1. Jehovaba Edenni ǃhanab ǃnâ ǁîb khākhoeb xa tae-e ge ǂanǂan?

ADAMMI ge ge ǂan i ǀao-i ǃhoa tama hâsa. ǁNās ǀkhab ge ǀnîsi ge hōǃâ gagasi kurusabeb ge Evas ǀkha a ǃhoasa ǀaob ǃnâ-ū. (Gen. 3:1-6) Adammi tsî Evas tsîn ge gagasi kurusabe-i xa ge ǂan tama hâ i. ǁNāti i ge ī i xaweb ge Adamma ǂanǃgâsase ǁîb di ǀnamxaǃnâ ǀhomsi ǁGûb ǃoagu ge mâ tsî ǁGâuaba ge ǁhao. (1Tim. 2:14) ǁNās ǀkhab ge Jehovaba ǁîb khākhoeb hîna ge Adammi tsî Evas tsîna a ǂgaeǂhapub xa ge ǂanǂan. Jehovab ge ge mîmâi nē khākhoebab nî dīkākā ǃkhaisa. Xawe Jehovab ge ge mî nē gagasi kurusabeb hîna ge ǀaob ǃnâ-ū ǃhoab ǀgaiba ūhâsa Jehovaba a ǀnam khoena mâǃoas diba.—Gen. 3:15.

2, 3. Tae-i ǃaromas ge Satanni ǀonsa kaise sîsen-ūhe tama hâ i Mesiab hās aiǃâ?

² Jehovab ge ǁîb gā-aisib hoab ǃnâ ǁîba ge mâǃoa ǀgôab ǀonsa mîba da tama hâ. * Elob ge nē khākhoeb ǀonsa 2 500 kurigu khaoǃgâ ǀgui ge ǂanǂan. (Job. 1:6) ǃNona Hebre  ǂkhanidi 1 Kroniks, Jobi tsî Saxariab tsîn ǀguin ge Satanni ǀons xa ra ǃhoa. Nē ǀons ge “mâǃoa-aob” di ra ǂâibasen. Tae-i ǃaromas ge nē ǀonsa kaise sîsen-ūhe tama hâ i Mesiab hās aiǃâ?

³ Jehovab ge Satanna ǂhâbasa tama hâ ǂanǂansasiba Hebre Xoadi ǃnâ ge mā ǂgao tama hâ i. Jehovab ǂâibasen ge îs ge î di Xoade Mesiaba ǂanǂan tsî Elob khoena ǁîb ǃoa daoǁgau. (Luk. 24:44; Gal. 3:24) Mesiab ge hā o, ob ge Jehovaba ǁîba ge sîsen-ū. Tsî Jesub ǁkhāǁkhāsabegu ge Satanni xa da a ǂan xūna ge ǃgāǃgāba da tsî ǀhomǃgāgu tsîn ge nēs ǃnâ ge ǁhao. * Jehovab ge Jesub tsî ǂhauhesan tsîna nî sîsen-ū Satanni tsî ǁîb saosaben tsîna dīkākās ǃnâ.—Rom. 16:20; J.ǂHa. 17:14; 20:10.

4. Tae-i ǃaroma da ǁGâuab xa tā nî ǂâiǂhansen?

⁴ Apostel Petrub ge ǁGâuaba “ǃguru ra xammi” ase ge ǁguiǃā. Tsî Johaneb ge “kai draki” tsî “kaira ǀaob” di ge ǂgai bi. (1Pet. 5:8; J.ǂHa. 12:9) ǁGâuab xa da ge tā nî ǂâiǂhansen, ǁîb ge ǁnātikōse ǀgaisa tama hâ. (Khomai re Jakobub 4:7.) Jehovab, Jesub tsî ǂgomǂgomsa ǀhomǃgāgu tsîn ge ra mâǃgâ da. ǁÎgu huib ǀkha da ge nē khākhoeba a mâǃoa ǁkhā. Xawe ǁnās ǂam-ai da ge sao ra 3 dîde nî ǃhoaǃgao: Satanna mâs kōse ra ǂgaeǂgui da? Satanna mati khoena ra ǂgaeǂgui? Tsî Satanni ǀgaiba ǀam-e ū i hâ? Nē dîde da ra ǃhoaǃgao khami ǃgaoǃgâ re tae-e da ǁnāpaxū a ǁkhāǁkhāsen ǁkhā ǃkhaisa.

