Ama as ge khoe-i ge a ǀū Paulub ge mati ī īsiba ūhâ isa. Sida ǂkhanin ǃnâ hâ ai-īsigu Paulub digu ge saogu rase ǂgaekhâihe tama hâ. Xawe xoas ǁkhāsiba ūhâ khoen xa ra dīhe.

Xawe gaxu ǁaeba da ge Paulub gere mûsen ǀgauba gere ǁgauǁgau. Aiǁgause, Zion’s Watch Towerb 1 Maarti, 1902 ge ge mî: “Paulub ai-īsib: . . . ’ǃNaeǃkhaidi ǂkhanis tsî Theclab,’ . . . 150ǁî kurib dib ǃnâ a xoasasa. ǁNāpa i ge ǁguiǃāde Paulub ai-īsib xa hâ. Nē ǁguiǃādi ǃnâb ge ‘ǂkhariro soros, ǂgā danas, ǃhôa ǀnūgu, ǀgaisa soros tsî gaxu ǂhuis tsîna ge ūhâ i.’”

Oxford mîdi ǂkhanis Xristeǁî Kerkeb (1997 māǂuis) dis ge ǀorokamǁaeb xoadi xa sao ra-e ge mî: “Ī ǁoa i ge a ‘ǃNaeǃkhaidi’ ǂkhanis amaba ǃkhōǂgā hâsa.” ǃNaeǃkhaidi ǂkhanis Paulub xa hâs tsî Theclab tsîn ge kaise ge ǃgôahe hâ i ǀorokamǁaeb ǃnâ. Nēs tsîn ge 80 Grikegowab manuskripgu ǃnâ a ǁapoǁaposa tsî ǀnî gowagu ǃnâs tsîna a xoasa. ǁNās ǀkhan ge sida ǂkhanin di ǁgauǂuis Paulub disa a ǀguiǃnâxa ǀorokamǁaeb ai-īsib Paulub dib ǀkha.

ǂÂis ǃnâ ūhâ re, Paulub ai-īsib ǃgâ-ain ge ǀnî xūna kaise a ǂhâǂhâsa. Paulub gere aoǁnâ hînan ge ǀnî khoena gere mî: “Xawe sorosi hâs âb ge a ǂkhabusa, tsî ǃhoas âb ge xū-e harebe tama hâ.” (2Kor. 10:10) Tā da ge nî ǀuru ǁîb ge buruxa ǀgaub ǃnâ ge Xristeǁî kai. Paulub ge sīǃnâ xūn xas tsîna da ge nî ǂâi “ǃkhōǂuibasen ta hâ soab a ǁî xuige, ob ge ti [Jesub] ǀonsa nîra tani ǀūben aiǃâ.” (ǃNǃkh. 9:3-5, 15; 22:6-8) Tsî ǁnās xōǀkhā ǂâi re, matikō xūna da Elobmîs ǂkhanidi hînab ge Pauluba xoade xu a hōǁkhāsa.

Paulub ge Xristeǁî kaib nîs aiǃâb ge ūhâ i ǀgapi ǁkhāǁkhās tsî ǁîb ai-īsib ǃgao ge koasen tama hâ i. (ǃNǃkh. 26:4, 5; Fil. 3:4-6) ǁÎb ge ge ǂanǃgâ: “Tita ge apostelgu hoagu xa ǂkharita, tita apostelse ǂgaihesa anu tama ta.” (1Kor. 15:9) ǁÎb ge ega ge xoa: “Tita ǃanun hoan xa ǂkhari ta ge nē ǀkhomma ge māhe, ǀūben ǃnâ ta nî ǃgâiǂhôasa xu ôaǃnâheǁoasa ǃkhūsib Xristub diba aoǁnâse.” (Efe. 3:8) ǁNā haisi-ams ge kaise a ǂhâǂhâsa ǁîb ai-īsib xa.