1-2. (a) ǃHūbaib di ǂgaeǂgui-aoga ǀgūǁae tae-i ǂanǂansa nî dī? (b) Mâ dîde da nî ǃeream?

ǂÂI RE ǃhūbaib ǂgaeǂgui-aogu ga “ǂkhîb ge hâ tsî tsūǃgâ-i a ǀkhai” di hâ ǂanǂansa dī o. ǁÎgu ge a koasen ǁkhā ǃhūbaib ge kaise a ǃnorasa di. Tsî ǁîgu ǃhūbaib di ǃgomsin hoana ǀamsa a hā-ūba ǁkhā khami nî mûsen kai. Xawe gu ge ǁîga amabes ǃnâ ǁkhāsiba ūhâ tama hâ ī nî xūna ǀamsa hā-ūbasa. Tae-i ǃaromasa nēsa? Elobmîs kēbodi ǃoagu i ge ‘ǃhae ǁgaoǁgaosi-e ǁîn ǂama nîra hā . . . tsîn ge nēsa ǁhâxū tide.’—1Tes. 5:3.

² ǂHâǂhâsa dîdi hîna nî ǃeream-e di ge: Tae-e “kai ǁgâiǀāb” ǁaeb ǃnâ nî ī? Jehovaba tae-e sida xu nē ǁaeb ǃnâ nî ǃâubasen? Tsî mati da nēsi nî aiǂhomisen kai ǁgâiǀāb ǁaeb ǃnâ ǂgomǂgomsase hâs ǃgao?—Mat. 24:21.

3. ǂHaiǂhais 17:5, 15-18 ǃoagub Eloba mati “Babilons kaisa” nî hîgāgā?

³ Khomai re ǂHaiǂhais 17:5, 15-18. ‘Babilons kais’ ge nî hîgāgāhe. Tsoatsoas ǃnâ i goro mîhe khami i ge ǃhaode ī nî xūna ǀam kai tide. Tae-i ǃaroma? “Elob ge ǁîgu di ǂgaogu ǃnâ mā xui-ao, ǁîb di ǂâisa gu nî dīsa.” Nēsa  tae-e ǃkhōǂgā hâ? Nēs ge hoa ama tama ǂgomdi tsî Xristeǁîn ase ra ǁgausen khoen tsîna hîgāgāsa ǃkhōǂgā hâ. * Elob ge ǁîb di ǂâisa ‘disi ǁnâgu’ ‘skarlakǀapa ǀgurub’ digu di ǂgaob ǃnâ nî ǂgā. Nē disi ǁnâgu ge hoa ǂhanugu hîna United Nationsa ra ǂkhâǃnâga ra ǂnûǁkhaeba. (J.ǂHa. 17:3, 11-13; 18:8) Nē ǂhanugu ga ama tama ǂgomde ǁnāǂam o, o i ge kai ǁgâiǀāba nî tsoatsoa. Nēs ge kaise nî ǁkhōǁkhōsa i tsî ǃhūbaib ǂhawase hâ khoen hoana nî tsâǀkhā.

4. (a) ǃHaode tae-i ǃaromasa nî mā ama tama ǂgomde ǁnāǂams ǃgao? (b) Ama tama ǂgomdi ǁani ge i khoena tae-e nî dī?

⁴ ǀŪ da ge a ǃhaodi mâ ǃaromasa nî māsa Babilons kaisan tae-i ǃaroma ra ǁnāǂamsa. ǁÎn ge ǀnîsi nî mî ama tama ǂgomdi ge ra ǃaroma i-i ǃhaode tā ǂkhîba ūhâ tsî hoaǁae ǂgīǂgōsi xūn ǃnâ ǃâ-e ra ūhâ di. Tamas ka ion ge ǀnîsi nî mî ama tama ǂgomdi ge ǃkhūsib tsî xūn tsîna ra ǀhaoǀhaobasen di. (J.ǂHa. 18:3, 7) ǃHaodi ga ama tama ǂgomde ǁnāǂam o, o i ge ama tama ǂgomdi ǁanin hoana hîgāgāhe tide. Xawe ǃhaodi ge ama tama ǂgomdi ǀapeǂhumidi hoade nî hîgāgā. Nē ǀapeǂhumidi ga hîgāgāhe o, on ge nē ǀapeǂhomidi ǁani ge i khoena nî mî nē ǀapeǂhumidi ge mîmâin ge hâ i xūna ge dī tama hâ i di tsî ǁîn ǀkha dī xū-e ūhâ ǂgao tide.

