1. Mâ ǃâubasensab ge Jehovaba mā da?

 JEHOVAB ge buruxa ǃâubasensa mā da hâ, ǀamo ûib disa. ǀNîn ge ra ǃâubasen gagasi kurusaben ase ǀhommi ǃnâ ǀamose ûisa. (1Kor. 15:50, 53) ǂGuin ge ra ǃâubasen ǀamose ǃhūbaib ai ûisa, ǀoasa ǂurusib tsî ǂkhîb ǃnâ. (J.ǂHa. 21:3, 4) Nēsi da ga ǀhommi tamas ka io ǃhūbaib ai ǀamose ûisa ga ra mûǂûi. Xawes ge sida ǃâubasensa kaise a ǀō-aisaba da.

2. Sida ǃâubasensa tae-i ai a ǃgaoǃgaosa, tsî tae-i ǃaroma?

² Elobmîs ǃnâ ra sîsenūhe mîs “ǃâubasens” ge a ǁguiǃāhe ǁkhā. “Hānî ǃgâi xūn nî īs ra ǃâubasenhesa.” Sida ǃâubasens hānîǁaeb dis ge a ǁapoǁaposa, Jehovaba xu i ra hā amaga. (Rom. 15:13) ǂAn da ge a tae-eb ge mîmâisa. Tsî da ge a ǂan ǁîb hoaǁae ǁîb mîsa ra dīǀoaǀoasa. (Num. 23:19) Jehovab turab tsî ǀgaib tsîna ūhâ sa da ge ra ǂgom. ǁÎb ge dīb nî di a mî xūn hoana nî dīǀoaǀoasa. ǁNā-amaga sida ǃâubasens ge sida ra mûnanai xūn. Tamas ka io ǂhâba da hân ai ǃgaoǃgaosa tama; xawe ǁgauǁgaudi tsî amab ai a ǃgaoǃgaosa.

3. Tae-e da nē ǁkhāǁkhāǃâs ǃnâ nî ǃhoaǃgao? (Psalmdi 27:14)

³ Sada ǀhomsi ǁGûb ge a ǀnam da tsîb ge ǂhâba hâ, î da ǁîb ǃnâ ǂgom. (Khomai re Psalmdi 27:14 sa.) Sida ǃâubasens ga Jehovab ǃnâ ǀgaisa, o da ge ǃgomsiga a mâǃkharu ǁkhā. Tsî da ge hānîǁaeba ǁkhoaǂgaosib tsî ǃgâiaǂgaob ǀkha a tani ǁkhā. ǀKhī da kō re, matis sida ǃâubasensa ra ǁkhauba da sa. ǂGuro da ge nî ǃhoaǃgao matis ǃâubasensa ankers tsî danasa ra ǁkhauba ǀgapas khami īsa. ǁNāpaxu da ge nî ǃhoaǃgao, mati da sada di ǃâubasensa a ǀgaiǀgai ǁkhā ǀgauba.

4. ǃÂubasensa mati anker-i khami ī? (Hebreǁîn 6:19)

⁴ Hebreǁîna ǃoab ge xoa sîǂkhinis ǃnâb ge, apostel Pauluba. Sida ǃâubasensa anker-i ǀkha gere ǀgopeǀnō. (Khomai re Hebreǁîn 6:19 sa.) ǁÎb ge hoa ǁae ǂgaudi ai gere ǂoa. Tsîb ge ge ǂan i, anker di ge ǂgaude ǃkhōmâis ǃaroma gere sîsen ūhesa. ǀGui ǁaeb ǂgaus ai ǃnarisao hâ hînas ge, ǀgaisa huriǂoasa ge khâi. ǁNā ǁaeb ǃnâb ge ge mû mati gu ǂgaus ǃnari-ao ga, ankerde hurib ǁgammi ǃna ra aoǂgā ǀgausa, îs ǁkhaehe tsî ǀuidi ai tā ǂgâusen. (ǃNǃkh. 27:29, 39-41) Ankers ǀgūse ǂgausa ra ǃkhōmâi khamis ge sida di ǃâubasensa Jehovab ǀgūse ra ūhâ ǀgara da, î da tā ǂgae-oasen. Kai ǁgaoǂoas khami i ǃgomsina da ga ǃkharu ǃnâ o. Sada ǃâubasens ge ǃnomsase ra ūhâ da ǃgomsina da ga ūhâ o. Xūn hānîǁaeb ǃnâ nî ǃgâisa da ra ǂgom amaga. ǂÂis ǃnâ ūhâ re, Jesub ge ge mî ǃgôaǃgonhe da nîsa. (Jhn. 15:20) ǁNā-amaga î ge Jehovab mîmâiba da hâ xūna ǂâiǃgâsa ra huida, î da ǁîba ǃoaba ǀgara.

