1. Jesuba tae-i ǂhâǂhâsa xū-e ǁîb ǁkhāǁkhāsabega ge mîba?

ǁŌB NÎ ǃuis aiǃâb ge Jesuba ǁîb ǁkhāǁkhāsabegu ǀkhab ge hâ i o, ǁaubexa 30 ǃnāde ǀnam di hâ mîsa gere sîsen-ū. Jesub ge ǁîb ǁkhāǁkhāsabega ge mîba îgu “ǀnamgu.” (Jhn. 15:12, 17) ǁÎgu ūba gu hâ ǀnammi ge nî mâǂoa tsî ǁîga nî ǀgora ǁÎb ǁkhāǁkhāsabegu ase. (Jhn. 13:34, 35) Nē ǀnammi ge ǃkhāǃkhā tama hâ. Jesub ge ǀō-aisa tsî māsenxa ǀnamma ǃoa gere ǁnaeǁgau. ǁÎb ge ge mî: ‘Nē-i ǃgâ-ai kai ǀnam-e i ge khoe-e ūhâ tama, khoe-i nî ǁî-i khoen ǃaroma ǁî-i ûiba mā, di. Sago ge a ti khoe [ǀhōsa], tita ra mîmā gona go kara dīo.’​—Jhn. 15:13, 14.

2. (a) Tae-e da Elob khoen ǁaegu ra mû? (b) Mâ dîde da nî ǃeream?

² Aitsama māsenxa ǀnammi tsî khôahe ǁoasa ǀguiǃnâxasib ge Jehovab ǃoaba-aona ra mâǂoa kai nētsē. (1Jhn. 3:10, 11) Matikōse da Jesub gere ǁgau ǀnamma ra ǃgôaǃgâ hîna Jehovab ǃoaba-aon ǁaegu hâba, ǃkharagaǃnâgu ǁaedi, ǃhaodi, gowagu tsî khaoǃhūga xu da ga hâ xawe. ǀNîsi da ge ra ǂhâ: ‘Tae-i ǃaromab ǀnamma a ǂhâǂhâsa nētsē? Jehovab tsî Jesub tsîkha mati ǀnammi  ǃnâ ra omkhâi da? Mâ ǀgaub ǃnâ da Jesub gere ǁgau ǀnamma a ǁgau ǁkhā hîna ra ‘ǂnubikhâiba [omkhâiba]’?’​—1Kor. 8:1.

3. Nē ‘ǀuniga tsēde’ mati khoena ra tsâǀkhā?

³ Ûib ge “ǀhupub tsî ǃoab” tsîkha xa ǀoa hâ nē “ǀuni tsēdi” ǃnâ tsîn ge ǂgui khoena kaise ǃgoma ra tsâ. (Psa. 90:10; 2Tim. 3:1-5) ǂGui khoen ge ǀûsen ǂgaos ǀguisa ra dī. Ôaǃnâ-aon ge ra mî 800 000 xa ǃnāsa khoen ge mâ kurib hoaba ra ǁō aitsama ǃgamsens ǃnâ-ū, nēs ge mâ 40 sekunde gu hoagu ǃnâ ra ī. Kaise tsûtsûsas ge sida ǃgâsan tsîn ge nēs ǃnâ a māǁnâsen ǃkhaisa tsî aitsama a ǃgamsensa.

4. Mâ khoega ǁō ǂgaos tsâsiba ge dan?

⁴ Elobmîs ǁaegu ǃnâs tsînan ge Eloba gere ǃoaba khoena ǁîn mâsib xa gere ǂkhabuǂâi tsî gere ǁō ǂgao. Aiǁgause, Jobi ge tsûb xa gere ǃgae: “Tita ge ǀamose ûi ǂgao tama hâ” dib ge ge mî. (Job 7:16; 14:13) Jonab ge ge tsûaǂgao xūn ge ǁîb ǁgaumâis ǃnâ ǃgâise ǃgû tama io tsîb ge ge mî: “Tsî nēsi ǃKhūtse, ti ǀomsa ūxu te, ǁōs ûis xa a ǃgâiba te xuige.” (Jon. 4:3) ǂGomǂgomsa kēbo-aob Eliab tsîn ge ǁîb mâsib xa kaise tsâǀkhāhe tsî gere ǁō ǂgao. ǁÎb ge ge mî: “ǂÂu go nēsi, ǃKhūtse, îts ǁnâi ti ǀomsa ū.” (1Gao. 19:4) Xawe Jehovab ge ǁnā ǃoaba-aogu nî ûi ǃkhaisa gere ǂhâba. ǁÎga ǀgoraǃgâs xab ge Jehovaba ge huigu îgu ǁō ǂgaos tsâsiba dan tsî ǁîga ǀnammi ǃnâ ge omkhâi îgu ǁÎba ǃoaba ǁkhā.

