1. Jehovab di ǃoaba-aona tae-i ǃaroma a ǂkhî khoe? (Tsoatsoas ǃnâ hâ ai-īsiba mû re.)

JEHOVAB DI ǀHÛǀGUITIMÎ-AON ge ǂkhî khoena. Nēs ge ǁîn ǀhaohâb ǀhaodi, kai ǀhaodi, omdi ain ga sarigu tsî ǀkharib kai ǀhaodi tawa ga ra ǀhao o, os tsîna ra mûhe. ǁÎna tae-i ǃaroma a ǂkhî? ǁÎn ge ra ǁgūtsâ Jehovab hîna a ‘ǂkhîba’ ǁgaesa. (1Tim. 1:11; Psa. 16:11) ǁÎb a ǂkhîb di Elo amagab ge Jehovaba ra ǂhâba î da sada tsîna ǂkhî khoe tsî ǁnās xa da ge ǂgui ǃaromade ūhâ.​—Deu. 12:7; Aoǁn. 3:12, 13.

2, 3. (a) ǃGâiaǂgaoba [ǂKhîba] a tae? (b)Tae-i ǃaroma i a ǃgom nē ǁaeb ǃnâ ǂkhîba ūhâsa?

² O sadu tsîna a ǂkhî khoe? Sadu tsîna sadu ǃgâiaǂgaoba a kaikai ǁkhā? ǃGâiaǂgaob [ǂKhîb] ge “ǃgam tsâsib hîna du ǂgaob ǃnâ ǃgâi xū-e du ga ra ǃâubasen o, o ra hōǃâba.” Elobmîs ge ra mî, ama ǂkhîb ge Jehovaba xu da ra hō ǀkhaeb xa ra ǃaromahe di. Xawe nē tsēdi ǃnâ i ge kaise a ǃgom ǃkhîba ūhâsa. Tae-i ǃaroma?

 ³ ǃGom mâsigu ge sida ǂkhîba a ūbē ǁkhā, aiǁgause ǁōb ǃnâ khoe-e ǂoaǃnâs, omaris ǁani i ga ra ǂnûiǂuihes, ǃgame ǀgoras tsî sîsen-e ǂoaǃnâs. Omaris ǃgomsigu tsî ǁnâuǃāgu tama is tsîn ge kai ǃgomsigu tsî ǂkhîoǃnâsib tsîna a ǃaroma ǁkhā. Sîsenǁare-aon tamas ka io skol ǀhōsan xa ǃkhāǃkhāhes, ǂgomdi ǁkhāǁkhā-aon xa mâǃoahes tamas ka io ǂgoms ǃgao ǃkhō-oms ǃnâ ǂgāhes tsîn ge a ǂkhîoǃnâ kai da ǁkhā. Tsî ǁkhōǁkhōsa ǀaeb, ǂgau-e tama ǀaeb tsî depressib tsîn ge sida ǂkhîba a ūbē ǁkhā. Jesub Xristub hîna “ǃgâiǃō hâ tsî ǀguri ǀgaiba ūhâ ǃKhūb” ge kaise ra dâ khoena ǁkhaeǂgao tsî ǃgâiaǂgao kaisa. (1Tim. 6:15; Mat. 11:28-30) ǁÎb ǃhommi aoǁnâs aib ge Jesuba ǂgui ǀgaugu hîna ǂkhîba ra mā da gu xa ge ǃhoa, nēsi da ga Satanni ǃhūbaiba xu ǁgâiba ga ra hōǃâ xawe.

4, 5. Mati da ǂkhîba hō tsî a ūhâ ǀgara ǁkhā?

