1-3. (a) Psalmdi 5:4-6 ǃoagub Jehovaba mati tsūdīgu ǃoa-ai ra tsâ? (b) Tae-i ǃaroma da a mî ǁkhā ǀgôaǀgaiǃkhōs “Xristub di ǂhanub” xa ra mâ ǃoahesa?

JEHOVA ELOB ge hoa ǃnôa tsū xūna a ǃhuisa. (Khomai re Psalmdi 5:4-6.) ǁÎb ge kaise ǀgôana ǃgâi tamase hâ-ūhesa a ǃhuisa tsî ǃgōsase ǀgôa ǀgaiǃkhōsa. Jehovab aiǁgausa ǁgaes ǃnân ge Jehovab di ǀHûǀguitimî-aona ǀgôa ǀgaiǃkhōsa ǃhuisa tsî nēsa Xristeǁî ǀhaohâgu ǃnâ ǃkhōǃkhō tama hâ.​—Rom. 12:9; Heb. 12:15, 16.

² Hoa ǀgaugu ǃnâ ǀgôan ǀkha tsūse hâs ge “Xristub di ǂhanub” ǃnâ ra mâǃoahe. (Gal. 6:2) Tae-i ǃaroma da nēti ra mî? ǃKharu go ǁkhāǁkhāǃâs ǃnâ da go ǁkhāǁkhāsen khamib ge Xristub di ǂhanub hîna hoa xūn Jesub gere ǁkhāǁkhā dīb tsî mîb geren hoana ǀnammi ai ge ǃgaoǃgaosa i tsî ǂhanu-aisiba gere aiǃgû kai. Nē ǂhanub xa ǂgaeǂgui-e hâsen ge ama Xristeǁîna ǃnorasase tsî ama ǀnam-en a ǃkhaisa ǁîn ǀgôana ra tsâ kai. Xawe ǀgaiǃkhōs ge kaise a ǁgai ǀgôana i ǀnam-e taman hâ khami ra tsâ kai tsî ǃnorasaoǃnâses tsîna amaga.

³ ǃOaxases ge ǀgôa ǀgaiǃkhōsa ǃhūbaib ǂhabase hâ tsî ama Xristeǁîn tsîn ge nēs xa ra tsâǀkhāhe. Tae-i ǃaroma? “ǂKhaba khoen tsî ǂgaeǂhapu-aon” tsîn ǀoa hâ tsî ǀhaohâgu ǃnâs tsîna a ǂgâxa ǁkhā amaga. (2Tim. 3:13) ǁNān hîna ǀhaohâgu ǃnâ hân tsîn ge nē turaga  ǃkham ǃoasa dan hō tama i tsî ǀgôana ge ǀgaiǃkhō nē turaga taniǂuis ǃnâ. Hā re, î da ǃhoaǃgao tae-i ǃaromas ǀgôa ǀgaiǃkhōsa a tsū ǃkhaisa. Tsî da ge nî ǃhoaǃgao mati gu ǀhaohâb ǃûi-aoga nē ǃnôa ǁhōga nî sîsen ǂamsa, ǀgôa ǀgaiǃkhōs tsîna ǃkhōǂgā hâse. Tsî ǁgûn mati ǁîn ǀgôana nî ǃûisa. *

4-5. Matis ǀgôa ǀgaiǃkhōsa a ǁgai ǁore nēs xa tsâǀkhāhe hâ khoe-i ǃoa-ai?

⁴ ǀGôa ǀgaiǃkhōs ge ǁgai ǀamǂoade ūhâ. Nēs ge ǀgaiǃkhō-e go khoe-e ra tsâǀkhā tsî ǁî-e ra kōǃgâ khoen, omaris khoen tsî ǁî-i di ǀhaohâb Xristeǁîn tsîna ra tsâǀkhā. ǀGôa ǀgaiǃkhōs ge a ǁgai ǁore.