5. Tae-i ǃaroman sida ǃgâsana sida ǀnamma nēsi ǂhâ hâ?

⁵ Sida ǃgâsan ga ǀûsen tama i xawen ge ǁgâiba ra ǃaroma mâsiga ra hōǃâ tsî ǀnammi ǃnâ omkhâihesa ǂhâ hâ. ǀNîn ge ǁgâiǀāhes tsî ǃhōhes tsîna ra hōǃâ. ǀNîn ge mîǁgaiǁgaihe tsî ra ǀhoehe sîsen-aib ai. Tamas ka io kaise ǃgarise ra sîsen tsî tsau hâse hoaǁae ra tsâ. ǀNîn ge oms ai ǁîn ǀgaiba ra ūbē ǃgomsiga ra hōǃâ tsî ǀnîsi Jehovaba ǃoaba tama hâ ǃgame i hâ khoe-i xa ra mîǁgaiǁgaihe. Nēs xa ǃaromahe hâsen ge ǂgui ǃgâsana ǀhaohâb ǃnâ sorosises tsî emosioneelses tsîna khôaǁnāsase ra tsâ. Ham-e ǂkhabuǂâi ra ǃgâsana a hui ǁkhā?

6. Jehovaba mati ǁîb ǃoaba-aona ǀnammi ǃnâ ra omkhâi?

⁶ Jehovab ge ǁîb ǃoaba-aona ra omkhâi ǁîna ǁÎb ǀnamma ǁgaus ǃnâ-ū. Matikōse i ge Israelǁaesa ǂkhâǃnâ sao ra mîdi Jehovab ge ǃhoade ǁnâusa: “ǃGomǀgausats ge ti mûǁae isa xuts ge ge ǂkhaisa, tsî tita ge ge ǀnam tsi. . . . Tā ǃao, tita sa ǀkha hâ xuige.” (Jes. 43:4, 5) Jehovab ǃoaba-ao-i ase du ge a ǂgomǃgâ ǁkhā ǁîb ǀnamxaǃnâ ǀgaub ǃnâ a ǀnam dusa. * Elobmîs ge sao ra-e ra mîmâi ǁnān hîna ama ǃoaba ǀgauba ra saon xa: “ǁÎb ge sa ǂama nîra ǃgâiaǂgao dâb ǀkha.”​—Sef. 3:16, 17.

7. Jehovab ǀnamma mâ ǀgaugu ǃnâ ǁgûs di ǀnammi khami i? (Tsoatsoas ǃnâ hâ ai-īsiba mû re.)

⁷ Jehovab ge ge mîmâi ǁîb ǃoaba-aonab  ge kōǃgâ tsî nî ǁkhaeǂgao ǃgomsigan ga ra hōǃâ o. “O du ge ǁîs di ǂhoweb ai nîra tanihe, . . . ǀGui-i ǁgûs xa ra ǁkhaeǂgaohe-i axase ta ge tita sado nîra ǁkhaeǂgao.” (Jes. 66:12, 13) Kaise ǃgâi ai-īsib ge nēpa, ǁgûs ge ǁîs ǀgôaro-e ǁîs ǂhowes ai ra tani. ǁKhā ǀgaub ǃnâb ge Jehovaba nē ǂkhōs ǃnâ-ū ǁîb ǀaexa ǀnamma ǁîb ǃoaba-aona ra ǁgau. Jehovab ǃoa-ai da ge a ǀō-aisa tsî ǀnamǀnamsa, tā ǁnāsa ǀuru re.​—Jer. 31:3.

8, 9. Jesub di ǀnamma mati a ǀgaiǀgai da ǁkhā?

⁸ Sida tsîn ge ǃaromasa ūhâ Elob di ǀnammi xa ǂgaehesa: “ǁNātikōseb ge Eloba ǃhūbaiba ge ǀnam, ob ge ǁîb di ǀguise ǃnae hâ ǀGôaba ge mā, ǁîb ǃnâ ra ǂgomn hoan kāǁō tidese, xawen nî ǀamo ûiba ūhâse.” (Jhn. 3:16) Jesuba mâ ǀnamma ge ǁgau, ǁîb ûibab ge sida ǃgao a mā o? Tsî ǁnā ǀnammi ge kai ǁkhaeǂgaos ase sida ība. Elobmîs ge ra mîmâi “ǂōǂōsib tsî ǁgâiǀāb” tsîkha ge Xristub ǀnamma “xu a ǀgora” da ǁoa.​—Rom. 8:35, 38, 39.