⁴ Jesub ge ǂgurose a mî mîdi ge kaise a ǂhâǂhâsa: “ǃGâiǃōn ge hâ gagas ǃnâ ǀgâsana, ǁîn dib a gaosib ǀhommi diba amaga.” (Mat. 5:3) Mati da a ǁgau ǁkhā sada tsîn nē ǂhâsiba ǂhâ hâsa? Nēsa da ge gagasi ǂûna ūǂgās, gagasi xūna ǃgôaǃgâs tsî ǂkhîb di Elob Jehovaba ǂgurose sada ûib ǃnâ mâis ǃnâ-ū a dī ǁkhā. Nēna da ga ra dī o, o da ge kai ǂkhîba nî hōǃâ. Tsîs ge sida ǂgoms tsîna Elob di mîmâidi ǃnâ nî ǀgai. Tsî da ge “ǃgâiǃō ǃâubasens” hîna da Elobmîs ǃnâ ra khomais xa nî ǂkhâǃnâhe.​—Tit. 2:13.

⁵ Jehova Elob ǀkha ǀgaisa ǀhōsagusisa omkhâis ge ǀamo ǂkhîba nî mā da. Apostel Paulub ge ge xoa: “ǃGâiaǂgao re ǃKhūb ǃnâ mâ ǁaeb hoab ai; tsî ǁkhawa ta ra mî: ǃGâiaǂgao re!” (Fil. 4:4) Nēti i ǀhōsagusisa xu ǀamas ǃaroma da ge elosi gā-aisiba nî ūǂgā. Elobmîs ge ra mî: “ǃGâiǃōb ge ǁnā khoeb, gā-aisiba ra hōb tsî ǁnā khoeb, ǁnâuǃāxasiba ra ūǀkhība. ǁÎb ge ûib di haise ība, ǁnān ǁîba ra ǃkhōna; tsî ǁîba ga ǃkhōǀgaipe-i hoa-i ge a ǃgâiǃō.”​—ǂKhm. 3:13, 18.

6. ǀAmo ǂkhîba ūhâsa tae-e xu hâ?

⁶ ǀAmo ǂkhîba ūhâs ǃgao da ge tā Elobmîsa khomais ǀguisa nî dī xawe khomai da ra xūna nî ûiǂui. Khomai da ra xūna ûiǂuis xab ge Jesuba ge mî: ‘Nēna ǂan tsî du ga ǁîna dīo, o du ge a ǃgâiǃō.’ (Jhn. 13:17; khomai re Jakobub 1:25.) Nēb ge sadu gagasi ûiba ǀgaiǀgais tsî ǀamo ǂkhîba ūhâs di ǁkhowa-am. Xawe mati da ǂkhîba a ūhâ ǀgara ǁkhā, xūn hîna sida ǂkhîba ra ūbēn ǁaegu da ra hâ hîna? Hā re î da kō Jesub ge tae-e sao rase a mîsa ǃhommi aoǁnâs ai.

7. Mâ ǀgaub ǃnân ǃoa-aona ǂkhîba a ūhâ ǁkhā?

⁷ “ǃGâiǃōn ge hâ ǃoa hâna ǁkhaeǂgaohen nîra amaga.” (Mat. 5:4) ǀNîn ge ǀnîsi ra ǂâi, ‘mati i ǃoab ǃnâ hâ khoe-e ǂkhîba a ūhâ ǁkhā?’ Jesub ge ǃoa hâ khoena ǂâis ǃnâ ge ūhâ tama hâ i, nēs xab gere ǃhoa o. Eloxoresa khoen tsîn ge ‘ǀuniga tsēdi’ mâsib xa ra ǃgae. (2Tim. 3:1) Xawe nē khoen ǃoab ge ǁîna Jehovaba ǃoa ǂgae tama hâ tsî  ǂkhîb tsîna mā tama hâ. Jesub ge gagasi ǂhâsiba ūhâ khoen xa gere ǃhoa, hîna ge ǁîn gagasi mâsib ǃgao gere ǃoana. ǁÎn ge ǁîn ǁoreb mâsiba mûǂan tsî ǃgomsin hîna nēs xa ra ǃaromahen xa ra tsûaǂgao. Jehovab ge nēti i ǃoab tsâsiba ra hōǃâna ra ǃgaoǃgâ. Tsîb ge ǁÎba ǁîna ǁkhaeǂgao tsî ra ǀkhae gagasi xūn, ǂkhîb tsî ǃgâi ûib tsîn ǀkha.​—Khomai re Esegieli 5:11; 9:4.

