1, 2. Gagasise da ra ǀgai khami da tae-e dīsa ra ǁkhāǁkhāsen? ǂKhō re.

AXAROB ge ǀkhaeba ra ǃkhōǃoa. ǁÎb ǁgûb ge ra mîba bi “gangans di mî re.” Nē ǀgôab ge ra ǁnâuǀnam xaweb ge nēsa mîs a mî o ǀgui ra dī. Tsî kaib ra khamib ge ǃgôaǃgâsiba ǁîb ǁgûra di ǂâi ǀgaub tsî khoexaǃnâsib tsîna ra ǁgau. Nēsib ge gangansa ǂgaoba xu ra ǁgau. Tae-i ǃaroma? ǃGôaǃgâsib ge ge ǁîb ǂâi ǀgaub di ǃâ kai.

² ǂGurose da ge amaba a ǁnâu o, o da ge Jehovaba ǁnâuǀnams di ǂhâǂhâsasiba ge ǁkhāǁkhāsen. Xawe da ge gagasise a ǀgai o, o da ge Jehovab ǂâi ǀgauba ge omkhâi, ǁîb tae-i xa a ǃgâibahes tsî tae-i xa ǃgâibahe tama hâs tsîna. Nē ǂâi ǀgauba mā-ams îb sida dīxūn tsî mîǁguigu tsîna ǂgaeǂguis ge nî ǁgau Jehovab ǂâi ǀgauba da ūhâsa. 

3. Tae-i ǃaroma î a ǃgom Jehovab ǂâi ǀgauba ūhâsa?

³ Jehovab ǂâi ǀgauba ūhâs ga ra ǃgâi i xawe î ge a ǃgom ǁkhā. Sida ǂâi ǀgaub hîna ǀoasa tama hâb ge daob ǃnâ a ǂgâ ǁkhā. Aiǁgause, Jehovab ǁgauoǃnâsib, ǃkhūsis, aoǁnâ sîsenni tsî ǀaob ra sîsen-ūhe ǀgauba ra mû ǀgauba ǁnâuǃās xa da ge a ǃgombahe ǁkhā. Tae-e da a dī ǁkhā?  Mati da a aiǃgû ǁkhā Elob ǂâi ǀgauba sida dib ǀkha ǀguiǃnâxa kaisa? Tsî nēsa dīsa mati sida dīga nēsis tsî hānîǁaeb ǃnâs tsîna nî tsâǀkhā?

4. ‘Sada ǂâis ǃnâ . . . ǀkharasa’ tae-e ǃkhōǂgā hâ?

⁴ Khomai re Romeǁîn 12:2. Apostel Paulub ge nēpa Jehovab ǂâi ǀgauba ūhâs tae-e ǃkhōǂgâ hâsa ra ǁguiǃā. ǃKharu go ǁkhāǁkhāǃâs ge go hui da î da ‘tā nē ǃhūbaib ǀkha ǀguiti dīsen.’ Jehovaba ǃoaba tama hâ khoen di ǂâi ǀgaub tsî tanisen ǀgaub tsîna xu da ge nî ǂgōsen. Tsîb ge Pauluba noxoba ge ǀaro î da ‘sida ǂâis ǃnâ . . .  ǀkhara.’ Nēs ge Elobmîsa ǁnâuǃā ǂgaos ǀkha ǁkhāǁkhāsens, ǂâiǃgâs tsî sida ǂâi ǀgauba Elob dib ǀkha ǀguiǃnâxa kaisa ǃoa ra ǁnaeǁgau.

