NĒ ǁGAI ǃhūbaib ǃnâ da ûi hâ ǃkhais ǃgao da ge ǃgarise nî sîsen, î da ǂkhîba ūhâ. ǂKhîba da ge a ūhâ ǁkhā xawe ǁîba ūhâ ǀgaras ge ǀnî ǁaega nî ǃgom i. Elobmîsa mati a hui da ǁkhā î da hâhâ nî ǂkhîba ūhâ? Tsî da mati nau khoena a hui ǁkhā în ǁîn tsîna nē ǂkhîba ūhâ?

Ama ǂkhîba da ge ǃnorasase tsî da ga emosioneelse ǃgâise ga ra tsâ o ǀgui nî ūhâ. Sada tsîn ge ǀgaisa ǀhōsagusisa nau khoen ǀkha nî omkhâi. Xawe ama ǂkhîba ūhâs ǃaroma î ge kaise a ǂhâǂhâsa Elob ǀkha ǀhōsagusisa ūhâsa. Nēsa da mati a dī ǁkhā?

Jehovab di mîmâidi tsî tsoatsoadi tsîna da ga ra ǁnâuǀnam o, o da ge ra ǁgau ǁÎb ai da ra ǂgomaiǂnûi tsî ra ǂkhîb di ǀhōsa kai ǂgaosa. (Jer. 17:7, 8; Jak. 2:22, 23) Xaweb ge ǁîba nēn hoan ǃnâ sida ǃoa ǀgū tsî ǂkhîba ra mā da. Jesajab 32:17 ge ra mî: “Ob ge sîsenni ǂhanu-aisib diba ǂkhîb ase nîra ī; os ge ǃoabas ǂhanu-aisib disa sâ tsî ǂkhîse hâb ase nîra ī ǀamosib kōse.” Sada ge ama ǂkhîba Eloba ǁnâuǀnams ǃnâ-ū ǀgui nî hō.—Jes. 48:18, 19.

Ama ǂkhîba ūhâs ǃaromab ge sida ǁGûba kai ǀkhaeba ge mā da, ǁnāb ge ǁîb ǃanu gagaba.—ǃNǃkh. 9:31.

Apostel Paulub ge ǂkhîba 3ǁîse Elob “Gagab di ǂûb” ase ra ǁguiǃā. (Gal. 5:22, 23) Ama ǂkhîb Elob gagab ǃnâ-ū ǀgui a hōhe ǁkhā amaga da ge nî dītsâ nē ǂkhîba omkhâisa. Hā re î da Elob gagab ra hui da ǀgauba ǃhoaǃgao.

 ǂGurose, Elobmîsa tsēs hoasa khomais ǃnâ-ū da ge ǂkhîba a omkhâi ǁkhā. (Psa. 1:2, 3) Khomai da ra xūn xa ǂâiǃgâs ge ra hui da î da Jehovab ǂâi ǀgauba ǁnâuǃā. Aiǁgause, da ge ra mû matib Eloba ǂkhîb ǃnâ ra hâsa tsî tae-i ǃaromab ǂkhîba ǁîba a ǂhâǂhâsaba ǃkhaisa. Tsî Elobmîsa xu da ra ǁkhāǁkhāsen xūna da ga sida ûib ǃnâ ga ra ûiǂui o, o da ge kai ǂkhîba sida ûib ǃnâ ra hōǃâ.—ǂKhm. 3:1, 2.

ǀGamǁîse, da ge Elob ǃanu gagaba nî ǂgan. (Luk. 11:13) “Tsî Elob di ǂkhîb, ǁnâuǃāb hoaba ǃnā hâba, ab sadu ǂgaogu tsî ǂâidi tsîna Xristub Jesub ǃnâ sâu” dib ge Jehovaba ra mî. (Fil. 4:6, 7) Jehovab ǃanu gagab ai da ga ra ǂgomaiǂnûi o, o î ge sida ǂgaoga ǂkhîb ǀkha nî ǀoa. Tsî nē ǂkhîban ge ǁÎba ra ǃoaban ǀguina a ūhâ ǁkhā.—Rom. 15:13.