8. Tsamtsiǃnânasiba mati ǂkhîba ra mā?

⁸ “ǃGâiǃōn ge hâ tsamtsiǃnâna, ǁîn ǃhūbaiba nîra ǀumi amaga.” (Mat. 5:5) Tsamtsiǃnânasiba mati ǂkhîba ra mā? Khoe-i ga Elobmîs amaba ga ra ǂan o, o i ge ǀkharaǀkharana ǁî-i ûib ǃnâ ra dī. ǁÎ-i ge ǀnîsi ge kharoǂgaoxa, ǂkhabaxa tsî ǁaixasa i. Xawe î ge nēsi “ǀasa khoeba” ge ana hîna “ǀkhomxaǂgaosib, khoexasib, ǃgamǃgamsens, tsamtsiǃnâsib tsî ǃnūǃnâxasib” tsîna ra ǁgau-e. (Kol. 3:9-12) Tsî î ge ǁî-e nēs xa ǃaromahe hâse ǂkhîb tsî ǀnammi tsîn xa ǀoahe hâ ûiba ūhâ. Elobmîs tsîn ge ra mî ǁîn ge ‘ǃhūbaiba nîra ǀumi’ di.​—Psa. 37:8-10, 29.

9. (a) Mâ ǀgaub ǃnân “tsamtsiǃnâna . . . ǃhūbaiba nîra ǀumi”? (b) ‘ǂHanu-aisiba ǃâ tsî ra ǁgâbana’ tae-i ǃaroma ra ǃgâiaǂgao?

⁹ Mâ ǀgaub ǃnân “tsamtsiǃnâna . . . ǃhūbaiba nîra ǀumi”? Jesub di ǂkhauhesa ǁkhāǁkhāsabegu ge ǃhūbaiba nîra ǀumi, gaogu tsî pristergu tsîn ase gu ga ra ǂgaeǂgui tsoatsoa o. (J.ǂHa. 20:6) Tsîn ge miliundi khoen hîna ǀhomma ǃoa ī tama hâna ǃhūbaiba nî ǀumi tsî ǀoasa kurus, ǂkhîb tsî ǃgâiaǂgaob tsîna nî hōǃâ ǀamosib kōse. Nēn ge ǁîn hîna a ǂkhîna ‘ǂhanu-aisiban ǃâ tsî ra ǁgâba’ amaga. (Mat. 5:6) ǁÎn gagasi ǃâs tsî ǂhanu-aisib ǁgâs tsîn ge ǀasa ǃhūbaib ǃnâ nî dīǀoaǀoahe. (2Pet. 3:13) Elob ga Eloxoresan hoana ga ra dīkākā o, o i ge ǂhanu-ain di ǂkhîba ūbēhe tide eloxoresan a ǀkhai amaga.​—Psa. 37:17.

10. ǀKhomxaǃnâsiba tae-e ra ǂâibasen?

¹⁰ “ǃGâiǃōn ge hâ ǀkhomxaǃnâna ǁîn nîra ǀkhomxaǃnâhe amaga.” (Mat. 5:7) Hebregowab mîs ǀkhomxaǃnâ di hâs ge “ǀgamsa tsâsib hîna khoexaǃnâsiba ra ǁgaub ǃoa ra ǁnaeǁgau.” ǁNās ǁkhās khamis ge Grikegowab mîs tsîna nau khoe-e ǀkhoms di ra ǂâibasen. Tsî ǀkhomxaǃnâ di hâ mîs ge ǂguina ǃkhōǂgā hâ. Elobmîs ǃnâs ge nē mîsa ǀkhomxaǃnâsiba ǁgaus ǃoa ra ǁnaeǁgau.