5. Khomais tsî ǃgamse ǁkhāǁkhāsens tsîna mati ra ǀkhara?

⁵ ǁKhāǁkhāsens ge khomai tsî ǃereamde ǂgaeǃgaos ai ǀgui ǃgaoǃgaosa tama hâ. ǁKhāǁkhāsen da ga ra o, o da ge ǃgamse ra kō ǂgao nēs tae-e Jehovab, ǁîb ǀgaugu tsî ǂâi ǀgaub tsîn xa ra ǁkhāǁkhādasa. ǁNâuǃā ǂgao da ge ra tae-i ǃaromab Eloba nau xū-e ūǃoa tsî nau-e ǂgao tama hâsa. Sada ûib tsî ǂâi ǀgaub ǃnâs tsîna da a dī ǁkhā ǀkharaǀkharan xas tsîna da ge ra ǂâi ǂgao. Nē xūn hoan ge ǀnîsi khomai da ra ǂkhani-i ǃnâ a ǀkhai xawes tsîna da ge nî dītsâ ǁkhāǁkhāsens ǃgao ǁaeba ūhâsa. ǀNîsi da ge ǃkhare tsēsa ǁkhāǁkhāsens ǃgao a ǁamaǂûi ǁkhā tsî ǃgôaǃgâsib ǀkha a ǂâiǃgâ ǁkhā.—Psa. 119:97; 1Tim. 4:15.

6. Tae-e ra hā Jehovab ǂâi ǀgaub xa da ga ra ǂâiǃgâ o?

⁶ ǁAeb hoaba da ga Elobmîs xa ga ra ǂâiǃgâ o, o î ge ǀnî hâ xū-e ra ī. O da ge ra ‘ǃâitsâsen ǁkhā da nîga,’ ǁnās ge mîbasen da ge ra Jehovab xūna ra mû ǀgaub a ǂhanusa. Jehovab xūna ra mû ǀgaub ai da ge xūna nî mû tsî nēs ǀkha nî ǀguiǃnâxa tsoatsoa. Sada ǂâi ǀgaub ge ra ‘dī-ūnuhe’ tsî da ge ǀasa ǂâi ǀgauba ra omkhâi tsoatsoa. Tsî da ge Jehovab khami ra ǂâi tsoatsoa.

7, 8. (a) Jehovaba ǃkhūsiba mati ra mû? (Tsoatsoas ǃnâ hâ ai-īsiga mû re.) (b) Nē ǀgauba ūǃoasa mati nî hui da?

⁷ Sada ǂâi ǀgaub ge ǂkhûs ǀkha ǀgui sîsen tama hâ. ǂÂis ge tanisen ǀgauba ra tsâǀkhā. (Markub 7:21-23; Jak. 2:17) Nēsa da ge a ǃgôaǃgâ ǁkhā sao ra aiǁgaude kōs ǃnâ-ū. Haka ǃGâiǂhôas ǂkhanidi ge ra ǁgau da Jehovab mati ra tsâsa ǃkhū ǂgaos xa. Elob ge ǁîb ǀGôaba nî kaikai khoe-aogu ra ge ǁhûi ǁîra ge ǃkhū tama hâ i xawe. (Lev. 12:8; Lukab 2:24) Jesub ge ǃnaehe o, os ge Mariasa “ǁgorob ǃnâ ge ǁgui bi, ǃgûkhoen ommi ǃnâ i ge ǃkhai-e ǀkhai-i amaga.” (Lukab 2:7) Jehovab ge ǂhâbab ga hâ o, o ǁîb ǀGôaba ǃkhū hâ khoe-aogu ra omarisa xu ga ǃnae kai hâ. Jehovaba ge ǂhâǂhâsaba îs ge îb Jesuba gagasise a ǀgaisa omaris ǃnâ kai.

⁸ Jesub di ǃnaes di aiǁgausa xu da ge ra ǁkhāǁkhāsen î da Jehovab ge ǃkhūsisa gere mû ǀgauba ǃgôaǃgâ. ǀNî ǁgûn ge ǁîn ǀgôana ǃkhūsisa ra ǂhâbaba,  nēs ga ǀgôan di gagasi ûi ǀgauba ga ra tsâǀkhā xawe. Amaseb ge Jehovaba gagasi ǀgauga ūhâsa ra ǀgapiǃgôa. Sadu tsîna Jehovab nēsa ra mû ǀgauba ge ūǃoa? Sadu ûi ǀgauba nēs xa tae-e ra ǁgau?—Khomai re Hebreǁîn 13:5.

9, 10. Mati da a ǁgau ǁkhā Jehovab ǂâi ǀgauba da ūhâsa?