⁵ ǁOreba ǀgaiǃkhō-e go khoe-i ǃoa-ai. * Tsî ǁnā khoe-i di ǀgūkhoen ǃaroma kai tsûb tsî ǃgomsin tsîna. Sao ra ǁkhāǁkhāǃâs ǃnâ da nî mû khamis ge ǀgôa ǀgaiǃkhōsa nēsa ra ǃaroma, nē ǀgôa-i ge kaise ra tsûtsûhe. ǀGôa-i di ǂgomǃgâsib ge ra khôahe tsî i ge ǁkhaubahe i rasa ǂgom tama hâ. ǀGôan ge nî ǁkhaubahe nē ǃnôa khoena xu tsî ǁnān hîna nēs xa tsâǀkhāhe hân ge nî ǁkhaeǂgaohe.—1Tes. 5:14.

6-7. Matis ǀgôa ǀgaiǃkhōsa ǀhaohâb tsî ǂhanub ǃoa-ai a ǁore?

⁶ ǁOreba ǀhaohâb ǁanin ǃoa-ai. ǀHaohâb khoe-i hîna nēs ǃnâ ǃâ-e ūhâ i ge ǀhaohâb ai ǁgai ǀonsa ra hā-ū. (Mat. 5:16; 1Pet. 2:12) Nēs ge nau miliun di Xristeǁîn ǃoa-ai ǂhanu tama hâ hîna ǁîn ‘ǂgoms . . . ǃaroma ra ǃkhamna.’ (Jud. 3) Sada ge nē ǃnôa khoen hîna dī-unusen ǂgao tama hâna sada ǀhaohâgu ǃnâ ǃkhōǃkhō tama hâ. ǁÎn ǀhaohâb di ǃgâi ǀonsa ra ǀuriǀuri amaga.

⁷ ǁOreba ǂhanub ǃoa-ai. Xristeǁîn ge ‘ǂamkhoega ǃnaga nî hâba.’ (Rom. 13:1) ǂAmkhoega da ge ǃnāga ra hâba ǁîgu di ǂhanuga ǁnâuǀnams ǃnâ-ū. ǀHaohâb khoe-i ga tsūdī o, ǀgôa-e ǀgaiǃkhōs ǃnâ o i ge ǁî-e ǂhanub ǃoa-ai ra ǁore. (ǀGopeǀnō re ǃNǃkh. 25:8.) ǀHaohâb ǃûi-aogu nē ǂhanub ǃnâ dīxū-e ūhâ tama hâ xawe gu ge nē ǃnôa ǁore ao-e sâu tama hâ nē ǂhanuba xu. (Rom. 13:4) ǁGai xū-ets ga dī o, ots ge ǁgai xū-e nî ǃâubasen.​—Gal. 6:7.

8. Jehovaba ǃgâsan ǃoa-ai ra dīhe ǁorena mati ra mû?

⁸ Hoan ǂam-ai ǁoreba Elob ǃoa-ai. (Psa. 51:4) ǃGâsa-i ga nau ǃgâsa-i ǃoa-ai a ǁore o, o i ge Jehovab ǃoa-ais tsîna ra ǁore. Jehovab ge Israelǁaesa a mā ǂhanub xa ǂâi re. Nē ǂhanub ge gere mî khoeb ga ǁîb ǀgūkhoeb ǃoa-ai ǂhauoǃnâse tanisen o, ob ‘Jehovab ǃoagu ra ǁoresa.’ (Lev. 6:2-4) ǁNā-amaga i ge ǀhaohâb khoe-i hîna ǀgôa-e ra ǀgaiǃkhō tsî nē ǀgôa-e ǁî-i di ǃnorasasiba ūxu-e Elob ǃoa-ai ra ǁore. Nē tsūdī-ao-i ge Jehovab di ǀonsa ra ǁgaiǁgai. Nēs ǃaroma i ge tsūdī-ao-e nî ǀgoraǃgâhe ǁî-i di ǁgai ǁoreb ǃaroma.

