1-2. (a) Tae-e ra huida ǃgomsin ǃnâ mâǀgais ǀkha? ǁGuiǃā re. (b) Tae-e da nē ǁkhāǁkhāǃâs ǃnâ nî ǃhoaǃgao?

“ǃKHARU ǃNÂ ta ge ǃgomsigu xa ta ga ǂâi o, o ta ge a ǂan nēsa ta ga ǀguri dīhō tama hâsa.” Sadu tsîna ǀnîsi nēti gere tsâ? ǂGui da â da ge nēti ī tsâ ǀgauba ge ūhâ i. ǀNîsi du ge nēsa ǀaesen du ge hâ ios tamas ka io du ge ǀnamsabe-e ǁōb ǃnâ a ǂoaǃnâ o, o ge mî. Nēs xa du ga ǂâi o, o du ge ra mûǂan nēs ge Jehovab di ǃanu gagab hîna “ǃnāǂamsasib ǀgaib” dib xa ǀoa hâb xa a īǁkhā kai-e ǃkhaisa.​—2Kor. 4:7-9.

² ǃAnu gagab tsîna da ge ǂhâ hâ nē ǃhūbaib di ǃâitsâga xu ǂgōsens ǃaroma. (1Jhn. 5:19) ǁNās ǂam-ai da ge “ǂkhaba gagagu” ǃoagus tsîna nî ǃkham. (Efe. 6:12) Nēsi da ge ǀgam ǀgaukha nî ǃhoaǃgao hînab ǃanu gagaba nē ǃgomsin ǃnâ ra huida ǀgausa. Tsî da ge nî ǃhoaǃgao tae-e da nî dīsa ǃanu gagaba xu ǀamas ǃaroma.

3. Jehovaba mâ ǀgaub ǃnâ ǃgomsin ǃnâ mâǀgais ǀkha ra huida?

³ Jehovab ǃanu gagab ge ǀgaiba ra mā da i da sida ǁgaumâide ǃgomsina da ga hōǃâ xawe dī. Apostel Paulub ge ǃgomsinab gere hōǃâ xawe noxoba gere aiǃgû sîsens ǀkha “Xristub di ǀgaib” aib gere ǂgomaiǂnûi amaga. (2Kor. 12:9) ǀGamǁî ǃnās hînab ge sîsabe sîsenni ǀkha a īs aib ge Pauluba aoǁnâ sîsenni ǃnâ ǀgui ǃgarise ge sîsen tama hâ i xawe kōǃgâsens ǃgaos tsîna ǃgarise gere sîsen. ǁÎb ge Korintes ǃnâ Akwilab tsî Prisilas tsîn oms tawa gere hâ. ǁÎra ge tente gere kuru. ǁNās ǀkhab ge Pauluba ǁîb tsîn ge  tente gere kuru amaga ǁîra ǀkha ǀguiba gere sîsen. (ǃNǃkh. 18:1-4) ǃAnu gagab ge Pauluba ǀgaiba ge mā îb kōǃgâsens ǃgao ǃgarise sîsen tsî ǁîb aoǁnâ sîsenni tsîna dīǀoaǀoa ǁkhā.

4. 2 Korinteǁîn 12:7-9 ǃoagub ge Pauluba mâ ǃgomsiga gere hōǃâ?

⁴ Khomai re 2 Korinteǁîn 12:7-9. Nē xoaǀgoradi ǃnâb ge Pauluba tae-e gere ǂâibasen “ǀā ǁkhū-e ti ǁgans ǃnâ ge māhe” tib ge mî o? ǁKhūba du ga sadu soros ǃnâ ūhâ o, o du ge kai tsûba ra hōǃâ. ǁNās ǀkhab ge Pauluba gere mî ǁîb tsîn ge ǁkhā ǃgomsiga gere hōǃâ ti. ǁÎb ge nē ǃgomsina ‘Satanni di ǀhomǃgāb’ ase gere ǂgai hîna ‘ǃoms ǀkha ra ǂnaubiba.’ Nē ǀhomǃgāgu ge Paulub di ǃgomsina mûǂan o, o gu ge ǁîb di ǃgomsina ge ǂguiǂgui. Pauluba tae-e ge dī?

