1. Jehovaba tae-e a dī ǁkhā ǁîb ǂâisa dīǀoaǀoas ǃnâ?

JEHOVAB ge ǂhâb hâ xū kai ǁkhā ǁîb ǂâisa dīǀoaǀoas ǃaroma. Aiǁgause, Jehovab ge a ǁkhāǁkhā-ao, ǁkhaeǂgao-ao, aoǁnâ-ao tsî a ǃgâiǂhôas tani-ao ǀoro xūn ǁîb dī ǁkhān xa da ga ǃhoa o. (Jes. 48:17; 2Kor. 7:6; Gal. 3:8) Xaweb ge noxoba ǁaen ai khoena ra sîsen-ū ǁîb ǂâisa dīs ǃnâ. (Mat. 24:14; 28:19, 20; 2Kor. 1:3, 4) Jehovab ge sada ǀgui i tsîna gā-aisib tsî ǀgaib tsîna a mā ǁkhā, i da ǂhâb hâ xū-e ǁîb ǂâisa dīǀoaǀoas ǃaroma dī. Nēs ge Jehovab ǀons ǂâibasensa ǂgui khoen xa i ra ǁnâuǃāhe khami.

2. (a) Tae-i ǃaroma da ǁaen ai ǂgom tama hâ Jehovab noxoba ra sîsen-ū da ǃkhaisa? (b) Tae-e da nē ǁkhāǁkhāǃâs ǃnâ nî ǃhoaǃgao?

² Hoa da ge Jehovab xa ra sîsen-ūhe ǂgao, xawen ge ǀnîna ǁaen ai Jehovab xan sîsen-ūhe tama hâ khami a tsâ ǁkhā. Tae-i ǃaroma? ǁÎn ge ǁîn kurigu, mâsib tsî ǁkhāsib tsîn xa ǃaroma-e hâse a tsâ ǁkhā ǁîn Jehovaba dība bin gere ǂgui xūna a dība ǁoa di. ǀNîn ge dīn da xūn ǀkha a ǂkhîǂâixa ǁkhā tsî ǃnāsa-e dī ǂgao tide. Nē ǁkhāǁkhāǃâs ǃnâ da ge nî mû matib Jehovaba ǂhâ da hâ ǀgaiba nî mā dasa ǁîb ǂâisa dīǀoaǀoas ǃnâ. Tsî da ge Elobmîs aiǁgaudi aogu tsî taradi hîna ge Jehovab xa ǁkhāsib tsî ǀgaib tsîna ǁîb ǂâisa dīǀoaǀoas ǃnâ a mā-en xas tsîna nî ǃhoa. ǀUnigase da ge mati da Jehovaba nî mā-am îb sîsen-ū da ǀgauba nî ǃhoaǃgao.

3. Filipeǁîn 2:13 ǃnâ i ra ǁgau-e khamib Jehovaba mati ǁkhāsiba a mā da ǁkhā xū-e dīs tiba?

³ Khomai re Filipeǁîn 2:13. * Jehovab ge xū-e dīs ǁkhāsiba a mā da ǁkhā. ǁÎba mati nēsa a dī ǁkhā? Aiǁgause, da ge sada ǀhaohâb ǃnâ hâ ǃgâsa-i ǂhâsib ǃnâ hâ tamas ka io i dī-e nî xū-i hâsa ra mûǂan. Tamas ka io, o da ge ǀhaohâb ǃûi-aogu ǀapeǂhumisa xu hâ sîǂkhanisa ra khomai hîna ra ǁnâu huib ǀnî hâ ǃkhai-i ai a ǂhâsa ǃkhaisa. O da ge a dîsen ǁkhā, ‘Mati ta nē ǂhâsib ǃnâ a hui ǁkhā?’ Tamas ka io da ge ǃgom sîsen-e a māhe ǁkhā tsî a ǂâi ǁkhā mati ta tita nē sîsen-e nî dīhō. Tamas ka io da ge ǃâ-e Elobmîs ǃnâ khomai tsî a ǂâi ǁkhā, ‘mati ta nē xū-e ti ûib ǃnâ ûiǂûi tsî nau khoen tsîna a hui ǁkhā?’ Jehovab ge xū-e dīs ǃnâ ǁgari da tide. Xawe da ga ǂâi o, o mati da nē xū-e a dī ǁkhā ob ge Jehovaba ǁkhāsiba a mā da ǁkhā ǁnā xū-e dīs diba.

