1. ǀNî ǃgâsana tae-i ǃaroma ǁkhāǁkhāsens ǁkhāsiba ūhâ tama hâ?

NĒTSĒN ge khoena kaise ǃgarise nî sîsenni în ǂâusa mari-e ūhâ, în ûi ǁkhā. ǂGui ǃgâsan ge ǃnāsa ǁaeba ra sîsen în ǁîn omaridi ǂhâsiga kōǃgâ ǁkhā. ǂGuin ge ǁîn sîsen ǃkhaisa ǃoa mâ ǁgoas hoasa ī tsî ǁkhawa ra oaǀkhī. Tsî ǀnîn ge ǁîn ǃomdi ǀkha ǃgarise ra sîsen mari-e hōs ǃgao. Tsēs ǀams ain ge nē ǃgâsana kaise tsau hâ. Tsî ǁnās ǀkha ǁkhāǁkhāsens ǁkhāsiba ūhâ tama hâ.

2. Mâ ǁaeb ai du ǁaeba ra ǁamaǂui ǁkhāǁkhāsens ǃgao?

² Xawe da ge hoada ǁaeba nî ǁamaǂui Elobmîs tsî sada ǂkhanin hîna Elobmîs ai a ǃgaoǃgaosan tsîna amabes ǃnâ ôaǃnâs ǃgao. Nēs ge kaise a ǂhâǂhâsa ǀgaisa ǀhōsagusisa da ga Jehovab ǀkha ūhâ ǂgao tsî ǀamose ûi ǂgao o. (1Tim. 4:15) ǀNîn ge ǁgoaga khâimân ra ǁaeb ai ra ǁkhāǁkhāsen, ǁnā ǁaeb ain ǃgâise ra ǂâi amaga. Tsî ǀnîn ge ǃuia ǁom hân nî aiǃâ Elobmîsa ôaǃnâ tsî ra ǂâiǃgâ.

3-4. Mâ ǀkharaǀkharana ge dī-e xūn hîna da ra khomai tsî kōn ǃnâ tsî tae-i ǃaroma?

³ Hoada ge a mî ǁkhā ǂhâǂhâsa i asa ǁaeba ǁamaǂui tsî ǁkhāǁkhāsensa. Xawe tae-e da nî ǁkhāǁkhāsen? ‘Kaise ǂgui xūn ge hâ khomaihe nî na,’ di da ge a mî ǁkhā. ‘Kaise i ge a ǃgom hoa xūna khomaisa.’ ǀNîn ge a supubahe gagasi xūn hîna da ra hōna khomaisa xawe ǀnîn ge nēs xa a ǃgombahe. ǂGaeǂguira soros ge nēsa ge mûǂan. Nēs ǃaroma i ge daoǁgausa ge māhe î i ǁkhāǁkhā xūna ǀoroǀoro-e ǁgâihe ra xūn tsî internets ai hân hoana.

 ⁴ Aiǁgause, Yearbook of Jehovah’s Witnesses di hâ ǂkhanis ge ǁkhawa māǂuihe tama hâ, ǂgui ǃgâsan aiǁgaudi hîna ra ǂkhâǃnâde da jw.orgs tsî JW broadcastings ais tsîna ra hō amaga. Watchtowerb tsî Awake! ǂkhanikha tsîn ge nēsi ǃnona ǃnādi ǀguide ra māǂuihe kurib ǃnâ. Nē ǀkharaǀkharan ge dī-e tama hâ, i da ǁaeba ǀnî hâ xūn ǃaroma ūhâ. Nē ǀkharaǀkharan ge ‘ǁîsa xu ra ǀgora xūna da nî ǃâitsâ ǁkhāse’ ge dī-e. (Fil. 1:10) Hā re î da kō mati da ǂhâǂhâsa xūna ǂgurose nî mâisa tsî mati da Elobmîsa ôaǃnâsa xu nî ǀamasa.

5-6. Mâ ǂkhanina da ǃgaoǃgâxase nî khomai?