5. Jehovaba Paulub di ǀgorede mati ge ǁnâu-am?

⁵ ǂGuroseb ge Pauluba gere ǂhâba îb Jehovaba nē ‘ǁkhūba’ ūbe. ǁÎb ge ge mî: ‘ǃNona ǃnādi kōseb ge ǃKhūba ge ǀkhoma’ îb ǁîb ǃgomsiga ūbē. Paulub gere ǀgore xawe i ge ǃgomsina noxoba ge hâ i. Nēsa ra ǂâibasen Jehovab ge Paulub di ǀgorede ge ǁnâu-am tama hâ i di. Hî-i ti tamas ge. ǁÎb ge ge ǁnâu-am. Jehovab ge ǁîb ǃgomsiga ge ūbē tama hâ i xaweb ge Pauluba ǀgaiba ge mā îb mâǀgai ǁkhā. Jehovab ge ge mî: “Ti ǀgaib ra ǂkhabusasib ǃnâ ǀoa xui-ao.” (2Kor. 12:8, 9) Tsî Elob huib ǀkhab ge Pauluba ǁîb ti ǂkhîb tsî ǃnomsasib tsîna ge ūhâ ǀgara.—Fil. 4:4-7.

6. (a) Jehovaba mati sida ǀgorede a ǁnâu-am ǁkhā? (b) Mâ mîmâidi hîna xoadi ǃnâ hâde ǀgaiba ra mā da?

⁶ Paulub khami du ge sadu tsîna Jehovaba gere ǀkhoma îb sadu ǃgomsina ūbē? ǀNîsi du ge Jehovaba ǂgui ǃnāde gere ǀkhoma xawe i ge nē ǃgomsina bē tama hâ i tamas ka io ǀnîsi ge tsū, o du gere ǂâi Jehovab ge sadu ǀgorede ǁnâu-am tama hâ di? Nēs ga ī o, o Paulub di aiǁgaus xa ǂâi re. Jehovab ge ǁîb di ǀgorede a ǁnâu-am khamib ge sida ǀgoredi tsîna nî ǁnâu-am. Jehovab ge ǀnîsi ǃgomsina ūbē tide. Xaweb ge ǁîb ǃanu gagab ǃnâ-ū ǀgaiba nî mā da i da mâǀgai. (Psa. 61:3, 4) ǀNîsi du ge “hoan ǃnâ ra ǁgâiǀāhe” xaweb ge Jehovaba ǁnāxūǃnâ du tide.—2Kor. 4:8, 9; Fil. 4:13.

7-8. (a) ǃAnu gagaba mâǀgaub ǃnâ ǂoab ǀkha a ǀgui? (b) Petruba mati ǃanu gagab ra sîsen ǀgauba ge ǁguiǃā?

⁷ ǃAnu gagaba mâ ǀgaub ǃnâs tsîna a huida ǁkhā? ǂOab ge ǂgauba a hui ǁkhā îb īb ra ǃkhaisa ǃoa sī hurib ga ǀgaisa ǃgabiga ga ra ūhâ xawe ǁkhā ǀgaub ǃnâb ge ǃanu gagaba ra huida ǃgomsina da ga hōǃâ o Elob mîmâisa ǃhūbaib ǃnâ da nî sīs kōse.

⁸ Apostel Paulub ge ǁauǃkhō-aob ge i amaga ǂgui xūna ǂgau ǃnaris xa ge ǂan i. ǁNā-amagab ge ǃanu gagab ra sîsen ǀgausab ge ǁguiǃā o, o ǂgau ǃnaris ǀkha ra ǃgûǀhao xū-e ge sîsen-ū. ǁÎb ge ge xoa: “Tātsē i kēbosi-i xare-e khoe-i di ǂâisa xu ūǀkhīhe tama hâ xui-ao; xawe ǃanu gagab xa doeǁgarihe hâsen ge ǃanu khoen Elob dina gere ǃhoa.” Grikegowab mîs hîna “doeǁgarihe” di hâs ge ‘tanisaohe tamas ka io ǂkhâǃnâhe’ di ra ǂâibasen.—2Pet. 1:21.

