; ǂHǂh. 13:15; Luk. 24:28-30) Khoe-e ǂû ǀhaos ǃaroma ǁkhaus ge ǀhōsagusis tsî ǂkhîb khoen ǁaegu hâsa ra ǁgau. Ham-e du ǃnāsase nî ǁkhau? ǁÎn hîna sida ǀkha ǀguiba ra ǃoaba ǀhaona. ǃGomǁaegu ga ra hā o, o da ǁîn xa huihe ǂgao tide? ǂHauǃnâ ǀhōsan tsî ǂkhîb tsîna da ge hoan ǀkha ǂhâba hâ. Aiǁgause ǂGaeǂguira soros ge 2011 ǃKhē xu ǂgō-ommi ǁkhāǁkhās ǁaeba ge a ǀkharaǀkhara 6:45 sa xu 6:15 kōse Betels omaris tawa Amerikab ǃnâ. Tae-i ǃaroma? Nē ǂanǂans di ǂâibasens ge în Betels omaris ǁanina sarigu ǁkhā. Tsî ǃhaokhoeǃkhōǃoagusa ǁgaugu ǁkhā. ǀNî ǁNâub berodi tsîn ge ǁnā aiǁgause ge a sao tsoatsoa. Nēs ge Betels omaris ǁanina ge a ǀguiǃnâxa kai.

7, 8. Mati da ǃhaokhoeǃkhōǃoaxasiba ǃhoade ra mā ǃgâsaga a ǁgau ǁkhā?

⁷ Hoa da ge kaise ra ǃgâiaǂgao ǃhoadi ga sida ǀhaohâb ai ga ra māhe o. ǃNarimâra mûǂam-aogu tsî ǁNâub beros ǂnûiǁkhaeba-aogu xas tsîna. ǁÎgu ga ǃhoade hā ga ra mā o, o da ge hoa da ǃēde ūhâ ǁîga ǃhaokhoeǃkhōǃoaxasiba ǁgausa. (Khomai 3 Johaneb 5-8.) ǂÛ-e ǁîga mās ge ǀgui ǃgâi ǀgauba. ǁNāsa dī i du nî?

⁸ Amerikab ǃnâ ǁan hâ ǃgâsas ge ra mî: “Tita tsî ti aob tsîn ge ǂgui ǃhoa-aogu tsî ǁîgu taradi tsîna ǃhaokhoen ase sim oms ǃnâ gere ǃkhōǃoa. Mâ ǃnās hoas ge kaise ge ǁkhoaxa i tsî hoan ǂam-aim ge gagasise gere omkhâihe. Nēsa dīsam ge tātsēs tsîna ǃhausen tama hâ.”

9, 10. (a) Ham-e gaxuse a sari ǁkhā? (b) ǁNān hîna ǃgâi tama mâsiba ūhân tsîna a hui ǁkhā? ǂKhō re.

 ⁹ Gaxu ǁaeba ra sari khoen: ǀOrokamǁaeb ǃnâs ge ǃhaokhoeǃkhōǃoaxasiba khoe-e hâǃkhai-e māsa ge ǃkhōǂgāhe hâ i. ǀŌ-aisasen ga ǂgomǂgomsa o. (Job. 31:32; Flm. 22) ǁNāsa da ge sida tsēdi ǃnâs tsîna a dī ǁkhā. ǃNarimâra mûǂam-aogu ge sarigu ra ǀhaohâgu ai ra kō hâǃkhai-e māhesa. Elobmîs ra ǁkhāǁkhā aihe skolga ra hâǃnâ ǃgâsan tsî omsîsenna ra dī ǃgâsan tsîn ge hoaǁae hâǃkhai-e ǂhâ hâ. Tsūkēǃgâgu xa ǃaromahe hâsen ge khoena ǁîn omde a ǂoaǃnâ ǁkhā. Tsî ǁnās ǀkha huiba ǂhâ hâ ǁîn ǂaidi ain nî sī mâs kōse. Tā da ge nî ǂâi ǁnān hîna ǃgâi ûiba ūhân ǀguin nî huisa, ǀnain ge ǁîna ǂgui ǃnāde ǀnîsi ra hui. Sadu mâsib ga ǃgâi tama i xawe hâǃkhai-e mā i du nî?

