1. ǀNamma mati a ǃgāsa Elob khoen ǁaegu?

ELOB khoen ge ǀgui gagasi omarisa ra kuruǂui tsî ǀnammi xa ra sao-e. (1Jhn. 4:16, 21) ǁNā ǀnammi ge mûmûsens ǃnâ-ū dīhe tama hâ. Xawe ǂgui ǂkhariro xūn ǃnâ ra ǁgauhe, aiǁgause, omkhâi ra mîdi tsî ǃgâi dīb ǃnâ-ūs tsîna. Khoen xa da ga ra ǂâi o, o da ge a “Elob di ǁgaeǁgae-ao ǀnamǀnamsa ǀgôan axase.”​—Efe. 5:1.

2. Jesuba mati Elob ǀnamma ge ǁgau?

² Jesub ge ǁîb ǁGûba ǃamkuse gere ǁgae. “Tita ǃoa hā re ǀhupu hâdu tsî ǃnaohe hâdu hoado,” dib ge Jesuba ge mî, ‘o ta ge tita nî khoakhoa du . . . tsamtsiǃnâ tsî ta ǂgaob ǃnâ a ǃgamǃgamsenxa’ amaga. (Mat. 11:28, 29) Xristub khami da ga ‘ǀgâsa-i xa ra ǂâi’ o, o da ge sida ǀhomsi ǁGûb mā-amsa nî ǃkhōǃoa tsî kai ǂkhîba nî ūhâ. (Psa. 41:1) Hā re, î da ǃhoaǃgao mati da sida omaris ǁanin, sida ǃgâsan ǀhaohâb ǃnâ hân tsî aoǁnâba da ra khoen tsîn xa nî ǂâisa.

3. Aoga mati ǁnâuǃāxasiba nî sîsen-ū? (Tsoatsoas ǃnâ hâ ai-īsiba mû re.)

³ Aob ge omaris danab ase ǁîb omaris ǁanin xa nî ǂâi. (Efe. 5:25; 6:4) Aiǁgause, aogu ge ra mîbahe îgu ǁîgu taradi ǀkha ‘ǁnâuǃāxasib’ ǃnâ sîsen. Nē mîs ge “taradi xa ǂâi tsî ǁîde ǁnâuǃā” di ra ǂâibasen. (1Pet. 3:7) ǂÂi tsî ǁnâuǃā di hâ mî ra ge ra ǃgûǀhao. ǁNâuǃāxa aob ge a ǂan ǁîb taras a ǁîb hui-aosa tsîs ǁîsa ǁîb aiǃâ xū tama dib ge ǂâi tama hâ. (Gen. 2:18) ǁÎb ge ǁîs tsâsiba ǂâis ǃnâ ra ūhâ tsî ǁîsa ǃgôasib ǃnâ ra ǃhoa-ū. Kanadab ǃnâ ǁan hâ ǃgâsas ge ra mî: “Ti aob ge tātsēs tsîna tita ǃgôaǁnâ tama hâ tamas ka io mî tama hâ ‘tis ge a tsâ ǁoa’ di. ǁÎb ge a ǃgâi ǃgâ-ao. Xū-i ǀkhab ga ra hui te o, ob ge ǁîba nēsa khoexaǃnâsib ǀkha ra dī.”

4. Aoba mati ǃnâuǃāxa ǀgaub ǃnâ ǁîb taras ǀkha nî hâ?

⁴ ǁNâuǃāxasiba ūhâ aob ge ǁîb taras xa ra ǂâi ǀnî hâ tarekhoedi ǀkhab ga ra ǃhoa ǁaeb ai. ǁÎb ge tātses tsîna ǁîdi ǀkha ǁâǁâsen tamas ka io ǁîdeb ǂhâba hâsa ǁgau tama hâ. Nēsab ge internets ǂhawegab ga ra sîsen-ūs tsîna ǂâis ǃnâ nî ūhâ. (Job 31:1) Nesab ge ǁîsab a ǀnam o ǀgui dī tama hâ xaweb Elobab a ǀnam ǃkhais ǃgao tsîb ǁgaib tsîna ǃhui hâ amaga.​—Khomai re Psalmdi 19:14; 97:10.

