1, 2. (a) Tae-e sida kaise a ǀō-aisaba? (b) Mâ amaga da ra ǃgôaǃgâ tsî tae-i ǃaroma? (Tsoatsoas ǃnâ hâ ai-īsiba mû re.)

TAE-E sado kaise a ǀō-aisaba? Māsenxase du ǀnî hâ xū-i ǃgao nî mābe? Jehovab di ǃoaba-aon ǃgao di ge ǁnā dîde kaise a supu ǃereamsa. Sida kaise a ǀō-aisaba xū-i ge Jehovab ǀkha da ūhâ ǀhōsagusisa tsî da ge nēsa tātsēs tsîna mābe tide. Elobmîs amab tsîna da ge ra ǃgôaǃgâ hîna ra huiba î da sida ǁGûb ǀkha ǃgâi ǀhōsagusisa ūhâ.—Kol. 1:9, 10.

² Sida ǀGapi ǂoaǂamsa ǁgauǃnâ-aob ǁîb Mîsa xu ra ǁkhāǁkhāda xūn xa ǂâi re. ǁÎb ge ǁîb ǀons ǂâibasens tsî ǁîb mâǂoa ra ǀgaugu tsîna ge ǁkhāǁkhāda. Tsîb ge Xoremarib xas tsîna ge mîba da, hînab ge ǁîb ǀGôab Jesub ǃnâ-ū a ǁguibab xa. Jehovab ge ǁîb di Gaosib xas tsîna ge mîba da tsîb ge ǂkhauhesana ǀhommi ǃâubasensa ge mā tsî ‘ǀnî gūna’ ǃhūbaib ai ǀamosib kōse ûisa. (Johaneb 10:16) ǁÎb ge ra ǁkhāǁkhāda mati da nî tanisen ǀgauba. Sida ge nē  amaba kaise ra ǃgôaǃgâ nēs sida Kuru-aob ǃoa ra ǂgae da amaga. Tsîs ge nēs tsîna sida ûiba ǂâibasensa ra mā.

3. Amaba ǁamasa tae-e ǂâibasen tama hâ?

³ Jehovab ge a māxa Elo. ǁÎb ge ǃgâiba ǃkhō-oa tama hâ amaba ra ôana xū. Jehovab ge ǁîb ǀGôab ûiba ǀkhaeb ase ge māda. Elob ge sada ǂgaoǀkha tama hâ î da amab ǃgao mari-e matare. Simon di ǀon hâ khoeb ge apostel Petruba mari-e gere mā ǂgao o, ǃanu gagab ǀkhāb ge ǂkhauhe ǃkhais ǃgao ob ge Petruba ǁîba ǂkhā tsî ge mî: “A-i sa mari-e sats ǀkha kāǁōsib ǃoa ǃgû, Elob mās ra mari-e xu hōhe, tits go ǂâi amaga.” (ǃNaeǃkhaidi 8:18-20) ǁNās ǀkha ‘amaba ǁamas’ di hâ mîsa tae-e ra ǂâibasen?

4. Nē ǁkhāǁkhāǃâs ǃnâ da tae-e amab xa nî ǁkhāǁkhāsen?

⁴ Khomai re ǂKhoamîdi 23:23. Elobmîs ǃnâ hâ amaba da ge ǁgūtsâ da ga ra o, o ǀgui nî hō. ǁKhā da an hoana da ge nî dītsâ nē amaba hōs ǃgao. ǀNî ǂanǂansa ǂkhoamîdi xoa-aob ge ge mî, “ǁama” tamas ka io da ga xū-e ga ra “hōǂgā” o, o da ge nî dītsâ î da tā ǁî-e “ǁamaxū” tamas ka io ǂoaǃnâ. Hā re î da ǃhoaǃgao amaba “ǁamas” tae-e ra ǂâibasensa tsî tae-e da a matare ǁkhāsa amaba da ga ǁama ǂgao o. ǁNās ǀkha î ge sida amaba ūba hâ ǃgôaǃgâsiba nî ǀgai tsîs ge nēsa nî hui da î da tā amaba “ǁamaxū.” Tsî da ge nî mû amaba ǁamas kaise a ǀō-aisa ǃkhaisa.