¹⁰ ǀNî ǃgâsab Suid Koreab ǃnâ ra hâb ge Elobmîs ra ǁkhāǁkhā-e skolgu ai ra ǁkhāǁkhāhe ǃgâsana hâǃkhai-e ge mā. ǁÎb ge ge xoa: “ǂGuro ta ge gere ǃkhō-oasen ǀasasem ge ǃgame hâ tsîs ge sim omsa kaise ǂkhariro ī ǃkhais ǃgao. Xawe nē ǃgâsana sim ǀkha hâǀhaos ge ge ǁkhoaxa i. ǀAsasem ge ǃgame hâ i xawem ge ge mû matikōse i a ǃgâisa Jehovaba ǀguiba ǃoabasa. Tsî ǀgui gagasi mîǁguiga ūhâsa.”

11. Tae-i ǃaroman ǀhaohâba ǃoa ǀasase ra doena ǃhaokhoese ǃkhōǃoahesa ǂhâ hâ?

¹¹ ǀHaohâb ǃnâ a ǀasan: Omari-i tsî ǀguri hâ khoe-i tsîn ga sadu ǃās ǃoa ga ra doe sī o. ǀNîn ge ǂhâsib hâba sī ra aoǁnâ. Aimâba-aon ge ra sîhe în ǀhaohâba huiǃnâ. Hoan ge ǁîn a ǂan xūna xu a ǃnū tsî ǀasa ǀhûhâsib, ǀhaohâb, gowab tsî ǃhaoǃnâbe ǁnaetigu tsîna nî hōǃâ. ǁÎna ǂû ǀhao-i ǃgao ǁkhaus ge nî hui nî în ǀasa ǀhōsana kuru tsî ǁîn ǀasa mâsiba ǁnaeti ǁkhā.

12. Tae-e ra ǁgau ǃhaokhoeǃkhōǃoaxasib ǀgapi xūna dīs ai ǃgaoǃgaosa tama hâsa?

¹² ǃHaokhoeǃkhōǃoaxasib ge hoaǁae ǀgapi xūna dīs ai ǃgaoǃgaosa tama hâ. (Khomai re Lukab 10:41, 42.) ǀGui ǃgâsab ge ǁîb sîsabe sîsenni xa sao ra-e ra mî: “ǂKham tsîm ge ǂansa ge ūhâ tama hâ i. Tsîm ge kaise sim omaris ǁanina gere ǁkhore. ǀGui ǃuis ge ti tarasa kaise sim omaris ǁanina ge ǁkhore, ǁîsa ta gere hui tsâ xawes ge ge ǂgao tama hâ i. ǁAubexa 7:30 khamab ai i ge dao-ams tawa ge ǃgubu-amhe. Sida ǃgâsas ge ǃnona lemunde ge hau. ǁÎs ge sima gere ǁkhoreǁhare ǂgao. Oms ǃnâm ge ge ǁkhauǂgā si tsî ǁgam-e ge mā si. ǁNāpaxūm ge tee-e ge dība si. Sim ge Swahili gowaba ge ǂan tama hâ i tsî ǁîs ge ǀapaǃaogowaba ǃgâise ge ǃhoa tama hâ i. Nē ǃnaeǃkhais ge kaise ǃgâi ǀhōsagusisa ǃgâsan ǀkha ge omkhâi kai mi.”

13. ǃHaokhoeǃkhōǃoaxasiba xu tae-e da ra hō?

¹³ ǃKhō-oasen î du ra ǃhaokhoe-e ǁkhausa xu? ǁNāti i ga io, o du ge ǃgâi ǀhōsasis tsî hâhâ nî ǀhōsasisa xu ra ǂoaǃnâ kaisen. ǃHaokhoeǃkhōǃoaxasib ge ǀguri tsâsensa ra ǃkhōǃkhuni. Xawe du ge ǀnîsi ra ǂâi, ‘tae-i ǃaroma i khoe-e nî ǃkhō-oasen?’ ǂGui ǃaromadi ge ǀnîsi hâ.

