ǃHŪBAIB ǂhawase gu ge ǀhaohâb ǃûi-aoga Elob khoen ǁaegu gu ūhâ ǁgaumâide ra ǃgôaǃgâ. ǁÎgu ge ǀhaohâb ǃgao ǀkhaeb ase ī. Xawe î ge ǁaeroba ǃkharu hâse ǀkharaǀkhara-e ge dī-e. Kaira ǀhaohâb ǃûi-aogu ge ge ǂgan-e îgu ǂkham ǀhaohâb ǃûi-aoga ǁîgu ūhâ ǃereamde mā. Mâ ǀgaub ǃnâ?

Nē ǀkharaǀkharan ge ge dī îgu ǃnarimâra mûǂam-aogu tsî ǀhaohâb ǃûi-aogu skola ra kōǃgâ ǃgâsagu tsîna 70 kurixa gu ga ra o, o ǁîgu ǁgaumâide ǀnî hâ ǃgâsaga mā. ǀHaohâb ǃûi-aogu tsîn ge 80 kurixa gu ga ra o, o ǂkham ǀhaohâb ǃûi-aoga ǁîgu ǃereamde ra mā ǁnās ge ǁNâub ǀapeǀhaos ǁanigu tsî ǀHaohâb ǃûi-aogu ǀGuiǀguira ǃgâsab tsîna ǃkhōǂgā hâ. Kaira ǃgâsaga nē ǀkharaǀkharana mati ge ǃkhōǃoa? ǁÎgu ge Jehovab tsî ǁîb ǀapeǂhumis tsîna ǂgomǂgomsasiba ra ǁgau.

“Tita ge nē mîǁguiba hoase gere ǃkhōǃoa” dib ge Ken di ǀon hâ ǃgâsab hîna ge ǁNâub ǀapeǀhaos ǀguiǀguira ǃgâsab ase  49 kuriga a ǃoaba ba ra mî. “Nē ǀkharaǀkharan xa ta ge ǁnâu ǁgoaga ta ge Jehovaba ǃoa ge ǀgore tsî ǁîba ge mîba ǂhâsib hâsa îb ǂkham ǃgâsaba ǀguiǀguira ǃgâsab ase ǁhûi-e.” Keni di tanisen ǀgaub ge ǃhūbaib ǂhawasegu kaira ǃgâsaga ūhâ tsâsigu ǀkha a ǀgui. ǁÎgu ǃgâsana kōǃgâs xa gu a ǃgâibahe amaga gu ge ǀnî ǃgâsaga gere tsûaǂgao.

Esperandiob hîna ge ǀHaohâb ǃûi-aogu ǀGuiǀguira ǃgâsa îb ge ra mî, “nēs ge tsūse ge tsâ kai te.” Xaweb ge ge mî: “ǁAeba ta ge ǂhâ hâ ti ǂurusiba kōǃgâs ǃgao.” Esperandiob ge Jehovaba ǃoabas ǃnâ ra aiǃgû tsî ǁîb ǀhaohâba ǀkhaeb ase ība.

O kaira ǂgomǂgomsa ǃnarimâra mûǂam-aogu hîna ge ǀkharaǀkharana a dīgu îgu ǀnî hâ ǀgaugu ǃnâ ǃoaba? Allani hîna 38 kuriga ǃnarimâra mûǂam-aose ra ǃoabab ge ra mî: “Nē ǀkharaǀkharan xa ta ge ǁnâu o, o ta ge kaise ge buru.” ǁÎb ge ǂkham ǃgâsaga ǁkhāǁkhāsa xub ra ǀama ǀgaub xa ra ǂâi tsî ǂgomǂgomsase ǃoabas ǃnâ ra aiǃgû.

Russeli hîna ge ǃnarimâra mûǂam-ao tsî ǀhaohâb ǃûi-aogu skola ra kōǃgâ ǃgâsab ase 40 kuriga a ǃoabab ge ra mî ǁîb tsî ǁîb taras tsîn ge ge tsûaǂgao hâ i di. “Sim aiǂhanubam ge kaise gere ǃgôaǃgâ tsî ge ǂâi hâ i noxobam ǀgaiba ūhâ di aiǃgûs ǃgao.” Russeli tsî ǁîb taras tsîn ge nē ǁkhāǁkhās tsî ǂans tsîna ǀhaohâb ǃnâ ra sîsen-ū nau ǃgâsan ǃgâib ǃgao.

