1. Jehovaba ǃoaba tama khoen di ǁîǀnamsenxa tanisen ǀgauba mati a tsâǀkhā da ǁkhā?

TAE-I ǃaroma i a ǃgom Elobmîs ǃnâ da ra ǁkhāǁkhāsen xūna ûiǂuisa? ǀGui ǃkhais ge kai ǃgamǃgamsenxasiba î ge ǂhâ hâ ǃgâina dīsa tsî sida ǃgamǃgamsenxasib ge ra ǃkhāǃkhāhe. Nē “ǀuni tsēdi” ǃnâ da ge khoen hîna a ‘ǁîǀnamsenxa, mariǃgunuxa, anxa tsî ǃgurixan’ ǁaegu ûi hâ. (2Tim. 3:1-3) Xawe nēti i ǀgaugu ǀamǂoade ra ūhâ ǁaeb ai i ge Elob ǃoaba-aona surixa gagadi xa ra ǀoa-e. (Psa. 37:1; 73:3) ǀNî i ge ǀnîsi a ǂâi ǁkhā: ‘ǂHâbasa-e tita nau khoen ǂhâsiga ti gu ǂam-ai nî mâisa? Tita ga ‘ǂkharirose’ ga ra tanisen o, on khoena ǃgôasiba ūhâba te tite?’ (Luk. 9:48) Jehovaba ǃoaba tama khoen ǁîǀnamsenxasib ǀgaugu ge sida a ǂgaeǂhapu ǁkhā tsîs ge nēsa ǀhaohâb ǁanin ǀkha da ūhâ ǀhōsagusisa a tsâǀkhā ǁkhā tsî sida Xristeǁî tanisen ǀgaub tsîna. Xawe da ge kai ǀkhaega ra hōǃâ Elobmîs ǃnâ hâ aiǁgaude da ga ǁgae o.

2. Mâ ǀgaub ǃnâ da ǂgomǂgomsa ǃoaba-aon xa a ǁkhāǁkhāsen ǁkhā?

 ² ǂGomǂgomsa ǃoaba-aon di aiǁgaude da ga ra ǁgae ǂgao o, o da ge aibe ǁîn di ûib xa nî ôaǃnâ. ǂAn ǂgao da ge nî tae-i ǃaroman ge ǁnā ǀkhaega a hōs? Matin ge Elob ǀkha ǃgâi ǀhōsagusisa a omkhâis tsîn ge mati ǀgaiba a hōsa în ǁÎb ǂâisa dī? Nē ǀgaub ǃnâ ǁkhāǁkhāsens ge a hui da ǁkhā î da gagasise ǀgai.

3, 4. (a) Mati da gagasise ra daoǁgauhe? (b) Tae-i ǃaroma i gagasi ǂûna ǃnāsa ǃgāsasiba ūǂgāsa ǃkhōǂgā hâ?

³ Kai huib tsî ǁkhāǁkhāsen ǀgaub tsîna da ge Elobmîsa xu ra hō. Sida Xristeǁî ǂkhanin, internets ǂhaweb, JW Broadcastings, Xristeǁî ǀhaodi tsî kai ǀhaodi tsîn ǃnâ-ūs tsîna da ge huiba ra hō. Xawe Jesub mîdi hîna Johaneb 4:34 ǃnâ hâ di ge ra ǁgau gagasi xūna ôaǃnâs ge ǂguina ǃkhōǂgā hâ di. Taena i ǃkhōǂgā hâ? Jesub ge ge mî: “Nēs ge ti ǂûsa, sî te geb di ǂâisa ta nî dī, tsî ǁîb di sîsenna ta nî dītoasa.”

⁴ Jesub mîdi ǃoagu î ge gagasi ǂû-e Elob daoǁgaus ǃoagu ûisa ǃkhōǂgā hâ. Nēsa mâ ǀgaub ǃnâ ǂû-i khami ī? Sida soros ǃgâi ǂûna da ga ra ǂû o, o ra tsâ khami i ge sida ǂgaogu tsîna ra ǀgaiǀgaihe tsîs ge sida ǂgoms tsîna ra ǀgai ǀamo ûib mûǂuis ǃnâ. Matikōse du khoakhoahe tama aoǁnâ sîsenni ǃnâ du nî ǂoas aiǃâ du tsau hâse ra tsâ xawe du aoǁnâ toa du ga ra o khoakhoahe hâse ra tsâsa?

