1. Tae-i ǃaroma da hoada ǁkhaeǂgaohesa ǂhâ hâ?

HOADA ge ǁkhaeǂgaohesa ǂhâ hâ. ǀNîsi da ge ra ǂâiǂhansen, tsûaǂgao tamas ka io ǀaegu xa ǃkhō-e hâ. Tsî da kairasis, ǀaegu tamas ka io ǀnam da a khoe-i hîna ge ǁō-i xa ra tsûaǂgao. ǀNî khoen ge ǁaiba ūhâ. ǁGai mâsigu ǂnamipe da ge ǁan hâ. ǂAn da ge a ‘ǃgom ǁaegu’ hîna da ûiǃnâ hâgu ra ǁgausa “ǀuni tsēdi” ǃnâ da ge hâ di tsî mâ tsēs hoas ge ǀasa ǃhūbaiba ǃoa ra ǀgūǀgū da. (2Tim. 3:1) ǀNîsi da ge ǂgui kuriga ra dītsâ Jehovab mîmâide dīǀoaǀoasa xawe î ge sida ǃgomsina kais ǀguisa ra dī. Mâpa da ǁkhaeǂgaosa nî hō?

2, 3. (a) Habakuki xa da tae-e a ǂan? (b) Tae-i ǃaroma da Habakuki ǂkhanisa nî ǃhoaǃgao?

² ǃEreamsa hōs ǃgao hā re î da Habakuki ǂkhanisa kō. Elobmîs ge Habakuki ûib tsî dīb gere xūn tsîn xa xū-e mî tama hâ, nē ǂkhanis ǁîb ǀonsa tani hâs ge ra ǁkhaeǂgao. ǁÎb ǀons ge “ǀgaisa tanisen ǀgauba ūhâ” di ra ǂâibasen. Nēs ge Jehovab ǁkhaeǂgaos tamas ka io ǁîb ǃoaba-aon ǁîba ǃoa ra kō ǀgauba ǃoa ra ǁnaeǁgau. Habakuki ge Eloba dîde gere dî. ǁÎb ge sida ǃgao dîde gere dî, Jehovab ge  Habakuka a mîba amaga îb ǁîkha ǁgamǀhaos xa xoa.—Hab. 2:2.

³ Nē ǁgamǀhaos Habakuki tsî Jehovab tsîn ǁaegu hâs ǀguis ge Elobmîs ǃnâ nē kēbo-aob xa ra ǃhoa. ǁÎb ǂkhanis ge “aiga xoahe hân” ǁaegu hâ tsî Elobmîs ǃnâ a xoasa “sada nî xoas di sâsasib tsî ǁkhaeǂgaos tsîra xu ǃâubasensa ūhâga.” (Rom. 15:4) Mati da Habakuki ǂkhanisa xu a ǀama ǁkhā? Nē ǂkhanis ge nî hui da î da mû Jehovab ai ǂgomaiǂnûis tae-e ra ǂâibasensa. Habakuki ǂkhanis ge ra ǁgau da ǃnomsa ǂgaoba da ge a ūhâ ǁkhā ǂâiǂhansendi tsî ǃgomsigu tsîn ǂam-ai. Nēsa ǂâis ǃnâ ūhâse hā re î da Habakuki ǂkhanisa kō.

4. Habakuka tae-i ǃaroma ge tsûaǂgao hâ i?

⁴ Khomai re Habakuki 1:2, 3. Habakuki ge kaise ǃgom ǁaegu ǃnâ ge ûi hâ i. ǁÎb ge kaise ge tsûaǂgao hâ i khoen ǁîb ǂnamipe ge hâ în ge eloxoresa i amaga. ǁÎn eloxoresasiba mâ ǁae ge ǀam? Jehovaba tae-i ǃaroma ǀhapese ge ū xū-eb nî dīs aiǃâ? Habakuki ge ǃgâi tama tanisen ǀgaub ǀguiba gere mû ǁîb khoen ǁaegu. ǁÎb ge huioǃnâse gere tsâ. ǁNā ǃgom ǁaegu ǃnâb ge Habakuka Jehovab ai ge kō îb xū-e dī. Habakuki ge Jehovab ǁîb ǀkha ǁae tama hâ khami gere tsâ. Elob xū-e ǀgūǁae dī tide dib ge ge ǂâi hâ i. Elob ǃoaba-aob di tsâsiga du a mû ǁkhā?

