1. Jehovaba tae-e dīsa ra mā-am da?

JEHOVAB ge hoa da ûi da nî ǀgausa ǁhûis aiǂhanuba ge mā. ǁÎb ge ǃgâi mîmâide dīs ǀkha ra huida tsî ǁîba ra ǂkhî kai mîmâide da ga dī o nēsa dīǀoaǀoas ǀkhas tsîna ra huida. (Psa. 119:173) Elobmîs ǃnâ hâ daoǁgaude da ga hoaǁae sîsen-ū o, o da ge ǃgâi mîmâide nî dī.—Heb. 5:14.

2. Mâ ǃgomsina da a hōǃâ ǁkhā mîmâide da ga dī toa o?

² ǃGâi mîmaiga da ga dī xawe da ge nēsa dīǀoaǀoas ǃgomsiba a hōǃâ ǁkhā. Nē aiǁgaudi xa ǂâi re: ǂKham ǃgâsab ge hoa Elobmîsa khomaisa ra mîmâi. ǁÎb ge nēsa ǀoro wekhega ra dī hō tsî ǁnāpaxū ra ǀû. ǃGâsas ge aimâba-ao sîsen-e dīsa ra mîmâi xawe nēsa ǁaeb hoaba ra mâiǂui. ǀHaohâb ǃûi-aogu ge ǀhaohâb ǃnâ ǃkhai hâ ǃgâsana sarisa ra mîmâi xawe ǁkhâgu ǃkharu hâse noxoba nēsa dī tsoatsoa tama hâ. Nē mâsigu hoagu ge a ǃkharagagu xawe ǀgui xū-i ge ra ǃgûǀhao. ǃGâsan ge mîmâiga ge dī xawe hoana nē mîmâiga ge dīǀoaǀoa tama hâ i. ǂGuro ǁaeb Xristeǁîn hîna ge Korintes ǃnâ ǁan hâ în tsîn ge nē ǃgomsina gere hōǃâ. Kō re tae-e da ǁîna xu a ǁkhāǁkhāsen ǁkhā ǃkhaisa.

3. Mâ mîmâiden ge Korinteǁîna dī xawe tae-e ge hā?

³ 55ǁÎ kurib ǃnân ge Korinteǁîna ǂhâǂhâsa mîmâisa ge dī. ǁÎn ge ge ǁnâu ǃgâsan hina Jerusalems tsî Judeas ǃnâ hân ǃgoma ra tsâsa tsîn nau ǀhaohâgu ǃgâsana ǁîna marisise ra ǂkhâǃnâ ǃkhaisa. Korinteǁîn ge kaise ge ǃgâiǂgaoxa  tsî māxa i tsî nēs ǃaroma ge mîmâi nē ǃgâsan hîna ǃgomsib ǃnâ hâna huisa tsîn ge apostel Pauluba ge dî matin nēsa a dī ǁkhā ǃkhaisa. ǁÎb ge ǁgaraga ǀhaohâba ǃoa ge sî tsî Tituba ge ǁgaumâi îb mā-e ra marina ǀhaoǀhao. (1 Cor. 16:1; 2 Cor. 8:6) ǀOro ǁkhâga ǃkharu tsîn ge korinteǁîna mān nî din ge mî marisi huiba ge mā tama hâ i. Nēs xa ǃaroma-e hâsen ge ǁîn di marisi huiba nau ǃgâsan dib ǀkha ǀhaoǀhaohe tsî Jerusalems ǀhaohâba ǃoa ge sîhe ǁoa i.—2Kor. 9:4, 5.

4. 2 Korinteǁîn 8:7, 10, 11 ǃnâb Pauluba Korinteǁîna tae-e ge ǂkhâǃnâ dīsa?

⁴ Korinteǁîn ge ǃgâi mîmâisa ge dī tsîb ge Pauluba ǁîn di ǂgoms tsî māxasib amsi ge koa nî. Xaweb ge mîn ge mîmâisa dīǀoaǀoas amsis tsîna nî ǂkhâǃnânise ge īs ge. (Khomai re 2 Korinteǁîn 8:7, 10, 11.) Nē aiǁgaus ge ra ǁgau da ǂgomǂgomsa Xristeǁîn tsîn ǃgomsiba a hōǃâ ǁkhāsa ǁîn mîmâide dīǀoaǀoas ǃnâ.