5, 6. Tae-i ǃaroma i khoesi ǂhanuba khoesib ǂhâsiga a dīǀoaǀoa ǁoa?

⁵ Satanni ge ǂgui ǃgôab mâǃoaxa ǀhomǃgāga ra ǂgaeǂgui. Kai ǁgammi dâus aiǃâb ge ǂguiga ge nana îgu sorosise khoen ǀgôadi ǀkha ǁgoe. Elobmîs ge ra mî ǁîb ge ǂgui ǃgôab ǀgamirodi [ǀhomǃgāgu] ǀkha ǀhomma xu ge ǁnā. (Gen. 6:1-4; Jud. 6; J.ǂHa. 12:3, 4) ǁNā ǀhomǃgāgu ge Satanni ǀkhāb ai ge mâ tsî Eloba ge mâǃoa tsoatsoa. Nē mâǃoa-aogu ge ǁoreb ǀguiba ra ǃaroma. Satanni ge Elob Gaosiba ǁgae tsî aitsama gao-ao kaisen hâ. Mûhe ǁoasa gaosi-i ǃnâb ge Satanna demonga ǂhanugu ǃnâ ǀgoraǂgā hâ. Tsî ǁîga ǀgaiba mā hâ îgu ǃhūbaiba ǂgaeǂgui.—Efe. 6:12.

⁶ Nē demongu ǃnâ-ūb ge Satanna khoesi ǂhanugu hoagu ai ǀgaiba ra sîsenǂui. Nē ǃkhais ge ge ama i Satanni ge Jesuba “hoa gaosidi ǃhūbaib” dide a ǁgau o. Tsî mî o: “Satsa ta ge nē ǀgaib hoab tsî gaosidi di ǂkhaib ona nî mā; tita tsîn ge ge māhe, tsî ta ǂgao ta ra-i hoa-e ǁîna ra mā xui-ao.” (Luk. 4:5, 6) Satanni ǃnāsa khoesi ǂhanuga ra ǂgaeǂgui xawe gu ge nē ǂhanuga ǃgâi xūna ǁîgu khoena ra dība. ǂGaeǂgui-aogu tsîn ge nēsa ǃgâiǂâibasens ǀkha ra dī. Xawe i ge khoesi ǂhanu i tamas ka io ǂgaeǂgui-ao-e khoesib hoab di ǂhâsiga a dīǀoaǀoa ǁoa.—Psa. 146:3, 4; J.ǂHa. 12:12.

7. Satanna mati ama tama ǂgomdi, khoesi ǂhanugu tsî ǁamaxū-aogu tsîna ra sîsen-ū? (Tsoatsoas ǃnâ hâ ai-īsiba mû re.)

⁷ Satanni tsî demongu tsîn ge ǂhanugu ǀguiga sîsen-ū tama hâ. Xawe ama  tama ǂgomdi tsî ǁamaxū-aon tsîna ra sîsen-ū “ǃhūbaib” hoaba ra ǂgaeǂhapuse. (J.ǂHa. 12:9) Ama tama ǂgomdi ǃnâ-ūb ge Satanna Jehovab xa ǂhumiba ra ǃhoa. ǁGâuab ge ge ǁapoǁapo în ǂgui khoena Jehovab ǀonsa ǀuru. (Jer. 23:26, 27) ǁNās ǀkhan ge ǂgui ǂhauǃnâ khoena Eloban ra ǀgoreǀî di ǂâi hâ demongan ra ǀgoreǀî hîna. (1Kor. 10:20; 2Kor. 11:13-15) Satanni tsîn ge ǁamaxū-aogu ǃnâ-ū ǂhumiba ra aiǃgû kai. Aiǁgause, ǁîgu ge ra mî ǂkhî ǂgaots ga ra o, ots ge ǃkhūsiba nî ôa tsî ǂgui xūna nî ǀhaoǀhaobasen. (ǂKhm. 18:11) ǁNān hîna nē ǂhumiba ra ǂgom an ge ‘ǃkhūsiba’ ra ǃoaba Elob ose. (Mat. 6:24) ǃKhūsiban ga ra ǀnam o, on ge Eloba ǀnam tide.—Mat. 13:22; 1Jhn. 2:15, 16.