5. Habakuki ǂkhanisa xu da mâ ǂhâǂhâsa xū-e ra ǁkhāǁkhāsen? (Tsoatsoas ǃnâ hâ ai-īsiba mû re.)

⁵ Habakuka Jehovab ai ge ǂgomaiǂnûi ǀû? Jehovab mîmâidi ǃnâb ge ǂgom ǀû? Hî-î. ǁÎb ǂâiǂhansendi tsî ǃgomsigu tsînab ge Jehovab ǃomdi ǃnâ ge mā, ǁnās ge ra ǁgau Jehovab aib ge ge ǂgomaiǂnûi ǀû tama hâ i. ǁÎb ge Elob xūna ra dī ǀgauba ge ǁnâuǃā tama hâ i tsî nēs xa kaise gere tsûaǂgao tsî gere ǂâi Jehovaba tae-i ǃaroma ǁîb tsûba gere mā-am di. Habakuka ǁîb ǂâide xoa kais ǃnâ-ūb ge Jehovaba xū-e ge ǁkhāǁkhāda: Tā da ge nî ǃao ǁîba sida ǃgomsin xa mîbasa. ǁÎb ge ra ǁkhau da î da sida ǂgaob tsâsiga ǀgores ǃnâ-ū mîba bi. (Psa. 50:15; 62:8) ǂKhoamîdi 3:5 ge ra mî “ǂgomaiǂnûi ǃKhūb ai sa ǂgaob hoab ǀkha, îts tā sa ǁnâuǃāb ai ǂgomǃgâ.” Habakuki ge nē mîde ge ǂan i tsî ǁîde ǂgaob ǀkha ge ū.

6. ǀGoresa tae-i ǃaroma a ǂhâǂhâsa?

⁶ Habakuki ge ǂgurose Jehovaba ǃoa ge ǀgū, ǁîb ǂgomǃgâsa ǀhōsab tsî ǁGûba. Habakuki ge ǁîb ǂâiǂhansendi ǃnâ ǁîb ǁnâuǃāb ai ge ǂgomaiǂnûi tama hâ i. ǁÎb ge ǁîb tsâsigu tsî ǂâiǂhansendi tsîna ge ǀgoreba, ǃgâi aiǁgausa ra māse. Jehovab ge ra ǁkhauda î da sida ǂâiǂhansendi ǃnâ-ū ǂgomǃgâsiba ǁgau. (Psa. 65:2) Nēsa da ga ra dī o, o da ge Jehovab khoexaǃnâsiba nî hōǃâ ǁîb daoǁgaus ǃnâ-ū. (Psa. 73:23, 24) ǁÎb ge nî hui da î da ǁîb ǂâide ǂan, ǃgomsina da ga ra hōǃâ xawe. Sida ǀgoredi hîna ǂgaoba xu hâ di ge sida Jehovaba ūba hâ ǂgomǃgâsiba ra ǁgau.

7. Jehovaba mati Habakuki di ǂâiǂhansende ge ǃeream?

⁷ Khomai re Habakuki 1:5-7. ǁÎb ǃgomsina Jehovab ǃomdi ǃnâ mā toa  tsîb ge Habakuka gere ǂâiǂhansen Jehovab mati nî ǃereamsa. ǁNâuǃāxa ǁGûb aseb ge Jehovab ǁîba ge ǂhābē tama hâ i. Elob ge ge ǂan i tsûaǂgaob tsî ǃoab tsîn di ās a ǃkhaisa. Jodeǁîna ǃoa ge hâ i mîdi ǃnâb ge Jehovaba Habakuka ge ǂanǂan tae-eb hānîǁaeb ǃnâ nî dīsa. Habakuki ge ǀnîsi ge ǂguro khoe-i Jehovab ge mîba ba ǀams ǁnā tsēdi dis ge go ǀgū di.