5. Matis ge ǃâubasensa Jesuba hui, ǁōb xab ge ǃoa-e o?

⁵ Kō re ǃâubasens ge mati Jesuba a hui ǀgausa, îb ǂgomǂgomsase hâ. Tsûtsûsa ǁōbab nî ǁōsab ge ǂan i xawe. Pinkstertsēs 33ǁî kurib ge apostel Pauluba. Psalmdi ǂkhinisa xu kēbosa ge sîsenū. Hîna ra ǁguiǃāsa Jesub ge ǃnomsa tsî ǂgomǃgâsiba gere ǁgausa: “ǁKhātis ge ti sorosa ǃâubasens ǃnâ nî ûi. Sats ge ti ǀomsa ǁŌhân Hâǃkhaib ǃnâ ǁnāxū tide. Sats ge mā-am tide sa ǃAnub nî ǁgaoǁgaosasiba mû ǃkhaisa. . . . ǃGâiaǂgaob ǀkhats ge ra ǀoaǀoa te, sa ais aiǃâ.” (ǃNǃkh. 2:25-28; Psa. 16:8-11) ǁŌb nî sab ge ǂan i xaweb ge Jesuba. ǀGaisa ǃâubasensa ge ūhâ i, Elob khâisa nî mābi ǃkhaisa. Tsîb ǃgâiba nî ūhâsa ǁîb Îb ǀkha ǀhommi ǃnâ ǁkhaba ǀhao-oasa.—Heb. 12:2, 3.

6. Tae-eb ge ǀgui ǃgâsaba ǃâubasens xa mî?

⁶ Sida Xristeǁî ǃâubasens ge ǂgui ǃgâsana ge hui în mâǀgai. Leonard Chinni aiǁgausa kō re, ǂgomǂgomsa ǃgâsab hîna ge Englandi ǃnâ gere hâ ba. ǂGuro ǃhūbaib torob ǃnâb ge tronkes ǃnâ ge ǂgāhe, torob ǃnâ ǁkhaosab ge ǂkhā o. ǀGam ǁkhâgab ge ǀguri ge ǂganam ǂnûihe. ǁNās khaosib ge gere ǁgarihe ǃgari sîsenne dīsa. “ǃKharuǃnâ ta ge xūn ge ge huite î ta ǂanǃgâ” tib ge ega ge xoa, “ǃÂubasensa ta ǂhâhâsa, î da mâǀgai. Aiǁgaude da ge ūhâ Jesub, apostelgu, kēbo-aogu. Tsî ǀō-aisa mîmâidi Elobmîs ǃnâ hâ di tsîna xu. Nēn hoan ge kai ǃâubasensa ra māda hânîǁaeb ǃaroma. Tsî ra ǀgaiǀgaida î da mâǀgai.” ǃÂubasens ge Leonarda anker-i khami ge iba i. Tsî sada tsîna anker-i ase a iba ǁkhā.

7. ǃGomsina mati sida ǃâubasensa ra ǀgaiǀgai? (Romeǁîn 5:3-5; Jakobub 1:12)

⁷ Sida ǃgomsina da ga mâǀgai. Tsî Jehovab huiba ga ra hōǃâ, o da ge ra ǂanǃgâ. ǁÎb mā-amsa da ūhâ ǃkhaisa, nēs ge sida ǃâubasensa ra ǀgaiǀgai. (Khomai re Romeǁîn 5:3-5; Jakobub 1:12 sa.) ǁNās ǀkha da ge ǀgaisa ǃâubasensa ūhâ, ǂguro da ge ǃgâiǂhoasa ūǃoas xa. ǁGâuab ge ǃgomsin ǀkha ra ǁgâi da ǂgao. Xawe da ge Jehovab huib ǀkha, mâ ǀguiǀguibe-i hoa-e a mâǀgai ǁkhā.