4. Jehovaba mati ǀgaiba a mā da ǁkhā?

⁴ Jehovab ge xū-e dīs ǀgaib tsîna a mā da ǁkhā. (Jes. 40:29) Matib nēsa nî dī? ǁÎb ge ǁîb di ǃanu gagaba a mā da ǁkhā ǂkhâǃnâ das ǃaroma. (Eks. 35:30-35) ǁÎb di ǀapeǂhumis ǃnâ-ūb ge Jehovaba a ǁkhāǁkhā da ǁkhā mati ǀnî xūna dīsa. Xū-i ra dī-e ǀgauba du ga ǀū o, o huiba ǂgan re. ǃNorasase tsâ re sada mā ǀnamxa ǀhomsi ǁGûb tsîn ai huiba ǂgansa ǁîb ge ‘ǃnāǂamsase ǀgaiba’ ra mā. (2Kor. 4:7; Luk. 11:13) ǂGui aogu tsî taradi aiǁgaudi tsînas ge Elobmîsa ūhâ hînab ge Jehovaba ǁkhāsib tsî ǀgaib tsîna a mān dide. Nē aiǁgaude da ra ǃhoaǃgao hîna ǂâi re matib Jehovaba ǀnî ǁkhā ǀgaugu ǃnâ sadu tsîna a sîsen-ū ǁkhā ǀgausa.

5. Tae-e da Jehovab ge Moseba sîsen-ū ǀgaub ǁîb khoena huis ǃnâba xu ra ǁkhāǁkhāsen?

⁵ Jehovab ge Moseba ge hui îb Israelǁaes di ǃnoraǃnora-ao kai. Jehovaba nēsa mâǁae ge dī? Nēsab “Egipteǁîn di gā-aisib” ǃnâb ge Moseba ǁkhāǁkhāhe toas khaoǃgâ ge dī? (ǃNǃkh. 7:22-25) Hî-î, Jehovab ge nēsa Mosebab ge ǃgamǃgamsenxa tsî tsauraǂgaoxa khoe kais khaoǃgâ ge dī. (ǃNǃkh. 7:30, 34-36) Jehovab ge Moseba ǁkhoaǂgaosiba ge mā îb ǀgaisa Gao-aob Egipteb dib aiǃâ mâ ǁkhā. (Eks. 9:13-19) Tae-e da ǁaeb tsî ǀgaub hînab ge Jehovaba Moseba sîsen-ūba xu ra ǁkhāǁkhāsen? Jehovab ge ǁnān hîna ǁîb ǀgauga ǁgau tsî ǁîb ai ra ǂgomaiǂnûina ra sîsen-ū.—Fil. 4:13.

