1. Elobmîsa tae-e ra ǁkhāǁkhā da?

HOA ǃGOMSINA da ge a mâǃoa ǁkhā Jehovab a sada di ǁkhāǁkhā-ao amaga. (Jes. 30:20, 21) ǁÎb mîs ge ǂhâ da hâ xūna ra mā da î da “dīǀoaǀoasaga” tsî “mâ ǃgâi sîsenni hoab ǃoa ǁkhā.” (2Tim. 3:17) Elobmîs ǁkhāǁkhādi ǃoa-ai da ga ûi o, o da ge khoen hîna “ǃhūbaib di gā-aisiba” ra ôan xa nî gā-ai.​—1Kor. 3:19; Psa. 119:97-100.

2. Tae-e da nē ǁkhāǁkhāǃâs ǃnâ nî ǃhoaǃgao?

² Mû da nîseb ge ǃhūbaib di gā-aisiba hoaǁae sada di sorosi turagu xa ǀgui hâ. Nēs ǃaroma da ge nî ǃgombahe nē ǃhūbaib khoen di tanisen tsî ǂâiǀgaugu tsîna mâǃoasa. ǃGâi ǃaromas ǀkhas ge Elobmîsa ra mî: “ǂAnbasen re, î-i khoe-i xare-e tā ǃnarixū-i ase ǃgû-ū du, khoesi gā-aisib tsî ǁau ǂgaeǂhapus ǀkha khoen di ǂnûiǂgādi ǃoa.” (Kol. 2:8) Nē ǁkhāǁkhāǃâs ǃnâ da ge nî ôaǃnâ matin ge khoena ǀgam ǂhumikha ǁGâuab dikha a ǂgom tsoatsoasa. Hoa ǀgam ǃnāra ai da ge nî mû matib ǃhūbaib di gā-aisiba a gâresa tsî matib Elobmîs amaba hoan ǂam-ai a ǀgapisa.

3-4. Mâ ǀkharaǀkharana Amerikab ǃnâ 1901ǁî kurib khaoǃgâ ra sao kurigu ǃnâ ge hâ?

³ ǃKharu ge ǁaegu ǃnân ge khoen ǂâiǀgauga Amerikab ǃnâ ge dawa tae-i a tsū tsî tae-i a ǃgâis tsîn ǃoa-ai ǁgoe-ūgub xa. ǂGuron ge khoena gere ǂgom sorosise ǂharugus ǃgame hâ khoen ǃaroma ǀgui hâsa tsî nēs xa kaise ge ǃhoa tama hâ i. Xawes ge nēsa ge dawa tsîs ge nē ǃhoaǃâsa ge hoaǃnâ-aixa.

 ⁴ ǁNā ge ī ǁaeb 1901ǁî kuriba xu gere saogu ge ǂoaǂamsa ǁaegu ase ge ǂansa i hînan ge xūna a ǀkharaga. “Gon ra ai-īsigu, ǀhuruǃâdi, amdi, ǀhuruǃâ ǂkhanidi tsî ǁgauǂuidi tsîn hoan ge ǁgoe-ūgub xa ge hâ i,” dis ge ǀgui ôaǃnâ-aosa ge mî. ǁNā ǁaeb ǃnâ gu ge ǂnā ǀgaugu tsî saran tsîna ǁgoeb xa ǀgui ge hâ i. Elobmîs ge ǀuni tsēdi xa a mîmâi khamin ge khoena ‘turaba a ǀnam.’​—2Tim. 3:4.

5. ǃHūbaib di mûǂuib ǁgoe-ūgub xa hâba mati ge dawa 1960ǁî kuriba xu?

⁵ 1960ǁÎ kurib ǃnân ge ǃgame tamase hâǁaes, aorese tamas ka io tarese ǁgoe-ūgus tsî ǃgame khôas tsîna ge hoaǃnâ-aixa. ǂGui ǀhuruǃâdi ge ǃgâi tama ǀgaub ǃnâ ǁgoe-ūguba gere ǁgauǂui. Nē xūn hoan ǀamǂoasa a tae? ǀGui xoa-aob ge sao ra xū-e ge xoa. Omaride ǀgoras, ǀgui ǁgû-i ǀgui i hâǃnâ omaris, tsûtsûhes, ǁgoe-ūgub vidioga kōs turab tsîn “ǃgâi tanisen ǀgauga ǁgaigu ǃnâ dawasa” xu ra hāsa. ǁGoe-ūgus ǃnâ-u ra hō-e ǀaegu ge ǀgui ǁgauǁgausa ǃhūbaib gā-aisib a gâresa.—2Pet. 2:19.