⁹ ǀNî hâ ǀgaub ge, Elob mati ra tsâsa nau khoena ǃnôa kais xa. Jesub ge ge mî: “Tsî nē ǂkharin tita ǃnâ ra ǂgomn di ǀgui-e ga ǁgonǁgonǂgao-i, ǁî-i ga ǃgâibahe, ǁkhamiǀui-i ga ǁî-i di ǃaos ai ǃgaehe, tsî i ga hurib ǃnâ aoǂgāhe ǃkhaisa.” (Markub 9:42) Nē mîdi ge kaise ǀgaisa tsâsiba ra ǁgau. Jesub ge ǀoasase ǁîb ǁGûb di ǀgauga gere ǁgau. Tsî da ge ǁnās ǀkha ǂgomǃgâsiba a ūhâ ǁkhā Jehovab ǁgaise ra tsâsa khoe-i ga tsâsioǃnâ tsî nau khoe-e ga ra ǃnôa kai o.—Johaneb 14:9.

¹⁰ Sada tsîna Jehovab tsî Jesub tsîn khami ra tsâ nēs xa? Nēsa da ge ūbasen? Sida tanisen ǀgauba nēs xa tae-e ra ǁgau? Aiǁguase da ge ǀnîsi, ǀnî ana ǀgaub xa a ǃgâibahe xawe î ge nē ana ǀgauba ǀnî ǃgâsa-e a ǃnôa kai ǁkhā ǀhaohâb ǃnâ tamas ka io ǀnî hâ ǂâi ǀgauba ǁî-i ǃnâ a omkhâi ǁkhā. Sida ǀnamxasiba nî ǂgae da î da ǃgâsa-e tā ǃnôa kai nē ana ǀgaub ǀkha?—1Tim. 2:9, 10.

11, 12. Jehovab ǂhanuoǃnâsiba ra mû ǀgauba mati nî hui da?

¹¹ ǃNonaǁî aiǁgaus: Jehovab ge ǂhanuoǃnâsiba ǃhui hâ. (Jes. 61:8) ǁÎb ge a ǂan ǂhabusasiga da ūhâsa, ǀoasa kurusa da ūhâ tama hâ ǃkhais ǃgao xawes tsînab ge Jehovaba ra mîba da î da ǂhanuoǃnâsiba ǃhui. (Khomai re Psalmdi 97:10.) Jehovab ǂhanuoǃnâsiba ǃhui hâs xa ǂâiǃgas ge nî hui da î da ǁîb mûǂui ǀgauba nēs xa ūhâ tsîs ge ǁnāsa ǁgaiba ǃhuis di ǀgaiba nî māda.

¹² Jehovab ǂhanuoǃnâsiba ra mû ǀgauba ūhâs ge nî hui da mûǂansa ǀnî ǁnaetigu a tsūsa Elobmîs ǃnâ î ga xoahe tama ga ra ī xawe. Aiǁgause, ǁgaiǁgaibe ǂnā ǀgaub hîna nē ǃhūbaib ǃnâ hoase ra ūǃoaheb. ǀNîn ge nē ǂnā ǀgauba tsū xū-i ase mû tama hâ tsî nēs ge ǁgoe-ūgus ǀkha ǀgui tama hâ di ra mî. * Xawe nē ǀgauga Elob di ǂâi ǀgaub ǀkha a ǀgui hîna hoa ǁgai xūna ǃhui hâba? A da ǁkhā da as kōse dītsâ re ǃkhō-oasensa ǁkhāǁkhāsens ǃnâ-ū tsî Jehovab ǃhui hâ xūna xū ǂgōsen.—Rom. 12:9.

13. Jehovab ǂâi ǀgauba ūhâsa mati nî hui da hānîǁaeb ǃnâ ǃhaese mîǁguiga dīs ǃnâ?

¹³ Elobmîsa da ga ra ǁkhāǁkhāsen ǁaeb ai da ge a ǂâiǃgâ ǁkhā ǁnās mati hānîǁaeb ǃnâ a hui da ǁkhāsa. ǁNā ǀgaub ǃnâ da ge mîǁgui-e da nî dīs ga ra io, o ǁaeb ai a dī ǁkhā, ǃgomsib ǃnâ ǂgâ tamase. (ǂKhm. 22:3) Sao ra Elobmîs aiǁgaudi xa ǂâi re.