14. Tae-e da a dī ǁkhā ǁaeb tsî ǁkhāsib tsîkha da ga ūhâ tama io, ǃhaokhoeǃkhōǃoaxasiba ǁgaus ǃnâ?

¹⁴ ǁAeb tsî ǁkhāsib: Jehovab ǃoab-aon ase da ge kaise a ǁaxa hoaǁae tsî ǂgui dī xūna ūhâ. ǀNîn ge ra tsâ ǁaeban  ūhâ tama hâsa ǃhaokhoeǃkhōǃoaxasiba ǁgausa. ǁNāti i mâsib ǃnâ du ga ra hâ o, o sadu ǀapeǁguiga ôaǃnâ re. ǀKharaǀkharana dī ǁkhā du a î du ǁaeb tsî ǁkhāsib tsîna ūhâ ǃhaokhoeǃkhōǃoaxasib ǃgao? Elobmîs ge ra mî Xristeǁîn nî ǃhaokhoeǃkhōǃoaxasiba ǁgaugusa. (Heb. 13:2) Tsū tama i ge hâ ǁaeba ǁamaǂuisa, nēs a ǂhanu xui-ao. Māsenxa da ge nî ǀnî ǁaxasiga ǁnāxūǂuisa.

15. Matin ǀnî ǃgâsana ra tsâ ǃhaokhoeǃkhōǃoaxasib xa?

¹⁵ Sadu ra tsâ ǀgaub: Khoe-e du ge ra ǁkhau ǂgao xawe du ge xū-e du ūhâ tama hâ di ra tsâ tsî ra ǃkhō-oasen. ǀNîn ge tao tsî ra ǃao ǁgamǁaedi ǃgâise ǃgûǁnā tidesa. ǀNîn ge xū-en ūhâ tama hâ ǃkhais ǃgao ra tsâ, ǁîn naun mā ǁkhā-e mā hō tide ǃkhaisa. ǂÂis ǃnâ ūhâ re oms ǂhâǂhâsasiba, ǃanu tsî i ga ǀnamma hâ o, o i ge nau xūna ǂhâbasa tama hâ.

16, 17. Tae-e ǃhaokhoeǃkhōǃoaxasib ǂâiǂhansende nî ūbē?

¹⁶ ǃHaokhoena ǁkhausa du ga ra ǃao o, o du ge ǀguri hâ tama hâ. ǀGui ǀhaohâb ǃûi-aob Britaniab ǃnâ ra hâb ge nēsa ge ǂanǃgâ: “ǃAo tsâsib ge hâ khoe-e ǃhaokhoese ǃkhōǃoas ǃgao. Xawe Jehovaba ǃoabas ǃgâiba ūhâ tsî ǂkhîba ra mā khamis ge ǃao tsâsiba a danhe ǁkhā. Tita ge ǃhaokhoen ǀkha kofi-e ā tsî ǁgamǀhaos xa kaise a ǃgâibahe.” ǂÂis ǃnâ ūhâ re ǃhaokhoen ǃnâ ǃgâiǃgâibasensa ūhâs ge huib ase ī. (Fil. 2:4) Mâ khoe-i hoa-i ge ǁî-i ûib ǃnâ ge ī xūna ra ǀgoragu. Nē sarigus ǃnâ-ū ǀgui da ge dîna dîgu tsî xūna a ǀgoragu ǁkhā. ǀNî hâ ǀhaohâb ǃûi-aob ge ge xoa: “Sida ǀhaohâb ǃnâ hâ ǃgâsana ta ga ǁkhau o, os ge nēsa ra hui te î ta ǁîna ǃgâise ǂan. ǀŌ-aisase ta ge ra dî nî matin ge amaba a hōsa.” ǀNamxaǃnâ ǃgâiǃgâibasensa ǁîn ǃnâ ūhâs ge sarigusa kaise ra ǁkhoaxa kai.