5. Tarasa mati ǁnâuǃāxasiba a ǁgau ǁkhā?

⁵ Aob ga Jesub Xristub hîna a ǁîb danab ǃoa ga ra kō o, os ge ǁîb tarasa ǁîba ‘ǃgam ǃgôasiba’ nî ūhâba. (Efe. 5:22-25, 33) Tsîb ge ǁîs aobas ūba hâ ǃgôasiba ǁîsa nî hui îs ǁnâuǃāxasib ǃnâ ǁîs aob ǃoagu tanisen. Aiǁgause ǂgui gagasi ǁgaumâideb ga ra ūhâ ǁaeb ai tamas ka iob ga ǀnî hâ ǃgomsin xa ga ra ǂhani-e ǁaeb ais tsîna. “ǀNî ǁaeb ais ge ti tarasa ti tanisen ǀgaub ǃnâ-ū ra mû, xū-i ra ǂhani te ǃkhaisa,” dib ge Brittanjeb ǃnâ ǁan hâ ǃgâsaba ra mî. “Tsîs ge ǁîsa ǂKhoamîdi 20:5 ǃnâ hâ Elobmîs tsoatsoasa ra sîsen-ū, hîna ra mîsa î du ǂhanu ǁaeba ǃâu khoe-i ǃnâ hâ tsâsiba du nî ‘hōǂuis’ aiǃâ. Tsîs ge nēsa ra hui te î ta tsâ ta ra ǀgauba ǁîs ǀkha harase ǀgoragu.”

6. Mati da hoa da ǀgôana a ǂkhâǃnâ ǁkhā tsî nēsa ǁîna mati nî hui?

⁶ Khoe-aogu ra ga ǃgâi ǀgaub ǃnâ ga ra hâ-ū gu o, on ge ǀgôan tsîna ǁîra aiǁgausa nî ǁgae. ǁGûn ge ǁnā aiǂhanuba ūhâ în ǀgôana ǁkhāǁkhā în sao ra khoe-i xa ǂâi. Aiǁgausen ge ǁgûna ǀgôana nî ǁkhāǁkhā în tā ǀhû-ommi ǃnâ ǃkhoe mâ tamas ka io ǀhuru. Tsî ǂû ǀhaodi tawan ge ǁgûna ǀgôana nî mîba în aibe ǃâu kaikhoen ǂû-e nî hora toas kōse. Xawen ge hoana ǀhaohâb ǃnâ hâ ǁgûna a hui ǁkhā. Aiǁgause î ga ǀgôa-e ǀhû-ommi dao-amsa ga ra ǁkhowam tamas ka io ga ra ǃkhōba da o, o da ge ǁî-e nî gangan. ǁÎ-e gangans tamas ka io ǃgâi mî-e mîs ge ǁî-e a hui ǁkhā î-i ǂâis ǃnâ ūhâ ‘mās ūs ǃgâ-ai a ǃgâisa.’​—ǃNǃkh. 20:35.

7. Jesuba mati ǃgome khoeba ǁnâuǃāxa ǀgaub ǃnâ ge sîsen-ū tsî tae-e da sada tsîna a ǁkhāǁkhāsen ǁkhā?

⁷ Jesub ge Dekapolib ǂharis ǃnâ gere aoǁnâ o, on ge khoena ‘ǃgome tsî ǂganaǂgae hâ khoeba ǁîb ǃoa ge ūhā.’ (Mrk. 7:31-35) Jesub ge ǁîba khoen ǁaegu ge ǂgauǂgau ǂgao tama hâ i tsî ǁîba “ǁaesa xu ǀguri ūbē” tsî ge ǂgauǂgau. Tae-i ǃaroma? Nē khoeb ge ǀnîsi  gere tao khoen ǁaegu ǂgauǂgauhesa. Jesub ge nēsa a hōǃâ o, ob ge khoeba ǀguri sī ge ǂgauǂgau. Sada ge nētsē khoena buruxa dīgu ǃnâ-ū a ǂgauǂgau ǁoa. Xawe dī ǁkhā da as ge ǁîn di ǂhâsigu tsî tsâsigu xas tsîna ǂâisa. Apostel Paulub ge ge xoa: ‘Î da kōǃgâ gu ǀnammi tsî ǃgâi sîsengu hōhōǃnâgu ǃoa.’ (Heb. 10:24) Jesub ge ǃgome khoeb di tsâsiba ǂâis ǃnâ ge ūhâ i tsî nēs ǀkha ǁîba ǁnâuǃāxa ǀgaub ǃnâ ge sîsen-ū. Nēs ge kaise a ǃgâi aiǁgausa.

8, 9. Mâ ǀgaugu ǃnâ da a ǁgau ǁkhā kairan tsî ǀaesen hân xa da ra ǂâisa? (Aiǁgaude mā re.)

