1. Tae-i ǃaroma da Jehovaba hoase nî ǃoaba?

JEHOVAB ǀguiba da ge nî ǃoaba ǁîb ge a kuru da tsî ûiba a mā da amaga. (J.ǂHa. 4:11) Xawe i ge ǁkhōǁkhōsasiba hâ. Jehovaba da ga ǀnam tsî ǃgôaǃgâsiba ūhâ xawe i ge ǀnî hâ xūna sida ûib ǃnâ a ǂhâǂhâsa ǁkhā tsî da ge ǁîba hoase ǃoaba tide. Nēs mati nî īsa da ge nî ǁnâuǃā. ǂGurose da ge Jehovab ǀguiba ǃoabas tae-e ra ǂâibasensa nî ǃhoaǃgao.

2. Eksodus 34:14 ǃoagu da tae-e nî dī Jehovaba da ga hoase ǃoaba o?

² Elobmîs ǃnâ i ge Jehovaba hoase ǃoabasa ra ǂâibasen ǁîba da ge ǃgam ǀnamma nî ūhâba di. Jehovaba hoase ǃoabas ge ra ǂâibasen ǁîb ǀguiba da ge ra ǃoaba di. Khoe-i tamas ka io xū-e da ge mā-am tide ǁîb ǃkhaisa sida ǂgaob ǃnâ ūsa.—Khomai re Eksodus 34:14.

3. Tae-i ǃaroma da ǃgâi ǃaromade ūhâ Jehovaba ǀnams tide?

³ Jehovaba da ge ǃgâi ǃaromadi ǃgao ra ǃoaba. Tae-i ǃaroma? Nēs ǁîb xa da ge ǁkhāǁkhāsen amab ai a ǃgaoǃgaosa ǃkhais ǃgao. ǁÎb di ǃgâi ǀgaugu xa da ge ge ǁkhāǁkhāsen. Jehovab tae-i xa ǃgâiba-e tsî tae-i xa ǃgâiba-e tamasa da ge a ǂan tsî sida tsîna ǁkhā ǀgaub ǃnâ ra tsâ. ǁÎb ǂâibasens khoesib ǀkhab ūhâsa da ge ra ǁnâuǃā tsî ra ǂkhâǃnâ. ǁÎb ǀkha ǀhōsagusisa ūhâs di aiǂhanuba da ge kaise ra ǃgôaǃgâ. (Psa. 25:14) Sida kuru-aob  xa da ra ǁkhāǁkhāsen xūn hoan ge ǁîba ǃoa ra ǀgū kai da.—Jak. 4:8.

4. (a) ǁGâuaba tae-e ra sîsen-ū i da tā Jehovaba ǂgaoba xu ǀnam? (b) Tae-e da ne ǁkhāǁkhāǃâs ǃnâ nî ǃhoaǃgao?

⁴ ǁGâuab ge nē ǃhūbaiba ra ǂgaeǂgui nēs ǃaromab ge ra dī i da sida di turaga ǂhâǂhâsase mû tsî nēsa tā mâǃoa hō. (Efe. 2:1-3; 1Jhn. 5:19) ǁÎb ge Jehovab ǀguiba da nî ǀnamsa ǂgao tama hâ xawe ǀnî hâ xūn tsîna da nî ǀnamsa ra ǂhâba. Hā re i da ǀgam ǀgaukha ǁGâuab nēsa a dī ǁkhā kha xa ǃhoa. ǂGuroseb ge ra dī i da ǃkhūsisa ôa tsî ǀgamǁîseb ge ra dī i da ǃgâi tama ǁkhoaxa ǁaeba ūhâ.

5. Tae-i ǃaroma da mari-e ǀnamma omkhâibasa xu nî ǂgōsen?

⁵ Hoa da ge ǂâusa ǂû-i, ana da nî saran tsî ǃgâi hâ ǃkhai-i tsîna ra ūhâ ǂgao. Xawe da ge nî ǂanbasen i da tā mari-e ǀnamma omkhâiba. ǂGui khoen ge nētsē a “mariǃgunuxa” tsî mari-i a ǁama ǁkhā xūn tsîna a ǀnam. (2Tim. 3:2) Jesub ge ge ǂan i ǁîb saosaben ge mari-e ǀnamma nî omkhâiba di ǁnās ǀkha ge mî. “Khoe-i xare-i ge ǀgam ǀhonkhoekha a sîsenba ǁoa; ǀguiba i ge nî ǁkhan, tsî nauba i ge nî ǀnam, tsî ǀguib ai i ge nî ǂgāmâisen, tsî nauba i ge nî ǃharaxū. Elob tsî ǃkhūsib tsîkha du a sîsenba ǁoa.” (Mat. 6:24) Khoe-i hîna Jehovaba ra ǃoaba xawe nau ǀkhāb ai nē ǃhūbaib di ǃkhūsisa ra ôa i ge ǀgam ǀhonkhoekha ra ǃoaba. ǁÎ-i ge Jehovaba hoase ǃoaba tama hâ.