6. Tae-e da Jehovab ge Barsilaiba Gao-aob Daviba huis ǃnâ-ū a sîsen-ū ǀgauba xu a ǁkhāǁkhāsen ǁkhā?

⁶ Kurina ǃkharu hâseb ge Jehovaba Barsilaiba ge sîsen-ū Gao-aob Daviba huis ǃnâ. Davib tsî nau khoen tsîn ge ‘ǃâ tsî ge ǁgâ hâ i’ ǁîb ôab Absaloma xun gere ǃkhoe hîna. Barsilaib hîna ge kaise kaira hâ îb tsî ǀnî hân tsîn ge ǁîn ûiga ǁkhōǁkhōsasib ǃnâ mâi tsî Davib tsî ǁîb ǀkha ge hâ i khoen tsîna ge hui. Barsilaib ge kairab hâ ǃkhais ǃaroma ge ǂâi tama hâ i Jehovab ǃaruǀî sîsen-ū bi tide di. Xaweb ge ūb ge hâ i xūna sîsen-ū tsî Elob di ǃoaba-aona ge hui. (2Sam. 17:27-29) Tae-e da nēsa xu ra ǁkhāǁkhāsen? Kaise da ga kaira xaweb ge Jehovaba nî  sîsen-ū da sada ǃgâsan di ǂhâsigu ǃnâ huis ǃnâ-ū, ǀgūse hân tsî ǃnūse hân tsîna ǃkhōǂgā hâse. (ǂKhm. 3:27, 28; 19:17) Aitsama da ga nēsa dī ǁoa xawe da ge marisise a hui ǁkhā, în sada ǃgâsan di ǂhâsiga nēs ǃnâ-ū kōǃgâhe ǁkhā.—2Kor. 8:14, 15; 9:11.

7. Jehovaba mati Simeona ge sîsen-ū tsî nēsa mati ra ǂkhâǃnâ da?

⁷ Jehovab ge Jerusalems ǃnâ gere hâ ǂgomǂgomsa Simeona ge mîba, ǁîb Mesiabab mû tama hâ hîna ǁō tide di. Nē mîmâis ge Simeona ge ǂkhâǃnâ Mesiabab ge ǂgui kuriga ǃâu hâ i amaga. Jehovab ge Simeona ǁîb di ǂgoms tsî mâǀgaibesib amsi ge ǀkhae. ǀGui tsēb ge ‘gagab xa’ daoǁgau-e hâse tempeli ǃnâ ge ǂgâ. ǁNāpab ge Jesuba ǂkham ǀgôarob ase ge mû, Jehovab ge Simeona ge sîsen-ū îb kēbosa nē ǂkham ǀgôab hîna nî Xristu kaib xa mā. (Luk. 2:25-35) Simeoni ge Jesub ǁîb aoǁnâ sîsenni ǀkha nî tsoatsoas aiǃâ ge ǁō, ǁîb ge Jehovaba gere gangan sîsen-ū bib ge ǃkhais ǃaroma tsîb ge ǂgui ǃgâi ǀkhaega hānîǁaeb ǃnâ nî hō. ǀAsa ǃhūbaib ǃnâb ge nē aoba nî mû matis Jesub ǂgaeǂguisa ǃhūbaib omaridi hoade nî ǀkhae ǀgausa. (Gen. 22:18) Sada tsîn ge Jehovab ǁîb ǃoabas ǃnâ ra mā da aiǂhanugu hoaga ra ǃgôaǃgâ.

8. Jehovaba mati Barnababab ge sîsen-ū khami a sîsen-ū da ǁkhā?

⁸ ǃKharu ge ǁaeb ǃnâb ge Joseba ge māsenxa i Jehovab xa sîsen-ūhes ǃnâ. (ǃNǃkh. 4:36, 37) Joseb ge ge ǃgâi ǁkhaeǂgao-ao ī, nēs ǃaroma gu ge nau apostelga Barnaba di ge ǂgai bi, nēs ge “ǁkhaeǂgaos di ôab” di ra ǂâibasen. Aiǁgause, Saulub ge Xristeǁî kai o, on ge nau ǃgâsana ǁîba ǀgūsa gere ǃao, ǀhaohâgab gere saoǃgon xui-ao. Xaweb ge Barnababa Sauluba ǁkhaeǂgao tsî ge hui, Saulub ge nēsa kaise ge ǃgôaǃgâ. (ǃNǃkh. 9:21, 26-28) Jerusalems ǀhaohâb ǃûi-aogu ge ǃnūse gere hâ ǃgâsana gere ǁkhaeǂgao ǂgao, hîna Antioxias tsî Siriab ǃnâ gere hâna. Ham-en ge sî? Barnabab. ǁÎn ge ǃgâise ge ǁhûi. Mîbahe da ge ra Barnabab “ǁîn hoana gere ǁnama, ǁaposa ǂgaob di ǂâibasens ǀkhan nî ǃKhūb tawa hâhâga.” (ǃNǃkh. 11:22-24) ǁKhā ǀgaub ǃnâb ge Jehovaba sada tsîna nētsē a hui ǁkhā î da nau Xristeǁîn ǃoa-ai ‘ǁkhaeǂgaos di ôa’ kai. Aiǁgauseb ge ǁōb ǃnâ ǀgūkhoe-e ǂoaǃnâ hâ khoe-e ǁkhaeǂgaos amsi a sîsen-ū da ǁkhā. Tamas ka iob ge a huida ǁkhā ǀaesen hâ ǃgâsa-e ǁkhami tamas ka io ǃgâi tama ǁaeb ǃnâ ra ǃkharu ǃgâsa-i ǀkha ǃgâi mîde ǀgoragus ǃnâ. Jehovaba du nî mā-am îb Barnababab ge sîsen-ū khami sadu tsîna sîsen-ū?—1Tes. 5:14.