⁵ Tae-e da ǂgurose nî ǁkhāǁkhāsen? Tsēs hoasa da ge ǁaeba nî ǁamaǂui Elobmîsa ôaǃnâs ǃaroma. ǀHaohâb Elobmîs khomais ǃgao hâ xoaǃâdi tsîn ge ge ǀoro kaihe, î da ǁaeba ūhâ khomai da go xūna ôaǃnâ tsî ǂâiǃgâsa. Mîǁgui da ge nî, î da tā khomais ǀguisa dī xawe Elobmîs haisi-amsa mā-am sida ǂgaoga tsâǀkhā tsî Jehovaba ǃoa ǂgae dasa.​—Psa. 19:14.

⁶ Tae-e da ǃgaoǃgâxase nî ǁkhāǁkhā- sen? ǃKhē xu ǂgō-ommi ǁkhāǁkhāǃâs tsî ǀhaohâb Elobmîs ǁkhāǁkhās ǃgaos tsîna da ge ǂōrisase nî aiǂhomisen. The Watchtower tsî Awake! ǂkhanikha māǂuidi tsîna da ge hoaǁae nî khomai.

7. ǂKhabuǂâi i da nî hoa xūn hîna internets ais tsî JW Broadcastings ai hâna da ga khomai tsî kō hō tama io?

⁷ ‘ǃGâi a’ di du ge a mî ǁkhā, ‘xawe jw.orgs ai hâ xūn tsî JW Broadcastings ais tsîna hâna kō i da ra? Kaise ǂgui xūn ge hâ.’ Sao ra ǂkhōs xa ǂâi re: ǃKharagaǃnâgu ǂûn ge restaurants tawa ra hō-e. ǁNāpa hâ khoen ge hoa ǂûna a tsâ ǁoa. ǁNās ǀkhan ge ǁîna ǀnî ǂûn ǀguina nî ǂû. ǁNās ǁkhās khami da ge tā nî ǂkhabuǂâi hoa xūn hîna internets ai ra hō-ena da ga khomai hō tama io. Khomai tsî du a kō ǁkhān ǀguina dī re. Hā re î da nēsi ǁkhāǁkhāsens tae-e ǃkhōǂgā hâs tsî mati da nēsa xu a ǀama ǁkhā ǀgaub tsîna mû.

8. Tae-e da nî dī ǃKhē xu ǂgō-omma da ga aiǂhomi o tsî nēsa xu da mati nî ǀama?

⁸ ǁKhāǁkhāsen du ra ǁaeb ai du ge ǁkhāǁkhāsen du ra xū-i xa ra ǂâiǃgâ, i du ǂhâǂhâsa xū-e ǁkhāǁkhāsen. ǁKhāǁkhāsens ge māsa xūna khomai tsî ǂgaeǃgaos ǀguisa ǃkhōǂgā tama hâ. ǂGurose, ǃKhē xu ǂgō-ommi ǃgao da ga aiǂhomisen o, o da ge ǃkhōǀhaos hîna ǁkhāǁkhāǃâs tsoatsoas ai hâsa nî ǃgaoǃgâ. ǀGamǁîse, xoaǂams tsî ǂâiǃgâs dîdi hîna ǁkhāǁkhāǃâs ǃnâ hâde kōǃgâ re. ǁNās khaoǃgâ ǁkhāǁkhāǃâsa ǂause tsî ǃgaoǃgâxase khomai re. Xoaǂams tae-i xa hâsa ra ǁguiǃā xoaǀgorasa ǃgaoǃgâ re. ǁNā xoaǀgoras ge nî huida ǁnâuǃāsa xoaǂams tae-i xa hâsa. ǁKhāǁkhāǃâsa du ra khomai hîna, ǂâiǃgâ re mâ xoaǀgoras hoas mati xoaǂams tsî ǁkhāǁkhāǃâs tsîn ǀkha ra ǃgûǀhaosa. ǁNâuǃā tama du hâ xūna xoaǁnâ tsî nēna ôaǃnâ re.