Nēti ī tsâsiba du ga noxoba hōǃâ tama ga ra i xawe î ge 2 Samueli ǃnâ hâ ǃnaeǃkhaide nî hui du î du nēsa ǁnâuǃā.

ǂÂi-oa re Gao-aob Davib ǀgôab Absalommi ge a mâǃoa tsoatsoa o. Davib ge Jerusalemsa xu Mahanaimsa ǃoa ge ǃkhoe ǁnās ge Jordanǃāb ǀgūse. Davib tsî ǁîb ǀkha ge hâ i khoen tsîn ge ǂhâsiga ge ūhâ i. ǂÂi-oa î du ra tae-i ge īsa?

ǁNā ǃās ǃnâ ge ǁan hâ i ǃnona khoegu ge kharogu, ǂû-i tsî ǂhâbasa xūn tsîna ge sī-ū. Barsilaib ge ge ǁnā khoegu ǀgui i. (2Sam. 17:27-29) Absalommi mâǃoas ge toa o, ob ge Daviba Jerusalemsa ǃoa ge oa tsîb ge Barsilaiba Jordanǃāb kōse ge ī ū bi. Davib ge ǁîba ge ǂkhâǃnâ îb Jerusalemsa ǃoa sao. Davib ge ǁîba ǂû-e ge mā, Barsilaib ge kaise ge ‘ǃkhū hâ i aoba’ tsî nē ǂû-e ge ǂhâ tama hâ i. (2Sam. 19:31-33) Davib ge Barsilaib di ǀgauga gere ǃgôaǃgâ tsî ǁîb gere mā ǀapemādi tsîna. Kai aiǂhanub ge ge i Gao-aob ommi ǃnâ hâ tsî sîsensa.

ǃGamǃgamsenxa tsî ǁnâuǃāxab ge i amagab ge Barsilaiba ge mî 80 kurixab  ge a di. Tsî ge ǀaro: “ǀGora ǁkhā ta nî xare ǃgâib tsî ǂkhabab tsîkha ǁaegu?” Tae-eb gere ǂâibasen? Barsilaib ge gā-aisiba ge ūhâ i ǁîb ûib ǃnâ. ǁÎb ge kairab a hînas tsîna ǀapemāde gere mā, “kaigu” ge Gao-aob Rehabeamma gere ǀapemā khami. (1Gao. 12:6, 7; Psa. 92:12-14; ǂKhm. 16:31) Barsilaib ge ǃgâi tsî ǁgai xūn xa gere ǃhoa o, ob ge ǀnîsi ǁîb sorosi ǁkhāsigu xa gere ǃhoa. ǁÎb ge ge mî kairasis ge ǁîb tsâ ǀgaub tsî ǁnâu ǀgaub tsîna gere tsâǀkhā di. (Aoǁn. 12:4, 5) Barsilaib ge Daviba ge ǂkhâǃnâ îb ǁîb ǀgôab Kimhamma Jerusalemsa ǃoa ī ū.—2Sam. 19:35-40.

ǀKharaǀkharan hîna ge kurigu ǃgao a dīhen ge Barsilaib gere ǁgau mûǂuis ǀkha a ǀgui. Sida ǁaeb ǃnâ î ge ǀgui khoe-i ǁkhāsigu ǀguiga kō-e tama hâ Barsilaib di ǁaeb ǃnâs khami. ǃHūbaib ǂhawase hâ ǂgomǂgomsa ǀhaohâb ǃûi-aogu di ǃgâib ǃgao î ge ǁnā ǀkharaǀkharana ge dī-e.

Nē kaira ǃgâsagu ge ge mûǂan ǀapeǂhumis ge nî ǀgaiǀgaihe hānîǁaeb ǃnâ ǂkham ǃgâsagu ga ǀhaohâb ǃnâ ǃereamde māhe o. ǂGui ǃnaeǃkhaidi ǃnâ î ge kaira ǃgâsaga ǂkham ǃgâsaga gere ǁkhāǁkhā. Barsilaib ge ǁîb ǀgôaba ge ǁkhāǁkhā tsîb ge apostel Pauluba Timoteuba ge ǁkhāǁkhā. (1Kor. 4:17; Fil. 2:20-22) Nē ǂkham ǃgâsagu ge ge ǁgau ǁîgu ‘mādi’ ase ī ǃkhaisa “Xristub soros di ǂnubikhâihesa ǃoa.”—Efe. 4:8-12; ǀgopeǀnō re Num. 11:16, 17, 29.

