1, 2. (a) Tae-i ǃaroma da ǂgomǂgomsase ra aoǁnâ ǃgâsan aiǁgaus xa ra ǂkhâǃnâhe? (Tsoatsoas ǃnâ hâ ai-īsiba mû re.) (b) Jesuba tae-e “aboxan ǃhūb” ǃnâ aoǁnâs xa ge mî? (ǁNaeǁgau saosa mû re.)

SERGIOB TSÎ OLINDAS tsîn ge aimâba-ao khoe-aogura hîna 80 kurigu ǃnâ hâ ra, ǁîra ge Amerikab ǃnâ ǁan hâ. ǁÎra ǀnūgu hîna ra tsûgu ge ra ǃaroma î ra tā ǃgûmâ. Xawe ra ge kurikorobe tsēs hoasa 7ǁî kamaba xu ǁamaxū ǃkhaib ǃnâ sī ra aoǁnâ. ǁÎra ge bēb ǀgūse ra mâ tsî ǃkharu ra khoena Elobmîs ai a ǃgaoǃgaosa ǂkhanina ra mā. ǂGui khoen ge ǃgâ tama hâ xawe ra ge ǁîra ǀû tamase ra aoǁnâ. Tsî ǃuia omsa ǃoa ra oa. Tsî ra ge ǁgoaga ǁkhawa ǁamaxū ǃkhaiba ǃoa ra ī. Nē ǂgomǂgomsa khoe-aogura ge ǃnani ǁgoade wekheb ǃnâ Gaosib ǃgâiǂhôasa ra aoǁnâ, kurib hoaba.

² Sergiob tsî Olindas tsîra khamin ge ǂgui ǃgâsana ǃhūbaib ǂhawase khoen amaba ūǃoa ǂgao tama hâ ǃādi ǃnâ ra aoǁnâ. Nēs ga sadu ǀkha ga ra ī o, o da ge sadu  ǂgomǂgomsasib ǃgao ra koa du. * Sadu ǂgomǂgomsasib Jehovaba ǃoabas dib ge ǂgui khoena ra ǂkhâǃnâ, ǂansa ūhâ ǃgâsan tsîna. “Nē ǃgâsan ǀkha ta ga ra sîsen o, o ta ge ra khoakhoahe ǁîn aiǁgaus xa” digu ge ǀnî ǃnarimâra mûǂam-aoga ra mî. “ǁÎn ǂgomǂgomsasib ge ra ǁgari te î ta aiǃgû tsî aoǁnâ sîsenni ǃnâ ǁkhoaǂgaosiba ūhâ.” “ǁÎn aiǁgaus ge ti ǂgaoba ra tsâǀkhā.”

3. Mâ ǃnona dîde da nî ǃhoaǃgao tsî tae-i ǃaroma?

³ Jesub ge mîmâi aoǁnâ sîsen-e dīǀoaǀoas ǃaroma hā re î da nē ǃnona dîdi ǃereamde ǃhoaǃgao: Tae-i ǃaroma da ǀnî ǁaeb ai ra ǂkhabuǂâi? Mati da nî ǂûtani? Tae-e nî hui da î da ǂûtani?

4. (a) Jodeǁîn di ǁgai tanisen ǀgauba Pauluba mati ge tsâǀkhā? (b) Pauluba tae-i ǃaroma nēti gere tsâ?

⁴ ǀNîsi du ge ra ǂkhabuǂâi khoen ga amab ūǃoa tama io. Xawe apostel Paulub tsîn ge di gere tsâ. ǁÎb ge 30 kuriga aoǁnâ sîsenni ǃnâ ǁhao tsî ǂgui khoena ge hui în Xristub di ǁkhāǁkhāsabe kai. (ǃNǃkh. 14:21; 2Kor. 3:2, 3) Xawes tsînab ge ǂgui Jodeǁîna ge hui hō tama hâ i în ama Xristeǁî kai. Khoen ge Pauluba gere ǂhābē tsîn ge ǀnîna gere mâǃoa bi. (ǃNǃkh. 14:19; 17:1, 4, 5, 13) Jodeǁîn tanisen ǀgauba mati Pauluba ge tsâǀkhā? ǁÎb ge ge mî: “Amaba ta ra mî Xristub ǃnâ . . . Kaise ta ǃoa hâ ǃkhaisa, tsî hugaǀgui ta tsûaǂgao hâ ǃkhaisa.” (Rom. 9:1-3) Pauluba tae-i ǃaroma nēti gere tsâ? ǁÎb ge aoǁnâ sîsen-e ge ǀnam i. Jodeǁînab ge ǁînab ra tsâba ǃkhais ǃgao gere aoǁnâba. ǁNā-amagab ge Pauluba kaise ge tsûaǂgao Elob ǀkhoman ge ūǃoa ǂgao tama hâ io.