11. Tae-e da Samariaǁîb di ǀkhomxaǂgaosiba xu a ǁkhāǁkhāsen ǁkhā?

¹¹ Khomai re Lukab 10:30-37. Jesub ǂkhōs hîna Samariaǁîb xa hâs ge a ǀkhomxaǃnâsib di ǁgauǁgau. Nē Samariaǁîb ge khoexaǃnâ tsâsib xa ge ǂgae-e nē khoeb hîna tsûb ǃnâ hâba huisa. Jesub ge nē ǂkhōs khaoǃgâ ge mî: “ǃGû ǁnâi, î sats ona ǁnāti dī.” ǀNîsi da ge a dîsen ǁkhā: ‘Tita tsîna Samariaǁîb ge ǁgau ǀkhomxaǃnâsiba ra ǁgau? Tita tsîna khoexaǃnâsiba ǁîn hîna ǃgomsiba ra hōǃân ǃoagu a ǁgau ǁkhā? Aiǁgause ta hoaǃnâ-aixa huiba Xristeǁîn, ǃoa taradi tsî ǁgûna amab ǃnâ ūhâ tama hân ǃoagu a ǁgau ǁkhā? Tita tsîna ǁîn hîna ‘ǂkhabuǂâi hâna ǁkhaeǂgao tsî ǂkhabusana a ǂkhâǃnâ’ ǁkhā?’​—1Tes. 5:14; Jak. 1:27.

12. Mâ ǀgaub ǃnâb ǀkhomxaǂgaosiba ǂkhîba ra mā da?

¹² Mâ ǀgaub ǃnâb ǀkhomxaǂgaosiba  ǂkhîba ra mā da? Naun ǃoagu da ga ǀkhomxaǂgaosiba ga ra ǁgau o, os ge ǁnāsa ǂkhîba ra mā da ǁîna da ra hui amaga. Tsî da ge a ǂan, nēs Jehovaba ra ǂkhîǂkhî ǃkhaisa. (ǃNǃkh. 20:35; khomai re Hebreǁîn 13:16.) ǁÎn hîna naun xa ra ǂâin xab ge Gao-aob Daviba ge mî: “ǃKhūb ge ǁîba ǂkhaba tsēs ai nîra ore. ǃKhūb ge ǁîba nîra sâu tsî nîra ûi kai.” (Psa. 41:1, 2) Sada ga hoaǁae ǀkhomxaǂgaosiba ga ra ǁgau o, ob ge Jehovab tsîna sada nî ǀkhom tsî da ge ǁnās ǀkha ǀamo ǂkhîba nî hōǃâ.​—Jak. 2:13.

13, 14. ǃAnu ǂgaoba ūhâs tsî ǂkhîb tsîna mati ra ǃgûǀhao?

¹³ “ǃGâiǃōn ge hâ ǂgaob ǃnâ ǃanuna ǁîn Eloba nîra mû amaga.” (Mat. 5:8) Sida ǂgaoga ǃanuse ūhâs ǃgao da ge ǂganagaba nî ǃanu tsî ǃgâi tsâsigu tsî turagu tsîna nî ūhâ. Sida ǂâi te da ge ǃanuse nî ūhâ î da tā gagasise ǀurixa, Jehovab ai da māǁnâsen hâ amaga.​—Khomai re 2 Korinteǁîn 4:2; 1Tim. 1:5.