ǂGui ǃgâsagu hîna ge ǃhūbaib ǂhawase ǀhaohâgu ǃnâ ǁîgu ǁgaumâide a māǁnâgu ge ǀnî hâ ǁgaumâidi hîna gu ge Jehovab ǀapeǂhumis ǃnâ a hōna ra ǃgôaǃgâ.

“Ti ǀasa ǁgaumâis ge ra ǃaroma î ta ǃgâsadi kaikhoegu hîna amab ǃnâ hâ tama hâ gu ǀkha ǃhoa ǁkhā” dib ge Markoba ra mî hîna ge 19 kuriga sarimâra mûǂam-aose ǁgaumâisa ība.

“Sim ǀasa ǁgaumâis ge ǃkhai hâ ǃgâsana huis tsî Elobmîs ǁkhāǁkhāde ūhâs tsîna ǃkhōǂgā hâ” dib ge Geraldoba ra mî hîna ge 28 kuriga sarimâra mûǂam-ao ība. ǁÎb ge ra mî ǁîb tsî ǁîb taras tsîn ge 15 khoena Elobmîsa ra ǁkhāǁkhā tsîn ge ǂgui ǃgâsan hîna ge ǃkhai hâ īna ǀhaode ǃoa ra ī.

Allani ge ra mî: “Nēsim ge ǃnāsa ǁaeba aoǁnâ sîsenni ǃnâ ra ǁhao di. Sim ge ǃgangu ǃnâ aoǁnâs, ǁamaxū ǃkhaib ǃnâ aoǁnâs tsî sim ǁanǁare-aona aoǁnâbas xas tsîna a ǃgâibahe, ǀgam ra ge ǀHû-omma ǃoa ge ī tsâ hâ i.”

ǃEreamsa tani hâ ǃgâsa du ga ra io hîna ǀasa ǁgaumâisa ūhâ do, o î ge ǀnî hâ ǀgaub tsîna hâ nēsa du a dī ǁkhāba. Jehovab sîsenni ǃnâ du ge a ǁhao ǁkhā ǂkham ǃgâsaga ǀhaohâb ǃnân xūna ra dīhe ǀgauba ǁkhāǁkhās ǃnâ-ū. “Jehovab ge nē îsa ǂkham ǃgâsagu ǃnâ-ū ra ǁkhāǁkhā da” dib ge Russela ra mî. “ǂGui ǃgâsan ge ǁîgu ǁkhāsigu tsî daoǁgaus ǃnâ-ū ra ǀama.”—“ ǂKham ǃgâsaga hui re îgu ǀoasase aiǃgû” di hâ boksisa mû re.

ǀAsa ǁgaumâisa du ga ra ūhâ o, o nēs ǃnâ ǃgâiba mû re. ǂGui khoen ge ǀnai sadu sîsenni xa ge tsâǀkhāhe tsî du ge nēs ǃnâ a aiǃgû ǁkhā. Khoen ge a ǀnam du tsî nî aiǃgû ǀnam dusa.

ǂHâǂhâsa as ge sadu ge Jehovab di ǂgaoba ge tsâǀkhā. Elob ge ‘sadu sîsenni tsî ǀnammi tsîna ǀuru tide, ǁîb ǀons ǃnâ du  ge ǁgauba, ǃanuna du gere ǃoaba tsî ganupe ra ǃoabas ǀkha.’ (Heb. 6:10) Nē xoas ge ra ǁgau Jehovab mîmâidi ge sida dīga xu hâ tama hâ di. Jehovab aiǃgâ du ge a ǀō-aisa ǁgūtsâdi hîna du ra dīn ǃgao.

O sadu ga aitsama nē ǀkharaǀkharana hōǃâ tama ga ra i os? Nēs ge noxoba sadu ai sîsenǂuiba a ūhâ ǁkhā. Mâ ǀgaub ǃnâ?

ǃGâsab hîna ge ǀnî hâ ǁgaumâisa a hōb ǀkha du ga ra hâ o, o du ge ǁnā ǃgâsab ǂansa xu a ǀama ǁkhā. ǁÎb ǀapemāde ôa tsî ǁîb daoǁgausa ǂgan re. Tsî ǂōrisase ǁîb ǁgaumâisab ra dī ǀgauba ǃgaoǃgâ re.

ǀNîsi du ge a kaira tamas ka io a ǂkham ǃgâsa hîna nēsa xu a ǀama ǁkhā do, o ǂâis ǃnâ ūhâ re Jehovab ge ǂgomǂgomsase ǁîba ra ǃoaba ǃgâsana ra ǃgôaǃgâ di.