1, 2. Josuaba tae-i ǃgomsiba ge hōǃâ Moseb ǁōb khaoǃgâ?

JOSUAB ge noxoba Jehovab di mîde ra ǁnâu, mî rase: “Ti ǃgāb Moseb ge go ǁō, xuige khâi îts satsa Jordanna-ū doeǃgâu, sats tsî nē ǁaes hoas tsîdo, ǁnā ǃhūb Israeli ôana ta tita ra māb ǃoa.” (Jos. 1:1, 2) Xūn ge Josuab ûib ǃnâ ge ǀkhara hîna ge Moseb hui-aob ase hâ îba.

² Moseb ge Isrealǁaesa ǂgui kuriga gere ǂgaeǂgui amagab ge Josuaba ǀnîsi gere ǂâiǂhansen khoena mati nî ǂâi di. (Deu. 34:8, 10-12) ǀNî Elobmîs ôaǃnâs ge Josuab 1:1, 2 tsîn xa ra mî: “ǃKharu ge ǁaeb tsî nē ǁaeb ǃnâs tsîna i ge ǂgaeǂgui-aose ǁgaumâihesa kaise a ǁkhōǁkhōsa, khoena ǁkhaubas tawa î ga ra hā o.”

3, 4. Mati da a ǂan Josuab ge Elob ai ǂgomǂnûi hâ isa tsî mâ dîsa da ǀnîsi ra dîsen?

³ Josuab ge ǀnîsi gere ǃao xawe ǁaero i khaoǃgâ ge mâǀgai. (Jos. 1:9-11) Elob ǃnâb ge ūhâ i ǂgomǃgâsib ge ge bē tama hâ i. Elobmîs ǃnaeǃkhaidi ra ǁgau khamib ge Jehovaba Josuab tsî Israelǁaes tsîna ǁîb ǀhōmǃgāb ǃnâ-ū gere daoǁgau. Mî ǁkhā da ge a nē ǀhomǃgāb a Mîsa, ǁnāb  ge Elob di ǂguro ǀGôaba.—Eks. 23:20-23; Johaneb 1:1.

⁴ Jehovab huib ǀkhas ge Israelǁaesa Moseb ǂgaeǂguisa xu Josuab di ǂgaeǂguisa ge sao tsoatsoa. Sida tsîn ǀuniga tsēdi ǃnâ hâ ǃkhais ǃgao da ge ǀnîsi ra ǂhâ, ‘Elob ǀapeǂhumis ǀkharaǀkharana ra dī khami da sida tsîna Jesub hîna ǁgaumâihe hâ Gaoba nî sao?’ (Khomai re Mateub 23:10.) Hā re i da kō Jehovab ge mati ǃkharu ge ǁaeb ǃnâ ǂgomǂgomsa ǂgaeǂgui-aoga gere ǁgaumâi ǀgauba.

5. Josuaba tae-e ge hōǃâ Jerixos tawab nî sīs aiǃâ? (Tsoatsoas ǃnâ hâ ai-īsiba mû re.)

⁵ Israelǁaes Jordan ǃāba ǃkharu toa hâs khaoǃgâb ge Josuaba ǃgomsiba ge hōǃâ. Jerixos tawab nî sīs aiǃâb ge khoeb ǀkha ge ǀhao hîna ge kai kôaba ūhâ îba. Josuab ge nē ǃhaokhoeba ge ǀū i tsî ǁnās ǀkha ge dî: ‘Sida dits a tamas ka i ots a sida khākhoen di?’ Josuab ge ge ǂgom tama hâ i nē khoeb ge mîba bi ǃkhaisa ǁîb a hamsa. Nē khoeb ge ǃeream tsî ge mî ‘ǂnubis ǃKhūb dis di gaoda’ ge hîna Elob khoena nî ǁkhauba da. (Khomai re Josuab 5:13-15.) Nē ǃnaeǃkhais ge ra ǁgau Jehovab Josuab ǀkha ra ǃhoasa xaweb ge ǁîba nēsa ǀhomǃgāb ǃnâ-ū ra dī ǀnaib ge tsoatsoas ai gere dī khami.—Eks. 3:2-4; Jos. 4:1, 15; 5:2, 9; ǃNaeǃkhaidi 7:38; Gal. 3:19.

6-8. (a) Tae-i ǃaroma î ge khoesi mû ǀgaub ǃoagu Jehovab di mîmāde ǃgâi tamase gere mûsenba? (b) Xawes ge nē mîmāsa mâǀgaub ǃnâ gā-ai sîsenǂuiba ūhâ i? (ǁNaeǁgau saosa mû re.)

