KHOEXAǃNÂSIB ge ǀgaiǀgai da tsî ra ǁkhaeǂgao da. Mûǂan da ga ra o khoe-i ge sida ra tsâba di, o da ge nēsa ra ǃgôaǃgâ. Hoa da khoexaǃnâsib ǃnâ ra hâ-ūhe ǂgao amaga da mati nē ǀgauba a omkhâi ǁkhā?

Khoexaǃnâsib ge nau khoen ǃnâ ǃgâiǃgâibasensa ūhâsa ǃkhōǂgā hâ, nēs ge mîdi tsî dīgu tsîn ǃnâ-ū ra dīhe. Khoexaǃnâsib dīgu ǃnâ-ū ra ǁgauhe amaga î ge nēsa ǃgâi ǀgaugu ǃnâ ǀgui ǁgausa ǂâu tama hâ. Ama khoexaǃnâsib ge ǀnammi tsî ǀkhomxaǂgaosib tsîn ǃnâ-ū ra ǁgau-e. Nē khoexaǃnâsib ge Elob ǂûgu di ǃâ hînan Xristeǁîna nî omkhâiba. (Gal. 5:22, 23) Hā re î da khoexaǃnâsiba omkhâis ǃgao, Jehovab tsî ǁîb ǀGôab tsîn nē ǀgauba mati ra ǁgausa kō tsî mati da nēsa a ǁgae ǁkhā ǀgaus tsîna.

Jehovab ge hoa khoen ǃoagu a khoexaǃnâ, ǁnān hîna a “ganganoǃnân tsî ǂkhaban” tsîna ǃkhōǂgā hâse. (Luk. 6:35) Aiǁgauseb ge Jehovaba ‘ǁîb soresa ǃgâin tsî ǂkhaban tsîn ǂama ra ǁhai kai, tsî ǂhanu-ain tsî ǂhanuoǃnân tsîn ǂama ra ǀapi kai.’ (Mat. 5:45) ǁNā-amagan ge ǁnān hîna Jehovaba Kuru-aob ase ǂanǃgâ tama hân tsîna nēsa xu ra ǀama tsî ûib tsî ǃgâiaǂgaob tsîna ra hōǃâ.

Khoexaǃnâsiba da ge Jehovab ge Adammi tsî Evas tsîna a dība xūna xu ra mû. Adammi tsî Evas tsîn ge ǁore ra ge o, o ‘ǀnomahais di ǁnâuga ǂomǁae tsî sarana ge dībasen.’ Jehovab ge ge mûǂan ǁîra ge sarana ǂhâ hâ īsa îra ǃhanab ǃauga ǁan ǁkhā, nē ǃhūb ge “ǁkhūn tsî ǀgamen” tsîn ǀkha ge ǁkharahe. Jehovab ge ǁîra ǂhâsiba ge mûǂan tsî “khōsarana” ge mā ra.—Gen. 3:7, 17, 18, 21.

Jehovab ge “ǂhanu-ain tsî ǂhanuoǃnân” ǃoagu a khoexaǃnâ xaweb ge ǃgōsase ǁîb ǂgomǂgomsa ǃoaba-aon hoan ǃoagu khoexaǃnâsiba ra ǁgau. Aiǁgause, kēbo-aob Saxariab tsēdi ǃnâ î ge ǀhomǃgāba kaise ge ǁaixa mûb ge o khoen ge tempela go om ǀû di. Jehovab ge nē ǀhomǃgāb di ǂâiǂhansendi tsî tsûb tsîn xa ge ǁnâu tsî ǁîba ‘ǁkhaeǂgaos mîdi’ ǀkha ge ǂkhâǃnâ. (Sax. 1:12, 13) Jehovab ge ǁkhā ǀgaub ǃnâ Eliaba ge ǁkhaeǂgao. Kēbo-aob ge kaise ǁgaise gere tsâ tsî Jehovaba ge ǂgan îb ǃgamhe. Jehovab ge Eliab tsâsiga ǂâis ǃnâ ge ūhâ i tsî ǀhomǃgāba ge sî îb ǂkhâǃnâhe. Elob ge kēbo-aoba ge mîba ǀgūrib ge hâ tama hâ di. Eliab ge nē khoexaǃnâ mîde a ǁnâus khaoǃgâb ge ǁîb sîsen-e ǃamkuse  dīs ǃnâ ge aiǃgû. (1Gao. 19:1-18) Elob khoen ǁaegu î ham-e ǃgōsase Jehovab ǀgaub khoexaǃnâsib diba ra ǁgau?

ǃHūbaib aib ge hâ io, ob ge Jesuba ge khoexaǃnâ i tsî khoen tsîn xa gere ǂâi. ǁÎb ge nau khoen ǀkha ǁgai ǀgaub ǃnâ ge hâ tama hâ i. ǀKhomxaǂgaosib ǀkhab ge ge mî: “Tita ǃoa hā re ǀhupu hâdu tsî ǃnaohe hâdu hoado, o ta ge tita nî khoakhoa du. . .Ti ǃnaob a ǃgâi.” (Mat. 11:28-30) ǁÎb ge khoexaǃnâ i amagan ge khoena Jesuba gere sao. ‘ǀKhomxaǂgaosib’ xa ǂgaeǂguihe hâseb ge Jesuba khoena ǂgauǂgau tsî ǂgui xūna ǁîb ǁGûb xa gere ǁkhāǁkhā.—Mrk. 6:34; Mat. 14:14; 15:32-38.