8. Jehovab ge ǃeream ǀgauba tae-i ǃaroma Habakuka ge buru kai?

⁸ Jehovaba Habakuka ge ǁgau ǁîb a ǂhanusa huibis ǃaroma. ǁNā ǂkhabadī tsî Eloxoresa ǃhaos di dīkākāhes ge ge ǀgū. “Sadu tsēdi ǃnâ” di hâ mîdi ǃnâ-ūb ge Jehovaba ǀgoraǃgâs ǁaeb nē kēbo-aob tsēdi ǃnâs tamas ka io ǁîb ǀkha ge hâ-i khoen ǁaeb ǃnâ nî hâsa. Jehovab ge ǃeream bi ǀgaubab ge Habakuka ge ǃâubasen tama hâ i. ǃNūǃnâxasibab ge ǁgau tama hâ i o, ob gere ā ǀgaub di ǃereamsa? Jehovab ge ǁîba a mîba mîdi ge tsūdība Judab ǃnâ kaikais ǀguisa ge dī. * Galateǁîn (Babilons) ge ǂgao o tsî ge eloxoresa i, Habakuki di ǁaes khoen di ī tama hâ hîna tsîn ge ǁîna gere dītsâ mîsa Jehovaban ra ǃoaba di. Tae-i ǃaromab Jehovaba nē eloxoresa ǁaesa nî sîsen-ū ǁîb di khoen dīkākās ǃgao? Sado mati ga ǃeream hâ nē mîde du ga ǁnâus khaoǃgâ?

9. Habakuka mâ dîde gere dîsen?

⁹ Khomai re Habakuki 1:12-14, 17. Habakuki ge ge ǁnâuǃā Jehovab ge Babilonsa nî sîsen-ū eloxoresa khoena ǀgoraǃgâs ǃgao xaweb ge noxoba gere ǃao. ǁÎb ge Jehovaba ge mîba ǁîb ge noxoba a ǁîb “ǃhaoba [ǀui]” di. (Deu. 32:4; Jes. 26:4) Habakuki ge ǃnūǃnâxasib ǀkha Jehovab ǀnammi tsî khoexaǃnâsib tsîn ai ge ǂgomaiǂnûi ǀgara. Nēs ge ǁîba ǂgomǃgâsiba ge mā ǁkhawa Jehovaba ǃoa ǀgoresa. Eloba tae-i ǃaroma Judab mâsiba ge mā-am î-i ǁgaiǂoa? Tae-i ǃaromab ge xū-e dī tama hâ i? Tae-i ǃaromab ge Hoaǀgaixa Eloba tsûaǂgaoba aiǃgû kai? Tae-i ǃaromab ge “ǃnō” eloxoresasib ge hâ io? ǁÎb ge a “ǃAnu” tsî ǁîb ‘mûra ge a ǃanu ǂkhababa a mû ǁoase.’

10. Mati da ǀnî ǁaeb ai Habakuki khami a tsâ ǁkhā?

¹⁰ ǀNî ǁaeb ai da ge Habakuki gere tsâ khami a tsâ ǁkhā. Xawe da ge Jehovaba nî ǃgâ. ǂGomǃgâsib ǀkha da ge ǁîb mîsa khomai tsî ra ǁkhāǁkhāsen tsîs ge nēsa ǃâubasensa ra mā da. Nē mîmâide da ge ǁîb ǀapeǂhomis ra mā daoǁgaudi ǃnâ-ū ra hō. Xawe da ge noxoba ra ǂâiǂhansen, ‘sida ǃgomsina huka toa i nî?’ Tae-e da Habakuki ge sao rase a dī-e xu a ǁkhāǁkhāsen ǁkhā?

11. Habakuka tae-e dīsa ge mîǁgui Jehovabab ge ǃgâ toa o?

¹¹ Khomai re Habakuki 2:1. Habakuki ge Jehovab ǀkha ūhâ i ǁgamǀhaos ge ǁîb ǂgaoba ge tsautsau. Tsîb ge ge mîǁgui Jehovab ai ǃâusa ǁîb xū-e nî dīs kōse. Nēs ge ǁnā ǁaerob di mîǁguis ǀguisa ge i tama hâ i xaweb ge nēs a amasa ge ǁgau mîb ge o “tita ge ǂanǂansase nîra ǃâu ǂōǂōsib di tsēsa îs hā.” (Hab. 3:16) ǀNî hâ ǂgomǂgomsa ǃoaba-aon Jehovab din  tsîn ge ǃnūǃnâxase ǁîb ai gere ǂgomaiǂnûi, nēs ge sida ra ǂkhâǃnâ î da Jehovab ai ǃâu xū-eb nî dīs kōse.—Mix. 7:7; Jak. 5:7, 8.