⁶ Josuab ge ǃgāsa daoǁgausa ǀhomǃgāba xu ge hō matib Jerixosa nî dīkākā ǀgaub xa. ǀNîsi î ge ǂguroseb ge māhe ǁgaraga ǃgâi tamase gere mûsen. Aiǁgauseb ge Jehovaba ge mîmā î gu hoa aore khoega ǃgaohe tsîs ge ǁnāsa ra ǂâibasen ǁîgu tsûb ǃnâ nî hâsa ǁaerob ǀgaiba. ǁNāpa amase ge ǂhanu ǁae i nēsa dīs ǃgao?​—Gen. 34:24, 25; Jos. 5:2, 8.

⁷ ǁNā huioǃnâ soldagu ge ǀnîsi gere ǂâi mati gu ǁîgu omaris ǁanina nî kōǃgâ ǀgauba. Xawe î ge ǂhôasa ge hā Jerixos ge “ǁāga ǂganam, tsî ge ǂganamsen hâ i Israeli ôan di ais aiǃâ.” (Jos. 6:1) ǁÎna ǃgâi ǂâibasen-e ūhâ tide ǂgomǃgâsiba Jehovab ǃnâ ūhâsa, mâsib go nēti a dawa o?

⁸ Israelǁaes ge ge mîmāhe în Jerixosa 6 tsēde ǃgûǂnamipe tsî 7ǁî tsēs ai hû ǃnāde ǃgûǂnamipe. ǀNî soldagu ge ǀnîsi ga mî hâ “nēs ge a ǁae ǁore di.” Xaweb ge Israelǁaes di mûhe tama hâ ǂgaeǂgui-aoba ge ǂan-i tae-eb ra dīsa. Nē mîmās ge Israelǁaes di ǂgoms ǀguisa ge ǀgaiǀgai tama hâ i xawe ǁîn tsîna Jerixos di ǀgaisa soldaga xu ge sâu.​—Jos. 6:2-5; Heb. 11:30. *

9. Tae-i ǃaroma da Elob ǀapeǂhumisa xu ra hā daoǁgaude nî saoba? Aiǁgau-e mā re.

⁹ Tae-e da nēsa xu ra ǁkhāǁkhāsen? ǀNî ǁaegu ai da ge ǀapeǂhumis ra dī ǀkharaǀkharana ǀoasase ǁnâuǃā tama hâ. Aiǁgause da ge ǀnîsi elektronise xūna Elobmîsa ôaǃnâs, aoǁnâ sîsenni tsî ǀhaodi tawa sîsen-ūs ǃgao ǃgâibahe  tide. Xawe da ge ǁaerob khaoǃgâ ra mû, nē elektronise xūna sîsen-ūs ǃnâ-ū da a ǀama ǁkhā ǀgausa. Nēn hoan di ǃgâi ǀamǂoas ge sida ǂgoms tsî ǀguiǃnâxasib tsîna ra ǀgaiǀgai.

10. Ham-e nē ǂhâǂhâsa ǀhaosa ge daoǁgau Jerusalems ǃnâ?

¹⁰ 13 Kuriga ǃkharu hâse Korneliub ǀkharaǀkharasen hâs khaoǃgân ge Jodeǁîna gere ǂhâba îgu aore khoega noxoba ǃgaohe. (ǃNaeǃkhaidi 15:1, 2) ǁNâusagu di ge Antioxias ǃnâ a hâ o, o i ge Pauluba ge ǂganhe îb Jerusalems ǃnâ hâ ǂgaeǂguira soros di ǁanigu ǀkha sī ǃhoa. Tae-e ge ǀamǂoa i? Paulub ge ge mî: ‘Tsî ta ge ǂhaiǂhaisi-e xu ge ǃgû.’ Xristub ge ǂgaeǂguira sorosa ge daoǁgau î-i nē ǁhōba ǃhoaǃgaohe ǁkhā.​—Gal. 2:1-3.

11. (a) Tae-e Jerusalems ǃnâ ge ǃgomsi i? (b) Pauluba mati ǀguiǃnâxasiba ge aiǃgû kai Jerusalems ǃnâ? (ǁNaeǁgau saosa mû re.)

