1, 2. (a) ǀKharaǀkharana mati Xristeǁî-i ûiba a tsâǀkhā ǁkhā? (Tsoatsoas ǃnâ hâ ai-īsiba mû re.) (b) Psalmdi 131 ǃoagu i mâ tanisen ǀgauba nî hui da î da ǂkhîba ūhâ ǀgara?

LLOYDI tsî Alexandras tsîn ge ǁnâu o betelsa xu ra ge nî ī di, o ra ge kaise ge tsûaǂgao hâ i. ǁÎra ge 25 kuriga betels tawa ge hâ i. Lloydi ge ra mî: “Tita ge ti betels ǁgaumâis tita ra ǁgauǁgau khami gere tsâ. Nē ǀkharaǀkharana ta ge gere ǃgôaǃgâ xawe wekhegu ra ī khami ta ge ǂkhābēhe hâse gere tsâ. Nēs ge kaise ge ǃgom i. ǀNî ǁaeba ta ge ǃgâise gere tsâ tsî ǁkhawa nau ǀkhāb ai tsûaǂgao hâse.”

² Sida ûib mâsib ga ra dawa o, o î ge ǀkharaǀkharan hîna da ra hōǃâna emosioneelse nî tsâǀkhā da. (ǂKhm. 12:25) ǁNā ǀkharaǀkharana ūǃoas ge nî ǃgom i. Nēti i ga ra ī o, o da mati ‘sâsa tsî ǃnōsa’ ûiba nî ūhâ? (Khomai re Psalmdi 131:1-3.) Hā re î da kō matin ge Elobmîs ǁaeb Xristeǁîn tsî nētsē hâ ǃgâsan tsîna ǂkhîba a ūhâ ǀgarasa ǀkharaǀkharan ge hâ xawe.

3. Joseba mâ mâsib ǃnâ ge hâ i?

³ Joseb ge ge 17 kurixa i ǁîb ǃgâsagu ge surib xa a ǁamaxū bi o. Nēs ǂam-aib ge Joseba ǁîb ǁgûb xa ǃnāsase ge ǀnamhe i. (Gen. 37:2-4, 23-28) ǁÎb ge 13 kuriga ǃgāb ase Egipteb ǃnâ ge hâ i, ǁîb ǁgûb Jakoba xu ǃnūse. Tae-e Joseba ge hui îb tā ǁgai tanisen ǀgauba omkhâi?

4. (a) ǃKhōsis ǃnâb hâ hînab ge Joseba tae-i ai ǁîb ǂâisa ǂnûi hâ i? (b) Jehovaba mati Joseb di ǀgorede gere ǃeream?

⁴ Joseb ge ǃkhōsis ǃnâb hâ hîna ǁîb ǂâisa Jehovab nî mā bi ǀkhaegu ai gere mâi. (Gen. 39:21; Psa. 105:17-19) Joseb ge ǂkhamsis ǃnâ gere hō kēbodi ge ǁîba ge ǁgau Jehovab ǁîb ǃnâ ǃgâiǃgâibasensa ūhâsa. (Gen. 37:5-11) ǁÎb ge ǀgui ǃnās xa ǃnāsase ǁîb tsûaǂgaoba Jehovab aiǃâ gere ǁgui. (Psa. 145:18) Jehovab ge Joseba ge mîba ‘ǁîb ǀkhab’ hoaǁae nî hâ ǃkhaisa ǃgomsigab ga ra hōǃâs tsîna.​—ǃNaeǃkhaidi 7:9, 10. *

5. ‘Elob di ǂkhîba’ mati sida gagasi mîǁguiga nî tsâǀkhā?

⁵ Sida tsîn ge nētsē ǀkharaǀkharan ga ra hâ xawe ‘Elob di ǂkhîba’ a hōǃâ ǁkhā. (Khomai re Filipeǁîn 4:6, 7.) Tsûaǂgao da ga ra ǁaeb ǃnâ da ga Jehovaba ǃoa ga ra kō o, o î ge Elob ǂkhîba sida gagasi mîǁguiga nî daoǁgau î da tā ǀûsen. Hā re î da nētsēs ǃnâ hâ aiǁgaude ǃhoaǃgao.

6, 7. ǀGorede mati nî hui da î da ǂkhîba ūhâ? Aiǁgau-e mā re.