5, 6. (a) Amaba da mati mari-i ose a ǁama ǁkhā? ǂKhō re. (b) Amaba xu da mati ra ǀama?

⁵ Xū-i hîna marioǃnâ î tsîn ge kaise a ǂgan ǁkhā. Hebregowab mîs tsîn ge ǂKhoamîdi 23:23 tawa “ǁama” di ra ǂnûiǃkhunihe xawe “hō” dis tsîna ra ǂâibasen. Nē ǀgam mîra ge dītsâ tsî xū-e hōs tamas ka io xū-e ǀnî hâ xū-i ǀkha mādawas ǃgaos tsîna ra sîsen-ūhe. Amaba ǁamas di ǀgauba da ge sao rase a ǂkhō ǁkhā. ǁAmaxū ǃkhaib tawa î ge “marioǃnâ bananagu” di a xoasa. Nē banana ga sadu oms tawa aitsâma nî sī? Hî-î. Sada ge aitsâma ǁama ǃkhaiba ǃoa ǃgû tsî nē banana ga sī nî ū. O nē banana ga a marioǃnâ? Î, xawe da ge sada nî dītsâ ǁaeba ǁamaǂui tsî ǁama ǃkhaiba ǃoa īsa. ǁNās ǁkhas khami da ge sada tsîna mari-e ǂhâ tama hâ amaba ǁamas ǃgao. Xawe da ge nî dītsâ ǁî-e hōsa.

⁶ Khomai re Jesajab 55:1-3. Jehovab mîdi hîna Jesajab xa xoahe hâ di ge ǃnāsase ra ǁgau amaba ǁamas tae-e ra ǂâibasensa. Nē ǃâb ǃnâb ge Jehovaba ǁîb mîsa ǁgammi, dai-i tsî ǂauxûi-i tsîn ǀkha ra ǀgopeǀnō. ǃAmku ǁgammi khami î ge Elobmîs amaba khoena ra khoakhoa. Dai-i ǀgaiba māda tsî ǀgôarona ra kaikai khamis ge Elobmîsa ǀgaiǀgai da tsî ra hui da î da gagasise ǀgai. Jehovab mîdi ge ǂauxûi-i khamis tsîna ī. Mâ ǀgaub ǃnâ? Elobmîs ge ǂauxûi-e ǃgâiaǂgaob ǀkha ra ǀgopeǀnō. (Psa. 104:15) ǁÎb khoena ‘ǂauxûi-e ǁama kais’ ǃnâ-ūb ge Jehovaba ra ǁgau da ǁîb mîdi ge nî ǃgâiaǂgao kai da di. (Psa. 19:8) Nēb ge kaise ǀō-aisa ǀgaub hîna da Elobmîs amaba ǁkhāǁkhāsen tsî a sîsenǂui ǁkhāba. Sida ǁgūtsâde da ge matare da ra maris ǀkha a ǀgopeǀnō ǁkhā. Hā re î da  koro ǀgaugu amaba da a ǁama ǁkhāgu xa ǃhoa.

7, 8. (a) Tae-i ǃaroma da ǁaeba nî ūhâ amaba ǁamas ǃgao? (b) ǀNî ǃgâsasa tae-e ge matare amab ǃgao tsî mâ ǃnurigu ǀkha?