⁸ Kairan tsî ǃhoran tsîna ǂâis ǃnâ ūhâ re. Xristeǁî ǀhaohâb ge ǀnammi xa saohe hâ. (Jhn. 13:34, 35) Nē ǀnammi ge ra ǂgae da î da ǁkhā da as kōse kairan tsî ǃhoran tsîna hui în ǀhaodi tsî aoǁnâ sîsenni ǃnâ ǁhao. Nēs ge ǁkhān as kōse. (Mat. 13:23) Mikeli hîna rolstoels ǃnâ ra ǂnûb ge omaris ǁanin tsî ǀhaohâb ǃgâsana xub ra hō huiba kaise ra ǃgôaǃgâ. “ǁÎn ra kōǃgâ te ǀgaub ge ra hui te î ta ǀhaodi tsî aoǁnâ sîsenni ǃnâs tsîna ǀoasase ǁhao. Tita ge ǃgangu ǃnâ aoǁnâs xa kaise a ǃgâibahe,” dib ge ra ǀaro.

⁹ Betels omaridi ǁanin ǁaegu i ge ǂgui kairan tsî ǀaesen hân tsîna hâ. ǀNamǀnamsa mûǂam-aogu ge nē ǂgomǂgomsa ǃoaba-aona ra hui în sîǂkhanidi tsî ǁâǁawagu ǃnâ-ū aoǁnâ ǁkhā. Bili hîna 86 kurixab ge ra mî: “Kaise da ge ra ǃgôaǃgâ sîǂkhanidi ǃnâ-ū aoǁnâs aiǂhanuba da ūhâ ǃkhais ǃgao.” Nansies hîna a 90 kurixas ge ra mî: “Tita ge sîǂkhanide xoasa, ǂkhanigu ase ǀgui mû tama hâ xawe aoǁnâ sîsen-e ta ra dī khami ra tsâ. Khoen ge amaba nî ǂan.” Ethels hîna ge 1921ǁî kurib ǃnâ a ǃnaes ge ra mî: “Tsûb ge a ti ûib di ǃâ. ǀNî tsēdi ge a ǃgom sarana anasa.” Xawes ge ǁîsa nēn hoan ǂam-ai kaise a ǁkhoaxabahe ǁâǁawab ǃnâ-ū aoǁnâsa tsî nēs ge ge ǃaroma în ǂguina ǁîsa ǃgâ. Barbaras hîna a 85 kurixas ge ra mî: “Ti ǀaeb mâsib ge hoaǁae aoǁnâ sîsenni ǃnâ ǁhaosa ra ǃgom kai. Xawe ǁâǁawab ǃnâ-ū aoǁnâs ge ra hui te î ta nau khoena aoǁnâba. Gangans Jehovaba ǃoa.” ǀOro ǁkhâgu ǃnân ge kaira ǃgâsana 1 228 irga aoǁnâ sîsenni ǃnâ ge ǃnuri, 6 265 xa a ǃnāsa sîǂkhanide ge xoa, 2 000 xa a ǃnāsa ǃnāde ǁâǁawagu ǃnâ-ū ge aoǁnâ tsî 6 315 ǂkhaniga ge māǂui. Nēti i ǁguiǂgāsendi ge kaise Jehovab ǂgaoba ra ǂkhîǂkhî.​—ǂKhm. 27:11.

10. Mati da sida ǃgâsana ǂâis ǃnâ nî ūhâ ǀhaodi tawa?

¹⁰ Xristeǁîn ǀhaodi ai naun xa ǂâi re. Sida ǃgâsan ǀhaode xu nî ǀamasa da ge ra ǂgao. Sida ga ra ǁnâuǃāxa tamas ka io ǁîn xa ga ra ǂâi o, on ge a ǀama ǁkhā. Mâ ǀgaub ǃnâ? ǀGui ǀgaub ge ǁaeb aiǃâ ǀhaodi tawa sīsa, î da tā ǃgâsana ǂhani. Xūn ge hoaǁae sida ra ǂâi khami ī tama hâ tsî da ge a ǃgonkhao ǁkhā. Xawe da ge tā nî ǁnaeti hoaǁae ǁaeb ai hâ tama isa, ǃgâsan xa da ge ǁkhā das as kōse nî ǂâi. Tsî ǂâis ǃnâ nî ūhâ Jehovab tsî Jesub tsîn ge go ǁkhau da ǀhaosa ǃoa. (Mat. 18:20) ǁÎkha ge amabes ǃnâ anu hâ sada xa ǃgôasiba ǁgauhesa.