¹¹ Xristub di ǂgaeǂguis ǃnāga î ge ǂgaeǂguira sorosa ge daoǁgauhe, în Xristeǁî tama hâ Jodeǁîna tā ǃgaohe. (ǃNaeǃkhaidi 15:19, 20) Xawe î ge nēs khaoǃgâs tsîna ǀnî Jodeǁîna ge aiǃgû ǁîn ǀgôana ǃgaos ǀkha. ǀHaohâb ǃûi-aogu ge Jerusalems ǃnâ a ǁnâu o, Paulub Moseb ǂhanuba ūǃoa tama hâsa o gu ge ǁîga Pauluba ǂgomhe ǁoasa daoǁgausa ge mā. * (ǃNaeǃkhaidi 21:20-26) ǁÎgu ge ǁîba ge mîba îb haka khoegu ǀkha tempelsa ǃoa ī în khoena mûn ga ra o ǂâi Paulub “ǂhanuba ra dī ǃkhaisa.” Paulub ge ǁîgu gā-aisiba ga ôaǃnâ hâ ǁîgu ge mā daoǁgaus ǃgao tsî ga mî hâ Jodeǁîn Xristeǁîn ǃgaos xa ǃgâise ǁnâuǃā tama hâsa. Xaweb ge Pauluba ǃgamǃgamsenxase ǁîgu di daoǁgausa ge ūǃoa îb ǀguiǃnâxasiba Xristeǁîn ǁaegu aiǃgû kai ǁkhā. ǀNîsi da ge ra ǂâi, ‘Jesuba tae-i ǃaroma nēsa gaxuǁaeba ge aiǃgû kai, ǁîb ǁōb ge Moseb di ǂhanuba a ǀam kai hîna?’​—Kol. 2:13, 14.

12. Tae-i ǃaromab ge Xristuba ǁaeba ū nē ǁhōba sîsenǂams ǃnâ?

 ¹² ǀNîn ge ǁaeba ra ū xū-e ǁnâuǃāsa. Jodeǁi Xristeǁîn tsîn ge ǁaeba ge ǂhâ hâ i ǀasa ǀgauba ǁnâuǃāsa. (Johaneb 16:12) ǀNîn ge noxoba ǁaeba ǂhâ hâ în ǁnâuǃā ǃgaohes ǃnâ-ū ǀgui î khoe-e ǀhōsagusisa Jehovab ǀkha a ūhâ ǁoasa. (Gen. 17:9-12) ǀNîn ge mâǃoahesa gere ǃao tsî ǁnās ǀkha Jodeǁîn ǂgom ǀgauba xū mâǂoasa gere ǃao. (Gal. 6:12) Tsîb ge Xristuba noxoba ge aiǃgû daoǁgaus ǃnâ Paulub ge xoa sîǂkhanidi ǃnâ-ū.​—Rom. 2:28, 29; Gal. 3:23-25.

13. Tae-e nî hui da î da Xristub di ǂgaeǂguisa nētsē ǃgôaǃgâsiba ǁgau?

¹³ ǀApeǂhumis ǃnâ ra dīhe ǀkharaǀkharana da ga hoase ǁnâuǃā tama ga ra io, o da ge Xristub ge ǃkharu ge ǁaeb ǃnâ gere daoǁgau ǀgauba nî ôaǃnâ. Josuab ǁaeb tamas ka io ǃkharu ge ǁaeb Xristeǁîn tsēdi ǃnâs tsînab ge Xristuba ǃgâi daoǁgaude Elob khoena gere mā. Tsîs ge nēsa Elob ǃoaba-aon ǂgomsa ge ǀgaiǀgai tsî ǁîna gere ǀguiǃnâxa kai.​—Heb. 13:8.

14-16. Xristuba mâ ǀgaub ǃnâ “ǂgomǂgomsa tsî gā-ai ǃgāb” ǃnâ-ū ra hui da gagasise ǀgaisa?

¹⁴ Jesub di ǀnamma da ge ǁîb ǃoaba-aonab nētsē ra kōǃgâ ǀgaub ǃnâ ra mû “ǂgomǂgomsa tsî gā-ai ǃgāb” ǃnâ-ū. (Mat. 24:45) Marki hîna haka ǀgôana ūhâb ge ra mî: “ǁGâuab ge omaride ra ǁāǂam di. Xawe ǂkhâǃnâs hîna da ge hōs î da omaris ǃoabasa mâ wekheb hoaba ūhâs ge kaise omaride ra ǁkhauba.”

¹⁵ Xristub di daoǁgausa da ga ra mûǂan o, o da ge nî mû ǁîb kaise ra kōǃgâ dasa gagasise. Patriki hîna ǀhaohâb ǃûi-aob ase ra ǃoabab ge ra mî: “ǀNîn ge ǀorose aoǁnâ ǃgûs ǃgao ǀhaos xa kaise gere ǁkhoa o. Xawe Jesub di mâǂoa ra ǀgaub ge ǁîb ge ǃgamǃgamsenxan ǃnâ ǃgâiǃgâibasensa ūhâ tsî da ge ǁnāsa nē ǀhaodi ǃnâ ra mû. Tsî ǃgâsan hîna amab ǃnâ ǃkhai hân ge kaise nēti i ǀhaodi ǃnâ-u ra ǂkhâǃnâhe tsî gagasise ǁkhawa ra omkhâisen.”