5. Mâ dîde da nî ǃeream?

⁵ Korinteǁîn khami i ge sada tsîna a ǃgomba ǁkhā sada di mîmâiga taniǂuisa. Tae-i ǃaroma? ǀOasa kurusa da ūhâ tama hâ ǃkhais ǃaroma da ge a mâiǂui ǁkhā. Tamas ka io i ge ǃâubasen tama da hâ xūna a ǁkhae da ǁkhā sada di mîǁguiga dīǀoaǀoas ǃnâ. (Aoǁn. 9:11; Rom. 7:18) Tae-e da nî dī mîǁguigu hîna da ge dīga da ga ôaǃnâ tsî ǀkharaǀkharana dī ǂgao o? Tsî tae-e da a dī ǁkhā sada di mîǁguiga dīǀoaǀoas ǃaroma?

6. Mâ ǁae da mîǁguigu hîna da ra dīga a ǀkharaǀkhara ǁkhā?

⁶ ǀNî ǂhâǂhâsa mîǁguiga da ge a ǀkharaǀkhara ǁoa. Aiǁgause Jehovaba ǃoaba ǀgaras di mîǁguib tsî sada ǃgame khoe-i ǃoa-ai ǂgomǂgomsase hâs di mîǁguib tsîna. (Mat. 16:24; 19:6) Xawe ǀnî hâ mîǁguigu ge a ǀkharaǀkharahe ǁkhā. Tae-i ǃaroma? Sada mâsigu a dawa ǁkhā amaga. Taena a huida ǁkhā ǃgâi mîǁguiga dīs ǃnâ?

7. Tae-e da nî ǀgoreba tsî tae-i ǃaroma?

⁷ Gā-aisiba ǀgoreba re. Jehovab ge Jakobuba ge ǂkhâǃnâ îb xoa: ‘Tsî ǀgui-i â du ga gā-aisiba tôasio, a-i Elob tawa ǂganbasen . . . ǀguiǃnâxase ra māba.’ (Jak. 1:5) ǀNî xūn ǃnâ da ge ‘gā-aisiba ra tôasi.’ ǁNā-amaga Jehovaba ǂgan re îb hui du mîǁgui-e du ga dī o tsî ga ra ǀkharaǀkhara ǂgao o. Nēsa du ga dī o, ob ge Jehovaba nî hui du ǃgâi mîǁguiga dīs ǃnâ.

8. Tae-i ôaǃnâsa da nî dī mîǁguiga da nî dīs aiǃâ?

⁸ ǃGâi ôaǃnâsa dī re. Elobmîsa ôaǃnâ, Elobmîs ai ǃgaoǃgaosa ǂkhanin hîna Jehovab ǀapeǂhumis xa ra mā-ena khomai tsî ǂgomǃgâ du ra khoe-i hîna ǃgâi ǀapemāde a mā du ǁkhā-i ǀkha ǃhoa re. (ǂKhm. 20:18) Nē ôaǃnâs ge kaise a ǂhâǂhâsa mâpa da nî does tsî Jehovaba ǃoabas ǀkha nî aiǃgû kai da sîsen-e da nî ǁhûis aiǃâ.

9. Mati da nî ǀama ǂhauǃnâ ūsen da ga o?

⁹ Sadu mîǁguigu di ǃaromade ôaǃnâ re. Jehovab ge mîǁguiga da ra dība ǃaromadi ǃnâ ǃgâiǃgâibasensa ūhâ. (ǂKhm. 16:2) ǁÎb ge ǂhâba hâ i da hoa xūn ǃnâ ǂhauǃnâ. Nēs ǃaroma da ge mîǁguiga da ga dī o, sada tsî nau khoen ǃoa-ais tsîna ra ǂhauǃnâ ǂgao. ǂHauǃnâ ūsen tama da ga i o, o i ge sada mîǁguiga dīǀoaǀoasa a ǃgomba da ǁkhā. Aiǁgause ǂkham ǃgâsab ge a mîǁgui ǁkhā aimâba-ao kaisa. ǁAeb ra ǃkharu khami i ge ra ǃgomba bi tsoatsoa ǁîb di irga hōǂgās ǀkha tsîb ge nēs xa ǃaroma-e hâse ǀoro ǂkhîba aoǁnâ sîsenni ǃnâ  ūhâ. ǁÎb ge ge ǂâi ǁkhā i, ǁîb ra aimâba-ao kai ǃkhais ge ǁîb Jehovaba ra ǂkhîǂkhî ǂgao amaga di. Xaweb ge ǁîba ǁîb di ǁgûn tsî ǀnî hâ khoe-i tsîna ǂkhîǂkhîs di ǂâisa ūhâ tama hâ i?