9. Petruba khoen tae-i xa nî ǂâi ǃkhaisa gere ǂgao khoen ge ǃanu gagab xa ‘doeǁgarihe’ hâ dib ge xoa o?

⁹ Petruba khoen tae-i xa nî ǂâi ǃkhaisa gere ǂgao khoen ge ǃanu gagab xa ‘doeǁgarihe’ hâ dib ge xoa o? ǁKhā Grikegowab mîs ge Lukab hîna ge ǃNaeǃkhaidi  ǂkhanisa a xoab xa ge sîsen-ūhe ǂgaub hîna ǂoab xa ra ‘ǁgari-eb’ xab ge xoa o. (ǃNǃkh. 27:15) ǀGui Elobmîs ôaǃnâ-aob ge ra mî Petrub ge Elobmîs xoa-aogu ge ǃanu gagab xa ‘doeǁgarihe’ hâ di a xoa o, ob ge khoena ǂgau ǃnaris xa nî ǂâi kai mîsa ge sîsen-ū. Petrub ge gere ǂâibasen ǂoab ǂgauba īb nî ǀkhāba ǃoa ra ǂhā ǁkhās khami i ge ǃanu gagaba Elobmîs xoa-aoga gere ǁgari îgu ǁîgu sîsen-e dīǀoaǀoa ǁkhā. ǁKhā Elobmîs ôaǃnâ-aob ge ge mî: “Elobmîs xoa-aogu ge ǃanu gagab gere daoǁgaugu sîsen-e gere dī.” Jehovab ge dī ǁkhāb ge i xūn hoana ge dī. ǁÎb ge ‘ǂoab’ tamas ka io ǃanu gagaba ge mā. Elobmîs xoa-aogu ge mā-e gu ge hâ i sîsen-e ge dī. ǁÎgu ge ǃanu gagab ǀkha ǀguiba gere sîsen.

10-11. Mâ ǀgam xūna da nî dī ǃanu gagab xa da ga daoǁgauhe ǂgao o? ǁGuiǃā re.

¹⁰ Jehovab ge nētsē ǁîb di ǃanu gagaba sîsen-ū tama hâ în khoena Elobmîsa xoa. Xaweb ge Jehovaba noxoba ǃanu gagaba ra sîsen-ū ǁîb di ǃoaba-aona daoǁgaus ǃnâ. Jehovab ge noxoba ǁîb di ǀkhāba ra hā-ū. Mati da Elob di ǃanu gagaba xu a ǀama ǁkhā? Hoaǁae da ge nî ǁgūtsâ sida di ǀkhāba hā-ūsa. Nēsa da mati a dī ǁkhā?

¹¹ Sao ra aiǁgaus xa ǂâi re. ǂGau ǃnari-ao i ge ǂoab di huiba i ga ǂhâba o, o ǀgam xūna nî dīs ge. ǂGuroseb ge ǁîb di ǂgauba ǂoab ra ǃgom ǀkhāb ai nî mâi. ǁÎb di ǂgaub ge ǃkhai-e ǃoa ī tide ǂoab ra ǃgom ǀkhāb ai i ga mâihe tama io. ǀGamǁîseb ge ǁîb di ǂgaus di ǁgaboga nî ǁkhowa-am. ǂOab ga ǃgom xawe i ge ǂgauba ǃkhai-e ǃoa ī tide ǁîb di ǁgabogu ǂoaba hō tama hâs kōse. ǁNās ǁkhās khami da ge sida tsîna ǃanu gagaba da ga ūhâ o, o ǀgui Jehovaba a ǃoaba ǀgara ǁkhā. ǃAnu gagaba xu ǀamas ǃgao da ge ǀgam xūna nî dī. ǂGurose da ge Elob ǃoaba-aon ǃanu gagab xa ra ǂkhâǃnâ-e  în dī xūna nî dī. ǀGamǁîse da ge nē xūna sida ǁkhāsib hoab ǀkha nî dī. (Psa. 119:32) Nē xūna da ga dī o, ob ge ǃanu gagaba nî ǂkhâǃnâ da tsî nî huida ǃgomsin ǃnâ ǂgomǂgomsase mâǀgaisa Elob di ǀasa ǃhūbaib ǃnâ da nî ǂgâs kōse.