5. Jehovaba tae-e kai ǁgâiǀāb xa ge mîmâi tsî tae-i ǃaroma?

⁵ Elobmîs ge ǁgau tama hâ mâ ǁaes Babilons kaisa nî hîgāgāhesa xawe da ge a ǂan nēs ǀgūǁae nî īsa. (J.ǂHa. 18:10, 21) Jehovab ge ge mîmâi kai ǁgâiǀāb ‘tsēdeb ge nî ǃnubuǃnubu di’ i-i ǁîb ǃkhōǂûibasenhe hâ khoen tsî ama ǂgoms tsîna sâuhe. (Mrk. 13:19, 20) Jehovaba tae-e sida xu nî ǃâubasen kai ǁgâiǀāb tsî Armagedons ǁaeb ǃnâ?

6. Ama tama ǂgomdi ǃâ tama īs ǂam-ai da tae-e nî dī?

⁶ ǂOa goro ǁkhāǁkhāǃâs ǃnâ da goro ǃhoaǃgao khamib ge Jehovaba ǁîb ǃoaba-aon Babilons kais di ǃâ tidesa ra ǃâubasen. Xawe Babilons kais di ǃâ tama īs ǀguis ge ǂâu tama hâ. Mîǁgui da ge nî Jehovaba ǃoaba ǀgarasa. ǀGam ǀgaukha nēsa da a dī ǁkhā kha xa ǂâi re.

7. (a) Mati da ǂgomǂgomsase Jehovab di ǁgaraga nî ǁnâuǀnam? (b) Tae-i ǃaromas Hebreǁîn 10:24, 25 tsîna ra mî ǀhûǀhao da ge nî di tsî nēsa tae-i ǃaroma nēsi a ǂhâǂhâsa?

⁷ ǂGurose da ge ǂgomǂgomsase Jehovab di ǁgaraga nî ǁnâuǀnam. ǃHūbaib di ǁgai tanisen ǀgauba da ge ūǃoa ǂgao tama hâ. Aiǁgause da ge ǁgauoǃnâ ǁgoe-ūguba ūǃoa tama hâ nēs ge aorekhoegu tsî aorekhoegu tsî tarekhoedi tsî tarekhoedi tsîna ǃgames tsî ǁgauoǃnâ tanisen ǀgaugu tsîna ǃkhōǂgā hâ. (Mat. 19:4, 5; Rom. 1:26, 27) ǀGamǁîse da ge sida di Xristeǁî ǃgâsan ǀkha nî ǃoaba ǀgara. Nēsa da ge mâ ǃkhai i hoa i tawa ra dī Gaosib ǀHû-ommi ǃnâs, ǃgâsa-i oms tawas tamas ka io ǂganǃgâsib ǃnâ. Tae-i ǀgui-i ga ī xawe da ge ǀhaode ǃoa ī ǀû tide. Sida di ǀhaode da ge nēsi kaise ǂhâ hâ ‘tsēs ra ǀgū ǃkhaisa da ra mû xui-ao’.—Khomai re Hebreǁîn 10:24, 25.