10. Tae-e da ǂhâ hâ ǀkharaǀkharana dīs ǃaroma?

¹⁰ Elobmîsa ra ǁkhāǁkhāsen khoe-i hîna ge ǂgae ǀûsa mîǁgui-i di aiǁgausa ǃoa kō re. ǂGurob ge wekheb tamas ka io ǀgamkha ra ǂgae ǀû tsî ǁnās khaoǃgâ ǂgaes di turaba hō tsî ra ǂgae tsoatsoa. Xaweb ge ǀams ai ra ǂgae ǀû. ǁÎb ǀnammi hînab Jehovaba ūba hâb tsî Jehovaba ǂkhîǂkhîs ge ra hui bi nēsa ǀûs ǀkha.—Kol. 1:10; 3:23.

11. Tae-i amsi du ǃgāsa mîǁguiga nî ūhâ?

¹¹ ǃGāsa mîǁguiga ūhâ re. Sadu mîǁguigu ga ǃgāsa o, o du ge nēsa supuse a dīǀoaǀoa ǁkhā. Aiǁgause du ge a mîǁgui ǁkhā Elobmîsa ǃnāsase khomaisa. Xawe du ga ǁaeba nēs ǃaroma ǁamaǂui tama io, o i ge a ǃgom ǁkhā sadu di mîǁguiba dīǀoaǀoasa. * Tamas ka io gu ge ǀhaohâb ǃûi-aoga a mîǁgui ǁkhā ǃgâsana ǃnāsase sarisa xawe gu ge nēsa ǁaeb ǃkharu hâ hîna noxoba dī tama hâ. ǁÎgu mîǁguiga dīǀoaǀoas ǃaroma gu ge sao ra dîde a dîsen ǁkhā: “ǃGâsan hîna nē sarisa xu nî ǀamana ge a ǂan? ǁÎna saris ǃaroma ge ǁaeba ǂnûiǂui hâ?”

12. Tae-e da nî dī tsî tae-i ǃaroma?

¹² ǃGâi mûǂuiba ūhâ re. Hoa da ge ǁaeb, xūn tsî ǀgaib tsîna ūhâ tama hâ dī ǂgao da ra xūn hoana dīs ǃaroma. Nēs ǃaroma ǃgâi mûǂuiba ūhâ re. ǁAeb ga hā o du ge sadu mîǁguiga a ǀkharaǀkhara ǁkhā dīǀoaǀoagu ǁoa du ga o. (Aoǁn. 3:6) ǂÂi re sadu di mîǁguiga du ga ǀkharaǀkhara toa o, o du ge nēsa du dī ǁkhā khami ra tsâ. Hā re i da koro ǀgaugu hîna sada mîǁguiga dīǀoaǀoas ǀkha nî hui da gu xa ǃhoa.

13. Mati du sadu mîǁguiga dīǀoaǀoas amsi du ǂhâ hâ ǀgaiba a hō ǁkhā?

¹³ ǀGaiba sadu mîǁguiga dīǀoaǀoas ǃaroma ǀgoreba re. Elob ge “ǂâibasens tsî dīs” tsîra a mā du ǁkhā sadu mîǁguiga dīǀoaǀoas ǃaroma. (Fil. 2:13) Nēs ǃaroma Jehovaba ǁîb ǃanu gagaba ǂgan re îb ǀgaiba mā du. Sadu ǀgoredi ǁnâu-am-e tama khami du ga tsâ xawe tā ǀgore ǀû re. Jesub ge mî khami: “ǂGan, [ǃanu gagaba] o du ge nîra māhe.”—Luk. 11:9, 13.

14. ǂKhoamîdi 21:5 ǃnâ hâ daoǁgausa mati ra huida sada di mîǁguiga dīǀoaǀoas ǀkha?

¹⁴ ǀApeǁguiba ūhâ re. (Khomai re ǂKhoamîdi 21:5.) Mîǁgui-e du ga dī tsî nēsa dīǀoaǀoa ǂgao o, o du ge ǀapeǁguiba ǂhâ hâ. ǁNās khaoǃgâ du ge sadu ǀapeǁguib ǃoagu nî sîsen. ǁKhā ǀgaub ǃnâ mîǁgui-e du ga dī o nē mîǁguiba du nî dīǀoaǀoa ǀgausa xoamâi tsî nēsa sao re. Kai mîǁguiga da ga ūhâ o, o da ge nē mîǁguiga ǂkhari ǃârogu ǃnâ ra khôa ǂgao. Nēsa da ga dī o, o da sida mîǁguiga supuse nî dīǀoaǀoa amaga. Paulub ge Korinteǁîna ge ǂkhâǃnâ în “mâ ǂguro tsēs wekheb dis ai” māsenxa māde ǂnûiǂui, în tā nēsa ǁîb ga ǁnāpa sī ǁaeb ai ǀgui dī. (1Kor. 16:2) Kai mîǁguiga ǂkhari ǃârodi ǃnâ khôas ge sadu mîǁguiga du dīhō ǁoa khami tsâ kai du tide.