12. Tae-e da nēsi nî ǃhoaǃgao?

¹² ǀGam ǀgaukha hînab ǃanu gagaba a huida ǁkhākha da ge go ǃhoaǃgao. ǃAnu gagab ge ǀgaiba ra mā da tsî ra huida i da ǂgomǂgomsase mâǀgai ǃgomsina da ga hōǃâ xawe. ǃAnu gagab ge ra daoǁgau da tsî ra huida i da Jehovab ǂhâba hâ sîsen-e dī tsî nēs di ǀamǂoas ge a ǀamo ûi. Nēsi da ge haka xūna nî ǃhoaǃgao hîna da nî dīna i da hoase ǃanu gagaba xu ǀama.

13. 2 Timoteub 3:16, 17 ǃoagus Elobmîsa tae-e a dība da ǁkhā xawe da tae-e nî dī?

¹³ ǂGurose Elobmîsa ôaǃnâ re. (Khomai re 2 Timoteub 3:16, 17.) Elob ge ǁîb di ǃanu gagaba ge sîsen-ū i i ǁîb di ǂâide Elobmîs xoa-aogu di ǂâidi ǃnâ “ǃgomǂgāǃnâhe.” Elobmîsa da ga khomai tsî khomai da ra xūna ǂâiǃgâ o, o i ge Elob di daoǁgaude sida ǂgaob tsî ǂâidi ai nî hâ. Nēs ge nî huida i da ǀkharaǀkharana sida ûib ǃnâ dī tsî Jehovaba ǃgâiaǂgao kai. (Heb. 4:12) Xawe ǃanu gagaba xu da ga hoase ǀama ǂgao o, o da ge ǁaeba ǁamaǂui tsî Elobmîsa nî ôaǃnâ tsî ôaǃnâ da ra xūn xa ǃgamse nî ǂâi. Nēsa da ga dī o, os ge Elobmîsa mî tsî da ra dī xūn hoana nî tsâǀkhā.

14. (a) Tae-i ǃaroma da a mî ǁkhā ǃanu gagab ge sida Xristeǁî ǀhaodi tawa hâ di? (b) Mati da hoase ǃanu gagaba xū ǀhaodi tawa a ǀama ǁkhā?

¹⁴ ǀGamǁîse Eloba ǀguiba ǃoaba re. (Psa. 22:22) Sida di ǀhaodi tawa i ge Jehovab di ‘ǃanu gagaba’ hâ. (J.ǂHa. 2:29) Tae-i ǃaroma da nēsa a mî ǁkhā? ǀHaodi tawa da ge ǃanu gagaba ra ǀgoreba, Gaosib ǁnaetsanadi hîna Elobmîs ai ǃgaoǃgaosade ra ǁnae tsî Elobmîs ai ǃgaoǃgaosa daoǁgaude ra mā ǃgâsaga ra ǃgâ hîna ǃanu gagab xa ǁgaumâisa ga. Tsî ǃanu gagab ge ǃgâsadi tsîna ra hui i di ǁîdi ǁgaumâide aiǂhomi tsî ǃamku ǀgaub ǃnâs tsîna mā. ǃAnu gagaba xu hoase ǀamas ǃgao da ge ǀhaodi ǃgaos tsîna nî aiǂhomisen i da ǃereamde mā ǁkhā. ǁNā ǀgaub ǃnâ da ge ǀhaodi tawa da ga hâ o, o ‘ǃanu gagaba’ xu ra ǀama.

15. ǃAnu gagaba mati aoǁnâ sîsenni ǃnâ ra huida?

¹⁵ ǃNonaǁîse aoǁnâ sîsenni ǃnâ ǁhao re. Elobmîsa da ga sida aoǁnâ tsî ǁkhāǁkhā sîsenni ǃnâ sîsen-ū o, o da ge ǃanu gagaba ra mā-am îb huida. (Rom. 15:18, 19) Hoase ǃanu gagaba xu ǀamas ǃgao da ge hoaǁae aoǁnâ sîsenni ǃnâ nî ǁhao tsî nî ǁgūtsâ Elobmîsa sîsen-ūsa. Khoen ǀkha da ge ǃgâi ǁgamǀhaode a ūhâ ǁkhā, Sida Xristeǁî ûib tsî aoǁnâ sîsenni, sîsen ǂkhanib ǃnâ hâ ǁgamǀhaodi aiǁgaude da ga sîsen-ū o.