⁶ Ryani tsî Julietts tsîn ge ǁnâu o ǀō-aisa aimâba-aose ra ge ǁkhawa ǃoaba tide di, o ra ge ǂkhābēhe hâse gere tsâ. “Nēs xam ge Jehovaba ǀgores ǃnâ ge mîba.” Ryani ge ra mî: “Sim ge ge ǂan i nēs ǃnâ-ūm Jehovab aim ǂgomaiǂnûi hâsa nî ǁgausa. ǂGui ǃgâsan ge ǀhaohâb ǃnâ amab ǃnâ ge ǀasa i tsîm ge ge ǀgore îb Jehovaba huim im ǁîn ǃgao ǃgâi aiǁgaus ase i.”

⁷ Jehovaba ǁîra ǀgorede mâ ǀgaub ǃnâ ge ǃeream? Ryani ge ra ǂâi oa: “ǀGores khaoǃgâ i ge ǁgai tsâsigu tsî ǂâiǂhansendi tsîna ge bē. Elob di ǂkhîb ge sim ǂgaob tsî ǂâi ǀgaub tsîna gere daoǁgau. Tsîm ge ge mûǂan ǃgâi tanisen ǀgaubam ga ra ūhâ ǀgara o, om ge Jehovab xa nî sîsen-ūhe.”

8-10. (a) Elob di gagaba mati nî hui da tsûaǂgao da ga ra ǁaeb ǃnâ? (b) Jehovaba mati nî hui da î da gagasi mûǂuisa ūhâ?

⁸ Sâsasiba ūhâs ǂam-ai î ge Elob di gagaba nî hui da î da sida ǂâisa xoadi ai ǂnûi hîna nî hui da de î da gagasi xūna ǂgurose mâi. (Khomai re Johaneb 14:26, 27.) ǃGame hâ kaikhoera Filipub tsî Marias tsîn xa ǂâi re, ǁîra ge 25 kuriga betels tawa gere ǃoaba. Haka ǁkhâgu ǃnâ î ge ǁîra tare ǁgûra ge ǁō tsî ǀnî hâ omaris ǁan-i tsîna tsî ra ge Marias ǁgûb hîna xūna ǀurus di ǁōba ǀaesen hâba ge kōǃgâ tsoatsoa.

⁹ Filipub ge ra ǂâi oa: “Tita ge ǁkhā ta a di ge ǂâi hâ i xawe î ge xū-e ge ǀkhai i. Koloseǁîn 1:11 sa ta ge ǃKhē xu ǂgō-ommi ǁkhāǁkhāǃâs ǃnâ ge  hō. Tita ge gere mâǀgai xawe ǀoasases ose. ǀOasase mâǀgaisa ta ge ge ǂhâ hâ i ‘ǃnūǃnâxasib tsî ǃgâiaǂgaob tsîn ǀkha’. Nē xoas ge ge ǂâiǂâiǃnâ te ti ǃgâiaǂgaob ti mâsiba xu hâ tama hâsa xawe Elob gagab ti ûiba ra tsâǀkhā ǀgauba xu.”

¹⁰ Gagasi mûǂuiba ra ge ǁîra ûib ǃnâ ūhâ i amagab ge Jehovaba Filipub tsî Marias tsîna ǂgui ǀgaugu ǃnâ ge ǀkhae. Betelsa xu ra ge ī o, o ra ge khoena Elobmîsa gere ǁkhāǁkhā hîna gere aiǃgû na tsî ǀgui tsēs xa ǃnāsase wekheb ǃnâ gere ǁkhāǁkhāsen ǂgaona. Kō-oas ra o, os ge Mariasa ra mî, “ǁîn ge sima gere ǃgâiaǂgao kai tsîb ge Jehovaba ǁîn ǃnâ-ū gere mîbam hoan ge nî ǃgâi di.”

11, 12. (a) Joseba mati Jehovaba ǀkhaeb nî xū-e ge mā? (b) Joseba mati ge ǀkhaehe mâǀgaib ge amaga?

¹¹ ǀKharaǀkharana da ga ra hōǃâ ǁaeb ǃnâ da ge hānîǁaeb xa a ǂâiǂhansen tsoatsoa ǁkhā. Nēs ge Joseb ǀkha ga ī hâ. ǁÎb ge ǁîb mâsib ǃnâ ǃgâina gere mû tsî ǁnās ǃnâ-ū Jehovaba ǀkhaeb nî xū-e ge mā. ǃKhōsis ǃnâb ge hâ io, ob ge Joseba mā-eb gere ǁgaumâis hoasa gere dī, Potiferab gere sîsenba ob gere dī khami.​—Gen. 39:21-23.