9. Mâ ǃnôa xoadi ai a ǃgaoǃgaosa daoǁgaudes Jehovab di ǀapeǂhumisa kurigu ge ǃkharu khami ge mā tsî tae-i ǃaroma?

 ⁹ Kurigu ǃnâs ge Jehovab di ǀapeǂhumisa nē ǃnôa ǁhōgu ǀgôa ǀgaiǃkhōs digu ai ǂgui ǂkhanina ge xoa. Aiǁgause, ǃKhē xu ǂgō-ommi tsî Awake ǂkhanikha tsîn ge nēsa ge ǃhoaǃgao. Matin ǁnān hîna nēs xa tsâǀkhāhe hâna ra tanisen ǀgaus, nau ǃgâsan ǁîna mati a hui tsî ǂkhâǃnâ ǁkhā ǀgaus tsî ǁgûn mati ǁîn ǀgôana a ǁkhauba ǁkhā ǀgaus tsîna. ǀHaohâb ǃûi-aogu ge xoade xu daoǁgaude ge hō matigu nē ǃnôa ǁhōga nî sîsenǂamsa. ǀApeǂhumis ge ǀgôa ǀgaiǃkhōs di ǁhōga ǃgâiǃgâis ǃnâ ra aiǃgû. Tae-i ǃaroma? Nē ǁhōga da ra sîsenǂam ǀgaus ge Xristub di ǂhanub ǀkha ra ǃgûǀhao.

10-12. (a) ǁHōgagu ga ôaǃnâ o ǀgôa ǀgaiǃkhōs tsîna ǃkhōǂgā hâse o gu ǀhaohâb ǃûi-aoga tae-e ǂâis ǃnâ ra ūhâ tsî mâ ǂâiǂhansende gu ūhâ? (b) Jakobub 5:14, 15 ǃoagu gu ǀhaohâb ǃûi-aoga tae-e ra dī?

¹⁰ ǀHaohâb ǃûi-aogu ga ǁgai ǁoreb di ǁhōga a sîsenǂam o, o gu ge ǂâis ǃnâ ra ūhâ Xristub di ǂhanub ra ǂhâbasa îgu gūna ǀnami ǃnâ sîsen-ū tsî Elob mûǁae a ǂhanu xūna dī. Nēs ǃaroma gu ge ǂâiǂhânsende ūhâ nē ǃnôa ǁhōgaguga hō o. ǀHaohâb ǃûi-aogu ge Elob ǀonsa ǃanuǃanus ai ǁîgu ǂâisa ra ǂnûi. (Lev. 22:31, 32; Mat. 6:9) ǁÎgu ǃgâsan di gagasi mâsib xas tsîna gu ge ǀhaohâb ǃnâ ra ǂâiǂhansen tsî ǀgaiǃkhōs xa tsâǀkhāhe hâ ǃgâsana ra hui ǂgao.

¹¹ Tsî nē î nî ǀhaohâb khoes ga io, o gu ge ǀhaohâb ǃûi-ao ga ra dītsâ nē khoe-e huisa nēs ga īǁkhā o. (Khomai re Jakobub 5:14, 15.) ǃGâsa i hîna ǁî-i di turagu ǃnâ ra mâǁnâsen i ge gagasise ǀaesen hâ. Nēs ge ra ǂâibasen ǁî-i ǃaruǀî ǃgâi ǀhōsagusisa Jehovab ǀkha ūhâ tama hâsa. * Nē ǀgaub ǃnâ gu ge ǀhaohâb ǃûi-aoga a gagasi ǀaeǃkhō-ao. ǁÎgu ge ra dītsâ nē khoe-e huisa, nē mâsib ǃnâ-i ge “ǀaesen hâ khoe-e” tsūdī-ao-e ǃoa ra ǁnaeǁgau. ǁÎgu di gagasi daoǁgaudi ge nē khoe-e a hui ǁkhā ǁî-i di ǀhōsagusisa Jehovab ǀkha ǃgâiǃgâis ǃnâ. Xawe nēs ge ǁî-i ga amabes ǃnâ ǃhausen o ǀgui a īǁkhā.​—ǃNǃkh. 3:19; 2Kor. 2:5-10.