¹⁷ Aimâba-ao sîsen-e ra dī ǃgâsas ge Elobmîs ra ǁkhāǁkhā aihe skola ge hâǃnâ ǃgâsana hâǃkhai-e ge mā tsîs ge ra mî: “ǂÂiǂhansen ta ge gere ti oms xa, oms ǃnâ hâ xūn ge ǀoro i amaga. Nē skoli di ǁgauǃnâ-aob taras ge ǃgâise ge tsâ kai te. ǁÎs ge ge mîba te ǁîra ga ǀhaohâga sari o, o ra ge gagasi mûǂuisa ūhâ ǃgâsan hîna ǂgui xūna ūhâ taman tawa hâs xa a ǃgâibahe. Jehovaba ra ǃoaba tsî ǀgui ǃgupu ûiba ra ûina. Nēs ge ti mamas gere mî xūn xa ge hōhōǃnâ te: ‘ǂÛ-ai-i ǃam ǁhaon di-i ǀnammi hâǃnâ-i ge a ǃgâi.’” (ǂKhm. 15:17) Ab ǀnamma sadu ǃhaokhoeǃkhōǃoaxasiba ǂkhâǃnâ tsî tā kaise nēs xa ǂâiǂhansen re.

18, 19. Matis ǃhaokhoeǃkhōǃoaxasiba ǁgausa ǃgâi tama tsâsiga a dan ǁkhā?

¹⁸ Sadu tsâsiba nau khoen ǃoagu: Khoe-e hâ-e sadu ǀhaohâb ǃnâ du xū-e taniba hâ-e? Hoaǃnâ-aixase du ge ǃgâi tamase ǁnā khoe-i xa ra tsâ xawe ǂâis ǃnâ ūhâ re xū-i ga dīhe tama io, ob ge ǁnā tsâsiba nî hâhâ. Khoe-i ǀkha ǃkhō sāgus ge a ǃaroma ǁkhā î da tā ǁî-e ǃhaokhoese sida omdi ǃnâ ǃkhōǃoa. Tamas ka io, i ge khoe-e ǃkharu ge ǁaeb ǃnâ ge tsûtsû du tsî du ge ǁnā ǃkhaisa a ǀuru ǁoa.

¹⁹ Elobmîs ge ra ǂkhâǃnâ da î da sida khākhoen tsîna ǃhaokhoeǃkhōǃoaxasiba ǁgau. (Khomai re ǂKhoamîdi 25:21, 22.) ǃHaokhoeǃkhōǃoaxasib ge ǃgomsina ra ǀoroǀoro tsî ǂgaoba ra tsautsau. Nēs ge sida sari hâ khoe-i di ǃgâi ǀgauga a mâǂoa kai ǁkhā. ǁNā ǀgaugu hînab ge Jehovaba a mûga nē khoe-eb ge amab ǃoa a ǂgae o. (Jhn. 6:44) Nēs ga ǀnammi ǃnâ dīhe o, os ge nēsa a ǃgâi ǀhōsagus tsoatsoa. Mati da a ǁapoǁapo  ǁkhā ǀnammi sida di ǂâibasensa? ǀGui ǀgaub ge Filipeǁîn 2:3 ǂkhâǃnâsa saosa mî rasa: “Î du ǃgamǃgamsens ǃnâ nē-e nau-e ǁî-i ǃgâ-ai ǀgapise ǃgôa.” ǀGauga ôa re sida ǃgâsana da ǀgapise nî ǃgôaga, aiǁgause ǁîn di ǂgoms, ǃgomga tanis, ǃaoǁoasib tsî ǀnî Xristeǁî ǀgaugu tsîn ǃgao. Nēs ge sida ǀnamma nî ǀgaiǀgai ǁîn ǃoagu tsî ama-ai ǃhaokhoeǃkhōǃoaxasib tsîna nî ī ǁkhā kai.