16. Mâpa a ǀgui ǀgau hîna da Jehovaba xu ǃanu gagaba ra ǃkhōǃoaba?

¹⁶ Hakaǁîse Jehovaba ǃoa ǀgore re. (Mat. 7:7-11; Luk. 11:13) ǀGui ǀgaub hîna da Jehovaba xu ǂhanuse ǃanu gagaba ra ǃkhōǃoab ge ǀgores ǃnâ-ū. Xū-i ge sida ǀgorede ǁgae tama hâ Jehovaba ǃoa īsa tsî Jehovab ǃanu gagab tsîna sida ǃoa hāsa, Satanni tsîn ge nēsa a ǁgae ǁoa. (Jak. 1:17) Mati da nî ǀgore i da hoase ǃanu gagaba xu ǀama? Nēsa ǃereams ǃgao hā re i da ǀgores xa Lukab ǃGâiǂhôas ǂkhanis ǃnâ a xoasa ǂkhōsa xu ǁkhāǁkhāsen. *

17. Tae-e da ǀgores xa Jesub ǂkhōs hîna Lukab 11:5-9, 13 ǃnâ hâsa xu ra ǁkhāǁkhāsen?

¹⁷ Khomai re Lukab 11:5-9, 13. Jesub di ǂkhōs ge ra ǁgau mati da ǃanu gagaba nî ǀgorebasa. Nē ǂkhōs ǃnâb ge khoeba ǂhâb ge hâ i xūna ge hō, ‘ǁîb di ǀû tamasis’ ǃgao. ǁÎb ge ge ǃao tama hâ i ǁîb ǀhōsab ai huiba ǂgansa ǃuis ge i xawe. (Luk. 11:8) Jesuba mati nē ǂkhōsa ǀgores ǀkha ge ǀgopeǀnō? ǁÎb ge ge mî: “ǂGan, o du ge nîra māhe; ôa, o du ge nîra hō; ǃgubu-am, o du ge nîra ǁkhowa-ambahe.” Nēsa tae-e sida ra ǁkhāǁkhā? ǃAnu gagab huiba hōs ǃgao da ge ǀû tamase nî ǀgore.

18. Jesub di ǂkhōs ǃoagu da mati io a ǂan Jehovab ǁîb ǃanu gagaba nî mā da ǃkhaisa?

¹⁸ Jesub di ǂkhōs tsîn ge ra mûǂan kai da Jehovab ǃanu gagaba nî mā da ǃkhaisa. Nē ǂkhōs ǃnâ hâ aob ge ǁîb di sari-aona ǃgâise gere kōǃgâ ǂgao. ǁÎb sari-aon hîna ge ǃuia gere sīnab ge ǂû-e gere mā ǂgao xaweb ge xū-e ge ūhâ tama hâ i. Jesub ge ra mî nē khoeb di ǁanǁare-aob ge ǁîb ge ǂgan ǀû tama hâ i amaga pere-e ge mā bi di. Jesuba tae-e nēs ǃnâ-ū ge ǁkhāǁkhā? ǀOasa kurusa ūhâ tama hâ khoe-i ga ǁî-i ǁanǁare-ao-e ǁnā ǀgaub ǃnâ hui o, ob sida ǀhomsi ǁGûba mati ǁnān hîna ǃanu gagaba ra ǂgan bina mā tide. ǁNās ǀkha da ge ǂgomǃgâsiba nî ūhâ Jehovab sida ǀgorede nî ǃereamsa ǃanu gagaba da ga ǂgan o.—Psa. 10:17; 66:19.

19. Tae-i ǃaroma da ǂgomǃgâsiba ūhâ mâǀgai da nî ǃkhaisa?

¹⁹ ǂGomǃgâsiba da ge nî ūhâ Satanni ga ǁnāǂam da xawe da nî mâǀgai ǃkhaisa. Tae-i ǃaroma? ǃAnu gagab ǀgam ǀgaukha ǃnâ ra huida amaga. ǂGuroseb ge ǀgaiba ra mā da ǃgomsina da ga hōǃâ ǁaeb ǃnâ mâǀgaisa. ǀGamǁîseb ge ǀgaiba ra mā da i da Jehovaba ǃoaba ǀgara ǁîb di ǀasa ǃhūbaib ǃnâ da nî ǂgâs kōse. Mîǁgui da ge nî hoase ǃanu gagaba xu ǀamasa.