ǂOab tsî ǀanub mâsiga ra ôaǃnâ khoe-i ge ǂharis di ǂoab mâsiga ra khomai machinesa ra ôaǃnâ. ǁÎb ge ǀgaisa ǂoaba ra mû hîna ǂgui khoena ūhâ ǃkhaib tawa ra sība. ǁÎb ge khoena ra tsâba ǁnā-amagab ge ǃgarise ra dītsâ ǁîna ǃkhâikhomsa.

ǁKhā ǀgaub ǃnâb ge Jehovaba ǃhūbaib ai hâ khoena ra ǃkhâikhom hānî kai ǂoas xa. ǁÎba nēsa mati ra dī? Tsî mati da a ǂan ǁîb khoena ǂâusa ǁaeba ra māsa nē ǃkhâikhoms xa xū-e dīsa? Nēsa ǃereams ǃgao hā re i da kō Jehovab ge mā ǀnî ǃkhâikhomde ǃoa.

Elobmîs ǁaegu ǃnâb ge Jehovaba ǃkhâikhomde gere mā matib khoena nî ǁkharasa ǁnān hîna ǁîba ǂanǃgâsib ǃnâ ra ǁnâuǀnamoǃnâna. (ǂKhm. 10:25; Jer. 30:23) ǁÎb ge nē ǁnâuǀnamoǃnâ khoena gaxu ǁaeb ǃgau hâse gere ǃkhâikhom tsî ǁîna gere mîba tae-en nî dīsa ǁîb ǂâis ǃoagu ûis ǃaroma. (2Gao. 17:12-15; Neh. 9:29, 30) Khoena ǂhâǂhâsa ǀkharaǀkharana dīsa huis ǃgaob ge ǁîb ǃoaba-aon hîna ge ǃhūbaib ai hâ i na gere sîsen-ū în khoena hui în mû ǃhaesen xū-e nî dīsa.—Amo. 3:7.

Noaxi ge a aiǁgaun di ǀgui hîna ge Elob di ǀgoraǃgâs xa gere ǂanǂana. ǂGui kurigab ge ǁgauoǃnâ khoen hîna ge ǁîb tsēdi ǃnâ ûi hâ îna hānî kai ǁgammi dâus xa gere ǃkhâikhom. (Gen. 6:9-13, 17) ǁÎb ge ǁîna gere mîba tae-en nî dīsa nē ǁgammi dâus tawa sâuhesa ǁnās ǀkhab ge Noaxa “ǂhanu-aisib di aoǁnâ-aob” ase ge ǂansa i.—2Pet. 2:5.

Noaxi ge ǃgarise a ǁgūtsâ xawen ge nē ǁgauoǃnâ khoena Elob di haisi-amsa ge ǃgâ tama hâ i. ǁÎn ge ge ǁgau ǂgomsan ge ūhâ tama hâ i ǃkhaisa. ǁNās xa ǃaroma-e hâsen ge kai ǁgammi dâus ge ‘hā tsî hoana a ūbē’ o, o ge ǁō. (Mat. 24:39; Heb. 11:7) ǁÎn ǀams ra ǀgū khamin ge Elob ge ǁîna ge ǃkhâikhom tama hâ i di ge mî ǁoa i.

ǀNî ǁaegu aib ge Jehovaba khoena ǃnūbu ǁaerob ǃgau hâ hîna gere ǃkhâikhom. Xaweb ge noxoba khoena ǂâusa ǁaeba gere mā în ǀkharaǀkharana dī. Aiǁgauseb ge Egipteǁînab 10 ǁkharaga nî mās aiǃâs tsîna ǁîna ge ǃkhâikhom. Jehovab ge Moseb tsî Aronni tsîkha ge sî īkha sī Faraob tsî ǁîb ǃgān tsîna ǃkhâikhom hûǁî ǁkharab hîna nî hāb xa nēb ge kai ǃnareba. Nē ǃnareb sao ra tsēs ai nî hâ ǃkhais ǃgaob ge Eloba ǁîna ǁaeba mā în hâ ǃkhais tsî nē ǃnareba xūn nî sâusen ǀgaub tsîna ôa? Elobmîs ge ra mî: “Faraob di ǃgāgu ǃnâ ǁnâi ǃKhūb mîsa ra ǃaoǃgâb hoab ge ǁîb di ǃgāgu tsî ǁîb di ǀgoana omgu ǃnâ ge ǁhaiǁhâ kai. Xawe ǂgaob âba ǃKhūb mîs ai ǂnûi tamab hoab ge ǃgāgu âba tsî ǀgoan âba ǃgarob ai ge hâ kai.”(Eks. 9:18-21) Jehovab ge ǂâusase ge ǃkhâikhom în ǁnān hîna ra ǁnâuǀnam na tā nau khoen khami kaise ǃgoma tsâ.