9. (a) Tae-i ǃaroma tsî mati da xoade nî ǃgaoǃgâ ǃKhē xu ǂgō-omma da ga ôaǃnâ o? (b) Josuab 1:8 ǃoagu da tae-e nî dī xoade khomais ǂam-ai?

⁹ ǃKhē xu ǂgō-omma da ǀhaohâb tawa ra ǁkhāǁkhāsen o, o da ge Elobmîsa  ǃnāsase ra ǁnâuǃā. ǁNā-amaga xoadi hîna ǀhaohâb ǃnâ nî khomaihede ǃgaoǃgâ re. Xoadi ǃnâ hâ mîdi hîna xoaǂamsa ra mâǂoa kaide ǃgaoǃgâ re. ǁAeba ū tsî khomai du ra xoade ǂâiǃgâ tsî mû re matis nēsa sadu ûib ǃnâ sîsenǂuiba a ūhâ ǁkhāsa.​—Khomai re Josuab 1:8.

10. Hebreǁîn 5:14 ǃoagun ǁgûna tae-i ǃaroma omaris ǃoabas ǃnâ ǀgôana nî hui matin nî ǁkhāǁkhāsen tsî ôaǃnâsa dīsa?

¹⁰ ǁGûn ge ra ǂgao în ǁîn ǀgôana mâ wekheb hoaba ǁkhoaxa ǁaeba ūhâ omaris ǃoabas ǃnâ. ǁGûn mâ wekheb hoaba tae-i omaris ǃoabas tawa nî ǃhoaǃgaohesa nî mî xawen ge tā ǁgarisase nî tsâ mâ wekheb hoaba ǀō-aisa ǁaxasiba ūhâsa. Omaris ǃoabas ǃnâ da ge JW broadcastings ai hâ ǀapeǁguiga a kō ǁkhā tamas ka io Noaxi arka a om ǁkhā, kaise î ge a ǂhâǂhâsa ǀgôana matin Elobmîsa nî ôaǃnâ ǀgausa ǂansa. ǁÎn ge nî ǁkhāǁkhāsen matin ǀhaodi ǃgao nî aiǂhomisensa tamas ka ion mati skoli tawan ra hōǃâ mâǃoadi xa ôaǃnâsa a dī ǁkhāsa. (Khomai re Hebreǁîn 5:14.) Elobmîsan ga oms tawa ôaǃnâ o, on ge ǀhaohâb ǀhaodi, ǂharis kai ǀhaodi tsî ǀkharib kai ǀhaodi tawas tsîna ǃgâise nî ǁnâuǃā, nēn ga vidioga ūhâ tama i xawe. ǀGôa-i matikō gaxuse nî ǁkhāǁkhāsens ge ǁî-i kurigu tsî ǀgaugu tsîna xu hâ.

11. Tae-i ǃaroma i a ǂhâǂhâsa sada Elobmîsa ra ǁkhāǁkhā khoena matin aitsama ôaǃnâsa nî dī ǀgauba ǁkhāǁkhāsa?

¹¹ Sada Elobmîsa ra ǁkhāǁkhā khoen tsîna da ge nî hui în ôaǃnâs xa ǁkhāǁkhāsen. ǁÎn ga ǀasase Elobmîsa ǁkhāǁkhāsen tsoatsoa o, o da ge kaise ra ǃgâiaǂgao ǁîn ga ǂgaeǃgao o, ǀhaohâb Elobmîs ǁkhāǁkhās ǃgaon ga aiǂhomisen o. Xawe da ge ǁîna nî ǁkhāǁkhā matin ǂâibasens ǀkha ôaǃnâsa nî dī ǀgausa. ǁNā ǀgaub ǃnân ge ǃgomsinan ga hōǃâ o, o ǃhaese nau ǃgâsana ǃoa kō tide hui-es ǃgao xawe aitsama ôaǃnâsa sida Elobmîs ai ǃgaoǃgaosa ǂkhanin ǃnâ nî dī.