5. (a) Tae-e ra ǂgae da î da sida ǀgūkhoena aoǁnâba? (b) Tae-i ǃaroma da ǀnî ǁaegu ai ra ǂkhabuǂâi?

⁵ Paulub khami da ge sida tsîna khoena da ra tsâba amaga ra aoǁnâ. (Mat. 22:39; 1Kor. 11:1) Tae-i ǃaroma? Sida ge a ǂan ǀkhaegu hîna da a hōǃâ ǁkhā ga Jehovaba ǃoabasa xu. Sida ǂharis ǃnâ hâ khoen xa da ra ǂâi o, o da ge ra mîbasen ‘ǁîn ge a ǀū tae-en ra ǂoaǃnâ ǃkhaisa.’ ǁNā-amaga da ge ǁîna ra ǂkhâǃnâ în Jehovab xa hâ amab tsî ǁîb ǂâibasens khoen ǃgaos tsîna ǁkhāǁkhāsen. Khoen hîna da aoǁnâ sîsenni ǃnâ ra ǀhao-ūna da ge ra mîba: ‘Kaise ǃgâi ǀkhaeba da ge go hauba du. Toxoba du ūǃoa re.’ Khoen ga nē ǀkhaeba ūǃoa tama io, o da ge ra “tsûaǂgao.” Nē tsâsigu ge sida ǂgoms a ǂhabusa ǃkhaisa ǁgau tama hâ xawe ra ǁgau aoǁnâ sîsen-e da a ǀnamsa. ǁNā-amaga da ge ǂkhabuǂâi da ga ra xawe ra aiǃgû. Elenas hîna 25 kuriga aimâba-ao sîsen-e ra dīs ge ra mî: “Aoǁnâ sîsenni ge kaise a ǃgom. Xawe î ge nē sîsenni khami i sîsen-e a ǀkhai.”

6. Mâ dîde da nî ǃhoaǃgao tsî nēsa da mati nî dī?

⁶ Tae-i ǃaroma da a ǂan sida aoǁnâ sîsenni ge nî ǂûtani di? Nē dîsa ǃereams ǃaroma hā re î da ǀgam ǂkhōra Jesub di ra kō, ǁîb ge ǁnāpa mati da nî  ‘ǂûtanisa’ ra ǁgau. (Mat. 13:23) ǂGuros ge ǂauxûiǂûhais xa hâ.

7. (a) Ham-e “ǃhanasîsen-aob,” ‘ama-ai ǂauxûiǂûhaib’ tsî “ǂgonab” tsîna ra ǂnûǁkhaeba? (b) Mâ dîdi ǃereamde da nî ôa?

⁷ Khomai re Johaneb 15:1-5, 8. Jesub ge ǁîb apostelga ge mîba: “Nēs ǃnâb ge ti Îba ǂkhaiǂkhaihe hâ, kaise go ga ǂûtanio, tsî ti ǁkhāǁkhāsabe go kao.” Jesub ge Jehovaba “ǃhanasîsen-aob” ase ge ǁguiǃā, ǁîba ‘ama-ai ǂauxûiǂûhaib’ ase tsî ǁîb ǁkhāǁkhāsabega “ǂgonab” [ǁnâugu] ase. * Mâ ǂû-en Xristub saosabena nî tani? Jesub ge nē ǂkhōs ǃnâ mî tama hâ nē ǂû-i a taesa, xaweb ge ǀgui xū-e ge ǁguiǃā hîna ǃereamsa ra mā da-e.

8. (a) Nē ǂkhōs ǃnâ i ǂûtanisa tae-i ǃaroma ǁkhāǁkhāsabedīsa ǃoa ǁnaeǁgau tama hâ? (b) Jehovaba sida xu tae-e ra ǂgaoǀkhā?