¹⁴ ǁÎn hîna ǂgaob ǃnâ a ǃanun ge ǃgâi ǂkhîsa ǀhōsagusisa Jehovab aiǃâ nî ūhâ, ǁÎb ge nēti ge mî: ‘ǃGâiǃōn ge ǁnān ti mîmāde ra dīna.’ (J.ǂHa. 22:14) ǁÎb “mîmāde” dīsa tae-e ra ǂâibasen? ǂKhauhesa Xristeǁîn ge “mîmāde” ra ǁnâuǀnam tsî ǁnā ǀgaub ǃnâ Jehovab aiǃâ a ǃanu tsî ǁnās ǀkha ǀhommi ǁgaumâisa hō tsî ǀamo ǂkhîba nî hōǃâ. Kai ǂnubis khoen hîna ǀamosib kōse ǃhūbaib ai nî ǁanan ge ǂhanu-ai ǀhōsagusisa Jehovab ǀkha nî ūhâ. Tsîn ge ǁîna ‘ǁîn saran âna ǁKhaob di ǀaob ǃnâ ǁā tsî nî ǃuriǃuri.’​—J.ǂHa. 7:9, 13, 14.

15, 16. Matin ǂgaob ǃnâ a ǃanuna ‘Eloba nî mû’?

¹⁵ Xawe matin ǁîn hîna ǂgaob ǃnâ a ǃanuna mûhe ‘ǁoasa Elob aisa’ ra ‘mû’? (Eks. 33:20) Grikegowab mîs ‘mû’ di hâs ge “ǂâis ǀkha mûs” di ra ǂâibasen. ǁÎn hîna Eloba ‘ǂgaob di mûs ǀkha ra mûn’ ge ǁîba ama khoeb ase ra mûǂan tsî ǁîb ǀgauga ra ǁgae. (Efe. 1:18) Jesub ge Elob ǀgauga ǃamkuse gere ǁgae tsîb ge ǁnās ǀkha ge mî: “Tita ra mû-i kom ǁGûba ra mû-eo.”​—Jhn. 14:7-9.

¹⁶ Elob ǀgauga ǂans ǃgaon ge ama Xristeǁîna ǁÎba, ǁîn ǃgaob ra dī xūn ǃnâ-ū nî ‘mû’. (Job 42:5) Tsîn ge ǁîna ǁîn ǂâidi ǀkha ‘ǂgaob di mûs ǀkha’ Elob mîmâi hâ buruxa ǀkhaega ra mû tsî ǂgomǂgomsase ǁîba ra ǃoaba  ǀgara. ǁÎn hîna ǀhommi khâisa nî hōn ge Jehovaba ǁîn mûdi ǀkha nî mû.​—1Jhn. 3:2

17. Tae-i ǃâbas ǂkhîbagusa ūhâ?

¹⁷ Jesub ge ge mî: “ǃGâiǃōn ge hâ ǂkhîxaǃnâna.” (Mat. 5:9) ǁÎn hîna ǂgurose hoaǁae ǂkhîba ra sauruǃgon ge a ǂkhî. Jakobub ge ge xoa: “Tsîb ge nē ǂûtanib ǂhanu-aisib diba ǂkhîbagusa ra dīna ǂkhîb ǃnâ ra tsorobahe.” (Jak. 3:18) ǀNîsi da ga sada ǃgâsa-i tamas ka io omaris ǁani-i ǀkha ga ra ǁnâusāgu o, o da ge Elob ǃoa ǀgore tsî nî ǂgan bi îb hui da î da ǂkhîb kuru-ao kai. Jehovab ǃanu gagab, ǂhanu tanisen ǀgaub tsî ǂkhîb tsîn ge nî ǂgaeǂgui da. Jesub ge ǂkhîba kurus ǃgao sao rana ge mî: “Sa māsats ga altars ǃoa sī-ū, tsîts ga ǁnāpa ǂâihō, ǃgâsa-i âts sa ǃoagu ǀauxū-e ūhâsa, ǁnâi mās âtsa altars aiǃâ ǁnāxū î ǃgû, î aibe ǃgâsa-i âts ǀkha ǀûbagusa dī, îts ǁnāǃnubai sa māsa hā ǁguiba.”​—Mat. 5:23, 24.