11. Tae-i ǃaroman ǁnān hîna ǃâdi tamas ka io ǃhoade ǀhaos tawa ūhâna 1 Korinteǁîn 14:40 sa ǂâis ǃnâ nî ūhâ?

¹¹ Sida ǃgâsana ǂâis ǃnâ ūhâs ǃnâ-ū da ge sao ra mîdi xa nî ǂâi: “Xawe an xūn hoana anu hâse tsî ǃamkuse dīhe.” (1Kor. 14:40) ǃGâsan hîna ǀhaodi tawa ǃâdi tamas ka io ǃhoade ra mān ge  māhe hâ ǁaeb ǃnâ nēsa nî dī. Nēsa dīs ǃnâ-ūn ge sao ra ǃhoasa ra mā ǃgâsa-i xa ǀgui ǂâi tama hâ xawe ǀhaohâb ǁanin xas tsîna ra ǂâi. ǀNî ǃgâsan ge ǀnîsi ǃnūse ra ǃnari ǀhaos khaoǃgâ. Tsîn ge ǀnîna taxide ra sîsen-ū. Tsîn ge ǀnîna Jehovaba ǃoaba tama hâ khoe-i ǀkha ǃgame hâ.

12. Tae-i ǃaroma da “ǀō-aisase” ǀhaohâb ǃûi-aoga ǂâis ǃnâ nî ūhâ? (Mû re boksisa “ ǀHaohâb ǃûi-aogu xa ǂâi re” di hâsa.)

¹² ǀHaohâb ǃûi-aogu hîna ǀhaohâb tsî aoǁnâ sîsenni ǃnâ ǃgarise ra sîsen gu tsîna da ge ǂâis ǃnâ nî ūhâ. (Khomai re 1 Tesalonikaǁîn 5:12, 13.) ǀHaohâb ǃûi-aogu ra dī ǁgūtsâde da ge kaise ra ǃgôaǃgâ sida ǃgao. Xawe da ge ǃgôaǃgâsiba a ǁgau ǁkhā ǀguiǃnâxasib tsî ǁîga mâxōǀkhās tsîn ǃnâ-ū sîsenǀhaos ǃnâ. Tsî ǁîgu tsîn sida “ǀomdi ǂama ra ǃûi” amaga.​—Heb. 13:7, 17.

13. Tae-e da Jesuba xu a ǁkhāǁkhāsen ǁkhā?

¹³ Jesajab ge Jesub xa ge kēbo, mî rase: “ǂĀb ǀkhana hâbab ge ǁîba khôa tide, tsî ǀan ra tsurib di khauǃgauro-eb ge ǁîba ǀari tide.” (Jes. 42:3) Jesub ge khoena ūba hâ i ǀnammi ge ǁîba ge ǂgae îb ǁîna tsâba. ǁÎb ge ǁîn tsâsiba ra ǁnâuǃā ǁîn ǀan ra tsurib hîna ra khau toab ǀkha a ǀgui amaga. Tsîb ge ǁnās ǀkha ǁîna khoexaǃnâsib tsî ǃgūǃnâxasib tsîn ǀkha gere hâ-ū. ǀGôaron tsîn ge ǁîb xa ge ǃgâibahe i. (Mrk. 10:14) Amase da ge sada Jesub khami gā-aisib ǃnâ ǁkhāǁkhās ǁkhāsiba ūhâ tama hâ. Xawe da ge sida ǂharidi ǃnâ da ra aoǁnâba khoena ǂâis ǃnâ nî ūhâ. ǁNās ge ǁîn ǀkha da ga ra ǁgam o da matikō gaxuse nî ǃhoas tsîna ǃkhōǂgā hâ.

14. Tae-i ǃaroma da khoen ǀkha da aoǁnâ sîsenni ǃnâ ra ǃhoa ǀgauba nî kō?

 ¹⁴ Mati da khoen ǀkha nî ǃhoa? ǂGui khoen ge nētsē ǁgai, kaiǂgaoxa ǁamaxū-aon, ǂgīǂgōsi ǃnandi tsî ǂgomdi tsîn xa ǃaromahe hâse ‘tsau . . . tsî ǁnāxūǃnâhe hâ gūn’ khami ī. (Mat. 9:36) Tsîn ge ǁnās xa ǃaromahe hâse ǁîn xa ǀgui ǂâi tsî ǃâubasen-e ūhâ tama hâ. ǁNās ǀkha da ge sada mîde nî kō tsî ǁîna khoexaǃnâ tsî tsaura ǀgaub ǃnâ nî ǃhoa-ū. ǂGui khoen ge sada ra aoǁnâ ǃgâiǂhôas tamas ka io Elobmîs ǂans hîna da ūhâs xa ǂgae-e tama hâ xawe sida di khoexaǃnâ ǀgaub tsî ǁîn ǃnâ ǃgâiǃgâibasensa ūhâs tsîn xa ra ǂgae-e.