8. Sida di aoǁnâ tsî ǁkhāǁkhā ǀgauba mati hānîǁaeb ǃnâ ǀnîsi nî ǀkharaǀkharahe?

⁸ Kai ǁgâiǀāb ǁaeb ǃnâ i ge sida di haisi amsa ǀnîsi nî ǀkharaǀkharahe. Nēsi da ge Gaosib ǃgâiǂhôasa ra aoǁnâ tsî ra ǁgūtsâ ǁkhāǁkhāsabedīsa. Xawe da ge ǁnā ǁaeb ai kaise ǃoaǃū haisi-amsa nî aoǁnâ. Elobmîs ge nē haisi-amsa ǃnaredi ǀkha ra ǀgopeǀnō. (J.ǂHa. 16:21) Satanni ǃhūbaib ge ǀgūǁae nî hîgāgāhe di hâ haisi-amsa da ge ǀnîsi nî aoǁnâ. ǀGūǁae da ge nî ǂan sada haisi-ams nî tae-i sa tsî mati da nē haisi-amsa nî aoǁnâsa. ǀOadisi kuriga da sîsen-ū hâ ǀgauba da nî sîsen-ū sida di aoǁnâ tsî ǁkhāǁkhā sîsen-e dīǀoaǀoasa? Tamas ka io da ǀnî hâ ǀgauba nî sîsen-ū? Nēsa da ge ǃâu tsî nî mû. Mâ ǀgaub ǀguib ǃnâ da ga aoǁnâ xawe da ge aiǂhanuba nî ūhâ Jehovab di ǀgoraǃgâs haisi-amsa aoǁnâsa.—Ese. 2:3-5.

9. ǃHaode mati sida haisi-amsa nî ūǃoa xawe da tae-e a ǂan?

⁹ Sida haisi-ams ge nî dī i i ǃhaode ǁgūtsâ sida aoǁnâ sîsen-e hoase ǀû kaisa. Nēsi da Jehovab di ǂkhâǃnâsa aoǁnâ sîsenni ǃnâ ǂhâ hâ khami da ge ǁnā ǁaeb ǃnâs tsîna ǁîb ǂkhâǃnâsa nî ǂhâ. ǂGomǃgâ da ge nî Jehovab ge ǀgaiba nî mā da di, ǁîb di ǂâisa dīǀoaǀoas ǃnâ.—Mix. 3:8.

10. Lukab 21:25-28 ǃoagu i khoesiba mati kai ǁgâiǀāb ǃnâ ra ī ǃgomsin ǃoagu nî tanisen?

¹⁰ Khomai re Lukab 21:25-28. Kai ǁgâiǀāb ǁaeb ǃnân ge khoena kaise nî buru mûn ga o xūn hîna nî hâhâ din ǂâi hân ra hîgāgāhe o. ǁÎn ge kaise nî ǃao tsî ǂâiǂhansen nē ǁkhōǁkhōsa ǁaeb ǃnân nî ǁō di ǂâi tsî. (Sef. 1:14, 15) ǁNā ǁaeb ǃnâ i ge ûiba kaise nî ǃgom i Jehovab ǃoaba-aon ǃgaos tsîna. Nē ǃhūbaib di ǃâ tama da hâ amaga da ge ǃgomsina nî hōǃâ. ǀNî ǁaegu ai da ge ǂhâ da hâ xūna ūhâ tide.

11. (a) Ama tama ǂgomdi ga hîgāgāhe toa o, o i tae-i ǃaroma khoen tsî ǃhūbaib ǂgaeǂgui-aogu tsîna Jehovab di ǀHûǀguitimî-aon ai ǁîn di ǂâide nî ǂnûi? (b) Tae-i ǃaroma da kai ǁgâiǀāba ǃao tide?