¹⁶ Tsî gagasise da nî kai ǃkhais ǃgaob ge Xristuba ra hui da î da kaise a ǂhâǂhâsa sîsenni ai ǂâisa ǂûi, ǁnās ge aoǁnâ sîsen-e. (Khomai re Markub 13:10.) Andréb hîna ge ǀasase ǀhaohâb ǃûi-aob ase a ǁgaumâiheb ge ra mî, ǁîb ge hoaǁae ǀapeǂhumis ra mā ǀkharaǀkharana ǂōrisase ra kō di. ǁÎb ge ra mî: “ǁNâub berodi tawa î ge ǃgâsana a ǀoroǀorohes ge ra ǁgau, kaise da ǂhâǂhâsa ǁaeb ǃnâ ûi hâsa tsî da sida ǁaeba aoǁnâ sîsenni ǃnâ nî sîsen-ūsa.”

17, 18. Tae-i ǃaroma da nēsi ra dīhe ǀkharaǀkharana nî mûǂan?

¹⁷ ǁÎb di daoǁgaus ǃnâ-ūb ge Jesub Xristub sida Gao-aoba hānîǁaeba ǃoa ra mûǂui. ǁNās ǀkha hā re î da ǃgâiaǂgao nēsi da ra hōǃâ ǀkharaǀkharan ǃnâ ǃgâina da ra ǀama amaga. ǀNîsi du ge sadu omaris ǃoabas ǃnâ, mati du ǀhaodi nēsi ra dīhe ǀgauba xu ra ǀama ǀgaub xa a ǃhoa ǁkhā.

¹⁸ Jehovab ǀapeǂhumisa xu da ra ǀama ǀgauba da ga ra mûǂan o, o da ge nē daoǁgaude ǃgâiaǂgaob ǀkha nî sao.  Kaise da ge ra ǃgôaǃgâ ǁgâihe ra ǂkhanin ge ǀoroǀorohe o tsî da texnoloxiba ǀoasase sîsen-ūs ǃnâ-ū marihe ǂōrisase ra sîsen-ūsa tsî da nēn hoan ǂam-ai ǃhūbaib ǂhawase noxoba ra aoǁnâsa. Nēna ǂâis ǃnâ ūhâse da ge ǁkhā da as kōse elektronise ǂkhanin tsî mediab tsîna nî sîsen-ū. Nē ǀgaub ǃnâ da ge ǀapeǂhumis ra mā da xūna gā-ai ǀgaub ǃnâ nî sîsen-ū Xristub di ra ǂgao amaga.

19. Tae-i ǃaroma da Xristub di daoǁgausa nî sao?

¹⁹ Xristub di daoǁgausa da ga ūǃoa o, o da ge sida ǂgomsa ra ǀgaiǀgai tsî ǀguiǃnâxasib tsîna ra aiǃgû kai. Andréb ge Betels omaris ǁanin ge ǀoroǀorohe ǃkhais xa ra mî: “ǁNā betelitan hîna Betels tawa sîsen taman ge ǀasa ûi ǀgauba a ǃkhōǃoa ǀgaub ge ge ǁkhāǁkhā te, î ta ǂgoms tsî ǃgôasib tsîna ǁgau. ǁÎn ge ǀoasase Jehovab kunis ra tawa ǀgaub hoab ǃnâ ǂkhîb ǀkha ra aiǃgû ǁîn ǁgaumâidi ǃnâ.”

20, 21. (a) Tae-i ǃaroma da sida Gao-aob Xristub ai nî ǂgomaiǂnûi? (b) Tae-e da sao ra ǁkhāǁkhāǃâs ǃnâ nî ǃhoaǃgao?

²⁰ Sida ǁgaumâihe hâ Gao-aob Jesub Xristub ge ǀgūǁae “dan raǃâ” ǁîb di “ǃaoǃaosa xūna nîra ǁkhāǁkhā” da. (J.ǂHa. 6:2; Psa. 45:4) ǁÎb ge Elob khoena ra ǂhumi nē eloxoresa ǃhūbaib ǀams nî hās aiǃâ, ǁnāb nî ǁae amaga hînan ǁkhāǁkhās tsî om sîsengu ǃnâs tsîna nî ǁhaoba khâis ǁaeb ǃnâ.

²¹ Sida ǂkhauhesa Gao-aob ge ǀasa ǃhūbaib kōse nî daoǁgauda, ǁnās ǀkha da ge ǁîb ai nî ǂgomaiǂnûi mâsib ga ra dawa xawe. (Khomai re Psalmdi 46:1-3.) ǀNî ǁaeb ai da ge ǀnîsi ǀkharaǀkharana ūǃoas xa nî ǃgombahe, ûib mâsib ra dawa khami. Xawe nēn hoan ǂam-ai da mati ǂkhîb tsî ǀgaisa ǂgoms tsîna nî ūhâ Jehovab ǃnâ? Nē dîs ge sao ra ǁkhāǁkhāǃâs ǃnâ nî ǃhoaǃgaohe.