¹² Amabes ǃnâ gu ge ǀhaohâb ǃûi-aoga kai ǃereamsa ūhâ. ǁÎgu ge Elob ge ǁîgu ǃomǁae xu gūna kaise ra tsâba. (1Pet. 5:1-3) ǁÎgu ge ǂhâba hâ ǃgâsan ǃnorasase ǀhaohâb ǃnâ nî tsâsa. Nēs ǃaroma gu ge a ǃhae ǁgai ǁore-i di ǁhōga gu ga ǃkhōǃoa o ǀgôa ǀgaiǃkhōs tsîna ǃkhōǂgā hâse.  13,  15,  17ǁÎ xoaǀgoradi tawa hâ dîdi xa ǂâiǃgâ re.

13-14. ǀHaohâb ǃûi-aoga ǃhūb ǂhanugu ǀkha ra sîsen ǀhao ǀgôa ǀgaiǃkhōsa ǂanǂans ǃnâ? ǁGuiǃā re.

 ¹³ ǀHaohâb ǃûi-aoga ǃhūb ǂhanugu ǀkha ra sîsenǀhao ǀgôa ǀgaiǃkhōna ǂhanuba ǂanǂans ǃnâ? Î. Nēti i ǂhanugu ra sîsen-ūheba gu ge ǀhaohâb ǃûi-aoga nē ǂhanugu ǀkha ra sîsenǀhao nē ǀgôa ǀgaiǃlkhōsa ǂanǂans ǃnâ. (Rom. 13:1) Nē ǃnôa ǂhanugu ge Elob digu ǀkha ǂgaogu tama hâ. (ǃNǃkh. 5:28, 29) Nēs ǃaroma gu ge ǀhaohâb ǃûi-aoga nē ǃnôa xūn ga ī o, o ra dītsâ ǃhūb ǂhanuga ǁnâuǀnamsa.

¹⁴ ǀHaohâb ǃûi-aogu ge tsâǀkhāhe hâ  khoe-i ǁî-i ǁgûn tsî nēs xa ǂan khoen hoana ra mîba ǁîn ǂhanuba nēs xa a ǂanǂan ǁkhāsa. Xawe nē ǃnôa xū-i ga ǀhoahâb khoe-i xa a dīhe tsî ǀhûhâsib ǃnâ a ǂansa os? O i Xristeǁî-i hîna nēsa ra ǂanǂan-e Jehovab ǀonsa i go ǀuriǀuri khami nî tsâ? Hî-î. Tsūdī-ao i ge Jehovab ǀonsa go ǀuriǀuri-e.

15-16. (a) 1 Timoteub 5:19 ǃoagu i tae-i ǃaroma ǀgam ǀhûǀguitimî-aona a ǂhâǂhâsa ǀhaohâb ǃûi-aogu nē ǁhōb ǀkha nî aiǃgûs aiǃâ? (b) ǀHaohâb ǃûi-aoga tae-e ra dī ǀhaohâb khoe-i ga ǀgôa ǀgaiǃkhōs ǀkha ǂgā-amhe o?

 ¹⁵ ǀHaohâb ǃûi-aogu nēs xa xū-e nî dīs aiǃân tae-i ǃaroma ǀgam ǀhûǀguitimî-aona a ǂhâbasa? Nē ǁgui-ais ge Elobmîs di ǂhanu-aisib ǃâ. Tsūdīs di ǁguiǁnās ga ǀkhai o, on ge ǀgam ǀhûǀguitimî-aona a ǂhâbasa nēs a amasa ǂanǂans ǃaroma îgu ǀhaohâb ǃûi-aoga nē ǁhōb ǀkha aiǃgû ǁkhā. (Deu. 19:15; Mat. 18:16; khomai re 1 Timoteub 5:19.) Nēsa ra ǂâibasen tsūdī-ao i nî ǂhanub ai ǂanǂanhes aiǃân ǀgam ǀhûǀguitimî-aona aibe nēsa nî ǂanǂansa? Hî-î. Nēs ge ǂâibasen tama hâ ǀhaohâb ǃûi-aogu tamas ka io nau khoena nē tsūba ǂanǂansa sîsenǂamhes ǃaroma.