14. Joseb ge Potifari tarasa a ǃeream ǀgauba xū da tae-e ra ǁkhāǁkhāsen?

¹⁴ Joseb ge Potifari taras gere ǁgoe-ūbi ǂgao o, o ǃhaese ge ǂkhā.  Nēsa dīs ǃnâ-ūb ge Joseba ge ǁgau ǁîb Jehovab ǂâi ǀgauba ūhâsa ǃgameb xa. (Khomai re Genesis 39:8, 9.) Tsîb ge ǁîba Potifari tarasa ge ǃeream: “Mati ta kha ǁnâi nēti ī kai ǂkhaba-e dī tsî nî Elob ǃoagu ǁore?” ǁnās ǃnâ-ūb ge Elob ǂâi ǀgauba ge ūǃoabasen. O sada nētsē? Aiǁgause î ga sîsen-ū du ra khoe-e sadu ǀkha ga ra ǁâǁâsen os? Tamas ka io smsan hîna ǁgoe-ūguba ūhâna ga ra sîba du o? * Kaise î ge nî supu nē ǀgauba mâǃoasa ǀnai da ga ǁaeb aiǃgâ ga ra ǂhomisen o tsî Jehovab ǂâi ǀgauba ga ra ūhâ o nēti i mâsib ǃnâ.

15. Mati da ǃnona ǂkham Hebre ǀgôagu khami a mâǁapo ǁkhā ǃâitsâhe da ga ǁaeb ai?

¹⁵ ǃNona ǂkham Hebre ǀgôagu di aiǁgaus xa ǂâi re, Sadraxi, Mesaxi tsî Abednegob tsîna. ǁÎgu ge Gao-aob Nebukadnesari di ǃhuniǀurib ǀkha a dīsa elo-e ǀgoreǀî ǂgao tama hâ îs ge ge ǁgau ǁîgu ǀnai ǁaeb aiǃgâ nēs xa gere ǂaiǃgâsa. Tsî gu ge ge mîǁgui Jehovab ǃoa-ai ǂgomǂgomsase hâsa. (Eks. 20:4, 5; Dan. 3:4-6, 12, 16-18) O î ga ǀnîsi sadu ǀhonkhoe-e ga ra ǂgan du o, i du Jehovab xa ūǃoahe tama hâ ǁaxasib ǃgao mari-e mā. Tae-e du nî dī? ǁNāti i mâsib nî hā tsēsa du nî ǃnâus xa du tae-i ǃaroma ǀnai nēsi Jehovab ǁnās xa ra tsâ ǀgauba ôaǃnâ tama hâ? O du ge ǁnāti ī mâsib ga ra hā ǁaeb ai nî ǂhomisa ī tsî supuse nî ǃeream ǁkhā ǁnā ǂkham Hebre ǀgôagu khami.

16. Jehovab ǂâi ǀgauba ūhâsa mati nî hui da ǀaesen da ga ǁaeb ai?

¹⁶ ǀNîsi du ga ǁaeb aiǃgâ ǀaeb mâsigu hîna ǂgomǂgomsasiba Jehovab aiǃâ nî ǃâitsâgu xa ga ra ǂâi o, o î ge nî supu ǃgâi mîǁguiga dīsa. Mîǁgui da ge nî ǀao-e da ūǂgā tama hâsa tamas ka io ǁî-i di ǂkhari 4 ǃâgu tsîna. ǀAo-e ūǂgā tama is ǃgao hâ ǀgaugu ge aitsama mîǁguiba ūsa ra ǂgaoǀkhā tsîs  ge nēsa Elobmîs tsoatsoadi ǃoagu nî dīhe Jehovab ǂâi ǀgauba ra ǁgause. (ǃNaeǃkhaidi 15:28, 29) ǂHanu ǁaeb nēti ī ǀgauga ǃhoaǃgaos dib ge oms ai nî dīhe ǀaesen tama da hâ hîna, mîǁguiga da ge ǀaeǃkhō-oms ai sī a dī ǁoa. Nēb ge ǁaeb hîna da ǂkhanina ôaǃnâ, medise ǂkhaniba xoaǃgao tsî sida ǀaeǃkhō-aob ǀkha nî ǃhoaba. *

17-19. Tae-i ǃaroma da nēsi Jehovab ǂâi ǀgauba nî ūhâ? Aiǁgau-e mā re.