Jesub ge ge ǁnâuǃāxa i tsî nau khoen ǀkhab gere hâ ǀgauba ǂâis ǃnâ gere ūhâ. Mâ xū-i hoa i khoe-i gere ǂgan-eb ge Jesuba “khoexaǃnâsib” ǀkha gere dī. (Luk. 9:10, 11) Aiǁgause, ǁîb ge ǀaoǂnâba ge ūhâ i khoes ǀkha ǁgai ǀgaub ǃnâ ge ǃhoa tama hâ i ǁîb sarabas ge tsâǀkhā o. (Lev. 15:25-28) Jesub ge nē kaikhoes hîna ge ǀaoǂnâba 12 kuriga ūhâ îsa ǃoa ge mî: “ǀGôase, ǂgoms âs go hui si, ǂkhîb ǃnâ ǃgû î ǂgau sa ǁō-ai-e xu.” (Mrk. 5:25-34) Nē ǃnaeǃkhais ge kaise a ǀō-aisa.

Aiǁgaude xu da ge a mû ǁkhā khoexaǃnâsib ge dīgu ǃnâ-ū ra ǁgauhe di. Jesub ge khoexaǃnâsiba dīb ǃnâ-ū ǁgaus aiǁgausa Samariaǁîb di ǂkhōs ǃnâ ge ǁgau. ǃHuigus ge Samariaǁîn tsî Jodeǁîn tsîn ǁaegu hâ i xaweb ge Samariaǁî kaikhoeba, khoeb hîna ge xūna a ǃnari ai-eb tsî ǁōb kōse a ǁnāxūheba gere tsâba. Khoexaǃnâsib ge Samariaǁîba ge ǂkhâǃnâ xū-e dīsa. ǁÎb ge khoeba ge ǀaeǃkhō tsî ǁîba hâǃkhai-e ge mā. Samariaǁîb ge ǃkhais di ǃûi-aoba ge ǂgan îb khoeba ǀaeǃkhō-e tsî hâ nî xūn ǃgaos tsîna ge matare.—Luk. 10:29-37.

Khoexaǃnâsib dīgu ǃnâ-ū ra ǁgau-e xawe î ge ǂâidi tsî ǂkhâǃnâs mîdi ǃnâ-ūs tsîna a ǁgau-e ǁkhā. “Tsûaǂgaob khoeb di ǂgaob ǃnâ hâb ra ǁîba ǃgamǃgam, xawe ǃgâi mîs ra ǁîba ǃgâiaǂgao kai” dis ge Elobmîsa ra mî. (ǂKhm. 12:25) Nau khoen ǃoagu da ga khoexaǃnâsiba ǁgau tsî ǃgâi mîde ǁîna ga ra mîba o, o da ge ǁîna ǂkhâǃnâ tsî nî ǃgâiaǂgao kai. * Sida khoexaǃnâ mîdi ge nî ǁgau ǁîna da ra tsâbasa. ǂKhâǃnâhe hâsen ge ǁîna ǃgomsinan mati nî mâǃoasa a ǂan.—ǂKhm. 16:24.

“Īb Elob dib” ǃnâ da a kurusa amaga da ge hoa da khoexaǃnâsiba a omkhâi ǁkhā. (Gen. 1:27) Juliub hîna ge Romeǁîn ǀapaǃamku dana îb ge apostel Pauluba “khoexaǃnâse sîsenū, tsî ge mā-am bi, khoen tawa sī tsîb nî sîsenbahe ǃkhaisa” Sidons tawa. (ǃNǃkh. 27:3) Maltas ǃnâ ge hâ i khoen ge “ǂkhari tama khoexasiba” gere ǁgau Paulub tsî naun hîna ge ǃgâi tama mâsiba a hōǃân tsîn ǃoagu. ǁNā ǃās ǃnâ ge hâ i khoen ge ǀaesa ge khau în nē khoena ǀgam kai. (ǃNǃkh. 28:1, 2) ǁÎn ge ǃgâi xūna gere dī xawe î ge khoexaǃnâsiba xū-e dīs ǀguisa ǃkhōǂgā tama hâ.

Eloba da ga ǃgôaǃgâsiba ga ra ǁgau ǂgao o, o da ge khoexaǃnâsiba nî sida  ûib di ǃâ kai. Jehovab ge ǁnā-amaga ra mî î da khoexaǃnâsiba “ana”. (Kol. 3:12) Hoaǁae î ge supu tama hâ nē ǀgauba sida ûib ǃâ kaisa. Tae-i ǃaroma? ǀNîsi da ge khoexaǃnâsiba ǁgausa ra tao, ǃnorasasib tsâsiba da ūhâ tamas ka io a ǀgapiǂâixa amaga. Nē ǃgomsina da ge ǃanu gagab tsî Jehovab khoexaǃnâsiba ǁgaes ǃnâ-ūs tsîna a dan ǁkhā.—1Kor. 2:12.