¹⁶ ǂAnǂui-e i ga o ǀhaohâb khoe-i ǀgôa ǀgaiǃkhōsa ra ǂgā-amhesa, o gu ge ǀhaohâb ǃûi-aoga ǃhūb ǂhanugu ǀkha ra sîsenǀhao ǂgao nē ǁhōba ǂanǂans ǃaroma. ǁNās khaoǃgâ gu ge gagasi ôaǃnâsa ra dī. ǂGā-amhe ra khoe-i ga nēsa ǀūxū o, o gu ge ǀhaohâb ǃûi-aoga ǀgam ǀhûǀguitimî-aona ra ǂgaiǂgā. Nēs ge ǀgam khoena ǂhâhâ ǀgui-i hîna nē ǂgā-ams a amasa ra mî i tsî nau i hîna nē amaba ra ǁguiǃgâ i tsîna nē khoe-i nî ǀgoraǃgâhe ǁkhāse ǂhanub xa. * ǀGamǁî khoe-e ǀkhais ge ǂâibasen tama ǂguro khoe-i ama tama xū-e ra mîsa. Nē ǁhōb ga ǀgam khoen xa ǂnûǁkhaebahe tama i xawe gu ge ǀhaohâb ǃûi-aoga ra mûǂan ǁgai ǁore-i go dīhesa. Nau khoena kaise ra tsûtsû-e. Nēs ǃaroma gu ge ǀhaohâb ǃûi-aoga ra aiǃgû tsūdīhe go khoe-e ǂkhâǃnâs ǀkha. ǀHaohâb ǃûi-aogu ge nēs ǃaroma ra aiǃgû ǀhaohâba tsūdī-aona xu ǁkhaubasa.​—ǃNǃkh. 20:28.

17-18. ǀGoraǃgâ ǃnans tae-e ra dīsa ǁguiǃā re.

 ¹⁷ ǀGoraǃgâ ǃnans ǃâba a tae? Nē mîs “ǂhanub” di hâs ge ǂâibasen tama hâ ǀhaohâb ǃûi-aogu ra ǀgoraǃâ tsî tsūdī-ao-e ǁkharasa ǃhūb ǂhanuga ra ǃgûǂamse. ǀHaohâb ǃûi-aogu ge ǂhanub ǂnûiǂgādi ǃoagu sîsen tama hâ xawe tsūdī-ao i di ǁhōba ǂhanub ǃomǁae ra xu. (Rom. 13:2-4; Tit. 3:1) Xawe gu ge ǀhaohâb ǃûi-aoga ra ǀgoraǃgâ nē khoe-i ǀhaohâb ǃnâ nî hâs tamas ka io nî ǂnûiǂuihesa.

¹⁸ Nēti i ǁhōga gu ga ǀhaohâb ǃûi-aoga a ôaǃnâ o, os ge nēsa gagasi xūn ai a ǃgaoǃgaosa. Xoadi xa daoǁgauhe hâse gu ge ra mîmâi nē khoe-i amabes ǃnâ ǃhausen tamas ka io ǃhausen tama hâsa. ǁÎ-i ga ǃhausen tama io, o i ge ra ǂnûiǂuihe tsîb ge ǀhaohâba ra ǂanǂanhe. (1Kor. 5:11-13) Xawe i ga ǃhausen o, o i ge ǀhaohâb ǃnâ nî hâ ǀgara. Xawe gu ge ǀhaohâb ǃûi-aoga ǁî-e nî ǂanǂan, ǁî-î aiǂhanugu tsî ǃereamdi tsîna ǀhaohâb ǃnâ hō tidesa. ǀGôa-e tsâbas ǃnâ gu ge  ǀhaohâb ǃûi-aoga ǁgûna ra ǃkhâikhom î i tā nē khoe-i ǀkha sîsenǁare. Nē ǃnôa ǀgauga gu ra sao hîna gu ge ǀhaohâb ǃûi-aoga nē tsâǀkhā-e hâ khoe-i di xūna hoa khoena ǂanǂan ǂgao tama hâ.