⁷ ǁAeb. Amaba ra ǁama khoen hoan ge nēsa ra matare. Gaosib haisi-amsa ǃgâs, Elobmîsa ôaǃnâs tsî ǀhaodi ǃgao aiǂhomisens tsîn hoan ge ǁaeba ǂhâ hâ. ǁAeba da ge ǂhâǂhâsa tama hâ xūna xu nî ǁamaǂui. (Khomai re Efeseǁîn 5:15, 16.) Matikō ǁaeba i ǂhâ hâ sida Elobmîs ǂansa hōsa? Nēs ge sida mâsiba xu hâ. Jehovab gā-aisib, ǀgaugu tsî sîsengu tsîn xa da ge ǁkhāǁkhāsen ǀû tide. (Rom. 11:33) ǂGurose ge māǂuihe ǃKhē xu ǂgō-ommi ge amaba “ǃamku bloms” ǀkha ra ǀgopeǀnō tsî ge mî: “Tā ǀgui bloms ǀkha ǂâu re di. ǀGuis ga ǂâu tama hâ o, o î ge ǁkhawa ga ǀkhai hâ. Noxoba ǂguina ôa re.” Dîsen re, ‘Matikōse ta amaba a ǂan?’ ǂGui ǁaeba da ga ra ūhâ xawe da ge noxoba Jehovab xa nî ǁkhāǁkhāsen. Nētsē da ge sida ǁaeba ǃgâise nî sîsen-ū î da ǂgui amaba ǁama sida mâsib ra mā-am khami. Amaba gere ǃâba khoe-i aiǁgaus xa ǂâi re.

⁸ Mariko * di ǀon hâ ǃgâsas ge Amerikaba ǃoa ge ī, is ǁnāpa skola sī ǂgâ. ǁNā ǁaeb ǃnâs ge ǁîsa ǀnî hâ ǂgomdi ǁkhāǁkhāde gere sao hîna ge 1950ǁî kuri Japani ǃnâ a tsoatsoana. Aimâba-ao ǃgâsas ge Marikosa omsa xu oms ǀkhas ra aoǁnâ hîna ge ǀhao-ū. Elobmîs amabas ge ǁkhāǁkhāsen tsoatsoa o, os ge kaise gere ǃgâiaǂgao tsî ǃgâsasa ge ǂgan îs Elobmîs ǁkhāǁkhāsa ǀgam ǃnāra wekheb ǃnâ ūhâ. ǂGui skoli sîsenni tsî ǃkhare tsēde ra sîsen-e sîsenni hînas ge ūhâ ī-i ǂam-ais ge Marikosa ǀhaode ge hâǃnâ tsoatsoa. Tsî ǁkhoaxa ǁaeba ūhâs tsîna ge ǀoro kai îs ǃnāsa ǁaeba ūhâ amaba ǁkhāǁkhāsen ǃgao. Māsenxases ge māsen amagas ge ǃhaese gagasise ge aiǃgû. ǀGui kuriba ǃkharu hâses ge ge ǁāǁnâhe. Tsî 2006ǁî kurib ǃnâ ge aimâba-ao kai, nētsēs kōse.

9, 10. (a) Amaba ǁamasa mati ǃkhūsisa da ra mû ǀgauba ra tsâǀkhā? (b) ǀNî ǂkham ǃgâsasa tae-e ge ǀû tsîs nēs xa mati ra tsâ?

⁹ ǃKhūsis. Amaba ǁamas ǃgao da ge ǀgapi sîsenni tamas ka io ǀgapi ǁkhāǁkhāsensa ge ǀû. Petrub tsî Andrib tsîn ge ǁkhauhe o, îgu ‘khoeǃkhō-ao’ kai o gu ge ǁîgu ‘ǀûide ǁnāxū’ tsî ge ī. (Mat. 4:18-20) ǂGui khoen hîna amaba ra ǁkhāǁkhāsenan ge ǁîn sîsen-e ǁnaxū tsî a ī ǁoa. ǁÎn ge Elobmîs ai a ǃgaoǃgaosa ǃereamde ūhâ. (1Tim. 5:8) Elobmîs amaba ra ǁkhāǁkhāsen khoe-i ge ǁî-i ǃkhūsis ǃoagu ūhâ ǂâi ǀgauba nî dawa tsî ǂhâǂhâsa xūna ǂgurose nî mâi. Jesub ge nēs xa ge mî: “ǁUiba ǃhūbaib ai tā ǀhaoǀhaobasen . . . ǁuiba ǀhommi ǃnâ ǀhaoǀhaobasen.”(Mat. 6:19, 20) Hā re î da ǀnî ǂkhamkhoes aiǁgausa kō.