6. Tae-e da Jesub ge Laodiseaǁî ǀhaohâba ǃoa a mî mîde xu a ǁkhāǁkhāsen ǁkhā?

⁶ ǃKharu ge ǁaeb ǃnâ i ge Laodiseaǁî ǀhaohâb di ǁanina gere koasen mî rase: “ǃKhū ta hâ tsî xūxa ta a, o ta kom xū-i xare-e ǂhâba tamao.” Xawe Jehovab tsî  Jesub tsîkha di mûǁaen ge ge ‘ǁkhoa tama tsî ǀkhomǀkhomsa tsî ǀgâsa tsî ǂgī tsî ǀōǀkhā-i.’ Jesub ge ǃkhūn hâ ǃkhais ǃgao ge ǁnama nî tama hâ i xawe ǁîn di ǀnammi mari-en ūba hâb ge Jehovab ǀkhan ūhâ ǀhōsagusisa gere tsâǀkhā. (J.ǂHa. 3:14-17) Mû da ga ra o mari-e da ge ra ǀnam tsoatsoa di, o da ge ǃhaese xū-e nēs xa nî dī. (1Tim. 6:7, 8) Xū-e da ga dī tama ga ra io, o da ge ǀnîhâ xūn tsîna nî ǀnam tsoatsoa tsîb ge Jehovaba sida ǃoabasa ūǃoa tide. ǁÎb ge a ‘tauxa Elo.’ (Deu. 4:24) Mari-e mati sida ûib ǃnâ a ǂhâǂhâsa ǁkhā?

7-9. Tae-e da Davib di ǀon hâ ǀhaohâb ǃûi-aob di aiǁgausa xu a ǁkhāǁkhāsen ǁkhā?

⁷ Davib aiǁgaus xa ǂâi re, ǃgarise ra sîsen ǀhaohâb ǃûi-aob hîna Amerikab ǃnâ ra hâba. ǁÎb ge ra mî ǁîb ge kaise ge ǃgari sîsen-ao i di. Sîsenbab gere ǃkhais ge ǀgapi mari-e ra matare-e sîsen-e ge mā bi tsîb ge ǁîb ǃhūb ǃnâ ge ǂanǂansa ī dīb gere sîsenni ǃgao. “ǂGuro ta ge ge ǂâi hâ i nēn a Jehovaba xu ra hā ǀkhae di,” dib ge Daviba ra mî. Xawe nēsa amabes ǃnâ Jehovaba xu gere hā?

⁸ Davib ge ge mûǂan ǁîb sîsenni ge ǃgâi tama ǀgaub ǃnâ ǁîb ǀhōsagusis hînab Jehovab ǀkha ūhâsa gere tsâǀkhāsa. “ǀHaodi tsî aoǁnâ sîsenni ǃnâ ta hâ hîna ta ge ti sîsenni ǃgomsin xa gere ǂâi,” dib ge ra mî. “ǂGui mari-e ta gere kuru xawe ta ge ge ǂâiǂhansen tsoatsoa tsî ǃgomsina ti ǃgameb ǃnâs tsîna ge hōǃâ tsoatsoa.”