15. Mîǁgui-e da ga dī toas khaoǃgâ da tae-e nî dī?

¹⁵ ǃGāsa ǀapeǁguib sada mîǁguigu dib ge sada mîǁguiba sîsengu ǃnâ ra dawa. (1Kor. 14:40) Aiǁgause, ǀhaohâb  ǃûi-aogu ge ǀgui ǀhaohâb ǃûi-aoba ra ǁhûi hîna mîǁguigu hoaga ra xoaba, ham-i nē mîǁguiga nî dīs tsî mâ ǁae gu nî dīǀoaǀoa-es tsîna. ǀHaohâb ǃûi-aogu hîna nē ǀgauba ra saogu ge ǁîgu di mîǁguiga a dīǀoaǀoa ǁkhā. (1Kor. 9:26) Sada tsîn ge ǁkhā xū-e sada mîǁguigu ǀkha a dī ǁkhā. Aiǁgause du ge tsēs ǃnâ du nî dīse ī xūna a xoamâi ǁkhā tsî ǂhâǂhâsa xūna ǂgurose nî xoamâi. Nēsa du ga dī o, o du ge sadu mîǁguiga a dīǀoaǀoa ǁkhā tsî ǂgui xūn tsîna ǀoro ǁaeb ǃnâ a dī ǁkhā.

16. Tae-e a ǂhâǂhâsa sadu mîǁguiga dīǀoaǀoas ǃnâ tsî Romeǁîn 12:11 sa nēsa mati ra ǂkhâǃnâ?

¹⁶ ǃGarise ǁgūtsâ re. ǁAeba i ge ra ū sadu ǀapeǁguiga tsoatsoa tsî dīǀoaǀoasa. (Khomai re Romeǁîn 12:11.) Paulub ge Timoteuba ge mîba “sa-aitsama kōǃgâsen”, i nē xūn ǃnâ “hâhâ” ǃgâi ǁkhāǁkhā-ao kais ǃaroma. Paulub daoǁgaosa da ge Jehovaba da ra dība ǂgao xūn hoan ǃnâ a sîsen-ū ǁkhā.—1Tim. 4:13, 16.

17. Efeseǁîn 5:15, 16 tsîna mati nî hui da sada di mîǁguiga dīǀoaǀoas ǃnâ?

¹⁷ Sadu ǁaeba ǃgâise sîsen-ū re. (Khomai re Efeseǁîn 5:15, 16.) Sadu mîǁguiba du nî dīǀoaǀoa ǁaeba ǁhûi re tsî tā nē ǁaeba ǀkharaǀkhara re. Tā ǃgâi mâsigu nē mîǁguiga du nî dīǀoaǀoaga ôa re; nē ǃgâi mâsiga du ǀnîsi ūhâ tide i ge. (Eccl. 11:4) ǂAnbasen re i du tā sadu di ǁaeba ǂhâǂhâsa tama xūn ai sîsen-ū hîna du sadu ǂhâǂhâsa mîǁguigu amsi ǂhâ hâna. (Fil. 1:10) ǁAeba ǁhûi re hînan khoena ǂhani du tideba dī du ra xūn ǃnâ. Khoena ǂanǂan re în tā ǂhani du î du nē xūn ai ǃgaoǃgâ. Sadu ǁâǁawaba ǀari re tsî sadu e-maildi tamas ka io internetsa toa du ga o ǀgui kō re. *

18-19. Tae-e a huida ǁkhā sada mîǁguiga dīǀoaǀoas ǃnâ ǃgomsina da ga hōǃâ xawe?

¹⁸ ǀAmǂoasa ǃoa mûǂui re. Sadu mîǁguigu ǀamǂoas ge ǃkhai-e ǃoa du ga ǃnari o du ra hō ǀamǂoas khami ī. ǁNā ǃkhai-i tawa du ga amabes ǃnâ sī ǂgao o, o du ge daob ga ǂganamsa xawe ǀnî hâ daoba nî ôa i du ǁnā ǃkhaib tawa sī ǁkhā. ǁKhā ǀgaub ǃnâ da ge sada mîǁguigu ǀamǂoasa ǃoa da ga mûǂui o, ǃgomsina da ga hōǃâ xawe nî mâǀgai.—Gal. 6:9.

¹⁹ ǃGâi mîǁguiga dī tsî nē mîǁguiga taniǂuis ge a ǃgom ǁkhā. Xawe da ge Jehovab huib ǀkha gā-aisib tsî ǀgaib tsîna a hō ǁkhā nē mîǁguiga taniǂuis ǃnâ.