18, 19. Xristeǁîna tae-i ǃaroma ra ǃgâiaǂgao mâǃoahen ga ra o?

¹⁸ “ǃGâiǃō du ge hâ, khoen ga sado ǁgui-ai tsî ǃgôaǃgon, tsî ǂhumib ǀkha hoa ǂkhaba xūna sadu ǃoagu gowao tita ǃaroma.” Jesuba tae-e gere ǂâibasen? ǁÎb ge ge mî: “ǃGâiaǂgao î du dâ, amǃnâs âdu ǀhommi ǃnâ a kai xuige; ǁnātin kom sada aiǃâ ge hâ i kēbo-aoga gere ǃgôaǃgono.” (Mat. 5:11, 12) Apostelgu ge ǂnauhe tsî a mîmāhe o, îgu tā aoǁnâ, “o gu ge ǁîga ǀapemāǃnans di aisa xu ǃgâiaǂgao hâse ge ǃgû.” Amas as ge ǁîgu ge tsûb ǃaroma ge ǃgâiaǂgao tama hâ i. Xawe gu ge ‘Jesub di ǀons ǃaroma ǃharaxūhe hâse tsâsa gu ge anuǃgôahe ǃkhais ǃaroma’ gere ǃgâiaǂgao.​—ǃNǃkh. 5:41.

¹⁹ Sida ǁaeb ǃnâ da ge Jehovab khoen ase ra ǃgâiaǂgao Jesub ǀons ǃgao da ǃgomsina ra tsâ o. (Khomai re Jakobub 1:2-4.) Apostelgu khami da ge sida tsîna ǃgomsina hōǃâs ǃnâ ǃgâiǃgâibasen-e ūhâ tama hâ. Xawe da ga ǃgomsin ǂama Jehovab ǃoagu ǂgomǂgomsase ga ra hâ o, ob ge ǁÎba hui tsî nî ǀgaiǀgai da. Aiǁgause, Augustub 1944ǁî kurib ǃnâ kha ge Henryki tsî Dorniki tsîkha konsentrasiekampa ǃoa ge sîhe ǂhanub xa. ǁÎkha gere mâǃoan ge ge ǂanǃgâ: “ǁÎkha ǀnî hâ xū-e dī kais ge ge īǁoa i. ǁÎkha ǁgâiǀāb ge ǂkhîba gere mā kha.” ǃGâsab Dorniki ge ge mî: “Tita ge ge tura tama hâ i ǁgâiǀāhesa xawe ta ge ǃgomsiga ǁkhoaǂgaosib ǀkha ge ǃgûǃkharu. Tsî Jehovab ǃoagu ǂgomǂgomsase hâs ge ǂkhîba ge mā te. . . . Jehovaba ǃoa hoaǁae ǀgores ge tita ǁÎba ǃoa ge ǀgūǀgū tsî ǁÎb ge ǂgomǃgâhe ǁkhā Hui-aob ase ge ī-i.”

20. Tae-i ǃaroma da ra ǂkhî ‘ǃgâiǃō hâ Eloba’ ǃoabas ǃnâ?

²⁰ “ǃGâiǃō hâ Elob” mā-amsa ūhâs ge a ǃgâi, ǀnî ǂgomde xu da ra hō ǁgâib, ǀaokhoena xu da ra hō mâǃoas, ǀaeb tsî kairasib ǃgâ-ai. (1Tim. 1:11) Elob hîna “ǂhumi ǁoab” mîmâidi ge ǂkhîba ra mā da. (Tit. 1:2) Jehova Elob mîmâidi ge ǃgomsin hîna da nēsi ra hōǃâna nî ūbē. Hānî Paradais ǃnâgu ge Jehovab ǀkhaega sida ra ǂâi xūna nî ǃnā. Tsî da ge kai ǂkhîba nî hōǃâ. Ama as ge ‘kai ǂkhîb ǃnâ da nîra ǃgâiǃgâisensa.’​—Psa. 37:11.