¹² ǀGui tsēb ge Joseba ge ǂganhe îb ǀgam khoekha hîna ge ǀgapi ǂhārode Farob ommi ǃnâ ūhâ î kha ǃûi. Joseb di ǃgâi tanisen ǀgaub xa kha ge hoa ǀgam khoekha ǁîkha ǃgomsigu tsî ǁhapodi tsîn xa ge ǂâi ǀû. (Gen. 40:5-8) Joseb ge ge mûǂan tama hâ i xawes ge nē ǁgamǀhaosa ǃgâiaǂgaoba ga hau hâ. ǀGam kurigab ge ǃkhō-oms ǃnâ hâ i xaweb ge ǁîba ge orehe tsî ǁnā tsēs ai ǀgamǁî gao-aob ase Farob ǃnāga ge ǁgaumâihe.​—Gen. 41:1, 14-16, 39-41. 

13. Mati da Jehovaba ǀkhaeb nî xū-e nî mā?

¹³ Joseb khami da ge sida tsîna xū–e da a dī ǁoa mâsib ǃnâ a hōsen ǁkhā. Xawe da ga ǃnūǃnâxasiba ūhâ tsî ǃgâina ga ra dī o sida mâsib ǃnâ, o da ge Jehovaba ǀkhaeb nî xū-e nî mā. (Psa. 37:5) ǀNî ǁaeb ai da ge ǀnîsi ra “îganǀgē” xawe da ge “huio tama hâ” apostel Paulub ge mî khami. (2Kor. 4:8) Paulub mîdi ge sida ûib ǃnâ ra ama kai, aoǁnâ sîsenni ǃnâ da ga ǃnāsase ga ra dī o.

14-16. Filipub ǃgâiǂhôa-aoba mati ǁîb mâsib gere dawa xawe aoǁnâ sîsenni ǃnâ ǃnāsase gere dī?

¹⁴ Filipub ǃgâiǂhôa-aob ge ǃgâi aiǁgausa  ra mā da, aoǁnâ sîsenni ǃnâb ge ǃnāsase gere dī amaga ǀkharaǀkharan ge hâ i xawe. Jerusalems ǃnân ge ǃgâsana gere mâǃoahe Stefanub nî ǃgamhes kōse. * Filipub ge ǀasa ǁgaumâisa ǁnā ǁaeb ǃnâ ge ūhâ i. (ǃNaeǃkhaidi 6:1-6) Xristub saosaben gere mâǃoahe o, ob ge Filipuba kō tsî xū-e ge dī ǁoa i. ǁÎb ge Samariasa ǃoa ī tsî gere aoǁnâ, ǁnā ǃnās ǃnâ î ge ǃgâiǂhôasa noxoba ge aoǁnâhe tama hâ i.​—Mat. 10:5; ǃNaeǃkhaidi 8:1, 5.

¹⁵ Filipub ge Elob gagab gere daoǁgau bi ǃkhais hoasa ǃoa gere ī, ǁnā-amagab ge Jehovaba ǁîba gere sîsen-ū. ǁÎb tanisen ǀgaub ge Samariaǁîna gere khoakhoa hîna ge ǃgôasiba anu tama hâse Jodeǁîn xa gere hâ ūhena. ǁNā-amagan ge khoena ǁîba “ǀguiǂâixase” gere ǃgâ.​—ǃNaeǃkhaidi 8:6-8.

¹⁶ Filipub ge Elob gagab xa Asodus tsî Kaesareas tsîna ǃoa ge daoǁgauhe, nē ǀgam ǃāra ge ǂgui Jodeǁî tama khoena ge ūhâ i. (ǃNaeǃkhaidi 8:39, 40) 20 Kuriga ǃkharu hâse Samarias ǃnâb aoǁnâ toa hâ hînab ge Filipub mâsiba ǁkhawa ge dawa. Omaris aob aseb ge ǁîb ǃās ǃnâ sī gere aoǁnâ. ǁÎb mâsib gere dawa xaweb ge Filipuba aoǁnâ sîsenni ǃnâ ǃnāsase gere dī tsîs ge nēsa ge ǃaroma ǁîb tsî ǁîb omaris tsîna ǀkhaehesa.​—ǃNaeǃkhaidi 21:8, 9.

17, 18. Aoǁnâ sîsenni ǃnâ ǃnāsase dīsa mati nî hui da sida mâsigu ga ra dawa ǁaeb ǃnâ?