⁹ Davib ge ge mûǂan tae-i ǁîb ûib ǃnâ a ǂhâǂhâsa ǃkhaisab nî mîǁguisa. “Tita ge ge mîǁgui ti mâsiba ǀkharaǀkharasa,”  dib ge ra mî. Davib ge ǁîb di sîsen ǀgauba gere ǀkharaǀkhara ǂgao tsîb ge tae-eb ra dī ǂgaosa ǁîb ǀhōnkhoeba ge ǁgau. Nēsa mâ ǀamǂoasa ge hā-ū? Davib ge ǁîb sîsen-e ge ǂoaǃnâ. Tae-eb ge nēs xa dī? “Sao ra tsēs ai ta ge huiǃnâ ra aimâba-aose ge xoaǂgāsen,” dib ge ra mî. Kōǃgâsen ra nî ǃkhais ǃaroma ra ge Davib tsî ǁîb kaikhoes tsîna ǃanus di sîsen-e ra dī. ǁAeroba ǃkharu tsîb ge Daviba ge ǀoasa aimâba-ao kai tsîs ge ega ǁîb kaikhoes tsîna aimâba-ao sîsenni ǃnâ ge ǁhao bi. Nē khoe-aogura ge khoen ge dī ǂgao tama hâ i sîsen-e ra dī xawe i ge ǁîra ǃgao ǁîra ra dī sîsen-e ǂhâǂhâsa tama hâ. ǁÎra ra hōǂgā mari-i ge ǀoroǀorohe xawe ra ge ǁkhâb hoaba ǂhâ ra hâ mari-e ūhâ. ǁÎra ge Jehovaba ǂgurose ra mâi ǂgao tsîra ge ge ǁkhāǁkhāsen Jehovab ǁîb Gaosiba ǂgurose ra mâi khoena ra kōǃgâ ǃkhaisa.—Mat. 6:31-33.

10. Mati da sida di ǂgaoga a ǁkhauba ǁkhā?

¹⁰ Nēsi da ga ǂgui tamas ka io ǀoro mari-e ga ra ūhâ xawe da ge sida di ǂgaoga nî ǁkhauba. Mâ ǀgaub ǃnâ? Tā ǃKhūsiba ǀnamma omkhâiba re. Tsî tā sa sîsen-e ǂgurose mâi re Jehovab di ǃoabas xa. Mati du a ǂan nēs ga ra ī o? ǀNî dîdi hîna da a dîsen ǁkhā di ge: ‘ǀNî ǁaegu ai ta ǀhaodi tamas ka io aoǁnâ sîsen-i tawa ta hâ hîna ti sîsen-i xa ra ǂâi? Hoaǁae ta ǂâusa mari-e ta hānîǁaeb ǃnâ nî ūhâs xa ra ǂâi? Mari-i tsî ǃkhūsis tsîna ti ǃgameb ǃnâ ǃgomsina ra hā-ū? Nau khoen xa ǂhâǂhâsase mû-e tama hâ sîsen-e ta nî dī Jehovaba ǃoabas di ǁaeba i ga ra mā te o?’ (1Tim. 6:9-12) Nē dîde da ra ǃhoaǃgao hîna da ge sao ra-e ǂâis ǃnâ nî ūhâ, Jehovab ge a ǀnam da tsî ǁîba ǂgaoba xu ra ǃoaba khoena sao ra-e ra mîmâiba: “Tita ge ǁnāxū tsi tide, tsî ta satsa xu ūdawasen tide.” ǁNā-amagab ge apostel Pauluba ge xoa: “Tanisensa as xūǃgunuxasib ose ī.”—Heb. 13:5, 6.

11. ǁKhoaxa ǁaeba ūhâsa mati khoe-e a tsâǀkhā ǁkhā?

¹¹ Jehovab ge ûib ǃnâ da ǁkhoaxa ǁaeba nî ūhâsa ǂhâba hâ. Elobmîs ge ra mî “Khoeba kha ǃgâiba bi tama i hâ, ǂû tsîb nî ā ǃkhaisa, tsî ǀoms âb nî ǃgâiba ǂû ǃkhaisa xūreb âb ǃnâ.” (Aoǁn.  2:24) Xawe i ge ǃhūbaib ǁkhoaxasiga ǁgai sîsenǂûiba sida ai a ūhâ ǁkhā. Nēs ge a ǃaroma ǁkhā în ǂgui khoena Elobmîs ǂkhā hâ xūna ūǃoa tamas ka io ǀnam.

12. 1 Korinteǁîn 10:21, 22 ǃoagu da tae-i ǃaroma ǁkhoaxa ǁaeba ūhâs ǃnâ da ra dī xūna ǃgâise nî ǁhûi?