6. ǃHūbaib ǁgoe-ūgusa ra mû ǀgausa mati Satanni ǂâibasensa ra dīǀoaǀoa?

⁶ ǃHūbaib ǁgoe-ūgusa ra mû ǀgaus ge Satanni ǂâibasensa ra dīǀoaǀoa. ǁNās ǀkhab ge ǁîba ra ǂkhî khoen Elob ǀkhaeb ǁgoe-ūgus xa hâba ǃgâi tama hâse ra sîsen-ū o. (Efe. 2:2) ǁGoe-ūgus ge Jehovab îsa ǀkhaeb ǀguiba ǁgaiǁgai tama hâ xawe ǁnān hîna nē xūna ra dīna ǀamo ûiba ra ǂoaǃnâ kai.​—1Kor. 6:9, 10.

7-8. Elobmîs ǁgoe-ūgus xa ūhâ mûǂûiba tae-i ǃaroma ǃhūbaib dib xa a ǃgâi?

⁷ Khoen hîna nē ǃhūbaib gā-aisiba ūhân ge Elobmîs ǁgoe-ūgus xa ra mî xūna ra mâǃoa tsî nēn ge ama tama hâ di ra mî. ǁNāti ī khoen ge a dî ǁkhā, ‘Eloba tae-i ǃaroma ǁgoe-ūgus turagu ǀkha kuru da tsî tā nî mā-am î da nēsa sîsen-ū?’ ǁÎn ge nē dîsa ra dî ǂâin ra amaga khoen ge xū-en ga dī ǂgao o, o dīs ǀguisa nî hî. Xawe Elobmîs ge nēs xa ǀkhara-e ra mî. Elobmîs ge ra mî sida turagu hoaga da ge tā nî  dīǀoaǀoa di xawe da ge ǁkhāsiba ūhâ ǃgâi tama xūna ǃkham ǃoasa. (Kol. 3:5) Jehovab ge nēs ǂam-ai ge dī î da ǁgoe-ūgub turab hîna da ūhâba ǃgameb ǃnâ dīǀoaǀoa. (1Kor. 7:8, 9) ǃGameb ǃnâ ra ge ǃgame hâ khoera nē aiǂhanuba ǃgâi ǀgaub ǃnâ a sîsen-ū ǁkhā, ǃhausen tama hâse.

⁸ Elobmîs ge ǃgâi mûǂûiba ǁgoe-ūgus xa ra ǁkhāǁkhā da. Tsî ra mî ǁgoe-ūgus ǃnâ da ge ǃgâiba a hōǁkhā. (ǂKhm. 5:18, 19) Xawes ge Elobmîsa ra mî: “Mâ-i hoa-i nî ǂan ǃkhaisa, mati i nî ǁî-i soasa ǃanusib tsî ǃgôasib ǃnâ ūhâsa; ǂkhaba turab di gongonǃnâdi ǃnâ tama ǀūben khami, Eloba ǂan tamana.”​—1Tes. 4:4, 5.

9. (a) Jehovab khoena mati 1901ǁî kurib ǃnâ gere ǂkhâǃnâ-e Elobmîs gā-aisiba saosa? (b) 1 Johaneb 2:15, 16 ǃnâ da mâ daoǁgausa ra hō? (c) Romeǁîn 1:24-27 ǃnâ i ra mîhe khami da mâ ǁgaiǁgaibe xūna xu nî ǂgōsen?

⁹ 1901ǁÎ kuriba xu hâ kurigu ǃnân ge Jehovab ǃoaba-aona “ǁîn karokarosensa xu ǁî-aitsama ǁgaiǁgaisana ge māǁnâsen” di hâ ǂâiǀgaugu xa ge ǂgaeǂhapuhe tama hâ i. (Efe. 4:19) ǁÎn ge Jehovab ǀgaugu ǃoa-ai gere ûi ǂgao. Watch Tower 15 Meib 1926ǁî kurib dib ge ge mî “aore tsî taren hoan ge ǃanu ǂâiǀgaub tsî mûǂuiba ǁgoe-ūgub ǃoa-ai nî ūhâ.” ǁÎn ǂnamipen ǁgai xūna ǃhūbaib ǃnâ ra ī xawen ge Jehovab khoena Elobmîs di ǀgapi gā-aisib ǃoa-ai ra ûi. (Khomai re 1 Johaneb 2:15, 16.) Elobmîsa ūhâsa da ge kaise ra ǃgôaǃgâ. Jehovab tsîna da ge kaise ra gangan gagasi ǂû-eb ǂhanu ǁaeb ai ra mā da ǃkhaisa hîna ra huida-e î da tā nē ǃhūbaib xa ǂgaeǂhapu-e. *—Khomai re Romeǁîn 1:24-27.

