ǁAEBA du ga ra ǂan ǂgao o, o du tae-e ra dī? O du ge ǀnîsi sadu ǁaeǃgôasa ra kō. Sadu ǀhōsa-i ga ra dî o, o du ge ǁî-i tsîna a mîba ǁkhā. Mati du nî ǃeream? ǂGui ǀgaugu ge hâ nēsa ǃereams ǃnâ. Mâ ǀgaub ǃnâ?

Hā re î da mî, kharab 1 khamab tsî 30 haigu dis ge ǁaeǃgôasa ra mî. ǀNîsi du ge 1:30 di nî ǃeream. Xawe mâpa du ra ǁans tsî hoaǃnâ-aixa ǃhoa ǀgaub ǃoagu 13:30 di a ǃeream ǁkhā. ǁAeba ǁnā ǀgaub ǃnâ mîs ge 24 irgu ǁaeǃgôas ai a ǃgaoǃgaosa. ǀNî ǃhūgu ǃnâs tsîna î ge ǁnā ǁaeba “ǃkhare ǀgam” di ra ǂgaiǂuihe, ǁnās ra ǂâibasens ge 30 haigu 2ǁî khamab xa ǃgau hâsa.

Elobmîsa khomaisa du a ǀnam xawe du ge ǀnîsi ra ǂâi matin ge khoena ǁnā kurigu ǃnâ ǁaeba gere ǃgôa ǀgauba. ǀGui ǀgaub ǀguib ge ge hâ tama hâ i. Hebre Xoadi ge “ǃnauǁgoaga,” ‘tsēǃgâǁaeb’ tsî “ǃui-amǁaeb” ǃoa ra ǁnaeǁgau. (Gen. 8:11; 19:27; 43:16; Deu. 28:29; 1Gao. 18:26) Xawe ǀnî ǁaeb ai î ge ǂhanu ǁaeba gere sîsen-ūhe.

Elobmîs ǁaegu ǃnâ î ge ǃkhē-aoga gere sîsen-ūhe. Nēs ge ǃuia ǀō-aisase gere dīhe. ǂGui kuriga Jesub ǃnaes aiǃâs ge Israelǁaesa ǃuisa ǃnona ǃâgu ǃnâ ge ǀgora hâ i tsî nē ǃâga ǁaeǃgôadi di gere ǂgai. (Psa. 63:6) ǂHanuǂhanu-aogu 7:19 ge ‘tsuxu ǃgâǃûiǁaeb’ di ra mî. Jesub ǁaeb ǃnân ge Jodeǁîna Grikeǁîn tsî Romeǁîn ǁaeǃgôa ǀgauba ge ūǃoabasen hîna ge haka ǃâga ǃuia ūhâ i ga.

Haka ǃGâiǂhôas xoa-aogu ge nē ǁaeǃgôadi ǃoa ǂgui ǃnāde gere ǁnaeǁgau. Aiǁgause, “hakaǁî ǃûiǁaeb tsuxub” dib aib ge Jesuba ǁgammi ai gere ǃgû ǁîb ǁkhāǁkhāsabegu ǂgaub ǃnâ hâ hîna. (Mat. 14:25) ǁÎb ǂkhōs ǃnâb ge Jesuba ge mî: “Oms ǀhonkhoeb ga ǂan io, mâ tsuxuǃûiǁaeb aib nî ǃnari-aoba hāsa, ob ge ga ǃûi tsî oms âba khôaǂgâǃnâ kai tama i hâ.”—Mat. 24:43.

Jesub ge hoa haka ǃâgu ǁaeǃgôade ǃoa gere ǁnaeǁgau ǁîb ǁkhāǁkhāsabega ǃoab ge mî o: “ǂKhaikari ǁnâi hâ re, ǀū du a xuige, mâ ǁaeb oms ǀhonkhoeba nî hāsa; ǃui-amǁaeb ais kas, tsuxuǃgâb ais kas, anib ās ǀkhas kas, ǃnauǁgoagas kas hoasa.” (Mrk. 13:35) ǁNā ǃgôaǁaeb di ǂguro ǃâb ge “soresǂgâsa” xu ǃuis di 9ǁî khamab kōse gere ǃgôahe. Tsî ǃgôaǁaeb di 2ǁî ǃâb “ǃuias” dis ge 9ǁî khamaba xu tsuxub kōse ge hâ i. Tsî ǃgôaǁaeb di 3ǁî ǃâb ge “anib āsa” xu ǁgoas di 3ǁî khamab kōse ge hâ i. Nē ǃgôaǁaeb ǃnâs ge ge i anib ge āsa tsîb ge Jesuba ǃkhōsis ǃnâ a ūhesa. (Mrk. 14:72) Hakaǁî ǃâb ǃgôaǁaeb dis “ǃnauǁgoagas” ge 3ǁî khamab ǁgoagasa xu soresǂoas kōse gere ǃgôahe.

Nētsēs ǃgôa ǀgauban ge ūhâ tama hâ i xawen ge khoena ǃkharu ge ǁaeb ǃnâ ǀgauba ge ūhâ i ǁaeba ǃgôas diba.