¹⁰ Maria di ǀon hâ ǃgâsas ge skolas ǂgâ tama hâ hîna ǀnai golfsa ge ǀhuru tsoatsoa. ǀGapi skola ǃoas nî īs kōses ge golfsa gere ǀhuru tsî ǀgapi ǁkhāǁkhāsens ǃkhaib tawa ǃkhai-e ge hō. ǁÎs ge golfsa kaise ge ǀnam-i tsî nēs ǃnâ-ū ǂgui mari-e gere kuru ǂgao. Xawes ge Elobmîsa ge ǁkhāǁkhāsen  tsoatsoa tsî ǁkhāǁkhāsens ra xūn xa kaise ge ǃgâibahe i. Tsî gere ǃgâiaǂgao amab ge huisi o, îs ǁîs ûib ǃnâ ǀkharaǀkharana dī. ǁÎs ge ra mî: “Ti ǂâi ǀgaub tsî ûi ǀgaub tsîna ta ge Elobmîs ǂgaoǀkhādi ǃoagu gere dawa khami da ge kaise gere ǃgâiaǂgao.” Marias ge ge mûǂan gagasi ǃkhūsis tsî ǃhūbaib ra mā ǃkhūsis tsîn hoanas ge a ūhâ ǁoa di. (Mat. 6:24) Amabas ge ge matare ǁîs ǃkhūsis tsî ǂanhes ǁkhāsib tsîna māǁnâs ǃnâ-ū. Amabas ge ǁama amagas ge nēsi a aimâba-ao tsî “ǂâibasensa ūhâ ûib” ǃnâ ǃgâiba ra mû.

11. Amaba da ga ra ǁama o, o sida ǀhōsan ǀnîn ǀkha tae-e ra ī?

¹¹ ǀHōsagusis. Elobmîs ǁgaragu ǃoagu da ga ra ûi o, o î ge sida ǀhōsan tsî ǀaokhoen tsîn ǀkha da ūhâ ǀhōsagusisa nî dawa. Tae-i ǃaroma? Jesub ge ǁîb saosaben xa ge mî: “ǁÎna ǃanuǃanu amab ǃnâ, sa mîs ge a ama.” (Jhn. 17:17) “ǁÎna ǃanuǃanu” di hâ mîs ge “ǀgora nî” dis tsîna a ǂâibasen ǁkhā. Amaba da ga ra ūǃoa o, o da ge ǃhūbaiba xu ra ǀgorahe. Khoen ge ǀnî hâse ra mû da sida ǂgom ǀgaub ra ǀkhara amaga. Elobmîs ǁgaragu ǃoagu da ge ra ûi. ǀGorasa da ūhâ ǂgao tama hâ xawen ge sida ǀhōsan tsî ǀaokhoen tsîna sida xu nî bē tamas ka io sida ǂgomsa a mâǃoa tsoatsoa ǁkhā. Jesub ge nēs xa ge mî: “Tsî khoe-i ommi din ge ǁî-i khākhoese nî i.” (Mat. 10:36) Tsî ge mî amaba ǁamasa da ge xū-i ǀkha a mādawa-am ǁoa di.—Khomai re Markub 10:28-30.

12. ǀNî Jodeǁî khoeba tae-e ge matare amab ǃgao?