8, 9. (a) Tae-e da go Adammi, Evas tsî mâǃoaxa ǀhomǃgāxa xu ǁkhāǁkhāsen? (b) Tae-i aiǂhanuba da ūhâ ǂansa Satanni ǂgaeǂguis xa?

⁸ Adammi, Evas tsî mâǃoaxa ǀhomǃgāga xu da ge ǀgam ǂhâhâsa xūna ra ǁkhāǁkhāsen. ǂGurose, ǀgam ǀkhāga ǀguiga ge hâ tsî ǀguiba da ge nî ǁhûi. Jehovab ǃoa-ai da ga ǂgomǂgomsase mâ tama io, o da ge Satanni ǀkhāb ai nî mâ. (Mat. 7:13) ǁGamǁîse, ǁnān hîna Satanni ǀkhāb ai ra mân ge ǁaerob ǃgâib ǀguiba nî hō. Adammi tsî Evas tsîn ge gere mîǁguibasen ǂgao tae-i a ǃgâi tsî tsūsa. Tsî demongu ge khoesi ǂhanugu ǂama ǁîgu ǀgaiba ra sîsenǂui. (Gen. 3:22) Xawe Satanni ra mā ǀkhaeb ge ǃgâi tama ǀamǂoasa ūhâ.—Job. 21:7-17; Gal. 6:7, 8.

⁹ Tae-i aiǂhanuba da ūhâ ǂansa Satanni ǂgaeǂguis xa? Nēs ge ra hui da î da ǀnōsa mûǂuisa ūhâ khoesi ǂhanugu ǃoa-ai. Tsî nēs ge ra ǂkhâǃnâ da î da aoǁnâ sîsenni ǃnâ aiǃgû. ǂAn da ge a Jehovab ge ra ǂhâba î da khoesi ǂhanuga ǃgôasiba ǁgau. (1Pet. 2:17) Tsî Jehovab ge ra ǂgaoǀkhā da î da khoesi ǂhanuga ǁnâuǀnam, ǁîgu ga ǁîb ǂhanuga mâǃoa tama io. (Rom. 13:1-4) Xawe da nî ǂanǃgâs ge î da tā ǀkhā-e ū. Tātsēs tsîna da ge ǀgui ǂgīǂgōsi ǃnansa naus ǂam-ai koa ǂgao tama hâ. Tsî ǀgui khoesi ǂgaeǂgui-ao-e nau-i ǀgapiga mâi ǂgao tama hâ. (Jhn. 17:15, 16; 18:36) Mû da ras ge Satanni tae-e Jehovab ǀons ǀkha ra dīsa. ǁNās ǀkhas ge nēsa kaise ra tsâǀkhā da î da khoena Elob amab xa ǁkhāǁkhā. Kaise da ge a ǂnīsa Jehovab ǀonsa tanisa. ǂAn da as ge Jehovaba ǀnams ge ǃkhūsib tsî xūna ǀhaoǀhaos ǃgâ-ai a ǀgapi.—Jes. 43:10; 1Tim. 6:6-10.

10-12. (a) Satanna mati ǀhomǃgāga ge ǂgaeǂhapu? (b) Tae-e da ǀhomǃgāgu ǁnāsa xu a ǁkhāǁkhāsen ǁkhā?

¹⁰ Satanni ge ǃgâi sîsenǂuiba ūhâ ǀgauga ra sîsen-ū khoena ǂgaeǂhapus ǃnâ. Aiǁgause, ǁîb ge khoena ra ǂgaeǂhapu în ǁîb ra ǂhâba xūna dī. ǁÎb ge ra dītsâ în khoena māǁnâsen ǁîb ǃoa-ai.

¹¹ Âi re, matib ge Satanna dī hōsa ǂgui ǀhomǃgāga ǂgaeǂhapusa. ǁÎb ge ǀnîsi ǁîgu xa ǂgui kuriga ge ǁkhāǁkhāsen, ǁîgab nî ǂgaeǂhapu tsî gu ǁîb ǀkhāba nî ūs aiǃâ. Nē ǀhomǃgāgu ge ǁîb xa ǂgaeǂhapuhe tsî sorosise khoen ǀgôadi ǀkha a ǂharugu o, o gu ge habasa ǀgôaga ge ǁgorabahe. (Gen. 6:1-4) Satanni ge nē ǀhomǃgāga sorosise ǂharugub ǀkha ǀgui ǃâitsâ tama hâ. Xawe ǁîga ǀnîsi ge mîba îgu khoena ǂgaeǂgui. ǁÎb ge ūhâ i ǂâibasens ge mîmâisa ‘suriba’ ǀgaruǀgarusa. (Gen. 3:15) Jehovab ge ǁnā ǂâibasensa Kai ǁgammi dâus ǀkha ge ǀam kai. ǁNās ge Satanni tsî mâǃoaxa ǀhomǃgāgu tsîna ge ǁaixa kai.