⁹ Sorosises, emosioneelses tsî gagasises tsîna ra khôaǁnā da xūna ǃkham ǃoas ge Xristub ǀnammi xa ra īǁkhā kaihe î da mâǀgai ǁkhā. (Khomai re 2 Korinteǁîn 5:14, 15.) Jesub ǀnammi ge ǀgaiba ūhâ kōǃgâ das diba tsî ra hui da î da tā ǀûsen. Tsūkēǃgâgu, ǁgâiǀāgu, khoexaǃnâ tsûaǂgaogu tsî ǀû tamase ǂâiǂhansens tsîn hoan ǂam-aib ge nî hui da.

10, 11. Ham-e nau ǂkhabusana a ǁkhaeǂgao ǁkhā? ǁGuiǃā re.

¹⁰ ǀGui ǀgaub Jehovab ǁîb ǀnammi ǃnâ ra omkhâi dab ge ǀhaohâb ǃnâ-ūsa. Hoa da ge sida ǃgâsana ǀnammi ǃnâ a omkhâi ǁkhā gagasise ǀguis ose xawe emosioneelses tsîna. (1Jhn. 4:19-21) Apostel Paulub ge Xristeǁîna sao rase ra ǂkhâǃnâ: “ǁNā-amaga ǁnamagu [ǂkhâǃnâgu] re, î-i nē-e nau-e ǂnubikhâi, ǁkhāti du ra dī khami.”  (1Tes. 5:11) Ama as ge nēs ge hoa da xa nî dīhe ǀhaohâb ǃnâ tsî ǀhaohâb ǃûi-aogu xa ǀgui dīhe tide. ǁNās ǀkha da ge Jehovab tsî Jesub tsîkha a ǁgae ǁkhā sida ǃgâsana ǁkhaeǂgao tsî omkhâis ǃnâ.​—Khomai re Romeǁîn 15:1, 2.

¹¹ ǀNîn hîna ǀhaohâb ǃnâ emosioneel ǃgomsina ūhân ge ǀaeǃkhō-aogu di huiba a hōǁkhā. (Luk. 5:31) ǀHaohâb ǃûi-aogu tsî ǀnî ǃgâsan hîna ǀhaohâb ǃnâ hân ge nî ǂanǃgâ ǁîn ǀaeǃkhō-ao tama hâsa nēti i mâsib ǃnâ. Xawe hoan ge ǂhâǂhâsa ǃâba ǀhaohâb ǃnâ ra ǀuru î da “ǂkhabuǂâi hâna ǁkhaeǂgao, ǂkhabusana ǂkhâǃnâ î du ǃnūǃnâxa hoan ǃoa.” (1Tes. 5:14) Hoa Xristeǁîn ge ǀnamxaǃnâsib tsî ǃnūǃnâxasib tsîna ra sîsen-ūse nē ǂkhabusana nî ǂkhâǃnâ. Sado khoena ǁkhaeǂgao tsî ra ǂǃkhâǃnâ? Khoen ra ǁkhaeǂgaohe ǀgauba ǂans ge kaise nî hui du î du ǃamku ǀgaub ǃnâ ǁnāsa dī ǁkhā.

12. ǀNî ǃgâsas aiǁgausa mâ re.

¹² Sida ǀnamma mati ǁîn hîna emosioneelse tsû hâna a hui ǁkhā? “ǀNî ǁaeb ai ta ge ǃgamsen ǂgaos ǂâide gere hō,” dis ge Europab ǃnâ ǁan hâ ǃgâsasa ra mî. “Xawe ta ge ǃgâise ra ǂkhâǃnâ te ǃgâsana ūhâ. Ti ǀhaohâb ǁanin ge kaise ge hui te. ǃGâsan ge hoaǁae ǀnamxaǃnâ ǀgaub ǃnâ gere ǂkhâǃnâ te. Hoan ge ge ǀū-i depressib ǀkha ta ǃgomsiba ūhâsa xawen ge hoaǁae gere hâ xōǀkhā te. ǀNî khoe-aogu ra ge ti gagasi ǁgûn ase ī. ǁÎra ge tsēs hoasa ra sari te tsî kaise ǃgâi ǀgaub ǃnâ ra kōǃgâ te.” Amase i ge hoa khoena ǀgui ǀgaub ǃnâ ǁkhaeǂgao tama hâ. Xawe sada di khoexaǃnâ ǀgaub ge ǁîn ûib ǃnâ kai ǀkharaǀkhara-e a ūhâ ǁkhā. *