9. Tae-e da Jehovab ge Vasily di ǀon hâ ǃgâsaba hui îb gagasi ǀhaohâb ǃûi-ao kai ǀgauba xu a ǁkhāǁkhāsen ǁkhā?

⁹ Jehovab ge Vasily di ǀon hâ ǃgâsaba ge hui îb gagasi ǀhaohâb ǃûi-ao kai. Vasily ge ge 26 kurixa i ǀhaohâb ǃûi-ao kaib ge o, ǁîb ge gere ǂâi ǂâusa ǂansab ūhâ tama tsîb ǃgomsin ǃnâ ra ǃkharu ǃgâsana hui hō tide di. ǁÎb ge ǂâusa ǂansa ūhâ ǀhaohâb ǃûi-aogu xa ge hui-e tsî Gaosib aoǁnâ-aogu skola ǃoas tsîna ge ī. Vasily ge ǃgarise gere sîsen ǀkharaǀkharana dīs ǃnâ. Aiǁgause, ǂkhari xūron hînab dī ǁkhānab ge ge xoamâi. Nē xūnab gere dī khamib ge ǁîb di ǃaob tsâsiba gere bē. ǁÎb ge ra mî: “ǃKharu ge ǁae ta gere ǃao xūn ge nēsi kai ǂkhîba ra hā-ūba te. ǃGâsa-e huis ǃnâb ga Jehovaba ǂhanu xoaǀgorasa  hōs ǀkha a hui te o, o ta ge kaise ra ǃgâiaǂgao.” ǃGâsado, māsenxase du ga Vasily khami Jehovab xa sîsen-ūhesa mā-am o, ob ge ǁîba nî hui du kai aiǂhanuga ǀhaohâb ǃnâ kōǃgâs ǀkha.

10. Abigailsa tae-e ge dī tsî ǁîs di aiǁgausa xu da tae-e ra ǁkhāǁkhāsen?

¹⁰ Davib tsî ǁîb di ǃgāgu tsîn ge Gao-aob Sauli xa gere saoǃgonhe tsî huiba ge ǂhâ hâ i. Davib ǃgāgu ge Nabal di ǀon hâ khoeb ai ǂû-e ge ǂgan, ūb ge hâ i xū i hoa-e. ǁÎgu ge ǃgarob ai gu Nabali gūna gere kōǃgâ amaga gu a ǂgan ǁkhā di ge ǂâi. Xaweb ge ǁîǃgôasenxa Nabala ge ǂkhā. Davib ge kaise nēs xa ǁaixa tsî Nabali tsî ǁîb di aore ǃgāgu tsîn hoana gere ǃgam ǂgao. (1Sam. 25:3-13, 22) Xawe Nabali kaikhoes Abigails ge ǁnâuǃāxa tsî kaise ge îsa ī. Xawes ge kai ǁkhoaǂgaosiba ǁgau tsî Davib ǂaidi tawa ge ǁnāǁgoe tsî ge ǀkhomma bi îb Nabali tsî ǁîb aogu tsîna tā ǃgam. ǁÎs ge ǃgâi ǀgaub ǃnâ ge mîba bi îb Jehovab di huib ai ǂgomaiǂnûi. Abigails di ǃgamǃgamsenxasib tsî ǃgâise ǁhûisa mîdi tsîn ge Davib ǂgaoba ge tsâǀkhā. ǁÎb ge ge mûǂan ǁîs Jehovab xa sîhe hâ ǃkhaisa. (1Sam. 25:23-28, 32-34) Abigails ge ǃgâi ǀgauga ge ūhâ i, nēs ǃaromab ge Jehovaba ǁîsa ge sîsen-ū. ǁKhā ǀgaub ǃnâb ge Jehovaba ǃgâsadi hîna nē ǀgauga ūhâde a sîsen-ū ǁkhā i di ǁîdi omaridi tsî ǀhaohâb tsîna ǂnubikhâi.—ǂKhm. 24:3; Tit. 2:3-5.