¹² Tae-e da nēsa xu a ǁkhāǁkhāsen ǁkhā? Tātsēs tsîna da ge tā ǁgauoǃnâ ǁgoe-ūgus tsî ǀgapiǂâixasib ǃnâ ǂgaeǂhapuhes tsîna nî mā-am. Nē ǀhomǃgāgu hîna ge Satanna a ǁhao gu ge Eloba ǂgui kuriga gere ǃoaba. ǁÎgu ge ǃgâi mâsib ǃnâ hâ i xawe gu ge ǁgai turaga ge mā-am îgu ǃnoma ǃkhō tsî kai. ǁNās ǁkhās khami da ge sida tsîna ǀnîsi Eloba ǂgui kuriga ǃhūbaib ai ra ǃoaba, ǁîb ǀapeǂhumis ǃnâ. ǃGâi gagasi mâsiba da ūhâ xawe gu ge ǃanuoǃnâ turaga a ǃnoma ǃkhō ǁkhā. (1Kor. 10:12) Kaise i ge a ǂhâǂhâsa hoaǁae sida ǂgaoga ôaǃnâsa. ǃGâi tama ǂâidi ǁgoe-ūgus didi tsî ǂhanu tama hâ ǀgapiǀgapisens tsîna mâǃoa re.—Gal. 5:26; khomai re Koloseǁîn 3:5.

13. Satanna mâ ǀgauba ra sîsen-ū sida ǂgaeǂhapus ǃnâ tsî nēsa xu da mati nî ǂgōsen?

¹³ ǀNî hâ ǀgaub Satanni ǂgaeǂhapusa ra sîsen-ūb ge hoa xūna ǂan ǂgaosa ǃgaidīb xa. Sida ǁaeb ǃnâb ge ama tama ǂgoms ǃnâ-ū ǀgui ǂgaeǂhapu da tama hâ. Xawe ǁkhoaxasib ǁaxasigu ǃnâ-ū ra ǂgaeǂhapu da. Aiǁgause, muvin, elektronik game an tsî mediab tsîn ge ǃgaidība ǁkhoaxase ra mûsen kai. Mati da nî ǂgōsen î da tā nē xūn xa ǃkhōhe? Tā da ge Elob ǀapeǂhumisa xu tae-i a ǃgâis tsî tsūs tsîna nî ǃâubasen ǁkhoaxasib tawa i ga ra hā o. Hoa da ge sida ǃgâiǂâisa nî omkhâi îs Elob  ǂgaoǀkhādi ǀkha ǀguiǃnâxa. (Heb. 5:14) Eloba da ūba hâ ǀnammi ge nî “hînaoǃnâ” dib ge apostel Pauluba ge mî. (Rom. 12:9) Dîsen ǁkhā da ge a: ‘Ti mîǁguib ǁkhoaxasiba ūhâs diba ǃgâi-e? Tita Elobmîsa ra ǁkhāǁkhā khoe-i ga mû o, tae-i muvina ta ra kōsa, mî în nî ǁkhāǁkhā ta ra xūna ta ra dīsa?’ ǃHoa da ra xūn ga sida dīgu ǀkha ǀguiǃnâxa o, ob ge Satanna ǂgaeǂhapu da tide.—1Jhn. 3:18.