¹² ǂKhamsis tsēde xub ge Aaron di ǀon hâ Jodeǁîba ge mîbahe Elob ǀons ge ǂgaiǂuihe tama hâ di. Xaweb ge Aarona amab ǃgao ge ǃâ hâ i. Kaiseb ge gere ǃgâiaǂgao ǁgauheb ge o ǀōmûde haka Hebre mîdi ǀkha ǀhaoǀhaos ǃnâ-ūb ge Elob ǀons “Jehovasa” nî hō di. ǃGâiaǂgao hâseb ge sinagogeba ǃoa ge ī îb sī ǁgauǃnâ-aoga mîba. ǁÎgu ge Aaroni ǃâubasen tama hâ ǀgaub ǃnâ ge ǃeream. ǁÎb ǀkha ǃgâiaǂgao tama i tsî gu ge ǁîba ge ǂāra-ai tsî ǀaesen hâ khoe-i khami gere hâ-ū bi. ǁÎb ge nēs xa ge tsûaǂgao kaihe. Xaweb ge amaba noxoba gere ǁama tsî Jehovaba ǁîb ûib hoaba gere ǃoaba. Aaroni khami da ge amaba da ga ra ǁama ǂgao o, o sida ǁkhāsib ǃnâ hâ xū-i hoa-e nî matare tsî hâ nî ǀkharaǀkharana nî ūǃoa.

13, 14. Mâ ǀkharaǀkharana da sida ǂâi ǀgaub tsî tanisen ǀgaub ǃnâs tsina nî dī amaba da ga ra ǁama ǂgao o? Aiǁgau-e mâ re.

¹³ ǃAnu tama ǂâi ǀgaub tsî tanisen ǀgaub. Aamaba da ga ūǃoa tsî Elobmîs ǁgaragu ǃoagu ga ra ûi ǂgao o, o da ge sida ǂâi ǀgaub tsî tanisen ǀgaub tsîna nî dawa. Petrub ge sao rase ge mî: “Î ǁnâuǀnamxa ǀgôadu ase tā ǀguiti-īkaisen aibe du ǀūǂams ǃnâ ge ī i tura-aigu ǃoa . . . ǁkhās khami sado ǁkhāti ǃanu sadu tanisens hoas ǃnâ.” (1Pet. 1:14, 15) Khoen hîna ge Eloxoresa ǃnās Korintes ǃnâ ǁan hâ în ge ǂgui ǀkharaǀkharana ge dī amaba ǁamas ǃgao. (1Kor. 6:9-11) Nētsēs tsînan ge ǂguina ǁîn ûi ǀgauba ge dawa amaban ra ǁama ǂgao amaga. Petrub ge Xristeǁîna ge ǂâiǂâiǃnâ: “ǂÂuba da i kom hâo, ǃgôa-ī ge ǁaeb ûib diba da ǀūben  di ǂâisa gere dīǀoaǀoasa, ǁgaiǁgaisa ǂūǁoasigu tsî turagu tsî āǀhorosigu tsî ōgu tsî āǃansengu tsî ǁgaisi ǁgôatsuiǁgoaǃoabagu tsîn ǃnâ da gere ûi ǃnubai.”—1Pet. 4:3.

¹⁴ ǂGui kuriga ra ge Devynni tsî Jasmines tsîna kaise xûi-e gere ā. Devynnib ge banks ǃnâ sîsens ǃnâ ǂansa ge ūhâ i xaweb ge sîsen-e ǁîb ās ǃgomsib ǃgao ge dīhō tama hâ i. Jasmines ge khoen xa ge ǃgôahe tama hâ i ǁîs ǁgai tanisen ǀgaub ǃgao. Jasmines ge ǀgui tsēs ǃgâu hâse ra ǃgû hîna ǀgam sîsabe ra ǀkha ge ǀhao. Nē sîsabe ra ge ge ǂgan îra ǁîsa Elobmîsa ǁkhāǁkhā, xawe ra ge wekheba ǃkharu hâse oms ai a sī o, o ra ge Devynni tsî Jasmines tsîn hoara oms ai ge hâ i. Sîsabe ra ge ǁîra ǀkha ǁae tama hâ i khami ra ge gere tsâ. Sao ra ǃnās ai î ge hoana ge ǃgâi i. ǂGuro ǁkhāǁkhāǃâsa xu ra ge Devynni tsî Jasmines tsîna ǁkhāǁkhāsen ra gere xūna ge sîsenǂui tsoatsoa. ǃNona ǁkhâgu ǃnâ ra ge ge ā ǀû tsî ge ǃgame. ǁÎra ge dī ǀkharaǀkharan ge ǂgui khoen xa ge ǂanhe tsî ǂgui khoena ge ǁgari în Elobmîsa ǁkhāǁkhāsen tsoatsoa.