¹¹ Khoen hîna ge hîgāgā-e ge ǂgomdi  ǃnâ hâ în ge nî ǁaixa Jehovab di ǀHûǀguitimî-aon di ǂgoms ǀguis ge hâhâ ǃkhais ǃgao. ǁÎn ge khoen hoana nēs xa nî ǂanǂan internets ǃnâ-ūs tsîna. ǃHaodi tsî ǁîdi ǂgaeǂgui-aob Satanni tsîn ge nî ǃhui da sida ǂgoms ǀguis hîgāgāhe tama hâ amaga. ǁÎn di mîǁguib hoa ǂgomde ǃhūbaiba xu hîgāgās diban ge ge dīǀoaǀoa tama hâ i. ǁNā-amagan ge ǁîn di ǂâide Jehovab ǃoaba-aon ai nî ǂnûi. ǁNā ǁaeb ǃnâ i ge nē ǃhaode nî Gogi Magogi di kai. * Hoa ǃhaodi ge ǀguiǃnâxa tsî Jehovab khoena ǁîn ǀgaib hoab ǀkha nî ǁnāǂam. (Ese. 38:2, 14-16) Tae-i kai ǁgâiǀāb tawa nî īs xa da ge a ǂâiǂhansen tsoatsoa ǁkhā, ǃnāsa ǃgāsasiba da ūhâ tama hâ amaga. Xawe ǀgui xū i ge hâ: Kai ǁgâiǀāba da ge ǃao tama hâ. Jehovab ge sida ûiga nî sâu daoǁgaude nî mā da. (Psa. 34:19) ǂHanuse mâ tsî da ge sida danade ūkhâi ǁkhā ǂan da a amaga sida ‘ores go ǀgū’ ǃkhaisa. *

12. ‘ǂGomǂgomsa tsî gā-ai ǃgāba’ mati ra huida i da hānîǁaeb ǃgao aiǂhomisen?

¹² “ǂGomǂgomsa tsî gā-ai ǃgāb” ge ra aiǂhomi da, i da ǂgomǂgomsase kai ǁgâiǀāb ǁaeb ǃnâ hâ ǁkhā. (Mat. 24:45) Nēs ge ǂgui ǀgaugu ǃnâ ra dīhe aiǁgause sida kai ǀhaos di ǀapeǁguigu 2016 sa xu 2018ǁî kurigu digu xa ǂâi re. Nē ǀhaodi tawa gere māhe ǃhoadi ge ge ǂkhâǃnâ da i da sida ǀgaugu hîna da ǂhâ hâ ga ǀgaiǀgai Jehovab tsēs ra ǀgū khami. Hā re i da nē ǀgauga ǃhoaǃgao.

13. Mati da sida ǂgomǂgomsasiba Jehovab ǃoagu nî ǀgaiǀgai tsî tae-i ǃaroma da nēsa nēsi nî dī?

¹³ ǂGomǂgomsasib: 2016ǁÎ kurib di kai ǀhaos di xoaǂams ge “Jehovab ǃoagu ǂgomǂgomsase hâ re” di ge hâ i. Nē ǀapeǁguib ge ge ǁkhāǁkhā da ǀgaisa ǀhōsagusisa da ga Jehovab ǀkha ūhâ o, o da ge ǁîb ǃoagu ǂgomǂgomsase nî hâ di. ǂÂiǂâiǃnâhe da ge ge Jehovaba ǃoa da ga ǀgū ǂgao o, o da ge nî ǀgore tsî ǁîb mîsa ǃgamse nî ôaǃnâ. Nēs ge ǀgaiba nî mā da kai ǃgomsin tsîna mâǃoasa. Satanni ǃhūbaib di ǀams ra ǀgū khami da ge nî ǃâubasen sida ǂgomǂgomsasib Jehovab tsî ǁîb di Gaosib ǃoa-ai nî ǃâitsâhe ǃkhaisa. Khoen ge nî aiǃgû saoǃgon das ǃnâ. (2Pet. 3:3, 4) Nēs ge Satanni ǃhūbaib di ǃâ tama da hâ amaga nî ī. Sida ǂgomǂgomsasiba da ge nēsi nî ǀgaiǀgai i da kai ǁgâiǀāb ǁaeb ǃnâs tsîna ǂgomǂgomsase hâ ǁkhā.

14. (a) Tae-i ǀkharaǀkharana ǃhūbaib ai ra gaeǂgui ǃgâsagu ǀkha nî ī? (b) Tae-i ǃaroma da ǂgomǃgâsiba ǁnā ǁaeb ǃnâ nî ǂhâ?