¹⁷ ǂGui ǃgâsan hîna ǀoasase ra ǃoaban ge ra mî aoǁnâ sîsenni ǃnâ ǃnāsase dīs ge ǁîna ra hui ǀkharaǀkharan ga ra hâ ǁaeb ǃnâ. Suid Afrikab ǃnâ hâ khoe-aogura Osborni tsî Polites tsîn ge ra mî, ǁîra ge betelsa xu ra ge ǂoa o ǃhaese ra sîsenni tsî hâǃkhais tsîna nî hō di ge ǂâi hâ i. “Xawe î ge di ge ī tama hâ i” dib ge Osborna ra mî. “Sîsen-em ge ǃhaese ge hō tama hâ i ǂâim ge hâ i khami.” ǁÎb taras Polites ge ra mî: “Sîsen-em ge 3 ǁkhâgu ǀgaiba ge hō tama hâ i tsî i ge sim marihe ge toa. Nēs ge kaise ge ǃgom i.”

¹⁸ Tae-e ge hui ra î ra ǁîra ǃgom mâsib ǃnâ mâǀgai? Osborni ge ra  mî: “Aoǁnâ sîsenni ǃnâ ǀhaohâb ǀkha ǁhaos ge ge huim im sim ǂâide ǃgâi xūn ai mâi. Sim ge ge mîǁgui aoǁnâ sîsenni ǃnâ ǃnāsase dīsa nēs nî huim amaga im tā ǂnû tsî ǂâiǂhansen, nēs ge kai ǃgâiaǂgaoba ge mām. Sîsen-em ge hoaba gere ôa tsî ǁnās ǀkha ega sîsen-e ge hō.”

19-21. (a) Tae-e nî hui da î da ǃgâiaǂgao? (b) Mati da nî ǀama sida ǀkharaǀkharana da ga ra ūǃoa o?

¹⁹ Nē aiǁgaudi go ǁgau khami da ga sida tsîna sida mâsib ǃnâ ǃgâina ga ra mû o tsî Jehovab ai ǃnūǃnâxase ga ra ǃâu o, o da ge ǃgâiaǂgaoba nî hōǃâ. (Khomai re Mixab 7:7.) Tsî da ge nî mûǂan gagasise da nî ǀamasa nē ǀkharaǀkharan ǃnâ-ū. Polites ge ra mî: “Betelsa xu ǂoas ge ge ǁgau te Jehovab ai ǂgomaiǂnûis tae-e ra ǂâibasensa hoa xūn ga ti ǃoa-ai ga ra hâ xawe. Ti ǀhōsagusis Jehovab ǀkha ta ūhâs ge ge ǀgai.”

²⁰ Marias ge ǁîs ǁgûb hîna ǀaesen hâba ra kōǃgâ aimâba-aoses ra sîsen hîna. ǁÎs ge ra mî: “ǂÂiǂhansen ta ga ra ǁaeb ai ta ge mâ tsî ra ǀgore tsîs ge nēsa sâsase ra tsâ kai te. Jehovab ǃomdi ǃnâ xūna māsa ta ge ge ǁkhāǁkhāsen tsîs ge nēsa hānîǁaeb ǃnâs tsîna a hui te ǁkhā.”

²¹ Lloydi tsî Alexandras tsîn ge ra mî ǀkharaǀkharan ge ǁîra ǂgomsa ǂgom ǁoa ra a ǀgaugu ǃnâ gere ǃâitsâ di. Xawe ra ge ra mî: “Nē ǃâitsâdi ge ge ǁgau sim ǂgoms a amasa tsî ǃgom ǁaegu ǃnâ a huim ǁkhāsa. Nēs ge ge huim im mâǀgai.”

22. Sida mâsib ǃnâ da ga ǃgâina ga ra mû o, o da tae-e nî hōǃâ?

²² Sida mâsib ga gagasi ǁgaumâi-i, ǀaeb mâsib tamas ka io omaris mâsib xa ga ra dawa o, o da ge ǂâis ǃnâ nî ūhâ Jehovab sida ra kōǃgâsa tsîb ǂhanu ǁaeb ai nî hui dasa. (Heb. 4:16; 1Pet. 5:6, 7) ǁNās ǀkha nēsi sadu mâsib ǃnâ ǃgâina mû re. Jehovab ǃoa ǀgores ǃnâ-ū ǀgū re tsî sadu ǃgomsiga ǁîb ǃomdi ǃnâ xu re. Nē ǀgaub ǃnâ da ge ǀkharaǀkharana da ga ra hōǃâ xawe nî ǃgâiaǂgao.