11. Salummi ǀgôade tae-e ge dī tsî ham-e nētsē ǁîdi aiǁgausa ra sao?

¹¹ ǂGui kuriga ǃkharu hâse di ge Salummi ǀgôade Jerusalems mirga dī-ūnus ǃnâ gere sîsen-ū-e khoen ǁaegu ge hâ i. (Neh. 2:20; 3:12) ǁÎdi ǁgûb ge Gao-ao i xawe di ge Salummi ǀgôade māsenxase nē ǃgom sîsena gere dī. (Neh. 4:15-18) ǁÎdi ge Tekoaǁî aogu khami ge ī tama hâ i hîna xū-e ‘ǃKhūb di ǃoabas ǃnâ ge dī ǂgao tama hâ’ i ga. (Neh. 3:5) Salummi ǀgôadi gere hōǃâ ǂkhîb xa ǂâi re, nē sîsenni ge 52 tsēdi ǃnâ toa o. (Neh. 6:15) Sada tsēdi ǃnâ di ge māsenxa ǃgâsade a ǂkhî ǀō-aisa aiǂhanugu ǀHû-omga om tsî kōǃgâs digu ǃnâ huis ǀkha. Nē māsenxa, ǁkhoaǂgao ǂgomǂgomsa ǃgâsade da ge ǂhâ hâ nē sîsenni aiǃgûs ǀkha huis ǃnâ.

12. Jehovaba mati Tabitasab ge sîsen-ū khami a sîsen-ū da ǁkhā?

¹² Jehovab ge Tabitasa ge ǂkhâǃnâ is ‘ǃgâidī tsî ǀgâsana hui’, ǃgōsase ǃoatarade. (ǃNǃkh. 9:36) ǁÎs di māsenxasib tsî khoexaǃnâsib ǃaroman ge ǂguina ǁōs ge o, o gere ā. Xawen ge kaise ge ǂkhî i apostel Petrub ge ǁîsa ǁōba xu khâisa mā o. (ǃNǃkh. 9:39-41) Tabitasa xu da tae-e ra ǁkhāǁkhāsen? Nēsi da ga ǂkham tamas ka io kaira xawe da ge hoa da xū-e a dī ǁkhā sada ǃgâsana huis ǃnâ.—Heb. 13:16.

13. Matis ge taoxa ǃgâsas Rut di ǀon hâsa Jehovab xa sîsen-ūhe tsî tae-es ge mî?

¹³ Taoxa ǃgâsas Rut di ǀon hâs ge gere sîsabe kai ǂgao. ǂKhariros ge ī o, os ge ǁîsa omsa xu oms ǀkha ǃhaese gere sîsen îs khoena ǂkhaniroga mā ǁkhā ga. “Tita ge nē sîsenni xa kaise ge ǃgâibahe ī,” dis ge ra mî. Xawe dao-ams ai khoen ǀkha ǃhoa tsî ǁîna Elob Gaosib xa mîbas ge kaise ǁîsa ge ǃgomba i. Ruts ge taoxas ge ī xawe 18 kurixas ge o, o ge aimâba-ao kai. 1946ǁÎ kuris ge Watchtower Bible Gilead skola ge ǁhaoǃnâ tsî ega Hawaiib  tsî Japani ǃnâ gere ǃoaba. Jehovab ge ǁîsa ge sîsen-ū îs kai aoǁnâ sîsena ǁnā ǃhūgu ǃnâ dī. 80 Kurigas aoǁnâ sîsen-e dī hâ hînas ge Rutsa ge mî: “Jehovab ge hoaǁae gere ǂkhâǃnâ te. ǁÎb ge ti taoxasiba ǀamsa hōbas ǀkha ge hui te. Tita ge ra ǂgom Jehovab ǁîb ǃnâ ǂgomǃgâsiba ūhâ khoe-i hoa-e a sîsen-ū ǁkhā di.”