¹⁷ ǀUnigase Jesub ge ǃhaese Petrub ǂâi ǀgauba a dawa ǀgauba kō re: “ǀKhomsen re, ǃKhutse.” Jesub ge Elob ǁîb ǃoagu ūhâ ǂâis tsî Xoadi hîna ǁîb ǁōb xa ra ǁgaudi tsîn ai ǂâisa ge ǂnûi hâ i. Nēs ge ǁîb mîǁguiga ge ǀgaiǀgai tsî ǂgomǃgâsiba ge mābi.—Khomai re Mateub 16:21-23.

¹⁸ Nētsēb ge Eloba ra ǂgao în ǁîb ǃoaba-aona ǁîb ǀkha ǃgâi ǀhōsagusisa ūhâ tsî ǁîb sîsenni ǃnâ ǃnāsase ǁhao. (Mat. 6:33; 28:19, 20; Jak. 4:8) Jesub ǀkha ge ī ǃnaeǃkhais khamin ge khoena nēsa xu a ūbe da ǁkhā. Aiǁgause, î ge ǀnîsi sadu ǀhōnkhoe-e ǀgapi ǃharosa sîsenni tawa go mā du hîna sadu gagasi ǁaxasigu ǁaeba nî ūsa? Tamas ka io du ge ǀnîsi skoli ǃnâ hâ tsî go ǂganhe î du ǀnîhâ skola ǃoa ī hîna ǀgapi ǁkhāǁkhāsa ūhâba. ǁNā ǁaeb ǃnâ du ge ǀgore hâse nî ôaǃnâ tsî sadu omaris ǁanin tsî ǀhaohâb ǃûi-aogu tsîn ǀkha nēs xa nî ǃhoa. Tae-i ǃaroma du nēsi Jehovab ǂâi ǀgauba nēs xa nî ūhâ? Tsî du ga nēti ī mâsib xa ga ra hāǂāmhe o, o du ge a ǂan nēs ǃâitsâ tama hâsa. Sadu gagasi mîǁguiga du ge dī hâ tsî sadu ǂgaob tsîn ge a ǂhomisa, nēn hoan ge nî ǃaroma î du ǃgâi mîǁguiga dī.

¹⁹ ǀNîhâ mâsigu hîna ǀūǃgâse a īǁkhāgu xas tsîna du ǂâi re. Nēs ǃgao da ge a ǂhomisen ǁoa. Sida Elobmîsa ra ǁkhāǁkhāsen ǁaeba da ge nî sîsen-ū Jehovab ǂâi ǀgaub xa ǂâiǃgâsa, nēs ge nî hui da î da ǁkhāǁkhāsen da ra xūna mâsib ǃoagu sîsenǂui. ǁNās ǀkha da ge Jehovab ǂâi ǀgauba sida ǂâi ǀgaub ǀkha nî ǀguiǃāxa kai tsî nî ǂâiǃgâ nēs mati nēsis tsî hānîǁaeb ǃnâs tsîna sida dīga nî tsâǀkhāsa.

20, 21. (a) Tae-i ǃaroma da ǃnorasasiba ǀasa ǃhūbaib ǃnâ ǀgui nî hōǃâ? (b) Mati da nēsi a ǃgâiaǂgao ǁkhā?

²⁰ ǀAsa ǃhūbaiba da ge a ǃâu ǁoa. Hoa da ge ǀasa ûib hîna paradais ǃhūbaib ai nî hâba ǃoa ra mûǂui. Gaosib ǂgaeǂguis ǃnāga î ge khoesib hoab di ǃoab tsî ǃgomsin tsîna nî ūbēhe. Khoen ge ǁnās khaoǃgâs tsîna aitsama nî ǁhûibasen. Mâ khoe-i hoa î ge mîǁguiga nî dī ǁî-i turagu ǃoagu.

²¹ ǃNorasasib ge hoaǁae hâ tide. Tsū xū-i tsî ǂhanu tama hâ xū-i tsîn tawa î ga ra hā o, o î ge nēsa Jehovab ǂhanub tsî ǂâi ǀgaub tsîn xa nî daoǁgauhe. Nēs ge kaise nî ǃgâiaǂgao kai da tsî da ge kai ǂkhîb xa nî ǀoa. (Psa. 37:11) Nē ǃgâiaǂgaoba da ge Jehovab ǂâi ǀgauba da ga ra omkhâi o, o ǀgui a hōǃâ ǁkhā.