20. Mati da ǁkhauǂuisa da ra ǃgôaǃgâsa nî ǁgau?

²⁰ Psalmdi ǁnae-aob Davib ge ge mî: “ǃKhūtse [Jehovatse, NW], tari-e nî hâ sa tentommi ǃnâ?” (Psa. 15:1) ǁÎb ge ǁnā dîs khaoǃgâ Jehovab xa ǃhaokhoese ra ūǃkhoahe ǂgao khoe-i nî ūhâ gagasi ǀgauga ge mî. Tsî ǀgui mâǂoa ra ǀgaub ge hâ: “Nū i ga hâ ǁî-i di ǂkhôas ǃoa xawe i ge ǀkharaǀkhara tama hâ.” (Psa. 15:4) ǁKhauǂuihe da ga o, o da ge ǁkhauǂuisa ūǃoa tsî nî ī. Khoe-i hîna go ǁkhau da i ǀnîsi ǀnai hoa xūna aiǂhomi hâ ǃkhais ǃaroma da ge mâiǂui tide. (Mat. 5:37) ǀNî khoen ge ǁkhauhen ga o ūǃoa tsî mari-e ūhâ khoen xan ga ǁkhawa ǁkhauhe o, o ǂguro ǁkhauǂuisa ra mâǂui. ǁNāsa amabes ǃnâ ǀnammi tsî ǃgôasib tsîna ǁgau-i ra? ǂÂis ǃnâ ūhâ re, khoen ǁkhauǂuidi tsî ǁîn ra aiǂhomiba da xūna da ge nî ǃgôaǃgâ. (Luk. 10:7) Xawe i ga ama ǁkhōǁkhōsa mâsiba ga ra ǁgari da o, o da ge ǁaeb aiǃâ ǁîna nî ǂanǂan.

21. ǃHaoǃnâbe ǁnaetiga ǃgôaǃgâsa mati sida a ǃgâi ǃhaokhoe kai ǁkhā?

²¹ ǃGôasiba da ge khoen ǃhaoǃnâbe ǁnaetiga nî ǁgau. ǀNî ǃhaodi ǃnâ i ge ǁkhauhe tama khoena oms tawa sīsa ǃgomsi tama hâ xawe ǀnî ǃhaodi tawas ge nēsa mā-amhe tama hâ. ǀNî ǃhaodi ǃoagun ge ǃhaokhoena ǁkhau nî go khoena ǀkhae xū-e ra sī ūba xawe nau ǃhaodi ǃnân ge hoana ǀguitikōse ra ǀgoragu. ǀNî ǁaeb ain ge ǃhaokhoena xū-e ra sī ū ǁnā ǁaxasib ǃaroma. Xawen ge ǁkhawa ǀnî ǃhaodi ǃnâ ǃhaokhoeǃkhōǃoa-aona sari-ao-i xū-e ǃkhōǃom tsî nî sī-ūsa ǂgao tama hâ. Tsî ǀnî ǃhaodi ǃnân ge ǁkhauhe ra khoe-e ǀgam ǃnā ra kōse ǁkhauǂuisa ra mâiǂui. Xawe ǀnîn ge nî mî ǃgôasibats ūhâ tamasa ǁnāsats ga dī o. Sida go ǁkhau khoe-e da ge toxoba nî gangan ǁkhauǂuis ǃgao.

22. Tae-i ǃaroma i a ǂhâǂhâsa î da “sâuǀnamgu”?

²² Hoaǃnâ-aixase nēsa ǀguiǀguis ǃgaon ge ‘ǀams xūn hoan disa go ǀgū.’ (1Pet. 4:7) Kai ǁgâiǀāb ǃhūbaib noxoba mû tama ge ǃgôaxa. Nē ǁaeb ra ǀgū khami da ge ǃgâsan ase sada ǀnamma nî ǀgaiǀgai. Petrub di ǀapemās ge kaise nētsē a ǂhâǂhâsaba da mî rasa: “Sâuǀnamgu du re” matikōses ǁnāsa a ǃgâi tsî ǀams kōse nî dīhe hoa da xa.​—1Pet. 4:9.