10-11. Elobmîsa tae-e ge ǃkhâikhom ǀuni tsēdi xa?

¹⁰ Elobmîs ge ra ǃkhâikhom ǀuni tsēdi ǃnân khoena nî “ǁîǀnamsenxa” di. (2Tim. 3:1, 2) Buru tama da ge hâ ǃhūbaib khoen nē mûǂuiba ūhâ ǃkhaisa. ǀGui mîdi ǂkhanis ge ge mî 1970ǁî kurigu ǃnâ di “ge ǂkhanidi hîna ǃgâi ûiba ūhâs xa hâde ge hâ i” di. ǀNî ǂkhanidi ge “khomai aona gere ǂkhâǃnâ în tā ǀkharaǀkharasen tsî ǁîn ǀkha i xū-e a tsū di ǂâi.” ǀGui aiǁgausa ǃoa kō re, ǀgui ǂkhanis ǃnâ ge māsa i xoaǁguib ge ge mî: “aitsama ǀnamsen re îsa, ǂoaǂamsa khoets hîna ûi hâts a amaga.” ǂHanub ai ǃgaoǃgaosa, nau khoena huis ǃgao hâ ǂkhanis ge ge mî “khoe-i ge aitsama mîǁguiga dī tsî ǁî-i ǂhanu di ra ǂâi xūn hoana nî dī.”

¹¹ Nē ǂâiǀgauba du ge ǀnai ǁnâu hâ i? ǁGâuab ge Evasa ge ǂkhâǃnâ is ǂhanu tama hâ xū-e dī. ǁÎb ge ǁîsa ge mîba “Elob ǁkhāb khami nî ī, tsî ro ge nî ǂan mâ-i a ǃgâi tsî mâ-i a ǂkhaba ǃkhaisa.” (Gen. 3:5) Nētsēn ge ǂguina kaise a ǀgapiǂâixa tsî ǁîn ǀguin a ǂhanu tsîb Elob tsî khoen tsîna ǁîna xū-e mîba ǁoa ǃkhais ǂâiǀgauba ūhâ. Aiǁgause, nē ǂâiǀgaub ge khoen ǃgameba ra mû ǀgaub ǃnâ a mûhe ǁkhā.

12. Mâ ǂâiǀgaubab ǃhūbaiba ǃgameb xa ra aiǃgû kai?

¹² Elobmîs ge aogu tsî taradi tsîna  ra ǁkhāǁkhā în ǃgôagu tsî ǁîn ǃgameb mîmâisa ūhâ ǀgara. ǃGame hâ khoen ge ra ǂkhâǃnâ-e în ǃgâi ǃhoa-ūgu ǀgauga ūhâ: “ǁNā-amagab ge khoeba ǁgûb tsî ǁgûs tsîra ǁnāxū tsî nî ǁîb di taras tawa ǂgāmâisen, o ra ge ǁîǀgamra nî ǀgui ǁgan.” (Gen. 2:24) Xawen ge ǁnān hîna nē ǃhūbaib ǂâiǀgauba ūhâna ra mî ǃgame hâ khoe-i aitsama ǂâibasens mûǂuiba nî ūhâsa. “ǀNî ǁaxasigu ǃnâ” dis ge ǀgui ǂkhanisa ra mî “ǃhaoǃnâbe ǁnaetigu hîna ‘hoam ûitsamas kōse’ di hâ ǃgameb mîmâis ge ǀnî mîdi ǀkha ge ǃkhōǃkhunihe ‘ǀnammi sam ǁaegu hâs kōse’ di hâdi ǀkha.” Nē mûǂuib ge ǂgui ǃgamega khôa tsî hâhâ ra tsûba ra ǃaroma. Nēs ǃaromab ge nē mûǂuib hînab ǃhūbaiba ǃgameb xa ūhâba a gâre.

13. ǀGui ǃaromasa mā re hîna ra ǁgausa tae-i ǃaromab Jehovaba ǀgapi ǂgaoxa khoena a ǃhuisasa?