8. Matis ǃâubasensa toroǀgapas khami ī? (1 Tesalonikaǁîn 5:8)

⁸ Elobmîs ge sida ǃâubasensa, ǁkhauba ǀgapas ǀkhas tsîna ra ǀgopeǀnō. (Khomai re 1 Tesalonikaǁîn 5:8 sa.) Toro  ǃkham-aob ge toroǀgapasa ra ǀgapa îb. ǁÎb khākhoeb ga ǁnāǂambi ǂgao, o ǁîb danasa ǁkhauba. Sida gagasi torob ǃnâ da ge sida ǁnâuǃā ga nî ǁkhauba, ǁGâuab di ǁnāǂamde xu. ǁÎb ge ǂgui ǃkharagagu xūna ra sîsenū, îb sida ǃâitsâ. Tsî sida ǂâi ǀgauga ǁgaiǁgai. Toroǀgapas toro ǃkham-aob danasa ra ǁkhauba khamis ge ǃâubasensa. Sida ǂâiǀgauga ra ǁkhauba, î da Jehovab ǃoagu ǂgomǂgomsase hâ ǀgara.

9. Mâ ǀamǂoasa hâ khoen ga ǃâubasen-e ūhâ tama io?

⁹ Sida ǀamo ûib ǃâubasens ge nî huida, î da gā-aise ǁhûi. ǀNî mîdi ǃnâ sida ǃâubasens ǃnâ da ga ǂkhapu. Tsî sada di turagu xa ǀgui ǂâi tsoatsoa, o da ge sida ǀamo ûib ǃâubasens xa a ǀuru ǁkhā. Kō re ǃkharuge ǁaeb Korintes ǃnâ gere hâ Xristeǁîn mâsiba. Elob di ǂhâǂhâsa mîmâis ǃnân ge ge ǂgom ǀû—ǃâubasens ǁō hân khâis dīsa. (1Kor. 15:12) Paulub ge ge mî, ǁnān hîna ǁō hân di khâis ǃnâ ǂgom taman ge, ǁîn di turaga dīǀoaǀoas ǀguisa ra ûiba. (1Kor. 15:32) Nēsin ge ǂgui khoen hîna Elob mîmâis ǃnâ ǃâubasen-e ūhâ tamana. ǁAerob di ǁkhoab ǀguiba ra ûiba. Xawe da ge sida ǂgomǃgâsiba hānîǁaeb Elob mîmâis dib ǃnâ ūhâ. Sida ǃâubasens ge ǀgapas hîna, sida danasa ra ǁkhaubas khami, sida ǁnâuǃāga ra ǁkhauba. Tsî ra huida î da tā sida xa ǀgui ǂâi. ǁNās ge sida ǀhōsagusis hîna da Jehovab ǀkha ūhâsa nî ǁgaiǁgai.—1Kor. 15:33, 34.

10. Matis ǃâubasensa a ǁkhauba du ǁkhā, ama tama ǂâiǀgauga xu?

¹⁰ Sida ǃâubasens ǀgapas ge sida ǂâiǀgauga a ǁkhauba ǁkhā. Tātsē da ge Jehovaba ǂkhîǂkhî tide, di da ga ǂâi o. Aiǁgausen ge ǀnîna a ǂâi ǁkhā: ‘Tātsē ta ge ǁnān hîna ǀamose nî ûin ǁaegu hâ tide. Tita ge anu tama tsî ta ge Jehovab ra ǂgaoǀkhāte xūna dīhō tide.’ ǂÂi-oa re Jobi di ama tama ǁkhaeǂgao-aob. Elifasi ge Jobi ǀkha ǁkhā ǀgauba ge sîsenū. Elifasi ge ge mî: “Tare-e khoe-e, o i a ǃanu ǁkhā?” Aiǃgû tsîb ge Elob xa ge mî: “Elob ge ǁîb ǀhomǃgāgu ǂûga ǂgomǃgâ tama hâ, tsî ǀhommi tsîn ge ǁîb mûǁae ǃanu tama hâ.” (Job. 15:14, 15) ǁNāb ge a ǂhumi. ǂÂihō re, ǁGâuab ge ǂhâba hâ î du ǁnā ǂâiǀgauba ūhâ. ǁÎb ge a ǂan ǁnā ǀgaub ai du ga ǂâi ǀgara, o du sadu ǃâubasensa nî ǂoaǃnâ tsoatsoasa. ǁNā-amaga ǁnāti i ǂhumiba xu ǂgōsen, î Jehovab mîmâis ai ǂâisa ǂnûi. Tātsē du ge ǂgom ǀoro tide Jehovab ǀamose du nî ûi ǃkhaisa ǂhâba hâsa. Tsîb nî hui du sa î du ǁnā mîǁguiba sīǃnâ.—1Tim. 2:3, 4.