Mâ ǀgaub ǃnâ da khoexaǃnâsiba ǁgausa a ǃgâiǃgâi ǁkhā? Dîsen re: ‘ǀKhomxaǂgaosib ǀkha ta ra ǃgâ? Nau khoen ǂhâsiga da ra ǃgaoǃgâ? Mâ ǁae ta ge di omaris ǁani tama hâ khoe-i ǃoagu khoexaǃnâsiba ǁgau hâ i?’ Mîǁguiga da ge nî dī tsî sida ǂnamipe hâ khoena ǃamkuse nî ǂan ǃgōsase ǁnān hîna ǀhaohâb ǃnâ hâna. Nē ǀgaub ǃnâ da ge ǁîn mâsib tsî ǂhâsigu tsîna nî ǂan. Sao rase da ge khoexaǃnâsiba ǃgâi ǀgaugu ǃnâ ra ǁgau ǂgao sida tsîn ǃgôaǃgâsiba nî ūhâse. (Mat. 7:12) Jehovab ge sida ǁgūtsâde nî ǀkhae khoexaǃnâsiba omkhâis ǃgao ǁîba da ga ra ǂgan o.—Luk. 11:13.

Apostel Paulub ge dîhe o îb ǁgau ǁîb mati nau aoǁnâ-aona xu ra ǀkharasa ob ge ge mî ǁîb a “khoexaǃnâsib” ǃgao di. (2Kor. 6:3-6) Khoen ge Pauluba ǃoa ǁîb khoexaǃnâsib xa gere ǂgaehe, ǁîb ge khoexaǃnâsiba dīgu tsî mîs ǃnâ-ū gere ǁgau. (ǃNǃkh. 28:30, 31) Sida tsîn ge khoena amab ǃoa a ǂgae ǁkhā sida khoexaǃnâ tanisen ǀgaub ǃnâ-ū. Khoexaǃnâsiba da ga hoa khoen ǃoagu ga ra ǁgau o, o da ge ǁîna ra hui în tā ǁaixa. (Rom. 12:20) ǁAeb ǀkhan ge nē khoena Elobmîs haisi-amsa ǃoa nî ǂgaehe.

Paradais ǃhūbaib ain ge ǂgui khoen hîna khâisa nî hōna khoexaǃnâsiba nî hōǃâ, ǀnîna ǂguro ǃnās ase. ǃGôaǃgâsib xa ǁgarihe hâsen ge ǂguina khoexaǃnâsiba nî ǁgau. Khoen hîna khoexaǃnâsiba ǁgau tama hân ge Paradais ǃnâ ǁan tide. ǁNān hîna ǀamosib kōse nî ûin ge khoexaǃnâsib ǃnâ nî hâ-ūgu. (Psa. 37:9-11) ǁNā Paradais ǃhūbaib ǃnâ da ge ǃnorasasib tsî ǃgâiaǂgaob tsîna nî ūhâ. ǁNā ǁaeb nî hās aiǃgâ da mati nēsi khoexaǃnâsiba nî ǁgau?

Elobmîs ge ra mî, “ǀkhomxaǃnâ khoeb ra ǁîb di ǀomsa ǃgâidība” di. (ǂKhm. 11:17) Khoen ge khoexaǃnâ khoe-i ǃoa ra ǂgaehe tsî ǁnā khoe-i ǃoagu ǀkhomxaǂgaosiba ra ǁgau. Jesub ge ge mî: “ǀGuiro-ū du ra ǀguirob ǁkhāb ǀkha du ǁkhawa nîra ǀguirohe xui-ao.” (Luk. 6:38) Khoexaǃnâ khoe-i ge ǃgâi ǀhōsana hoaǁae ra dī.

Apostel Paulub ge Efesus ǃnâ ge hâ i ǀhaohâba ǃoa ge mî, “î du khoexagu tsî ǀkhomxagu, î du ǀûbagu.” (Efe. 4:32) ǀHaohâb ǃnâ hâ ǃgâsan ge Xristeǁîn ra khoexaǃnâ io, o nēsa xu ra ǀama tsî ra huigu. ǁNāti ī khoen ge nau khoe-e nî tsûtsû mîde sîsen-ū tama hâ. ǂHôana ǃhoa mâ tama i tsîn ge ǁîn namsa nau khoena huis ǃgao ra sîsen-ū. (ǂKhm. 12:18) Nē ǀgaub ǃnâb ge ǀhaohâba ra aiǃgû tsî Jehovaba ǃgâiaǂgaob ǀkha ra ǃoaba.

Khoexaǃnâsib ge mîs tsî dīgu ǃnâ-ū ra ǁgau-e. Khoexaǃnâsiba da ga ra ǁgau o, o da ge Jehovab di ǃgâi ǀgauba ra ǁgau. (Efe. 5:1) Nēs ge ǀhaohâga nî ǀgaiǀgai tsî khoena ǃanu ǃoabasa ǃoa nî ǂgae. Hoaǁae da ge khoexaǃnâsiba nî ǁgau.