¹³ Elobmîs ge ra mî: “ǀGapi ǂgaoba ūhâ-i hoa-i ge ǃKhūba ǁgaiǁgaisaba.” (ǂKhm. 16:5) Tae-i ǃaromab Jehovaba ǀgapi ǂgaoxa khoena a ǃhuisa? ǀGui ǃaromas ge ǁnān hîna ǀgapi ǂgaoxan ge ǁGâuab di ǂūga ra ǁgauǂui. ǂÂi re, ǁGâuab ge gere ǂgom Jesub hîna ge Elob ǀkha hoa xūna a kurub ǁîba nî ǀgoreǀî di. (Mat. 4:8, 9; Kol. 1:15, 16) ǁNān hîna nē ǂâiǀgauba ra ūǃoan ge ra mûǂan nē gā-aisib ǃhūbaib dib Elob xa gâresib ase ra mûhesa.

14. Romeǁîn 12:3 sa mati ra huida i da ǀnōsa mûǂuiba sada ǃoa-ai ūhâ?

¹⁴ Elobmîs ge ra huida ǀnōsa mûǂuiba ǁîǀnamsenxasib ǃoa-ai ūhâsa. Elobmîs ge ra mî tsū tama i ge hâ aitsama ǀnamsensa di. Jesub ge ge mî: “ǀgūkhoebats ge nî ǀnam” nēs ge ra ǂâibasen i da ǀnōsa mûǂuiba sada ǂhâsigu ǃoa-ai ūhâ. (Mat. 19:19) Xawes ge Elobmîsa mî tama hâ i da nau khoen xa da  a ǂhâǂhâsa di ǂâi. Xawe ra mî: “Xū-i xare-e tā ǂnīǂnīsens tsî ǁîǃgôasensa xu dī, î du ǃgamǃgamsens ǃnâ nē-e nau-e ǁî-i ǃgâ-ai ǀgapise ǃgôa.”​—Fil. 2:3; Khomai re Romeǁîn 12:3.

15. Tae-i ǃaroma da a mî ǁkhā Elobmîs daoǁgaudi ǁîǀnamsenxasib xa hâde saos a ǃgâi di?

¹⁵ Nētsēn ge khoen hîna gā-aise ra mûhena Elobmîs daoǁgaudi ǁîǀnamsens didi ǃoa-ai ra ǂnoagu. ǁNîn ge ra mî nau khoena sa xa ǀgapise mûs ge ǀgaio khoe-i ase ra mûsen kai nî hîna nau khoen xa ǃgôasiba ǁgauhe tama hâna. Xawe amaba da ga mî o, ǁîǀnamsens ǂūga ǁGâuab ǃhūbaib ǃnâ mâ ǀgauga ra ǁgauǂui? Tae-e du ra mûǂan? ǁÎǀnamsenxa khoena ǂkhî khoena? ǂKhî omariden ūhâ? Ama ǀhōsanan ūhâ? Elob ǀkhan ǀgū ǀhōsagusisa ūhâ? Mû da rasa xūs mâ ǀamǂoasa a ǃgâi, ǃhūbaib gā-aisiba saosa tamas ka io Elob gā-aisiba?

16-17. Tae-i ǃgao da nî ganganxa tsî tae-i ǃaroma?

¹⁶ Khoen hîna nē ǃhūbaib xa gā-ai di ra mîhen daoǁgaude ra saon ge ǀūsabe-i khami i hîna nau ǀūsabe-i ai daoǁgausa ra ǂgan-e. Jesub ge ǁîb ǁaeb di gā-ai khoegu xa ge mî: “ǀÛǀkhā gu re, ǂgī hâ ǂgaeǂgui-aogu ǂgī hân digu kom ǁîgao; tsî ǂgī hâ-i ga ǂgī hâ-e daoba a ǁgauo, on kom hoana tsaus ǃnâ nî ǁnāo.” (Mat. 15:14) Amabes ǃnâb ge nē ǃhūbaib di gā-aisiba a gâre xū Elob mûǁae.

¹⁷ Elobmîs gā-ai daoǁgaudi ge a “harebe ǁkhāǁkhās ǃoa, tsî ǂgōǀaus ǃoa, tsî ǀkharaǀkharas ǃoa, tsî ǂhanu-aisib ǃnâ kaikais ǃoa.” (2Tim. 3:16) Kaise da ge ra gangan Jehovab ǁîb ǀapeǂhumis ǃnâ-u nē ǃhūbaib gā-aisiba xu ra ǁkhauba da ǃkhaisa. (Efe. 4:14) Nē gagasi daoǁgaudi hîna da ra māhe di ge ra hui da i da Elobmîs amaba ǃkhōǀgara. Kai aiǂhanub ge Elobmîs ǃnâ-ūb Jehovaba ra daoǁgauda ǃkhaisa.