5. Mâ ǀkhaega hâ gā-aisiba sîsen-ūs ǃnâ?

⁵ Elosi ǁkhāǁkhāsa sîsenǂuis ge kaise a ǂhâǂhâsa gā-aisiba i ra omkhâi amaga. (Psa. 107:43) Gā-aisiba ūhâs ge kai ǀkhaega ra hau. “Tsî ūts ga hâ ǃgomǀgausan hoan ge ǁîb ǀkha ǀguiti-ī tama hâ. . . ǁÎb ge ûib di haise ība, ǁnān ǁîba ra ǃkhōna; tsî ǁîba ga ǃkhōǀgaipe-i hoa-i ge a ǃgâiǃō.” (ǂKhm. 3:13-18) Jesub ge ge mî: “Nēna ǂan tsî go ga ǁîna dīo, o go ge a ǃgâiǃō.” (Jhn. 13:17) Jesub di ǁkhāǁkhāsabegu ge ǂkhîba nî hōǃâ, ǁîb ge mîbagu xūna gu ga ra dī ǀgara o. Xawe gu ge ǁîga Jesub ǁkhāǁkhā ǀgaub tsî aiǁgaus tsîna ǁnā ǁaeb ai ǃgâise ge sao tama hâ i. Tsî gu ge ega ǁîgu tsîna nēti i ûi ǀgauba gere sao.

6. Tae-i ǃaroma da nî mâǀgai?

⁶ Mâǀgais ge nētsē kaise a ǂhâǂhâsa, hoana da ga ra ǂan xawe. Aiǁgause, audo kuru-aob ge sîsen-ūb ra xūn xa ǃgâi ǂansa ūhâ. Xaweb ge ǁîba ǃgâise ǀama tide nē xūnab ga ǃgâi ǀgaub ǃnâ sîsen-ū tama ga ra io. ǁÎb ga ǃkharu ge ǁaeb ǃnâ audo kuru sîsen-e dī tsî ǃgâi ǂansa ga ra omkhâi o, ob ge ǁnāsa nî sîsen-ū îb ǁîb sîsen-e ǃamkuse dī. ǁNās ǁkhās khami da ge sada tsîna ǃgâi ûiba nēsi a ūhâ ǁkhā Elobmîs ǃnâ hâ tsoatsoade da ga ra sîsen-ū o. Xawe da ge noxoba kai ǂkhîba nî ūhâ Jehovab ra mā da daoǁgaude tsēs hoasa ǃgamǃgamsenxase sîsen-ūs ǃnâ-ū.

7. Gā-aisiba omkhâis ǃnâ-ū da mati Elobmîs aiǁgaude nî sîsenǂui?

⁷ Hā re î da haka ǃâga kō hîna ra ǁgauga mati i sida ǃgamǃgamsenxasiba a ǃâitsâhe ǁkhā ǀgauba. Tsî matin ge ǃkharu ge ǁaeb ǂgomǂgomsa ǃoaba-aona nēs ǃoagu a dan ǀgaub tsîna. Gagasise ǀgais ge xū-e khomais ǀguisa ǃkhōǂgā tama hâ. Xawe ǂâi re mati du aitsâma nē ǀgauga a sîsen-ū ǁkhā ǀgauba tsî nēsa mâiǂui tamase sîsen-ū.

8, 9. ǃNaeǃkhaidi 14:8-15 sa tae-e Apostel Paulub ǃgamǃgamsenxasib xa ra ǁkhāǁkhā da? (Tsoatsoas ǃnâ hâ ai-īsiba mû re.)

⁸ Elob ǂâibasens ge “khoen hoan nî ǃgâiǃō, tsîn nî amab di ǂans tawa sīsa.” (1Tim. 2:4) Sado tae-e ra ǂâi khoen hîna amaba noxoba nî ǁkhāǁkhāsenan xa? Apostel Paulub ge sinagogegu ǃnâ ǀnai amaba Elob xa a ǂan khoena gere ôa xaweb ge ge ǃkhō-oasen tama hâ i Jodeǁî khoena aoǁnâbasa. Tsî ǁîn hîna ǀnî hâ eloga ra ǃoaban di tanisen ǀgaub ge ǁîb di ǃgamǃgamsenxasiba gere ǁgau.