11. Tae-i ǃaroma da nî ǃnūǃnâxa sada ǃâubasens nî dīǀoaǀoahesa da ǃâuhâ hîna?

¹¹ Hoaǁae i ge supu tama hâ, sida ǃâubasensa ǀgaisase ūhâ ǀgarasa. ǃNūǃnâxa ǀû tsoatsoa ǁkhā da ge a, ǃâusa ib Eloba ǁîb mîmâide dīǀoaǀoa. Xawe Jehovab ge ǀamosib kōse hâ. ǁÎb ǁaeba ra mû ǀgaub ge sida mû ǀgauba xu a ǀkhara. (2Pet. 3:8, 9) ǁÎb di mîmâideb ge nî dīǀoaǀoa ǃgâi ǀgaub ai. Xaweb ge sada ra ǃâubasen ǁaeb ai dī tide. Tae-e a huida ǁkhā î da sida ǃâubasensa, ǀgaisase ūhâ ǀgara, ǃnūǃnâxase da Jehovab ǁîb mîmâide nî dīǀoaǀoasa ǃâuhâ hîna?—Jak. 5:7, 8.

12. Hebreǁîn 11:1, 6 ǃoagus mati ǃâubasensa, ǂgoms ǀkha ra sîsenǀhao?

¹² Sida ǃâubasensa da ge ǀgaisase nî ūhâ ǀgara, Jehovab ǀgūse da ga hâ o. ǁÎb hîna sida ǃâubasensa ra ama ī kaiba. ǃÂubasensa da ga ra ūhâ ǂgao, o da ge nî ǂgom Jehovab hâsa. Tsîb “ǁîba ra ôana ra mādawa-am ǃkhaisa.” (Khomai re Hebreǁîn 11:1, 6 sa.) Jehovab amase hâ ǃkhaisa da  ga ǂgom, o da ge ǃnāsa ǂgomǃgâsiba nî ūhâ. ǁÎb mîmâib ge xūn hoana nî dīǀoaǀoasa. ǀKhī re î da ǃhoaǃgao ǀgaugu hîna da. Sida ǀhōsagusisa Jehovab ǀkha ǀgaiǀgai. Tsî sida ǃâubasensa ǀgaisase ūhâ ǀgara ǁkhā ga.

13. Mati da Eloba ǃoa a ǀgū ǁkhā?

¹³ Jehovaba ǃoa ǀgore tsî ǁîb mîsa khomai re. Jehovaba da a mû ǁoa, xawe da ge ǁîba a ǀgū ǁkhā. ǀGores ǃnâ-ū da ge ǁîb ǀkha a ǃhoa ǁkhā. Tsî a ǂgomǃgâ ǁkhā ǁnâu dab ra ǃkhaisa. (Jer. 29:11, 12) Eloba da ge a ǃgâ ǁkhā, ǁîb mîsa khomai tsî ǂâiǃgâs ǃnâ-ū. ǃKharuge ǁaeb ǃnâb ge Jehovaba mati, ǁîb ǃoagu ge ǂgomǂgomsa ina gere kōǃgâ ǀgausa da ga khomai. Os ge sida ǃâubasensa nî ǀgai ǀgara. Hoa xūn Elobmîs ǃnâ xoahe hân ge “sada ǁkhāǁkhās ǃaroma xoahe hâ, tanixasib tsî ǀgaiǀgaiǃnâs tsîra Xoade xu hâra ǃnâ-u da nî ǃâubasensa ūhâse.”—Rom. 15:4.