12. Taena da Habakuka xu ra ǁkhāǁkhāsen?

¹² Habakuki di mîǁguiba tae-e ra ǁkhāǁkhāda? ǂGurose da ge tā nî ǀûsen Jehovaba ǃoa ǀgoresa ǃgomsina da ga ra hōǃâs tsîna. ǀGamǁîse da ge Jehovab ǁîb ǀapeǂhomis ǃnâ-ū ra mîba da xūna nî ǃgâ. ǃNonaǁîse da ge ǃnūǃnâxasib ǀkha Jehovab ai nî ǂgomaiǂnûi sida ǃgomsinab hā nî ūbēs kōse. Jehovab ǀkha da ga hoaǁae ǃhoa tsî ǃnūǃnâxasib ǀkha ga ra ǃâu o Habakuki khami, o da ge tsaura ǂgaoba nî hō tsîs ge ǁnāsa nî hui da î da aiǃgû. Sida ǃâubasens ge nî hui da î da sida ǃnūǃnâxasiba ǀgaiǀgai, nēs ge nî hui da î da ǃgâiaǂgao ǃgomsina da ga ra hōǃâ xawe. ǃÂubasens ge ǂgomǃgâsiba ra mā da Jehovab xū-e nî dīsa.—Rom. 12:12.

13. Habakuki 2:3 ǃnâ da mâ khoexaǃnâ mîde ra hō?

¹³ Khomai re Habakuki 2:3. Jehovab ge kaise Habakuki ge ǃâu ǀgaub xa ge ǂkhî. Hoaǀgaixa Elob ge Habakuki di ǁgai mâsib xa ge ǂan i. ǁNā-amagab ge Eloba kēbo-aoba ge ǁkhaeǂgao, ǁîba ǃâubasens ǁîb dîde ǃereams disa mās ǃnâ-ū. ǁÎb ǃgomsin ge ǁaeb ǃkharu tama hâse ge ǀam. Elob ge Habakuki ǃoa ge mî: “ǃNūǃnâxa tsî tita ai ǂgomaiǂnûi re. Ti ǃereams ge nî hā ǁaeba i ga ra ū xawe.” Jehovab ge ǁîba ge ǂâiǂâiǃnâ ǁîb ge ǁîb ǁaeb ai mîmâide nî dīǀoaǀoa di. Elob ge Habakuka ge ǀapemā îb ǁîb mîmâide nî dīǀoaǀoa ǁaeba ǃâu. Nēs ge ge ǃaroma îb ǁîba tā tsûaǂgao.

14. Tae-e da nî dī ǃgomsina da ga ra hōǃâ ǁaeb ǃnâ?

¹⁴ ǃNūǃnâxasib ǀkha Elob ai ǃâu tsî ǁîb ra mî xūna ǂōrisase ǃgaoǃgâs ge ǂgomǃgâsiba nî māda, nēs ge nî hui da î da tsaura ǂgaoba omkhâi ǃgomsina da ga ra hōǃâ xawe. Jesub ge ge mî Jehovab ai da ge ǁaeb Kōǃgâ-aob ase a kō ǁkhā ǁîb “ǁaegu tsî kamagu” hînab noxoba ǂhaiǂhai tama hâgu ai kō tama i tsi. (ǃNǃkh. 1:7) ǁNās ǀkha da ge ǀûsen tide xawe ǃnūǃnâxasib tsî ǂgoms tsîn ǀkha nî ǃâu, sida ǁaeb tsî ǁkhāsib tsîna Jehovaba ǃoabas ǃnâ ra sîsen-ūse.—Mrk. 13:35-37; Gal. 6:9.

15, 16. (a) Mâ mîmâide da Habakuki ǂkhanis ǃnâ ra hō? (b) Nē mîmâide tae-e ra ǁkhāǁkhāda?

¹⁵ Jehovab ge ǁîb ai ra ǂgomaiǂnûi khoena ge mîmâiba: “ǂHanu-aib ge ǂgoms âba xu nîra ûi” tsî “ǃhūbaib ge ǂans ǃKhūb di ǂkhaisib dis xa nîra ǀoa.” (Hab. 2:4, 14) ǁNān hîna ǃnūǃnâxasib ǀkha Jehovab ai ra ǂgomaiǂnûin ge ûib ǀkha nîra ǀkhaehe.