ǀNî khoena mati nē Elobmîs ai ǃgaoǃgaosa ǁgaraga ǁîn ûib ǃnâ ge dīǀoaǀoa? Tsî ǀkharaǀkharana ge dī în ǂkhîba Jehovab ǀkhas, ǁî aitsama tsî nau khoen ǀkhas tsîna ūhâ.

ǀNîn hîna Xristeǁî ǀhaohâb ǃnâ hân ge ǃhaese gere “ǁaixa.” Xawen ge nētsē khoexaǃnâ, ǃnūǃâxa tsî ǂkhîb ǀkha nau khoen ǀkha ra hâ. * (ǂKhm. 29:22) Hā re î da ǀgam ǃgâsa ra aiǁgaudi xa ǃhoa hîna ge ǁaib di ǃgomsiba dansa a hōba ra.

Davib ǁgai tanisen ǀgaub ge ǁîb di ǃhoa ǀgauba gere tsâǀkhā. Elob aib nî māǁnâsens aiǃâb ge ǁîba ǁgai xūna nau khoen xa gere mî tsî ǃgâi tama ǃhoa ǀgaub tsîna gere sîsen-ū ǁîb omaris ǁanin ǃoagu. ǁAeba xu ǁaeb ǀkhab ge Daviba ge mû ǁîb tanisen ǀgaub ǃgâi tama hâsa tsîb ǂkhîba nî ôasa. ǁÎba mati ge ǁkhāǁkhāsen ǂkhîba omkhâisa? ǁÎb ge ra mî: “Elobmîs tsoatsoade ta ge ti ûib ǃnâ ge sîsen-ū tsoatsoa tsî ǁnās ge ǃgôasiba tita tsî ti omaris ǁanin ǁaegu ge omkhâi.”

Raxels ge kaikaihe ǀgaub ge ǁîs ǂūba gere tsâǀkhā. ǁÎs ge ra mî: “Nēsis kōse ta  ge ǃhaese ǁaixas ǀkha ǃgomsiba ūhâ, ǂkhabab xa ǀoa hâ oms ǃnâ ta ge a kaikaihe amaga.” Tae-e ǁîsa ge hui îs ǂkhîba omkhâi? ǁÎs ge ra ǃeream: “Tita ge tsēs hoasa Jehovaba ǃoa ǀgore tsî gere ǂgan bi îb hui te.”

Davib tsî Raxels tsîn ge Elobmîs tsoatsoade sîsen-ūs, khoe-i ûiba ra ǀkharaǀklhara ǀgaus aiǁgaudi ǀgui. Nē ǁgai ǃhūbaib ǃnâ da ûi hâ xawe da ge ǂkhîba sida omaris ǁanin tsî ǃgâsan ǁaegu a omkhâi ǁkhā. Tsîb ge Jehovaba nēn hoan ǂam-ai ra mîba da “hoa khoen ǀkha ǂkhîb ǃnâ ûi re” di. (Rom. 12:18) Nēsa amabes ǃnâ ǂhâbasa-e tsî tae-e da ra hō ǂkhîba sauruǃgons ǃnâ-ū?

Aoǁnâ sîsenni ǃnâ-ū da ge khoena ra hui în ǂkhîb di haisi-ams Gaosib disa ǁnâu. (Jes. 9:6, 7; Mat. 24:14) Tsîn ge ǂguina nē haisi-amsa ra ūǃoa. Tsîn ge ǁîna nēs xa ǃaromahe hâse ǁaib tsâsib xa ǃhūbaib ǃnân ra mû xūn xa ǃao kaihe tama hâ. Tsîn ge “ôa re ǂkhîba, î sauruǃgon bi” di hâ mîdi xa ǃâubasensa hānîǁaeb xa ra māhe.—Psa. 34:14.