14. Tae-i ǃaroma da Jehovab ge nauna dība xūna nî ǂâiǃgâ?

¹⁴ Jehovab ge ǁîb mîmâide dīǀoaǀoa ǀgaub xa ǂâiǃgâ re. Kō re tae-eb ge Jehovaba Abrahammi tsî Sara hâra dībasa. ǁÎra ge kaise ge kaira hâ i, ǀgôana hōs xa. Xaweb ge Eloba ge mîmâiba ra ǀgôa-e ra nî hōsa. (Gen. 18:10) Abrahamma mati ge tanisen? Elobmîs ge ra mî: ǁÎb ge ‘ǃâubasens tsî ǂgomsa ge ūhâ i, ǂgui ǁaedeb ǁgûse nî ībasa.’ (Rom. 4:18) Abrahammi ge ǀū-i matib Eloba ǁîb mîmâisa nî ama kaisa. Xaweb ge Jehovab ǃnâ ǂgomǃgâsiba ge ūhâ i, ǁîb mîmâisab nî dīǀoaǀoasa. ǁNā ǂgomǂgomsa-aob ge ge ǂkhabuǂâi tama hâ i. (Rom. 4:19-21) Nēti i ǃnaeǃkhaidi ge ra ǁkhāǁkhāda. Hoaǁae da Jehovab ai a ǂgomǃgâ ǁkhā ǃkhaisa. ǁÎb mîmâisab nî dīǀoaǀoasa. Mati ǀguib ga mâsiba ga ra i xawe.

15. Mati io da Elob ge dība da xūn xa nî ǂâi-oa?

 ¹⁵ ǂÂiǃgâ re Jehovab ge taena a dība dusa. ǂÂi re mati du ge ǃgâiba a hōsa, Elobmîs ǃnâ hâ mîmâidi hîna ge dīǀoaǀoahede xu. Aiǁgause, Jesub ge ge mîmâi ǁîb di Îb ûib ǃnâ da ǂhâhâ xūna nî mā dasa. (Mat. 6:32, 33) Jesub ge ǁapoǁapoba das tsîna ge hî. Jehovab ǃanu gagaba nî mādasa ǂgan da ga o. (Luk. 11:13) Jehovab ge ǁnā mîmâide ge dīǀoaǀoa. ǁNās khami du ge ǀkhara mîmâidi hînab ge, sadu ǃaroma a dīǀoaǀoadi xa a ǂâi ǁkhā. Aiǁgauseb ge ǁîba ge mîmâi, sadob ǀûba, ǁkhaeǂgao tsî gagasise nî ǂûmāsa. (Mat. 6:14; 24:45; 2Kor. 1:3) Elob ǀnai dība du hâ xūna du ga ǂâiǃgâ. O du ge sadu ǃâubasensa nî ǀgaiǀgai. Hānîǁaeb ǃnâb nî dība du xūn ǃgao.

16. Tae-i ǃaromas ǃâubasensa ǁnātikōse a ǀō-aisa ǀkhae?

¹⁶ Sada ǃâubasens ǀamo ûib dis ge, ǀō-aisa ǀkhaeb Eloba xu hâba. Mûǂui da ge ra hānî ǃgâi ǁaeba ǃoa, ǁnāb hîna nî ama iba. ǁÎb ge sada anker-i ase ra sîsen. Tsî ra huida î da ǃgomsigu ǃnâ mâǃkharu. ǃGôaǃgonhe da ga o mâǀgai tsî ǁōba ǃoa ǁkhā. Sada dana ǀgapas khamis tsînas ge ra sîsen. Tsî sida ǂâiǀgauga ra ǁkhauba, î da tsū xūna xu ǂgōsen tsî ǃgâi xūna dī. Sida ǃâubasens Elobmîs ai a ǃgaoǃgaosas ge Elob ǀgūse ra sī-ū da. Tsî ra ǁgauda matikōseb a ǀnam dasa. Sada ǃâubasensa da ga ǃgāsa tsî ǀgaisase ūhâ ǀgara, o da ge kai ǃgâiba ra hō.

17. Tae-i ǃaromas sada ǃâubasensa ǃgâiaǂgaoba ra māda?

¹⁷ “ǃÂubasens ǃnâ ǃgâiaǂgao” dib ge apostel Pauluba ra ǂkhâǃnâ. Sîǂkhanis hînab ge Romeǁîna ǃoa a xoas ǃnâ. (Rom. 12:12) Paulub ge ge ǃgâiaǂgao ǁkhā i. Tsîb ge ge ǂan i ǂgomǂgomsaseb ga hâ ǀgara, ob ǀamo ûiba ǀhommi ǃnâ nî hōsa. Sada tsîn ge sada ǃâubasens ǃnâ a ǃgâiaǂgao ǁkhā. Jehovab ǁîb di mîmâisa nî dīǀoaǀoa di da ra ǂgom amaga. Psalmdi xoa-aob ge ge xoa: “ǀKhaehe i ge hâ ǁnā khoe-i . . . ǃâubasens â-i ǃKhūb [Jehovab], ǁî-i Elob ai hâ-e, . . . ǀamose a ǂgomǂgomsaba.”—Psa. 146:5, 6.