13. Tae-e a ǂhâǂhâsa khoe-e ǂkhâǃnâs ǃnâ?

¹³ ǃGâi ǃgâ-ao kai re. (Jak. 1:19) ǁNâuǃāxa ǀgaub ǃnâ ǃgâs ge a ǀnammi di ǁgauǁgau. Sadu ge ǀnîsi ǃamku tsî khoexaǃnâ ǀgaub ǃnâ dîde a dî ǁkhā, nē khoe-i tsâsiba ǁnâuǃās ǃaroma. ǁNā ǀgaub ǃnâ du ge sadu ǃgâsa-i ǃoagu khoexaǃnâsiba ra ǁgau. A-i sadu ais ǁgâiǂuisen ǀgauba ǀnamxaǃnâsib ǀkha du ra ǃgâsa ǁgau re. ǀNîsi i ga Xristeǁî-e kaise ǂguiǃnâgu xūna ga ra ǃhoa o, o ǁî-e ǃnūǃnâxasib ǀkha ǃgâre tā ǁî-i ra ǃhoa hîna ǂhani re. ǃNūǃnâxasib ǀkha ǃgâs ge nî hui du ǁî-i di tsâsiba ǁnâuǃās ǃnâ. Sadu ga ra ǁgau o ǁî-e du amabes ǃnâ ra tsâbasa os ge nēsa ǁî-e nî ǁkhaeǂgao.

14. Tae-i ǃaroma da mîǁgaiǁgais ǀgauga xu nî ǂgōsen?

¹⁴ Mîǁgaiǁgais ǀgauga xu ǂgōsen re. Nēti i ǀgauga ūhâs ge depressib ǃgomsiba ūhâ ǃgâsa-i ǃgao ǃgâi tama hâ, sadu mîdi ǁî-e a tsûtsûǂgao ǁkhā amaga. Elobmîs ge ra mî: “ǀGuib ge hâ, mîdi ǀkha ǂâioǃnâse gôab ra ǃkhā khami ra ǀkhība, xawe nams gā-aigu dis ge a soǀôa.” (ǂKhm. 12:18) ǀNî ǁaeb ai da ge ǂâi tamase ǃgâsa-e a ‘ǃkhā’ ǁkhā sida mîdi ǀkha. Xawe ǂâi tamase da ga ra ‘ǃhoa’ o, os tsîna da ge ǃgâsa-e a tsûtsû ǁkhā. Nau ǃgâsa-e ǀnammi ǃnâ ǂkhâǃnâs ge ra ǂgaoǀkhā î  da khoexaǃnâsiba ūhâ tsî ǁîn ra tsâ ǀgauba mûǂan.​—Mat. 7:12.

15. Tae-e da a sîsen-ū ǁkhā î da ǃgâsa-e ǁkhaeǂgao?

¹⁵ Nauna Elobmîs ǀkha hui re. (Khomai re Romeǁîn 15:4, 5.) Elobmîs ge ǃanu xoas hîna ra ǁkhaeǂgaosa. ǁÎs ge “sâsasib tsî ǁkhaeǂgaos” tsîna ra mā Eloba xu ra hāba. ǁKhaeǂgao ra xoadi ǂam-ai da ge ǂgui Elobmîs ǁkhāǁkhāsen-ū ǂkhanina ūhâ. Watch Tower Publications Index tsî The Research Guide for Jehovah’s Witnesses tsîna da ge a sîsen-ū ǁkhā. Nēn ge a hui da ǁkhā ǁkhaeǂgaos ǃgao hâ xoade hōsa. Tsî ǁkhāǁkhāsen-ū ǂkhanidi ge a hui da ǁkhā î da ǃgâi tsî khoexaǃnâ ǀgaub ǃnâ ǁkhaeǂgao.