Faraob tsî ǁîb ǃgān tsîn ge disiǁî ǁkharab nî mā-es aiǃâ ǁnās ǃgao ge ǃkhâikhom-e. Xawen ge ǁîna nē ǃkhâikhomsa ge ǃgâ tama hâ i. (Eks. 4:22, 23) ǁNās xa ǃaroma-e hâse i ge ǁîn di ǂguro ǃnaesabe ǀgôaga ge ǁō. Nēs ge kaise ge tsûtsûsa i. (Eks. 11:4-10; 12:29) Nē ǃkhâikhomsan ge ǀnai ǁaeb aiǃâ hō? Îo. Moseb ge ǀnai Israelǁaesa ge ǃkhâikhom hānî disiǁî ǁkharab xa tsî ǁîna ge mîba tae-en nî dīsa ǁîn  omaride sâuhes ǃgao. (Eks. 12:21-28) Matikō khoena Moseb di ǃkhâikhomsa ge ǁnâuǀnam? Ôaǃnâs ǃoagu i ge 3 miliun Israelǁîn, Israelǁî taman tsî Egipteǁîn tsîna Elob xa ge sâuhe ǁîb xa ǀgoraǃgâhesa xū tsî Egipteba xu ge ī.—Eks. 12:38.

Nē aiǁgaudi ra ǁgau khamib ge Jehovaba hoaǁae ra dītsâ în ǁîb ǃoaba-aona ǂâusa ǁaeba ūhâ ǁîb ǃkhâikhomde ǁnâuǀnamsa. (Deu. 32:4) Eloba tae-i ǂâibasens ǀkha nēsa gere dī? Apostel Petrub ge ge ǁguiǃā Jehovab “ǂgao tama, khoe-i nî kāǁōsa, xawen nî hoana ǃhobasen ǃkhaisa” di. (2Pet. 3:9) Elob ge khoena gere tsâba. ǁÎb ge gere ǂgao în khoena ǃhobasen tsî ǂhâbasa ǀkharaǀkharana dī ǁîb ǀgoraǃgâs nî hās aiǃâ.—Jes. 48:17, 18; Rom. 2:4.

Nētsēs tsînan ge khoena ǂhâǂhâsa ǃkhâikhoms hîna ǃhūbaib ǂhawase ra māhesa nî ǁnâuǀnam. ǃHūbaib aib hâ hînab ge Jesuba gere ǃkhâikhom ǃhūbaib ge ‘kai ǁgâiǀāb’ ǁaeb ga ra hā o, o nî hîgāgāhe di. (Mat. 24:21) ǁNā ǁaeba ǃoa ra ǁnaeǁgauseb ge ǁîb di saosabena nē kēbosa ge ǁguiǃāba în mû tae-en nî ǃâubasen tsî nî hōǃâsa nē ǁaeb ǃnâ. Jesub ge ǂhâǂhâsa ǁaxasigu hîna da nētsē ra mû ga ge ǁguiǃā.—Mat. 24:3-12; Luk. 21:10-13.

Nē kēbos ǀkha ra ǃgûǀhaoseb ge Jehovaba nēsi hoa khoena ra ǂkhâǃnâ în ǁîba ǃoaba tsî ǁnâuǀnam. ǁÎb ge ǂhâba hâ în khoena nēsi ǃgâi ûiga ūhâ tsî hānîǁaeb ǃnâ ǁîb ǀasa ǃhūbaib ǃnâ ûis di ǀkhaega hō. (2Pet. 3:13) ǁÎb mîmâidi ǃnâ ǂgomsa ǁgaus ǃaromab ge Jehovaba ûiba ra sâu haisi-amsa ge mā nēs ge ‘ǃgâiǂhôas gaosib disa’ Jesub ge nēs xa ge mî nēs ge “ǃhūbaib hoab ai nîra aoǁnâhe, hoa ǁaedi mîdansa ǃoa.” (Mat. 24:14) Elob ge ǁîb ǂgomǂgomsa ǃoaba-aona ge mîmā în nē haisi-amsa 240 ǃhūgu ǃnâ aoǁnâ. Jehovab ge ǂhâba hâ în ǂgui khoena ǁîb ǃkhâikhomsa ǁnâuǀnam tsî hānî ‘kai ǂoab’ xa tā tsâǀkhāhe.—Sef. 1:14, 15; 2:2, 3.

ǁNās ǀkha i ge ǂhâǂhâsa tama hâ dîsa Jehovab khoena ǂâusa ǁaeba ra māsa ǃkhâikhomde ǁnâuǀnamsa. ǃNaeǃkhaidi ge ra ǁgau ǁîb hoaǁae nēsa ra dīsa. Xawe ǂhâǂhâsa dîs ge hâ: Khoena Elob di ǃkhâikhomsa ǁaeb noxoba hâ hîna nî ǁnâuǀnam? Elob di haisi-am-aose da ge nî aiǃgû khoena huisa în nē ǃhūbaib di hîgāgāhes ǃnâ sâuhe ǁkhā.