⁹ Paulub di ǂguro sîsaben sîsenni ǃnâb ge Likaonias ǃnâ a sī o, on ge khoena ǁîb tsî Barnabab tsîna ore-aose gere mû. ǁÎn ge ǁîkha ǁîn di elogu Seub tsî Hermeb tsîn di ǁgauǁgaus ase gere mû. Paulub tsî Barnabab tsîna mûmûsen ǂgaos xa gere ǃâitsâhe? Nēsa mâǃoas hîna kha gere hōǃâsa xu nî ǃnora kai kha? ǁÎkha ǀnîsi gere ǂâi nē mûmûsens ǃgâiǂhôasa aoǁnâs ǃnâ nî hui di? Tātsēs tsîna. ǁÎkha ge ǃhaese ǁîkha saraga ge doa tsî ge ā tsoatsoa tsî gere mî: “Tarexa du nēna ra dī? Sikhom on ge a khoe, ǁkhā tsâsendi sadu didi khami īde ūhâ khoma.”—ǃNǃkh. 14:8-15.

10. Mâ ǀgaub ǃnâ kha Paulub tsî Barnabab tsîkha Likaonias ǃnâ hâ khoen ǀkha a ǀgui?

¹⁰ Paulub tsî Barnabab tsîn ge ǁîkha ǀoasa kurusa ūhâ tama hâsa gere mûǂan xawe î ge ǁîkha ǃoaba ǀgauba nau khoen di ǃoaba ǀgaub ǀkha ge ǀgui tama hâ i. ǁÎkha ge sîsabe-i hîna ge ǀō-aisa aiǂhânuba ūhâ i kha? (ǃNǃkh. 13:2) ǁÎkha ǃanu gagab ǀkha ge ǂkhauhe tama hâ i? Îo, Paulub tsî Barnabab tsîkha ge gere ǁnâuǃā Likaonias ǃnâ hâ khoen ge amaban ga ra ūǃoa o, o ǁîn tsîna ǁnāti i ǃēsa nî hō di.

11. Aoǁnâ da ra ǁaeb ai da mati Paulub di ǃgamǃgamsenxasiba a ǁgae ǁkhā?

¹¹ Mati da Paulub di ǃgamǃgamsenxasiba a ǁgae ǁkhā? ǂGurose da ge ǃâitsâgu ǃnâ tā nî māǁnâsen tsî tā ǂhaisiba nî ǂgao Jehovab ǀapeǂhumis ǃnâ da ra hō ǁgaumâidi ǃgao. ǀGamǁîse da ge nî dîsen: ‘Khoen hîna da ra aoǁnâba na da mati ra mû? ǀŪǃgâse ta ǀhûhâsib ǃnâ ǀnî khoen ǃoagu ǃhaoǃnâbe ǀgorasa ra ǁgau?’ Xawe mûhe ras ǃoagun ge Jehovab di ǀHûǀguitimî-aona ǁîn ǂharidi ǃnâ ǀûsen tamase hoa khoena ra aoǁnâba. Tsî nēs ge ǀnî ǁaega ra ǂgaoǀkhā în khoen hîna ǁîn ǂharidi ǃnâ ra ǁanan di gowab tsî ǁnaetigu tsîna ǁkhāǁkhāsen în ǁîna aoǁnâba ǁkhā. Nēs ge amabes ǃnâ ra ǁgau ǀHûǀguitimî-aon nēs xa ǀgapiǃgôasen tama hâsa. ǁÎn ge nēn hoan ǂam-ai ra dītsâ mâ khoe-i hoa-i di ǂhâsiga ǁnâuǃāsa în nēs ǃnâ-ū Gaosib ǃgâiǂhôasa aoǁnâ ǁkhā.

12. Epafraba mâ ǀgaub ǃnâ ge ǁgau ǁîb ǁîǀnamsenxa tama hâsa?

¹² ǀNî ǀgaub hîna da noxoba ǃgamǃgamsenxasiba a ǁgau ǁkhāb ge ‘ǁnān sida khami .   ǃgâi ǂgomsa ge hōna’ ǀgorebasa. (2Pet. 1:1) Epafrasi ge di ge dī. Elobmîs ge ǃnona ǃnādi ǀguide ǁîb xa ra ǃhoa. Nēs ge Paulub ǂkhanidi hoadi ǃnâ. Paulub ge oms aib ǃkhō-oms ǃnâ hâ hîna Koloseǁîn ǀhaohâb ǃoab ge xoa o, o Epafrab xa ge mî ǁîb hoaǁae ǁîna ‘ǀgores ǃnâ ra ǂâi’ di. (Kol. 4:12) Epafrab ge ǃgâsana ǃgâise ge ǂan i tsî  ǁîna gere tsâba. Paulub ǀkhab ge ‘ǀguiba ǃkhō-oms ǃnâ ǂnôa’ î xaweb ge ǁîba naun di gagasi ǂhâsiga ǂgurose gere mâi. (Flm. 23) Tsîb ge ǁîba nēs xa xū-e ge dī. ǁNās ge gere ǁgau ǁîb ge ǁîǀnamsenxa tama hâ îsa. Sida ǃgâsana da ge ǀons ai ra ǂgaise nî ǀgoreba.—2Kor. 1:11; Jak. 5:16.