12. Mâ mîǁguiba da nî ūhâ ǁkhāǁkhāsen da ga o?

¹² ǁKhāǁkhāsens xa da ga ǃgâibahe tama io, o da ge tātsē da ǁkhāǁkhāsens xa ǁkhoaxabahe tide di nî ǂâi. Xawe da ge nēsa a dī ǁkhā. ǃNubu ǁaeba ǁkhāǁkhāsens ǀkha da ge a tsoatsoa  ǁkhā tsî ǁaeb ra ī khami a gaxu kai ǁkhā. Mîǁguiba du ūhâ re. Sada ǂhâǂhâsa miǁguib hîna da nî ūhâb ge Jehovab ǃoa ǀgūsa. Mîǁguib hîna da ǃhaese a dīǀoaǀoa ǁkhāb ge khoe-i ge dî dîsa ǃereamsa tamas ka io mâǃoadi hîna da ra hōǃâde ôaǃnâsa.

13. (a) ǁGuiǃā re ǂkhamkhoe-i tae-e a dī ǁkhāsa ǁî-i ǂgomsa ǁkhaubas ǃgao. (b) Mati da Koloseǁîn 4:6 tawa ra hō-e ǁnamasa a sîsenǂui ǁkhā?

¹³ Aiǁgause, ǂkhamkhoeto tsî du noxoba skoli ǃnâ hâ? ǂGui ǀgôan ge sa klas ǃnâ ra ǂgom khoen ge kuruhe tama hâ tsî ǁnāti ǀgui ge hā di. ǀNîsits ge sa ǂgomsa ra ǁkhauba ǂgao xawets ge ǁkhāsiba ūhâ tama hâ. Nēs ge ra ǂâibasen ǃnāsasets ge ôaǃnâsa nî dī. ǀGam ǃaroma rats ge nēs xa a ūhâ ǁkhā: (1) Sa ǂgomsa ǀgaiǀgais Elob ge hoa xūna a kurusa tsî (2) sa ǂgomsats mati nî ǁkhauba ǀgauba ǃgâiǃgâis. (Rom. 1:20; 1Pet. 3:15) ǀNîsits ge a dîsen ǁkhā, ‘ti skoli ǀhōsana tae-i ǃaroma ra ǂgom khoen kuruhe tama hâsa?’ ǁNās khaoǃgâts ge sida ǂkhanin hîna Elobmîs ai ǃgaoǃgaosan ǃnâ ôaǃnâsa nî dī. Sa ǂgomsa ǁkhaubas ge kaise ǃgom tama hâ. ǀNî khoen ge khoen Jehovab xa kuru-e tama hâsa ra ǂgom, ǁîn ǃgôaǃgâ hâ khoe-i ge ti mî amaga. ǀGui tamas ka io ǀgam mâǂoara ǂâide da ga hō o hîna da ra ǀgoragu ǂgaode, o da ge khoe-i hîna ǃereamsa ra ôa-e a ǃeream ǁkhā.​—Khomai re Koloseǁîn 4:6.

14-16. (a) Mati du ǃnāsa ǂansa a hō ǁkhā ǂkhanis hîna du ǃnāsa ǂansa ūhâ ǃnâ tama hâsa du ga khomai o? (b) Māsa xoade ra sîsen-ūse ǁguiǃā re mati da Amob ǂkhanisa a ǁnâuǃā ǁkhāsa? (Boksis “ Elobmîsa ûi ûi re” di hâsa mû re.)

¹⁴ ǀNîsi da ge ǀhaos tawa sī ǂkhari kēbo ǂkhanirode ra ôaǃnâ tsî ǃhoaǃgao xawe da ge nēs xa ǃnāsase ǂan tama hâ. ǂGurose da ge ǁnā kēbo-aob ge xoa xūn ǃnâ ǃgâiǃgâibasensa nî omkhâi. Nēsa da mati a dī ǁkhā?

¹⁵ ǂGurose, dîsen re: ‘Tae-e ta nē ǂkhanis xoa-aob xa a ǂan? ǁÎba ge ham-i, mâpab gere hâ tsî tae-eb gere dī?’ Xoa-aob xa ǂans ge ǁîb gere sîsen-ū mîdi tsî ǂkhōdi tsîna a ǁnâuǃā kai da ǁkhā. Elobmîsa da ra khomai hîna da ge nî kō nēs mati xoa-aob ǀgauga ra ǁguiǃāsa.