15. Mâ ǀgaugu ǃnâ da aoǁnâba da ra khoena ǂâis ǃnâ nî ūhâ?

¹⁵ ǂGui ǀgaugu ǃnâ da ge aoǁnâba da ra khoena ǂâis ǃnâ a ūhâ ǁkhā. Aiǁgause dîde dîs ge kaise a ǃgâi ǁkhāǁkhās ǃgao. Sida dîde da ge khoexaǃnâsib tsî ǃgôasib tsîn ǀkha nî dī. ǀNî aimâba-aob ǂharis ǃnân ge khoena kaise a taoxa tsîb ge ǁîba nēsab ge ǂan o, o taotaoxa dîde dî tama hâ. Nēn ge dîdi hîna i khoe-e ǃeream hō tidena ǃkhōǂgā hâ. Aiǁgauseb ge sao ra dîde dî tama hâ: ‘Elob ǀonsa ǂan-i du a?’ tamas ka io ‘ǂan-i du a Elob Gaosib a taesa?’ ǁNā dîde dî tamaseb ge sao rana ra mî, “tita ge Elobmîsa xu ge ǁkhāǁkhāsen Elob ǀonsa ūhâ ǃkhaisa. ǁGau du ǁkhā î ta a ǁnā ǀonsa?” Khoen tsî ǃhaodi tsîn ge ra ǃkharagagu ǁnās ǀkha da ge ǁgaraga ǂhâ tama hâ. Xawe da ge hoaǁae nau khoena ǂâis ǃnâ nî ūhâ tsî ǃgôasib ǃnâ nî ǃhoa-ū nî, nēs ge aoǁnâ sîsenni ǃnâ hâ khoen tsîna ǂansa ǃkhōǂgā hâ.

16, 17. Mati da sida ǁanǁare-aona ǂâis ǃnâ nî ūhâ (a) omdi ai da ga ra sari o? (b) matikō gaxuse da nî saris ǃnâ?

¹⁶ Mâ ǁae da sida ǁanǁare-aona a sari ǁkhā? Omsa xu oms ǀkha da ga ra ǃgû o, o da ge khoena ǁkhauhe tama hâse ra sari. ǁNās ǀkha î ge a ǂhâǂhâsa î da khoena ǁîn mâsigu ra mā-am ǁaeb ai sari. (Mat. 7:12) Aiǁgause sada ǂharis ǃnâ hâ khoena sâǁaeb ai gaxuse ra ǁom? Di i ga ra io, o du tae-i ǃaroma aibe ǃgangu tamas ka io ǀnai du ge ǃhoa-ū hâ i khoena ǁkhawa sari tama hâba î du ǁnās khaoǃgâ sadu ǂharis ǃnâ sī sîsen?

¹⁷ Matikō gaxuse da nî sari? Khoen ge ǃnāsa ǁaeba kaise a ǀhape ǁnās ǀkha da ge sida sarisa ǃnubu ǃgupuse nî dī. ǃGâi nî ǃkhais ge sadu ǁgamǀhaosa ǃnubuse ūhâsa. (1Kor. 9:20-23) Khoen ga ra mûǂan o sada ǁîn ǁaeba ǃgôa hâsa on ge ǀnîsi a mîba da ǁkhā î da ǁkhawa oaǀkhī. Amase da ge gagab ǂûga aoǁnâ sîsenni ǃnâ nî ǁgau. Nēsa da ga ra dī o, o da ge nî ‘Elob di sîsenǀhao-ao’ kai tsî nēs ǃnâ-ū khoe-e Jehovab ǃoa nî ǂgae.​—1Kor. 3:6, 7, 9.

18. Nau khoena da ga ǂâis ǃnâ ga ra ūhâ o, o da tae-i ǀkhaega ra hō?

¹⁸ ǁNās ǀkha hā re î da dītsâ nau khoena ǂâis ǃnâ ūhâsa, omaris ǃnâs kas, ǀhaohâb ǃnâs kas tsî aoǁnâ sîsenni ǃnâs kas hoasa. ǁNāsa da ga ra dī o, o da ge ǂgui ǀkhaega nēsis tsî hānîǁaeb ǃnâs tsîna nî ǃkhōǃoa. Psalmdi 41:1, 2 ge ra mî: “ǃGâiǃōb ge ǁnā khoeb, ǀgâsa-i xa ra ǂâiba; ǃKhūb ge ǁîba ǂkhaba tsēs ai nîra ore. ǁÎb ge ǃhūbaib ai nîra ǃgâiǃgâxa kai.”