⁸ ǁÎb ǁGûb xab gere ǃhoa o, ob ge Jesuba ge mî: “Mâ ǂgona-i hoa-i, tita ǃnâ hâ-i, ǂûtani tama-eb ge ra ūbē.” ǀNî hâ mîdi ǃnâb ge Jehovaba ǂûtani da ga ra o ǀgui ǁîb ǃoabasaben ase ra mû da. (Mat. 13:23; 21:43) Nē ǂkhōs ǃnâ î ge Xristeǁîn ǂûtanisa ǁkhāǁkhāsaben hînan ra dīna xu hâ tama hâ. (Mat. 28:19) Di î ga ī hâ o, on ge ǂgomǂgomsa Xristeǁîn hîna ǁkhāǁkhāsabena dī tamana ǂûtani tama ǁnâugu xa ra ǂnûǁkhaebahe Jesub ǂkhōs ǃnâ. Xawe nēs ge di ī tama hâ. Tae-i ǃaroma? Sida ge khoena ǁgari tama hâ în ǁkhāǁkhāsabe kai. Jehovab ǀnamma î ge ǁgau tama hâ khoena ǁîn ǁkhāsib ǃnâ hâ tama xū-e dī kai tsî ǀgoraǃgâsa. Jehovab ge sida ǁkhāsib ǃnâ hâ xūn ǀguina ra dī kai da.—Deu. 30:11-14.

9. (a) Mâ sîsen-e ra ǂûtani kai da? (b) Mâ ǂkhōsa da nēsi nî ǃhoaǃgao tsî tae-i ǃaroma?

⁹ Tae-e da nî ǂûtani? Nē ǂû-i ge xū-i hîna da hoa da ra dī-e ǃoa ra ǁnaeǁgau. Mâ sîsen-e ‘ǂûtanisa’ ǃkhōǂgā hâ? ǃGâiǂhôas Elob Gaosib disa aoǁnâsa. * (Mat. 24:14) Jesub ǂkhōs tsoro-aob dis ge nēsa ra ǃeream. Hā re î da ǀgamǁî ǂkhōsa kō.

10. (a) ǃKhoms tsî ǃhūb tsîna nē ǂkhōs ǃnâ tae-e ra ǂnûǁkhaeba? (b) ǃHoroba tae-e ra ǂûtani?

¹⁰ Khomai re Lukab 8:5-8, 11-15. Tsoro-aob ǂkhōs ǃnâ î ge ǃkhomsa “Elob mîs” tamas ka io Gaosib ǃgâiǂhôasa ǃoa ra ǁnaeǁgau. ǃHūb ge khoe-i ǂgaoba ra ǂnûǁkhaeba. ǃKhoms hîna ge ǃgâi ǃhūb ai a ǁnās ge ǁhai tsî ǃgâise ge kai tsî ge ǃhoro kai. Tsî “kaidisiǃnâguse ge ǂûtani.” Xawe ǃhoro haiba tae-e ra ǂûtani? ǂKhari ǃhoro haiga î ra ǂûtani? Hî-î, ǃkhoms hîna ge ǂûtanis ge ge ǃhoro kai. Nē ǂkhōs ǃnâ î ge ǀgui ǃhorob di ǃkhomma ǂgui ǃhorona ge kuru. Nē ǂkhōsa mati aoǁnâ sîsen-e ǃoa ra ǁnaeǁgau?

11. (a) Tsoro-aob di ǂkhōsa mati aoǁnâ sîsen-e ǃoa ra ǁnaeǁgau? (b) Mati da Gaosib ǃkhomma ra ǃhana?