14. Koloseǁîn 1:29 ǃoagu da tae-e nî dī Jehovab xa da ga sîsen-ūhe ǂgao o?

¹⁴ Kurigu ǃnâb ge Jehovaba ǁîb ǃoaba-aona ǃkharagagu ǀgaugu ǃnâ ge sîsen-ū. Jehovaba tae-e dīs ǁkhāsiba a mā du ǁkha? Nēs ge sada māsenxasiba xu hâ. (Khomai re Koloseǁîn 1:29.) Māsenxa du ga o, ob ge Jehovaba sao ra xūna dīs ǀkha a hui du ǁkhā, ǁkhoaǂgao aoǁnâ-ao kais, ǃgâi ǁkhāǁkhā-ao kais, ǃgâi ǁkhaeǂgao-ao kais, ǃgarise ra sîsen khoe-i tsî ǃgâi ǀhōsa i.

15. 1 Timoteub 4:12, 15 ǃnâ i ra ǁgau-e khami gu ǂkham ǃgâsaga Jehovaba tae-e nî ǀkhomma hui gusa îgu dī?

¹⁵ ǂKham ǃgâsagu nēsi ra kaikhâi ga mati a hui ǁkhā? Kai ǀgaiba ūhâ ǃgâsagu ge ǀhaohâb hui-ao kai tsî ǀhaohâb ǃnâ a hui ǁkhā. ǀNî ǀhaohâgu ǃnâ gu ge ǀhaohâb ǃûi-aoga, ǀhaohâb hui-aogu xa a ǂgui. ǀNî ǂkham ǃgâsaga māsenxase ǀhaohâb ǃnâ ǀnî aiǂhanuga a ū ǁkhā? ǀNî ǃgâsagu ge ǁaen ai ra mî, “ǁÎgu ge a ǂkhî aoǁnâ-aose ǀgui Jehovaba ǃoabasa di.” Nēti du ga tsâ o, Jehovaba ǀkhomma re îb hui du ǀhaohâb hui-ao kais di ǁkhoreba omkhâisa tsî ǀnammi ǀkha ǁîba ǃoabasa. (Aoǁn. 12:1) Sadu huib ge ǂhâsa.—Khomai re 1 Timoteub 4:12, 15.

16. Jehovaba da tae-e nî ǂgan tsî tae-i ǃaroma?

¹⁶ Jehovab ge ǁîb di ǂâisa dīǀoaǀoas ǃnâ, ǂhâb hâ xū-i hoa-e a dī kai da ǁkhā. Nēs ǃaroma māsenxasib tsî ǀgaib tsîna ǂgan re, ǁîb di sîsena dīs ǃaroma. ǂKham tamas ka io da ga kaira ī xawe da ge nēsi sada di ǀgaib tsî xūn tsîna ra sîsen-ū ǂgao Jehovaba ǃoabas ǃnâ. (Aoǁn. 9:10) Jehovaba da ga sada ǀgaiba ǁîba ǃoabas ǃnâ mā o, o tā ǃhaese tita ge nē xū-e a dī ǁoa di mî tsî ǀû re. Kai aiǂhanub ge sada ǀnamxaǃnâ ǁGûba dība bi ǁkhā da a xūn hoana dība tsî ǁnās ǃnâ-ū ǂkhaisiba mā bisa.