Xawe hoa khoe taman ge nē ǃgâiǂhôasa ǃgâise ra ūǃoa na. (Jhn. 3:19) ǁNās ǀkha da ge Elob gagab ǀkha ra sîsenǀhao î da ǂkhîb tsî ǃgam ǃgôasib tsîn ǀkha ǁîna ǃgâiǂhôasa mîba. Nē ǀgaub ǃnâ da ge Jesub daoǁgausa ra sao hînab ge Mateub 10:11-13 ǃnâ a mîsa: “Tsî om-i ǃnâ go ga ǂgâo, ǁî-i dina tawede. Tsî ǁnā om-i din ga anu hâ, ob nî ǂkhîb âgo ǁîn ai hā, xawe anu taman ga io, ob nî ǂkhîb âgo sago ǃoa oa.” Jesub di daoǁgausa saos ǃnâ-ū da ge ǃgâ ǂgao tama go hâ i khoe-e ǂkhîb ǃnâ ra xu.

ǂKhîb tsîna da ge ra sauroǃgon ǂhanub ǂamkhoega da ga ǃgôasib ǃnâ ga ra ǃhoa-ū o, nēs ge ǁîn hîna ra mâǃoa dan tsîna ǃkhōǂgā hâ. Aiǁgause, î ge ǀnî Afrika ǃhūb di ǂhanub ǂamkhoega sida Gaosib ǀhûǃnâ-ommi nî omhe ǃkhaisa ge ǂgao tama hâ i. Nē ǁhōba sîsenǂams ǃgaob ge ǀnî hâ ǃgâsab hîna ge sîsabese kuriga ǃkharu hâse gere sîsenna ge sî-e îb ǂhanub ǂamkhoegu hîna Englandi ǃnâ hâgu ǀkha sî ǃhoa. ǁÎb ge ge sî-e îb Jehovab di ǀHûǀguitimî-aon mati ǂkhîb ǃnâ ra sîsen ǀgauba sī ǂamkhoega mîba. Nē sarisa mati ge ǀamǂoa?

ǁÎb ge ra mî: “Tita ge sekretaries tawa a sī o, o ta ge ǁîs ana ǀgaub ai ge mû ǁîs tita ge ǁkhāǁkhāsen gowaba ra ǃhoasa. O ta ge ǁîsa ǁîs gowab ǃnâ ge ǃhoa-ū tsîs ge ǁîsa ǃhurib xa ‘sadu saris ǂâibasensa a tae?’ di ge dî. Xawe ta ge tita ǁîsa ge mîba ǂamkhoeba ta ge ra mû ǂgao di. ǁNās khaoǃgâs ge ǁîsa ǂamkhoeba ge ǁkhami tsîb ge ge hā tsî ǁîb gowab ǃnâ ge tawede te. Tsî ta ge ǁnās khaoǃgâ ǁîba ǃgâi tsî ǃamku ǀgaub ǃnâ Jehovab di ǀHûǀguitimî-aon ǂkhîb ǃnâ ǀguiba ra ǃoaba xū-e ge mîba.”

ǃGâsab di ǃamku tsî khoexaǃnâ ǀgaub ge ge ī ǁkhā kai îb ǂhanub di ǂamkhoeba ǀHûǀguitimî-aon ǃoagu hâ mâǃoasa dawa. Tsî î ge ǁnās ǀkha Afrikab di ǃhūgu ǃnâ om sîsen-e ge mā-amhe. ǃGâsan ge nēs xa ge ǂkhî! ǁNās ǃaroma î ge kaise a ǂhâǂhâsa khoena ǃgôasib ǃnâ ǃhoa-ūsa nēsa xu da ǂguina a ǀama ǁkhā amaga, nēs ge ǂkhîb tsîna ǃkhōǂgā hâ.

Nētsēn ge Jehovab di khoena gagasi paradais ǃnâ ra ûi hîna ǂkhîba ūhâsa. Sadu tsîn ge nē ǂkhîb ǃnâ ǃâ-e a ūhâ ǁkhā, nē gagab di ǂûba du ga ra omkhâi o. Xawe du ge nēn xa a ǂhâǂhâsase Jehovab di mā-amsa nî hō tsî ǀgui tsē kai ǂkhîb xa ǀoa hâ ǃhūbaib ǃnâ nî ûi.—2Pet. 3:13, 14.