¹⁶ ǁNās khaoǃgâ du ge ǂkhanis mâǁae xoasasa ǂans xa nî hui-e. Nēsa da ge “ǃkhōǀhaos Elobmîs ǂkhanide ūhâs” tawa a kō ǁkhā, nēs ge New World Translation of the Holy Scriptures khaosǀkhāb ai hâ. ǁNās ǂam-ai du ge kēbo-aogu tsî gao-aogu tsîn xa hâ Appendix A6 tsîna a mû ǁkhā. ǁKhāǁkhāsen du ra ǂkhanis ga kēbodi xa hâ o, o du ge khoen ge mati ī mâsib ǃnâ ûi hâ īsa nî ôaǃnâ nē ǂkhanis gere xoa-e ǁaeb ǃnâ. Kēbo-aoba mâ ǁgai tanisen ǀgaub tsî dīxūn hînan ge khoena ūhâ ina gere ǃgâiǃgâi? Hamna nē xoa-aob ǀkha ǀgui ǁaeb ǃnâ ge ûi hâ i? Nēsa ǃgâise ǁnâuǃās ǃgao da ge ǀnî hâ Elobmîs ǂkhanidi tsîna nî ôaǃnâ. Aiǁgause, kēbo-aob Amosi ge ûi hâ i ǁaeb ǃnâ gere ī xūna ǃgâise ǁnâuǃās ǃgao da ge 2 Gao-aogu tsî 2 Kroniks ǂkhanira hîna Amob 1:1 tawa ǁnaeǁgaus ase a māsa ra nî ôaǃnâ. ǁNās ǂam-ai da ge Hoseab ge xoa xūn tsîna nî ôaǃnâ, ǁîb ge Amob ǁaeb ǃnâ ûi hâ i amaga. Nēn hoan ge nî huida Amob ge ûi ǃnâ hâ i ǁaeb ǃnâ gere ī xūna ǁnâuǃāsa.—2Gao.  14:25-28; 2Kro. 26:1-15; Hos. 1:1-11; Amo. 1:1.

17-18. ǂKhō re mati i nē xoaǀgoras ǃnâ hâ aiǁgaude nî huida ǀgauba Elobmîsa ôaǃnâs ǃnâ ǃgâiǃgâibasensa omkhâisa.

¹⁷ Elobmîsa da ga khomai o, o da ge ǃnāsase khomai da ra xūn xa nî ǂan ǂgao. ǂÂi re aiǁgause, 12ǁî xoaǀgoras Saxariab kēbodi disa du ra khomai hîna Mesiab di ǁōba ra ǂhôasa. (Sax. 12:10) 12ǁÎ ǁaraǃās tawa du ge “ǃhaos Natanni dis” xa ra khomai hîna kaise Mesiab ǁōb xa ra ǃoana. ǃHaese nēsa khomais xa du ge mâ tsî a dîsen ǁkhā: ‘Mesiab tsî Natanni omaris tsîn ǁaegu i tae ǃgaeǀhao-e hâ? Nēs xa da ǃnāsa ǃgāsasiba a hō ǁkhā?’ Ôaǃnâ sîsena du ge a dī ǁkhā. ǁNaeǁgaudi ge 2 Samueli 5:13, 14 ǃoa ra ǁnaeǁgau du hîna ra ǁgaude Natanni a Gao-aob Davib ǀgôagu ǀguisa. ǀGamǁî ǁnaeǁgaus ge Lukab 3:23, 31, ǃnâ ra ǁgau Jesub ge Natanni di surib ǃnâ a ǃnaesa Marias ǃnâ-ū. (Mû re “Joseph, son of Heli,” study note sa Lukab 3:23 ǃnâ) Tsîts ge nēs xa ra ǃgâibahe. ǂAn du ge go i Jesub Davib suriba xu ra hâsa. (Mateub 22:42) Xaweb ge Daviba 20 xa a ǃnāsa ǀgôaga ge ūhâ i. Tsîs ge nēsa ǁnās ǃaroma buru kai da tama hâ Saxariab ge Natanni omarisa ǃoa a ǁnaeǁgausa hîna ǃaroma-e ūhâna Jesub ǁōb xa ǃoasa?