¹⁴ Kai ǁgâiǀāb ǁaeb ǃnâ i ge ǃhūbaib ai ra ǂgaeǂgui ǃgâsagu xa ǀkharaǀkhara-e nî hâ. ǂKhauhesan hîna noxoba ǃhūbaib ai ǃgau hân ge nî ǀhaoǀhaohe în ǀhommi ǃnâ sī Armagedons toroba ǃkhams ǃnâ ǁhao. (Mat. 24:31; J.ǂHa. 2:26, 27) Nēs ge ra ǂâibasen ǂGaeǂguira Soros ge sida ǀkha ǃhūbaib ai hâ tide di. Xawen ge kai ǂnubis ǃgâsana noxoba ǂhanu ǀgaub ǃnâ nî aiǃgû. ǂAnsa ūhâ ǃgâsagu ge kai ǂnubis khoena nî ǂgaeǂgui. Jehovab ǃoagu da a ǂgomǂgomsasa da ge nî ǁgau nē ǃgâsaga  da ga ǂkhâǃnâ tsî ǁîgu Eloba xu ra hō daoǁgaude sao o. Sâuhe ǂgao da ga o, o da ge ǁîgu di daoǁgaude nî sao.

15. Mati da sida mâǀgaibesiba nî ǀgaiǀgai tsî tae-i ǃaroma i a ǂhâǂhâsa nēsa nēsi dīsa?

¹⁵ Mâǀgaibesib: 2017ǁÎ kurib di kai ǀhaos di xoaǂams ge “Tā ǀûsen” di ge hâ i. Nē ǀhaos tawa gere māhe ǃhoadi ge ge ǀgaiǀgai da i da ǃgomsin ǂam-ai mâǀgai ǁkhā. ǁKhāǁkhāsen da ge ge sida mâǀgaibesib ge ǃgâi mâsigu ǃnâ ǀgui a ǁgauhe ǁoa di. Xawes ge nēsa Jehovab ai hoaǁae ǂgomaiǂnûisa xu hâ. (Rom. 12:12) Jesub di mîmâide da ge tā nî ǀuru, mîb ge o: “ǀUnis kōse ga mâhō-i ge nîra ǃgâiǃō” di. (Mat. 24:13) Nē mîmâis ge ra ǂâibasen ǃgomsina da ga hōǃâ xawe da ge nî mâǀgai di. ǃGomsin ǂam-ai da ga nēsi mâǀgai o, oi ge sida ǂgomsa nî ǀgai kai ǁgâiǀāb ǁaeb ǃnâ mâǀgaisa.

16. Tae-e ǁkhoaǂgaosiba ra mā da tsî mati da sida ǁkhoaǂgaosiba nēsi a ǀgaiǀgai ǁkhā?

¹⁶ ǁKhoaǂgaosib: 2018ǁÎ kurib di kai ǀhaos di xoaǂams ge “ǁKhoaǂgao re” di ge hâ i. Nē ǀhaos tawa gere māhe ǃhoadi ge ge ǂâiǂâiǃnâ da sida ǁkhoaǂgaosib ge sida ǁkhāsiga xu hâ tama hâ di. Mâǀgaibesiba ūhâs ǃgao da Jehovab ai ra ǂgomaiǂnûi khami da ge ǁkhoaǂgaosiba ūhâs ǃgaos tsîna ǁîb ai nî ǂgomaiǂnûi. Mati da Jehovab ai ǂgomaiǂnûisa nî ǁkhāǁkhāsen? Nēsa da ge Elobmîsa tsēs hoasa khomai tsî Jehovab ge ǁîb khoena mati ǃkharu ge ǁaeb ǃnâ a sâu ǀgausa ǂâiǃgâs ǃnâ-ū a dī ǁkhā. (Psa. 68:20; 2Pet. 2:9) ǃHaodi ga kai ǁgâiǀāb ǁaeb ǃnâ ǁnāǂam da o, o da ge nî ǁkhoaǂgaoxa tsî Jehovab ai hoase nî ǂgomaiǂnûi. (Psa. 112:7, 8; Heb. 13:6) Jehovab ai da ga nēsi ǂgomaiǂnûi o, o da ge ǁkhoaǂgaosiba nî ūhâ Gogi di ǁnāǂamde mâǃoasa. *