¹¹ Sida Xristeǁî ǁgûn tamas ka io ǀnî hâ ǃgâsan ge sida ǀkha kuriga ǃkharu hâse Gaosib ǃgâiǂhôas xa ge ǃhoa. ǁÎn ge ge ǂkhî mûsa sida ge nē ǃgâiǂhôasa a ūǃoasa. Jesub ǂkhōs ǃnâ î ge ǃgâi ǃhūba ǃkhomma a hō khami da ge sida tsîna  ǃgâiǂhôasa ge ūǃoa tsî ge ǃkhōǀgara. ǁNās ge ge ǃaroma î-i Gaosib ǃgâiǂhôasa ǁhai, ǃgâise kai tsî ǃhoro hai kai hîna ra ǂûtanisa. ǃHoro haib ge ǀasa ǃhoroba ǂûtani kai tama hâ. Xawe ǃkhomma ra ǂûtani khami da ge sida tsîna ǁkhāǁkhāsabedī tama hâ xawe Gaosib ǃkhomma ra ǂûtani. * Mati da Gaosib ǃkhomma ra ǂûtani? Gaosib ǃgâiǂhôasa da khoe-i ǀkha ra ǀgoragu ǃnās hoasa da ge sida ǂgaob ǃnâ ge ǃhanahe ǃkhomma ra ǀgora. (Luk. 6:45; 8:1) Nē ǂkhōs ge ra ǁkhāǁkhā da Gaosib ǃgâiǂhôasa da ga aoǁnâs kōse da ge nî ‘ǂûtani.’

12. (a) Tae-e da Jesub ǂkhōra ǂauxûiǂûhais tsî tsoro-aob tsîn di ra xu ra ǁkhāǁkhāsen? (b) Nēsa mati ra tsâǀkhā da?

¹² Tae-e da Jesub ǂkhōra ǂauxûiǂûhais tsî tsoro-aob tsîn di ra xu ra ǁkhāǁkhāsen? Nēs ge ra hui da î da mû ǂûtanis matikō khoen go amaba sida ǂharis ǃnâ a ūǃoasa xu hâ tama hâsa. Xawes nēsa sida ǂgomǂgomsasiba xu hâsa. Paulub ge ge mî: “Tsî mâb hoab ge ǁîb di amǃnâsa ǁîb di sîsenni ǂûb ǃoa nîra ǃkhōǃoa.” (1Kor. 3:8) ǀAmǂoas ge sida ra dī sîsen-e xu hâ, matikō khoen ra ūǃoasa xus ose. Matildas hîna 20 kuriga a aimâba-aos ge ra mî: “Kaise ta ge ra ǂkhî mûsa Jehovab mati sida sîsen-e ra ǀkhaesa.”

13, 14. Romeǁîn 10:1, 2 tsîn ǃoagub ge Pauluba tae-i ǃaroma khoen hîna ge Gaosib ǃgâiǂhôasa ūǃoa ǂgao tama hâ îna ǀûs ose gere aoǁnâba?

¹³ Tae-e nî hui da î da ǂûtanis ǃnâ mâǀgai? Paulub ge Jodeǁîn ge Gaosib ǃgâiǂhôasa ūǃoa ǂgao tama hâ io gere ǂkhabuǂâi. Xaweb ge ge ǀûsen tama hâ i. ǁÎb ge Romes ǃnâ hâ Xristeǁîna ǃoab ge xoa sîǂkhanis ǃnâ ge mî: “Ti ǂgaob di turab tsî ti ǀgores, Israelǁaesa ta Elob aiǃâ ra dības ge ǁîn di ǃgâiǃōsib ǃoa hâ. ǁÎna ta kom ra  ǃkhō-ambao, Elob ǂaman ra tau ǃkhaisao, xawen kom ǁnâuǃāb ose ra dīo.” (Rom. 10:1, 2) Pauluba tae-e ge xoa aoǁnâ sîsenni ǃnâ aiǃgûs xa?

¹⁴ ǂGuroseb ge tae-i ǃaromab ge Jodeǁîna ǀû tamase gere aoǁnâbasa ge mî. ǁÎb ge ǁîb “ǂgaob di turab” xa gere ǂgaehe. ǁÎb ǂgaob di turab ge ge ǃaroma în Jodeǁîna sâuhe ǁkhā. (Rom. 11:13, 14) ǀGamǁîseb ge Pauluba ‘Elob aiǃâ’ ge ǀgore. ǁÎb ge Eloba ǀgores ǃnâ ge ǀkhomma în Jodeǁîna Gaosib ǃgâiǂhôasa ūǃoa. ǃNonaǁîseb ge ge ǀaro: “Elob ǂaman ra tau ǃkhaisao.” ǁÎb ge khoen ǃnâ ǃgâiǃgâibasensa ge ūhâ i. ǁKhoaǂgaosib ge a ǃaroma ǁkhā în khoena Xristub di ǁkhāǁkhāsabe kai, Paulub ge nēsa ge ǂan i.