¹⁶ Habakuki 2:4 ǃnâ hâ mîde da ge ge ǂgom tama hâ i ǂguro ǁnâu da ge o. Xawe apostel Paulub ge Jehovab ge mā mîmâisa kaise ǂhâǂhâsase gere mû nēsab ge ǃnona ǃnādi kōse xoadi ǃnâ a ǁgaeǁgae amaga. (Rom. 1:17; Gal. 3:11; Heb. 10:38) ǂHanu-ai khoe-i ra hōǃâ ǃgomsin ge ǂgoms tsî ǂgomǃgâsib tsîna Elob mîmâidi ǃnâ ra ǁgau. Jehovab ge ra mîba da î da nē da hâǃnâ hâ ǁaeba kō ǃkharu.

17. Habakuki ǂkhanisa mâ ǀgaub ǃnâ ra ǁkhaeǂgao da?

¹⁷ Habakuki ǂkhanis ge sida hîna  ǀuniga tsēdi ǃnâ ûi hâ da ǂhanu-ai xū-e ra ǁkhāǁkhā. Jehovab ge ǂhanu-ai khoen hîna ǁîb ǃnâ ǂgom tsî ǁîb ai ra ǂgomaiǂnûina ûiba ra mîmâiba. Hā re î da sida ǂgomsa ǀgaiǀgai tsî Elob ai ǂgomaiǂnûi ǂâiǂhansen da ga ra xawe. Habakuki ǃnâ-ūb ge Jehovaba ra mîba da ǁîb ǂkhâǃnâ da tsî nî sâu da ǃkhaisa. ǁÎb ge ra ǂgan da î da ǁîb ai ǂgomaiǂnûi tsî ǃâu xū-eb nî dī ǁaeba ǁÎb Gaosib ǃnāga. ǃHūbaib hoab ge ǁîb ǃoaba-aon hîna ra ǃgâiaǂgao tsî a khoexaǃnân xa nî ǀoa.—Mat. 5:5; Heb. 10:36-39.

18. Jehovab mîde mati Habakuka ge tsâǀkhā?

¹⁸ Khomai re Habakuki 3:16-19. Jehovab mîdi ge Habakuka ge tsâǀkhā. ǁÎb ge Jehovab ge ǁîb khoen ǀkha gere hâ ǀgaub xa gere ǂâiǃgâ. Nēsib ge ǁkhawa ǂgomǃgâsiba ge omkhâi. ǁÎb ge ge ǂan i Jehovab ǀgū ǁae xū-e nî dīsa. Nēs ge ǁîba gere ǁkhaeǂgao, ǁîb ǃgomsin ǀamsa ǀgū ǁae hō tidesab ge ǂan i xawe. Habakuki gere īganǀē xaweb ge ega ǂgomǃgâsiba Jehovab khoena ra sâu ǃâubasens ǃnâ ge hō. ǁÎb ge khoesib dītsâ hâ xū-i hîna a ǀō-aisa i xa gere ǂâiǃnâ. ǀNî khoen ge ǂâi hâ 18 ǁaraǃās sao rase ra ǂâibasen di, “ǃgâiaǂgaob ǀkha ta ge Eloba ǃoa nî ūri.” Nēs ge sida ra ǁkhaeǂgao. Jehovab ge ǀō-aisa mîmâidi ǀguite māda tama hâ xawe ra mîba da ǁîb ǂâibasensa ǃgâi ǀgaub ǃnâ ra dīǀoaǀoa di.

19. Habakuki khami da mati a ǁkhaeǂgaohe ǁkhā?

¹⁹ Habakuki haisi-ams ge ra ǁgau î da Jehovab ai ǂgomaiǂnûi. (Hab. 2:4) ǂGomǃgâsiba da ge sao ra ǀgaugu ǃnâ a ǀgaiǀgai ǁkhā (1)ǀgores ǃnâ-ū da ge Jehovaba sida ǃgomsigu tsî ǂâiǂhansendi tsîna nî mîba; (2)Jehovab ǀapeǂhomisa xu da ra hō daoǁgaude ǂōrisase nî sao tsî (3)ǂgomǂgomsases tsî ǃnūǃnâxasib ǀkha Jehovab ai nî ǃâu. Habakuki ge nēsa ge dī. ǁÎb ǂkhanisab ge ǃoab ǀkha a tsoatsoa xaweb ge ǂgomǃgâsib tsî ǃgâiaǂgaob tsîn ǀkha ge ǀam. Nē aiǁgausa da ge ǂōrisase nî sao î da Jehovab ǁkhaeǂgaosa hōǃâ. Mâ ǁkhaeǂgaosa da nē eloxoresa ǃhūbaib ǃnâ a hō ǁkhā?