15. Tae-e kaise a ǃgom amaba matares ǃgao tsî tae-i ǃaroma?

¹⁵ Elobmîs ai ǃgaoǃgaosa tama hâ dī xūn tsî ǁnaetigu. Elobmîs ai ǃgaoǃgaosa tama hâ dī xūn tsî ǁnaetigu tsîna xu ǂgōsens ge kaise a ǃgom. ǀNî khoen ge a supubahe nēsa dīsa xawe ǀnîn ge ra îganǀgē amaba ǁamasa omaris ǁanin, ǀhōsan tsî sîsenǀhao-aona xun nî hō ǁgâib ǃgao. Nē mâsib ge ǃgâi tide nēs ga ǁō hâ ǀaokhoe-i mari ǁhōga ga ra ǃkhōǂgā o. (Deu. 14:1) Nau khoen di aiǁgaudi ge a hui da ǁkhā î da ǂhâbasa ǀkharaǀkharana dī. Efesus ǃnâ ge hâ i khoen aiǁgaude kō re.

16. Efesus ǃnâ hâ Xristeǁîna tae-e ge dī amaba ǁamas ǃgao?

¹⁶ Efesus ge ǁîs ǃgaidīb xa ge ǂansa i. ǀAsase ge ǁāǁnâhe Xristeǁîna tae-e ge dī în ǁîn ǁgai ǁnaetiga xu ǂgōsen tsî amaba ǁama? Elobmîs ge ra ǁguiǃā: “Tsî ǁkhāti ǂguin, ǃgaidīga gere dīn ge ǂkhanide ūhā, tsî ǁîde ǂhaisase ge khauǃkhū, tsîn ge ǁîdi ǀgausa ǃgôaǀhao, tsî ǁîsa korodisiǀoadisi ǀhaiǀuri maride ge hō. ǁNātis ge ǃKhūb di mîsa ǀgaisase ǀom tsî ge dan.” (ǃNǃkh. 19:19, 20) ǂGomǂgomsa Xristeǁîn ge nē ǁguiǂgāsens ǃgao kaise ge ǀkhaehe.

17. (a) Tae-e amaba ǁamas ǃnâ a ǃkhōǂgāsa? (b) Mâ dîde da sao ra ǁkhāǁkhāǃâs ǃnâ nî ǃhoaǃgao?

¹⁷ Tae-e du ge dī amaba ǁamas ǃgao? Hoa da ge amaba ǁamas ǃgao blomde ra ǀhaoǀhao. ǀNîn ge ǁîn ǃkhūsis tsî ǀhōsan hînan ūhâna dawas ǃnâ-ū amaba ge ǁama. ǂGuin ge ǁîn ǂâi ǀgaub, tanisen ǀgaub tsî ǁnaetigu hîna Elobmîs ai ǃgaoǃgaosa tama hâ gu tsîna ge dawa. Elobmîs a ama ǃkhaisa da ge ge mûǂan tsî sida ǁkhāsib ǃnâ hâ xūn hoana ra matare amab ǃgao. Nēs ge ǃgâi ǀhōsagusisa Jehovab ǀkha ra mā da. Sida ǀkhaegu hîna da ge amaba hōs ǃnâ-ū a hōgu ai da ga ra kō ,o da ge ǂâi ǁoa khoe-i nēsa nî ǁamaxūsa. Mati da amaba a ǁamaxū ǁkhā tsî nēsa tae-i ǃaroma ǂhanu tama hâ? Nē dîde da ge sao ra ǁkhāǁkhāǃâs ǃnâ nî ǃhoaǃgao.