14. Satanna mati a ǂgaeǂhapu da ǁkhā tsî mati da nēsa nî mâǃoa?

¹⁴ Sada ǂgaeǂhapus ǃnâ-ūb ge Satanna ra ǃaroma î da sida ǂgomǂgomsasiba Jehovab ǃoa-ai ǂoaǃnâ. Aiǁgauseb ge ra dī î-i sida aoǁnâ sîsen-e ǂhanugu xa mâǃoahe. Tamas ka io da ge sîsenni ais tsî skoli tawas tsîna a mâǃoahe ǁkhā, Elobmîs ǃoagu da ra ûi ǃkhais ǃgao. (1Pet. 4:4) ǁÎb ge sida omaris ǁanina a sîsen-ū ǁkhā în sida ǂkhabuǂâi kai î da tā ǀhaode ǃoa ī. (Mat. 10:36) Mati da nēsa nî mâǃoa? ǂGurose, da ge nî ūǃoa, Satanni sada ǃoagu ra ǃkham ǃkhaisa. (J.ǂHa. 2:10; 12:17) Tsî da ge hara mûǂuisa nî ūhâ ī ra xūn xa. Satanni ge ra mî sida Jehovaba xu da ra hō ǃgâib ǃgao ǀgui ǁîba ra ǃoaba di. ǁÎb ge ra mî ǁgâiba da ga hōǃâ o, o da Eloba nî ǃoaba ǀû di. (Job. 1:9-11; 2:4, 5) Xawe hā re î da Jehovab ai kō î da ǀgaiba hō tsî mâǃoa bi ǁkhā. Jehovab ge tātsēs tsîna ǁnāxūǃnâ da tide.—Heb. 13:5.

15. Satanna ǁgari da ǁkhā-e î da ǂgao tama da hâ xū-e dī? ǁGuiǃā re.

¹⁵ Satanni ge khoena a ǁgari ǁoa în ǁîn ǂgao tama hâ xū-e dī. (Jak. 1:14) ǀŪǃgâsiba xun ge ǂgui khoena Satanni ǂâisa ra dī. Xawen ga amaba ǁkhāǁkhāsen o, on ge ra ǁhûi ham-en nî ǃoaba ǃkhaisa. (ǃNǃkh. 3:17; 17:30) Eloba ǃoabasa da ga mîǁgui o, ob ge Satanna sida ǂgomǂgomsasiba a khôa ǁoa.—Job. 2:3; 27:5.

16, 17. (a) Satanni tsî demongu tsîna matikōse a ǀgaisa? (b) Tae-i ǃaroma da ǃao tide ǃgarise Jehovaba ǃoa ǀgoresa?

¹⁶ Satanni tsî demongu tsîn ge ǁnātikōse ǀgaisa tama hâ. Aiǁgause, Elobmîs ge mî tama hâ ǁîgu khoen ǂâis tsî ǂgaob tsîna a ǂan ǃkhaisa. Jehovab tsî Jesub tsîn ǀguin ge ǁnā ǁkhāsiba ūhâ. (1Sam. 16:7; Mrk. 2:8) O, ǃgarise ǀgoreǂuis? ǃAo î da nî ǁGâuab tsî demongu sida ǀgorede nî ǁnâu tsî nî ǂhani ǃkhaisa? ǃEreams ge hî-î. Tae-i ǃaroma? Jehovab ǃoabas ǃnâ ǃgâi sîsen ga dīsa da ge ǃao tama hâ ǁGâuab ga mû xawe. ǁNās ǀkha da ge tā nî ǃao ǃgarise ǀgoresa ǁGâuab ga ǁnâu xawe. Elobmîs ge ǂgui ǃoaba-aon aiǁgaude ūhâ hîna ge ǃgarise gere ǀgore na. ǁGauǁgau-i ge a ǀkhai ǁîn ge ǁGâuab ǁîn ǀgorede nî ǁnâusa gere ǃaosa. (1Gao. 8:22, 23; Jhn. 11:41, 42; ǃNǃkh. 4:23, 24) Elob ǂâis ǀkha da ga ǀguiǃnâxasib ǃnâ ǃhoa tsî ga ra tanisen o, o da ge ǂgomǃgâsiba a ūhâ ǁkhā Jehovab nî hui da ǃkhaisa.—Khomai re Psalmdi 34:7.

¹⁷ Sida khākhoeba da ge nî ǂan. Xawe da ge tā nî ǃao bi. Jehovab huib ǀkhan ge ǀoasa kurusa ūhâ tama hâ khoena Satanna a mâǃoa ǁkhā. (1Jhn. 2:14) Mâǃoa bi da ga o, ob ge sida xu nî bē. (Jak. 4:7; 1Pet. 5:9) ǂKhamkhoen ge Satanni ǃkhōǃkhaise ī. Tae-en nî dī în ǁGâuaba mâǃoa ǁkhā? Sao ra ǁkhāǁkhāǃâs ge nē dîsa nî ǃhoaǃgao.