19-22. ǁGûna tae-e nî dī ǁîn ǀgôana ǁkhaubas ǃaroma? (Tsoatsoas ai hâ ai-īsiba mû re)

¹⁹ Ham-e ǀgôana ǁkhaubas ǃereamsa ūhâ? ǁGûn ge nē ǃereamsa ūhâ. * “ǀGôagu ge ǀumixūga” Jehovaba xu. (Psa. 127:3) ǁGûn di ǃereams ge ǁîn ǀgôana ǁkhaubasa. Tae-e du dī ǁkhā sadu ǀgôana ǁkhaubas ǃnâ ǀgaiǃkhōs ǃoa-ai?

²⁰ ǂGurose, sadu ǀgôana ǀgaiǃkhōs xa ǁkhāǁkhā re. Khoen hîna ǀgôana ra ǀgaiǃkhōn xa ǂanǂui re tsî tae ǃnôa ǀgaugan ra sîsen-ūs tsîna. Tsî nēs ǃoa-ai ǂkhaikharise nî hâ. (ǂKhm. 22:3; 24:3) ǂAn da ge nî ǀgôana ra ǀgaiǃkhō khoen ge ǃnāsa ǁaeba ǁnān ǀgôan a ǂan na.

²¹ ǀGamǁîse, ǃgâi ǃhoa-ūgu ǀgauga ūhâ re sadu ǀgôan ǀkha. (Deu. 6:6, 7) Nēs ge ǃgâi ǃgâ-aose ī di ra ǂâibasen. (Jak. 1:19) ǂÂis ǃnâ ūhâ re ǀgôan ge nē ǃnôa ǁhōga ǂanǂans xa supubahe tama hâ. ǁÎn ge ra ǂâi ǂgomǃgâhen tide di tamas ka io ǁnān hîna ra ǀgaiǃkhō nîn xa ra ǃaoǃaohe în tā nēsa ǂanǂan. Xū-i a tsū ǃkhaisa du ga hōǃâ o, o dîǃnâ nî re tsî ǁnāpaxū ǂōrisase ǃgâ re.

²² ǃNonaǁîse, sadu ǀgôana ǁkhāǁkhā re. ǁÎn ǁnâuǃāba ǂauhâ xūna ǁgoe-ūgus xa ǁkhāǁkhā nî re. Mî tsîn nî dī xūna ǁkhāǁkhā nî re khoe-i ga ǃgâi tama ǀgaugu ǃnâ tsâǀkhā nî o. ǀApeǂhumis ra mā xūna sîsen-ū re ǀgôana ǁkhaubas ǃaroma.​—“ Sadu ǀgôana ǁkhāǁkhā re” di hâ boksisa mû re.

23. Mati da ǀgôa ǀgaiǃkhōsa ra mû tsî mâ dîsa da nî ǃhoaǃgao sao ra ǁkhāǁkhāǃâs ǃnâ?

²³ Jehovab di ǀHûǀguitimî-aon ase da ge ǀgôa ǀgaiǃkhōsa ǃkhōǃkhō tama hâ ǁgai ǁoreb a amaga. Xristub di ǂhanub xa ǂgaeǂgui-e hâse da ge nē ǃnôa ǁoreba ra dī khoena ǁkhauba tama hâ. Xawe da tae-e a dī ǁkhā ǁnān hîna nēs xa tsâǀkhāhe hâna huis ǃnâ? Sao ra ǁkhāǁkhāǃas ge nē dîsa nî ǃeream.