16. Mâ ǀgauga da nî ūhâ tsûaǂgao hâ ǃgâsa-e da ga ra ǂkhâǃnâ o?

¹⁶ Tsâsib tsî tsaurasib tsîn ge ǁî aitsama ǀnamsen tama hâ khoe-i ûib ǃâ tsî i ge ǁkhaeǂgao tsî nauna ra omkhâi. Jehovab ge a “ǁGûb ǀkhomxaǂgaosigu” tsî “ǁkhaeǂgaob hoab diba.” (Khomai re 2 Korinteǁîn 1:3-6; Luk. 1:78; Rom. 15:13) Paulub ge nēs ǃnâ ǃgâi aiǁgausa ge ǁgau, netib ge xoa o: “Xawe sadu ǁgâiǀāhe radob nî ǀhâi-e mādawa-amsa sige ǀkha, sada ǃKhūb Jesub ga ǀhomma xu ǂhaiǂhaiseno ǁîb ǀgaib di ǀhomǃgāgu ǀkha,ǁhabu ra ǀaedi ǀkha, Eloba ǂan tamanab nî ǀkhaose, tsî sada ǃKhūb Jesub Xristub di ǃgâiǂhôasa ǁnâuǀnam taman.” (1 Tes. 2:7, 8) Elob ūhâ ǀgauga ǁgaes ǃnâ-ū da ge tsûaǂgao hâ ǃgâsa-e a hui ǁkhā.

17. Tae-i ǀnōsa mûǂuisa da nî ūhâ, î da sida ǃgâsana ǀnammi ǃnâ omkhâi?

¹⁷ Tā ǀoasa kurusa ǃgâsana xu ǃâubasen re. ǀNōsa mûǂuisa da ge sada gagasi ǃgâsan xa nî ūhâ. ǁNâuǃāxa i ge tide sida ǃgâsan tsūdī da tide di ǂâisa, nēs ge a ǂkhîoǃnâ kai da ǁkhā. (Aoǁn. 7:21, 22) ǂÂis ǃnâ ūhâ re Jehovab ge ǁnâuǃāxa ǂgaoǀkhāde ǁîb ǃoaba-aona ūba hâ. Jehovab aiǁgausa da ga ra ǁgae o, o da ge nau ǃgâsan dīsādi ai kō tide. (Efe. 4:2, 32) ǁÎn ǃnāsase dī tama hâ xūn xa da ge ǂâi ǂgao tama hâ xawe ǁîn ǀnai ǃgâise ra dī xūn ǃgao nî koa nî. ǁNās ge ǁîna a ǂkhâǃnâ ǁkhā. ǂHauǃnâse ǃgâsana ǀnammi ǃnâ koas ge ǁîna nî omkhâi tsî ǁîna nî hui în “koa-e” ūhâ ǁîn ǃoabas ǃnâ. ǁNās ge kaise nî ǃgâi dīsa, ǁaixa tsî ǀnî ǃgâsan ǀkha ǀgopeǀnōsens xa.​—Gal. 6:4.

18. Tae-i ǂkhâǃnâsa da ūhâ î da ǀnammi ǃnâ omkhâigu?

¹⁸ Jehovab gūn hoan ge ǁÎba a ǀō-aisaba, nēs ge Jesub xoremarib xa a īǁkhā kaihe amaga. (Gal. 2:20) Sida gagasi ǃgâsana da ge ǂgaoba xu a ǀnam. Tsî ǁîna da ge ǃgâi tsî ǀnamxaǃnâ ǀgaub ǃnâ ra kōǃgâ ǂgao. ǁÎna khoakhoas ǃgao da ge “ǁnâi ǂkhîb dina sauruǃgon, tsî ǂnubikhâigus ǃoa hân tsîna” nî dī. (Rom. 14:19) Matikōse da hoa da ra mûǂui Paradaisa ǃoa, ǁnāpa da ge ǃaroma na ūhâ tide ǂkhabuǂâis dina. ǁNāpa i ge ǀaegu, torogu, ǁōb, ǁgâiǀāb, omaris ǃgomsigu tsî tsûaǂgaob tsîna hâ tide. 1000 Kurigu ga ra ǃkharu o, on ge hoa khoena ǀoasa kurusa nî ūhâ. ǁNān hîna ǀuniga ǃâisa ra ǃkharun ge Jehovab ǀgôan ase nî ǃkhōǃoahe tsî ‘Elob ôan ǂkhaisib di ǃnorasisa nî hō.’ (Rom. 8:21) A da omkhâi ra ǀnamma hoaǁae ǁgaugu tsî huigu re î da hoa da ǂkhîb tsî kai ǀkhaegu tsîna ǃkhōǃoa.