17. Tae-i ǃaroma da Armagedonsa ǃao tide? (Tsoatsoas ai hâ ai-īsiba mû re.)

¹⁷ ǂOa goro ǁkhāǁkhāǃâs goro ǃhoaǃgao khami da ge ǂgui da sida ûib hoaba ǀuni tsēdi ǃnâ ûi hâ. Xawe da ge kai ǁgâiǀāba ûi ǃkharus di ǃâubasensa ūhâ.  Armagedons di torob ge nî nē ǃhūbaib di ǀam i. Xawe da ge xū-e ǃao tama hâ. Tae-i ǃaroma? Nēs nî Jehovab di toro i xui-ao. (ǂKhm. 1:33; Ese. 38:18-20; Sax. 14:3) Jehovab di mîmās ǃnāgab ge Jesuba nē toroba nî ǂgaeǂgui. Nēsab ge khâisa ge māhe ǂkhauhesan tsî ǀhomǃgāgu tsîn di huib ǀkha ni dī. ǁÎn ge Satanni, ǁîb demongu tsî toro ǃkham-aogu tsîn ǃoagu nî ǃkham.—Dan. 12:1; J.ǂHa. 6:2; 17:14.

18. (a) Jehovaba tae-e ge mîmâi? (b) ǂHaiǂhais 7:9, 13-17 sa mati ǂgomǃgâsiba ra mā da hānîǁaeb xa?

¹⁸ Jehovab ge ge mîmâi “sîsenūxūs sa ǃoagu ga ǁāǁāhes hoas ge ǃgâiǃgâ tide.” (Jes. 54:17) Jehovab di ‘kai ǂnūbis’ ǂgomǂgomsa ǃoaba-aon ge ‘kai ǁgâiǀāb’ ǁaeb ai nî sâuhe. Tsîn ge nî aiǃgû ǁîba ǃoabas ǀkha. (Khomai re ǂHaiǂhais 7:9, 13-17.) Elobmîs ge ǂgomǃgâsiba ra mā da ǁnā ǁaeb ǃnâ da nî sâuhesa. ǂAn da ge a Jehovab ‘ǂgomǂgomsa khoena ra sâu’ ǃkhaisa. (Psa. 31:23) Hoan hîna Jehovaba a ǀnam tsîra ǂkhaisiba mān ge kaise nî ǃgâiaǂgao ǁîb di ǀonsab ga ǃanuǃanu o.—Ese. 38:23.

19. Tae-i ǃgâi xūna hānîǁaeb ǃnâ ǃâu da hâ?

¹⁹ ǂÂi re 2 Timoteub 3:2-5 ga mati xoasa hâsa nēs ga khoen hîna ǀasa ǃhūbaib ǃnâ hâna ǁguiǃā hâ o Satanni ǃhūbaib ǂgaeǂguis ǃnāga hân ose. (“ Khoen hānîǁaeb ǃnâ nî ī ǀgaub” di hâ boksisa mû re) ǃGâsab George Gangasi hîna ge ǂGaeǂguira soros ǁani îb ge nēsa nēti ra ǁguiǃā: “ǃHūbaib ge kaise nî ǃgâi i ǃhūbaib ai hâ khoen hoan ga Jehovaba ǃoaba o. * ǀGūǁae da ge ǀasa ǃhūbaib ǃnâ ûis di aiǂhanuba nî ūhâ. Jehovab ûi hâs kōse da ge nî ûi. ǀAmosib kōse da ge nî ûi.” Nē ǃâubasens ge kaise a ǀō-aisa.