¹² Jehovab ǀguiba da ge hoase ra ǃoaba ǂgao, ǁnā-amaga da ge “ǃKhūb di tāb” tsî “ǁgâuagu di tāb” tsîn ǃnâ a amǃnâxa ǁoa. (Khomai re 1 Korinteǁîn 10:21, 22.) Khoe-i ǀkha da ga ǂûǀhaosa ūhâ o, os ge nēsa ǀhōsagusisa ra ǁgau. ǁNā-amaga da ge ǂkhabab, ǃgaib, ǁgauoǃnâsib tsî ǃgâi tama tanisen ǀgaugu tsîna ūhâ ǁkhoaxasigu ǃnâ da ga ǁhao o, o Elob di khākhoen ǀkha ra ǂûǀhao. Nēs ge sida ǀgui da tsâǀkhā tama hâ xawe Jehovab ǀkha da ūhâ ǀhōsagusis tsîna ra khôa.

13-14. Jakobub 1:14, 15 ǃoagu da tae-i ǃaroma ǃgâi tama turaga xu nî ǂgōsen? ǂKhō re.

¹³ Mâ ǀgaub ǃnâ i ǁkhoaxasiba ūhâsa ǂû-i ǀkha a ǀgōpeǀnōhe ǁkhā? ǂÛ da ga o, o da ge sida amǃnâs ǃnâ da ra ǂgā xūna a ǁhûi ǁkhā. Xawe ǂû-e da ga hāras khaoǃgâ da ge ǂû-i mâ sîsenǂûiba sida soros ai ūhâsa a ǁhûi ǁoa. ǃGâi ǂû-i ge ǃgâi ǂurusiba nî mā da xawe ǃgâi tama ǂû-i ge ǃgâi tama ǂurusiba nî mā da. Nēs mati ra tsâǀkhā da ǃkhaisa da ge ǁnā ǁae mû tide xawes ge nēsa ǁaeb ǀkha nî ī.

¹⁴ ǁKhā ǀgaub ǃnâ da ge ǁkhoaxa ǁaeba da ga ūhâ o, o sida ǂâi ǀgauba a ǁhûi ǁkhā. Xawe i ge ǁnās khaoǃgâ sida ra ǁhûi ǁkhoaxasiba sida ǂâi ǀgaub tsî tsâ ǀgaub tsîna a tsâǀkhā ǁkhā. ǃGâi ǁkhoaxasib ge nî khoakhoa da xawe ǃgâi tama ǁkhoaxasib ge nî khôa da. (Khomai re Jakobub 1:14, 15.) ǃGâi tama ǁkhoaxasib di sîsenǂûiba da ge ǁnā ǁaeb ai mû tide xawe da ge nēsa ǁaeb ra ī khami nî mû tsoatsoa. Elobmîs ge ra ǃkhâikhom: “Tā ǁhapu Elob ge ǃhōkaisen tamaba. Khoe-i ga tsoro-i hoa-i, ǁnā-e i kom ǁkhāti nîra ǃgaobaseno. ǁÎ-i ǁgans ai ga tsoro-i, ǁnā-i kom ǁgansa xu kāǁōsiba nîra ǃgaobaseno.” (Gal. 6:7, 8) Kaise i ge ǂhâǂhâsa i da Jehovab ǃhui hâ xūn hoana ūhâ ǁkhoaxasiba xu ǂgōsen.—Psa. 97:10.

15. Jehovaba mâ ǀkhaeba ge mā da ǁkhoaxa ǁaeba da nî ūhâse?

¹⁵ ǂGui Jehovab di ǃoaba-aon ge JW Broadcastingsa kōs xa kaise ǃgâibahe nēs ge sida internets ai-īsiǂhôaǂgaresa. Marilyn di ǀon hâ ǃgâsas ge ra mî: “JW Broadcastings ge ge hui te i ta ǃgâi ǂâi ǀgauba ūhâ tsî ǃgâi sîsenǂûiba tita ai ūhâ.” ǀGuri tsâsen tamas ka io ta ga ǂkhabuǂâi o, o ta ge ǂkhâǃnâ te ra ǃhoas tamas ka io ǁGoas ǃoabasa ra ôa i ta kō. Nēs ge Jehovab tsî ǁîb ǀapeǂhomis tsîna ǃoa ra ǀgū kai te. JW Broadcastings ge ti ûiba hoase ge ǀkharaǀkhara.” Jehovab ǀkhaeba xu du ra ǀama? JW Broadcastings ge mâ ǁkhâb hoaba ǀasa xū-e ūhâ nēs ge audiogu, vidiogu tsî ǂkhâǃnâ da ra amdi hîna da mâ ǃkhai i hoa i tsî ǁae i ais tsîna a ǃgâ ǁkhāde ūhâ.