¹⁸ ǀNî hâ aiǁgaus xa ǂâi re. ǂGuro ǁaraǃās Lukab dis ǃnâ da ge ǀhomǃgāb Gabrieli hîna ge Mariasa a sarib xa ra ǃhoa ǁîs nî hōse ge i ǀgôab xa gere ǂhôaba: “ǁÎb ge nîra kai, tsî Hoan xa ǀGapib Ôa ti nîra ǂgaihe, tsî ǃKhūb Elob  ge ǁîb îb Davib di tronsa nîra mā bi. Ob ge ǀamos kōse Jakob ommi ǂama nîra gaosîsen, tsî ǁîb gaosib ge ǀam-e ūhâ tide.” (Lukab 1:32, 33) ǃNāsa ǁaeba da ge ǂguro ǃâb Gabrieli haisi-ams dib ai ǀgui ǂâisa ra ǂnûi hîna Jesub ge ‘Hoan xa ǀGapib Ôab’ di nî ǂgaihe di ra mîsa. Xaweb ge Gabriela ge kēbo Jesub ge ‘Gao-aob ase nî ǂgaeǂgui’ di. ǁNās ǀkha da ge nî dîsen, Gabrieli mîde tae-e Mariasa gere ǂâibasenba. ǁÎsa gere ǂâi Gabrieli ra mî di Jesub ge Gao-aob Herodeba nî ǃkhōǃkhuni Israeli ǂgaeǂgui-aob ase? Jesub ga gao-ao kai hâ o, os ge Mariasa ga gao-aob ǁgû hâ tsîn ge ǁîs omaris khoena ǀgapise ga ǃgôa-e hâ. Xawes ge Elobmîsa mî tama hâ Marias ge nēs xa Gabrieli ǀkha gere ǃhoa di, tamas ka io Gaosib ǃnâ ǀgapi ǃkhaisa ge ǂgan di Jesub ǀgam ǁkhāǁkhāsabekha ge dī khami. (Mat. 20:20-23) Nēs ge ra ǁgau da Marias ge matikōse ǃgamǃgamsenxa ī ǀgauba.

19-20. Jakobub 1:22-25 tsî 4:8 tawa i ra ǁguiǃāhe khami da tae-e nî dī Elobmîsa da ga ôaǃnâ ǁaeb ǃnâ?

¹⁹ ǂÂis ǃnâ da ge nî ūhâ Elobmîs tsî Elobmîs ai ǃgaoǃgaosa ǂkhanina da ga ôaǃnâ o, o da ge Jehovaba ǃoa ra ǀgū ǂgao. Tsî da ge ra ǂan ǂgao ‘mati ī’ khoe da asa tsî mâ ǀkharaǀkharana da nî dīsa Eloba ǃgâiaǂgao kais ǃaroma. (Khomai re Jakobub 1:22-25; 4:8.) Elobmîsa da nî ôaǃnâ tsoatsoas aiǃâ da ge Jehovab ai ǃanu gagaba nî ǂgan. ǁÎba da ge nî ǂgan îb huida nē da ra ôaǃnâ xūna xu ǀama tsî ǂhâbasa ǀkharaǀkharana dī.

²⁰ Hoada ge Elob ǂgomǂgomsa khoen hîna psalmdi xoa-aob xa ra ǁguiǃāhen khami a īǁkhā: “ǁNāb, ǁîb di turaba ǃKhūb di ǂhanub ǃnâ ūhâb tsî ǁîb di ǂhanub xa ra ǂâiǂâisenna, tsēs tsî tsuxub tsîra. . . . tsî dīb ra xū-i hoa-i ge nîra ǃgâiǃgâ.”​—Psa. 1:2, 3.