15. Mati da Pauluba a ǁgae ǁkhā? Aiǁgaude mā re.

¹⁵ Mati da Pauluba a ǁgae ǁkhā? ǂGurose da ge khoen hîna ‘ǀamo ûiba ǃoa ǃkhōǂuibasenhe hâna’ nî ôa. ǀGamǁîse da ge Jehovaba ǀgores ǃnâ nî ǀkhomma îb khoen di ǂgaoga ǁkhowa-am. (ǃNǃkh. 13:48; 16:14) Silvanas hîna 30 kuriga a aimâba-aos ge ra mî, “omsa xu oms ǀkha ta nî aoǁnâs aiǃâ ta ge Jehovab ǃoa ra ǀgore tsî ǁîba ra ǂgan îb ǃgâi mûǂui ǀgauba mā te.” Eloba ǃoas tsîna da ge ra ǀgore îgu ǀhomǃgāga daoǁgau da ǂhauǃnâ ǂgaoga ūhâna ǃoa. (Mat. 10:11-13; J.ǂHa. 14:6) Roberti hîna 30 kuriga a aimâba-aob ge ra mî, “ǀhomǃgāgu hîna tae-i khoen ûib ǃnâ ra īsa a ǂan gu ǀkha sîsens ge kaise a ǁkhoaxa.” ǃNonaǁîse da ge khoen ǃnâ ǃgâina nî mû. Carli hîna a ǀhaohâb ǃûi-aob ge 50 xa ǃnāsa kuriga ǁāǁnâhe hâ. ǁÎb ge ra mî: “Tita ge khoe-i tanisen ǀgaub, ǀnom ǀgaub tsî khoe-i ra dî ǂhauǃnâ dîdi tsîn xa ra ǂgaehe.” Paulub khami da ge sida tsîna ǂûtanis ǃnâ a mâǀgai ǁkhā.

16, 17. (a) Tae-e da Aoǁnâ-aob 11:6 sa xu ra ǁkhāǁkhāsen? (b) ǂKhō re sida ǃhana sîsenni mati ǃgaoǃgâ ra khoena ra tsâǀkhā ǀgausa.

¹⁶ Sida ra aoǁnâ Gaosib ǃgâiǂhôas ga khoen ǂgaoga tsâǀkhā tama ga ra i xawe da ge tā sida ǃhana sîsen-e nî ǃgôaǁnâ. (Khomai re Aoǁnâ-aob 11:6.) ǂGui khoen ge ǃgâ da ǂgao tama hâ xawe sida ra dī sîsen-e ra ǃgaoǃgâ. ǁÎn ge sida ra ana ǀgaub, ǃgâi tanisen ǀgaub tsî ǀnoms tsîna ra kō. ǁAeb ra i khami î ge sida tanisen ǀgauba ǂguina nî hui în mû ǁîn sida ra mû ǀgaub ǂhanu tama hâsa. Sergiob tsî Olindas tsîn ge ǁnāti i ǀkharaǀkharana ge mû.

¹⁷ Sergiob ge ra mî: “ǁAerob ǀgaibam ge ǀaeb xa ǃaromahe hâse ǁamaxū ǃkhaiba ǃoa ge ī ǀû. ǁKhawam ge ī tsoatsoa o, on ge ǃkharu gere khoena ‘tae-e ge hā? di gere dî mi tsî ǁkhore ro da ge hâ di gere mî.’” Olindas ge ǀnom rase ra mî: “Bē ǃnari-aogu ge gere tawede mi tsî ‘ǃgâi sîsen-e ro ra dī’ di gere ǃau. Tsî sida ǂkhanin tsîna gere ǂgan.” Tsîb ge ǀnî ǁae aoba ǁîra ra aoǁnâ hîna blomde ge mā ra tsî gere gangan ra ǁîra sîsenni ǃaroma.

18. Tae-i ǃaroma du “ǂûtanis” ǃnâ nî mâǀgai?

¹⁸ Sida ǃomga da ga ‘sâ kai’ tama ga ra io Gaosib ǃkhomma ǃhanasa, o da ge ǃâ-e ūhâ “hoa ǁaedi mîdansa ǃoa.” (Mat. 24:14) Xawe da ge hoan ǂam-ai kaise ra ǂkhî mûsa Jehovab xa da ge ra ūǃoahe di, ǁîb ge “ǂûtani” ran hoana a ǀnam.