13. Mati da sida ǀgoredi ǃnâ Epafraba a ǁgae ǁkhā?

¹³ ǁÎn hîna du ǀons ai ǀgoreba ǁkhan xa ǂâi re. Epafrab khamin ge ǂgui ǃgâsana nau ǃgâsan hîna ǀhaohâb ǃnâ hâna ra ǀgoreba tsî ǁîn omaridi ǁanin hîna kai ǃgomsiga ra hōǃân tsîna. ǂGuin ge jw.org’s ai “Jehovah’s Witnesses Imprisoned for Their Faith.” (Look under NEWSROOM > LEGAL DEVELOPMENTS.) di hâ ǃâb ǃnâ a xoasa ǃgâsan ǀonde kō tsî ǁîna ra ǀgoreba. Xawe da ge ǁîn hîna ge ǁîn ǀnamǀnamsana ǁōb ǃnâ a ǂoaǃnân tsîna ra ǀgoreba ǂgao. Tsî ǁnān hîna ge ǃhūǂgubigu, torogu tsî marin ǃgomsigu tsîna a hōǃâna. Amabes ǃnân ge ǂgui ǃgâsana sida xa ǀgorebahesa ǂhâ hâ, ǁîn nēsa xu nî ǀama amaga. ǀGore da ra ǁaeb ai da ge sida xa ǀgui ǂâi ǂgao tama hâ xawe sida ǃgâsan xas tsîna ra ǂâi ǂgao. (Fil. 2:4) Jehovab ge nēti i ǀgorede ra ǁnâu-am.

14. Jehovaba mâ ǀgaub ǃnâ a ǃgâi aiǁgau, khoe-e ǃgâs diba?

¹⁴ ǃNonaǁî ǀgaub sida ǃgamǃgamsenxasib ra ǃâitsâheb ge māsenxase sida ǃgâsan ra ǃhoa o ǃgâsa. Jakobub 1:19 ge ra mî ‘ǃhae re ǁnâus ǃnâ’. Jehovab tsîn ge nēs ǃnâ ǃgâi aiǁgausa ra ǁgau da. (Gen. 18:32; Jos. 10:14) Hā re î da kō tae-e da Eksodus 32:11-14 (Khomai re.) ǃnâ ge ī ǃnaeǃkhaisa xu a ǁkhāǁkhāsen ǁkhāsa. Moseb xū-e nî mîs ge ge ǂhâbasa tama hâ i xaweb ge Jehovaba ǁîba ǃēsa ge mā îb ǁîb ra tsâ ǀgauba mî. Ham-e khoe-i hîna ǃgâi tama ǂâi ǀgauba ūhâ i ra mî xūna ǃgâ tsî nî dī? Jehovab ǀguib ge ǃnūǃnâxase khoen hîna ǁîba ǂgoms ǃnâ-ū ra ǂgaina ra ǃgâ.

15. Mati da Jehovaba a ǁgae ǁkhā nau khoena ǃgôasiba ǁgaus ǃnâ?

¹⁵ Dîsen ǁkhā da ge a: ‘Jehovab ge Abrahami, Raxels, Josuab, Manoaxi, Eliab tsî Hiskiab tsîna kō tsî ǁîna ge ǃgâ, tita tsîna ǁnā aiǁgausa a ǁgae ǁoa î da nau khoen ra mî xūna ǃgâ? Ti ǃgâsana ta ti ǂhâsigu ǂam-ai ra mâi, ǃgôaǃgâ, ǃgâ tsî ǁîn ra mā ǀapemāde ra ūǃoa? Khoe-e ti ǀhaohâb tamas ka io omaris ǃnâ ti ǁaeba ǂhâ hâ? Tae-e ta ǁnās xa a dī ǁkhā?’—Gen. 30:6; ǂHǂh. 13:9; 1Gao. 17:22; 2Kro. 30:20.