16-17. Mati da ǁkhoaxa ǁaeba ǀnōsa ǀgaub ǃnâ ūhâ ǁkhā tsî nēsa da mati a dī ǁkhā?

¹⁶ ǂAnbasen da ge nî tae-e da ǁkhoaxa ǁaeba ūhâs ǃnâ ra dīsa tsî matikō ǁaeba da nēs ai ra ǂkhôasa. ǂAn tama da ga ra io, o da ge ǃnāsa ǁaeba ǁkhoaxa ǁaeba ūhâs ai nî ǂkhôa Jehovaba ǃoabas ais ose. ǂGuin ge ǁkhoaxa ǁaeba ǀnōsa ǀgaub ǃnâ a ūhâ ǁoa. 18 Kurixa ǃgâsas hîna Abigail di ǀon hâs ge ra mî: “Ai-īsiǂhôaǂgaresa  kōs ge sâsase ra tsâ kai te ǀhawe tsēs ǀnams ai. Xawe ǂan tama ta ga ra io, o ta ge ǂgui irga ai-īsiǂhôaǂgaresa ra kō.” Samuel di ǀon hâ ǂkham ǃgâsab ge ra mî: “Kaise ta ge ǂgui ǁaeba vidioga internets ai kōs ai ra ǂkhôa. ǀGui vidioba kōs ǀkha ta ge ra tsoatsoa tsî i ge ega ǃnona tamas ka io haka īrga ra ǃkharu vidioga ta noxoba ra kō hîna.”

¹⁷ Mati da ǀnōsa ǁkhoaxa ǁaeba nî ūhâ? ǂGurose da ge matikō ǁaeba da ǁkhoaxa ǁaeba ūhâs ai ra ǂkhôasa nî ǂanǂûi. Tae-i ǃaroma da nēsa wekheba dītsâ tama hâba? Kalenders ai xoa re matikō ǁaeba du ai-īsiǂhôaǂgaresa ra kōs, internets ai xūna ra kōs tsî gamena ǁâǁawab ai ra ǀhurusa. ǃNāsa ǁaeba du ga nē xūn ai ǂkhôa o, o ǀkharaǀkhara-e dī re. ǁAeba ǁamaǂûi re i ǂhâǂhâsa xūna ǂgurose dī tsî ǁnās khaoǃgâ ǁkhoaxa ǁaeba ūhâ. Sao rase Jehovaba ǂgan re îb hui du i du mîǁgui du hâ xū-e dī ǁkhā. ǁNā ǀgaub ǃnâ du ge ǁaeb tsî ǁkhāsib tsîna nî ūhâ Elobmîsa ôaǃnâs, omaris ǃoabasa dīs, ǀhaodi ǃgao aiǂhomisen tsî ǀhaode ǃoa īs tsî aoǁnâ sîsen-e dīs tsîna. Nēs tsîn ge a dī ǁkhā i du ǁkhoaxa ǁaeba ǀnōsa ǀgaub ǃnâ mû Jehovaba du ǂgurose ra mâi amaga.

18-19. Mati da Jehovaba da ǂgaob hoab ǀkha ra ǃoabasa a ǁgau ǁkhā?

¹⁸ ǁGâuab ǃhūbaib di ǀams tsî ǀasa ǃhūbaib hîna nî hāb xab ge xoa toa o, ob ge apostel Petruba ge mî: “ǁNā-amaga, ǀnamsabedo, î du nēna ra ǃâubasense ǃhaeǃhaesen, ǂnao-ose tsî ūose du nî ǁîb xa hōhese ǂkhîb ǃnâ.” (2Pet. 3:14) Nē ǁgaraga da ga ǁnâuǀnam tsî ǃgarise ǁgūtsâ o Jehovab ǂgaoǀkhā hâ khami ûisa, o da ge ra ǁgau ǁîba da hoase ra ǃoabasa.

¹⁹ Satanni tsî ǁîb di ǃhūbaib tsîn ge ra dī i da ǀnî hâ xūna ǂgurose sida ûigu ǃnâ mâi Jehovab ose. (Luk. 4:13) ǃGomsina da ga ra hōǃâ xawe da ge khoe-i tamas ka io xū-e mā-am tide Jehovab ǃkhaisa sida ǂgaob ǃnâ ūsa. Jehovaba da ge ǁnā aiǂhanub ǁîb ǀguiba ǀguri ǃoabas tiba ra mā ǂgao.