16. Gao-aob Daviba mati ge tanisen Simib gere ǃkhāǃkhābi o?

¹⁶ ǃGamǃgamsenxasib ge ra hui da î da ǃkhō-oasen ǃkhāǃkhāhe da ga o. (Efe. 4:2) Nē aiǁgaus ge 2 Samueli 16:5-13. (Khomai re.) ǃnâ ra hō-e. David tsî ǁîb ǃgāgu tsîn ge Simib hîna a Gao-aob Sauli omaris ǁanib xa ǃgâi tama ǀgaub ǃnâ gere tsūdī-e. Davib ge ǁkhāsiba ge ūhâ i nēna ǀamǀamsa xaweb ge ti ge dī tama hâ i. Daviba mati ǁkhoaǂgaosiba ge omkhâi nēna xu ǃkhō-oasens ǃnâ? Nēsa da ge Psalmdi ǃnonaǁî danaǃâsa khomais ǃnâ-ū a ǁnâuǃā ǁkhā.

17. Tae-e Daviba ge hui îb ǃkhō-oasen tsî sida tsîna mati ǁîba a ǁgae ǁkhā?

 ¹⁷ Psalmdi ǃnonaǁî danaǃâs ge Gao-aob Davib ge ‘ǁîb ôab Absalomma xu gere ǃkhoe’ ǁaeb ǃnâ ge xoa-e. ǂGuro tsî 2ǁî ǁaraǃā ra ge 2 Samueli di 16ǁî danaǃâs ǃnâ gere ī xūna ra ǁguiǃā. Tsî î ge Psalmdi 3:4 sa Gao-aob Davib di ǂgomǃgâsiba ra ǁguiǃā: “Tita ge ǃgari dommi ǀkha ǃKhūb ǃoa go ǂgai, ob ge tita go ǁnâu-am ǁîb di ǃanu ǃhomma xu.” Sida tsîn ge tsūdīhe ta ga ra ǁaeb ai a ǀgore ǁkhā. Jehovab ge ǃanu gagab ǃnâ-ū a hui da ǁkhā î da mâǀgai. Mâsib xa ǂâi re hîna da ǃkhō-oasensa ǂhâ hâba tamas ka io māsenxase nî ǀûbaba? ǂGomǃgâsiba du ūhâ Jehovab sadu tsûba mû tsî nî ǀkhaedusa?

18. Tae-i ǃaroma du nî aiǃgû ǃamkuse ǁgaraga saosa?

¹⁸ ǂHanu a ti da a ǂan xū-e da ga ra dī o, o da ge kai ǀkhaega nî hōǃâ. ǂKhoamîdi 4:7 ge ra mî: “Gā-aisib ge a ǂguro” di. Gā-aisib ge ǂans ai a ǃgaoǃgaosa xawes ge nēsa mîǁguigu hîna da hoana da a ǂan o, o ra dī gu ai hâ. ǂGoberugu tsîn ge gā-aisiba ūhâ. ǂGoberugu ge gā-aisib ǂansa ūhâ tama hâ, ǁîgu dīgu ge ra ǁgau ǁîgu hānîǁaeb ǃaroma ra aiǂhomisensa. (ǂKhm. 30:24, 25) Xristub ge ‘Elob di gā-aisib’ ǀkha ǀguiǃnâxase ra tanisen tsî ǁnās ǀkha hoaǁae ǁGûba ra ǂkhîǂkhî xūna ra dī. (1 Kor. 1:24; Jhn. 8:29) Elob ge ǃkharagagusiba ǃgâi mîǁguiga dī tsî ǁîgu ǃoagu sîsensa a ǂan. Tsîb ge ǁÎba ǁîn hîna ǃgamǃgamsenxase ra mâǀgain tsî amaba ra ûiǂuin tsîna ra ǀkhae. (Khomai re Mateub 7:21-23.) ǁNās ǀkha ǃgarise sîsen re î du sadu gagasi mâsiba ǃgamǃgamsenxasib ǀkha aiǃgû kai. ǂAn da a xūna sîsenǂûis ge ǁaeb tsî ǃgūǃnâxasib tsîna ǂhâ hâ, xawes ge nēsa a ǃgamǃgamsenxasib ǁgauǁgau tsî kai ǂkhîb tsîna ra mā da.